Volume 6 / Part 2 — He Kanikau no Lono-opio.
Reading edition
Na Pelekaia.
Kuu kane o ka ua o ka wai hoi,
Kuu hoa o ka aina kai puhi i ka makani,
Kuu hoa pili i ke anu o ke kiuwailehua.
Kuu kane oka po o ke ao;
Kuu hoa nana makani koolauwahine, 5.
E kahea ana i Kulahuhu.
U i puakei, ka hoa ’loha, he kane,
Kuu hoa aloha i loko o ka Haku,
Kuu hoa lawe hana i loko o Kristo.
Kuu hoa i ka malu kukui o Koolau 10.
Kuu hoa i ka hala o Pooku
Kuu hoa i ka hau o Kaukaopua
Kuu hoa o ka limu pehu, limu one, ka
kanaka o Manuakepa
Kuu hoa alo ua ina one Ona
Kuu hoa o ke ala hapai i ka lima 15.
E hiki aku ai maua i Hoohila me kuu kane
Kuu hoa nana ’hi lele o Kamaile
Hala ka pali pau ka luuluu
Kuu kane i la wela o Mana
Kuu hoa i ka wai huna a ka paoo 20.
Kuu hoa i ke alia o Kalaalaau
Kuu hoa i ke one o Kalaihi
Kuu hoa i Kapiheakekua
Kuu hoa i ke ko eli o Halalii
Kuu kane mai ka malu o ka naulu o Kaali. 25.
Kuu hoa i ka wai ula, wai hiliahi o Waimea
Kuu hoa aloha i ka poli o Lehua
Kuu hoa i ka ua kapaahoa o Kahana
Kuu hoa pili i ke anu o ka mauna
He luna ae o Halemanu 30.
He lalo iho ko maua hale
He hale puka laau
Hale a ka manu i ako a oki
Na maua ia uka i noho me kuu kane
Kuu hoa o ka ia hoopa i ka ili o Pakaua i Pohakomo 35.
Kuu hoa ’loha i ka oihana kupaianaha a ka Haku
Kuu hoa imi i ka makemake o ka Haku
O ka makemake oia ko maua makamaka i noho ai maua i Luhi
Kuu hoa i ke kai o Palepalemoana
Kuu hoa i ka pali o Waahia, i Manawaohua i Wawaenohu, 40.
I ka lulu o Kaimaio,
Kuu hoa ’loha i ke ku moena
Hapapa o Keawanui.
Na Lono no i nai kaua ia ka moku,
I nai kaua ia no, e ka lani! 45.
Na ka lani ka hee o ka aina,
Hee kou aina ko ka mea make,
Mea make oe lilo i ka hanau mua,
Hanau mai ka lani i Holoholoku.
Honolulu, Oahu, June 16, 1837.