La surprise et fustigation d'Angoulvent[104], poëme heroïque addressé au Comte de Permission[105] par l'Archipoëte des pois pilez.
Reading edition
La surprise et fustigation d'Angoulvent[104], poëme heroïque addressé au Comte de Permission[105] par l'Archipoëte des pois pilez.
A Paris.—M.DC.III.
Avec permission.
Cet avorton, semence d'escargot, Trouve en chemin ce magnifique sot, Et doucement par sa cape l'arreste, Puis d'un clin d'œil, d'un branlement de teste, Luy fait le signe, en luy disant tout bas: «Venez, Monsieur, le maistre n'y est pas, Et ma maistresse est seule retirée, Qui vous attent pronte et deliberée; Portez sans plus de l'argent à foison, On guarira vostre demangeaison.»
De ces faveurs ce prince est idolâtre. Quand il rencontre une cuisse folastre, Dont la vertu ne suit point le guidon Des bons soldats du gentil Cupidon, Sobre du cul, difficile à la couche, Et qui ne veut que personne la touche, Tout son desir en elle est arresté.
Or, pour le jeu qui luy fut appresté, Vous en sçaurez la plantureuse histoire De point en point; mais premier il faut boire.
Ayant descript la cabale secrette De ce monarque, il est temps que je traicte Ce que deveint le cours de son procès, Et comme il feit reparer cest excès. Or, pour avoir justice bonne et briefve, Droict au baillif de Sainte-Geneviefve Et l'un et l'autre ils se sont adressez, Et par decrets vivement traversez; Tant qu'à la fin, ce prince magnifique, Qui ne sceut oncq' la forme de pratique, Sur un defaut, comme il n'y pensoit pas, Par un huissier est mené pas à pas. Interrogé, le juge le relasche; Mais sa grandeur d'un tel affront se fasche, Bouffe en colère, et dit qu'il appellet: Par ce moyen tout vient au Chastellet.
Le Chastellet dignement se prepare Pour opiner dessus un fait si rare. Mesme l'on tient qu'ils devoyent arrester Qu'Angoulevent se feroit defoiter, Satisfaisant à ceste humeur estrange Qui fait par fois que tant il se demange. Mais le barbier et compagnons loyaulx, Et la barbière, eurent lettres royaux Pour evoquer, dont la Cour est saisie, Ce gros procès farcy de fantaisie, Qui, sur le champ, dos à dos les a mis. Et plus y perd qui plus y aura mis. Voilà comment se passa tout l'affaire Jusqu'où j'en sçay; pour ce je me veux taire, Laissant là bas ce prince reculé, Entre les sots bien immatriculé.
Fin.
