II.—VIOLA.[1] (Versione raccolta in Pomigliano d'Arco)

II.—VIOLA.[1] (Versione raccolta in Pomigliano d'Arco)

Nce stevane 'na vota tre figliole; e l'urtima 'e cheste[2] ssi chiammava Viola. Tutte e tre faticavane; ma 'a primma filava, 'a siconda tesseva e 'a terza cuseva. 'O figlio d' 'o Re sse n'annammurava; e sempe, che passava, receva:—«Quanto è bella chella, che fila; | quanto è cchiù bella chella, che tesse; | ma quanto è cchiù bella chella, che cose; | mme cose 'sto core, | ebbiva Viola, | ebbiva Viola».—'E sore n'avevane 'mmiria[3]; e pe' dispietto 'a mettettere a filà'. Passava 'o figlio d' 'o Re e recette:—«Quanto è bella chella, che tesse; | quanto è cchiù bella chella, che cose; | ma quanto è cchiù bella chella, che fila: | mme fila 'sto core, | ebbiva Viola, | ebbiva Viola.»—'E sore 'a mettettere a tessere; ma 'o figlio d' 'o Re pure accussì deceva e sempe cu' Biola aveva:[4]—«Quanto è bella chella, che cose; | quanto è cchiù bella chella, che fila; | ma quanto è cchiù bella chella, che tesse; | me tesse 'stu core; | ebbiva Viola; | ebbiva Viola!»—'Nu juorno, Viola steva a còsere fora 'ô barcone.[5] Le carette 'o ditale[6] 'rint'a 'o giardino 'e l'Uorco.[7] Piglia e 'o dicette 'ê sore. Cheste, ca nun 'a putevene verè', le respunnettere, ca non ssi fosse pigliate collera, pecchè isse 'a 'ttaccavane vicino a 'na fune e 'a scennevane rint'a 'o giardino abbascio, e po' doppo n' 'a facevane saglì' 'n'auta vota. Viola ss' 'o crirette. Ma 'e sore nu' facettero accussì; pecchè, doppo averla fatta scennere llà, spezzarene 'a fune e ssi nn'iettere. 'A povera Viola, truvannese llà, non sapeva iessa stessa, che cosa aveva da fà'; penzava buono 'e ssi mettere sotto 'â seggia 'e l'Uorco. Passato 'nu poch' 'e tiempo, l'Uorco ss'assetta[8]; e, mente steva accussì, facette 'nu pirete.[9] Piglia Viola, esce 'a llà sotto e dice:—«Salute, papà.»—L'Uorco sse vutave e decette:—«Uh 'maramè![10] cu' 'nu pirete haggio fatto 'na figlia!»—S' 'a purtava 'ngoppa e ss' 'a teneva cu' isso[11]. 'Nu juorno, Viola sse steva lavenne[12] 'a faccia, piglia 'o pappavallo d' 'o Re (pecchè 'o Re rimpetto a l'Uorco steva 'e casa) le recette:—«Sciù, sciù![13] 'A figlia 'e l'Uorco sse lava 'a faccia!»—Chesta sse ne trasette tutta 'ngullarata.[14] L'Uorco l'addimannava 'a raggione r' 'o pecchè[15] steva accussì. Jessa lo decette; e l'Uorco le 'mmiziava[16], ca 'n' auta vota ca 'o pappavallo le receva accussì avesse resposto:—«Statti zitto, pappavallo! | 'Sti toje penne ni faccio 'nu mazzo; | sti toje gambe ne faccio bastone; | ed i' sarraggio[17] moglie del tuo padrone.[18]»—L'auta matina,[19] Viola sse va a lavà' 'a faccia. 'O pappavallo le rice pure accussì:—«Sciù, sciù, 'a figlia 'e l'Uorco sse lava 'a faccia».—Jessa allora responnette comma l'aveva ditto l'Uorco:—«Statte zitto, pappavallo. | 'Sti toi penne ne faccio 'nu mazzo; | 'sti toie gambe ne faccio bastone; | ed i' sarraggio moglie del tuo padrone.»—Piglia 'o pappavallo, tanto d' 'a collera murette. 'O Re, truvannelo muorto, n'accattava[20] 'n auto. Ma chisto pure, quanno fui[21] 'a matina, ca Viola ssi iette a lavà 'a faccia, le recette:—«Sciù, sciù! 'A figlia 'e l'Uorco sse lava 'a faccia.»—Chesta povera figliola, appena 'o sintette, le respunnette 'e stesse parole, ch'aveva ritte 'ô primmo; e accussì tanno pi' tanno[22] murette pure 'o secondo. 'O servo d' 'o Re allora, comme verette ca 'o padrone ssujo aveva accattato 'nu terzo pappavallo, sse vulette mettere 'n guardia, pe' berè' chi era, ca 'o faceva murì'. E, quanno fui l'auta matina, 'o servo sentette, ca 'o pappavallo recette:—«Sciù, sciù! 'A figlia 'e l'Uorco sse lava 'a faccia;»—e ca Viola respunnette:—«Statti zitto, pappavallo; | 'sti toi penne ne faccio 'nu mazzo; | 'sti toi gambe ne faccio bastone; | ed i' sarraggio moglie del tuo padrone.»—E verenne, ca 'o pappavallo murette llà pe' llà, 'o ghiette a dicere 'ô figlio d' 'o Re. 'O figlio d' 'o Re le mannava a dicere, ca isso veramente ss' 'a vuleva spusà'; e, ch'avesse spiato a l'Uorco, che nce voleva pe' sse marità' iessa. Viola 'o spiava. L'Uorco primma no' nce 'o vuleva dì'; ma doppo ave' veruto tanta promessa ca 'a figlia le facette, respunnette:—«Tu 'o buò' sapè'? embè, pe' te maretà' tu, aggi' a murì' i'.»—Viola 'o dicette 'ô figlio d' 'o Re; e chisto respunnette, ca l'avesse spiato, che nce vuleva p'accirere a isso. Jessa puntualmente nce l'addimannava. Ma l'Uorco da primma le riceva:—«Tu 'o buò' sapè' pe' mm'accirere. Mo'[23] non è vero cchiù, ca mme vuò' bene. Vuò' fà' murì' a mme; e pecchè po' chesto?»—Ma doppo, verenne, ca Viola le prumitteva ca iessa 'o vuleva bene, ca 'o buleva sapè' pe' 'na cosa, l'Uorco ricette:—«Pe' mm'accirere a mme, ss'ha da i'[24] a tale e a tale parte. Llà nce sta 'nu puorcospino. Chillo, quanno sta cu' l'uocchie apierte, dorme; e quanno sta cu' l'uocchie 'nghiuse, stà 'scetate.[25] E quanno rorme ss'accire; ssi piglia chill'uovo, che tene 'nguorpo, mme sse sbatte 'nfronte, e i' moro.»[26]—'A femmina subbito 'o dicette 'ô figlio d' 'o Re, E chisto, llà pe' llà, spedisce 'nu servo; fa accirere chillo puorco e ssi fa purtà' l'uovo. 'O facette sbattere 'nfronte a l'Uorco mentre isso rurmeva e ssi spusava 'a figlia.