XI ter. CUNTV DELLA FURMICULICCHIA[1] (Variante di 'A vecchiarella) (Raccolta a Novoli, in Terra d'Otranto)
Reading edition
XI ter. CUNTV DELLA FURMICULICCHIA[1] (Variante di 'A vecchiarella) (Raccolta a Novoli, in Terra d'Otranto)
Era 'na fiata 'na cummare furmiculicchia; e sta scupa 'a casa e truau tre caddhi e subbetu dicìu:—«Ce mme nde 'ccattu? ce mme nde 'ccattu? Mme nde 'ccattu cupeta? No, ca mme chiammanu cannaruta. Mme nde 'ccattu nuci? No, ca 'mbugu casa. Mme nde 'ccattu zaareddhe[2]? Sì, sì, ca mme paru e mme 'mmaritu».—Sse 'ccattau le zaareddhe e sse 'nfaccìu alla fenèscia. Passau lu cumpare cane e ni diciu:—«Furmiculicchia mmia, ca t'ha' parata mutu».—Respuse:—«Ca mm'haggiu 'mmaretare».—«'Uei mmie pe' maritu?»—E iddha diciu:—«Comu faci la notte?»—«Bau, bau!»—«No, no, ca mme faci 'mpaurare!»—Doppu passau lu cumpare ciucciu e ni disse:—«Cummare furmiculicchia mmia, ca t'ha' parata mutu».—«Ca mm'haggiu 'mmaretare».—«'Uei mmie pe' maritu?»—«Comu faci la notte?»—«Huo! Huo!»—«No, no, ca mme faci 'mpaurare».—Passau lu surcicchiu e ni disse:—«Furmiculicchia mmia, ca t'ha' parata mutu».—«Ca mm'haggiu 'mmaretare».—«'Uei a mmie pe' maritu?»—«E comu faci la notte?»—«Cih! cih!»—«Sì, sì!»—Spusara la dumineca matina. La furmiculicchia hia pusta la carne cu la coca, quandu sunau missa; e 'sciu a la Chiesia cu ss' ha biscia missa; e restau lu surcicchiu cu bota la carne. Quando la sta buta, cadiu intra a lu pignatieddhu. Turnau de missa la furmiculicchia e 'ccumenzau chiammare lu surcicchiu:—«Surcicchiu mmiu, surcicchiu mmiu, 'ndu' sinti? no te trou».—Quandu 'sciu biscia la carne e bidde lu surcicchiu 'ntra lu pignatieddhu muertu, tandu 'ccumenzau a chiangere e 'retare:—«Surcicchiu mmiu, surcicchiu cadutu a pignaticchiu, suppatu a la pezzuddha, e precatu a l'imbrecicchiu».—'Scìu e lu precau. E lu cuntu nu' foi cchiùi. Sia benedittu diu e tutti nui.
Cinga l' ha cuntatu
'Nu piattu de muscatu;
Cinga l' ha 'ntisu,
'Nu piattu de 'ranurisu;
Cinga l' ha spiatu
'Nu cuccalu de muertu 'ndelessatu.[3]