Ein Beitrag zur Frage der Steinkreuze

Auf dem Geithainer Kirchberg, unter der alten Linde, steht heute ein Steinkreuz. Dessen Standort soll früher der Galgenberg gewesen sein. Demnach ist dieses Denkmal mit ziemlicher Wahrscheinlichkeit dasselbe, welches in dem ältesten Geithainer Stadtbuch erwähnt wird. Hier heißt es nämlich auf Blatt 45b, unter dem 11. Oktober 1469:

Causa Nickel Kircheners vnd Jorg follertczs.

Anno domini millesimo quadrinngentesimo Sexagesimo Nono An der mitwoche noch dyonisy Ich liborius Oler Burgermeister Clemen honkirche Richter hans Geyseler hans Botticher Michel smid Merten francke michel Eckart vnd Peter Jarnhirsch Ratman der Stat Geythan Bekennen In vnserem Statbuch vor Idermenneklichen das vor vnseren sitzen rad kommen seyn Jorg follert heynrich seyn bruder vnd mit Iren gehülffen vff eyne part / Nickel kirchener / hans kirchener seyn Son / merten sneyder Jerath metzener uff dy ander part haben wir uff beyde part mit eynander gutlich vnd fruntlichen entscheyden vnd bericht seyn vmb den totslag Symon follert seligen Also das Nickel kirchener den kindern Symon follartz reichen vnd geben sal Achtczehen gute schog hocher were Anzcuheben uff heüte mitwoche seyn gegeben czwey schog dar noch saln (kirchener?) geben vnd reychen czwey schogk uff weynachten nehest kommende / voran uff alle weychvasten eyn gut schogk / biss so lange sulche Summa geldis gefellet Sunder wer sulche summa geldis heben wirt / von der vnmündigen kinder wegen / der sal eyne mögliche were dor vorthum Dor noch sal Nickel kirchener anderhalb hundert vigilien vnd anderhalb hondert selmessen wü dy follert dy hen bestymmen zcuhalden In pharrkirchen adder klostern bestellen jnwendig virwochen Auch eyne ochfart czwyschen hy vnd phingsten nehest kommende Auch eyn Steynencrücze jn der selben czeit uff der Stat weychbilde setczen sal Auch czerunge scheppengelt nemlich II s(schogk) XXVI gl sal Nickel kirchener geben Jorg follert vnd vintcz berger LV gl uff den nehesten mantag Galli / dornoch uff den nehesten montag abber beyden 1 s 1 gl / dornoch uff weynachten vintcz berger 1 s / dornoch follert XXX gl uff den mantag noch aller gotis heyligen tag / Auch sal kirchener gericht freyheyt yss hafft … js hafft abczulegen Auch desgleichen sal kirchener heynrich follart vom bader brengen wen her heyl wirt //. Nu vor silche berichtunge fride vnd Summa geldis seyn burge Andres bretczschel veitcz muller Cristoffel bretczschel Gerius geyseler Auch do mit Burge vor eynen steten fride der Sache / Auch ab der burgen eyner abgynge von todis wegen sullen dy andern eynen anderen burgen bestellen an desselben stat Auch haben Nickel kircheners kinder mit namen hans kirchener Gerius kirchener gereth den selben vir burgen vorder zcu lossen ab ir vater abginge todis halben das got wende Nu uff silchen fryde hat jorg follert mit seynem bruder auch czwene burgen widergesetczt mit namen matts Loze vnd jocoff burgraffe Auch ab der g(enenneten) burgen eyner auch abginge todis halben das got lang wende sullen sy eyn anderen an des stat bestellen Auch haben sy von gutem willen vnd wolbedachtem mute vorkort und vorpeynigit / wer sulche stucke artickel obinberurth breche de sal der Stat Geythen eynn gut schog zcu gericht vorvallen seynn wy ofte das geschit / wen man jn das kan beczeügen mit warhafftigen leuten den zcu gelauben stehet darvber haben sy jre wyssenunge dem Rat dorvbergegeben vnd lassen czeychen jn vnserem Statbuch