Note 194 — La nouvelle manière de faire son profit des Lettres, traduitte en françois par J. Quintil du Tronssay, en Poictou[190].

Il sera bon aussi de te faire advoüer De quelque Cardinal[194], ou te faire loüer Par quelque homme sçavant, afin que tes loüenges Volent par ce moyen par des bouches estranges. Mais il faut que le livre où ton nom sera mis Tu donnes çà et là à tes doctes amys. Ainsi t'exempteras du rude populaire, Ainsi ton nom partout illustre pourras faire: Car c'est un jeu certain, et quiconque l'a sçeu, Jamais à ce jeu là ne s'est trouvé deçeu, Surtout courtise ceulx auquelz la court venteuse Donne d'hommes sçavants la loüenge menteuse, Qui au bout d'une table, au disner des seigneurs, Deplient tout cela, dont furent enseigneurs Les Grecs et les Latins, qui de faulses merveilles Emplissent, ignorans, les plus grandes oreilles, Et abusent celuy qui par nom de sçavant Desire, ambitieux, se pousser en avant.