PREMIER TRAICTÉ. (continued 2)

Je suis un Pere mal-heureux, qui finira sa vieillesse comme les sangliers, vivant seulet, & mangeant les racines ameres toutes cruës, si tu n’as pitié de moy : La Misericorde est convenable aux Grands, & verso.n’ont non plus de grandeur, qu’ils ont de clemence & misericorde. Ton Roy est le plus grand Roy du monde ainsi que les nostres qui ont esté en France le nous ont rapporté. Il t’a envoyé icy comme un des Principaux de sa suitte, afin que tu nous liberasses de la captivité des Peros : donc puis que tu es grand, tu es misericordieux, & partant tu dois user de misericorde envers ceux qui sont tombez en fortune sans malice. Je sçay qu’il faut estre juste & prendre le pour ce, qu’ils appellent seporan & vangeance des meschans : ce que nous gardons estroictement parmy nous, & telle a esté tousjours la coustume de nos Peres : mais quand la faute ne vient de malice, nous usons de clemence. J’avois deux enfans, comme tu sçais, lesquels sont venus souvent travailler en ton Fort, l’un a tué l’autre par accident & sans malice, ou pour mieux dire, l’aisné s’est embroché, luy mesme dans les fleches du jeune qui reste en vie, pour lequel je te prie de ne le poursuivre point, ains de luy pardonner : C’est luy qui me doit nourrir en ma vieillesse ; Il a tousjours aymé folio 65.les François : & quand il en voit venir en mon village, il appelle incontinent ses chiens, & s’en va aux Agoutis & aux Pacs qu’il leur apporte pour manger. Il a faict la maison des Peres, & m’asseure que les Peres prieront pour luy : Il a tousjours esté obeissant à sa belle-mere que voilà, qui l’ayme comme son propre fils : son frere, qu’il a tué sans y penser, & sans volonté, estoit meschant, n’aymoit point les François, jamais il ne leur voulut rien donner, ny aller à la chasse pour eux, haissoit sa belle-mere, & la mettoit souvent en colere : quand il fut tué il estoit yvre, & vint prendre la femme de son frere, & luy arrachant son enfant d’entre les bras, le jetta d’un costé, & la mere de l’autre, en luy donnant des soufflets, encore qu’elle fust enceinte, & ce devant mes yeux, & les yeux de son Mary, & eusmes patience en tout cela : mais venant pour coleter son frere, afin de le battre, il se donna des fleches qu’il tenoit en sa main dans verso.le ventre, desquelles il est mort : Pourquoi perdray-je mes deux enfans tout en un coup sur ma vieillesse ? Si tu veux faire mourir le vivant, faits moy mourir quant & luy. Voilà qu’il te donne son canot pour aller à la pesche & ses Esclaves pour te servir. Le Sieur de Pesieux admira ceste harangue, comme il m’a souvent dict depuis, & l’a raconté à plusieurs personnes, s’estonnant de voir une si belle Rhetorique en la bouche d’un Sauvage : Car vous devez sçavoir, que je represente tous ces discours & harangues le plus naifvement qu’il m’est possible, sans user d’artifice.

Il luy fit responce, que c’estoit un grand crime, qu’un frere eust tué son frere : Mais d’autant qu’il disoit que cecy estoit arrivé plus par la faute du mort, que par celle du vivant, il se laisseroit aisement gaigner à la misericorde par la priere des Peres, ausquels il ne vouloit rien refuser : Et ainsi l’asseura que son fils n’auroit point de mal : & quant aux dons qu’il luy offroit, tant du canot que des folio 66.Esclaves, il les acceptoit, mais qu’il les luy donnoit pour soustenir sa vieillesse, eu esgard à ce qu’il aymoit les Peres & les François. Cet acte de misericorde & de liberalité contenta infiniment ce bon vieillard, qui ne fut pas ingrat d’en semer le bruit par toute l’Isle & d’en venir recognoistre par action de grace, le dict Sieur & nous autres, apportant quant & luy de la venaison qu’avoit prins ce sien fils remis en grace.

verso.

Qu’il est aisé de civiliser les Sauvages à la façon des François, & de leur apprendre les mestiers que nous avons en l’Europe.

Chap. XVIII.

Au Livre 2. des Machabees Chap. I. nous lisons que le feu sacré de l’Autel fut caché dans le puits de Nephtar le long de la captivité du peuple, & se changea en bourbe : le peuple retournant de captivité en liberté, les Prestres puiserent ce limon, qu’ils verserent sur le bois exposé en l’Autel, sous les Sacrifices : Aussi tost que le Soleil donna là dessus, ce limon retourna en feu, & devora les Holocaustes : Je desire me servir de ceste figure, pour expliquer ce que je veux dire, tant en ce Chapitre qu’és autres folio 67.suyvans, sçavoir est : Que par ce feu nous devons entendre l’esprit humain, imitant la nature du feu en son activité, legereté, chaleur & clarté, lequel esprit devient bourbe & limon, caché dans un centre contraire au sien propre, & ce par la captivité de son ame en l’infidelité : Je veux dire que l’esprit de l’homme creé pour connoistre Dieu, & apprendre les arts & sciences, devint embourbé & obscurcy parmy les immondicitez, lors que son ame est detenuë en la cadene de l’infidelité, sous la tyrannie de Sathan : Mais aussi tost que ceste sienne ame sort de captivité, par l’instruction & conduicte des Prophetes de Dieu, cet esprit remonte de ce puits fangeux, & renforcé par la lumiere & cognoissance de Dieu, des arts & bonnes sciences, il se rend apte & prompt à executer ce qu’il entend & apprend : chose que je feray voir & toucher au doigt, par l’exemple de nos Sauvages : & ce principalement, d’autant que les plus ordinaires demandes qu’on verso.nous faict des Sauvages, sont, s’il y a esperance que ces gens se puissent civiliser, rendre domestiques, s’assembler en une Cité, faire marchés, apprendre mestiers, estudier, escrire, & acquerir sciences.

Premierement je tiens qu’ils sont beaucoup plus aisez à civiliser, que le commun de nos Païsans de France, & la raison de cecy est, que la nouveauté a je ne sçay quelle puissance sur l’esprit, pour l’exciter à apprendre ce qu’il voit de nouveau, & luy est plaisant : Or est-il que nos Tapinambos n’ont eu jamais aucune cognoissance de civilité jusqu’à present, qui est cause qu’ils s’efforcent, par tous moyens de contre-faire nos François, comme je diray cy apres : Au contraire les Paysans de nostre France sont tellement confirmez en leur lourdise, que pour aucune conversation qu’ils puissent avoir, tant par les villes que parmy les honnestes gens, ils retiennent tousjours les démarches de villageois.

Les Tapinambos depuis deux ans en çà que les folio 68.François leur apprennent à oster leurs chappeaux & salüer le monde, à baiser les mains, faire la reverence, donner le bon jour, dire Adieu, venir à l’Eglise, prendre de l’eau beniste, se mettre à genoux, joindre les mains, faire le signe de la Croix sur leur front & poitrine, frapper leur estomach devant Dieu, escouter la Messe, entendre le sermon, quoy qu’ils n’y conçoivent rien, porter des Agnus Dei, ayder au Prestre à dire la Messe, s’asseoir en table, mettre la serviette devant soy, laver leurs mains, prendre la viande avecques trois doigts, la coupper sur l’assiete, boire à la compagnie : bref faire toutes les autres honnestetez & civilitez qui sont entre nous, s’y sont si bien advancez, que vous diriez qu’ils ont esté nourris toute leur vie entre les François. Qui sera celuy donc qui me voudra nier que ces marques ne soient suffisantes, pour convaincre nos esprits à esperer & croire, qu’avec le temps ceste nation se rendra domestique, bien apprise & honneste.

On tient, & est vray, que les exemples confirment verso.plus, que toute autre espece de raison, rapportee à la preuve d’une verité : C’est pourquoy je veux icy inserer l’exemple de quelques Sauvages nourris en la maison des Nobles. Il y a de present à Maragnan une femme Sauvage d’une des bonnes lignées de l’Isle, qui autrefois avoit esté prise petite fille par les Portuguais, & venduë pour Esclave à Dame Catherine Albuquerque, petite Niepce de ce grand Albuquerque, Vice-Roy des Indes Orientales, soubs le Roy de Portugal, laquelle se tient à Fernambourg & est marquise de Fernand de la Rongne, Isle tres-belles & plantureuse, comme la descrit le Reverend Pere Claude en son Histoire. Cette petite fille faite Chrestienne, apprist tellement la civilité, que si elle estoit accommodée maintenant à la Portuguaise, on ne pourroit pas la distinguer, si elle seroit de naissance Portuguaise ou Sauvage, portant devant ses yeux la honte & la pudeur, que doit avoir une femme, couvrant soigneusement l’imperfection de son sexe. J’en pourrois dire autant de beaucoup folio 69.d’autres Sauvages, qui ont esté nourris parmy les Portuguais, & de ceux qui sont venus en France, lesquels ont retenu ce qu’ils ont apris, & le pratiquent quand ils sont entre les François.

C’est chose bien nouvelle entre eux que de porter les moustaches & la barbe, & nonobstant voyant que les François font estat de ces deux choses, plusieurs se laissent venir la barbe & nourissent leurs moustaches.

Quant aux arts & mestiers, ils y ont une aptitude nompareille. J’ay cogneu un Sauvage de Miary, surnommé le Mareschal, à cause du mestier qu’il exerçoit entr’eux, lequel ayant veu travailler autrefois un Mareschal François, sans que cet ouvrier prist la peine de luy rien monstrer, il sçavoit aussi bien la mesure à toucher son marteau avec les autres, sur une barre de fer chaud, comme s’il eust esté longtemps apprentif : & neantmoins c’est une chose que ceux du mestier sçavent, qu’il faut du temps pour apprendre la musique des marteaux, sur l’enclume du mareschal. Ce verso.mesme Sauvage estant dans ces terres perduës de Miary avec ses semblables, sans enclume, marteau, limes, estau, travailloit neantmoins fort proprement à faire des fers à fleches, harpons & haims à prendre poissons : Il prenoit une grosse pierre dure au lieu d’enclume, & une autre mediocre pour luy servir de marteau, puis faisant chaufer son fer dans le feu, il luy donnoit telle forme qu’il luy plaisoit.

Les mestiers plus necessaires d’estre exercez en ces Païs là sont ceux-cy : Taillandier, Futenier, Charpentier, Menuisier, Cordier, Cousturier, Cordonnier, Masson, Potier, Briquetier & Laboureur. A tous ces mestiers ils sont fort aptes & aidez de la nature.

Pour le Taillandier nous l’avons monstré par l’exemple susdit. Quant au mestier de Futenier, ou faiseur de futene, c’est leur propre mestier, s’il estoit corrigé : car ils tissent leurs lits extremement bien, travaillent à l’estame aussi joliment que les François. Et si ils ne se servent ny de navete, ny d’eguille de fer ains de petits bastons.

Je raconteray icy une jolie histoire ; Un jour je folio 70.m’en allois visiter le Grand Thion Principal des Pierres vertes Tabaiares : comme je fus en sa loge, & que je l’eus demandé, une de ses femmes me conduit soubs un bel arbre qui estoit au bout de sa loge qui le couvroit de l’ardeur du soleil : là dessouz il avoit dressé son mestier pour tistre des licts de coton, & travailloit apres fort soigneusement : je m’estonnay beaucoup de voir ce Grand Capitaine vieil Colonel de sa nation, ennobly de plusieurs coups de mousquets, s’amuser à faire ce mestier, & je ne peus me taire que je n’en sceusse la raison, esperant apprendre quelque chose de nouveau en ce spectacle si particulier. Je luy fist demander par le Truchement qui estoit avec moy, à quelle fin il s’amusoit à cela ? il me fit responce : les jeunes gens considerent mes actions, & selon que je fais ils font : si je demeurois sur mon lict à me branler & humer le petun, ils ne voudroient faire autre chose : mais quand il me voient aller au bois, la hache sur l’espaule & la serpe en main, ou qu’ils me voient travailler à faire des licts, ils sont verso.honteux de ne rien faire : jamais je ne fus plus satisfaict, & ceux qui estoient avec moy que par ces paroles, lesquelles à la mienne volonté fussent pratiquées des Chrestiens : l’on ne verroit l’oisiveté mere de tous vices si avant en France comme elle est.

La charpenterie ne leur peut estre difficile : car dés leur jeunesse ils manient les haches ; & je les ay veu par experience en faisans leur loges, ou celles des François, asseoir leurs haches aussi asseurement, & redonner quatre ou cinq fois au mesme endroit, que pourroit faire un charpentier bien appris.

La menuiserie leur est bien aisee à apprendre : ils dolent avec leurs serpes un bois aussi usny & esgal, que si le rabot y avoit passé. Ils font des marmots de bois & d’autres figures avec leur seuls couteaux. Il ne leur faut ne scie, ny autre outil à faire leurs arcs & avirons, & leurs espees de guerre, avec une simple tille : ils creusent & accommodent leurs canots, leur donnent telle forme qu’il leur plaist. Bref de tous les autres metiers mentionnez cy-dessus : Je les ay veu folio 71.fort industrieusement travailler, tellement qu’avec peu d’enseignement, ils viendroient à la perfection d’iceux : par dessus tout cela, ils s’entendent infiniment bien à faire des robes, couvertures de lict, ciel, pentes & rideaux de lict, de plumes de diverses couleurs, qu’à peine jugeriez vous de loin, que ce peut estre. Je ne veux parler de l’aptitude qu’ils ont connaturelle à peindre, & faire divers fueillages & figures, se servans seulement d’un petit copeau, au lieu qu’il faut tant de pinceaux à nos peintres, compas, regles, & crayons.

verso.

Que les Sauvages sont tres-aptes pour apprendre les sciences & la vertu.

Chap. XIX.

J’ay recogneu depuis mon retour des Indes en France, par les frequentes & ordinaires demandes que me faisoient ceux qui me venoient voir, la grande difficulté qu’ont tous nos François, de se persuader, que ces Sauvages soient capables de science & de vertu : ains je ne sçay si quelques-uns ne vont point jusques-là d’estimer les peuples barbares, plustost du genre des Magots que du genre des hommes. Je dy moy & par exemple je le prouveray, qu’ils sont hommes, & par consequent capable de science & de vertu : puis qu’au rapport de Seneque en son Epistre 110. Omnibus natura dedit folio 72.fundamenta semenque virtutum. La nature a donné à tous les hommes du monde, sans exception d’aucun, les fondemens, & semences des vertus, paroles bien notables : car comme les fondemens, & la semence sont jettez dans les entrailles de la terre & par consequent cachez en icelle : de mesme Dieu a jetté naturellement en l’esprit de l’homme les fondemens & semences des vertus ; sur lesquels fondemens tout homme peut bastir avec la grace de Dieu, un bel edifice, & tirer de la semence une tige portant fleurs & fruits, doctrine que prouve tres-clairement sainct Jean Chrysost. en l’Homelie 55. au peuple d’Antioche, & en l’Homelie 15. sur l’Epistre I. à Thimothee moralisant ce passage de la Geneze : Germinet terra herbam virentem, & omne lignum pomiferum : que la terre produise l’herbe verdoyante, & toute espece d’arbres fruictiers ou portans pommes, il adjouste : Dic ut producat ipse terra fructum proprium & exibit quicquid facere velis, dy & commande à ta propre terre, c’est à dire à ton ame, qu’elle produise son fruict connaturel, & tu verras qu’incontinent elle produira ce que tu demandes. verso.Et sainct Bernard, au traicté de la vie solitaire dit, virtus vis est quædam ex natura : que la vertu est une certaine force qui sort de la nature. Qu’il en soit ainsi, je le veux faire paroistre par plusieurs exemples, & commençant premierement par les sciences, pour lesquelles apprendre, il faut que les trois facultez de l’ame concurrent, la volonté, l’intellect, & la memoire : la volonté fournit à l’homme le desir d’apprendre, par lequel nous surmontons toute espece de travail & difficulté : l’intellect donne la vivacité de comprendre & la memoire reserve & conserve ce qui est cogneu & appris.

Les Sauvages sont extremement curieux de sçavoir choses nouvelles, & pour rassasier cet appetit, les long chemins, & la distance des pays leur est bien courte, la faim qu’ils patissent souvent ne leur couste rien, les travaux leur sont repos : ils vous escoutent attentivement, & tant que vous voulez, sans s’ennuyer, & sans qu’ils disent aucun mot, lors que vous leur discourez, soit de Dieu, soit d’autre folio 73.chose : si vous voulez avoir patience avec eux, ils vous font mille interrogations. Il me souvient qu’entre les discours que je leur faisois ordinairement par Truchement, je leur disois que si tost que nos Peres seroient venus de France, ils feroient bastir de belles maisons de pierre & de bois, où leurs enfans seroient receus, ausquels les Peres aprendroient tout ce que sçavent les Caraibes. Ils me respondoient : O que nos enfans sont bien heureux qui aprendront tant de belles choses, ô que nous sommes mal-heureux & tous nos Peres devant nous, qui n’ont point eu de Pays. Leur intellect est vif autant que la nature le permet : ce que vous reconnoistrés par ce qui suit : Il n’y a gueres d’Estoiles au Ciel qu’ils ne connoissent, ils sçavent juger à peu pres de la venuë des pluyes, & autres saisons de l’année, distingueront à la Physionomie un François d’avec un Portugais, un Tapoüis d’avec un Tapinambos & ainsi des autres : Ils ne font rien que par conseil : Ils pesent en leur jugement une chose, devant qu’en verso.dire leur opinion : Ils demeurent fermes & songeards sans se precipiter à parler. Que si vous me dites : Comment est il possible que ces personnes là ayent du jugement faisans ce qu’ils font ? Car pour un couteau, ils vous donneront pour cent escus d’Ambre gris s’il l’ont, ou quelqu’autre chose dont nous faisons prix, ainsi qu’est l’or, l’argent & les pierres precieuses. Je vous diray l’opinion qu’ils ont de nous au contraire sur ce point : c’est qu’ils nous estiment fols & peu judicieux, de priser plus les choses qui ne servent de rien à l’entretien de la vie, que celles sans lesquelles nous ne pouvons vivre commodement. Et de faict, qui est celuy qui ne confessera qu’un couteau est plus necessaire à la vie de l’homme qu’un diamant de cent mille escus, les comparant l’un à l’autre, & separant l’estime qu’on en faict. Et pour monstrer qu’ils ne manquent point de jugement à se servir de l’estime, que font les François des choses qui se trouvent en leurs pays : ils sçavent bien rehausser le prix des choses qu’ils croyent que les François recherchent. Un jour folio 74.quelques-uns me disoient qu’il falloit que nous fussions bien pauvres de bois en France, & qu’eussions grand froid, puis que nous envoyons des navires de si loing, à la mercy de tant de perils, querir du bois en leur pays[89] : Je leur fey dire, que ce bois n’estoit pas pour brusler, ainsi pour teindre les habits en couleur. Ils me repliquerent : quoy donc vous nous vendez ce qui croist en nostre pays, en nous donnant des casaques rouges, jaunes & pers : Je leur satisfey disant : qu’il falloit mesler d’autres couleurs avec celles de leur pays pour teindre les draps. Si vous me dites de rechef qu’ils font des actions totalement brutales, telles que sont celles-cy, manger leurs ennemis, & generalement tout ce qui les blesse, comme les poux, les vers, espines & autres. Je respons, que cela ne provient de faute de jugement, ains d’une erreur hereditaire qui a tousjours esté entr’eux, que leur honneur dependoit de la vengeance ; & me semble que l’erreur de nos François à se couper la gorge en duel, n’est pas plus excusable ; & toutefois nous voyons que les verso.plus beaux esprits, & les premiers de la Noblesse, sont frappez de cet erreur, meprisans le commandement de Dieu, & mettans leur salut eternel en peril eminent.

Quant à la memoire, ils l’ont tres-bonne, puis qu’ils se souviennent pour tousjours de ce qu’ils ont une fois ouy, ou veu, & vous representeront toutes les circonstances, soit du lieu, soit du temps, soit des personnes, que telle chose a esté ditte ou faicte, faisant une geographie ou description naturelle avec le bout de leurs doigts sur le sable, de ce qu’ils vous representent.

Ce qui m’estonna d’avantage, est qu’ils reciteront tout ce qui s’est passé d’un temps immemorial, & ce seulement par la traditive : car les vieillards ont ceste coustume de souvent raconter devant les jeunes quels furent leurs grands peres & ayeux, & ce qui se passa en leurs siecles : ils font cecy en leurs Carbets, & quelquefois en leurs loges, s’esveillans de bon matin & excitans les leur à escouter les harangues : aussi font-ils quand ils se visitent : car s’embrassans l’un l’autre, en pleurant tendrement, ils repetent l’un apres l’autre, parole folio 75.pour parole, leurs grands peres & ayeux, & tout ce qui est passé en leurs siecles.

Suitte des Matieres precedentes.

Chap. XX.

J’accorde que ces peuples sont enclins à beaucoup de vices naturellement : mais il se faut ressouvenir qu’ils sont captifs, par l’infidelité de ces esprits rebelles à la loy Divine, & instigateurs de la transgression d’icelle : que sainct Jean en sa premiere Epistre appelle Iniquité, ou Inegalité, c’est-à-dire, deviation ou detour du droict comme le texte Grec exprime notamment, ἡ ἁμαρτία ἐστὶν ἡ ἀνομία, c’est à dire, Peccatum est exorbitatio a lege : laquelle loy verso.est de deux sortes, Divine & Humaine ; la Divine a esté donnee par escrit à Moyse, & du depuis par Jesus-Christ aux Chrestiens : l’humaine est burinee au fond de la nature : Et ces deux loix sont deux sortes de pechez en leurs transgressions : l’un est appellé peché contre les commandemens de Dieu, & l’autre peché contre la lumiere naturelle ; & de cestuy-cy seront chargez & condamnez les mescroyans, chacun en son particulier, outre le peché commun de l’infidelité.

Entre tous les vices auquels pourroient estre subjets ces Barbares, ceux-cy sont speciaux, sçavoir est, la vengeance qu’ils ne demordent jamais, quelque mine qu’ils facent à leurs ennemis reconciliez & la mettent en pratique à toute occasion : & de faict il n’y a nulle doute, que si les François avoient quité Maragnan, toutes les nations qui se sont là congregees pesle-mesle, pour avoir l’aliance des François, estant auparavant ennemies, se mangeroient les unes les autres, & toutefois c’est chose estrange, qu’à present ils vivent en bonne intelligence soubs les François, s’entredonnans leurs filles en mariage.

folio 76.Ils sont fort amateurs de vin, & s’enyvrer est un grand honneur entre eux, mesmes les femmes. Ils sont lubriques extremement, & plus les jeunes filles que tout autre, inventeurs de fauses nouvelles, menteurs, legers & inconstans, qui sont vices communs à tous mescroyans, & pour accomplir la mesure ils sont paresseux incroyablement : de sorte qu’ils ayment mieux ne rien faire, & vivre chetivement, que de travailler & vivre grassement : Car s’ils vouloient tant soit peu se forcer, ils pourroient en peu d’heure avoir abondance de chair & de poisson. Cecy se doit specialement entendre des Tapinambos : Car pour les autres Nations, telles que sont les Tabaiares, Long-cheveux, Tremembaiz, Canibaniliers, Pacajares, Camarapins, Pinariens, & semblables, ils se peinent pour mieux vivre, & amasser marchandises, & s’accommoder gentiment tant en leurs loges, qu’en leurs mesnages.

Je vay icy reciter un exemple joyeux de la paresse de nos Tapinambos. Quelques François du Fort, ayans demandé congé d’aller par les villages verso.pour se rafreschir, vindrent en bonne rencontre au village d’Vsaap, & à l’entree de la premiere loge, ils trouverent un grand Boucan chargé de venaison : aupres duquel le maistre d’iceluy estoit couché dans un lit de coton, qui se plaignoit fort, comme s’il eust esté malade : Nos François affamez & bien deliberez de faire feste à cette table preparee, luy demanderent d’une voix douce & amoureuse Dé omano Chetouasap, estes-vous malade mon Compere ? Il respond qu’oüi : les François repliquerent, qu’avez-vous donc ? Qu’est-ce qui vous faict mal ? Ma femme, dict-il ; est dés le matin au jardin, & je n’ay encore mangé. Les François luy dirent : voilà de la farine & de la chair si prez de vous, que ne vous levez-vous pour en prendre ? Il respond, Cheateum, Je suis paresseux, je ne me sçaurois lever. Voulez-vous, dirent les François, que nous vous apportions de la farine & de la viande, & nous mangerons avec vous ? Je le veux bien, respondit-il, aussitost chacun se met en devoir de descharger le folio 77.Boucan, & le mettre devant luy, & s’asseans en rond, comme c’est la coustume, l’incitoient à manger par le bon appetit qu’ils avoient, & la peine qu’ils eurent d’apporter les viandes de dessus le Boucan, qui n’estoit qu’à trois pieds de là, fut le payement de leur escot.

Nonobstant ces perverses inclinations, ils en ont d’autres tres-bonnes & loüables à la vertu. Ils vivent paisiblement les uns avec les autres, font part de leur pesche, chasse & autres vivres à leurs semblables, & ne mangent rien en secret parmy eux. Un jour au village de Ianouaran il n’y avoit autre chose à manger que de la farine : Il survint un jeune garçon qui apporta une grosse perdrix fraischement tuee, sa mere la plume au feu, la faict boüillir, la met au mortier, puis la reduict en poudre, & faisant apporter des fueilles de Manioch (lesquelles approchent du goust de la chicoree sauvage), les fit boüillir, & les ayant bien hachees, elle mesle la poudre de la perdrix & de la farine avec ces fueilles hachees, duquel meslange elle fit de petites verso.boules, grosses comme une balle, qu’elle envoya à tous les mesnages de sa loge chacun la sienne. J’ay veu moy-mesme une chose plus qu’admirable, encore qu’elle soit triviale & de peu de consequence : C’est que plusieurs Sauvages fort affamez, vindrent de la pesche en ma loge, n’ayans sceu rien prendre sinon qu’une Crabe, c’est un Cancre, qu’ils firent cuire sur les charbons, & m’ayans demandé de la farine pour la manger, ils s’asseerent en terre en rond, chacun prenant son morceau : Ils estoient douze ou treize. Vous pouvez penser combien chacun en pouvoit avoir, parce que la Crabe n’excedoit au plus la grosseur d’un œuf de poule.

La liberalité est tres-grande entr’eux, & l’avarice en est fort esloignee, tellement que si quelqu’un d’entr’eux a desir d’avoir quelque chose qui appartient à son semblable, il luy dit franchement sa volonté : & il faut que la chose soit bien chere à celuy qui la possede, si elle ne luy est donnee incontinent, à la charge toutefois que si le demandeur a quelque autre chose que le donneur affectionne, il la folio 78.lui donnera toutefois & quantes qu’il la luy demandera.

Ils font paroistre leur liberalité beaucoup plus vers les estrangers, que vers leurs compatriotes, tellement qu’ils s’apauvrissent de leurs hardes, pour en accommoder les estrangers qui les viennent voir, s’estimans bien recompensez d’estre reputez liberaux par ceux qui ne sont de leur pays, croyans que leur renommee volera dans les pays esloignez, & là seront tenus pour grands & riches : de sorte que bien souvent ils vont faire des visites à cent, deux cens, & trois cens lieuës, pour ce sujet d’estre estimez par leurs liberalitez. Jamais ils ne s’entre-dérobent, ains tout est à la veuë d’un chacun, suspendu aux poutres & soliveaux de leurs loges. Il est bien vray que dedans l’Isle à present, dans Tapouïtapere & Comma, ils ont des coffres que les François leurs ont donnez, dans lesquels ils reserrent leur meilleure marchandise, aussi il s’est ensuivy soit de là, soit de l’exemple des François, que plusieurs apprennent le mestier de dérober. Ils appellent dérober, Monda le larron, Mondaron, & est une grande injure entr’eux, verso.tellement qu’ils changent de couleur au visage, de sorte qu’appeller une femme laronnesse, & double putain qu’ils signifient par le mot Menondere, à la difference d’une simple putain appellée Patakuere, c’est le pis qu’on luy sçauroit dire : aussi vous estes payez de mesme monnoye, quand vous les appellez larrons : pour ce qu’ils vous jettent sur la barbe un beau & bon Giriragoy, c’est à dire, tu as menty, sans espargner personne, en quoy on peut recognoistre, combien ce vice leur déplaist, puis qu’ils n’en sçauroient supporter l’injure.

Ils gardent equité ensemble, ne se fraudent, & ne se trompent ; si quelqu’un offence autruy, la peine du Talion s’ensuit ; sont fort compationnans & se respectent l’un l’autre, specialement les vieillards. Ils sont fort patiens en leurs miseres & famine, jusques à manger de la terre[90], à quoy ils habituent leurs enfans, chose que j’ay veuë plusieurs fois, que les petits enfans tenoient en leurs mains une plote folio 79.de terre, qu’ils ont en leur pays quasi comme terre sigilee, laquelle ils sucçoient & mangeoient, ainsi que les enfans de France, les pommes, les poires, & autres fruicts qu’on leur donne.

Ils ne sont pas fort curieux à apprester leur viande, comme nous : car, ou ils la jettent dans le feu pour la cuire, ou la mettent boüillir dans la marmite sans sel, ou rostir à la fumee sur le Boucan.

Ordre et Respect que la Nature a mise entre les Sauvages, qui se garde imviolablement par la jeunesse.

Chap. XXI.

Le poinct que j’ay le plus consideré & le plus admiré, pendant les deux ans que j’ay demeuré verso.entre les Sauvages, est l’ordre & respect gardé inviolablement des jeunes, vers leurs majeurs, ou entr’eux, chacun executant ce que son aage requiert de luy, sans s’ingérer de plus haut ou de moindre. Qui est celuy qui ne s’estonnera avec moy, que la pure nature ait plus de force sur ces Barbares à faire garder le respect, que les enfans doivent à leurs majeurs, & à demeurer dans les bornes du devoir que requiert la diversité des aages, que la nature, dis je, ait plus de force à faire observer ces choses, que non pas la Loy, ny la grace de Jesus-Christ sur les Chrestiens, parmy lesquels rarement l’on voit que la jeunesse se tienne dedans ses termes, nonobstant tous les beaux enseignements, Maistres & Pedagogues, ains l’on n’y remarque que de la confusion & grande presomption. A la mienne volonté que ce discours suivant nous y apporte quelque remede.

Les Sauvages ont distingué leurs aages, par certains degrez, chaque degré, portant sur le front de son entree, son nom propre, qui advertit celuy qui desire entrer dans son Palais ses parterres & folio 80.allees, le but de sa charge, qu’il enveloppe sous soy par enigme, comme faisoient jadis les Hierogliphiques des Egyptiens. Le premier desquels, pour les enfans masles & legitimes, se nomme en leur langue, Peitan, c’est à dire, enfant sortant du ventre de sa mere. En ce premier degré d’aage, plein d’ignorance du costé de l’Enfant, & qui n’a autre portion que les pleurs & la foiblesse, si est-ce qu’estant le fondement de tous les autres degrez, la Nature ; bonne mere à ces Sauvages, a voulu que l’enfançon fust disposé immediatement, à la sortie du ventre de sa mere, à recevoir en luy, les premieres semences du naturel commun de ces Barbares : Car il n’est point caressé, emmailloté, eschauffé, bien nourry, bien gardé, ny mis en la main d’aucune nourrice, ains simplement lavé dans le ruisseau, ou en quelque autre vase plein d’eau : est mis en un petit lit de cotton, ses petits membres ayans toute liberté, sans vesture quelconque, soit sur le corps, soit sur la teste : il se contente pour sa nourriture du laict de sa mere, & des grains de mil rostis sur les charbons, & machez dans la verso.bouche de la mere reduicts en farine, & détrampez de sa salive en forme de boüillie, laquelle sa mere luy donne en sa petite bouche, ainsi qu’ont accoustumé les oyseaux de repaistre leurs petits, c’est-à-dire bouche à bouche. Il est bien vray que quand l’enfant est un peu fort, par une cognoissance & inclination naturelle, vous le voyez rire, s’esjoüir, & tressaillir à la mode des enfans, sur les bras de sa mere, la considerant mascher grossement en sa bouche, sa nourriture, & portant son petit bras à la bouche de sa nourrice, il reçoit dans le creux de sa menote cette pasture naturelle, qu’il porte droict à sa petite bouche & la mange : & quand il se sent rassasié, il jette le surplus en terre, & destournant son visage, frappant de ses mains la bouche de sa mere, il luy fait entendre, qu’il n’en veut plus. A quoy obeist la mere, ne forçant en rien son appetit, & ne luy donnant aucune occasion de pleurer. Si l’enfant a soif il sçait fort bien demander par ses gestes la folio 81.mammelle de sa mere. Ces petits enfans rendent, en ce jeune aage, le respect & le devoir, que la nature leur demande en ce degré : car ils ne sont point criards, pourveu qu’ils voyent leurs meres, se tiennent en la place, où elles les mettent : Quand elles vont jardiner au bois, elles vous les asseent tous nuds comme ils sont sur le sable & la poudre, où ils se tiennent sans dire mot, quoy que l’ardeur du Soleil leur donne vivement sur la teste, & sur le corps. Qui est celuy de nous autres, qui auroit eu en son petit aage la moindre de ses incommoditez, & seroit à present en vie ? Nos parens sçavent la retribution & le devoir que nous avons commencé à leur rendre, dés ce premier degré, d’où ils pouvoient bien s’asseurer, si le trop grand amour qu’ils nous portoient ne les eust aveuglez, qu’en tous les autres degrez de nostre aage, nous ne serions pas plus recognoissans de nostre devoir envers eux, quelque peine qu’ils puissent prendre.

Le second degré d’aage commence au temps verso.que le petit enfant s’esvertuë d’aller tout seul, encore que confusément on ne laisse d’appeller du mesme mot que je vay dire les enfans, en leur premier degré : Neantmoins j’ay pris garde de prez, qu’autre est la façon de gouverner les enfans qui ne peuvent marcher, & autre la façon de gouverner ceux qui s’efforcent d’aller tous seuls, qui faict que nous devons mettre ce degré à part, & singulariser leur nom, pour l’adapter seulement à leur degré, specifié par la diversité de gouvernement & d’action : Le second degré s’appelle Kounoumy miry, petit garsonnet[91], & dure jusqu’à l’aage de sept ou huict ans. En tout ce temps ils ne s’esloignent de leurs meres, & ne suivent encore leurs Peres, qui plus est, on les laisse à la mammelle, tant que d’eux mesmes, ils s’en retirent, s’accoustumans peu à peu à manger des grosses viandes, comme les grands & adults. On leur fait de petits arcs, & des flesches proportionnees à la force de leurs bras : lors s’amassans les uns avec les autres de mesme aage, ils plantent & attachent quelques courges, devant eux, sur lesquelles ils tirent folio 82.leurs fleches, & ainsi de bonne heure ils s’adextrent tant les bras que la veuë à tirer justement. On ne voit battre, ny foüetter ces enfans, qui obeissent à leurs parens, & respectent ceux qui sont plus aagez qu’eux. Cet aage d’enfans est infiniment agreable : car vous remarquez en eux la distinction qui peut estre en nous, de la nature & de la grace : pour ce que, rejettant toute comparaison, je les ay trouvez aussi mignons, doux & affables, que les enfans de par de çà, sans oublier pourtant d’excepter & mettre à part, la grace du Sainct Esprit, qui est donnee aux enfans des Chrestiens par le Baptesme. Que s’il arrive que ces enfans en cet aage meurent, les parens en portent un deüil extreme, & en gravent une memoire perpetuelle en leur cœur, pour s’en resouvenir en toutes les ceremonies de larmes & de pleurs, rememorans entre ces souvenances, qu’ils se font les uns aux autres, en pleurant cette perte, & mort de leurs petits garsonnets, les appellant d’un nom particulier Ykounoumirmee-seon, le petit garsonnet verso.mort en son enfance. J’ay veu de ces foles meres demeurer au milieu de leurs jardins, dans les bois toutes seules, voire quelquefois s’arrester & acroupir dans le milieu du chemin, pleurantes amerement, & leur ayant faict demander ce qu’elles avoient de pleurer ainsi toutes seules dans les bois, & au milieu du chemin : Helas ! disoient-elles, nous nous resouvenons de la mort de nos petits enfans, Ché Kounoumirmee-seon, morts en leurs enfances. Puis elles recommençoient de tant plus à pleurer, & se fondoient en larmes : & à la verité cela est connaturel, d’avoir regret de la perte & mort de ces petits enfans, qui tant s’en faut, qu’ils ayent donné de la peine à leurs parens, c’est au contraire, le seul & unique temps du cours de leur vie, auquel ils puissent donner quelque contentement à leurs peres & meres.

Le troisieme degré contient l’aage entre ces deux premiers degrez, d’enfance & de puerilité, & entre les degrez d’adolescence & virilité, qui est proprement depuis 8 jusques à 15 ans, que nous appellons folio 83.jeunesse, & garsons : les Sauvages les appellent simplement Kounoumy sans aucune autre addition, telle qu’est l’enfance appellee Kounoumy miry & l’adolescence nommee Kounoumy Ouassou. Ces Kounoumys donc, ou garsons, en l’aage de 8 à 15 ans, ne s’arrestent plus au foyer, ny autour de leurs meres, ains suivent leurs Peres, apprennent à travailler, selon qu’ils voyent qu’ils font : ils s’appliquent à rechercher la nourriture pour la famille, vont au bois tirer des oyseaux, vont à la mer, flecher les poissons, qui est chose tres-belle à voir, avec quelle industrie ils dardent quelquefois trois à trois ces poissons, ou bien ils les prennent avec la ligne faite de toucon, ou dans les poussars, qui sont une espece de fouloire & petite seine, se chargent d’huytres & de moules, & apportent le tout en la maison : on ne leur commande de ce faire. Ils y vont de leur propre instinct, recognoissans que c’est le devoir de leur aage, & que tous leurs majeurs ont fait le mesme. Ce travail & exercice plus joyeux que penible, correspondant à l’inclination de leurs ans, les affranchit de beaucoup de vices, ausquels la nature infectee commence à prester l’oreille et le goust : verso.Et c’est, ce me semble, la raison pourquoy, l’on propose à la jeunesse des divers exercices liberaux ou mechaniques, pour la retirer & divertir de l’impulsion corrompuë, que chacun a naturellement attachee dedans soy, laquelle se renforce par l’oysiveté, specialement en ce temps.

Le quatriesme degré est pour ceux, que les Sauvages appellent Kounoumy Ouassou, c’est à dire grands garsons, ou jeunes hommes, comprenant les ans depuis 15. jusques à 25. que nous disons entre nous l’adolescence. Ceux-cy ont une autre sorte de comportement : car ils s’addonnent fort et ferme au travail, ils s’habituent à bien manier les avirons des Canots, et pour ceste cause on les choisit, quand on desire aller en guerre, pour nager les Canots. Ce sont eux qui s’estudient specialement à faire les fleches pour la guerre : ils vont à la chasse, avec les chiens, s’acoustument à bien flecher et harponner les gros poissons, ne portent encore des Karaiobes, c’est-à-dire, des pieces de drap liees devant eux pour cacher leur honte, comme font les hommes mariez, folio 84.mais avec une fueille de Palme ils accomodent ceste partie. Ils peuvent librement deviser avec les plus aagez, hormis au Carbet, où il faut qu’ils escoutent, sont prompts à faire service à ceux qui les surpassent d’aage. Et à vray dire, c’est en ce temps qu’ils aydent plus à leurs Peres & Meres, de leur travail, chasse et pesche, d’autant qu’ils ne sont point encore mariez, & par consequent non obligez à nourrir une femme : & c’est pourquoy leurs parens s’attristent beaucoup, quand ils meurent en ces annees, leur donnans un nouveau nom en signe de douleur, qui est Ykounoumy-ouassou-remee seon, c’est à dire le grand garson mort, ou le grand garson mort en son adolescence.

Le cinquiesme degré prend depuis 25. jusqu’à 40. ans, & celuy qui est en ces annees proprement s’appelle Aua, vocable qui ne laisse pas d’estre imposé generalement à tous les aages, ainsi comme est le nom d’homme parmy nous : toutefois il doit estre particulier à cet aage, en tant qu’alors l’homme est verso.en sa force appellé par les Latins vir, à virtute, & en François aage viril, pour la virilité, c’est-à-dire la force qui est en l’homme en ce terme : de mesme ceste langue des Sauvages use de ce mot Aua, duquel procede Auaeté, c’est-à-dire fort, robuste, vaillant, furieux, pour signifier le 5. aage de leurs enfans. En ce temps ils sont bons guerriers pour bien frapper, mais non pour conduire. Ils recherchent les femmes en mariage en cette saison, lequel n’est pas beaucoup difficile à faire : car le trousseau de la nouvelle mariee ne consiste qu’en quelques courges que sa mere luy donne pour commencer son mesnage, au lieu qu’en ces pais les meres fournissent les vestements, linges, ornemens & pierreries à leurs filles. Les peres donnent pour doüaire, aux marys qui espousent leurs filles, 30. ou 40. buches coupees de mesure, qu’ils font porter en la chambre du nouveau marié, pour faire le feu des nopces, & ce nouveau marié s’appelle non plus, Aua, mais Mendar-amo. Quoy que ce jeune homme soit marié, & la jeune femme semblablement, cela n’oste ny afranchit de folio 85.l’obligation naturelle, d’assister leurs parents, ains demeurent tousjours obligez de leur subvenir, & ayder à faire leurs jardinages. C’est une remonstrance que j’entendy faire en ma loge, par la fille de Iapy-Ouassou, baptisée & mariee en l’Eglise, à un autre Sauvage son mary aussi Chrestien, lequel s’en allait à Tapouitapere, assister le R. Pere Arsene, pour baptiser plusieurs Sauvages : Elle luy dit ainsi : Où veux-tu aller ? Tu sçais bien que les jardins de mon Pere sont à faire, & qu’il a faute de vivres : Ne sçais tu pas qu’il m’a donnee à toy, à la charge que tu luy ayderois & subviendrois en sa vieillesse ? Si tu le veux abandonner je m’en vay retourner chez luy. On la reprit sur ces derniers mots, luy faisant recognoistre la foy, qu’elle avoit donnee, de jamais ne l’abandonner, ou se separer de luy, quant au reste on la loüa fort : Et pleust à Dieu que tous les enfans de la Chrestienté se mirassent en ce lieu, apprenans la vraye intelligence de ces paroles formelles du mariage, que l’homme & la femme quitteront leurs parens pour adherer ensemble : car tant s’en faut que Dieu authorise l’ingratitude des enfans mariez, pour verso.ce disent-il, qu’ils ont d’autres enfans, ou sont prests d’en avoir, ausquels il faut qu’ils pourvoient : qu’au contraire, Dieu reprouve comme damnez, ceux qui abandonnent leurs parens, sans lesquels, mettant la volonté de Dieu à part, ils ne seroient au monde, ny eux ny leurs enfans ; mais bien par ces paroles Dieu declare la grande union qui doit estre d’esprit & de corps, entre l’homme & la femme par le mariage.

Le 6. degré enferme en soy, les annees depuis 40. jusqu’à la mort, & ce degré est le plus honorable de tous ; c’est luy qui couronne de respect & de majesté les braves soldats, & prudens Capitaines d’entr’eux : tout ainsi que la saison de l’Aoust donne la cueillette des labeurs, & recompence la patience du laboureur à supporter l’hyver, & le printemps, sans estre aydé de sa terre, sur laquelle il a tant fait de tours & retours avec la charruë, ainsi en est-il parmy les Sauvages, lesquels estans parvenus à la saison folio 86.d’anciens & vieillards sont honorez de tous ceux qui sont leurs inferieurs en aage. Celuy qui est receu par la course de ses annees en ce terme, est appellé Thouyuaë, c’est a dire ancien & vieillard : Il n’est plus si assidu au travail comme les autres, ains il travaille à son vouloir & à son aise, & plus pour servir d’exemple à la jeunesse & suivre la coustume de leur Nation, que pour autre necessité : il est escouté avec silence dans un Carbet : & parle par mesure & gravement sans precipiter ses paroles, lesquelles il accompagne de geste naïf, & explicant nettement ce qu’il veut dire, & le sentiment avec lequel il prononce ces paroles. On luy respond doucement & respectueusement, & les jeunes le regardent & escoutent attentivement, quand il parle : s’il se trouve à la feste des Kaouïnayes, il est le premier assis & servy le premier ; & d’entre les filles qui versent le vin, & le presentent aux invitez : les plus honorables le servent, telles que sont les filles les plus proches de consanguinité à celuy qui faict le convive. Parmy les danses qui se font là, ces anciens verso.& vieillards entonnent les chansons, & leur donnent la notte, commençans d’une voix fort basse, mais grave, tousjours montant presque à la mesure de nostre musique. Leurs femmes ont soin d’eux, leur lavent les pieds, leur apprestent & apportent à manger, & s’il y a quelque difficulté en la viande, poisson, ou escrevices de mer, pour estre aisement machees leurs femmes les cassent, espluchent & accommodent. Quand quelqu’un d’eux meurt, les vieillards luy rendent honneur, le pleurent comme les femmes, & l’appellent Thouy-uaë-pee-seon. Il est vray que s’il est mort en guerre, ils l’appellent d’un autre mot, qui est marate-Kouapee-seon, c’est-à-dire, le vieillard mort au milieu des armes : ce qui ennoblit autant les enfans d’iceluy & toute sa race, comme entre nous, quelque vieil Colonel, qui toute sa vie n’a faict rien autre chose, que porter les armes pour le service de son Roy & de sa patrie, meurt pour le comble de son honneur les armes au poing, la face tournee vers les ennemis, au milieu d’un furieux combat, chose qui n’est pas oubliee par ses enfans, folio 87.ains la tiennent pour le plus grand heritage qu’il leur peut laisser & sçavent bien s’en servir, pour representer au Prince le bon service de leur pere, & partant recompence deüe par le Prince aux enfans. Ces Sauvages qui ne font cas d’aucune recompence humaine ains seulement de l’honneur, recueillans & rassemblans toutes les passions de leurs ames à ce seul but, ne peuvent autrement, qu’ils ne facent grande estime des proüesses de leurs parens, & qu’ils ne soient estimez par les autres pour le respect d’iceux. Ceux qui meurent en leur lict, ne laissent pas d’estre honorez, chacun selon son merite, & est appelé d’iceux Theon-souyee seon, c’est à dire, le bon vieillard mort en son propre lict.

Par ce discours vous pouvez voir, comme la nature seule nous apprend de respecter les vieillards & anciens, les ayder & secourir & reprend aigrement la temerité & presomption de la jeunesse de ce temps qui sans prevoir l’advenir n’advisent pas qu’alors qu’ils deviendront vieux, il leur sera rendu justement la mesme mesure qu’ils ont donnee estant jeunes à leurs predecesseurs : car ils apprennent par exemple, verso.leurs enfans à leur rendre ceste ingratitude.

Que le mesme ordre & respect se garde entre les filles & les femmes.

Chap. XXII.

Les traicts de la nature se trouvent entre ces Sauvages, tout ainsi que les pierres precieuses se rencontrent dans les flancs d’une montagne : car celuy qui estimeroit, que les diamans & autres joyaux fussent dans leur lict naturel aussi clairs & estincelans, comme ils se voient enchassez dans les bagues, seroit un fol : pour ce que ces riches pieces sont enveloppees dans le limon, sans paroistre beaucoup, folio 88.tellement que plusieurs passent & repassent dessus, ignorans ce secret, sans les lever de terre.

La mesme chose se pratique en la conversation de ces pauvres Sauvages : combien y en a-il, qui ont ignoré, & ignorent ce que j’ay rapporté icy, & rapporteray, quoy qu’ils ayent longtemps conversé avec eux, faute d’avoir penetré & remarqué la belle conduitte de la nature en ces gens destituez de grace, ains ont passé par dessus ces pierres precieuses sans en faire leur profit, traversant le tout en gros.

Le mesme ordre des degrez d’aage, j’ay remarqué entre les filles & les femmes, comme il est entre les hommes, sçavoir, que le premier degré supposé commun aux masles & aux femelles sortans immediatement du ventre de leurs meres, appellé du mot, Peïtan, ainsi qu’avons dit suffisamment au chapitre precedent : le second degré suit, qui met distinction d’aage, de sexe & de devoir : d’aage de fille à fille, de sexe de fille à garçon & de devoir de la plus jeune à son aisnee. Ce degré enclost dedans soy les sept premieres annees, & la fillette de ce temps verso.s’appelle Kougnantin-myri, c’est-à-dire la petite fillette. En tout cet aage, elle demeure fixement avec sa mere, succeant le laict de la mere plus d’un an davantage que les garçonnets, voire je diray bien ceste verité, d’en avoir veu aagees de plus de six ans, teter encore leurs meres, mangeant fort bien toute autre viande, parlant & courant comme les autres. Au lieu que les garçonnets de cet aage portent des arcs & fleches, ces fillettes s’amusent à contre-faire leurs meres en fillant comme elles peuvent du coton, & traceant une espece de petit lict, comme est la coustume des fillettes de cet aage à s’amuser à quelques frivoles & legeres ouvrages, pestrissent la terre, contrefaisant l’usage des plus experimentees à faire des vases & des escuelles de terre. Il y a bien à dire de l’amour que portent les peres & les meres à leurs petits enfans masles, ou fillettes ; pour ce que tant le pere que la mere batissent leur amour sur leur fils, & pour les filles, cela leur est par accident, & ne sont point esloignees en ceste suitte de nature, de nostre lumiere commune qui nous rend plus prisables les fils que les folio 89.filles, & non sans raison : car l’un conserve la souche, & l’autre la met en pieces.

Le troisiesme degré va depuis sept jusqu’à quinze, & la fille de cet aage s’appelle Kougnantin, c’est à dire fille : c’est en cet aage qu’elles perdent ordinairement par leurs foles phantasies, ce que ce sexe a de plus cher, & sans quoy elles ne meritent d’estre estimees, ny devant Dieu, ny devant les hommes : qu’on me pardonne, si je dy un mot, que plusieurs de ce sexe en cet aage, ne sont pas plus sages par de çà, quoy que l’honneur & la loy de Dieu, les devroit convier à l’immortalité de la candeur, parce que ces pauvres jeunes filles barbares, ont un erreur connaturel procedé de l’auteur de tout mal, qu’elles ne doivent estre trouvees apres cet aage avec le signacle de leur pureté : Je n’en diray pas d’avantage, pour n’offencer le Lecteur : il me suffit d’ateindre & toucher le fil de mon discours. En ces annees elles apprennent tous le devoir d’une femme, soit pour filer les cotons, pour tistre les licts, pour travailler en estame, pour semer & planter les jardins, pour faire les farines, composer les vins, & apprester les verso.viandes, gardent un grand silence, quand elles se trouvent en compagnie, où il y a des hommes, & generalement elles parlent peu de cet aage, si elles ne sont avec leurs semblables.

Le 4. degré est depuis 15. ans jusqu’à 25. ans ; lequel impose à la fille de cet âge le nom de Kougnanmoucou, c’est-à-dire, une fille, ou femme en sa grandeur & stature parfaicte, que nous disons en ces quartiers fille à marier. Nous passerons souz silence l’abus qui se commet en ces annees, par la tromperie que la coustume de leur Nation deceuë, leur a imprimé pour loy dans leur esprit. Ce sont elles qui font tout le mesnage de la maison, relevant de peine leurs meres, & ont la charge des choses necessaires pour le vivre de la famille. Elles ne sont pas longtemps sans estre demandees en mariage, si tant est que leurs parens ne les reservent pour quelque François, afin d’avoir abondance de marchandise, & en cas que cela ne soit, elles sont donnees en mariage, & alors elles portent le nom de Kougnanmoucou-poire[92], c’est-à-dire, femme mariee & en la force de son aage. Et dés ce temps elle suit son mary, folio 90.portant sur sa teste, & sur son dos apres luy, tant les ustenciles necessaires, pour presenter à manger, que le mesme manger, & les vivres qui sont de besoin par les chemins : tout ainsi que les mulets de par deçà portent le bagage & les vivres des Seigneurs : Et en effect, puisque je suis sur ce point je diray ce mot, que comme les Seigneurs de l’Europe ambitieux de faire recognoistre à tout le monde leur grandeur, taschent d’avoir le plus grand nombre de mulets qu’ils peuvent : ainsi ces Sauvages sont extremement convoiteux d’avoir nombre de femmes pour marcher apres eux, portans leur bagage : d’autant qu’entr’eux, ils sont prisez & estimez selon le nombre des femmes qu’ils ont.

Ces jeunes femmes devenuës grosses du faict de leurs maris, sont appellees d’un mot particulier Pouroua-bore, c’est à dire, femme enceinte, & nonobstant ceste grossesse, elles ne laissent de travailler, jusqu’à l’heure de leur accouchement, comme si elles n’estoient point empeschees. Elles deviennent fort grosses, à cause qu’elles rendent leurs enfans assez grands & membrus. Plusieurs penseroient que ces femmes verso.en cet estat, auroient plus de curiosité de se couvrir, mais c’est tout un avec les autres temps. Venuë qu’elle est au temps de ses couches, si couches se doivent apeller : car elle ne garde pour tout cela le lict, si elle n’est prevenuë de grandes douleurs, encore à lors demeure-elle assize, environnee de ses voisines, lesquelles elle a invitees, quelque peu auparavant, au sentiment & mouvement de son fruict, de l’assister par ces paroles, Chemen-boüirare-Kouritim, c’est-à-dire, je m’en vay incontinent accoucher, ou je suis preste à present d’accoucher, lors le bruit court par les loges, que telle ou telle s’en va accoucher, disans ces paroles avec le nom propre de la femme qu’elles y conjoignent Ymen-bouïrare, qui signifie, une telle est accouchee, ou s’en va accoucher. Le mary s’y trouve avec les voisins, & si tant est que sa femme ait difficulté d’enfanter, il luy presse le ventre, pour faire sortir l’enfant, sorty qu’il est, il se couche pour faire la gesine au lieu de sa femme[93], qui s’employe à son office coustumier, & lors toutes les femmes du village viennent le voir & visiter couché en ce sien lict, le consolant sur la peine & folio 91.douleur qu’il a eu de faire cet enfant, & est traitté comme fort malade & bien lassé, sans sortir du lict, au lieu que par deça les femmes gardent le lict apres l’accouchement où elles sont visitees & traittees.

Le cinquiesme degré enferme dans ses limites les annees de vingt-cinq à quarante ans, auquel temps le femme reçoit toute sa force, ainsi que l’homme ; & partant est appellee du nom commun & general Kougnan, sans autre addition, ce que nous dirions en François, une maistresse femme, ou une femme en sa force. En ce terme les femmes Indiennes ont encore quelques traicts de la beauté de leur jeunesse, neantmoins elles s’en vont au declin le grand galot, & commencent à estre hideuses & sales, leurs mamelles pendantes le long de leurs flancs, comme vous voyez par deça aux levrettes & chiennes de chasse : ce qui apporte une horreur à la veuë : quand elles sont jeunes, elles sont tout au contraire, portans les mamelles fermes. Je ne veux m’amuser d’avantage à ceste matiere, apres que j’auray dit, que la recompence verso.dés ce monde donnee à la pureté, est l’incorruption & integrité accompagnee de bonne odeur, fort bien representee dans les sainctes lettres par la fleur de Lys, pur, entier & odoriferant : Sicut lilium inter spinas, sic amica mea inter filias.

Le sixiesme & dernier degré prend depuis quarante ans, jusqu’au reste de la vie, & la femme de ce temps est nommee Ouainuy : dans ces annees, elles ne laissent d’estre fœcondes à produire des enfans : Elles usent du privilege de mere de famille : ce sont elles qui president à faire les Kaouins, & toutes leurs autres manieres de brasseries : sont les maistresses du Carbet, où se trouvent les femmes pour deviser : & quand le pouvoir de manger les esclaves estoit encore entier, c’estoit leur office de bien faire rostir le corps, recueuillir la gresse qui en degoutoit, afin d’en faire le Migan, c’est-à-dire le potage, de faire cuire les tripes & boyaux dans des grandes poëles de terre, y mesler la farine, & les chous de leurs pays, puis mesuroient la portion d’un chacun dans des escuelles de bois, qu’elles envoyoient à tous par folio 92.les jeunes filles. Ce sont elles qui commencent les pleurs & gemissemens sur les deffuncts, & à la bien venuë de leurs amis. Elles enseignent aux jeunes ce qu’elles ont appris. Elles sont plus corrompuës en paroles, & plus effrontees que les filles & les jeunes femmes ; & n’oserois dire ce qui en est, & ce que j’en ay veu & recogneu. Bien vray est que j’en ay veu & cogneu de fort bonnes, honnestes & charitables.

Il y avoit au Fort S. Louïs deux bonnes vieilles femmes Tabaiares, qui ne manquoient jamais de m’apporter de leurs petites commoditez, & quand elles me les offroient, c’estoit en pleurant, & s’excusant de ne pouvoir faire mieux. Je n’ay pas pourtant grande esperance de ces vieilles : Il faut que le Païs s’en face quitte par la mort naturelle : quand elles meurent elles ne sont pas beaucoup pleurees ny regrettees, ainsi les Sauvages en sont bien aises pour en avoir de jeunes. Je me suis laissé dire que les Sauvages, par opinion supersticieuse tiennent, que les femmes ont bien de la peine, apres qu’elles sont mortes, de trouver le lieu, où dansent leurs grands verso.Peres, par delà les montagnes, & qu’une bonne part demeure par les chemins si tant est que quelques unes s’y arrivent. Elles deviennent fort sales, quand elles atteignent l’aage decrepité, & y a ceste distinction entre les vieillards & les vieilles, que les vieillards sont venerables, & representent une façon en eux, de gravité & authorité ; à l’opposite les vieilles de ces Païs sont rechignees & ridees comme un parchemin mis au feu : nonobstant cela, elles sont fort respectees, tant de leurs maris, que de leurs enfans & specialement des filles & des jeunes femmes.

folio 93.

De la consanguinité, qui est parmy ces Sauvages.

Chap. XXIII.

La consanguinité entre ces barbares, a autant d’eschelons & rameaux comme la nostre, & se conserve de famille en famille, avec autant de curiosité comme nous pourrions faire, excepté le poinct de Castimonie, qui a de la peine parmy eux, sinon au premier eschelon, c’est-à-dire de Pere à fille. Pour les sœurs, & les freres, ils ne se marient pas ensemble, mais du reste de leurs affaires j’en doute, & verso.non sans raison, cela ne merite pas d’estre escrit.

Le premier rameau sort du tronc de leurs Ayeuls ou grands Peres, qu’ils appellent Tamoin[94], & soubs ce mot ils comprennent tous leurs devanciers, voire depuis Noé, jusqu’au dernier de leurs Ayeuls ; & c’est chose estrange, comment ils se souviennent & racontent d’Ayeul en Ayeul, leurs devanciers, veu que nous sommes bien en peine en l’Europe de monter jusqu’au Tris-ayeul, que les familles ne se perdent deçà delà.

Le second rameau pousse & sort du premier, & s’appelle Touue, c’est-à-dire, Pere, & est celuy qui les engendre en vray & legitime mariage, tel qu’il est pratiqué par delà : Car la Loy des bastards, est autre que celle des legitimes, ainsi que nous dirons en son lieu. Ce rameau paternel en produit un autre qui se nomme Taïre, c’est-à-dire, fils, lequel rameau vient à se coupper, & fourcher en diverses branches, ausquelles ils imposent ces noms Chéircure, c’est-à-dire, folio 94.mon grand frere, ou mon frere aisné, qui doit tenir la tige de la maison & de la famille, & Chèuboüire, qui signifie mon petit frere, ou mon cadet, auquel n’appartient de tenir la maison, sinon par la mort de son grand frere. Arrivant qu’un de ces deux freres aye enfant ; cet enfant, masle ou femelle, doit appeller le frere de son Pere Chétouteure, c’est-à-dire, mon oncle, & sa femme Chèachè, ma tante. Semblablement si son Pere a des sœurs, il les appelle Chèachè, ma Tante, comme aussi les marys de ses sœurs Chètouteure, mon Oncle. Les Oncles & les Tantes appellent les enfans masles de leurs freres, ou sœurs Chèyeure, c’est-à-dire, mon Nepveu, & les filles Reindeure, ou Chereindeure, ma niepce. Les enfans descendus de deux freres, ou de frere, & de sœur, ou bien de deux sœurs s’appellent ainsi. Les masles Rieure, ou Cherieure mon cousin, les femelles Yetipere, ou Cheitipere, ma cousine. Quant à la descente du costé des femmes, la grand-mere fait le 1. Eschelon, soit du costé Paternel ou du costé Maternel, c’est à dire la Mere du propre Pere, duquel verso.on est descendu, ou la Mere de sa propre Mere qui l’a engendré, & est appellee Ariy, ou Cheariy ma grand’mere. La propre mere faict le 2. Eschelon, nommee Aï, Mere, ou Cheaï, ma Mere. La fille faict le 3. Eschelon, dite Tagyre, fille, ou Chéagyre ma fille. Le 4. Eschelon est de la sœur, appellee Teindure, sœur, ou Chéreindure, ma sœur. La Tante faict le 5. Eschelon, nommé Yaché, Tante, ou Chèaché, ma Tante. Le 6. Eschelon est en la Niepce, appellee Reindure, ou Chereindure, ma Niepce, ou ma petite sœur, qui est une forme de parler entr’elles. Le 7. Eschelon est de la Cousine, nommee Yetipere, Cousine, ou Cheytipere, ma Cousine ; Somme voicy les rameaux de la consanguinité d’entre eux.

Pour les masles.

Grand Pere.

Pere.

Fils.

Frere.

Oncle.

Neveu.

Cousin.

folio 95.Qu’ils appellent en leur langue

Chéramoin, ou Tamoin.

Touue, ou Chérou.

Tayre, ou Chéayre.

Chéircure, ou Chéubouïre.

Touteure, on Chétouteure.

Yeure, ou Chéyeure.

Rieure, ou Chérieure.

Pour les femelles.

Grand mere.

Mere.

Fille.

Sœur.

Tante.

Niepce.

Cousine.

Qu’il appellent en leur langue

Ariy, ou Ché-Ariy.

Aï, ou Chéaï.

Tagyre, ou Chéagyre.

Theindeure, ou Chéreindeure.

Yaché, ou Chèaché.

verso.Reindeure, ou Chéreindeure.

Yetipere, ou Ché-yetipere.

Outre ceste consanguinité, il s’en trouve deux autres contractees par alliance, sçavoir, ou en donnant leur fille à quelqu’un, ou recevant une fille pour femme de leur fils, ou bien secondement, en contractant l’alliance d’hospitalité avec les François, quand specialement ils leur donnent leur filles pour concubines. Ils appellent ceux à qui ils donnent leurs filles Taiuuen, gendre, ou Chéraiuuen, mon gendre. Ils imposent ce nom à la fille, qu’ils reçoivent pour femme à leur fils Taütateu, bru, ou belle fille, Chérautateu, ma bru ; ils appellent le François, avec qui ils contractent l’alliance d’hospitalité, Touassap, Compere, ou Ché touassap, mon Compere, & quelquefois Chéaïre, mon fils, ou Chéraiuuen, mon gendre, & ce lors que le François retient sa fille pour concubine. — Telle est donc ce rameau d’alliance.

folio 96.Gendre.

Bru.

Compere.

Et en leur langue

Taiuuen, ou Ché-raiuuen.

Taütateu, ou Cheraütateu.

Touassap, ou Chetouassap, ou bien Ché-aïre.

Les bastards sont tous les enfans qu’ils ont hors le legitime mariage pratiqué entr’eux, à leur mode, & entre ces bastards il y a un ordre : ou bien ils sont sortis d’un Tapinambos & Tapinambose, & cestuy est le premier Eschelon : ou d’une Indienne Tapinambose & d’un François, & c’est le second rameau : ou d’un Tapinambos & d’une Esclave, & c’est le troisiesme Eschelon, ou d’une Indienne Tapinambose, et d’un serviteur Esclave, & c’est le quatriesme rameau : ou d’une servante Esclave, & d’un François, c’est le dernier Eschelon.

verso.Telle est donc ceste ligne de bastards.

D’un Tapinambos avec une Tapinambose.

D’une Indienne Tapinambose & d’un François.

D’un Tapinambos & d’une Esclave.

D’une Indienne Tapinambose & d’un serviteur Esclave.

D’une servante Esclave & d’un François.

Ces Bastards sont appelez en leur langue

Marap, ou Ché-marap.

Et les Bastards des François,

Mulâtres.

Les loix de ces bastards sont diverses, selon la diversité de leurs descentes : & auparavant que je les touche, il faut poser la regle generale qu’ils observoient vers les bastards, qui est, que quand…

....... .......... ...

(Lacune d’une feuille.)

....... .......... ...

fol. 105.ils l’appellent Toreuüe, c’est à dire gaillard, Cheroreuuë, je suis joyeux, gaillard : celuy qui est plaisant, & a le mot à dire, aron-ayue.

Leurs salutations, demandes, & responces, quand ils se trouvent par ensemble, sont si douces que rien plus : d’autant qu’ils les prononcent avec un accent assez long, fort doux, & attrayant, specialement les femmes & les filles ; & pour ce que je sçay, que cela apportera une consolation au Lecteur : j’ay mis cy dessoubs la forme & maniere ordinaire de leur pourparler, qui est telle[95].

Le matin quand ils se levent, ils se disent.

Bon jour. Tyen-de-Koem.

Et à vous aussi. Nein Tyen-de-Koem.

Le soir quand ils reviennent du travail, & qu’ils se separent, ils se disent.

Bon soir. Tyen de Karouq.

Et à vous aussi. Nein Tyen de Karouq.

verso.Quand la nuict est fermee, & qu’ils veulent aller coucher, ils disent l’un à l’autre.

Bonne nuict. Tyen-de-petom.

Et à vous aussi. Nein-Tyen-de-petom.

S’ils voient quelqu’un venir à eux, ou passer aupres d’eux, ou s’ils se rencontrent en chemin, souvent ils s’arrestent un peu, & s’entre-demandent avec une parole & un visage familier.

D’où venez vous ? Mamo souï pereiou ?

Où allez-vous ? Mamo peresso ?

Lors ils respondent & disent d’où ils viennent, & où ils vont, & c’est ordinairement l’une de ces choses suivantes, ausquelles toute leur vie & exercice est appliquee, à sçavoir, ou pescher en la mer, aller dans le bois, couper des arbres, visiter leurs jardins, planter leurs racines, cueillir leurs fruicts, arracher leurs naveaux, aller à la chasse, se promener fol. 106.çà & là, visiter les villages, & les loges l’un de l’autre par ainsi ils respondent,

Je viens de la mer. Paranam-souï-Kaiout.

Je viens de pescher. Pira-rekie-souï-Kaiout.

Je viens du bois. Kaa-souï-Kaiout.

Je viens de couper du bois. Ybouïra monosoc, ou bien Ybouïra mondoc.

Je viens du jardin. Ko-souï-Kaiout.

Je viens de jardiner. Ko-pirarouer-Kaiout.

Je viens de bescher & planter. Maëtum arouere.

Je viens de cueillir des fruicts. Vuapoo-arouere-Kaiout.

Je viens de la chasse. Kaaue-arouere-Kaiout.

Je viens de me promener. Mosou-arouere-Kaiout.

Je viens d’un tel village. Taaue-souï-Kaiout.

Je viens de voir un tel. Ahere-piac-souï-Kaiout.

verso.Je viens de mon logis. Cheroe-souï, ou bien, Cheretan-souï.

A Dieu, je m’en vay. Ne in cheaiourco.

A Dieu, nous en allons. Ne in oro iourco.

Que si quelqu’un de leurs voisins les va trouver en leur loge, ou s’ils le voient en peine, cherchant çà & là quelque chose luy demandent,

Que cherchez-vous ? Maëperese-Kar ?

Que demandez-vous ? Marapereico ?

Alors ils disent ce qu’ils cherchent, & ce qu’ils demandent fort librement ; Pour exemple,

Je demande à manger. Ageroure deué-cheremyouran ressé.

Je demande de la farine. Ageroure ouï ressé.

Je demande de la chair. Ageroure soo ressé.

Je demande du poisson. Ageroure pyra ressé.

fol. 107.Je demande de l’eau. Ageroure v. ressé.

Je demande du feu. Ageroure tata cheué.

Je demande un couteau. Ageroure xè.

Une hache. Iu.

S’ils voient quelqu’un tout pensif en soy-mesme, ils luy demandent ce qu’il a, à quoy il pense.

Que pensez-vous ? Mara-péde-ie mongueta ?

Il respond.

Je ne pense à rien. Ai Kogné.

Je pense à quelque chose. Maerssé-Kaien-arico.

Je pense à vous. Deressé Kaien-arico.

Si davanture quelques-uns devisent ensemble, ils sont fort curieux de sçavoir ce qu’ils disent, & ainsi ils viennent doucement les trouver, & leur demandent.

verso.Que dites vous ? Mara-erepe ? ou bien, Mara-erepipo ?

Que disiez vous ensemble ? Mara-peïe-peïooupé.

Ils respondent,

Nous parlions de nos affaires. Ore-rei-Koran Koïo-mongueta.

Nous parlions de vous. Deressé Koïa-mongueta.

C’est ainsi qu’ils passent leur vie doucement les uns avec les autres en toute familiarité, selon que vous pouvez recognoistre par ce discours.

fol. 108.

Des humeurs incompatibles avec les Sauvages.

Chap. XXV.

Socrate avoit coustume de dire, que tout ainsi que le vin aspre, & rude est de mauvaise digestion, difficile, & mal plaisant à boire, ainsi les humeurs rudes, aspres & facheuses, sont mal propres pour converser avec les hommes. Et Plutarque escrit que, comme le son aigre des chauderons & pots cassez, mettent les Tygres en colere, de telle façon qu’ils se jettent à corps perdu, sur ceux qui viennent leur chanter aux oreilles ces motets si importuns & desagreables, aussi sont les mauvaises complexions & humeurs, parmy les societez des hommes. Nous verso.avons recogneu la pratique de cecy estre fondee en la nature, considerant combien ces Sauvages fuyent les humeurs agrestes & complexions austeres.

Ils hayssent sur toutes choses, quand ils voyent un des leurs agacer son voisin, ce qu’ils appellent en leur langue, Moïaron, ou bien quand ils voyent qu’ils debattent par ensemble de paroles, ce qu’ils nomment Oroacap : quand ils trouvent de semblables humeurs, ils les fuyent, & ce gardent le plus qu’ils peuvent, de tomber en debat avec iceux : voire ils font bien d’avantage, car ils advertissent les François, leurs Comperes, de n’aller rien demander chez ces personnes là. Si d’aventure ils ont des femmes qui soient de telle complexion, ils en sont fort empeschez, & ne se font pas beaucoup tirer l’oreille, pour s’en défaire, ou leur permettre qu’elles aillent là, où elles voudront se pourvoir. Il y a à Iuniparan dans l’Isle, un Hermaphrodite, qui en l’exterieur paroist plus femme qu’homme : car il porte le visage & la voix de femme, les cheveux non rudes, ains fol. 109.flexibles & longs, comme ceux des femmes, nonobstant il est marié, & a des enfans, mais il est d’un naturel si facheux qu’il est contraint de demeurer seul, pour ce que les autres Sauvages du village, ont crainte de debattre de paroles avec luy. J’ay veu toute une famille changer de village, seulement pour eviter le voisinage d’un Sauvage, subject à ces mauvaises humeurs.

Ils se mocquent, & méprisent l’homme qui s’amuse aux agacemens, & paroles de sa femme, quand elle est de mauvaise complexion. Il arriva, pendant que j’estois en ces cartiers, qu’un Sauvage s’ennuya de supporter les facheuses humeurs de sa femme, tellement que prenant un baston de sa main droicte, & de sa gauche les cheveux de sa femme, il voulut experimenter, si cette huyle & baume n’adouciroit point l’aigreur de son mal : mais il fut bien estonné, que le feu se mist en la playe, tellement que le mal en devint plus grand : Car à la veuë des voisins cette femme sceut bien s’échapper de ses verso.mains, & prenant semblablement un baston, elle voulut faire le mesme service à son mary, & apres s’estre gressez l’un l’autre avec la risee des regardans, ils demeurerent aussi grand maistre l’un que l’autre, sinon que le mary fut depuis la fable, & le discours universel, tant des grands, que des petits. Et les anciens disoient en leurs Carbets : qu’avoit-il affaire de s’arrester à sa femme, puis qu’il la cognoissoit telle.

Je les ay vu quitter & abandonner leur marchandise à celuy à qui ils l’avoient venduë, & ce pour eviter la dispute de paroles qu’il leur faisoit : Pourtant vous remarquerez, qu’ils n’ont que, Oüi, & Non, quand ils traictent par ensemble, ou avec les François, sans jamais barguigner. Plusieurs autres exemples pourroient estre apportez icy touchant cette matiere, mais ceux-ci suffisent.

Ils apprehendent merveilleusement les gens coleres qu’ils nomment Poromotare-vim, & s’entr’advertissent quand ils sont en colere, disans, Chèporomotare-vim, je suis en colere, & lors personne ne dit mot, ains on l’addoucit tant que l’on peut : ce qu’ils fol. 110.appellent Mogerecoap, c’est à dire, adoucir un autre. Aïmogerecoap, j’adoucis celuy qui est en colere.

J’ay pris garde par plusieurs fois, que quand ils voyoient un François en colere, ils estoient comme hors d’eux-mesmes, changeans de couleur en face, & se retiroient arriere de sa voye, disans l’un à l’autre, Ymari touroussou. Il est grandement en colere, il est grandement fasché : Ché-assequeié-seta, il me fait grand peur.

Il arriva que deux ou trois de nostre equipage se laissoient emporter à la colere assez souvent, dans les villages, où ils estoient : Les principaux du lieu sceurent fort bien se venir plaindre au Fort Sainct Loüis, & prier qu’on leur ostast ces François d’avec eux & qu’ils vinssent demeurer au Fort, par ce, disoient-ils, que cela nous faict peur & specialement à nos enfans : ce que l’on fist.

Si le debat des paroles, & la colere leur est facheuse, beaucoup plus le sont les debats en effect, quand quelques uns d’entr’eux tombent en querelle, ce qui est fort rare, & viennent à s’entre-battre, verso.qu’ils appellent Ionoupan, entre-battre, & encore davantage quand ils s’entre-blessent, ce qu’ils nomment Ioüapichap, entre-blesser, & le pis est, quand apres s’estre bien entre-battus, ils viennent en despit l’un de l’autre, à brusler leurs loges : ce qu’ils signifient par ce mot Iouapic, entre-brusler : car alors chacun s’en sent, & pas un n’oseroit se mettre en devoir de les empescher : car voicy comment ils font ; Ils se retirent chacun à leur costé, et prenant une poignee de branches de palme seiche, l’allument, la portent à la couverture de leur mesme costé, disant à un chacun, sauve qui pourra son costé, pour moy j’ay mis le feu au mien, personne ne m’en pouvoit empescher, & ainsi en peu d’heure, tout le village est bruslé, & si personne ne luy en dict rien : Plusieurs fois cela fust arrivé en l’Isle, n’eust esté la crainte, qu’ils avoient des François.

Ils haissent semblablement d’estre injuriez, soit homme, soit femme, mesme celles qui font profession fol. 111.de servir au public ne veulent qu’on les appelle Pataqueres, putains : & me souvient qu’une Indienne Esclave, ayant eu un enfant d’un François, quelques autres luy reprocherent qu’elle estoit putain, elle se fascha fort, & dist, que si desormais on l’appelloit plus Pataquere, qu’elle tueroit cet enfant, ou l’enterreroit tout vif : ils appellent l’injure, Courap.

Il ne se faut pas estonner, si ces Sauvages fuyent de telle façon la colere & ses effects, puisque cette passion repugne immediatement au naturel de l’homme, & le faict devenir totalement brute, ainsi que dict Sainct Basile le Grand, en l’Homelie 10. qu’il a faict de l’ire : Hominem penitus in feram converti, que la colere change l’homme totalement en une furieuse beste : & Sainct Gregoire de Nysse, en l’Oraison 2. de la beatitude, compare la colere à ces vieilles sorcieres du Paganisme ancien, qui par enchantemens transmuoient & changeoient en la forme de diverses bestes furieuses, maintenant en Sanglier, une autrefois en Panthere : La colere faict chose verso.pareille : Et Sainct Gregoire le Grand, au livre cinquiesme de ses Morales, chap. trentiesme dict, que le cerveau du colere, est le trou où s’engendrent les Viperes : Cogitationes iracundi vipereæ sunt generationis. Platon n’enseignoit autre remede à ses escoliers contre cette passion, sinon qu’ils contemplassent vivement les gestes & les paroles d’un homme colere, ou bien quand eux-mesmes seroient tombez en colere, qu’ils allassent vistement se considerer dans un miroir. Ce n’est donc point chose tant nouvelle, ny si hors de propos si ces Sauvages craignent, se tirent à part quand ils voyent un homme en colere specialement un François : Car comme dict le Proverbe Chap. vingt sept. Impetum concitati spiritus ferre quis poterit ? Moins aussi est-ce chose difficile à croire, qu’en dépit l’un de l’autre, si daventure ils sont tombez en debat, ils bruslent leurs loges, puis qu’aux Proverbes 26. il est dict, sicut carbones ad prunas, & ligna ad ignem, que les charbons sur le brasier, & le bois sur le feu, ainsi le debat de paroles à l’homme naturellement colere, sic homo iracundus suscitat rixas, & en fol. 112.l’Ecclesiastique 28. secundum ligna sylvæ, sic ignis exardescit : Telle qu’est la quantité du bois, telle est la force du feu, parlant de la colere.

De l’Oeconomie des Sauvages.

Chap. XXVI.

Pitacus disoit, ainsi que rapporte Strobee de luy, que cette famille est bien ordonnee, quand deux choses concurrent, sçavoir, qu’il n’y aye aucune superfluité, soit au vivre, soit au mesnage, & pareillement qu’il n’y aye aucune disette de ces choses : Et Ciceron rapporte du grand Caton, lequel interrogé quel mesnage luy sembloit le meilleur : c’est, respondit-il, où l’on donne competamment à manger, le vestir, & que le travail y soit chery. Il me semble que verso.ces sentences soient plustost dites pour les Sauvages, & gens qui vivent frugalement, que pour aucune autre condition de personnes. Sainct Thomas definissant l’Oeconomie, conclud que ce n’est autre chose, qu’une bonne conduitte domestique, tendante à cette fin, que la famille soit accommodée de vivres, & autres choses necessaires, & specialement, que parmy cette famille soit entretenuë une bonne intelligence, chacun s’aquittant de ce à quoy il est employé. Monstrons cecy estre enseigné aux Sauvages, par la pure Nature, & non par aucune autre science aquise.

Les villages sont partis en quatre loges : sur lesquelles toutes commande un Mourouuichaue, pour le temporel, & un Pagy Ouassou, c’est à dire un Sorcier pour les maladies & enchanteries[96] : Chaque loge a son Principal. Ces quatres Principaux respondent au Principal de tout le village ; & luy avec les maistres Principaux des autres villages, respondent au Souverain Principal de toute la Province. Chaque

....... .......... ...

(Lacune d’une feuille.)

fol. 121.

Du soin que les Sauvages ont de leurs corps.

Chap. XXVIII.

Platon appelloit la forme du corps, un privilege de Nature, & Crates le Philosophe, un Royaume Solitaire. Ces deux sentences meriteroient un discours long & ample : si nous traittions autre chose qu’une histoire, laquelle demande un stile concis, sans aucune superfluité de paroles, ou de digressions faictes mal à propos : partant nous appliquerons le dire de ces deux Philosophes à nostre subject, pour faire voir que la Nature ayant dénié, par un si long temps, aux corps des Indiens les vestemens, les a recompensez d’un singulier privilege, les formant verso.beaux & bien faicts, encore que les meres n’y prennent aucune peine : ains les levent & manient, comme elles feroient un morceau de bois. Ce que dit Crates, leur convient tres-bien, d’appeller ceste forme corporelle, un Royaume solitaire & desert : car tout ainsi que les animaux du desert, croissent & s’embellissent extremement bien, pendant qu’ils demeurent en leur Royaume deserté, c’est à dire en leur liberté connative : Et à l’oposite, s’ils sont pris des hommes, & amenez en la demeure domestique des Rois & Princes de la Terre, pour estre veuz & montrez, ainsi qu’un spectacle nouveau, vous les voyez incontinent se descharner, se desplaire, & perdre l’appetit d’engendrer & conserver leur espece, & cecy non pour autre occasion que pour avoir perdu la liberté de ce Royaume solitaire. Pareillement ce que la Nature a osté d’un costé à ces Sauvages, à sçavoir les vivres bien apprestez, les potions bien friandes, les habits pompeux, les licts molets, & les superbes maisons & palais, elle les a recompencez d’un autre part, en leur donnant une pleine liberté, comme aux oyseaux fol. 122.de l’air, & aux bestes des forests, sans estre molestez des mangeries & plaideries de par deçà, qui n’est pas une des moindres afflictions d’entre les autres, qui balancent les commoditez que nous pensons avoir en ce monde Ancien. Et si le Diable par permission de Dieu, pour en tirer un bien, qui est leur salut, ne se fut mis à traverser ces Barbares, leur suscitant nouvelles discordes, à ce qu’ils se tuassent & mangeassent les uns les autres : il n’y a point de doute qu’ils ne fussent les plus heureux hommes de la Terre, à cause de ceste franchise & liberté connaturelle, laquelle assaisonne si bien les viandes qu’ils ont, qu’elles tournent en nourriture parfaicte & salubre, d’où procede immediatement la belle forme de leurs corps.

Je ne fais qu’attendre l’objection pour y respondre ; qu’on a veu de ces gens sales, laids comme marpaux. Je dy que ce n’est pas au visage, où il faut remarquer la forme & beauté d’un homme : c’est de quoy Demosthene se moquoit, quand les Ambassadeurs verso.d’Athenes furent de retour de leur Ambassade au Roy Philippe de Macedoine, lesquelles loüoient la beauté du visage de ce Roy : non, non, dit Demosthene, ce n’est pas un subject digne de loüange en un homme, que la beauté de son visage, qu’il a commun avec les Courtisanes : mais bien en la stature du corps, proportion des membres, & phisionomie de grandeur & de noblesse : Et c’est ce que je traitte, que la Nature a donné pour l’ordinaire, un corps bien faict, bien proportionné, & d’une stature convenable, specialement aux Tapinambos : Et quant à ce qu’ils gastent leurs visages par incisions, ouvertures, & fanfares de peintures & ossemens, cela provient, comme j’ay dit cy dessus, de l’opinion qu’ils ont d’estre estimez plus vaillans.

Ils sont fort soigneux de tenir leurs corps nets de toute ordure : ils se lavent fort souvent tout le corps, & ne se passe jour, qu’ils ne jettent sur eux, force eau, & se frotent avec les mains de tous costez, & en toutes les parts, pour oster la poudre & autres ordures. Les femmes ne manquent point de se peigner souvent : Ils craignent fort d’amaigrir, qu’ils appellent fol. 123.en leur langue, Angäiuare, & s’en plaignent devant leurs semblables, disans, Ché Angäiuare, je suis maigre, & chacun en a compassion, specialement quand il arrive qu’ils font quelque voyage, pendant lequel, il faut qu’ils jeusnent & travaillent : lors qu’ils sont de retour, & que leurs joües semblent estre abatuës, chacun les pleure & plaint, disant Deangäiuare seta, helas ! que tu es maigre, tu n’a plus que les os.

Ce point estoit l’unique cause, pour laquelle nous ne pouvions garder avec nous les jeunes enfans baptisez : par ce que les meres avoient si grande peur, qu’ils n’emmaigrissent avec les François, pour la croyance qu’elles avoient que les François estoient en disette, qu’elles ne permettoient à leurs maris d’amener ces petits enfans quant & eux, pour voir les Peres, & les Chapelles de Dieu, qu’à toute force, en chargeant tres-estroittement aux maris de les ramener avec eux, & toutes les fois qu’elles pensoient à ces enfans, elles fondoient en larmes, & s’atristoient infiniment.

verso.J’avois retenu un jeune enfant de Tapuitapere faict Chrestien & nommé Michel, lequel sçavoit extremement bien & en bons termes la doctrine Chrestienne, afin qu’il l’apprist aux Esclaves que j’avois. Il demeura quelques mois avec moy, mais il ne me fut jamais possible de le garder davantage, à cause de l’importunité qu’en faisoit sa mere, & la douleur qu’elle monstroit avoir par ses pleurs & lamentations continuelles, de sorte que son pere vint expres le querir, & luy ayant dit que sa mere le regardoit en pitié (c’est une phrase de parler entr’eux, pour montrer leur compassion vers autruy) il me vint demander congé de s’en retourner, avec un regret pourtant de me quiter, & en pleuroit de douleur (tant ces jeunes enfans caressent les Peres & se plaisent avec eux) alleguant que sa mere devenoit maigre de tristesse, à cause de son absence, & l’opinion qu’elle avoit de luy, qu’il emmaigriroit avec moy, neantmoins qu’il ne manqueroit point de raconter à sa mere la bonne chere que je luy faisois, à ce qu’elle luy permist de retourner vers nous.

fol. 124.Un de nos Esclaves avoit faict quelque faute, pour laquelle il merita d’avoir le fouët, quand il vit que c’estoit au faict & au prendre, il pria qu’on eust esgard à ce qu’il estoit maigre, & qu’on ne frappast si vivement son corps, ainsi que s’il eust esté gras ; par ce, disoit-il, que la graisse sert de couverture aux os, soustient les coups, & empesche que la douleur ne vienne jusqu’à eux : Si vous frappez fort, vous me romprez les veines qui ne sont couvertes que de la peau, (il disoit cela pour ce qu’il estoit naturellement maigre).

Or pour s’engraisser, ils s’assemblent quantité d’Indiens, s’embarquent dans un grand Canot, se munissent de farine, portent nombre de fleches, menent leurs Chiens, & s’en vont en terre ferme, où ils tuent autant de venaison qu’ils veulent, soit Cerfs, Biches, Sangliers, Vaches-Braves, Tatous, soit une infinité d’oyseaux, & demeurans là, tant que leur farine dure, ils s’engraissent, en mangeant leur saoul de ces viandes, puis retournans en l’Isle, apportent verso.avec eux force venaison boucanee.

Le Bresil revenu de la guerre de Para en l’Isle, s’estimant maigre, demanda congé au Sieur de la Ravardiere d’aller en terre ferme, & de mener avec luy quelques François fort maigres pour les engraisser, ce qui luy fut accordé : & allant assés avant dans la grande terre, ils abondoient en toute sorte de venaison, mais parmy ce bon-heur, un mal-heur leur arriva : c’est que la farine leur manqua tellement, qu’ils furent contraincts de manger le cœur des palmes, en guise de pain, avec leurs viandes : ce qui faschoit bien les François, qui ne s’accommodent gueres volontiers à ce genre de pain de Palmiers, & avoient grand regret, que la feste n’estoit entiere, voyans tant de chair devant eux, & n’avoient moyen d’en manger, à cause que le pain & le sel leur manquoit. Il me semble qu’il leur estoit arrivé ce qui advint à Midas affamé d’or, quand sa femme luy fist presenter sur la table force viandes, mais toutes d’or, ou bien ce que l’on feint de Tentale, qui au milieu des eaux mouroit de soif : Chose pareille leur arriva car ils emmaigrirent plus qu’ils n’engraisserent, & ce par leur faute, n’ayans porté fol. 125.de la farine, autant qu’il en falloit.

Les François imitent en ce poinct les Sauvages, & sont bien receus d’iceux : Car les François qui demeurent au Fort, demandent congé d’aller par les villages, faire une promenade & bonne chere. Les Sauvages, qui sçavent cela, vont à la chasse, & donnent (moyennant quelques marchandises) à ces promeneurs deux ou trois bons repas, apres lesquels, il faut gaigner pays, autrement vous n’aurez que du commun, à quoy les François sont stilez, si bien qu’apres avoir faict deux ou trois bons repas en un village, ils sautent en l’autre, & par ainsi faisans le tour de l’Isle, ou de la Province de Tapoüitapere & Comma, ils reprennent leur force, & se consolent. Les François qui sont logez par Comperage en ces villages, ne sont pas trop aises de telles promenades : d’autant que s’il y a quelque chose de bon alors, ce n’est pas pour eux, ains pour les Passans : le naturel du Sauvage estant de donner tout le meilleur qu’ils verso.ont aux survenans pour deux ou trois repas, apres lesquels vous n’avez que le commun & l’ordinaire. Admirez, je vous prie, en passant, le grand amour de Dieu vers les hommes, lequel a imprimé naturellement la charité du prochain ; Car que pourroient faire mieux les Chrestiens, voire les Religieux les plus reformez, sinon que la charité des Sauvages est purement naturelle, sans pouvoir meriter la gloire, & la charité des Chrestiens est sur-naturelle, & espere la récompense en la vie eternelle.

Ce soin de leurs Corps est ménagé par plusieurs autres façons de faire, comme sont celles-cy : Ils ont tousjours l’herbe de Petun en la bouche, la fumee de laquelle ils attirent par la bouche, & le rendent par les narines, afin de vuider les humiditez du Cerveau, & en avalent, pour nettoyer l’estomach de cruditez, lesquelles ils font sortir par eructations. Ils n’ont pas si tost achevé de manger qu’ils prennent leur Petun, comme ils font aussi du grand matin, à fol. 126.la sortie du lit, & avant de se coucher. Mais à propos du Petun, il est bon que je rapporte icy l’opinion supersticieuse qu’ils ont de cette herbe, & de sa fumee. Ils croyent que cette fumee les rend diserts, de bon jugement & eloquens en parole, tellement que jamais ils ne commencent une harangue qu’ils n’en ayent pris. Et me semble que leur opinion n’est point tant supersticieuse, qu’elle n’aye quelque raison naturelle ; car je l’ay experimenté moy mesme, que cette fumee esclaircit l’entendement, dissipant les vapeurs, qui possedent l’organe du Cerveau, & affermit la voix, en ce qu’elle desseiche les humiditez & crachats de la bouche, qui se rencontrent à la sortie de la veine vocale tellement que la langue en est bien plus libre à faire sa fonction : La verité de cecy est bien aisee à experimenter, pourveu qu’on en prenne avec modestie, & au temps convenable : Car l’abondance & continuation n’en est pas, à mon advis, trop bonne & salubre à ceux qui vivent de boissons & viandes chaudes ; mais à ceux verso.qui sont humides & froids de cerveau & d’estomach, la prise de ceste fumee ne leur peut estre que saine ; Et c’est une autre raison, pourquoy les Sauvages qui habitent sous cette zone tres-humide, & qui pour l’ordinaire ne boivent que de l’eau, prennent continuellement de ceste fumee, à sçavoir pour descharger leur Cerveau des humiditez & froidures, & l’estomach de cruditez : ce que font semblablement les Matelots & les gens habitans sur le rivage de la mer. Ce Petun aussi ayans trempé 24. heures dans du vin blanc, opere de grands effects pour nettoyer le corps de ses infections. On ne prend seulement que le vin. Ils ont aussi une autre opinion que la fumee qu’ils avalent du Petun, les tient gaillards & joyeux contre la tristesse & melancolie qui leur peut survenir. Je vous le feray voir par exemples, outre ce que j’en ay peu apprendre par leurs discours. Un Sauvage supplicié à la bouche du Canon, (duquel je parleray au Traicté du Spirituel) auparavant que de s’acheminer au supplice, il demanda un cofin de Petun, disant, que l’on me donne la derniere consolation fol. 127.de cette vie, par laquelle je puisse fortement & joyeusement rendre l’Ame : & de faict si tost qu’on luy eu donné ce Petun, il s’en alloit joyeux, & chantant à la mort ; & quand ses semblables l’attacherent à la bouche du Canon, il les pria de ne luy lier le bras droict si bas & si court qu’il n’eust moyen de porter en sa bouche son cofin de Petun, tellement que la balle du Canon ayant divisé le corps en deux, une partie portée dans la mer, & l’autre tombee au bas du rocher, à laquelle le bras droict estoit joint, on trouva encore dans la main droicte le cofin de Petun.

Les Sauvages jugez à mort, selon la coustume du pays, ne vont jamais au lieu où ils doivent estre assommez, qu’on ne leur donne le Petun, ny mesme les Sauvages, quelque maladie qu’ils ayent, ne laissent ce regime. Les Sorciers du pays ne servent de cette herbe au service des Diables, mais nous n’en parleront point à present, si la memoire me le permet, ce sera pour une autre fois.

Ils ont une autre façon de faire, pour conserver verso.leurs Corps en santé ; C’est qu’ils mangent souvent & peu à la fois, pour l’ordinaire, & ce apres qu’ils ont mangé, lavent soigneusement la bouche & si entre les repas ils ont soif, ils boivent à demy leur saoul, & gargarisent tres-bien la bouche, pour addoucir l’ardeur du Palais. Font bien cuire les viandes & n’en mangent point de cuites à demy : sont beaucoup plus soigneux en ce poinct que les François. Ils se frottent d’huyles de Palmes, de Rocon & de Iunipape[97], qui sont choses qui les tiennent en bonne disposition : Je m’asseurre que ceux qui liront cecy, & auront tant soit peu de cognoissance de la disposition du corps humain, & du regime necessaire pour l’entretenir, jugeront que la Nature donne à ces gens, ce que la science & l’experience donne à ceux de par deçà.

fol. 128.

De quelques indispositions naturelles, ausquelles les Sauvages sont subjects ; Et quels noms ils donnent aux membres du corps.

Chap. XXIX.

La verité est, que les Sauvages sont gratifiez de la Nature d’une bonne santé & disposition parfaicte & gaillarde : & rarement se trouvent entr’eux des Corps maleficiez & monstrueux : Nonobstant il s’en trouve, mais un entre cent.

D’aveugles tout à faict je n’en ay point veu, & toutesfois ils en ont, qu’ils appellent Thessa-vm, aveugle, Cheressa-vm, Je suis aveugle, & Ressa-vm, tu es verso.aveugle. Une chose ay je bien veu, que quelques uns avoient la veuë fort courte, specialement les vieux, & notamment les femmes, voire c’est chose comme ordinaire, que les femmes passé 30. ans, ayent la veuë fort courte & debile, en sorte qu’elles ne peuvent plus voir à tirer des pieds les Thons, ou vers[98], ains il faut que ce soit des jeunes garsons ou jeunes filles. A ce propos un Capitaine François, qui n’estoit pas de nostre equipage, & ne se tourmente pas beaucoup pour croire une divinité, disoit que le Pape n’avoit point de puissance sur la mer, puisque Dieu avoit dit à Sainct Pierre, que sa puissance s’estendoit seulement sur la terre : Par ainsi tous ceux qui passent de ces pays icy au delà de la mer, ne sont pas obligez aux ordonnances de l’Eglise de deçà, ains librement, entre autres choses pouvoient prendre une jeune fille pour concubine, puisque la necessité requiert qu’elles tirent & ostent des pieds des François ceste vermine. Je dy cecy pour faire voir combien ces pays sont dangereux aux ames qui tournent le tout en venin.

fol. 129.J’ay veu des borgnes entr’eux (qu’ils appellent Thessaue) mais en petit nombre, & des bigles appellez Thessauen, bigle, Cheressauen, je suis bigle, Deressauen, tu es bigle. Il s’y trouve des begues nommez Guingayue, begue, Chegningayue, je suis begue. Les enfans sont fort chassieux, & les vieillards aussi, qu’ils nomment Thessaou-vm, chassieux, Cheressaou-vm, je suis chassieux. Deressaou-vm, tu es chassieux, & cecy provient de la grande humidité du pays, qui domine plus sur les corps des petits enfans & des vieillards, à cause de la foiblesse de la chaleur naturelle qui est en ces corps des jeunes & vieux, que non pas sur les autres corps qui possedent une chaleur naturelle, forte & robuste. Il s’en trouve de chauves, assez peu pourtant, & sont appellez Apterep, chauve, Chéapterep, je suis chauve : & l’occasion pourquoy on ne voit là tant d’hommes chauves qu’icy : est que generalement leurs cheveux sont nourris d’une forte & aduste nourriture, tellement qu’ils ont les cheveux forts, roides & droicts.

verso.Ils ont peu de boiteux appellez Parin, peu de manchots, nommez Iuuasuc, peu de muets dits, Gneen-eum. De gouteux ils en ont qu’ils appellent Karouarebore, & les goutes Karouare. Il s’y trouve une espece de galleux qui viennent de race, changent de peau tous les ans, & diriez à les voir, qu’ils sont malades de Sainct Main, & neantmoins ne sentent aucun mal, & sont fort sains, on les appelle tant eux que les autres galleux, Kourouuebore, & la galle Kourouue, je suis galleux, Ché-courouue. Il y a des camus comme icy, nommez Timbep : Je suis camus, Chétimbep : Tu es camus, Detimbep, il est camus Ytinbep.

Il n’y a partie au corps, à laquelle ces Sauvages n’ayent donné un nom special & particulier. Ils appellent l’Ame An, mon Ame, ché-An, ton Ame, Dean : nos Ames, Orean, vos Ames, Pean, leurs Ames, Yan : & cecy tant que l’ame demeure enfermee dans le corps : car ils appellent d’un autre nom l’ame separee du corps, sçavoir, Angoüere.