Volume 6 / Part 2 — Pule no Hina.
Reading edition
O Hina hoi, Hina ukiuki,
O Hina hoi, Hina we’awe’a,
O Hina waianoa, la’i e i ka polikua kane,
Kani ae la Hina ha’ihala,
He akua kona i ka Nonomea. 5.
O ka wai e auau ai Hinakua,
Kani holo Hina i ke alanui,
He kaua huna na Peapea,
A i ole i hiki ka maia o ka wai e,
E ka wai e auau ai Hina makua! 10.
Iho mai Hina mai ka lani,
Kona alanui, o ka anuenue,
Kulukulu ka ua, ka pakapaka,
Ke ala a Hina i pii ai,
Kaukini Hina i ka hele one, 15.
Kani ae Hina i ke ahua,
He manini ka i’a e ai Hina,
Ua loaa e.
Kaumaha ia, kaumaha ia,
Ka papa i kai, ke koa panoa, 20.
Ka halelo, ka hee ku kohola, ka pe’ape’a,
Ka aalaihi, ka palani,
Kaa i ka onini he i’a paoa nui,
Na Hina ia i’a.
Kai-na mai i uka, unuhia mai i kaa walu 25.
Ka i’a Hina makua kala
Ai Hina i ka i’a makamaka maikai
Au e Hina e! Na Hina ka hoi ua i’a.
Kaumaha ia, kaumaha ia,
Ka papa i kai ka haku moana 30.
Ka lua kupua ka wai lua ono,
Kahakai o Hina, makai na ’ku ana,
Nana ia ’ku o Palaiuli, o Palaikea.
O Hina malailena, o Hina ai kanaka,
O ka Hina ia nona ka i’a, 35.
Hanaua mai he i’a e Hina e!
Na Hina ka hoi ua i’a.
Kaumaha ia, kaumaha ia,
Hookelekele ana Hina i kana i’a.
Maunu i ka makau o Hina makua kahi, 40.
Pa i ka ilikai o Hina makua lua,
Ai mai ka i’a a ke kupua, o Hina makua kolu,
Ka’ika’ina iluna o Hina makua ha,
Hoouka i ka waa o Hina makua lima.
Kuukuu ka alae na Hina, 45.
Kuu aku i lalo i manawai,
I ka wai puna, i ka wai kahe,
I ka wai auau no Hina,
Hamo ana i ka ili, nana i ka ula
I ka maikai, hoopau Hina i ona kino, 50.
Ua lele a manu, ua kau a lupe,
Pau ma koa’e, o Kane ka imua
O Hina ka i ka hope
O Hakiololo ka i muli mai ou e Hina.
Kau ka lupe, kolo ka alae a Hina la, 55.
Lele aku la.
O ka awa kanuia i ke kala o ka hale,
Ua kupu, ua lau, ua oo,
Kiina, hukia, lawea mai a,
O ha, o heea, i’a ku i ka apu, 60.
I’a inu, ku ia ia inu Lono, i’a inu Hina,
I ka umu hakoko, o ka awa hoi ane,
E Hina! E Hina! I ke kini,
E Hina i ka mano,
E Hina i ke kala, 65.
E Hina i ka weke,
Eia kau e kala o ka pu’u ma’i,
Eia kau e weke o ka pu’u make,
O ka pu’u ola kau e hoihoi mai.