Comment sigismunde remontroit a son pere qu'il devoit pencer que elle n'estoit point de fer ne de pierre plus que une autre

Ha tancredus tu pouois bien pencer Que de ta chair engendree tu me avois Et que n'estois de pierre ne de fer Mais humaine tout ce bien concepvois Et d'autre part regarder tu devoys Que toy qui es ja tout viel & cadus En jennesse les dars d'amours sentois Autant sur moy que contre toy tendus

Las tu pouois assez considerer Les grans assaux de venus dangereux Et que on ne peut les perilz moderer Quant ilz tumbent soit sur jeunes ou vieux Car oysive fait le cas perilleux Ou delicez & richesses ont lieu Les plus saiges deviennent folieux Trop est eureux qui est quite du jeu

Engendree je suis de toy sans doubte Jeune de age noble & de beau corsaige Tousjours ay eu des amoureux grant route Qui m'ont cherchee par loy de mariage Mais tant as fait par ton lasche courage Tout affollé de vieille insipience Que tu as mis et mettras ton lignage En misere par ta grant negligence

Tu devoyes aussi considerer Que femme suis procurant mon desir Et que peu vault or ne argent manier Qui n'a du corps le gracieux plaisir Tu sçavoys bien que ne pouoys gesir Seule en ung lit sans santir les assaulx Du dieu d'amours qui tost viennent saisir Tous les francs cueurs des amoureux loiaulx

Ce que autreffois avois eu ma plaisance Le peu de temps que ay esté mariee Me ramenoit souvent la souvenance Du temps passé par charnelle pancee Divers assaulx par chascune journee M'ont esté fais et livrés sans mesure Merveillez n'est se je suis succumbee En ce faisant ne t'ay fait quelque injure

Car en querant de mon mal guerison J'ay regardé tant que a esté possible A preserver d'infamie ta maison Ce m'a esté bien aisé et factible Avoir mieulx fait seroit chose impossible Hors mariage on ne pourroit pas mieux Se ton engin estoit doulx & ductible Tu loueroys mon fait ingenieux

Pour respondre ad ce que as proposé De guisgardus que nobles homs n'est mye En ce disant tu as mal avisé Du vulgaire tu ensuis la folie Car noblesse qui est de dieu amye Ne procede pas du tout des parens Cil est villain tant soit de grant lignye Qui n'est garny de vertus et de sens

Je n'ay pas fait comme les femmes folles Qui sans viser aux vertus ou prudence Se habandonnent pour les belles parolles A aucuns gorriers remplis d'oultrecuidance Et se dient nobles plains de vaillance Trop plus de dit que de fait sont remplis Guisgardus n'est point de leur aliance Ou monde n'a homme plus aconplis

Il est noble de bonnes meurs remply Loial segret des parfaictz le meilleur Jamés homme ne fut si acomply Pour bien garder de sa dame l'honneur A ses causes luy ay donné mon cueur Je luy donne avecques lui mourra Je ne voudrois avoir autre seigneur En desplaise qui deplere voudra

Se fortune en departant ses biens Folle aveugle les depart aux indignes Et que les bons et vertueux n'aient riens Pas ne s'ensuit que les bons soient mains dignes Ou mains nobles que ceux qui par faux signes Sophistiqués semblent estre loyaux Tel a souvent la charge de cuisines Qui plus sage est que ung riche damoiseau

N'avons nous pas tous prins commencement Originel de adam le premier homme On ne treuve que vertu seulement Qui les humains face pour toute somme Entre eux avoir difference car comme Entendre puis par euvres de vertu Que ung chascun parfait & bien consomme Est ung homme noble dit et tenu

Se tu as bien reviré ta maison Et regardé tous ceulx qui dedans sont Et de ung chascun la conversacion Vie et estat et quelles meurs ilz ont Tu verras bien qu'en rien n'aprocheront Des grans vertus de guisgardus sans faulte Comme le jour contre la nuit luiront Ses merites par excellence haulte

Ce qui plus m'a induicte a esprouver De guisgardus les louables vertus Est pour ce que te l'ay ouy louer Par plusieurs fois & que cher l'as tenus Cil n'eust esté pas vers toy bienvenus Qui guisgardus eust appellé villain Vituperer on ne doit jamés plus Ce que l'on a loué au soir et main

Et quant tu dis qu'il est povre et chetif Cela tourne a ton grant deshonneur Car attendu qu'il estoit tresactif De toy servir loyaulment de bon cueur Tu le devois promouvoir a honneur Et lui donner pour son salaire office Noble prince tant plus est grant seigneur Doit a ses gens pourveoir de benefice Ce neantmoins povreté ne pourroit La noblesse d'ung homme exterminer Mais les euvres bien empescher pourroit Qui n'a cherge ne peut bien expleter Telz ont esté povres qui sans doubté Ont puis esté nobles princes & roys Les histoires sans cy les reciter En sont plaines comme clerement voys Finablement tu as dit que de moy N'as pas encor conclud ce que dois faire De ce ne soyes en soucy ne esmoy Je te diray bien ce que auras a faire Car se tu as en pancé de defaire Mon doulx amy guisgard je te prie Que sur mon corps il te plaise parfaire La cruaulté de ta grant felonnie Je l'ay requis et prié de complaire A mon vouloir/ il ne m'a pas requise Pourtant raison est que je le compere Et que absolz soit cil que tant ayme & prise Jamés ne m'eust pour le fait d'amours requise Se les moyens je ne lui eusse ouvers Il m'a pleu et fait tout a ma guise Cil feroit mal qui lui seroit pervers Las je luy fis assavoir par escript Qu'il descendist par le trou du caveau Et qu'il venist par devers moy de nuyt De cuir boulli qu'il fist faire ung manteau Le gracieux et loyal jouvenceau Tous mes vouloirs acomplit sans desdire En plusieurs poins le prouve bien & beau Avant qu'il sceust que je luy voulois dire

Quant fut venu je lui fis remonstrance Que tu me amoys trop peu en une chose Car supposé que j'eusse abundance De biens mondains me failloit autre chose Tu m'as tenue comme recluse & close Mal diligent de moy avantager Pourtant je dy contre toy et propose Que matiere n'as de me ledanger

Je dy oultre pour mon loyal amant Qu'il n'a rien fait qui soit reprehensible Je l'ay contraint d'estre amy et servant Seur et segret : il a esté ductible Doulx & begnin jamés ne fut nuysible Ains pour l'onneur de ta maison veillant Trop as esté en ton fait deceptible De avoir cherchié ce que a veoir est nuisant

Se tu n'eusses nostre fait descouvert Et regardé par moyens inhumains A tousjoursmés il eust esté couvert Sages amours plaisent a gens humains Ce qui estoit secret et incertains Sans macule mettre aucune en ta gloire As descouvert : tu as fait que villains Privé de sens rempli de fol memoire

Quant tu auras les corps des deux amans De vie privés transitoire & mortelle Pas n'en auras les cueurs qui adherens Sont ensemble par maniere nouvelle Car se il advient que ta cruaulté vueille Livrer a mort mon gracieux amy Ne vueille dieu que je vive aprés seule Mourir pour vray me fauldra quant & luy

Quant la fille eu ce au pere expliqué Il contempla sa vertu & constance A ses objectz n'a dit ne repliqué Chose qui soit. ains de partir se avance Bien proposa que a sa fille nuysance Ne mal de corps ne feroit pour le cas De guisgardus proposa sans doubtance Faire une fin dont par aprés dist l'as