KOM MI BETTE KIPKAL.
Reading edition
A haar tjent Jens Masen no halvanden Or, skjønt han er en Asen i og om hans Gord.
A maa pas hans Høwde, a maa ref hans Fyld; haar æ ett aa løw ve, saa faar a æ Skyld.
A haar gyd hans Ruesstok, a haar past hans Lamm, drøwen med hans Goesflok aa og i æ Damm.
Rejen med hans Følkloj, fløt en affentow, rend æ Gord si Møllboj, nær de anner sow.
Der haar ingen frej mæ, a haar hat æ stræng, skjønt æ Stoder stej mæ næjsten uden Peng.
—Kom mi bette Kipkal, kom mi bette Kwi! Hosbond han er hwipgal søn ved Awtensti.
Derfor maa du rapp dæ no mi bette gul; her haar a di Klaptræ, hwor haar do di Mul?
Bløw wor Hosbond hwipgal, det war ild aa spør; kom mi bette Kipkal med di løjen Ør!
13/8 1899.
[Footnote: Høwde, Kreaturer; ref hans Fyld, ribbe hans Fjer (Gaase- og Hønsefjer); haar æ ett, har det intet (= Kreaturerne); gyd hans Ruesstok, gjødet hans Roser; Rejen med hans Følkloj, redet med hans Plag; fløt en affentow, flyttet den af og til; Møllboj, Møllebod; frej mæ, fæsted mig; stej mæ, fæsted mig; Kwi, Kvie; hwipgal, hastig gal; gul, gule; Klaptræ, Bindsel; løjen, laadne.]