La nouvelle manière de faire son profit des Lettres, traduitte en françois par J. Quintil du Tronssay, en Poictou[190].
Reading edition
La nouvelle manière de faire son profit des Lettres, traduitte en françois par J. Quintil du Tronssay, en Poictou[190].
Ensemble: le Poëte-Courtisan.
A Poictiers.
1559.—In-8o.
Moy a Toy.
Salut.
Tu sçais faire des vers, mais tu n'as le sçavoir De pouvoir par ton chant les hommes decevoir: Car le dieu Apollon avec le dieu Mercure S'assemble, ou autrement de ses vers on n'a cure. Mercure, par finesse et par enchantement, Dedans les cueurs humains glisse secrètement; Il glisse dans les cueurs, il trompe la personne, Et d'un parler flatteur les ames empoisonne: Avec tel truchement peut le dieu Délien Possible quelque chose, autrement ne peut rien.
Veulx-tu que je te montre un gentil artifice Pour te faire valoir? Pousse-toy par service; Par art Mercurien trompe les plus rusez, Et pren à telz appas les hommes abusez: Tu feras ton profit, et bravement en point De froid, comme tu fais, tu ne trembleras point.
Il te faut dextrement ces ruses imiter, Le sçavoir sans cela ne te peut profiter. Si le sçavoir te fault, et tu entens ces ruses, Tu jouyras vainqueur de la palme des Muses. Ne pense toutefois, pour un peu t'estranger De ces bavardes sœurs, que tu sois en danger De perdre tant soit peu: tu n'y auras dommage, Car aux Muses souvent profite un long voyage. Tu en rapporteras d'un grand cler le renom, Et de saige sçavant meriteras le nom. Mais si tu veux icy te morfondre à l'estude, Chacun t'estimera fol, ignorant et rude.
Doncques en Italie il te convient chercher La source Cabaline, et le double Rocher, Et l'arbre qui le front des poëtes honore. Mais retien ce précepte en ta memoire encore: C'est que tu pourras bien François partir d'icy, Mais tu retourneras Italien aussi, De gestes et d'habits, de port et de langage, Bref, d'un Italien tu auras le pelaige, Afin qu'entre les tiens admirable tu sois: Ce sont les vrays appas pour prendre noz François. Lors ta Muse sera de cestui la prisée Auquel auparavant tu servois de risée.
Le plus seur toutefois seroit en tout se taire, Et c'est un beau mestier, et fort facile à faire, Le faisant dextrement. Fay courir qu'entrepris Tu as quelque poëme et œuvre de hault pris, Tout soudain tu seras montré parmy la ville Et seras estimé de la tourbe civile.
Un vieulx ruzé de court naguières se vantoit Que de la republique un discours il traitoit; Soudain il eut le bruit d'avoir épuisé Romme, Et le sçavoir de Gréce, et qu'un si sçavant homme Que luy ne se trouvoit. Par là il se poussa, Et aux plus haults honneurs du palais s'avança, Ayant mouché les roys avec telle practique, Et si n'avoit rien fait touchant la republique. Toutefois cependant qu'il a esté vivant, Il a nourry ce bruit qui le meit en avant. Jusqu'à tant que la mort sa ruse eut descouverte, Car on ne trouva rien en son estude ouverte, Ains par la seule mort au jour fut revelé Le fard dont il s'estoit si longuement celé.
Quelque autre dit avoir entrepris un ouvrage Des plus illustres noms qu'on lise de nostre age, Et jà douze ou quinze ans nous deçoit par cet art; Mais il accomplira sa promesse plus tard Que l'an du jugement. Toutefois par sa ruse Des plus ambitieux l'esperance il abuse: Car ceulx-là qui sont plus de la gloire envieux, Le flattent à l'envy, et tachent, curieux, De gaigner quelque place en ce tant docte livre Qui peut à tout jamais leur beau nom faire vivre. Ce trompeur par son art très riche s'est rendu, Et son silence aux roys chèrement a vendu, Noyant en l'eau d'oubly les beaux noms dont la gloire Seroit, sans ses escripts, d'éternelle mémoire: Car les Parthes menteurs, faulx, il surmontera, Et nul (comme il promet) n'immortalisera; Mais il peindra le nez à tous, et pour sa peine De les avoir trompez d'une esperance vaine, Dessus un cheval blanc ses monstres il fera Par la ville, et du roy aux gages il sera.
J'ay, filz d'un laboureur, discouru brefvement Tout ce facheux propoz, moy qui ay bravement Delaissé les rasteaux pour m'attacher aux Muses. Tu pourras par usage apprendre d'autres ruses; Or à Dieu, pense en moy, et pour attraper l'heur Suy Mercure, qui est le plus fin oyseleur.
Fin.
In editione latina hæc omissa fuerant.
Le Poëte courtisan.
Celuy donc qui est né (car il se fault tenter Premier que l'on se vienne à la court presenter) A ce gentil mestier, il fault que de jeunesse Aux ruses et façons de la court il se dresse; Ce precepte est commun, car qui veult s'avancer A la court, de bonne heure il convient commencer.
Je ne veulx que longtemps à l'estude il pallisse, Je ne veulx que resveur sur le livre il vieillisse, Fueilletant studieux tous les soirs et matins Les exemplaires grecs et les autheurs latins. Ces exercices là font l'homme peu habile, Le rendent catareux, maladif et debile, Solitaire, facheux, taciturne et songeard; Mais nostre courtisan est beaucoup plus gaillard. Pour un vers allonger ses ongles il ne ronge, Il ne frappe sa table, il ne resve, il ne songe, Se brouillant le cerveau de pensemens divers Pour tirer de sa teste un miserable vers, Qui ne rapporte, ingrat, qu'une longue risée Partout où l'ignorance est plus authorisée.
Toy donc qui as choisi le chemin le plus court Pour estre mis au ranc des sçavants de la court, Sans macher le laurier, ny sans prendre la peine De songer en Parnasse, et boire à la fontaine Que le cheval volant de son pied fist saillir, Faisant ce que je dy, tu ne pourras faillir.
Quelque nouveau poëte à la court se presente: Je veulx qu'à l'aborder finement on le tente; Car s'il est ignorant, tu sçauras bien choisir Lieu et temps à propoz pour en donner plaisir; Tu produiras partout ceste beste, et en somme Aux despens d'un tel sot tu seras galland homme.
S'il est homme sçavant, il te fault dextrement Le mener par le nez, le loüer sobrement, Et d'un petit soubriz et branlement de teste Devant les grands seigneurs luy faire quelque feste, Le presenter au roy, et dire qu'il fait bien Et qu'il a mérité qu'on luy face du bien. Ainsi, tenant tousjours ce pauvre homme soubz bride, Tu te feras valoir en luy servant de guide; Et, combien que tu sois d'envie époinçonné, Tu ne seras pour tel toutefois soubsonné.
Mais qui des grands seigneurs veult acquerir la grace Il ne fault que les vers seulement il embrasse, Il fault d'aultres propoz son stile déguiser, Et ne leur fault tousjours des lettres deviser. Bref, pour estre en cest art des premiers de ton age, Si tu veulx finement joüer ton personnage, Entre les courtisans du sçavant tu feras, Et entre les sçavants courtisan tu seras.
Pour ce te fault choisir matière convenable Qui rende son autheur aux lecteurs agreable, Et qui de leur plaisir t'apporte quelque fruict. Encores pourras tu faire courir le bruit Que, si tu n'en avois commandement du prince, Tu ne l'exposerois aux yeulx de ta province, Ains te contenterois de le tenir secret, Car ce que tu en fais est à ton grand regret.
Et, à la verité, la ruse coustumière, Et la meilleure, c'est ne rien mettre en lumière, Ains, jugeant librement des œuvres d'un chacun, Ne se rendre subject au jugement d'aulcun, De peur que quelque fol te rende la pareille, S'il gaigne comme toy des grands princes l'oreille.
Tel estoit de son temps le premier estimé, Duquel si on eust leu quelque ouvraige imprimé, Il eust renouvelé peut-estre la risée De la montaigne enceinte; et sa Muse prisée Si hault auparavant eust perdu (comme on dict) La reputation qu'on luy donne à credit.
Retien donques ce point, et si tu m'en veulx croire, Au jugement commun ne hasarde ta gloire; Mais, saige, sois content du jugement de ceulx Lesquelz trouvent tout bon, auxquelz plaire tu veux, Qui peuvent t'avancer en estats et offices, Qui te peuvent donner les riches benefices, Non ce vent populaire et ce frivole bruit Qui de beaucoup de peine apporte peu de fruict. Ce faisant, tu tiendras le lieu d'un Aristarque, Et entre les sçavants seras comme un monarque. Tu seras bien venu entre les grands seigneurs, Des quelz tu recevras les biens et les honneurs, Et non la pauvreté, des Muses l'héritage, Laquelle est à ceulx-là reservée en partage, Qui, dedaignant la court, facheux et malplaisans, Pour allonger leur gloire accourcissent leurs ans.
Fin.
