V. L'AUCIELLO CRIFONE[1] (Versione raccolta in Pomigliano d'Arco)
Reading edition
V. L'AUCIELLO CRIFONE[1] (Versione raccolta in Pomigliano d'Arco)
'Na vota nce steva 'nu Re e teneva tre figlie. A isso le venette 'o male a l'uocchie.[2] Chiammava 'o mièreche; e chisto le recette, ca (pe' sse sanà) 'nce vuleva 'na penna d'auciello crifone.[3] 'O Re decette vecino 'e figlie:—«Chi mme trova sta penna, i' nce rongo 'a curona.».—'E figlie sse mettettere 'ncammino. 'O cchiù peccerillo scuntava 'nu viecchio, ca l'addimmannava, isso che ghieva facenne. E chisto le respunnette:—«Sta malato papà'.[4] Pe' sanarlo nce vo' 'na penna d'auciello crifone. E papà ha ditto, ca chi trova 'a penna have 'a curona ssoja».—'O viecchio recette:—«Embè', tecchete[5] 'stu graurinio.[6] Quanno sì a tala parte, mittele rinto 'ô cappiello. Chille venene l'aucielle a mangià'. Tu 'ngappe chillo, ca sta 'mmiezo; le tiri 'na penna e 'a puorte a papà».—'O giovane accossì facette; e, pe' paura 'e non ss' 'a fà' luvà' a nisciune, 'a mettette rinto 'â scarpa; e tutt'allegro ieva a d' 'o patre, pe' nce 'a purtà'. Via facenne, scuntava 'e frate suoi, ca le spiavano, si aveva truvata 'a penna. Chisto respunnette, ca no: ma 'e fràte nun 'o crerettere e 'o vulettere scùrere.[7] Vedettere pe' tutte 'e parte e non 'a truvarene. Po' le jettere a berè' rint' 'â scarpa e ss' 'a pigliarene. Accerettere 'ô frate peccerillo; 'o 'tterrarene; e purtarene 'a penna 'ô patre, decenne, ca loro l' avevane truvata. E 'o Re sse sanava l' uocchie. 'Nu pecurare, ca jeva pascenne 'e pecure, 'nu juorno, verenne, ca 'o cane ssujo scavava sempe 'ô stesso pizzo, jette a berè' chi era, e truvava 'n uosso. Ss' 'o mettette 'mmocca; e berette, ca chillo sunava e deceva:—«Pecuraro, ca mme tiene 'mmocca, | tieneme strinto e non mme lascià'! | Pe' 'na penna d'auciello crifone, | e fratemo[8] è stato 'nu traritore; | e fratemo è stato 'nu traritore[9]».—'Na vota, 'o pecoraro, cu' 'sto siscaro[10] 'mmocca, passava pe' sotto 'â casa d' 'o Re. Chisto 'o sentette; e 'o chiammava, pe' berè' chi era. 'O pecuraro le raccuntava 'a storia e comme isso l' aveva truvate. 'O Re ss' 'o mettette 'mmocca; e 'o siscaro deceva:—«Tata, tata, ca 'mmocca mme tiene, | tieneme strinto e non mme lascià'. | Pe' 'na penna d' auciello crifone, | fratemo è stato 'nu traritore; | e fratemo è stato 'nu traritore».—'O Re 'o rette 'mmocca a chillo frate; ca l'aveva accise; e chisto deceva:—«Frate frate, ca 'mmocca mme tiene, | tieneme strinto e non mme lascià'. | Pe' 'na penna d'auciello crifone, | tu sì' stato 'nu traritore; | e tu si' stato 'nu traritore.»—'O Re allora capette tutta 'a storia e facette accirere pure chill' aute figlie. E accussì chiste accirettere 'o frate e roppo furone accise pure loro.