The copie of the second charter touching the possession of the land, in French.

A tous iceulx, que ceste presente lettre verrunt ou orront, Florence counte de Holland, Robert de Brus seigneur du Val Danand, Iehan de Baliol seigneur de Galloway, Iehan de Hastings seigneur de Abergeuenny, Iehan Comin seigneur de Badenaw, Patrique Dunbar counte de la Marche, Iehan de Vescy, pour son pere, Nichol de Seules, & Guilaume de Ros, saluz en dieu. Come nous aions otrie, & graunte, de nostre bonne volunté, & commune assent sans nulle destresse, a noble prince sire Edward, par la grace de Dieu, roy de Angleterre quil come souerein seig. de la terre de Escoce puisse oir trier, & terminer nos chalenges, & nos demandes, que nos entendons monstrer, & auerrer pur nostre droyt en la reaume de Escoces & droyt receiuer deuant luy, come souerein seigneur de la terre, promettons ia lemains que son fait auerons & tendrons ferme & estable, & qu'il emportera le reaume, a qui droyt le durra deuant luy.

Mes pour ce que lauandict roy de Ang. ne puist nulle manier conusance faire ne a complier sauns iugement, ne iugement doit estre sauns execution, ne execution ne peult il faire duement, sauns la possession, & seysine de mesme la terre, & de chasteaux. Nous volons, otrions, & grantons, qu'il come souereine seigneur, a parfaire les choses auant dictes, ait la seysine de toute la mesme terre, & de chasteaux de Escoce, tant que droyt soit feit & perfourme, as demandans en tiel maniere, que auant ceo qu' il eit le seysine auant dict face bone seurte, & suffisante as demandants & as gardiens, & a la commune du reaume d' Escoce, a faire la reuersion de mesme le reaume, & de chasteaux, oue toute la royauté, dignité, seignourie, franchises, coustomes, droitures, leys, vsages, & possessions, & touz manieres des apurtenances, en mesme le estate, quils estoient quant la seysine luy fust bailleé, & liuereé a celuy que le droyt emportera par iugemēt de sa royauté, sauue au roy d' Anglterre le homage de celuy, qui serra rey. Yssint quela reuersion soit feit dedans les deux moys apres le iour que le droyt sera trieé & affirme. Et que les yssues de mesme la terre en le moyne temps resceus, soient sauuement mis en depos & bien gardées par la main le chamberleyn d' Escoce que ore est, & de celuy qui serra assigne a luy de par le rey d' Angleterre, & de sous leur seaus sauue renable sustinance de la terre, & des chasteaux & des ministres du royaume. En testimoigne de cestes choses auandicts, nous auons mis nos seaules a ceste escript. Fait & donné a Norham le mecredie prochein apres l'Ascension, l'an de Grace, 1291.