La Famine, ou les Putains à cul, par le sieur de La Valise, chevalier de la Treille.
Reading edition
A Paris, chez Honoré l'Ignoré, à la Fille qui truye, rue sans bout.
Quel pays voudroit entreprendre De contenter maistre Alexandre, Maistre Thibault et du Moustier, Maistre Cola le savetier, Maistre Guibert et la Montagne, Dufour, la Croupière, Champagne, La Verdure, Guichet, Petit, Et autres de hault appetit? Outre ces marchans de pucelles, Il faudroit que les maquerelles Eussent leur part à ces gasteaux, Aussi bien que les maquereaux.
Mais puisque, pendant cette guerre, On ne vous visite plus guère, Ny celles de vostre mestier Qui sont dedans vostre quartier, Nichon, souffrez que je vous die Quelque moyen qui remedie Au mal qui vous presse à present; C'est de recevoir tout venant, Riche ou non, vilain ou honneste, Homme d'esprit ou une beste, Pourveu qu'il apporte en sa main Quelque bon gros morceau de pain. Que si toutefois la diette Refroidit si fort la caillette Que l'on ne vous visite plus Et que vous demeuriez à culs, Puisque vous avez par famine Vendu les meubles de cuisine Et les pièces de cabinets, Coiffures, mouchoirs et colets, Rubans, vertugadins, calotes, Et puis qu'ayant vendu vos cottes, Vos jupes et vos cottillons, Avec tous vos vieux guenillons, Vous n'avez plus que la chemise, D'une chose je vous advise, De crainte de trop tost l'user, Que vous la laissiez reposer, La mettant dans une cassette, Afin que, la paix estant faite, En couvrant vostre nudité, On ayme moins vostre beauté: Car si, dans la grande abondance, Nous suivions la concupiscence Que nous causeroit vostre cas, la chemise n'y estant pas, Ma foy, il n'y auroit personne Qui voulust, tant fust-elle bonne, Ne point vous donner le couvert. Mais dites-moy à quoy vous sert De vous cacher dans la famine? Pour moy, Nichon, je m'imagine Que vous feriez mille fois mieu De nous monstrer vostre milieu, Parce qu'il n'y auroit personne Qui ne vinst mettre son aumosne Dedans tous les troncs des putains, Qui leur seroient des gaigne-pains; Au lieu que si, par couardise, Elles se couvrent de chemise, Je cognois bien, par mon calcul, Qu'elles demeureront à cul.
Fin.
