XX.
Reading edition
Non vides quanto moveas periclo, Pyrrhe, Gaetulae catulos leaenae? Dura post paullo fugies inaudax Proelia raptor,
Cum per obstantis iuvenum catervas 5 Ibit insignem repetens Nearchum: Grande certamen, tibi praeda cedat Maior an illi.
Interim, dum tu celeres sagittas Promis, haec dentis acuit timendos, 10 Arbiter pugnae posuisse nudo Sub pede palmam
Fertur et leni recreare vento Sparsum odoratis umerum capillis, Qualis aut Nireus fuit aut aquosa 15 Raptus ab Ida.