Remonstrance aux femmes et filles de la France. Extrait du Prophète Esaye, au chapitre III de sa prophetie.
Reading edition
Femmes, filles de France, escoutez la tempeste Dont le ciel esclatant menace vostre teste, Et, s'il y a encores lieu de conversion, Quittez vos vanités et vos bobances folles, C'est à vous qu'Esaye adresse ces parolles, Si vous estes au moins des filles de Sion.
Voicy que le grand Dieu vous mande par ma bouche: La teigne rongera, dict-il, jusqu'à la souche, Ces rameaux esgarez de vos perruques d'or; Et, de vostre poictrine allongeant l'ouverture, Je mettray tout à nud, jusque soubs la ceinture, Vostre honte au soleil, s'il vous en reste encor.
Bourrelets, affiquets, et toutes ces machines A ceindre vostre poil et le mettre en crespines, Seront pour le vieux fer et pour le vieux drapeau; Et, pour l'assortiment de tant d'habits si braves, A grand'peine aurez-vous, miserables esclaves, Un lambeau deschiré qui vous couvre la peau.
Ces mantelets garnis d'un pied de broderie, Bourses et espingliers, flambans de pierreries, Seront pour le butin des soldats triomphans; Et ces miroirs polis, dont la trompeuse glace Brusle si sottement vos cœurs de vostre face, Serviront de jouets à leurs petits enfans.
Ces cofrets diaprez et ces fatras de chambre, Toilettes et peignoirs, soufflant le musq et l'ambre, Couvre-chefs de fin lin, dentelés alentour, Et ces coiffes de nuict faictes en diadesme, Orgueil demesuré! s'en yront tout de mesme: Auriez-vous plus la nuict de faveur que le jour?
Ce visage poupin, qui met en jalousie Le lis accompaigné de la fleur cramoisie, Si bien contregardé, si frais, si en bon poinct, Sera plus laid qu'un More à la couleur tannée, Plus ridé qu'une peau seiche à la cheminée, Et plus rouillé qu'un pot que l'on n'escure point.
Bref, le hasle abattra la fleur de la jeunesse, Et, pour tant de muguets qui vous faisoient caresse, Brigans à qui auroit le bonheur d'estre à vous, Je jure en mon courroux, ce sera bien de grace Si à sept d'entre vous, pour en avoir la race, Le barbare relasche un captif pour espoux.
FIN DU TOME IV.
