“GRUMETE”
Reading edition
Hibaloán ta nga si Lucas natawo sa balangay sa Lutaw ¿katuhoan ba nga walá na gayud siyá’y kaubanan kun kaila niana’ng balangaya?
Migikan ang bapor. Songsongón. Mihurós ang habagat.
Nagakalayó sa dunggoanan ug nagasugod pagkilingkiling. Siyá walá maanad niadto’ng mga panawa. Gidagat siyá, gipanglipogngan ug nahipaubó sa “cubierta” sa bapor. Samtang ang hangin nagahurós, ang balód nagapungasi, ang Kapitán, apu ni Iyo Sam, nagapagulá sa iya’ng kalake: kusóg nga inum sa wisky, ug ang gisampotan maó ang kahubóg ug ang mga alaot nga “grumete” maó’y gidulaan: gipasaká ang tanán sa puente, gipakulob sa salóg ug gipakamangkamang sa hawanan’g mapig-ot, iya’ng gikabay-an. Usá da ka “grumete” ang walá didto, maó ang bag-o, si Lucas. Kiní’ng makalolooy nagalisód, gilabdan sa ulo, dili gani makatindog ug naghabwa sa iya’ng tanán’g kinaon. Apan walá’y pasaylo: Ang Kapitán maó ang hari sa taas sa bapor: gipayayongan si Lucas ug didto kay dili man makatukod sa mga tiíl, arón kakabay-an, gipatiran....
Sa pagkaugma, sa pag-idlak sa Adlaw, sa una’ng lungsod nga gidunggoan niadto’ng bapora, gipakawas si Lucas, gibiyaan sa bapor.
Panalagsaon da’ng kaagiha kadto’ng kang Lucas. Hapit dili mahitabó sa usá lamang ka tawo. Mahitabó hinoon, malagmit mahitabó sa alaot nga mamomoo, apan usá ka kagul-anan sa usá da ka mamomoo: dili kay usá ka tawo alang sa daghan’g kagul-anan.
Apan may kinaiya si Lucas nga panalagsaon ug kay panalagsaon angay’ng paninguhaon pagkasayud sa tanán’g tawo: maó ang iya’ng kalig-on. Sa tanán’g kapaitan nga giagian niya, ¿nakadungog ba kamó nga miagulo si Lucas, nga miagho ug midangoyngoy? Kahá may pilá ka tolo sa luha—luha, dili sa katalaw, kon dili sa kalagot—nangahulog sa iya’ng aping, apan walá siyá malubá.
Alang sa kabus, labáw sa kusóg sa bukton niya, kinahanglan ang kusóg ug kalig-on sa kabubut-on, ang kalig-on sa kasingkasing. Malubay gani ang kasingkasing, tanán walá na’y pagapuslan...
Tan-awon ta: Atua gibiyaan sa bapor, atua sa baybayon sa lungsod diin walá siyá, bisan usá ka putól nga ilá....