XI.—'A VICCHIARELLA[1] (Lezione raccolta in Pomigliano d'Arco.)

XI.—'A VICCHIARELLA[1] (Lezione raccolta in Pomigliano d'Arco.)

'Na vota nce steva 'na vicchiarella. Jette a scupà[2] 'a chisiella;[3] truvava 'nu turnesiello.[4] Dice:—«I' mo' che mm'accatto?[5] Se mm'accatto 'e mele, hagge a jettà' 'o streppone.[6] Si mm'accatto 'e noce, hagge a jettà' 'e scorze[7]. Si mm' accatto 'e castagne, pure hagge a jettà 'e scorze. Si mm' accatto 'o pane, si mm'accatto 'o scagnuozze,[8] mme carene 'e mulliche. Mo' mm'accatto 'o ghianco e 'o russo e mm' 'o metto 'nfaccia[9]».—Accussì facette. Ss'accattavo 'o ghianco e 'o russo, ss' 'o mittette 'nfaccia, e ssi mettette affacciata 'â fenestella.[10] Passava 'nu ciuccio.—«Zi' vicchiarè', che fai lloco?[11]»—«Mme voglio maretà'».—«Te vulisse piglià' a mme?»—«Famme abberè' che bocia tieni».—«Ingò! Ingò! Ingò! Ingò!»—«Fuie, fuie; mme fai mettere appaura 'â notte».—'O ciuccio sse n'iette. Passava 'na crapa.—«Zi' vicchiarè', che fai lloco?»—«Mme voglio maretà'».—«Te vulisse piglià' a mme?»—«Famme abberè' che bocia fai?»—«Be! be! Be! be!»—«Fui, fui; mme fai mettere appaura 'â notte».—'A crapa sse n'iette. Passava 'na miscia:—«Zi' vicchiarè', che fai lloco?»—«Mme voglio maretà'».—«Te vulisse piglià' 'a mme?»—«Famm'abberè' che bocia fai?»—«Miaò, miaò! Miaò, miaò!»—«Fui, fui; mme fai mettere appaura 'a notte».—'A miscia sse ne fuiette. E accussì passavano tutt' animale r' 'o munno; e a zi' vicchiarella nisciuno nce ne piacette. All' urtemo passava 'nu surecillo.—«Zi' vicchiarè', che fai lloco?»—«Mme voglio maretà'».—«Te vulisse piglià' a mme?»—«'Assa verè', che bocia tiene «.—«Zivuzì, zivuzì! Zivuzì, zivuzì!»—«Sagli 'ngoppa, ca mme piace».—'O surecillo sagliette e sse steva cu' zi' vicchiarella.[12] 'O juorno appriesso, zi' vicchiarella iette a messa; e rummanette 'o pignato vicin' 'ô fuoche; e decette vicino 'ô surecillo:—«Vuè, non te spugnà' 'o pane rint' 'ô pignato, ca tu nce vai rinto. Statt' attiente, ca i' hagge 'a ì' 'â messa».—'O surecillo respunnette:—«Gnernò, gnernò; iate cunnìa[13]».—E zi' vicchiarella iette 'â messa. Quanno turnava, truvava 'a porta 'nghiusa. Chiammava:—«Cumbà' surecì', cumbà' surecì'!»—'O surecille nu' respunneva. Pigliava zì' vicchiarella, facette scassà'[14] 'a porta, trasette rinto 'â casa, iette verenne pe' tutte parte, e non 'o truvava. Verette sott' 'ô lietto, e manco nce steva; sotto 'â seggia, e manco nce steva; rint' 'ô mortale e manco nce steva; rint' 'ô tiraturo[15], manco 'o truvava; 'ngoppa 'â cemminera[16], e niente nce steva. All'urtemo sse sfasteriava[17] e decette:—«Cumbà' surecillo vurrà pazzià'[18] cu' mme. Mo' nu' mm'incarreco. Mme mangio 'a menesta[19] e zitto; ca po', quanno piace a isso, tanno iesce».—Jette pe' menistà',[20] e truvava cumbà' surecillo rinto 'ô pignato.—«Uh! 'maramè!»—sse mettette alluccà', menava 'a menesta pe' l'aria e chiagneva, chiagneva. 'A cennere 'ngoppa 'ô fuculare, verenne chesto, sse spartugliava[21] tutta quanta. 'A fenestella l'addimmannava:—«Neh, tu pecchè te spartuogli?»—«Ah, tu nu' nzai niente. Cumbà' surecillo rinto 'o pignato; zi' vicchiarella chiagne, chiagne; e i', che so' stata cennere, mm'hagge voluto spartuglià'».—Respunnette 'a fenestella, e dice:—«I', che so' fenestella, mme voglio arapì' e 'nzerrà'.[22]»—Sse n'addunuva 'a 'rariata[23]; e dice:—«Fenestella, tu pecchè t'arapi e 'nzierri?»—«Tu manco sai niente! Surecillo 'rint' 'ô pignato; zi' vicchiarella tutta sse scippa;[24] 'a cennere sse spartoglia; e i', che so'stata fenestella, mm'hagge voluto arapì' e 'nzerrà'»—«Neh,»—respunnette 'a 'rariata—«e i', che so' 'rariata, mme voglio scarrupà'[25].»—E 'a 'rariata sse scarrupava. 'N auciello, che ghieva sempe 'ngoppa a 'n auro, rice:—«'Rariata, pecchè te si' scarrupata?»—«Tu pure sai niente! Cumbà' surecillo 'rint' 'ô pignato; zì' vicchiarella tutta sse scippa, 'a cennere ss' è spartugliata; 'a fenestella ss' è arraputa e 'nzerrata; e i', che so' stata 'rariata, mm'hagge vuluto scarrupà'»—«E i', che songh' auciello, voglio spennà'[26]».—E spennava tutto quanto. L'auro appena verette l'auciello spennato, l'addimmannava:—«Pecchè te si' spennato?»—«Uh, gioja mmia, tu stai 'nfurmata 'e niente! Cumbà' surecillo rint' 'ô pignato; zi' vicchiarella tutta sse scippa; 'a cennere ss'è spartugliata, 'a fenestella ss'è arraputa e 'nzerrata; 'a 'rariata ss' è scarrupata; e i', che so' stato auciello, hagge voluto spennà'».—«Neh? e i', che songh'auro, mme voglio sfrunnà'».—E sse sfrunnava. 'Na serva, che ghieva a tirà' l'acqua, spiava a l'auro, pecchè era sfrunnato. L'auro le cuntava pure tutta 'a storia.—«Cumbà surecillo rint' 'ô pignato; zi' vicchiarella tutta sse scippa; a cennere ss'è spartugliata; 'a fenestella ss' è arraputa e 'nzerrata; 'a rariata ss' è scarrupata; l'auciello ss' è spennato; e i', che songh' auro, mme voglio sfrunnà'».—Piglia 'a serva, recette:—«E ì', che so' serva, voglio rombere 'a rangella.[27]»—Jette 'ngoppa addò 'a signora; e chesta le spiava, si aveva tirate l'acqua. 'A serva respunnette:—«Uh, signora mmia! cumbà' surecillo 'rinto 'ô pignato; zi' vicchiarella tutta sse scippa; 'a cennere ss' è spartugliata; 'a fenestella ss'arrape e 'nzerra; 'a rariata ss'è scarrupata; l'auciello è spennato; l'auro ss'è sfrunnato; e i', che so' stata serva, haggio vuluto rombere 'a rangella».—'A signora, che teneva 'a farina preparata pe' fa 'ô pane, rice:—«E i', che so' signora, voglio menà' 'a farìna p' 'o barcone».—Venette 'o signore; e spiava 'a mugliera s' aveva fatto 'ô pane; e chesta respunnette:—«Marito mmio, niente sai tu 'e tutto chello, ch' è succieso! Cumbà' surecillo rinto 'ô pignato; zi' vicchiarella tutta sse scippa; 'a cennere sse spartuglia; 'a fenestella ss'arrape e 'nzerra; 'a 'rariata ss'è scarrupata; l'auciello è spennato; l'auro è sfrunnato; 'a serva ha rotta 'a rangella; e ì', che so' stata signora, hagge voluto menà' 'a farina p' 'ô barcone».—Respunnette 'o signore:—«E i', che so' signore, voglio rombere l'ossa a tutte e doje».—Pigliava 'na mazza e teretungo e teretanga, facette 'na bona mazziata primma 'â serva e pó' 'â padrona[28].