Tagpo VI.
Reading edition
Si ANGELING at si BALTAZARA.
Bal:—
(Buhat sa loob) ¡Angeling, Angeling ...!
Ang:—
¡Pooooo ...!
Bal:—
(Parang may hinahanap) ¿Hindi mo ba nakikita ang aking pustisong buhok? Kag̃gi-kang̃ina ko lamang hinusay, eh, nawaglit na ng̃ayon. At napakiramay pa mandin ang aking postisong ng̃ipin na kalilinis ko din.
Ang:—
Hindi ko po nakikita, nanay.
Bal:—
¿Saan kaya napasaksak? Hale ng̃a, hija, tulung̃an mo ng̃a ako sa paghanap.
Ang:—
Opo, nanay. (Kunwa'y hahanap ng̃ sumandali at pagkatapos ay babalikan ang kaniyang Ina,) nanay, mamaya ay magpapasyal ako, ho? (Palambing na sasabihen)
Bal:—
¿Na naman? ¿Saan ka na naman paroroon?
Ang:—
Sa Cine, po. ¿Papasok akó, ha nanay?
Bal:—
¿Cine na naman? ¿Hindi ba't, kagabi lamang ay nasok ka na?
Ang:—
Siyang̃a, nanay. (Lalong palambing)
Bal:—
Gayon pala, ¿bakit ibig mo na namang pumasok mamaya?
Ang:—
(Tatawa ng palihim) Aba, si nanay naman! Hindi ba ninyo nalalaman na ng̃ayon ay Huwebes?
Bal:—
¿Eh, ano kung Huwebes?
Ang:—
Eh, araw po ng̃ayon ng̃ kambio.
Bal:—
Kambio ba ng ano ang pinagsasabi mo?
Ang:—
Kambio ng̃ programa po.
Bal:—
At, ¿ano daw na naman ang palalabasin?
Ang:—
Zigomar contra Nick Carter po.
Bal:—
¿Magaling daw ba iyon?
Ang:—
Magaling daw po, ayon sa balita ng mg̃a pahayagan. Papasok ako, ha nanay?
(Lalabas si BRUNO na sumisigaw at waring may hinahabol na aso. Tang̃an sa kanang kamay, ang isang postizong buhok at sa isa naman ay postisong ng̃ipin,)