XII.—'A VICCHIARELLA[1] (Versione raccolta a Pomigliano d'Arco.)
Reading edition
XII.—'A VICCHIARELLA[1] (Versione raccolta a Pomigliano d'Arco.)
'Na vota nce steva 'na vicchiarella. Jette a scupà' 'a chisiella, truvava 'nu turnesiello. Rice:—«I' mo' che mm'accatto? Si mm' accatto 'e sciuscelle[2] hagge a jittà' 'e sciuscielle. Si mm' accatto 'e pastenache,[3] hagge a jittà' 'o struppone. Si mm'accatto 'e castagne, hagge a jittà' 'e scorze. Mo'mm'accatto 'nu turnese 'e farina; e[4] mme faccio 'a farenata».—Tirava 'nu cato r'acqua; 'o miscava cu' chillu turnese 'e farina e facette 'a farenata. 'O mettette rinto 'e piatte, 'ngoppa 'â buffetta[5]; e ghiette 'n'auta vota 'â chiesa: e ssi scurdava 'a fenestella aperta[6]. Passava 'na morra 'e crape. Una 'e chesse sentette addore r' 'a farenata, sse menavo pe' dinto 'â fenestella, trasette rinto 'a casa e sse mangiava 'â farenata. Venette zi' vicchiarella, iette p'aprì' 'a porta e nu' putette, pecchè steva 'a crapa arrete. Piglia 'a povera zì' vicchiarella, rummanette 'mbocca 'â casa; e chiagneva chiagneva. Passava 'na morra[7] 'e ciucce.—«Zi' vicchiarè', che fai lloco?»—«Sta 'a crapa rint' 'â casa mmia».—«Statte zitto, ca mo' la faccio ascì' i'».—Sagliette 'ngoppa.—«Tuppo tuppo».—«Chi è lloco?»—«Songh' 'o ciucce».—«E i' songh' 'a crapa | cu' tre corna 'ncapa; | cu' trei 'â trippa | si non fui ti strippo».—'O ciucce sse ne fuiette. Passava 'na morra 'e cane:—«Zi' vicchiarè', che fai lloco?»—«Sta 'a crapa rint' 'â casa mmia».—«Statte zitta, ca mo' t' 'a faccio ascì' i'».—Sagliette 'ngoppa e—«tup, tup».—«Chi è lloco?»—«Songh' 'o cane».—«E i' songh' 'a crapa, | cu' tre corna 'ncapa; | cu trei 'â trippa; | si non fuje, mo' te strippo».—'O cane avette a car'e grazie 'e fuì'. Passava 'na morra 'e pecure:—«Zi' vicchiarè', pecchè chiagne fora 'â porta?»—«Stà 'a crapa rint' 'â casa mmia».—«Mo' t' 'a faccio ascì' i'».—Sagliette 'ngoppa.—«Tup, tup!»—«Chi è?»—«Songh' 'a pecura».—«E i' songh' 'a crapa | cu' tre corna 'ncapa; | cu' trei 'â trippa; | si non fuje, mo' te strippa».—'A pecura sse ne fuiette. Passava 'na morra 'e surece; e uno 'e chiste, verenne a zi' vicchiarella chiagnere, le recette:—«Zi' vicchiarè', che fai lloco?»—«Sta 'a crapa rint' 'â casa mmia».—«Uh! tutto chesto iera? Statte zitta, ca mo' t' 'a facce ascì i'!»—«Ebbiva! No' mm' hà potuto fà' ascì' 'o ciucce, nu' 'o cane, nu' 'a pecura; mo' mm' 'a fai ascì' tu!»—Surecillo sagliette 'ngoppa. Tuppetiava[8] 'â porta. Respunnette 'a crapa:—«Chi è lloco?»—Songh' 'o surecille».—«E i' songh' 'a crapa | cu' tre corna 'ncapa, | cu' trei â trippa; | si non fui, mo' te strippa».—Recette 'o sorece:—«E i' songhe combà' sorecille, c' 'o cuolle stuorte; si nun fuie, mo' te ceche l'uocchie».—'A crapa subbeto fuiette. E accussì zi' vicchiarella trasette rint' a 'a casa 'nziemma cu' cumbà' surecillo. Sse spusavane e sse stettere 'nzieme tutti e dui.