III.
Reading edition
Parentis olim si quis impia manu Senile guttur fregerit, Edit cicutis allium nocentius. O dura messorum ilia! Quid hoc veneni saevit in praecordiis? 5 Num viperinus his cruor Incoctus herbis me fefellit? an malas Canidia tractavit dapes? Ut Argonautas praeter omnis candidum Medea miratast ducem, 10 Ignota tauris inligaturum iuga Perunxit hoc Iasonem; Hoc delibutis ulta donis paelicem, Serpente fugit alite. Nec tantus umquam siderum insedit vapor 15 Siticulosae Apuliae, Nec munus umeris efficacis Herculis Inarsit aestuosius. At si quid umquam tale concupiveris, Iocose Maecenas, precor 20 Manum puella savio opponat tuo, Extrema et in sponda cubet.