IX.
Reading edition
Non semper imbres nubibus hispidos Manant in agros aut mare Caspium Vexant inaequales procellae Usque, nec Armeniis in oris,
Amice Valgi, stat glacies iners 5 Mensis per omnis, aut Aquilonibus Querceta Gargani laborant Et foliis viduantur orni:
Tu semper urges flebilibus modis Mysten ademptum, nec tibi Vespero 10 Surgente decedunt amores Nec rapidum fugiente solem.
At non ter aevo functus amabilem Ploravit omnis Antilochum senex Annos, nec impubem parentes 15 Troilon aut Phrygiae sorores
Flevere semper. Desine mollium Tandem querellarum, et potius nova Cantemus Augusti tropaea Caesaris et rigidum Niphaten, 20
Medumque flumen gentibus additum Victis minores volvere vertices, Intraque praescriptum Gelonos Exiguis equitare campis.