MACÍAS.

El gentil ninno Narciso, En una fuente gayado, De sy mismo enamorado, Muy esquiva muerte priso; Sennora de alegre riso É gracioso lindo brío, Á mirar fuente nin rio Non se atreva vuestro viso. Engannaron sotilmente Con ymaginacion loca, Fermosura y edat poca Al ninno bien paresciente. Estrella resplandesciente, Mirad bien estas dos vias, Pues beldat y pocos dias Cada qual en vos se siente. Prados, verduras et flores Otorgo que las miredes, Otrosí que escuchedes Dulçes canticas de amores. Mas por sol nin por calores Tal cobdicia non vos ciegue, Vuestra vista siempre niegue Las fuentes et sus dulçores.

Deseando vuestra vida, Áun vos dó otro conseio: Que non se mire en espeio Vuestra fas clara, garrida; Que sabed que la partida Sería dende tanto fuerte, Que non vos fuese la muerte De Narciso repetida.