DE FRANCE, (continued 7)

histoire escript, moyne fu de Saint-Denys, vaillant homme, saige et

honneste; et fu tousjours famillier du roy et nourry au palais royal;) et

les autres messagiers furent à l'apostole, si le trouvèrent en Puille en

une cité qui a nom Vitonde[564]. Moult les receupt à belle chière, en

l'onneur et en la révérence de monseigneur saint Denys. Et trop volentiers

les eust lonctems retenus en sa compaignie, sé ne fust pour l'amour de

saint Denys qu'il doubtoit courroucier, et pour l'abbé de

Saint-Germain-des-Prés qui avec eux estoit et pour les aultres compaignons

qui moult se hastoient de retourner.

Note 564:

Vitonde.

Bitonto.

Et quant il eurent faictes leur besongnes à leur volenté, si se mirent au

retour. Si n'eurent pas faictes trois journées quant un messagier les

encontra qui à Sugier estoit envoyé de par le convent de Saint-Denys, qui

luy noncia la mort de l'abbé Adam et l'élection que le convent avoit faicte

de sa personne; et puis luy conta coment les meilleurs et les plus

religieus moynes de léans et les chevaliers meisme haulx hommes estoient

allés au roy[565] pour monstrer ce qu'il avoient fait et pour recevoir son

ottroy; et coment le roy s'estoit courroucié et pour ce les avoit mis en

prison en la tour d'Orléans.

Note 565: Il falloit ajouter ici avec Suger: «Sed quia inconsulto

rege factum fuerat.»

Lors commença damp Sugier à faire grant duel pour l'amour de son père

espirituel qui nourry l'avoit et fu moult angoisseux et en grant mésayse

pour deux choses: l'une fu pour sçavoir s'il recevroit celle dignité contre

la volenté du roy; car pour ce avoit il mis les moynes en prison qui

l'avoient esleu par la force de Rome et par l'ayde l'apostole Calixte qui

l'amoit moult. Et l'autre si fu s'il lairroit troubler et travailler

l'églyse qui nourry l'avoit dès les mamelles sa mère, et laisseroit gésir

en prison ses compaignons qui, pour l'amour de luy, avoient esté mal menés.

Ensi comme il estoit en telle angoisse et il pensoit en son cuer à envoyer

aucuns de sa meisnie au pape, pour soy conseiller à luy de ceste besongne,

si vint soudainement à luy un clerc romain moult noble homme et moult son

acointe qui ce qu'il prétendoit à faire par ses gens à grans despens,

receupt à faire par soy mesmes pour l'amour de luy. Après envoya au roy un

de sa meisnie avec celluy qui venu y estoit, pour luy venir redire la fin

de ceste besongne qui confusément estoit commenciée; car il ne se

présentast pas volentiers ainsi despourveuement devant le roy qui

courroucié estoit. Ainsi chevaucha troublé et desconforté, comme cellui qui

estoit en grand doubte coment son affaire prendront fin.

Si avint si bien que ne scay quans jours après revindrent les messages à

rencontre de luy, qui luy apportèrent nouvelles de la paix du roy et de la

délivrance de ses compaignons, et de la confirmacion de l'élection. Mais

lors en estoit le roy liés, et là[566] luy estoit venu à l'enconre avec

l'archevesque de Bourges et l'évesque de Senlis, et pluseurs autres prélas.

Là le receupt en grant amour et en grant révérence le convent; et fu

ordonné prestre le samedi après: c'est assavoir le samedi devant la

my-caresme, et le dimanche après fu sacré abbé devant l'autel des corps

saints. En pièce[567] ne seroient extrais les biens espirituels et

temporels que il fist à l'églyse: coment il se retrait et recouvra les

rentes et les possessions qui estoient perdues, si comme la prioré

d'Argentueil et assez d'aultres; et coment il fu saige et pourveu ès choses

temporelles; et coment il gouverna saigeinent le royaume, tandis que le roy

Loys fu oultre-mer; et coment il réforma léans l'ordre et la religion, et

coment elle y fu bien gardée; et mains autres biens qui en pièce ne

seroient racomptés. L'an après son ordonnement mut à Rome pour visiter

l'apostole, et pour le regracier de tous ses bénéfices, car tousjours, à

Rome et ailleurs, l'avoit soustenu et en ces besongnes et en celles

d'aultruy. Quant il fu là venu, si fut moult noblement receu de l'apostole

et de toute la court, et y demoura six mois entiers. Et avant qu'il s'en

partist, il fu au grant concile que le pape Calixte tint au palais du

Latren, qui fu de troi cens évesques et de plus. Et là fu faite la paix de

luy et de l'empereur Henry, de la querelle des revesteures dont vous avez

oï ci-dessus. Et quant il eut visité les sains lieux, si comme

Saint-Benoit-du-Mont-de-Cassin, Saint-Barthelemieu-de-Bonivent,

Saint-Macy[568]-de-Salerne, Saint-Nicolas-de-Bar, si retourna en France.

Note 566:

Là.

A Saint-Denis. Notre traducteur abrège sagement dans

tout ceci le texte de Suger; plus bas encore il arrange ce que Suger

raconte des bienfaits de son administration.

Note 567:

En pièce.

En un sommaire.

Note 568:

Macy.

Mathieu.

Depuis avint que l'apostole le manda pour le plus honnourer; si comme il fu

parti et fu allé jusques à Lucques, une cité de Touscane, il oï la nouvelle

de la mort de l'apostole. Et pour ce qu'il doubtoit la convoitise des

Romains, se mist au retour sans plus aller avant. Après l'apostole Calixte,

fu mis au siège Honnouré, et fu pris et esleu en l'églyse d'Oiste, dont il

estoit évesque; homme de grant sens et de très-haut conseil et fier. Et

quant il eut puis apris la droiture de l'églyse Saint-Denys, en droit la

prioré d'Argentueil, qui moult estoit lors blasmée et diffamée de mauvaise

conversacion, et il eut leue la chartre du don des anciens roys, comme de

Pepin, de Charles-le-Grant et de Loys, si la restora et conferma par

l'ottroy de toute la court à l'abbaye de Saint-Denis. Mais avant,

par-dessus tout ce, en eut-il aultre tesmoignage de Dam Macie, l'évesque

d'Albe,[569] son légat, et de l'évesque de Paris et de Chartres; et

mesmement de Regnault, l'archevesque de Rains, et de mains aultres.

Note 569: «Mathæi Albanensis episcopi.»

XVII.

ANNEE: 1124.

Coment l'empereur Henri assembla un ost merveilleus pour la haine qu'il avoit au roy; et coment les barons ordenèrent leur bataille au palais meisme avant que il ississent hors.

A nostre matière nous convient retourner que nous avons un peu

entrelaissiée, qui parle du gros roy Loys, qui tant valut de soy, et qui

tant souffri de travail et de paine, pour son règne deffendre des griefs

assaux qui luy sourdirent en son temps. Né nul qui ores vive ne pourroit

sçavoir de come grant cuer et de come grant valleur et come chevallier fier

il fu, s'il n'avoit oï ses fais.

Si avint, quant l'apostole Calixte fu mort[570], que l'empereur n'oblia pas

la longue hayne qn'il avoit conceue contre luy[571] de long-temps, pour ce

que il avoit esté excommunié et interdit en son règne, au grant concile que

l'apostole Calixte avoit tenu en la cité de Rains, si comme l'hystoire a

dessus dit. Mais assembla un merveilleux ost de toutes les parties qu'il

put oncques avoir, comme Allemans, Lorrains, Baviers, Saissongnois, et de

ceus de Suabe, jà soit ce que pluseurs des barons de ces contrées fussent

mal de luy. Et combien qu'il fist semblant d'ostoyer ailleurs, si

tachoit-il à mettre le siège devant la cité de Rains, par le conseil et par

l'ayde de Henry, le roy d'Angleterre, la fille duquel il avoit espousée. Et

avoit l'empereur proposé à tenir si longuement le siège devant la cité,

qu'elle fust prise; et puis à ardoir et destruire tout le pays entour, pour

ce que l'apostole qui excommunié l'avoit, avoit sis et séjourné dedens.

Tout celle affaire fu faite assavoir au roy Loys, par ses privés amis qu'il

avoit à la cour l'empereur. Et tantost comme il sceut ce, il fist escripre

ses briefs et les envoya à ses barons et à ses haux hommes, par quoy il les

semonnoit de venir en sa présence et leur mandoit la raison pour quoy.

Note 570: Suger dit: «Ante Calixti decessum.»

Note 571:

Luy.

Le roi.

Et pour ce qu'il sçavoit bien que Saint-Denys estoit, après Dieu, espécial

deffendeur des roys et du règne, si comme il avoit oï dire à pluseurs et

esprouvé en soy-mesme plusieurs fois, si s'en vint à son églyse et le

commença à déprier de tout son cuer qu'il deffendist et gardast sa personne

et son royaume, et contrestast à ses ennemis. Et si comme il avoit toujours

accoustumé que sé aucun royaume osast assaillir le royaume de France de

guerre, ou venir sur luy, que celluy martir Saint-Denys et ses compagnons

sont mis hors de la fort voulte où il gisent et sont mis ensemble sur

l'autel; ainsi fu lors fait humblement et dévotement en la présence le roy.

Adont prist l'enseigne Saint-Denys que l'en appelle l'oriflambe, sur

l'autel dévotement, qui appartient à la conté de Vouquessin[572] que le roy

tient en fief de Saint-Denys, comme de son lige seigneur. Après mut à peu

de gens contre ses ennemis, pour son règne pourveoir, et manda par grant

banissement,[573] que toute France le suyvist à grant effort. Grant

desdain[574] et grant despit eut toute la baronnie de France quant elle oï

la désaccoustumée hardiesse de cette gent barbarine. Adont s'esmeurent tous

communément de toutes les parties du royaume, encouragiés d'un cuer et

d'une volenté de contrester à leur ennemis. Et quant il furent tous venus

à Rains avec le roy qui jà y estoit pour attendre ses osts qui de toutes

pars venoient, si assembla si très grant peuple de chevaliers, de sergens

et de gens à pié que ce fu merveilles. Né nul ne pourroit compter né dire

le peuple qui là fu. La terre pourprenoient et couvroient, et non mie tant

seulement sur les rivières, mais en plains et en vallées, en manière de

langoustes. Des destriers courans et des clers heaulmes né de l'autre riche

appareil ne faisons nous aucune mencion. Car il n'est nul homme vivant qui

discerner le vous péust, tant vindrent-il richement appareillés pour le roy

leur seigneur ayder et pour son règne deffendre. Mais tant vous en peut-on

bien dire que dedens une sepmaine toute entière que le roy séjourna en la

cité de Rains où il attendoit ses ennemis, fu tel l'ordonnement et

l'atirement de nos barons qu'il disoient entre eulx: «Chevauchons hardiment

contre eulx, qu'il ne s'en puissent aler sans chièrement comparoir ce qu'il

ont orgueilleusement osé entreprendre contre France, la dame des terres.

Droit est qu'il sentent et esprouvent la desserte de leur orgueil non mie

en notre terre, mais en la leur mesme qui de tousjours est subgiete à

France et souvent a esté domptée par la force des roys de France et des

François. Ce que il taschent à nous faire couvertement et en larrecin, que

nous leur rendons aux fers des lances appertement devant tous.» Mais

encontre ce disoit l'autre partie des plus saiges barons que on attendist

encore tant qu'il fussent entrés ès marches du royaume; et lors quant il ne

sauroient où eulx mettre né fouir si leur courroient sus et les

détrencheroient cruellement et sans mercy, comme Sarrasins et mescréans. Et

leur charongnes toutes nues habandonneroient aux bestes et aux corbeaux

sans avoir sépulture, en remembrance de leur reproche et de leur perdurable

honte.

Note 572:

Qui appartient.

C'est seulement le droit de

porter

cette enseigne de Saint-Denis dans les armées du roi de France,

qu'avoient les comtes de Vexin, et auquel Louis-le-Gros consentit à

succéder, quand le Vexin fut réuni à la couronne. Il ne faut donc pas

croire que l'oriflamme ait jamais été la bannière particulière du

comté de Vexin; et la preuve, c'est que son cri fut toujours

Montjoie!

château bâti sur la butte de St-Denis.

Note 573:

Bannissement.

Convocation de ban et arrière-ban.

Note 574:

Desdain.

Indignation.

Après commencièrent à ordenner leur batailles au palais mesme, par devant

le roy, et coment il iroient et coment seroient au premier conroy. Et ainsi

ordonnèrent que ceulx de la contrée de Rains et de Chaalons que l'en

estimoit bien à soissante mille ou plus, que à pié que à cheval, feroient

la première bataille; et ceulx de Laonnois et de Soissonnois que l'en ne

prisoit pas moins feroient la seconde; et la tierce ceulx d'Orléannois et

d'Estampois et de Paris et ceulx de la terre de Saint-Denys et de la

contrée d'entour qui tous estoient près de mourir et de la contrée

deffendre aux espées trenchans, et qui plus y estoient tenus que aultres.

Le roy conduist la quarte[575] de ceulx d'entour Paris, et s'en fist

ducteur et chevetain le roy mesme pour les conduire et guider. Et dit

ainsi: «Avec ceulx,» dist il, «qui sont mes nourris et je le leur, me

combatray-je par l'ayde de Dieu et de Saint-Denys, mon seigneur après Dieu.

Car je scay bien qu'il ne me lairoient mie en champ, né mort né vif, entre

mes ennemis.»

Note 575:

La quarte.

Suger compte les Parisiens dans la troisième

bataille.

Après ceulx fist la quinte[576] bataille le conte Thibaut de Champaigne,

avec son oncle le noble conte Huon de Troyes qui avec le roy Henry

d'Angleterre maintenoit la guerre contre le roy Loys, et touteffois

estoit-il là venu[577] pour la besongne du royaume contre les estranges

nacions. Et le duc d'Acquittaine[578] et le conte de Nevers la sixiesme, et

ceulx furent establis en l'avangarde. Après ceulx revint Raoul, le noble

conte de Vermendois qui estoit cousin le roy et moult estoit renommé et

prisé en armes[579]. Moult amena noble chevalérie de la terre Saint-Quentin

appareilliée de toutes manières d'armeures; et à celluy fu livré le dextre

costé des batailles, et aux Poictevins[580] le senestre. Après cestuy

revint le noble conte de Flandres à tout dix mille chevaliers combatans, et

à celluy fu l'arrière garde commandée. Et eust amené trois fois autant de

gens qu'il fist, s'il l'éust plus tost sceu. D'autre part vint le duc

Guillaume d'Aquitaine et le noble duc de Bretaigne; et Foucques le conte

d'Anjou qui tant estoit renommé et prisié aux armes; et à peu qu'il ne

mouroient tous de duel de ce qu'il n'avoient eu temps de leurs gens

assembler, car le petit terme et la longue voye leur avoit ce tollu à

faire.

Note 576:

La quinte.

La quatrième de Suger.

Note 577:

Estoit-il là venu.

«Sur l'adjuration des François.»--Ex

adjuratione Franciæ. (Suger.)

Note 578: Le latin dit

de Bourgoigne

.

Note 579: C'est celui dont les poètes ont exalté la gloire, l'audace

et la malheureuse fin dans la chanson de geste de

Raoul de Cambrai

.

Note 580:

Poictevins.

Il falloit

Pohiers

, ceux du Ponthieu.

«Pontivos et Ambianenses et Belvacenses in sinistre constitui

approbavit.»

XVIII.

ANNEE: 1124.

Coment les barons firent forteresces des chars et des charettes de l'ost, et coment l'empereur et tous les Allemans s'enfuirent quant il sceurent leur hardiesce et leur atirement. Et coment le roy anglois fu seur François en ce point, et coment il fu chacié par la chevalerie du Vouquessin.

Après ce fu ordonné et atiré par grant conseil et par grant pourvéance de

nos barons que desoresmais en quelque lieu que ce fust, mais que le lieu

fust convenable, il assembleroient aux Allemans; et que les charrios et les

charrettes qui amèneroient le vin et l'eaue à nos gens lassés et navrés

seroient atirés et mis en ront ainsi comme en un parc, en lieu de chasteau

et de forteresse, affin que ceulx qui viendroient de la bataille las et

navrés refroidissent illec leur playes et raffrechissent leur corps et

estanchaissent leur soif en buvant vin ou eaue ou qui mieulx leur plairoit;

et après ce raffrechissement retournassent tantost en l'estour leurs

compagnons ayder et conquerre la victoire.

Tantost fu sceu et espandu ce noble atirement qui tant faisoit à redoubler

à leur ennemis, et le fier appareil que le roy avoit fait pour son règne

deffendre; tant que la renommée en vint à l'empereur qui par faulte de cuer

se retira en sa terre, luy et ses grans osts, quant il sceut ceste nouvelle

et fist semblant d'aller ailleurs pour sa honte couvrir. Et aima mieulx

avoir honte et déshonneur par deffaut de soy et se garentir, que sa

personne et son empire mettre en péril né soy habandonner à la vengeance

des François qui plus désiroient la guerre que la paix.

Quant François sceurent qu'il leur furent ainsi eschappés, si furent moult

courrouciés, si que à grant paine furent détenus, par les prières aux

évesques et aux archevesques, qu'il n'entrassent en l'empire pour ce que

les povres gens n'en fussent destruis.

Quant François s'en furent retournés en leurs pays, à la victoire[581] qui

autant valut ou plus comme s'il les eussent desconfis ou gettés de la

place, le roy qui tout voloit de joye s'en vint à ses seigneurs et vengeurs

Saint-Denys et ses compaignons, en rendant grâces à Dieu et à eulx de

l'onneur qu'il luy avoient fait. Et la couronne son père qu'il avoit tenue

jusques à ce jour à tort leur rendit incontinent humblement et dévotement.

Car bien sachent tous que la couronne aux roys de France est leur par

droit, après leur décès, et qui tort leur en fait il mesprent et mesfait

envers eulx. Les corps des martyrs qui sur l'autel estoient et avoient

tousjours esté, tant comme il avoit esté à celluy ost, à grant luminaire et

à grans chans porta le roy à ses espaulles, moult dévotement, à grant

plenté de larmes; et leur donna grans dons et grans présens, que en terre

que en autres choses, en guerdon de cest honneur et de mains autres qu'il

avoit eues par eulx. Et l'empereur d'Allemaigne qui receut celle honte, dès

ce jour en après, chéu en grant viltance, né oncques puis ne fina de

déchéoir et de venir à déclin et fina honteusement sa vie dedens l'an

mesme. Et par ce apparu la sentence vraye des anciens qui dit que nul, né

povre né riche, né villain né gentil qui l'églyse ou le règne vueille

troubler, n'istra de l'an, sé par occasion de luy convient mettre hors le

corps des glorieus sains[582].

Note 581:

A la victoire.

Avec la victoire.

Note 582: On voit, et j'en demande pardon à Suger, que nous sommes au

temps de la relation du pseudonyme Turpin,

de vitâ Caroli magni

.

D'aultre part le roy d'Angleterre qui bien sçavoit tout l'atirement et la

traïson de l'empereur, et pour ce mesmement que la guerre d'entre luy et le

conte Thibaut qu'il avoient emprise contre le roy long-temps devant

n'estoit pas encore finée, assembla son ost quant il sceut le règne vuide

du roy et de la chevalerie, et s'en vint vers les marches du royaume à

moult grant ost. Bien les cuida prendre et mettre à destruction par le

deffault du roy et des barons; mais fièrement fu fait ressortir et reculer

arrière par un tout seul baron du royaulme; ce fu le bon conte Amaury de

Montfort le bon chevalier et prouvé en bataille, et par la prouesse des

Vouquessinois qui pas n'estoient en celluy ost[583], mais estoient demeurés

pour le royaume garder. Arrière retourna né au royaume ne fist sé petit

non. Et pour ce merveilleux fait ne firent oncques François, grant temps

devant, chose où il eussent plus grant honneur, dont France fust mieux

renommée. Car en un mesme temps eut victoire de l'empereur d'Allemaigne et

du roy d'Angleterre, jà soit ce qu'il ne fust pas présent, et par ce

décheut moult et abaissa l'orgueil des ennemis du royaume et en fu la terre

plus en paix. Long-temps après ce, les ennemis du royaume à qui la renommée

de ces nobles fais estoit venue vindrent à son amour, et firent paix à luy

pluseurs, de leur volenté mesme.

Note 583:

Qui pas n'estoient.

Suger ne dit pas cela. «Et

strenuitate Vilcassinensis exercitùs repulsus, aut parum aut nihil

proficiens, vana spe frustratus retrocessit.»

XIX.

ANNEES: 1124/1126.

Coment l'évesque de Clermont se plaint au roy du conte d'Auvergne, coment le roy conduisit là ses osts, et prist la cité de Clermont et la rendi à l'évesque. Et coment cil méféist de rechief, et coment le roy rassembla plus grant ost et prist le chastel de Montferrant, et coment le conte luy donna ostages de sa volenté faire.

En ce temps avint que l'évesque de Clermont en Auvergne fu contraint à

issir de sa terre par les Auvergnas qui de viel et de nouvel ont ceste

tesche[584] qu'il sont orgueilleux. Moult estoit celluy évesque saige homme

et honnorable et fort deffenseur de saincte églyse. Quant il ne put en

avant aller, il s'en fouy en France ainsi comme tout déshérité. Au roy

monstra sa complainte tout en plourant et se plaignit du conte d'Auvergne

qui sa cité luy avoit tollue et la grant églyse de l'éveschié saisie et

garnie, par la malice d'un sien doyen. Pour ce luy prioit, tout estendu

devant ses piés, dont il luy grevoit moult, que il luy ramenast à franchise

son églyse qui estoit tournée en telle servitude, et mist à mesure par sa

force le tirant desmesuré. Et le roy qui tousjours avoit accoustumé à

deffendre les églyses emprist dévotement la besongne de l'églyse, jà soit

ce que il ne peust estre sans grant ost et sans grant travail. Et quant il

vit que ce tirant ne se vouloit chastier, né par mandement né par lettres,

si partit à grant ost et s'en alla droit à Bourges. Là s'assemblèrent les

barons du royaume fors que[585] le conte d'Anjou. Là vint le duc de

Bretaigne et le conte de Nevers, et les autres barons à moult grant

chevalerie.

Note 584:

Tesche

. coutume. Suger cite à ce propos le vers de

Lucain:

«Avernique ausi Latio se fingere fratres.»

Note 585:

Fors que.

Cela n'est pas dans Suger, qui nomme au

contraire Foulques d'Anjou le premier des barons qui se réunirent à

Bourges à l'armée du roi.

Quant il furent tous assemblés, si chevauchèrent vers Auvergne, tout

entallentés de prendre vengence des forfais de sainte églyse. Et ainsi

entrèrent en la terre de leur ennemis tout destruiant devant eulx. Et si

comme il approchoient de Clermont, les Auvergnas laissièrent tous les

chasteaux des montaignes et se misrent en la cité pour ce qu'il l'avoient

trop bien garnie. Et les François qui de leur folie et simplesse se

gabèrent, laissièrent à asseoir la cité, pour ce qu'il ne perdissent les

chasteaux dont les citoiens gastassent tandis les viandes[586]. Lors

tornèrent à un chasteau qui Pons a nom et siet sur l'eau de Hylerin[587].

Entour se logèrent et pourprisrent les plains et les haus tertres et

sembloit qu'il voulsissent aller au ciel, pour ce qu'il montoient les

montagnes et les puis[588] agus où les bonnes villes estoient. Si ardoient,

roboient et prenoient tout à force et amenoient les proyes en l'ost et non

mie tant seulement les bestes, mais les hommes bestiaux de la terre[589].

Après drescièrent les engins pour la tour prendre et abattre. Et quant les

perrierres et les mangonneaux lancèrent, si commença l'assaut fort et

périlleux; et tant y eut de trait getté que ceulx de dedens se rendirent eu

la mercy du roy. Ceulx qui la cité tenoient furent moult espoventés de

celle nouvelle comme ceulx qui autant ou pis s'attendoient à avoir; si s'en

fouirent et laissièrent la cité en la main du roy. Et il rendi tantost

l'églyse à Dieu, et au clergié leur droit, et à l'évesque sa cité. Après

fist la paix de luy et du conte si qu'il l'asseura par bons hostages. Et

atant retourna le roy en France.

Note 586: Cela est mal rendu. Il falloit: Pour laisser les citoyens

de Clermont consumer leurs provisions, tandis qu'ils seroient occupés

au siège des châteaux.

Note 587:

Pons

, etc. C'est

Pont du Chasteau

, sur l'<

Allier

, à

quelques lieues de Clermont.

Note 588:

Puis.

Tertres, pics.

Note 589: Il falloit:

Les hommes gardiens des bestes.

Entour cinq ans après, avint par la desloyaulté des contes et des Auvergnas

qui par nature sont de cuer légier et faux qu'il revelèrent de rechief et

prisrent contens contre le devant dit évesque et contre l'églyse. Et pour

ce luy convint de rechief aller au roy pour soy complaindre du conte. Et le

roy qui eut grant despit de ce qu'il s'estoit travaillié en vain, assembla

plus grant ost que devant et entra à grant force en Auvergne. Jà estoit le

roy en ce temps moult pesant pour la pesanteur de son corps et par la

grossesse de luy. Et sé un autre riche ou povre eust esté aussi pesant

comme il estoit et eust peu aussi bien demourer comme il demourast, s'il

eust voulu, en nulle manière n'eust chevauchié à tel travail. Contre le

désloement[590] de ses barons et de ses amis emprist-il celle voye. Mais il

avoit un cuer si fier, si courageux et si entreprenant de grans choses que

la chaleur du mois d'aoust et de juignet que les jeunes chevaliers

redoubtoient il souffroit trop légèrement par semblant. Et à aucuns trespas

de marois le convenoit porter et soustenir entre bras par ses sergens.

Note 590:

Desloement.

Conseil contraire.

Desloer

, c'est

déconseiller.

En celle ost qu'il mena à celle fois estoit Charles le conte de Flandres et

le conte de Bretaigne et Foucques le conte d'Anjou et l'ost des Normans

tributaires au roy d'Angleterre, et mains autres barons du royaume qui

eussent pu souffire à Espaigne conquerre. A tout son riche barnage passa le

roy les griefs passaiges de la terre d'Auvergne et les fors chasteaux que

il trouvèrent, tant qu'il vindrent à Clermont. Et quant il eut fait

assiéger Montferrant, un fort chasteau qui est près de la cité, les

chevaliers et ceulx de la garnison qui le chasteau devoient deffendre

s'esbahirent tous du merveilleux ost du royaume de France qui moult estoit

différent du leur, et furent tous esperdus de la clarté des heaulmes, des

escus et de l'autre noble atour qu'il virent resplendir contre le soleil;

si que par fine paour n'osèrent tenir le baile dehors le chastel; ains se

férirent tous en la tour et en l'açainte d'environ, à grant paine, si comme

il povoient mieulx. Tant fu getté le feu par les maistres des engins ès

maisons de la garnison qu'il eurent laissiées que tout fu ars et ramené en

cendre fors que la tour et le baile d'environ; et convint que l'ost se

retirast arrière à ses héberges pour le feu, qui soudainement esprist et

embrasa toute la ville, jusques au lendemain que le feu fu estaint. Et

quant vint au lendemain le roy ordonna une affaire dont ceulx de dehors

furent liés et ceulx de dedens courrouciés. Car une partie de l'ost du roy,

qui plus près de la tour estoit assise, estoit assaillie trop souvent et

par jour et par nuit de grans lancéis de dars et de quarreaux que ceulx de

dedens lançoient; si que il convenoit assiduement mettre garnison de gens

d'armes entre deux et par dessus tout ce les convenoit-il encore couvrir de

leur escus. Pour ce manda le roy au preux conte Amaury de Montfort qu'il

leur bastist un agait de bons chevaliers en aucun lieu près d'illec, de

leur saillie, si que s'il s'en issoient par adventure il ne peussent pas

rentrer dedens sans dommaige de leur gens. Et le preux conte Amaury qui

autre chose ne queroit fois soy mesler à eulx s'arma privéement en sa tente

et ne sçay quans de ses chevaliers. Et se mirent avant le jour en un agait

où il attendirent tant que ceulx du chastel ississent pour hordoyer en

l'ost si comme il souloient. Adont saillit de son agait le conte Amaury sur

un destrier courant comme cerf en lande, et, ainsi comme le lyon sault à sa

proye, les surprinst, tandis comme ceulx de l'ost les faisoient à eulx

entendre, une partie en prist et tantost les envoya au roy. Et quant il

furent devant luy, prièrent moult que il les prist à rençon telle comme il

luy plairoit. Mais il n'en voulut rien faire et commanda que on leur

coppast les poings, et ainsi amoignonnés que on les renvoyast arrières à

leur compaignons au chasteau. Quant il les virent ainsi atournés, si en

furent moult esbahis, né oncques puis n'osèrent issir né faire assallie.

Et quant ce lu fait et que presque toute Auvergne obéissoit au roy sans

contredit, que par force que par la demeure qu'il avoit faite, si advint

que le duc Guillaume d'Aquitaine survint à tout l'ost des Auvergnas. Et

quant il fu monté sur une haulte montaigne pour véoir l'ost de France et

pour soy loger, et il le vit si grant et les trefs et les pavillons tendus

parmy les grans plaines, si se merveilla moult dont si grant ost venoit et

se repentit moult durement de ce qu'il estoit venu ayder aux Auvergnas. Ses

messagiers envoya tantost au roy pour paix requerre. Et quant il furent en

la présence du roy leur seigneur si parlèrent ainsi: «Sire roy, nostre sire

le duc d'Aquitaine te salue moult, comme celuy qui veult ton salut et ton

honneur et ta vie; et te mande par nous telles parolles: N'ait pas desdaing

ta haultesse de prendre le service au duc Guillaume d'Aquitaine et de luy

garder sa droicture; car aussi comme elle requiert service aussi

requiert-elle droicture et seigneurie. Sé le conte de Clermont qui de moy

tient la conté d'Auvergne que je tiens de vous a riens mesprins vers vostre

court, moy qui suys son seigneur le doy présenter en vostre court et

advouer par devant vous. Né ce ne refusasmes-nous oncques à faire, et

encore le vous offronsnous et requérons que vous ne le refusez. Et affin

que vous ne soyez en doubte que nous ne le façons ainsi, nous sommes près

de livrer bons ostaiges et souffisans: et sé les pers et les barons du

royaume jugent que on le doie ensi faire, si soit fait[591], si esgarderons

et attendrons vostre plaisir.» Et sur ce se conseilla le roy à ses barons

qui à droit le conseillèrent que il avoit à en prendre foy et seureté de

bons ostaiges. Le roy le fist ainsi par le conseil des barons; et par ce

mist paix en la terre et aux églyses. Et mist un jour de parlement à

Orléans où le duc devoit estre pour faire ce qu'il avoit promis et ce que

les Auvergnas avoient refusé jusques alors. Et atant s'en retourna en

France.

Note 591:

Si soit fait.

Les termes de Suger sont clairs et sans

doute rappeloient une formule de la cour des pairs. «Si sic

judicaverint regni optimates, fiat; sin aliter, sicut.» N'est-ce pas

là notre

soit fait ainsi qu'il est requis?

Et viendra-t-on encore

soutenir que la cour des pairs date seulement de Philippe-Auguste?

Certes, d'après notre texte, elle est même antérieure à

Louis-le-Gros; ce n'est pas un prince aussi inquiet de son autorité

que l'on doit soupçonner d'avoir tant fait pour le gouvernement

féodal.

XX.

ANNEES: 1126/1127.

Coment Charles, le conte de Flandres, fu murtri en l'églyse de Bruges par les parens au prévot de l'églyse; et coment le roy vint là et les prist et pendi aux fourches.

L'un des plus nobles fais que le roy fist oncques avons cy proposé à mettre

brievement, jà soit ce qu'il conviegne grant loysir au traire, pour la

merveilleuse aventure qui avint. Il avint que le noble conte Charles qui fu

fils de la seur à l'aieule du roy Loys receut la conté de Flandres après la

mort le conte Baudouin, fils le conte Robert[592] qui fu roy de Jhérusalem

(si luy escheut par ne sçay quel lignage dont estoit tenu vers le conte

Baudouin qui morut sans hoir de son corps, si comme il nous est avis).

Note 592: Voy. plus haut, note 481.

Quant il eut la conté receue, si se contint moult bien et moult noblement

et droicturièrement, comme celuy qui bien deffendoit les églyses et estoit

large aumosnier et droit justicier. Si avoit fait semondre à sa court ne

scay quans riches hommes, riches mais orgueilleux et de bas lignage qui sa

seigneurie blasmoient et avoient en despit par leur orgueil; et disoient

qu'il avoit saisi à tort la conté comme celluy qui droit hoir n'estoit pas.

A sa semonse ne daignoient venir, ains l'espioient et se pénoient de le

prendre en tel point qu'il le péussent occire. Et cil estoit le prévost de

Bruges qui prévost estoit de l'églyse, et son lignage qui tous estoient

estrais de vilains serfs et de ligniée fausse et desloyale. Si advint que

celuy noble conte Charles estoit venu à Bruges. Si se leva au matin pour

aller à l'églyse Dieu prier, tenant un livre d'oroison en sa main. Et ainsi

comme il estoit estendu en oroison dessus le pavement, si avint que

Bouchart neveu au devant dit prévost et desloyal meurtrier et plusieurs

autres de ce desloyal lignage et compaignons de la traïson vindrent à

l'églyse où il avoit fait espier le conte, et vint par derrière si comme le

conte estoit acoudé et à genoulx sur le pavement; avant le toucha un petit

d'une espée trenchant et acérée toute nue, qu'il eut traite privéement pour

ce que le conte dressast un petit la teste et estendist le col, pour luy

mieulx assener. Et si comme le conte dressast la teste, le traitre qui son

coup avoit entendu lui fist au premier coup voller la teste. Et ainsi le

meurtrier occist son seigneur si comme il parloit à Dieu en oroison. Et les

autres qui compaignons estoient de la traïson et du meurtre s'esjoyssoient

et glorifioient en son sang espandre et en lui despécier. Et pour ce qu'il

estoient venus à chief de leur forsennerie démenoient grant joye, car leur

iniquité mesmes les avoit aveuglés. Et plus encore faisoient les

desloyaulx: car tous les chastelains et les nobles barons le conte qu'il

povoient encontrer occioient-il et faisoient mourir de mort trop cruelle;

et mesmement ceulx qu'il trouvoient désarmés et desgarnis.

Quant les murtriers se furent saoullés de sanc humain espandre, si

revindrent au conte et l'enterrèrent dedens l'églyse mesme, pour ce qu'il

ne fust plus honnorablement enterré né ploré, et que pour sa noblesse et sa

glorieuse mort le menu peuple qui tout s'en enrageoit, ne fust encore plus

encouragié de luy vengier; et ainsi firent saincte églyse fosse et repaire

de larrons et garnirent l'églyse et la maison du conte qui au moustier

tenoit, et tirèrent et amenèrent tant de garnison et de vitaille comme il

peurent pour eux garnir et deffendre, et pour la terre mettre souz eux par

force et par orgueil. Les barons de Flandres, qui ceste traïson n'avoient

de riens consentie, firent moult grant duel quant il sceurent ce

merveilleux et horrible fait, et luy rendirent son obsèque de pleurs et de

larmes. Après, le mandèrent au roy qui jà le sçavoit bien par renommée qui

en maintes contrées l'avoit jà espandue. Et quant le roy le sceut, si fu

moult esmeu pour l'amour de pitié et de justice et pour l'affinité du

lignage que le conte avoit à luy: et pour prendre vengence de si mortelle

traïson s'en entra en Flandres; né oncques pour parece né pour la guerre

qu'il avoit au roy d'Angleterre et au conte Thibaut n'en laissa. Et tout

premièrement fist conte de Flandres Guillaume qui avoit esté fils au conte

Robert de Normandie et qui depuis fu roy de Jhérusalem; car elle[593] lui

appartenoit par droit de héritage, après la mort d'icelluy Charles qui

ainsi fu murtri comme vous avez oï; et quant il fu venu à Bruges par moult

sauvage terre et estrange, il assiégea les traitres en l'églyse et en la

tour qu'il avoient garnie et leur tolli toutes vitailles fors celles qui

estoient en leur garnison qui jà estoient malmises et corrompues par la

vengeance Nostre-Seigneur.

Note 593:

Elle.

La comté de Flandres. Les droits de Guillaume,

d'ailleurs contestés par Thierry d'Alsace, étoient fondés sur

l'alliance de son grand oncle Guillaume-le-Conquérant avec Mathilde

de Flandres, fille de Baudouin V.

Et quant il les eut jà destrains et justiciés, il laissièrent l'églyse et

retindrent la tour pour eulx garantir. Un peu après commencièrent à se

désespérer de leurs vies. Lors avint que le desloyal Bouchart s'en fouit et

eschappa de léans par le consentement de ses compaignons; en talent[594]

avoit de fouir hors du pays, mais il ne put pour son desloyal peché qui

l'encombroit. Et en la fin se mist-il en la fermeté d'un sien famillier où

il fu entreprins par le commandement du roy: prins fu et amené devant luy

et lors lui fu quise[595] une chétive manière de mort pour sa lasse vie

finer. Ce fu que il eust les yeux trais et la face toute despéciée, et fust

tout trespercié de fleiches et de dars et si fust encore lié tout envers

sur une haulte roe et habandonné aux corbeaux et aux aultres oyseaux; et

ainsi fina sa doulente vie. Et au dernier, pour vengeance de luy, fu getté

en un lieu puant et ort, né oncques n'eut aultre sépulture. Un aultre

traitre, qui chief estoit de celle traïson, et Bertoux avoit nom, s'en

voulut aussi fouyr; et touteffois combien qu'il allast par le pays à sa

volenté, retourna-il au dernier par sa male aventure; et disoit teles

paroles par orgueil: «Qui suys-je né qui me osera prendre né que ay-je

forfait pour quoy on me doye prendre?» Touteffois fu-il prins par les siens

mesmes et présenté au roy, et fu incontinent jugié de telle mort comme il

avoit desservie. Pendu fu à une haulte fourche et un mastin en près luy: en

telle manière que le mastin li desmachoit et demangeoit tout le visiage;

toutes les fois que l'en feroit le chien, il se aïroit et s'en prenoit à

luy et le dérompoit tout. Et aucune fois avenoit, ce qui est honte à dire,

qu'il le conchioit tout. Ainsi morut le desloyal. Les aultres, qu'il avoit

assiégés dedens la tour, contraignit par maintes angoisses tant qu'il les

prist et les fist getter jus de la haulte tour l'un après l'aultre, voyant

toute leur parenté; et tous se rompirent les cols et espandirent les

cervelles. Un en y eut de ce complot qui avoit nom Ysaac, qui se bouta en

une abbaye et se fist tondre comme moyne; mais tantost qu'il fu sceu il en

fu trais hors et pendu à une fourche.

Note 594:

Talent.

Désir.

Note 595:

Quise.

Cherchée.

Quant le roy eut ainsi fait justice des murtriers, il s'en alla à Ypre le

chastel, contre Guillaume le bastard qui ceste traïson avoit pourparlée et

bastie, pour prendre vengeance de luy comme des aultres; et celluy

Guillaume avoit jà tant fait qu'il avoit alié et atraict à luy par menaces

et par losenges ceulx de Bruges. Et si comme le roy approcha d'Ypre, celluy

Guillaume vint contre luy à trois cens chevaliers, les heaulmes vestus.

Adont se mist une partie des gens le roy en conroy et se tournèrent vers

les gens Guillaume et l'autre partie se fery au chasteau par une des

portes; et ainsi le prindrent et furent les gens de Guillaume desconfis et

prins et menés devant le roy. Et pour ce qu'il avoit tendu à avoir la conté

de Flandres par traïson et par murtre, aussi en fu-il déshérité et bouté

hors par jugement droicturier. Par ces manières de vengeance fu Flandres

toute lavée et ainsi comme baptizée. Et quant le roy eut ainsi mis en la

conté de Flandres Guillaume le Normant, si comme vous avez oï, si s'en

retourna en France.

XXI.

ANNEE: 1130.

Coment le roy alla assegier Thomas de Malle au chasteau de Couci, et coment le conte Raoul de Vermendois le navra à mort, et coment le desloyal escommenié mourut sans recongnoistre son Sauveur. Et puis, coment le roy prist le chasteau de Livri sus le conte Amaury de Montfort.

Une aultre vengeance auques[596] semblable à ceste fist une aultre fois le

roy, dont Dieu luy sceut bon gré, si comme nous cuidons, quant il destruist

et attainst soudainement, ainsi comme un tison fumant, un desloyal, Thomas

de Malle, qui l'églyse de Dieu grevoit et destruisoit de tout son povoir né

ne craignoit né Dieu né homme.

Note 596:

Auques.

Presque.

Par maintes grans plaintes que le roy eut de luy plusieurs fois, fu meu

d'aller à Laon pour vengier les églyses du cruel tirant. Là luy fu

conseillié et loé des évesques et des barons du royaume et mesmement du

conte Raoul de Vermendois, qui après le roy estoit le plus puissant de

celle contrée, qu'il mist le siège entour le chasteau de Coucy. Et si comme

le roy chevauchoit vers ce chasteau, si luy vindrent à l'encontre les

espies qu'il avoit devant envoyés pour espier de quelle part le chasteau

estoit plus légier à assiéger, qui pour voir luy firent entendant que ne

povoitestre assiégé sé ce n'estoit de trop loing. Lors luy commencièrent

plusieurs à desloer et à prendre aultre conseil[597]; et il leur respondit

selon la noblesse de son cuer: «A Laon, dist-il, est ce conseil remés; car

pour mort né pour vie ne peut estre le conseil changié qui là nous a esté

donné: trop en seroit abaissié nostre honneur sé pour un excommenié nous en

retournions vaincus.» Itant respondit et puis se mist en la voie, jà soit

ce qu'il fust jà moult pesant et moult chargié de chair. Parmy forets et

parmy désers sans chemin et sans voie (qui estoient estouppées par ceux de

la partie d'icelluy Thomas) se mist, et tant erra deçà et delà qu'il

approcha du chasteau à grant travail de luy et de tout son ost. Et quant il

en fu bien près, on vint noncier au conte Raoul que l'en avoit basti un

grant agait de l'autre part du chemin pour l'ost du roy destourber et

desconfire. Tantost s'arma le conte et s'en alla celle part luy et un peu

de ses chevaliers, par une voye couverte et occulte. Avant envoya de ses

chevaliers et il les suivit tantost à pointe d'esperon; et quant il fu là

si trouva jà cellui Thomas chéu et abattu. Tantost luy couru sus l'espée

traicte et le navra à mort, et tantost l'eust occis s'il n'eust esté

destourbé. Prins fu et à mort navré présenté au roy, et par le conseil de

tous et des royaulx et des siens mesmes fu emporté à Laon. Le jour après

habandonna le roy sa terre[598] et fist rompre ses estans, et par tant

voulut espargner au pays et à la terre dont il tenoit le seigneur. Et quant

il[599] fu amené à Laon, si ne voulut accorder, né par menacier, né par

blandir né sermoner qu'il voulsist rendre les marchéans qu'il avoit prins

au conduit du roy et mis en prison par trop fière traïson; et quant il eut

fait venir sa femme par l'ottroy du roy, si faisoit le desloyal plus grant

semblant d'estre dolant et courroucié de ce qu'il luy demandoit les

marchéans que de ce qu'il se mouroit. Et quant il approcha de la mort, pour

la douleur de ses playes qui par trop le destraignoient, si luy

conseillèrent plusieurs qu'il se fist confesser et qu'il receust son

Sauveur, lequel moult envis leur ottroya; et tout ainsi comme le précieux

corps de Jhésuchrist fu apporté dedens la chambre où le chétif gisoit, si

advint, ainsi comme sé Nostre-Seigneur Jhésucrist ne voulsist entrer au

corps de ce chétif vaissel, si tost comme le felon leva le chief, tantost

cheut arrière le col brisé tout mort; et ainsi rendi l'esperit sans

recevoir le vray corps Nostre-Seigneur Jhésucrist.

Note 597: Cette traduction est embarrassée. Suger est plus net:

«Festinante autem rege ad castrum, quum qui missi fuerant opportunum

explorare accessum, importunum omnino et inaccessibile renunciassent,

et à multis angariaretur, juxta audita, consilium mutare debere; rex

ipsa indignatus animositate:

Lauduni

, inquil, etc.»

Note 598: Le texte de Suger offre ici quelques difficultés.

«Publicata terra plana ejus, ruptisque stagnis, quia dominum terræ

habebat terræ parcens, etc.» M. Guizot traduit: «Les champs qu'il

possédoit furent vendus au profit du fisc, on rompit ses étangs,

etc.» Ne seroit-ce pas plutôt:

Ce que Thomas possédoit dans la plaine fut confisqué?

Et quant aux étangs, ne s'agiroit-il pas des

eaux que Thomas aurait fait couler de la rivière dans les plaines,

pour embarrasser la marche du roi?

Note 599:

Il.

Thomas de Marle.

Le roy, qui plus ne voulut déchacier né le mort né sa terre, osta les

marchéans de la main à la dame et de ses fils, et prist grant partie de ses

trésors; et mist paix au pays et aux églyses par la mort au tirant, et puis

retourna à Paris.

Une aultre fois avint que un grant contens sourdi entre le roy et Amaury de

Montfort, par la hayne Estienne le Gallendois, pour la raison de la

séneschaucie de France; et combien que le conte eust grant ayde et grant

secours du roy Henry d'Angleterre et du conte Thibaut, si ne laissa-il

aincques qu'il n'allast assiéger le chasteau de Livry; et tant y fist

lancier pierres et mangonneaux, qu'il le prist par force et l'abattit à

terre jusques aux fondemens. Là eut le conte Raoul de Vermendois l'ueil

crevé d'un quarreau, à un assault où il se portoit moult vaillamment; et

tant les mena par force de guerre, qu'il lui quittèrent la séneschaucie et

l'éritaige qui y appartenoit.

En celle guerre meisme fut le roy durement navré d'un quarreau, parmy la

cuisse; comme celuy qui tousjours fu prest et alègre de sa main à courre

sus ses ennemis; et combien qu'il fust trop durement blessié si s'en

déportoit-il moult bien, et par trop grant vigueur souffroit et prisoit peu

sa playe.

XXII.

ANNEE: 1130.

Du descort de l'églyse de Rome par l'eslection de deux apostoles; desquels l'un, qui Innocent fu appelé, s'en vint en France, et le roy le reçut honnorablement, et à l'exemple de luy, l'empereur et plusieurs autres princes. Et coment il célébra la Résurrection à Saint-Denys.

En ce point avint que l'églyse de Rome fu en grant trouble par un descort

qui sourdi entre les cardinaux. Car il avint que l'apostole Honnoré

trespassa de ce siècle; et les plus saiges et les plus preudommes de la

court de Rome s'accordèrent à ce qu'il s'assembleroient à Saint-Marc et non

mie ailleurs; et pour oster toute noise et tout trouble esliroient et

feroient commune élection, si comme il est de coustume en l'églyse de Rome.

Et ces preudommes estoient ceux qui plus privés et plus familliers avoient

esté de l'apostole. Et avant que son trespassement fust publié né manifesté

esleurent une honorable personne: ce fu Grégoire, diacre cardinal de

l'églyse de Rome. Et les autres qui la partie Pierre Léon soustenoient

s'assemblèrent ailleurs[600] et les aultres semondrent d'assembler avec

eux, par le commun accord qu'il avoient entre eulx mis. Et quant il

sceurent le décès du pape, si esleurent Pierre Léon, un prestre cardinal,

par l'assentement du plus des cardinaulx, des évesques et des haux hommes

de Rome. Et ainsi par ce cisme qui entre eux sourdit decoppèrent la robe

sans cousture de Nostre-Seigneur Jhésucrist et firent partison de saincte

églyse qui est une mesme chose en Dieu.

Note 600:

Ailleurs.

Suger dit au contraire que ce fut dans

Saint-Marc, suivant la convention précédente. «Apud S. Marcum pro

pacto alios imitantes, convenerant.»

Et tandis comme chascun se deffendoit, les uns admonestoient les aultres et

enlaçoieut, et les autres excommunioient comme ceux qui jugement

n'attendoient fors le leur. Quant le devant dit Grégoire, qui Innocent fu

appellé, vit que la partie Pierre Léon surmontoit la sienne, par la force

de son grant lignage et par l'ayde des Romains, si ordonna à issir de la

cité, pour ce qu'il peust mieulx avoir ayde à conquerre la seigneurie de

tout le monde après Dieu. Et ainsi s'en vint par navie vers la terre de

France pour avoir ayde et refuge au noble royaume de France. Avant envoya

ses messages au roy Loys et lui requist son ayde et secours et à sa

personne et à l'églyse de Rome. Et le roy, qui tousjours fu ententif et

dévost à saincte églyse deffendre, assembla tantost un concile d'évesques,

d'archevesques, d'abbés et d'autres religieux. Là enchercha et enquist de

la personne et de l'élection; car maintes fois avient que l'élection de

l'églyse de Rome est moins ordonnéement faite qu'elle ne devroit, pour le

tumulte et le triboul des Romains. Et lors le roy, par le conseil du

concile, s'assenti à l'élection et promist à la maintenir et deffendre.

Quant ce fu fait si envoya à luy ses messages à l'abbaye de Clugny et par

eux luy offri soy, son royaume et son conseil. Et quant il sceut qu'il

approchoit, si luy alla à l'encontre jusques à Saint-Julien-sur-Loire[601],

avec luy, sa femme et ses enfans. Et quant il vint à luy, si luy alla au

pié, son chef dénué[602] qui tant de fois avoit esté couronné et s'enclina

aussi doulcement comme il eust fait au sépulcre Saint-Pierre duquel il

estoit vicaire, et luy promist de rechief soy et son règne et son conseil,

de bon cuer et de loyal.

Note 601:

Saint-Julien.

Il falloit:

Saint-Benoît

, avec Suger.

Note 602:

Denué.

Découvert.

A l'exemple de luy vint aussi à l'encontre de luy jusques à Chartres le roy

d'Angleterre. Lequel enclin à ses piés luy offrit aussi son service et son

règne. Ainsi s'en alla jusques en Lorraine visitant l'églyse de France. Au

Liège luy vint à l'encontre l'empereur Henry à grant tourbe d'archevesques,

d'évesques, d'abbés et de barons d'Allemaigne, et descendi humblement

devant la grant églyse et luy vint à l'encontre tout à pie parmy la saincte

procession en guise de varlet. En l'une des mains tenoit une verge ainsi

comme pour le deffendre, et en l'autre main tenoit le frain du blanc cheval

sur quoy l'apostole séoit; et ainsi le mena et conduit comme son seigneur.

Et puis qu'il fu descendu le porta en soustenant tant comme la procession

dura, et pour ce manifesta aux privés et aux estranges la haultesse qui en

luy estoit.

Après ce, quant l'apostole eut confermée paix entre l'églyse de Rome et

l'empire, si luy pleut à retourner en France et tenir court en l'églyse

Saint-Denys, comme en sa propre fille, à la Pasque qui approchoit. Là fu

receu à procession deux jours devant la cène et moult fist-on grant joye de

sa venue. Léans célébra la sollennité de Pasques.

Mais cy voulons-nous racompter coment et en quelle manière il vint à

l'églyse. Entour luy estoient ceulx de sa privée mesnie, comme chambellans,

clercs et chapellains qui l'eurent appareillé à la guise de Rome et luy

avoient mis au chief sa mitre avironnée d'un cercle d'or, et l'avoient

vestu d'un moult riche ornement. Et ainsi paré l'amenèrent sur un cheval

couvert d'une couverture blanche et vindrent chevauchant deux à deux devant

luy aussi comme à procession. Et les barons fievés de l'églyse et les

chastellains le menoient et conduisoient à pié, comme noble sergent, parmy

le frain, et les autres alloient à pié devant qui gettoient grans poignées

d'argent et grant plenté de monnoye, pour la grant tourbe du peuple

departir. Le chemin resplendissoit tout de parement et de draps de soye et

de pailes qui estoient pourtendus aux lances et aux perches que on avoit

fichées en terre: avec la chevalerie et le grant peuple qui là assembla y

acouru la synagogue des Juifs de Paris; et apportèrent avec eux leurs

rolles où les dix commandemens de la loy sont escris. Et quant il les vit,

si dist de la pitié qu'il eut d'eux telles parolles: «Dieu tout puissant,

oste de vos cuers par vous sa pitié la couverture qui goutte ne laisse

véoir[603].» Ainsi s'en vint en l'églyse des corps sains qui resplendissoit

toutes de couronnes d'or et d'autres riches paremens. Et lors en

remembrance et en signifiance du vray aignel, célébra le sacrement du vray

corps Nostre-Seigneur. Quant la messe et le service furent chantés, si

allèrent mengier et furent les tables mises parmy le cloistre. Là furent

servis de divers mez largement et moult honnorablement, pour l'onneur de

luy et de la haulte feste. Trois jours après le jour de Pasques se départi

de l'églyse, à grant grace et à grant promesses de son conseil et de son

ayde. Ainsi s'en alla par Paris visitant les églyses de France et relevant

sa disete et sa povreté de leur trésors et de leur richesses. Et quant il

eut esté et visité là par terre tant comme il voulut, si luy pleut à

demourer à Compiègne.

Note 603: Voici un exemple de tolérance et de charité qui ne pourroit

être aujourd'hui surpassé. «Ab ore ejus hanc misericordiæ et pietatis

obtinet supplicationem:

auferat Deus omnipotens velamen à cordibus vestris!

»

XXIII.

ANNEE: 1131.

Coment Phelippe, l'ainsné fils le roy, fu mort à Paris par un pourcel. Et coment le roy fist coroner son autre fils Loys a Rains. Après, de la pesanteur le roy et de la fierté de son cuer. Après, coment il destruist le chastel de Saint-Briçon, pour la roberie du seigneur.

En ce point avint une meschéance qui oncques n'avoit esté oïe au royaume de

France. Phelippe l'ainsné fils du roy chevauchoit un jour en une rue dehors

les murs de Paris avec sa compaingnie. Si luy vint à l'encontre un déable

de porc, par quoy son cheval s'eschauffa par dure destinée; chéoir le fist

sur une dure roche si que tout fu défoulé et acoré[604], du pié du cheval.

Si fu trop grant douleur, car il estoit damoyseau de trop grant beaulté et

entachié de toutes bonnes meurs, confort et espérance aux bons et crainte

et paour aux mauvais. Pour ceste meschéance fu toute la cité et tous ceux

qui là estoient ainsi comme mors et abattus.

Note 604:

Acoré.

C'est-à-dire il eut le cœur brisé.

A ce jour que ce avint avoit le roy son père semont ses osts pour ostoier.

Tous crioient et urloient pour la douleur qu'il avoient du tendre damoysel;

lors le prirent ceux qui près estoient, et estoit jà près que tout mort, et

l'emportèrent en la plus prochaine maison d'illec; si morut ainsi comme à

la mienuyt. Le deul et la douleur que le père et la mère et les barons

menoient ne pourroit nul racompter né retraire. Porté fu en l'églyse

Saint-Denys en la sépulture aux roys, à grant compaignie d'archevesques,

d'évesques et de barons. Et fu enterré comme roy moult honnorablement en la

sénestre partie de l'autel de la Trinité. Et son père qui trop estoit de

grant sens et de grant confort, après le grant deul qu'il avoit eu, receupt

le conseil et le confort de ses amis; après luy conseillèrent ses privés

amys qu'il fist couronner et enoindre de saincte onction Loys son beau fils

et le fist en son vivant compaignon de son règne, pour plus plaissier ses

ennemis et abaissier les envieux et mesmement pour la foiblesse de son

corps qui tant avoit esté péné et travaillié et débrisié pour les longues

guerres, dont il estoit si malade devenu que ses privés amis estoient en

grant doubte de le perdre soudainement. Au conseil de ses amis ouvra le

roy, à Rains fist assembler ses barons; son fils Loys et sa femme la royne

mena en ce général concile que pape Innocent y avoit fait assembler. Là

fist son fils enoindre et couronner, et sembla bien à aucuns que son povoir

et sa seigneurie en deust accroistre et multiplier, pour ce que il receut

illec la bénédiction de tant d'archevesques et d'évesques que de France que

d'Espaigne que de Lorraine que d'Angleterre.

Après ce que le roy fu presque allégié du deul de son fils mort, pour la

joye du vif, et il s'en fu revenu à Paris, le pape Innocent esleut à

demourer en la cité d'Aucerre pour faire illec son estaige et sa demeure.

Mais après ce eut occasion de retourner à Rome, pour le conduit l'empereur

Lothaire qui luy avoit promis qu'il le conduiroit à Rome à force et qu'il

déposeroit Pierre Léon.

Et quant il furent là allés ensemble et il eut couronné l'empereur, si ne

peut oncques avoir paix durant la vie dudit pape Léon pour le contredit de

Romains. Mais quant il fu mort si revint saincte églyse en paix, après les

grans adversités et les grans tribulacions qu'elle avoit si longuement

souffert qui trop longuement l'avoient travailliée et dégastée. Et

l'apostole qui longuement avoit esté travaillié, séist en son siège qu'il

amenda moult et ennobli, par mérite d'office et par honnesteté de bonne

vie.

Jà estoit le roy Loys moult affoibly et débrisié pour la pesanteur et pour

le fais de son corps, et pour les grans travaus qu'il avoit longuement

souffers et pour les longues guerres qu'il avoit menées; et défailloit jà

moult du corps et non mie de cuer. Car de si grant noblesse et de si grant

cuer estoit en l'aage de soixante ans, que pour rien il ne souffrist chose

qui luy tournast à déshonneur né au déshéritement de son règne. Et sé la

grosseur et la pesanteur ne l'eust empeschié, assez plus légièrement eust

surmonté ses ennemis. Et pour ce qu'il se sentoit agregié[605] se

plaignoit-il souvent, et disoit telles parolles: «Las comme sommes de fèble

nature et chétive qui oncques ne povons avoir nul scavoir et povoir

ensemble. Sé je eusse sceu en ma jeunesse ce que je scay et peusse ores

ainsi comme je povois lors, je conquisse grans terres et grans règnes[606]»

Note 605:

Agrégié.

Appesanti.

Note 606: On retrouve ici le proverbe:

Si jeunesse savoit et vieillesse pouvoit.

«Si enim juvenis scissem, aut modo senex

possem.»

En celle mesme foiblesse, où il gisoit presque du tout au lit, se

maintenoit-il si fièrement et si vertueusement qu'il contrestoit au roy

d'Angleterre et au conte Thibaut qui toute sa vie le guerroièrent, et à

tous ses aultres ennemis: si que tous ceux qui le véoient et oyoient parler

de ses merveilleux fais louoient sa grant valleur et sa grant noblesse de

cuer et ploroient la foiblesse de son corps. En celle mesme angoisse et si

blessié comme il estoit en la cuisse que à paine se povoit il porter, alla

contre le conte Thibaut au chasteau de Bonneval[607], qu'il fist ardoir,

fors que le cloistre aux moynes qu'il commanda à garder. Après il destruist

aussi Chasteau-Renart[608] qui mouvoit aussi du conte Thibaut. Et ce

fist-il faire par ses gens et par ses barons, car il n'y povoit estre

présent pour sa maladie.

Note 607:

Bonneval.

Aujourd'hui ville du diocèse de Chartres, à

quatre lieues de Chateaudun.

Note 608:

Chasteau-Renart

, dans le Gâtinois, à quatre lieues de

Montargis.

Après ce un peu de temps, mena-il le dernier ost qu'il put oncques mener à

St-Briçon-sur-Loire[609]. Le chasteau ardit et destruist et prinst la tour

et le seigneur pour sa roberie et pour ce qu'il brisoit les chemins et

desroboit les marchéans. Si comme il fu retourné de cest ost, luy prist une

maladie au neuf chasteau de Montrichier[610] et une menoison[611] forte

dont il estoit coustumier. Et celluy qui trop estoit de hault conseil et de

grant pourvéance commença à mettre conseil en soy-mesme pour son ame, car

souvent estoit en oroison. Et une seule chose désiroit en son cuer,

c'estoit qu'il péust estre apporté aux glorieux martirs Saint-Denys et ses

compaignons, ses maistres et ses seigneurs; car son intencion estoit qu'il

se desmist en leur présence de la couronne et du règne et des royaulx

garnemens, et prist l'abit Saint-Benoist et devinst moyne de léans. Si

peuvent regarder ceulx qui seullent blasmer la povreté de religion[612]

coment les archevesques et les évesques s'en fuient à la deffence et à la

seurté de religion qui meine et conduit ceulx qui tenir la veullent à la

vie perdurable[613].

Note 609:

Saint-Briçon

ou

Saint-Brisson

, village du Gâtinois, à

une lieue de Gyen.

Note 610:

Montrichier.

Montrichard; ou peut-être

Trechier

,

village du Vendomois. Suger l'appelle

Monstrecherius

.

Note 611:

Menoison.

Dyssenterie, diarrhée.

Note 612:

Religion.

Etat monastique.

Note 613 La phrase de Suger n'est pas rendue: «Videant qui monasticæ

paupertati derogant, quomodò non solum archiepiscopi, sed et ipsi

reges, transitoriæ vitam æternam præferentes, ad singularem monastici

ordinis tutelam securissimè confugiunt.»

XXIV.

ANNEE: 1137.

De la confession le roy et coment il s'appareilla à son trespassement. Et puis après, parle de ses lez. Et coment il se maintint vertueusement en sa glorieuse confession, au recevoir son Sauveur.

En ceste manière estoit le roy troublé de jour en jour, et buvoit tant de

manières de beuverages et de poudres par les phisiciens et par les mires

que trop le travailloient si que c'estoit merveille comme il le povoit

souffrir. Car néis les sains et les vertueux ne l'eussent peu endurer. Et

entre ces angoisses et ces destresses estoit-il moult doulx et amiable à

tous par sa débonnaire nature, comme celuy qui à tous faisoit beau samblant

et les recevoit tout aussi comme s'il ne sentist nul mal.

Et quant il se senti si attaint et si affoibly de celle maladie, si eut

desdaing de mourir vilement et soudainement ainsi comme mains hommes font.

Si assembla les religieux hommes de son royaulme, archevesques, évesques,

abbés et mains aultres prélas de saincte églyse et leur requist à estre

confés pour la révérence de la divinité et pour l'amour aux sains angles,

tout en appert, mise arrière toute honte et toute vergoigne. Et se voulut

garnir du corps et du précieux sang Jhésucrist. Et si comme il se hastoient

de ce faire, le roy se leva soudainement et s'appareilla et vesti, et yssi

de la chambre où il gisoit, dont il se merveillèrent tous. Et vint moult

doulcement contre le précieux corps Jhésucrist, voyans tous clercs et lays,

et se desvesti du règne en confessant et en régéhyssant que mauvaisement

l'avoit gouverné. Et après revesti son fils Loys de l'annel, et luy

commanda illec et le conjura, sur sa foy et sur son serment, qu'il gardast

et deffendist de son povoir toute sa vie saincte églyse et luy gardast sa

roicture, et deffendist les povres gens et les orphelins et gardast à

chacun son droit. Et qu'il ne prist nul homme en sa court s'il ne

forfaisoit illec présentement[614].

Note 614: «Neminem in curiâ suâ capere, si non præsentialiter ibidem

delinquat.»

Après départi tout son trésor aux églyses et aux povres gens, et toute sa

vaissellemente d'or et d'argent et toutes ses coutes pointes et son riche

atour de ses garde-robes et tout son meuble et quanqu'il avoit, pour

l'amour de Dieu; né oncques rien n'y laissa, né ses riches manteaux né ses

riches garnemens jusques à la chemise, qu'il ne départist. En ses lais

qu'il faisoit ainsi, n'oublia pas ses seigneurs les martirs glorieux et ses

compaignons; mais leur donna sa riche chappelle, c'est assavoir son

précieux texte d'or et de pierres précieuses[615], un encensier d'or de

quarante onces, et les chandelliers de fin or, du poids de cent et soixante

onces, et une précieuse jacinte qui avoit esté à son ayolle la royne de

Roussie qu'il bailla de sa propre main à l'abbé Sugier qui là estoit

présent et luy commanda qu'elle fust mise et assise en la précieuse

couronne des saintes espines. Ces choses envoya à l'églyse par celluy

Sugier qui son clerc estoit et l'avoit nourri; et promist qu'il iroit là au

plus tost qu'il pourrait.

Note 615: «Textum preciosissimum auro et gemmis.» J'ai déjà dit que

le mot

texte

s'appliquoit à tous les livres saints recouverts de

lames d'ivoire ou de métal.

Et quant il se fu ainsi déchargié de tout quanqu'il avoit au monde, comme

celluy qui de la grace de Dieu estoit enluminé, si s'agenouilla

très-dévotement devant son Sauveur que celluy qui présentement avoit la

messe chantée lui avoit apporté à procession. Et quant il se fu agenouillé,

si commença à dire parolle de vray confession comme vray crestien de cuer

et de corps, et dit telles parolles non mie comme lay mais comme tres

saige devin[616] en regehissant sa créance.

Note 616: «Non tanqam illitteratus, sed tanquam litteratissimus

theologus erumpit » (Suger.)--

Regehissant

, confessant.

«Je pécheur Loys, regehis de vray cuer et croy en Dieu le Père, le Fis et

le Saint Esperit, en trois personnes un seul Dieu, et Nostre-Seigneur

Jhésucrist croy fils de Dieu le père, égal en toutes choses à luy, qui pour

le salut des ames descendi du ciel, par l'ordonnement de Dieu le père et

s'enombra au sacré ventre de la vierge Marie, où il prist vraye chair et

vraye forme d'homme, et qui en celle chair mesme mourut selon l'umanité, en

la sainte vraye croix, pour les hommes délivrer de la mort d'enfer, qui fu

au sépulcre mis dont il ressuscita au tiers jour; et monta ès cieulx où il

siet à la dextre de Dieu le père et qui vendra au grant jugement, au

dernier jour du siècle, jugier les mors et les vifs: yceste précieuse

hostie du vray corps de Dieu croy-je estre ycetui précieux corps qu'il

prist au ventre de la vierge Marie, et qu'il donna à ses disciples en la

cène, pour quoi il fissent une mesme chose en luy, et qu'il vesquissent en

luy. Et croy icelui vin ce mesme sang glorieux qui de son costé decourut en

la vraye croix sans nul doubte, et le confesse de cuer et de bouche: et par

ce hault viaticque croy-je que mon ame sera garnie et deffendue, quant elle

sera issue de mon corps, de la puissance des deables.»

XXV.

ANNEE: 1137.

Coment il s'en vint à quelque paine à Saint-Denys pour graces rendre aux martirs. Et puis, coment il envoia son fils Loys en Aquitaine pour espouser la fille le duc qui mort estoit, et pour la terre saisir. Et puis parle de son glorieux trespassement et de sa sépulture.

Après ce qu'il eut ainsi dictée la confession devant tous qui moult se

merveilloient de sa repentance, et il eut receu son Sauveur, si s'en

retourna en la chambre où il gisoit et fu ainsi comme s'il retournast à

garison; et se coucha sur une coute de lin et eut mis jus tout boban et

tout orgueil séculier. Et quant il apperceut que l'abbé Sugier, (qui

tousjours avoit esté son nourry), pleuroit de si grant si petit et si

humble[617], se tourna devers luy, et luy dist: «Beau chier amy, ne plourés

mie pour moy; mais faites feste de ce que la miséricorde Nostre-Seigneur

m'a donné povoir, si comme vous povez véoir, de me appareiller contre sa

venue.» Après ce allégea un petit et puis s'en vint si comme il put à

Meleun; moult eut grans tourbes de gens après luy qui le suivoient et qui

contre luy venoient des villes, des chasteaux et des charrues, qui

courroient à luy emmy les champs et plouroient tendrement pour l'amour

qu'il avoient à luy et pour la paix que il leur avoit tousjours gardée et

tenue; et s'en vint à Saint-Denys pour visiter les glorieux martyrs à grant

dévocion. Là fu receu du couvent et presque de tous ceulx de la terre qui

là s'estoient assemblés contre sa venue; moult débonnairement le receurent

tous, comme le débonnaire deffendeur de l'églyse et du royaume: devant les

corps saints descendit dévotement et leur rendi graces et mercy, en

plourant, des biens et des honneurs et des victoires qu'il avoit tousjours

eues, et leur prioit que désoresmais il eussent le royaume en leur

pourvéance. Et si comme il fu départi de l'églyse et il fu venu à

Bethisy[618], si vindrent à luy les messagiers au duc Guillaume

d'Acquitaine, qui luy noncièrent que le duc estoit mort en pellerinage en

la voye de saint Jacques, et avant qu'il se mist au chemin il avoit

laissiée sa terre à une sienne fille à marier qui avoit nom Alienor. Lors

se conseilla à ses princes et receut la terre et la fille et la promist à

donner à Loys son fils. Dont commença à faire appareil et à envoyer là, et

fist semondre jusques à cinq cens chevaliers et plus, tous les meilleurs

de son royaume et fist d'eulx seigneur et connestable le noble conte

Thibaut, et son cousin le vaillant conte Raoul de Vermendois et l'abbé

Sugier de Saint-Denis ettous ceulx de son conseil où il se fioit le plus.

Et les baisa tous et son fils Loys; et luy dist au départir telles

parolles: «Beau très-chier fils, la dextre de Dieu, par qui les roys

règnent, vous ait en sa sainte garde! car sé je vous perdoye et ceux qui

avec vous sont par aucune meschéance, je ne priseroie rien né moy né chose

qui soit au royaulme.» Grant plenté de ses trésors luy fist livrer

entrevoyes, affin qu'il n'eussent raison de rien tollir né de rappiner aux

bonnes gens et qu'il ne fist de ses amis ses ennemis. Tout ce luy commanda

à faire et que la chevalerie qu'il luy avoit baillée vesquit du sien toute

la voye. Atant se misrent au chemin et passèrent parmy Limosin; et quant il

furent ès marches de Bourdeaux, si tendirent leurs pavillons devant la

cité, si que le fleuve de Gironde estoit entre eulx deux, et furent illec

tant qu'il passèrent à nefs jusques à la cité. Là attendirent jusques au

dimenche que les barons de Gascongne et de Poictou furent assemblés.

Note 617: «Cumque eum de tanto tantillum, et de tam alto tam humilem,

humano more, me deflere conspiceretur....»

Note 618:

Bethisy

, en Picardie, à deux lieues du Crépy. On

reconnoît encore les restes de l'ancien château.

Quant il furent venus, le jeune Loys espousa la demoiselle Alienor en leur

présence et la fist couronner de la couronne du royaulme de France; après

s'en retournèrent par la terre de Saintes en destruisant leur ennemis et

ceux qu'il trouvèrent; ainsi vindrent jusques à Poitiers à la joye de tous

ceux de la terre. Grant chaleur faisoit en ce temps, pour quoy il furent

plus retardés de venir.

Le roy Loys, qui à Paris estoit, commença moult à empirier et du tout à

deffaillir de sa maladie qui le rassailli pour la grant chaleur qu'il

faisoit, né oncques pour la maladie ne fu moins pourveu de soy. Car tantost

comme il se sentit ainsi agrégié, il manda Estienne, l'évesque de Paris, et

Gildon, l'abbé de Saint-Victor, à qui il se confessoit plus privéement et

le plus souvent pour ce qu'il avoit l'abbaye fondée et faicte dès les

fondemens. Adont se confessa de rechief et regarni l'issue de sa vie pour

recevoir le vray corps Jhésucrist. Après commanda que il fust porté à

l'églyse des martirs, pour rendre son veu qu'il avoit voué et de cuer et de

bouche; mais pour ce que sa maladie luy agrégea si durement, il accomplit

son veu de cuer et de volenté. Lors commanda à estendre un tapis par terre

et espandre par-dessus cendre en croix, et puis fu couché dessus par les

mains de ses gens qui se occioient de deul. Après seigna et garny son front

et son pis du signe de la saincte croix; et ainsi rendi l'ame à son

Créateur dignement et sainctement, après qu'il eut régné trente ans et de

son aage entour soixante ans; le premier jour d'aoust trespassa en l'an de

l'Incarnacion mil cent trente-sept.

Quant le corps de luy fu lavé et ensevely honnestement, si comme il

appartenoit à tel prince, si le misrent en riches dras de soye et

l'emportèrent en l'églyse Saint-Denys pour l'enterrer. Si y avoit jà devant

esleu sa sépulture. Si avint une chose qui pas ne fait à oublier: car

celluy noble roy dont nous parlons avoit maintes fois tenu parolles de la

sépulture aux roys, quant il parloit privéement à ses gens et souloit dire

entre ses autres parolles que celluy seroit beneuré qui pourroit avoir

sépulture entre l'autel de la Trinité et l'autel des Martirs et des autres

corps sains qui léans sont; car par la prière aux pelerins et aux passans

auroit de léger pardon de ses péchés; et pour ces parolles leur

monstroit-il la volenté de son cuer et désiroit à estre illec enterré. Et

avant que l'abbé Sugier allast avec son fils Loys en Acquitaine, avoit-il

jà pourveu où il gerroit, entre luy et le prieur Hervy de celle églyse, et

c'estoit devant l'autel de la Trinité contre la sépulture

Charles-le-Chauve, l'autel entre deux. Mais celluy lieu fu si estroit et fu

trouvé si encombré de la sépulture du roy Charles, que ce ne put estre fait

qu'il avoit proposé à faire, car il n'est né droit né coustume de remuer né

desherbergier les roys né les empereurs de là où il ont esleues leur

sépultures.

Après ce firent essaier, oultre la cuidance de tous, où il avoit convoitié

à estre mis, si comme il avoient plusieurs fois entendu à ses parolles: et

cuidoient bien que celluy lieu fust empeschié d'aucun roy ou d'aucun hault

prince. Mais ceulx qui cerchèrent trouvèrent autant de lieu vuyde, né plus

né moins comme il convenoit, aussi comme sé l'en l'eust proprement fait

pour luy. Là fu mis et enterré dévotement à grans oroisons et à grans

obsèques, où il attend la compagnie de la commune résurrection des sains.

Et de tant est-il plus prochain en esperit en la compaignie des sains,

comme il est plus près en terre de corps des martirs, en attente d'avoir

leur ayde; duquel l'ame dévote par les mérites aux sains peut estre mise en

la joye de paradis, pour le mérite de la passion Jhésucrist qui mist son

ame et son corps en la croix pour le salut du siècle, et qui vit et règne

sans fin par tous les siècles des siècles. Amen.

Ci fenist la via et les fais du gros roy Loys.

CI COMENCENT LES FAIS LE

ROY LOYS, PÈRE AU

ROY PHELIPPE.

I.

ANNEE: 1137.

Coment le jeune roy Loys vint d'Aquitaine à Paris pour ordener le royaume et sainte églyse, après le décès de son père. Et coment tout le royaume se tint bien apayé de luy.

[619]Dès ores mais, puis que nous nous sommes acquittés de retraire en

françois la vie et les fais du bon roy Loys-le-Gros, qui tante paine

souffri en son temps et tantes batailles fourni contre ses ennemis, et tant

de durs assaux souffri pour son règne deffendre, si nous convient entendre

à poursuivre les fais de son bon fils le roy Loys, celuy qui, par la divine

inspiration, fonda l'abbaye de Saint-Port, qui ores est appellée

Barbéel[620], où il repose corporellement.

Note 619: Les

Chroniques de Saint-Denis

présentent, pour la vie de

Louis-le-Jeune, le texte traduit du latin des

Gesta Ludovici regis, filii Ludovici Grossi

, que je crois pouvoir attribuer à Suger,

contre l'opinion de dom Brial, des auteurs de l'histoire littéraire

et de M. Guizot. Les passages évidemment écrits après la mort de

Suger peuvent être considérés comme autant d'interpolations.

Note 620: L'abbaye de

Barbeaux

fut construite en 1164, non pas sur

l'emplacement de

Saint-Port

, mais à trois lieues au-dessus.

Louis VII, qui d'abord avoit choisi

Saint-Port

, en 1147, consentit

ensuite à la translation de l'abbaye bénédictine à Barbelle ou

Barbeaux. L'auteur de ses

Gestes

dit que le mausolée de Louis VII

étoit

mirifici operis

; il fut brisé dans le temps des guerres de

religion. Le cardinal de Furstemberg l'avoit fait rétablir dans le

XVIIème siècle; mais sans doute il fut de nouveau brisé en 1792.

Atant commencerons l'istoire qui dit ainsi, que le jeune roy Loys, qui au

temps son père eut esté couronné, si comme l'istoire a ci-dessus compté,

sceust assez tost par plusieurs messagiers le trespassement de son père;

après que il eut oï ces nouvelles et il eut garnie la duché d'Acquitaine

par le conseil de ses barons, si se hasta de revenir vers son royaume pour

désavancier les roberies et les guerres qui légièrement soulent sourdre ès

deviemens des roys; et s'en vint hastivement jusques à Orléans. Là appaisa

l'orgueil et la forsennerie d'aucuns musars de la cité qui pour la raison

de la commune faisoient semblant de soy reveler et descier contre la

couronne. Mais moult en y eut de ceux qui chier le comparèrent. D'Orléans

s'en vint à Paris, qui est siège royal; car là souloient les anciens faire

leur assemblées et leur parlemens, pour traicter de l'ordonnance du royaume

et de l'églyse, si comme l'en trouve ès anciennes histoires. Et ce nouveau

roy le fist ainsi, selon ce que le temps et son nouvel aage le

requerroient. Tout le royaume se tenoit à bien payé de ce qu'il avoient tel

remanant de son bon seigneur le bon roy Loys-le-Gros, et tel qui les

preudhommes soustendroit et norriroit, et les mauvais felons abattroit et

destruiroit; et de tant avoient-il plus grant joie et plus grant délit de

ce qu'il avoient droit hoir, pour le royaume gouverner de quoy paix et

honneur leur venoit, quant il regardoient l'empire de Rome et le royaume

des Anglois qui pour deffaut de droit hoir avoient receu moult grant

dommaige et maint grant destourbier et qui estoient ainsi comme decheus de

leur noble estat, au temps de lors. Car vérité fu que après la mort

l'empereur Henry qui morut sans hoir, vint un grant contens en la grant

court qui fut tenue à Mayence, où il eut, si comme l'en tesmoigne, près de

soixante mille hommes que chevaliers que autres[621]. Par ce que Ferry le

duc d'Allemaigne qui nepveu estoit à l'empereur Henry voulut avoir le règne

et l'empire après son oncle. Mais l'archevesque de Mayence et celluy de

Coulongne et la plus grant partie des princes du royaume le refusèrent du

tout, et se tournèrent à Lohier le duc de Saissongne et le couronnèrent à

Ays-la-Chappelle par l'accord du clergié et du peuple. Mais ce ne fu pas

sans grant dommaige et sans grans maulx qui après en avindrent. Car celluy

Ferry et un sien frère qui Conras avoit nom, qui après Lohier fu depuis

saisi du règne par l'ayde de leurs parens, maintes roueries et maintes

batailles firent en la terre d'icelluy Lohier, pour l'envie de ce que il

avoit esté esleu. Si fu atourné à celluy Lohier à grant los et grant

honneur de ce qu'il fu esleu au royaume d'Allemaigne gouverner, combien

qu'il n'y eust nul droit par raison de héritaige; si le tint-il et deffendi

noblement, et non mie celluy tant seullement, mais le royaume de Lombardie

et la couronne de l'empire qu'il receupt à Rome par la main du pape

Innocent; jà soit ce que les Romains en allassent à l'encontre de tout leur

povoir. Après passa par force par la province de Cappes[622] et de Bonivent

jusques en Puille qu'il conquist par force d'armes, et chassa Siculle[623]

le roy de la terre, et se saisit de la cité de Bar et de toute la terre

d'environ. Depuis avint, si comme il s'en retournoit de celle guerre à

grant victoire, qu'il morut de la mort commune qui nulluy n'espargne. Si fu

son cors porté en Sassoingne son pays dont il estoit sire et duc; et par

ces travaux qu'il souffrit pour honneur conquerre mist-il si noble fin en

sa vie[624]. Né moins maleureusement n'avint-il pas au royaume

d'Angleterre. Car après le décès du roy Henry qui fu si fier homme et de

grant renommée qui trespassa sans hoir masle, le conte Estienne de

Bouloigne son nepveu et frère au conte Thibault entra soudainement au

royaume d'Angleterre né oncques ne se prist garde à ce que le conte

d'Angiers avoit eu à femme la fille celluy Henry son oncle et enfans en

avoit eus et avoit esté emperière; ains parmi tout ce se fist couronner à

roy d'Angleterre. Ceste manière de discort qui sourdit en la terre pour

l'envie et par l'aatine[625] des princes et des barons du règne et pour la

malice des habitans du pays empira si durement celle terre qui tant avoit

esté riche et habondant, par roberies et par occisions, que plus du tiers

du royaume fu gasté et destruit. Icelle manière de péril et de meschéance

estoit grant soulas aux François, quant il véoient que les gens de ces deux

royaumes souffroient ces maulx et ces angoisses par deffault de droit hoir,

et il estoient en paix et en joye pour ce que Dieu leur avoit donné lignée

et tel remanant de leur bon seigneur.

Note 621:

Que chevaliers que autres gens.

J'ai suivi la leçon du

manuscrit de Philippe-le-Bel, n° 8396. Les leçons postérieures

rendent exactement le texte latin, dont le sens est ridicule:

Feruntur fuisse sexaginta millia militum, exceptis personis aliis et multitudine populari.

Note 622:

Cappes.

Capoue.

Note 623: Le latin dit: Le roi Sicilien:

Siculoque fugato rege.

C'étoit Roger.

Note 624: Cette incidence sur Lothaire est déjà racontée de même par

Suger dans la vie de Louis-le-Gros. (Voyez-en la traduction, vie de

Philippe I, ch. XIII.)

Note 625:

L'aatine

, l'ambition.

[626]Atant repairerons à dire ce que nous avons proposé à dire des fais

cestuy Loys selon l'ystoire, qui dit ainsi qu'il estoit de l'aage entour

quatorze ans ou de quinze et croissoit chascun jour en sens et en proesce

par la grace Nostre-Seigneur.

Note 626:

Gesta Ludovici junioris.

§ 11. Ces gestes reviennent,

comme on le voit, au temps de la vie de Louis-le-Gros. Suger en avoit

agi de même en commençant l'histoire du père.

II.

ANNEES: 1137/1145.

Coment le roy Loys fist parlement à Vezelay et fist preschier la croiserie de la sainte terre. Et coment il prist la croix et à l'exemple de luy la prisrent plusieurs barons et prélas, et mains autres.

En ce termine avint que le duc Guillaume d'Aquitaine alla en voyage à

monseigneur Saint-Jacques, et si comme Dieu voult mourut au chemin. Icelluy

Guillaume duc d'Aquitaine n'avoit de tous hoirs que deux filles dont l'une

avoit nom Aliénor et la mainsnée Aalis. Et pour ce que la duchié estoit

demourée sans hoir masle, la tint le roy en sa main; et l'ainsnée des

filles qui avoit nom Aliénor espousa par mariage, si comme l'ystoire a

dessus dit. Et l'autre mainsnée qui Aalis avoit nom donna par mariage au

conte Raoul de Vermendois. De celle Aliénor eut le roy une fille qui Marie

eut nom et depuis fu contesse de Champaigne. Et ne demoura pas longuement

après que Gauchier, le sire de Monjai, se prist à reveler contre le roy par

son orgueil et commença à travaillier et à assaillir les gens de sa terre.

Mais ce fu par sa meschéance; car le roy assembla son ost et assiégea

Monjai et le prist en peu de temps et abatti tout, et destruit jusques en

terre la forteresse qu'il trouva[627].

Note 627: Le latin des

Gesta

ajoute:

Excepta magna turri

. Ce

village se nomme aujourd'hui

Montjai-la-Tour

.

En celluy an mesme avint trop grant meschief à toute crestienté, en la

terre d'oultre-mer[628], au royaume de Jhérusalem; car les Turs s'esmeurent

à trop grant force et prisrent une noble cité qui a nom Roches[629] qui

estoit en la main des crestiens. Mais ce ne fu pas sans grant perte et sans

grant dommaige et occision de leur gens. Et pour la prise de celle cité

s'enorgueillirent à merveilles et menacièrent à occire tous les crestiens

de celle contrée. La nouvelle de celle douleur vint en France jusques au

roy Loys. Et pour l'amour du saint Esperit dont il estoit inspiré eut moult

grant douleur de ceste mésaventure, si comme il monstra depuis; car pour

ceste besongne assembla-il en cest an grant parlement au chasteau de

Vezelay. Là fist venir les archevesques, les évesques et les abbés et grant

partie des barons de son royaume; là fu saint Bernard abbé de Clervaux et

prescha-il, luy et les évesques, de la croiserie de la saincte terre de

promission où Jhésucrist conversa corporellement, tant comme il fu en ce

monde et y receupt mort au gibet de la croix pour la rédemption de son

peuple.

Note 628:

Gesta Lud. jun.,

§ 3.

Note 629:

Roches.

Latinè:

Rohes

. C'est

Edesse

.

Lors se croisa le roy tout le premier et après luy la royne Aliénor sa

femme. Et quant les barons qui là estoient assemblés virent ce, si se

croisèrent tous ceulx qui cy sont nommés: Alphons le conte de Saint-Gille,

Thierry le conte de Flandres, Henry fils le conte Thibault de Blois qui

lors vivoit, le conte Guy de Nevers, Regnault son frère, le conte de

Tonnoire, le conte Robert frère du roy, Yves le conte de Soissons,

Guillaume le conte de Pontieu, et Guillaume le conte de Garente[630];

Archambault de Bourbon, Enguerrant de Coucy, Geuffroy de Rencon, Hue de

Lisignien, Guillaume de Courtenay, Régnault de Montargis, Ytier de Toucy,

Ganchier de Monjay, Erard de Bretueil, Dreue de Moncy, Manassiers de

Buglies[631], Anseau du Tresnel, Garin son frère, Guillaume le Bouteiller,

Guillaume Agillons de Trie, et pluseurs autres chevaliers et merveilles de

menues gens. Des prélas se croisèrent Symon évesque de Noyon, Godeffroy

évesque de Lengres, Arnoul évesque de Lisieux, Hébert l'abbé de

Saint-Père-le-Vif-de-Sens, Thibault l'abbé de Saincte-Coulombe et maintes

autres personnes de saincte églyse.

Note 630:

Garente.

L'Historia qloriosa regin Ludovici VII dit

Garennæ

, au lieu du

Guarentiæ

des

Gesta

. C'est

Varennes

.

Note 631:

De Buglies.

Sans doute

De Bueil

.

En ce mesme termine se croisa Conrat l'empereur d'Allemaigne et son nepveu

Ferry duc de Saissongne qui depuis fu empereur, quant il oïrent la

mésaventure de la terre d'oultre-mer. Et Amés se croisa le conte de

Morienne, oncle du roy Loys, et pluseurs autres nobles barons de grant

renommée.

Après ces choses ainsi faites, Ponce l'honnorable abbé de Vezelay fonda une

églyse en l'onneur de saincte croix au lieu de celle saincte prédicacion,

pour l'honneur et pour la révérence de la croix que le roy et les barons

avoient illec prise, tout droit au pendant du tertre, entre Ecuen et

Vezelay, en laquelle Nostre-Seigneur a depuis monstré mains appers

miracles. Tout l'an entier porta le roy la croix, de l'une Pasques jusques

à l'autre et oultre jusques à la Penthecouste, ains qu'il meust

oultre-mer[632].

Note 632: Une chose que l'on n'a pas encore remarquée et qui pourtant

méritoit de l'être, c'est qu'à compter du chapitre suivant jusqu'au

retour de Louis VII en France,

les Chroniques de St-Denis

copient

littéralement l'ancien texte françois des

Histoires d'outre mer

par

Guillaume de Tyr. Celles-ci avoient été répandues en France, à peu

près dans le même temps, c'est-à-dire vers 1200, en latin et en

françois. Quant au compilateur des

Gesta Lud. jun.

, il n'a pas

transcrit le texte latin assez correct de Guillaume de Tyr, mais il a

calqué sur le texte françois une traduction latine remplie de

gallicismes et d'incorrections grammaticales.

Tandis, avint que les bourgois de Sens se courroucièrent à Hébert, abbé de

Saint-Pierre-le-Vif, pour ce qu'il avoit fait despecier leur commune, et

pour ce fait le firent mourir de cruelle mort. En vengence de ce fait fist

le roy tresbuchier de la tour une partie des homicides et l'autre partie

descoller à Paris.

III.

ANNEE: 1146.

De la muete qui fu faite outre mer sur les mescréans, dont il firent moult petit.

[633]En l'an de l'Incarnacion mil cent quarante-six, la sepmaine après la

Penthecouste, meut le roy et se mist au chemin à grant compaignie de prélas

et de barons[634]. En ce point mesme meut l'empereur Conrat de sa terre à

grant chevalerie, si comme il avoient accordé ensemble[635]. Mais

Nostre-Seigneur qui bien voit cler en toutes besoignes, ne voult pas

prendre en gré leur pellerinage, si comme il apparut à la veue du siècle.

Et, non pour ce, tous ceulx qui bonne entencion avoient en cest affaire ne

perdirent oncques rien de leur service quant aux ames; mais l'estat de la

terre d'oultre-mer pour quoy il se murent n'amenda oncques guères pour leur

muete, si comme vous orrez cy après.

Note 633:

Gesta Lud. jun.,

§ 4.

Note 634: Notre traducteur n'ajoute pas ici, comme les

Gesta

, une

phrase relative à l'oriflamme: «Venit rex, ut moris est, ad ecclesiam

B. Dyonisii, à martyribus licentiam accepturus: et ibi post

celebrationem missarum, baculum peregrinationis et vexillum

B. Dyonisii, quod

Oriflambe

gallicè dicitur, valdè reverenter

accepit, sicut moris est antiquorum regum, quando debent ad bella

procedere, vel votum peregrinationis adimplere.»

Ce passage peut encore appuyer l'antiquité de l'oriflamme; et notre

traducteur l'a omis sans doute pour ne pas rappeler que l'oriflamme

avoit pu conduire les François dans une guerre désastreuse.

Note 635:

Guillaume de Tyr

,

liv.

XVI, § 19.

[636]Ces deux grans seigneurs devisèrent qu'il n'iroient mie ensemble pour

ce qu'il avoient trop grant plenté de gens, car grant contens pourroit

sourdre en leur osts et ne pourroient mie assés trouver viandes aux hommes

et aux chevaulx. Pour ce voulurent que les uns allassent devant les autres.

Tous s'adressèrent vers une terre qui a nom Bavière et passèrent la

Dinoe[637] qui est moult grant eaue et courant, à senestre la laissèrent et

puis descendirent en Ostriche; d'illec entrèrent en Hongrie. Le roy de la

terre les receut moult honnestement, grant honneur leur fist et maint bel

présent leur envoya. Après s'en allèrent oultre et passèrent parmy

Pannonnie où monseigneur saint Martin fu né. Si entrèrent en Bulgrie, Rippe

laissèrent à senestre. Tant allèrent qu'il allèrent par deux terres de quoy

chascune a nom Trace. Deux cités moult renommées passèrent; l'une si à nom

Finepople et l'autre Andrenoble[638].

Note 636: Tout ce qui suit, jusqu'à la fin du XXIème chapitre, n'a

été publié ni en latin ni en françois, dans les

Historiens de France

. Dont Brial a remis le soin de combler cette lacune aux

éditeurs des

Historiens des Croisades

, dont le premier volume,

confié par l'Académie des Inscriptions et Belles-Lettres à la

judicieuse érudition de M. le comte Arthur Beugnot, est en ce moment

sous presse. Pour la comparaison du texte latin avec notre

traduction, nous allons donc suivre maintenant l'édition que Duchesne

a donnée des

Gesta Ludovici junioris

, t. 4, p. 390 et suiv.

Note 637:

La Dinoe.

Le Danube.

Note 638: Philippopolis et Andrinople.

Après mains travaux et maintes journées qu'il eurent faictes par estranges

terres, vindrent à la riche cité de Constantinoble. Là séjournèrent ne scay

quans jours, pour ce qu'il estoient las et se garnirent des choses qui leur

failloient, à l'empereur Manuel parlèrent de maintes choses assez

privéement. Après ce jour passèrent le bras Saint-George qui divise les

deux parties du monde Europe et Aise. Lors entrèrent en Bithinie qui est la

première partie d'Aise, toutes les compagnies ensemble se logièrent devant

la cité de Calcidoine. C'est une moult ancienne cité où jadis fu l'un des

quatre grans conciles; là furent assemblés six cens trente-cinq prélas, au

temps de Marcien empereur et de Léon pape de Rome. En ce concile fu dampnée

l'érésie d'un abbé qui avoit nom Eutices, car il disoit que Jésucrist

n'avoit que une seule nature; mais la foy crestienne est telle qu'il fu

vrayement Dieu et homme.

[639]Le soudant du Coine[640] qui moult estoit puissant en Turquie avoit

assez oï parler avant de ces haulx princes et moult en fu en grant esmay.

Bien savoit que s'il ne s'en prenoit garde grant dommaige pourroit avenir à

ses hommes et à sa terre. Pour ce si tost comme il put envoya par toutes

les parties d'Orient, et manda que tous ceux qui armes pourroient porter

venissent à luy. Luy-mesme cerchoit[641] les cités et les chasteaux, ce qui

estoit cheu ès forteresses faisoit redrescier et les fossés réparer,

nouvelles trenchiées faire. Tous ceulx du pays prenoit et mettoit chascun

jour en ses œuvres; trop se doubtoit et ce n'estoit pas de merveille. Car

une renommée couroit moult grant par tout le pays que si grant plenté de

gens venoient avecques ces deux grans princes que là où il se logeoient sur

une grant eaue courant, tantost tarissoit si qu'elle ne povoit pas souffire

au boire des chevaulx et des hommes. Bien disoit-on que à paine les

pourroit paistre un grant royaume de toutes les viandes qui là croissoient.

Vray est que de telles choses en seult-on dire plus qu'il n'en est. Mais la

vérité estoit, si comme tesmoignèrent les preud'hommes qui furent là, que

seullement en l'ost de l'empereur Conrat avoit bien soixante-dix mille

hommes à haubers et à chevaus, sans les gens à pié et sans les autres à

cheval qui estoient plus légièrement armés. En l'ost le roy de France en

avoit autant et trop bonnes gens; de ceulx de pié n'est nul nombre, car par

là où il passoient estoit toute la terre couverte. Bien sembloit qu'il

deussent toutes les terres conquerre que les mescréans tenoient jusques à

la fin du monde. Et sans faille si eussent-il pu sé pour ce non[642] que

Nostre-Seigneur, ou pour leur orgueil ou pour les autres péchiés qui en

eulx estoient, ne voulut mie prendre en gré leurs services né souffrir

qu'il fissent chose qui honnorable fust à la veue du siècle. Nous ne savons

pour quoy ce fu; mais bien scavons qu'il le fist à droit.

Note 639:

Gesta Lud. jun.

, § 5.

Note 640:

Du Coine.

On traduisoit toujours ainsi le nom du

territoire d'

Iconium

.

Note 641:

Cerchoit.

Parcouroit. Le latin dit:

Circuibat

.

Note 642:

Sé pour ce non.

Si non pour ce.

IV.

ANNEE: 1146.

Coment l'empereur, quant il fu oultre mer, fu tray de ses ducteurs, et mené ès destrois où il n'avoit point de vitaille.

[643]Quant l'empereur Conrat eut passé celle mer que on appelle le bras

Saint-George, si voulut aller par soy, et fist ses batailles à la guise de

son pays. Chevetaines[644] mist en chascune des plus haux hommes qu'il

avoit; à senestre laissa la terre de Galacie et de Plaphagonne et deux

terres de quoy chascune a nom Ponthe: à dextre mist Frige et Lide et Aise

la petite et il s'en vindrent de lez Nichomède et passèrent la bonne cité

de Nice et puis entrèrent en une terre qui a nom Lichaonne dont la

meilleure cité est Icoine. Il alloient par un adresse[645] et avoient

laissié le grant chemin. Le soudan du Coine qui avoit assemblé grant plenté

de Turs attendoit coment il peust avoir temps et lieu coment il

empescheroit ces grans compaignies de crestiens qui par sa terre passoient,

car tous les roys et les grans hommes de la loy payenne estoient esmeus et

tous effrenés de ces grans gens qui venoient. Bien leur avoit-on mandé de

maintes parties que sé il passoient délivréement parmy ces terres il

avoient povoir de destruire tous les hommes et conquerre tous les pays; si

que en peu de temps toute la terre d'Orient seroit de crestiens. Par ceste

paour estoient venus en l'ayde du soudan les Turs des contrées des deux

Hermenies, de Capadoce, de Ysaure[646], de Silice et de Mede. Tant y avoit

de gens qui estoient si bien garnis de chevaux et d'armes que le soudant

emprinst hardiment qu'il pourroit assembler front à front à tous les

crestiens qui venoient.

Note 643:

Gesta Lud. jun.

, § 6.--

Guillaume de Tyr, liv.

XVI, § 20.

Note 644:

Chevetaines.

Aujourd'hui: capitaines.

Note 645:

Adresse.

Route de traverse. Le latin dit:

Inconsultè ibant

.

Note 646:

Ysaure

. Partie de la Cilicie.

L'empereur Conrat avoit demandé et prié à l'empereur de Constantinoble que

luy baillast de ses gens qui luy enseignassent les meilleures voyes et les

plus courtes. Si luy en bailla. Mais ceulx qui conduire les devoient

estoient de moult grant desloyaulté. Car si tost comme il entrèrent en la

terre aux Turs il vindrent aux chevetaines qui menoient les compaignies de

l'ost et leur dirent qu'il ne fissent chargier viandes que jusques à un

certain nombre de jours; et bien leur promisrent fermement que dedens ce

temps il les aroient menés en tel pays où il trouveroient grant plenté de

toutes viandes qui mestier aroient à hommes et à chevaux. Ceux les creurent

et firent chargier viandes selon la mesue que ceux avoient dicte sur