VII.—'A MUZZELLA[1]

VII.—'A MUZZELLA[1]

Nce steva 'na vota 'na mamma; e teneva 'na figlia, ca era muzzella.[2] 'Nu giovane ss'annammurave 'e chesta e ss' 'a vuleva spusà'. 'A mamma le recette:—«I' t' 'a ronghe[3], ma chesta sse piglia scuorne[4] 'e parlà'.»—'O giovane respunnette:—«Nu' 'mporte.»—Pecchè isso sse faceva 'ncapo[5], ca roppo pigliata 'a faceva parlà'. Ss' 'a spusava, ma chesta nu' buleva ricere nisciuna parola. 'O povero marite sse verette perze. Jette addo' 'nu cumbare ssujo e li facette cunuscere, come isso tineva 'na mugliera, ca nu' parlava mai. 'O cumbare decette:—«Sê'[6] cu buò' fà'? Falle 'nu pare 'e scarpe strette strette. Chell'ha da ricere: Tu che mm' hê fatto? E bire, ca parla».—'O marite accussì facette; ma 'a mugliera manco vulette parlà'. Jette 'n'auta vota a d' 'o cumbare a cercarlo 'nu sicondo cunziglio; e chisto le recette:—«Falle 'na vesta corta corta; e biri iessa, che fa».—Chillu pover'omme nce 'a facette, ma 'a mugliera manco vulette parlà'. Jette 'n'auta vota a d' 'o cumpare. Chillo cumpare, sapenne chesto, cunzigliava 'o marito 'e sse mittere arret' 'a porta: ammeno, quanno chella traseva, isso le faceva fa' 'na paura; e accussì 'a mugliera aveva ricere:—«Mamma mmia!»—Ma manco ne recavava niente, pecchè 'a femmena manche vulette parlà'. Chillo marite jette 'n'auta vota a d' 'o cumbare e chisto le recette:—«'N'urdema cosa te rummane 'a fà'. Fa berè', ca si' muorto; pecchè chella t'ha da chiagnere[7] e accussì 'a siente parlà'.»—Na matina, 'o marite sse mettette 'ngoppa 'ô lietto; e faceva abberè', ca era muorto. 'A mugliera ss' 'o crerette e sse mettette a chiagnere:—«Malite mmio, malite! 'a cappa tetta tetta, 'a vunnelluccia cotta cotta, 'a paula allete 'a potta; malite mmio, malite mmio, comm 'hagge 'a fà'?[8]»—'O marito allora sse sussette e decette:—«Ah tu pe' chesse nu' bulive parlà', pecchè eri muzzella? 'N'auta vota, ca nu' parli, te facce abberè' i'».—E de chesta manera 'o marite sentette parlà' 'a mugliera.