Volume 6 / Part 2 — Mele Ahiahi.
Reading edition
Lawe Lehua i ka la, kapu ke ahiahi.
E maa ka mumu, ka wawa, ka nei—e!
Kupina—i!
E kau aku ana hoi ka la, e ko mai ana;
Ke ahiahi hoanoano, hoomehameha. 5.
Hooihiihi, e ihi kihi ka le—o!
E hamau ka leo, e kapu!
Eia ke ano la, he ahiahi wale;
He iu kapu no ka lani e pee ana,
E kauolo lupe ana, ke luluhi nei—e, 10.
E kapu e, he ahiahi!
Kapu i ke ahiahi ihiihi, maa ka leo;
E kapu ka leo, ka walaau,
Ka nunu, ka ne ua la,
Ka ua ne ua la o ke ahiahi, 15.
Ka ulu-haka i ka po o Hakalani,
O ka pohaka o ke Kekaupea.
No Kihi ka po no ka hookeekee,
O ke kihi ahiahi kapu no hoi,
No Kealohi, no ke Kekaupea ke ’lii. 20.
Nona ke ahiahi—, e kapu—e—, e ahiahi!
He ahiahi kapu no Kawelo.
I holoholo ’ku iloko Wailuanui-a-hoano.
E hiamoe ana i moemoe a Kuhe.
Ilaila ka paluhi newalani i ka hiamoe. 25.
O ka huki kau kama ka ihi kama hoohia ka lani.
O ke ahiahi o Mahuna Kaioe.
O ka maka o Kuawalu-pau-ka-moku,
Ke ’lii nona ke ahiahi e; e kapu e, he ahiahi kapu o!
He ahiahi kapu no Kuihewa 30.
I Kukaniloko, i Lihue, ilaila ka pa awaawahia o ke kapu,
O ko Kuihewa awahia i malania.
O Kuihewa, Kakuihewa, Kuihewa o ka ua-ua-pena,
O ko lakou ahiahi i Lihu—e,
No Luaia, no Luanuimahao ke ’lii nona ke ahiahi. 35.
E kapu e! he ahiahi!
Kaha aui, newa ka la, ua ahiahi.
Ke kahakaha ka la, hele ua, kaha ka la i Manuahi.
Aia i ka haaluapou lawe aku la Lehua i ka la,
Aka ku la i ke poo ke kai uli, 40.
Hele aku la kanakaloa o ka la,
Hoi mai la ka poli o malumalu akua.
Ke ku mai la ka pahu o ke anoano—e;
Ano paha Kahiki—e,
Anoano aku la Kahiki, ua ahiahi. 45.
Kauliakea ke ahiahi ia Hoohokukalani;
He ahiahi ko ia ’na liliu,
He liu na la, he aui po, ke kului po, aumoe po,
He po ahiahi ae no ka lani kiu hoihoi mai ana.
E kapu ko lalo honua i ke ’lii, 50.
He ahiahi ka i kona nui, kona he apu.
I ke kona nui niho amo
Ia koluna ke ahiahi, he ahiahi kapu no Akea,
No Akea kahiko ke ahiahi.
E Ku, E Lono, E Kane,—he ahiahi—e; 55.
Kuu aku ka luhi, ua ahiahi;
He ahiahi kapu no Kekuaiwa, no Kauhola.
No ka ia hi’u loloa, ka ewaewa loloa iloko ka wai,
O Kiha-nui-lulu-moku, no Liloa ia ahiahi,
No ke kanaka luu wai manawa wai, 60.
Kiai wai kahawai okoa no.
A ka waiho hoi aku ke kamakama,
He kapu ka au ’lii, he wela ke kamani,
He laa ka hala, ka nioi kupu i Paakalana.
Aohe wahi manalo Waipio. 65.
Ke hahai aku la ka po i Haena.
Ke alualu aku la kau i ka pali,
Kiko aku la i ke poo Halaawiki,
Ko mai la ke ano, ke ano ke ahiahi—e.
Kuu aku ka luhi, ua ahiahi. 70.
He ahiahi kuluikului nei,
Kuluikului kahi ana po;
Ka po, ka po ia malio,
Malio, malio i ke aumoe,
Kaa momoe lea i ka apana, 75.
I ke poo Hawaii-ku.
E kani Hawaii ia’u!
Ka hiamoe i Kahiki-nui-kai-akea,
Ilaila anaina moku ai ka lani,
E lua lai alo moku ai i luakini 80.
Ka lani ma; ka lani ma i Hanalaa,
E holoi ai kai o Kahiki-ku,
E auau ai ke kai kupio—e,
Ke au, ka moana kahinia ia Lono.
E Lono—e, he pihe moku nei, 85.
He laka au eia ma Kahiki-ku.
E ku! kuua ka luhi, lomia ka o-pa.
Kuua ka luhi; he halauloa Hawaii:
Moea oe i Hawaii-nui-akea.
He luluhia lani mau honua i mau kului. 90.
He hiamoe ahiahi no ka lani ma,
E Ku, e Lono, e Kane, ko ahiahi—e.
Kuu aku ka luhi, ua ahiahi.