Le Salve Regina des Prisonniers, adressé à la Royne, mère du Roy[277].

La frayeur qui nous espouvante, Poussée d'un injuste courroux, Nous a faict d'une voix tremblante Vous dire humblement à genoux: Salve, Regina. Nous voyons qu'une grand' misère Nous viendra saisir pour jamais, Si vous, ô reyne debonnaire, Vous ne vous montrez desormais Mater misericordiæ. C'est à vous que nos vœux s'adressent Pour obtenir nostre pardon; Desjà les poursuites nous pressent; Ne nous laissez à l'abandon, Vita, dulcedo. En vous seule est nostre asseurance, Delivrez nous d'un tel méchef; Car sous cette seule esperance Nous venons dire de rechef: Et spes nostra, salve. Helas! ne soyez courroucée Des outrages par nous commis, Puisque, craignant ceste menée Que nous trassent nos ennemis, Ad te clamamus. Ouy, nous crions d'une voix haute: Reine mère, priez pour nous; Faites pardonner nostre faute, Ou bien nous sommes presque tous Exules filii Evæ. Et ceux qui sont sous garde seure Et qui sont venus des derniers, Madame, vous disent à cet heure Qu'ils sont detenus prisonniers: Ad te suspiramus, gementes et flentes. Quand nous voyons un camarade Qu'on emmène dans les prisons, Nous aymerions mieux battre l'estrade Qu'estre, nous et nos compagnons, In hac lacrymarum valle. Après avoir préveu l'orage, Nous nous sommes mis à prier, Ayant jugé qu'estant en cage On nous contraindra de crier Eya! Et, voyant que personne n'ose Venir deferer des premiers, Qu'est-ce qu'on demande autre chose, Sinon nous tenir prisonniers? Ergo, On veut remettre cette faute Sur nous, et, ce qui est le pis, C'est que l'on le dit à voix haute; Soyez vers le Roy vostre fils Advocata nostra. Vous le pouvez, ô grande Reyne! Un chacun de nous le prevoid. Changez en douceur ceste haine; Chacun l'espère, car on void Illos tuos misericordes oculos. Le bruit de nos malheurs s'embarque Sur le ponant et au levant; L'amitié d'un si grand monarque Est comm' elle estoit auparavant Ad nos convertere. Rendez la liberté perdue Par tous ces accidens divers; Vostre clemence assez congnue L'on chantera par l'univers Et Ludovicum benedictum. Au lieu d'un superbe carosse, D'une lictière ou de mulets, On nous menasse d'une fosse; Intercedez donc, s'il vous plaist, Fructum ventris tui. Ostez nous la peur des supplices Puis qu'en prison nous sommes mis Et nos estats et nos offices Que desjà l'on declare unis, Nobis post hoc exilium ostende. Nous avons merité la haine Ou un semblable traictement; [Mais] c'est une chose incertaine Que vous usiez de chastiment, O clemens! Nostre confession de bouche, La satisfaction du pecheur, Et la contricion nous touche Jusqu'au centre de nostre cœur, O pia! Ces bons Pères, qui sont si sages, Nous ont promis dans peu de jours La meilleur par[t] de leurs suffrages Et nous à eux de nos secours. O mater Maria! Quand vous direz au Roy, Madame: «Pardonnez à vos prisonniers», Vous verrez que de cœur et d'âme Ils crieront tous les premiers: Amen.