Songe.
Reading edition
Il estoit d'assez belle taille, De poil tout propre à la bataille De ce petit demon d'Amour; Sa fraize estoit à l'espagnolle, Et sa moustache en banderolle Chassoit aux mouches de la cour.
Ayant près de luy sa Cassandre, Il se marchoit en Alexandre, Il aboyoit comme un roquet; Il chevauchoit sur une mule, Et, discourant sur une bulle, Il parloit comme un perroquet.
Il portoit dessoubs son aisselle Le bout d'une vieille escarcelle D'où sortoit un fer de cheval, Et je cognus à ceste marque Que ce n'estoit pas un monarque, Mais seulement un mareschal.
Il estoit bon naturaliste: Il avoit une longue liste Des postures de l'Aretin; Il sçavoit toute la caballe, Et, monté sur une cavalle, Se panadoit en saint Martin.
Sa suitte est de gens d'escritoire Quy cachent d'une robbe noire Un venin d'infidelité, Et quy, comme des chatemites, Attrapent les grosses marmittes, Et tout cela par charité.
Vous eussiez veu ceste canaille, Baillant comme un huistre à l'ecaille Et portant un petit collet, Aprendre à ceux de la pratique Le secret de la rethorique Pour faire un tour de bon vallet.
Aussi froidz que saint de caresme, Les yeux baissez, la face blesme, Leur souche a tousjours le cul net. Ce sont des singes de Seville, Et comme furets de Castille Ils se glissent au cabinet.
Son bouclier estoit fait de carte, Sa cuirasse d'un cul de tarte, Son casque d'une peau d'ognon; Sa lance estoit d'une baguette, Son gantelet d'une brayette, Et sa masse d'un champignon.
Il estoit faict en sentinelle; Ses brassards estoient de canelle, Son pennache de deux harengs, Sa visière d'une raquette, Son hausse-col d'une etiquette, Et sa devise: Je me rends.
Ce n'estoit que rodomontades, Mais en effet les coyonnades Servoient de lustre à son bonheur. C'estoit un Roland en les rues, Pour batailler contre les grues Quand ce venoit au point d'honneur.
Mais je me ris, c'est une fable: Il n'est bon qu'à mettre à l'estable, Ou bien à battre les carreaux, Et, s'il peut servir en bataille, C'est peut-estre en homme de paille Pour faire peur aux passereaux.
On ne parle que de ses gestes: Il est mis aux rangs des celestes. Sur un autel faict de chardons Il se panade en effigie, Un catze servant de bougie, Et d'encensoir et de pardons.
La Valeur en fait son image, La Fortune luy rend hommage, Et Mars lui donne les lauriers; C'est le mignon de la Vaillance, Le subject de la Bienveillance Et l'estonnement des guerriers.
Esclatant d'un riche equipage, La Terreur luy servant de page, L'Effroy le suivoit pas à pas; Sans luy la terre estoit en poudre, Et son bras, comme faict la foudre, Portoit l'horreur et le trepas.
Ce monstre à la teste cornue, Quy bravoit avant la venue De ce miracle de valeur, Plus penaut qu'un loup pris au piège, Et plus leger que n'est un liège, Évite en courant son malheur.
Envieux, cesse de le mordre: Ce qu'il en faict, c'est qu'il veut l'ordre Pour estre au rang des chevaliers: Car ainsy, pendant la remise, L'enseigne en est à la chemise, Et le cordon à ses souliers.
Mais, las! estant pris à la piste, Il jure qu'il est arboriste, Et qu'il ne fouille sans raison, Et dict, touchant l'architecture, Qu'il monte assez bien de nature Pour bien bastir une maison.
Enfin, qu'on luy fasse une grace, Qu'on luy permette qu'il embrasse Les genoux de ce jeune Mars, Qu'il se soumette à sa puissance, Et qu'il luy preste obeissance Comme à la gloire des Cesars.
Ce prince, voyant qu'on le frotte, Qu'on le chatouille à coup de motte, Et qu'il est dessus demy nu, Commande à ses gens qu'on le choie, Et puis aussi tost le renvoie Plus chargé qu'il n'estoit venu.
Au cry qu'il fist je me reveille, Estonné de ceste merveille Et tout esperdu de ce bruit; Mais, afin de vous faire rire, Icy je l'ay voulu descrire, Puisque ce n'est qu'un jeu de nuit.
