IX.—MICCO[1] (Versione raccolta in Pomigliano d'Arco.)
Reading edition
IX.—MICCO[1] (Versione raccolta in Pomigliano d'Arco.)
'Na vota nce steva 'na mamma e teneva 'nu figlio, ca sse chiammava Micco.[2] 'Nu juorne aveva cuotte 'e maccarune[3]; e decette vecino 'ô figlio:—«Va fora a fa' 'nu fasce d'evra».—Micco nu'nce vuleva ì', pecchè sse vuleva mangià' primma 'e maccarune. Ma 'a mamma le prummittette, ca nc' 'e stipava; e accussì 'o figlio jette a fà' l'evra. 'A mamma, verenne, ca Micco nu' turnava cchiù, mangiava, e sse scurdava 'e rummanè' 'a porzione 'ô figlio. All'urdemo sse nn'allicurdava. Jette a 'bberè' rinto 'â caurara[4] e ne truvava 'nu filo. 'O rignette 'e caso e broro; e, quanno vinette 'o figlio, lo vuleva fà' mangià'. Chisto sse mettette a chiagnere, pecchè erane poche; e 'a mamma sse vutava e decette:—«Mazza, vatte a Micco, ca nu' nze vo' mangià' 'o maccarone».—'A mazza nu' nze ne 'ncarrecava. 'A mamma sse vutava e decette:—«Fuoche, arde 'a mazza; pecchè 'a mazza nun bo' vattere a Micco e Micco nu' nze vo' mangià 'o maccarone».—'O fuoche non sse ne 'ncarrecava. 'A mamma sse vutava e decette:—«Acqua, stuta[5] 'o fuoche; ca 'o fuoche nun bo' ardere 'a mazza, 'a mazza nun bo' vattere a Micco e Micco nu' nze vo' mangià' 'o maccarone».—Chesta nu' nze ne 'ncarrecava. 'A mamma sse vutava e decette:—«Voje,[6] vìvete[7] l'acqua; ca l'acqua nun bo' stutà' 'o fuoche, 'o fuoche nun bo' ardere 'a mazza, 'a mazza nun bo' vattere a Micco e Micco nu' nze vo' mangià' 'o maccarone».—'O voje nu' nze ne 'ncarrecava. 'A mamma sse votava e decette:—«Fune, attacca 'o voje; ca 'o voje nu' nze vo' vevere l'acqua, l'acqua nu' bo' stutà' 'o fuoche, 'o fuoche nun bo' ardere 'a mazza, 'a mazza nun bo' vattere a Micco e Micco nu' nze vo' mangià' 'o maccarone».—'A fune nu' nze ne 'ncarrecava. 'A mamma sse vutava e decette:—«Sorece, rosec' 'a fune; ca 'a fune nun bo' attaccà' 'ô Voje, 'o Voje nun sse vo' vevere l' acqua, l' acqua nun bo' stutà' 'o fuoche, 'o fuoche nun bo' ardere 'a mazza, 'a mazza nun bo' vattere a Micco e Micco nu' nze vo' mangià' 'o maccarone».—'O sòrece non sse ne 'ncarrecava. 'A mamma sse vutava e decette:—«'Atta, mangiate 'o sorece; ca 'o sorece nun bo' rusecà' 'a fune, 'a fune nun bo' attaccà' 'o voje, 'o voje nun bo' vevere l'acqua, l'acqua nun bo' stutà' 'o fuoco, 'o fuoco nun bo' ardere 'a mazza, 'a mazza nun bo' vattere a Micco e Micco nu' nze vo' mangià' 'o maccarone».—Accussì a 'atta sse mangiava 'o sorece, chisto rusecava 'a fune, 'a fune attaccava 'o voje, 'o voje sse vevette l'acqua, l'acqua stutava 'o fuoche, 'o fuoche ardette 'a mazza, 'a mazza vattette a Micco e Micco sse mangiava 'o maccarone.