II ter. RE TRE SORELLE. Variante di Viola Raccolta in Montella, nel Principato Ulteriore

'Na vota a 'no pajese nge stevano tre sorelle belle, ma una era cchiù bella. Ogni ghiuorno queste ssi mittievano 'ngimma a la loggia: una filava, 'n'ata tissia, e la bella cosìa. Re questa bella sse ne 'nammoravo 'no giovene. Quisto, sempe chi passava, ricìa:—«È bella quera, chi fila; è bella quera, chi tesse; ma quera, chi cose, è cchiù bella re tutte».—Re sore sentiero questo. Quera, chi cosìa, la mittiero a tesse', pe' berè', si lo giovene ricìa, ca puro quera era bella. Quanno fu lo juorno r'appriesso, passavo lo giovene e decette:—«È bella quera, chi fila; è bella quera, chi cose; ma quera, chi tesse, è cchiù bella re tutte».—Re sore, corrivate, la mettiero a filà': pe' berè, si ricìa puro accossì lo giovene. Quanno fu lo juorno r'appriesso, passavo lo giovene; e decette:—«È bella quera, chi cose; è bella quera, chi tesse; ma quanto è cchiù bella quera, chi fila!»—Re sore tanto chi si corrivaro, la pigliaro la bella e la menaro 'rinto a 'no sottano, chi 'rinto a 'sto sottano nge abbitava l'Uorco e l'Orca. L'Uorco e l'Orca no' ng' erano. Jessa ssi mettette sotto a 'na boffetta. Jette l'Orca e decette:—«Uh che puzza re cristiano[1]! Addov'è? mme lo voglio mangià'.»—La giovene responnette tutta tremanno, e decette:—«Ziè O', pe' l'amore re dio, no' mmi mancià'! Io so' 'na povera figliola sbenturata!»—Li contavo lo cunto, ca re sore, pe' 'mmiria, ca lo 'nnammorato li ricìa, ca era bella, l'avievano menata abbascio a la casa. L'Orca n'avette compassione e non sse la mangiavo. Decette:—«Figlia mmia, sa' che buo' fà', pe' non ti fà' mangià' a l'Uorco, quanno vene? Mittiti sotto a quesa boffetta. Po' iddro vene, e dice: Uh che puzza re cristiano! Io li rico ca non è lo vero. Iddro ssi zezza e quanno ss'è zezzato, tu mano catamano[2], ti mitti citto citto sott' a la seggia. Quanno iddro face 'no pirito, tu allucca[3]: tata! tata! Quiro sente accossì e non ti face nienti».—Accossì facette la figliola. Ss'annaccovavo. Ssi ritiravo l'Uorco e decette:—«Uh che puzza re cristiano! addov'è? mme lo voglio mangià'.»—«No' ng' è nienti»—decette l'Orca. L'Uorco ssi zezzavo, e facette 'no pirito. La guagliotta[4] alluccavo:—«Uh tata! Uh tata!»—L'Uorco tutto prejato[5] decette:—«Pe' 'no pirito haggio fatta 'na figlia!»—Sse la pigliavo e l' allisciavo; e ricia:—«Gio' re tata, quanto sì' bella; tata ti vole bene a te.»—'No juorno passavo pe' 'nnanzi a la casa re l'Uorco lo 'nnammorato re quera figliola. Quanno la verette, decette:—«E tu, come ti truovi lloco[6]?».—Jessa li contavo lo cunto, ca re sore l'avievano menata dra[7], ca isso li ricìa, ca ieddra era cchiù bella. Lo giovene le decette:—«Tu sa, che buo' fà'? Quanno vene l'Uorco, li rici: Ta', 'assammi ti cercà' 'no picca 'ncapo[8]. E tramente lo circhi, l'addommanni: Ta', lo gliuommiro[9], che birtù tene? lo pettene, che birtù tene? e lo fuso, che birtù tene?»—«Sine»—recette iessa. Lo giovene sse ne iette. Ssi ritiravo l'Uorco. Jessa decette;—Tà', ti vuò' fa' cercà' 'no picca 'ncapo?»—«Si»—decette l'Uorco. Tramente lo stia cercanno, iessa l'addommannavo:—«Tà', lo pettene, che birtù tene?»—«Gio' re tata, tene la vertù, che, quanno rici: Pettene, pè la tuia forza, chi tieni, fa arreventà' 'sta campagna tutta ponte re spate.»—E lo gliuommiro?»—decette iessa.—«Gio' re tata, lo gliuommiro tene la virtù re fa' deventà' 'na campagna uno Sele[10], quanno rici: Gliuommiro, pe' la virtù, chi tieni, fa arreventà' 'sta campagna Sele.»—«E lo fuso?»—decette iessa. Isso decette:—«Gio're tata, lo fuso tene la virtù re fa' arreventà' 'na montagna re sapone.»—Quanno fu lo juorno r'appriesso, passa lo 'nnammorato re la figliola. Verette la figliola. L'addommannavo:—«Chi ng' è'?»—«Nisciuno»—dicette iessa—«so' ghiuti a buscà' coccosa.»—«E l'haje 'ddummannato quero ti dicietti?»—«Si»—decette jessa.—«Embè', pigliati quero, chi t'ha' ra piglià' e ghiammongenne.»—Ssi pigliavo lo pettene, lo gliuommiro e lo fuso e sse ne iero. Ssi ritiravo l'Uorco e l'Orca e no' nge trovaro la figliola. Sdignati li curriero appriesso, e r'avievano quasi arrivati. Loro pigliaro lo pettene, e diciero: Pettene, pe' la tuia virtù, che tieni, fa arreventà' 'sta campagna tutta ponta re spate. Ma l'Uorco e l'Orca tanto 'nzaccaro, 'nfì' che passaro tutte quere ponte. Loro viriero, ca r'avievano quasi approssimati; pigliaro lo gliuommiro e diciero: Gliuommiro, pe' la virtù, chi tieni, fa arreventà' 'sta campagna 'no Sele. E assette lo Sele. L'Uorco e l'Orca tanto faciero, 'nfì' che passaro lo Sele. Loro viriero, ca li currievano appresso; pigliaro lo fuso e diciero: Fuso, pe' la virtù, chi tieni, fa assì' 'na montagna re sapone. E assette 'na montagna re sapone. L'Uorco e l'Orca arrivaro a 'no certo punto e scucolavano; tanta botte pigliaro, 'nfì' che moriero[11]. Lo giovene ssi sposavo la figliola e menaro 'na vita felice.