VI.—VILLA[1] (Versione raccolta in Pomigliano d'Arco)
Reading edition
VI.—VILLA[1] (Versione raccolta in Pomigliano d'Arco)
'Na vota nce steva 'nu Re; e facette 'o patto cu' tutte 'e cavaliere ssuoje ca nisciuno ss'aveva 'nzurà'.[2] 'Nu juorno, 'nu cavaliere verette 'na giovane 'ngoppa a 'nu barcone e sse n'annammurava. 'O decette 'ô padre e ss' 'a spusave annascuso d' 'o Re.[3] O' Re però 'o sapette, e, 'nu juorno, mente chillo cavaliere 'nzurato era asciute, isso iette a casa ssoja a berè' 'a mugliera, pecchè le decevano, ca chella era tanta bella. 'A truvave addurmuta. 'A verette e le piacette. E nu' nze cuntentave sulamente d' 'a tenè' mente,[4] ma 'a vulette pure tuccà'; e pe' fa chesto, sse luvave 'o vuanto;[5] e quanno sse ne iette, ss' 'o scurdave 'ngoppa 'ô tavuline a fianco 'ô lietto. Venette chillu cavaliere e sse pigliava tanta collera, ca, quanno fuie 'a matina e 'a mugliere 'o jette a scuntà', comme faceva sempe, isso nun 'a rette retta. Chella povera femmena sse vereve perduta; e, quanno fuje chell'auta matina, 'o jette a salutà'; e, comme verette, ca 'o marito le vutava 'a faccia, iessa recette:—«Villa era e Villa sono | Era amata e mo' non ci sono; | Io non so per quala ragione | Non mi tratta più il mio padrone.[6]»—'O cavaliere manco 'a respunnette; e, sempe ca chella nce 'o ghieva a dicere, isso vutave 'a faccia. 'O Re sapette chesto; e,'nu juorno, facette 'na tavula; e 'mmitava tutt' 'e cavalieri ch' 'e mugliere loro: e a chillo cavaliere le cummenette purtà' pure 'a mugliera ssoja. Quanno furene all'urtemo d' 'a tavola, 'o Re recette, ca tutte avevane a ricere 'nu cunto. Tutte quante 'o recettere; e, quanno ss'arrivava 'à mugliera d' 'o cavaliere, chella recette:—«Villa era e Villa sono, | Era amata e mo' non ci sono; | Io non so per quala ragione | Non mi tratta più il mio padrone».—'O marito respose:—«Per la guancia del leone[7] | Non ti tratta il tuo padrone».—Accussì 'o Re svelava 'o fatto[8] y 'e duje cumpagne facettero pace felice e cuntente.