VARIANTES.

§ 181. P. 1, ligne 1: Vous avés.—Ms. d’Amiens: Vous avés bien chy dessus oy parler d’un respit et d’unes trieuwes qui furent données et acordéez entre le roy englès et le roy David d’Escoce et leur pays, sauf tant que li castiaux de Struvelin et li castiaux de Rosebourcq, que messires Guillaumme de Montagut aida jadis à parfaire et fortefiier contre les Escos, estoient mis hors de le trieuwe, de quoy, revenut le roy englès en Engleterre, li Escot bastirent tantost un siège devant Struvelin, et tant l’assaillirent et constraindirent que il couvint le dit castiel rendre as Escos. Et s’en partirent chil qui dedens estoient et qui loinguement l’avoient tenut contre les dis Escos, simplement, car riens dou leur n’enportèrent. Assés tost apriès la prisse de Struvelin, li biaux castiaux de Rosebourcq fu emblés de nuit et escielléz, et pris li castellains qui le gardoit, et jusques à six Englès avoecq lui, et li demorans tous ochis, de quoy li rois englès fu de ces avenues moult courouchiéz et dist bien que il l’amenderoit temprement et le feroit chier comparer as Escos.

Ossi vous avés chi dessus oy parler coumment li roys englès amoit si ardamment la belle contesse de Sallebrin, qu’il ne s’en pooit ne savoit consillier, coumment que li comtes de Sallebrin, ses maris, fu li ungs des plus privés de son consseil et li ungs de chiaux qui le plus loyaument l’avoit tous jours servi. Si advint que pour l’amour de la ditte damme et pour le grant desirier qu’il avoit de lui veoir, et sus le couleur ossi pour remoustrer à ses gens le despit que li Escot li avoient fait et encorres se mettoient il en painne dou faire tous les jours qu’il avoient reconcquis le fort castiel de Rosebourcq et tout le pays jusques à le chité de Bervich, et pour avoir sour ce le consseil de ses gens quel cose on l’en volroit conssillier, il avoit fait criier une grant feste de jouste à le Candeler, l’an mil trois cens quarante deux, qui devoit durer quinze jours, en le cité de Londrez, et avoit mandet par tout son royaumme et autre part, si acertes que il pooit, que tout seigneur, baron, chevalier, escuier, dammes et dammoiselles y venissent, si chier qu’il avoient l’amour de lui, sans nulle escuzanche. Et coummanda especiaument au comte de Salebrin que il ne laissast nullement que la comtesse sa femme n’y fust et que elle n’amenast touttez lez dammes et dammoiselles que elle pooit avoir entours lui. Li dis coens li ottria vollentiers, car il n’y penssoit mies che qu’il y avoit. Et la bonne dame ne l’osa escondire, mès elle y vint mout à envis, car elle penssoit bien pour quoy c’estoit; et si ne l’osoit descouvrir à son marit, car elle se sentoit bien si avisée et si atemprée que pour oster le roy de ceste oppinion. Et devés savoir que là fu la comtesse de Montfort, et estoit jà arivée en Engleterre un grant tamps devant la feste, et avoit fait sa complainte au roy moult destroitement. Et li rois li avoit en couvent de renforcier son comfort, et le faisoit sejourner dallés madamme le royne, sa femme, pour atendre le feste et le parlement qui seroit à Londrez. Fº 73 vº.

—Ms. de Rome: En ce temps estoit publiie une très grosse feste qui devoit estre en la chité de Londres de quarante chevaliers et de quarante esquiers dedens, parmi le roiaulme d’Engleterre et aussi en Alemagne, en Flandres, en Hainnau et en Braibant. Et avoient tout chevalier et esquier qui venir i voloient, de quelconques pais que il fuissent, sauf conduit alant et retournant. Et estoit la feste ordonnée à la relevée de la roine Phelippe d’Engleterre d’un fil que elle avoit eu: si ques auquns de ces chevaliers qui estoient venu de France en Escoce, s’en retournèrent par Londres arrière en lor pais sans peril et sans damage. Fº 88.

§ 182. P. 2, l. 28: Ceste feste.—Ms. d’Amiens: Ceste feste fu grande et noble que on n’avoit mies en devant veue plus noble en Engleterre. Et y furent li comtez Guillaumme de Haynnau et messires Jehans de Haynnau, ses onclez, et des Haynuiers, avoecq les dessus dis, li sirez d’Enghien, messires Robers de Bailloeil, li sirez de Lens, li castellains de Havrech, li sirez de Gonmigniez, li sirez de Sars, li sirez de Faignuellez, li sirez de Mastaing, li sirez de Chin, li sirez de Wargni, messires Sansses de Biaurieu, li sirez de Montegni et messires Oufflars de Ghistellez. Et eult à le dite feste bien douze comtes, huit cens chevaliers, cinq cens damez et pucellez, touttez de hault linage. Et fu bien dansée et bien joustée par l’espasse de quinze jours, sauf tant que uns moult gentilz et jouenes bachelers y fu tués au jouster par grant mesavenue: che fu messires Jehans, aisnés fils à monseigneur Henri, visconte de Biaumont en Engleterre, biau chevalier jone, hardi; et portoit d’asur semet de fleur de lis d’or à ung lion d’or rampant et ung baston de gheullez parmy l’escut. Touttes les dammes et damoisellez furent de si riche atour que estre pooient, chacune seloncq son estat, excepté madamme Aelis, la comtesse de Sallebrin. Celle y vint le plus simplement atournée quelle peult, par tant qu’elle ne volloit mies que li roys s’abandonnast trop de lui regarder, car elle n’avoit penssée ne vollenté d’obeir au roy en nul villain cas qui pewist tourner à le deshonneur de li, ne de son marit.

Or vous noummeray lez contez d’Engleterre qui furent à ceste feste, ossi bien que je me sui hastés de noummer les Haynuyers; premiers, messires Henris au Tor Col, coens de Lancastre, messires Henris, ses filz, comtez Derbi, messires Robers d’Artois, comtes de Richemont, li coens de Norrenton et de Clocestre, li comtez de Warvich, li comtes de Sallebrin, li comtez de Pennebrucq, li comtez de Herfort, li comtez d’Arondiel, li comtez de Cornuaille, li comtez de Okefort, li comtez de Sufforch et le baron de Stanfort, et tant de barons et de chevaliers que li noummiers seroit uns detris.

Ainschois que ceste noble et grant feste fust departie, li roys Edouwars eut et rechupt pluisseurs lettrez qui venoient de pluisseurs seigneurs et de divers pays, de Gascoingne, de Bayone, de Bretaingne, de Flandrez de par d’Artevelle à qui il avoit grant amour, et des marces d’Escoce, dou signeur de Parsi et dou seigneur de Ros, et ossi des bourgois et de le cité de Bourdiaux sus Geronde, qui moult estoient constraint dez Franchois par terre et par aige, si ques li roys respondi, par le consseil de tous ses hommez, voirez de son consseil, as dis messaigez, si à point que chacuns s’en contenta. Encorrez de rechief auques sus le partement de le feste, ungs messages vint en grant haste deviers le roy et li apporta nouvellez et lettrez de par monseigneur Edouwart de Bailloel, cappitainne et souverain de le cité de Bervich. Et disoient ces lettrez que li Escot faisoient ung très grant appareil et grant mandement pour entrer environ Pasquez en Engleterre, et que sour ce il ewissent consseil. Ensi eult li rois grant mestier d’avoir bon avis; car sus l’estet qui venoit, trop de guerrez li apparoient de tous lés, car ossi devoit li trieuwe fallir de li et dou roy de Franche, qui fu prise et accordée à Arras en Pikardie, si comme il est chy desus contenus en ceste histoire. Or eut li roys englès pluisseurs ymaginations, car briefment il volloit secourir et comforter la comtesse de Montfort, ensi que juret et proummis li avoit; et se ne fust che que il tendoit à aller sus Escoche, il fust en propre personne adonc venus en Bretaigne. Si ordonna et pria à monseigneur Robert d’Artois, son cher cousin, que il y volsist aler et prendre tant de gens d’armes et d’archiers que pour resister contre monseigneur Carle de Blois et reconcquerir le pays concquis. Messires Robers li acorda vollentiers et fist sour ce ses pourveances. F^os 73 vº et 74.

—Ms. de Rome: A celle feste vinrent de Hainnau li contes Guillaumes, frères à la roine Phelippe, et messires Jehans de Hainnau son oncle, li sires d’Enghien, li sires de Ligne, li sires de Haverech, li sires de Gommegnies et pluisseurs chevaliers de Hainnau et de Hollandes. Et durèrent les festes quinse jours. Et vint dedens les festes la contesse de Montfort, qui amena Jehan son fil et sa fille. Dont li rois ot grant joie et dist à la contesse: «Ma cousine, vous me laisserés ces deux enfans, et je lor serai pères.»—«Monseigneur, respondi la contesse, pour ce les ai je amenés, et je les vous donne.» Li rois les mist tantos avoecques la roine sa fenme. Li fils avoit neuf ans, et la fille quatre ans.

Celle feste fu bien joustée et bien festée. Et en ot le pris des chevaliers de dehors li contes de Hainnau, et de ceuls de dedens messires Renauls de Gobehen; et des esquiers d’Engleterre Jehan de Qopelant; de ceuls de dedens et de ceuls de dehors, uns esquiers de Flandres qui se nonmoit Franqe de Halle, et adonc le retint li rois d’Engleterre, et devint son honme li dis esquiers.

La feste se fust bien portée, mais il avint de cas de fortune que mesires Jehans de Biaumont d’Engleterre, ainnés fils à messire Henri de Biaumont, fu mors à ces joustes, dont on fu durement courouchié.

A celle feste furent ordonné de par le roi et son consel liquel iroient en Gascongne, à Bourdiaus et à Baione, et liquel en Bretagne avoecques la contesse de Montfort, et liquel iroient tenir la frontière d’Escoce, car li rois d’Escoce estoit retournés de France en son pais; si ques on supposoit en Engleterre que il vodroit guerriier: pour tant i voloient les Englois pourveir. Si i furent ordonné d’aler tenir la frontière à l’encontre des Escoçois et demorer en la bastide de Rosebourch messires Guillaumes de Montagut qui depuis fu contes de Sasleberi; et aussi d’aler tenir la frontière contre les Irlandois furent ordonné li contes d’Ormont et li contes de la Marce. Ces festes passées, tout li signeur estrangier prissent congiet au roi et à la roine et se departirent d’Engleterre, et retourna casquns en son pais. Li contes de Hainau et mesires Jehans de Hainnau son oncle montèrent à port à Ourvelle et arivèrent à Dourdresc en Hollandes. Si demora li contes ens ou pais de Hollandes, et aussi fist son oncle, qui sires estoit de Sconenehove et de la Hode, et li Hainnuier retournèrent en Hainnau. Ensi furent faites ces departies. Fº 88 vº.

P. 3, l. 8: tués à jouster.—Ms. B 6: Et l’ochist le conte de Haynau, mais amender ne le povoit. P. 219.

P. 5, l. 8 et 9: le signeur de Boursier.—Le nom de ce chevalier est omis dans les mss. A 1 à 6, fº 101.

§ 183. P. 5, l. 16: En ce temps.—Ms. d’Amiens: Encorres fu il consilliet au roy que il envoiast l’evesque de Lincolle deviers le roy David d’Escoce, son serourge, pour tretier une trieuwe à durer deux ans ou troix, car tant de grosses besoingnes li appairoient à l’estet prochain que il ne poroit mies bonnement à touttes respondre. Li roys ne s’acordoit mies à ce consseil et disoit que ce seroit à trop son grant blamme se il requeroit les Escos de trieuwe; mès ses conssaulx li disoit: «Salve se grace,» car il avoit par tant de foix ars et courut sus les Escos que de ce ne pooit avoir nul reprouvier, et que c’estoit grans sens pour un seigneur, quant il a troix ou quattre guerrez, et il en poet l’une atrieuver, l’autre amoiener, le tierce apaisier, et le quarte guerriier: si ques li roys, par le consseil de sez hommez, pria à l’evesque de Lincolle que il y volsist aller. Et chils l’acorda vollentiers. Enssi se departi ceste feste. Li comtes Guillaumez de Haynnau et messires Jehans de Haynnau prissent congiet au roy et à le roynne, et s’en retournèrent arrière en leur pays avoecquez leurs gens. Si envoya li roys le seigneur de Fil Wautier, le seigneur de Pont Cardon, messire Jehans Camdos, qui estoit adonc jones bacelers, le seigneur de Multonne, le seigneur de Brassetonne, le seigneur de Lantonne et pluiseurs autrez, à tout deux cens armurez de fier et cinq cens archiers, à Bourdiaux et à Baione, pour aidier à deffendre le frontierre contre le comte de Lille, le comte de Pierregoth, le comte de Quarmain, le comte de Commignez, le comte de Villemur, le seigneur de la Barde, le comte de Bruniqiel et pluiseur aultre qui là tenoient les camps et y faissoient très forte guerre et herioient si chiaux de Bourdiaux, que il n’osoient wuidier hors de leur ville. Or lairons ung petit à parler de ce et retourons à l’evesque de Lincolle, et quel cose il trouva en Escoce, et coumment il fu respondus dou dessus dit mesage qu’il portait de par le roy d’Engleterre, son seigneur.

Il est bien voirs que li evesques de Lincolle esploita tant par ses journées qu’il vint à Bervich, où il fu liement recheus de monseigneur Edouwart de Bailloeil, qui en estoit cappittainne. Là sejourna li evesques tant que ungs hiraux d’Engleterre eut estet en Escoce querre ung sauf conduit au roy qui se tenait en Haindebourcq, pour le dit evesque et toutte se mesnie: si ques sus le sauf conduit li evesquez se parti et s’en vint devers le roy David et les barons et seigneurs d’Escoce. Il fu volentiers oys de tout ce qu’il leur remoustra, et li respondirent qu’il en aroient avis. Si fu la responsce telle et faite d’un baron d’Escoche, messire Archebaux Douglas, et dist: «Sire, li rois mon seigneur et tous ses conssaux ont bien oy ce que vous requerés. C’est li entension dou roy nostre seigneur et de ses hommez, que nul respit vous n’enporterez ne arrés; car nous sommes tout pourveu de gueriier sus le roy d’Engleterre et sus son pays, et de contrevengier les despis et dammaiges qu’il nous a fais.» Et quant li evesques de Lincolle entendi che, si fu tous courouchiéz et se repenti moult, quant onequez y avoit entré pour faire messaige. Si se parti adonc des Escos sans congiet et sans amour, et s’en revint au plus tost qu’il peult en Engleterre et trouva le roy à Londrez et une partie de son consseil à qui il fist relation de son messaige. Et quant li roys l’eut oy, si fu durement courouchiés et dist bien que, tout maugré lui et son consseil, on li avoit envoiiet, et que jammais cilx blasmes ne lui seroit absolz. Tant estoit li roys yreux que à painnes le pooit on appaisier, et dist que jammès n’aresteroit, si aroit si menet les Escos et si destruit leur pays, que jammais ne seroit recouvret, en quel aventure qu’il dewist mettre che qui dechà le mer estoit. Si envoiia tantost as pors et as havenes de mer coummander que on ne laiaist nullui passer jusques à tant que on oroit autres nouvellez. Et fu par ensi detriiés li voiaiges de monseigneur Robert d’Artois et de la comtesse de Montfort qui en grant destrèce de coer estoit de ces avenues. Ossi chil qui devoient aller en Gascoingne furent contremandet. Et fist li roys ung especial mandement et coumandement à estre touttez mannierres de gens portant armes, à Ewruich, le jour de le Pasque ou trois jours apriès; et qui en deffauroit, il perderoit sa terre, le royaume d’Engleterre et l’amour dou roy. Fº 74.

P. 6, l. 17: Ewruich.—Mss. A 1 à 6: Bervich. Fº 101 vº.

§ 184. P. 6, l. 21: Li jours.—Ms. d’Amiens: A che especial mandement que li roys fist, ne s’osa nulz escuser ne delaiier qu’il ne fust, et vinrent de tous lés d’Engleterre à Ewruic, et furent là en Paskèrez; meysmes la comtesse de Montfort, qui poursuivoit sa besoingne, y vint avoecq monseigneur Robert d’Artois. Tant avoit li roys englès là de gens, qu’il estoient bien cent mil, c’à piet, c’à cheval; et tantost le jour de le Pasque passet, il se parti de Ewruich et prist le chemin dou Noef Castiel sur Tin. Or entendirent li Escot que li roys englès venoit sur yaus si efforchiement que toutte se puissance y estoit avoecq lui, et en vollenté que de toutte destruire et ardoir Escoce sans merchy. Si en furent, je vous di, li plus dou pays d’Escoce tout effraé, car il sentoient leur pays et leur besoingnes auques en bon estat, et point ne se veoient fort contre le puissanche dou roy englès. Si se missent ensemble chil dou pais, prelas, comtez, barons, chevalier et riche homme dez bonnez villez, et vous dit qu’il y eut là mainte parolle retournée. Li aucun volloient le guerre, li autre le respit; et li pluisseur amaissent mieux le pais, se elle pewist estre. Si tenoient ossi li sage homme dou pays le roy à outrageusement consilliet, quant telle responsce on avoit fait à l’evesque de Lincolle, et que fort estoit se à ceste venue et assamblée dou roy englèz trop cher ne le comparaient. Cez parolles dessus dittez en plain parlement, present le roy et le grant consseil, messires Guillaumme de Douglas, messires Jacquemes de Douglas, ses onclez, messires Archebaux de Douglas, ses cousins, et tout chil de ce sanch les reputoient à grant ynoranche et à grant faintisse. Et disoient bien que c’estoient cil d’Escoche qui le plus à perdre avoient aprièz le roy; mes pour aperdre villez et castiaux et tout leur hiretaige, jà ne seroient en lieu ne en consseil où li oppinion de le première responsce dessus faitte fuist brisie ne amoliie, car trop leur retouroit à grant blamme et à vilain prejudisse à tous jours mès.

A che parlement y eut pluisseurs grosses parolles des uns as autres, car chil de Douglas y estoient si grant et si cremut, et tant avoient fait de biaux servicez au royaumme d’Escoche, que touttes mannierrez de gens les en amoient, et meysmement li roys y ajoustoit grant foy et grant sceurté. Nonpourquant il congnut assés que li aucun s’astenoient assés de voir à dire pour le doubtanche des dessus diz. Si emprist le parole de fait et dist: «Je sui, par le grasce de Dieu, roi d’Escoche, et le tieng en hiretaige par le sucession monseigneur Robert de Brus, de bonne memore, mon chier père, qui vaillanment et poissanment le tint et deffendi, tant qu’il vesqui, contre les Englèz. Depuis nous ont il fais moult de dammaiges, lesquelx j’amenderoie vollentiers, se je pooie. Or sommes nous emfourmet qu’il viennent très puissamment sour nous. Si vous pri et carge en especial que vous me conssilliéz tellement que ce soit à l’onneur de my et au commun prouffit de mon royaumme, et que nuls n’y regarde grandeur, orgoeil, ne linage. Et se vous sentés que nous soyons puissant pour combattre les Englèz, se le dittes, et nous metons tout au devant à l’entrée de nos pays.» Dont en y eut aucuns qui baissièrent les testez, et li aucun qui se veurent acquitter, respondirent: «Sire, nenil, et ewissiens encorrez otant de gens que nous avons.»—«Or coumande jou, dist li roys, puisque combattre ne nous poons et que nous n’en sommes point d’acort, que ceste besoingne soit dou tout cargie sur moy, sur le comte de Moret, sus l’evesque de Saint Andrieu et sur l’evesque d’Abredane.» Adonc tous li coummuns conssaux respondi: «Sire, vous dittes bien.»

Ensi se departi chils parlemens, non que li roys d’Escoche donnast congiet à ses gens, mès remforça son mandement de tous lés; car il ne savoit mies coumment li tretiéz se porteroit entre lui et le roy englèz. Conssaus entre ces quatre dessus noummés se porta que li doy evesque, c’est assavoir chilz de Saint Andrieu et chilz d’Abredane, se partirent d’Aindebourch, fondé et enfourmé quel cose il devoient dire et faire, et vinrent sus sauf conduit deviers le roy d’Engleterre à Durem, là où il se tenoit et attendoit ses os, et jà en y avoit grant fuison au Noef Castiel sur Tin. Quant li doy evesque d’Escoce dessus noummet furent devant le roy englès et aucun de son consseil, telz que le comte de Lancastre, le comte Derbi, monseigneur Robert d’Artois, le comte de Warvich, le comte de Sallebrin, le comte de Norrenthon et de Clocestre, monseigneur Richart de Stanfort, le seigneur de Biaucamp et messire Renaut de Gobehen, ils enclinèrent le roy et tous les seigneurs par mannierre de reverensce et dissent: «Sire, roys d’Engleterre, nous sommes deviers vous envoiiet de par le roy d’Escoce, nostre seigneur, et tout son consseil. On leur a dounnet à entendre que vous estez moult esmeut de gueriier Escoce, enssi que vous avés fait autrefoix; et bien est appairant ossi que la responsce que li evesquez de Lincole vous fist, ne vous est mies bien agreable. Sachiés, sire, que à ce jour que li evesques fu deviers nostre roy ou nom de vous, li rois, nos sirez, avoit envoiiet en Franche deviers le roy Phelippe, pour ce que certainnes convenences et alianches sont entre lui et le roy de Franche. Et ne puet li roys nostre sirez, dounner, prendre, requerre, demander ne accepter trieuwe ne respit enviers vous, sans le sceu dou roy de France. En che s’est il obligiez et acouvenenchiéz par sierment de roy solempnement juret et saielet. Or sont depuis li messaiges qui en Franche avoient estet envoiiet, retournet, et puet nos sirez, par le congiet dou roy de Franche, donner, accorder et accepter trieuwez et respit jusques à un certain terme durant, dont il n’est nus besoings de chy dire; mès nous sommes fort de par nostre roy et tout son consseil de prendre et de dounner une trieuwe ung an ou deux, s’acors le porte, et de che il vous en plaise à nous respondre.»

Quant li roys englès eut oys les deux evesquez d’Escoce ensi parler, si leur dist qu’il en responderoit vollentiers à l’endemain. Ceste responsce leur souffi assés bien. Dont se conssilla li roys tout ce jour quel cose en estoit bon affaire. Il voloit briefment, c’estoit tous ses desirs, chevauchier avant sus Escoce, ou cas qu’il avoit ses gens semons et assembléz en ceste instance. Touttez foix finablement ses conssaux regarda et conssidera les besoingnes qu’il avoit affaire en Franche, en Bretaingne et en Gascoingne, et que ceste guerre as Escos leur estoit trop coustable et perilleuse à nul prouffit; car s’il avoient tout ce que li royaummes d’Escoce puet finer, il n’aroient mies le chevanche d’un droit si grant. Bien y pooient mettre et peu prendre. Si consillièrent au roy que il presist une bonne et ferme trieuwe à durer trois ans, puisqu’il l’en requeroient, et que c’estoit grandement à sen honneur. Tant fu li roys conssilliéz d’uns et d’autres que finablement une trieuwe fu acordée entre lez Englès et les Escos, et devoit durer de ce jour jusques à le Saint Jehan Baptiste, c’on compteroit l’an mil trois cens et quarante trois, et de là en troix ans, et devoit chacuns tenir che qu’il tenoit. Et pooient chevalier et escuier d’Escoce prendre les gages au roy englèz, s’il leur plaisoit. Moult fu la comtesse de Monfort resjoïe de ceste trieuwe, car par lez Escos avoient jà estet ses besoingnes arrierées.

Ensi se departi ceste grande chevauchie. Et coumanda li roys au seigneur de Fil Wautier, à monseigneur Jehan Camdos, au seigneur de Multonne, au seigneur de Pont Cardon et à chiaux qui en Gascoingne devoient aller, qu’il presissent leur carge de gens d’armes et d’archiers et fesissent leur voiage. Dont s’appareillièrent li dessus noummet signeur et vinrent au port de Hantonne, et ordonnèrent là leur besoingne, et se missent en mer et singlèrent deviers Gascoingne.

Or dirons de le comtesse de Montfort qui si bien exploita au roy englès que li roys pria à monsigneur Robert d’Artois, au comte de Sallebrin, au comte de Sufforch, au comte de Pennebrucq, au comte de Kenfort et au baron de Stanfort et as pluisseurs autres, que il volsissent prendre en cure lez besoingnes de le ditte comtesse, et yaux partir hasteement d’Engleterre et venir en Bretaingne, et gueriier tellement qu’il y ewissent honneur et la dame prouffit; et chil signeur li eurent tout en couvent. Si se partirent dou roy et vinrent en Cornuaille, et pourveyrent là leur navie pour venir en Bretagne. Si estoient bien mil hommes d’armes et deux mil archiers et otant de chevaux. De touttez ces gens estoit messires Robiers d’Artois chiés.

En che tamps escheirent les Pasquez si haut que environ Closes Pasques eut on l’entrée dou mois de may, de quoy en le moyenné de ce mois la trieuwe de monseigneur Carle de Blois et la comtesse de Montfort devoit fallir. Or avoit la chevauchie d’Escoce si detriié la besoingne de la dessus dite comtesse que la trieuwe estoit jà close, quant elle se parti d’Engleterre. Si estoit bien messires Carlez de Blois enfourmés dou pourcach que elle faisoit en Engleterre et de l’ayde que ly roys englès ly devoit faire. Dont messires Loeys d’Espaingne, messire Carlez Grimaus et messires Othon Doriie estoient estaubli sus le mer à l’encontre de Grenesie, à trois mil Geneuois et à mil hommez d’armes et seize gros vaissiaux espagnolz, tous armés et tous fretéz, et waucroient sus le mer, attendans leur revenue. D’autre part, messires Ghautiers de Mauni et li signeur de Bretaigne et d’Engleterre qui dedens Hainbon se tenoient, estoient durement esmervilliet de leur comtesse de ce que elle demoroit tant, et si n’en ooient nullez certainnez nouvellez. Nonpourquant, mout bien supposoient que elle ne demoroit mies trop à se grant aise, et ne se doubtoient d’autre cose que elle n’ewist eu aucun villain encontre sus mer de ses ennemis: se ne savoient que pensser. F^os 74 vº et 75.

—Ms. de Rome: Mesires Carles de Blois fu enfourmés de verité que son adversaire, la contesse de Montfort, estoit alée en Engleterre au seqours, et i avoit mené ses enfans pour là demorer dalés le roi. Si pensa sus li dis messires Carles moult longement, et puis apella son cousin mesire Lois d’Espagne, ouquel ils avoit moult grant fiance, et li dist: «Biaus cousins, ce seroit bon, se vous l’acordiés, que une armée de gens d’armes de Geneuois et d’Espagnols fust mise sus en la mer, et là waucrast, en attendant le retour et la revenue de celle contesse de Montfort qui est alée en Engleterre. Se nous le poions atraper, nostre gerre en seroit plus belle.» A ce pourpos respondi li dis messires Lois et dist: «Vous dites verité, et il en sera ce que vous vodrés, car je sui tous près à faire vostre plaisir.»—«Grant merchis,» respondi messires Carles. Depuis ne demora gaires de temps que mesires Lois d’Espagne, qui bien savoit les usages et coustumes de la mer, se pourvei de barges et de balengiers, et mist sus la mer son armée, où bien avoit deus mille honmes parmi les Geneuois et les Espagnols, et disoit que ceuls de sa partie n’avoient donné nulles trieuves sus mer, fors que sus terre. Qant la contesse de Montfort ot ordonné toutes ses besoingnes en Engleterre, et elle sceut quels gens elle aueroit, cinq cens honmes d’armes et cinq cens archiers, et les devoient conduire messire Robers d’Artois et li contes de Pennebruq, en lor compagnie devoient estre li jones sires Espensiers, messires Edouwars, mesires Guis de Briane, mesires Thomas de Walquefare, li sires de Tallebot, li sires de Boursier, mesires Robers de Noefville, messires Jehans Paule, mesires Lois Clifort, mesires Guillaume Chifeton, mesire Richart de Pont Cardon et pluisseur aultre, et se ordonnèrent et atendirent tout l’un l’autre à Pleumude.

Qant tout furent venu, gens d’armes et archiers, qui compagnier devoient mesire Robert d’Artois et la contesse de Montfort, il entrèrent en lors vassiaus et puis se desancrèrent et se missent en mer, et orent si bonne aventure que onques ne veirent, ne trouvèrent, ne encontrèrent la navie des Geneuois et des Espagnols, des quels mesires Lois d’Espagne estoit chiés et conduisières, dont depuis il furent moult esmervelliet: et la cause pourquoi ce fu, je le vous dirai. Un petit avant ce que mesires Robers d’Artois et la contesse de Montfort se departesissent dou havene de Plumude, uns grans tourmens se mist sus mer, qui espardi tous ou en partie les vassiaus à mesire Lois d’Espagne et à Othon Doriie et à Toudou, et furent plus de quinse jours waucrant sus la mer et prendans terre de isle en isle, avant que il se peuissent tous remetre ensamble. Et en celle espasce la contesse de Montfort et mesire Robers d’Artois entrèrent en Bretagne, et prissent terre ou havene de Brest et de Hainbon, pour estre mieuls logiet à lor aise, dont messires Gautiers de Mauni et tout li compagnon orent grant joie de lor revenue. Fº 89.

P. 6, l. 22: Evruic.—Mss. A 1 à 6, 8 et 9, 11 à 14, 18 et 19: Bervich. Fº 101 vº.—Mss. A 20 à 23: Warwich, Fº 151.—Mss. A 23 à 29: Everuich. Fº 117 vº.

P. 7, l. 5: Hartecelle.—Mss. A 1 à 6: Harteselle. Fº 101 vº.—Mss. A 20 à 22: Hartesellée. Fº 151.—Mss. A 23 à 29: Hartevelle. Fº 117.

P. 7, l. 6: quatre cens.—Mss. A 8, 9, 11 à 17, 20 à 29: trois cens. Fº 93.—Mss. A 18, 19: à tout trois cens armeures de fier. Fº 102.

P. 7, l. 19 et 20: à l’encontre de Grenesie.—Mss. A 1 à 6: à l’encontre, en l’isle de Grenasie. Fº 101 vº.—Mss. A 18, 19: à l’entrée de Grenesie. Fº 102.—Mss. A 20 à 22: à l’endroit de Gravelinges. Fº 151 vº.

P. 7, l. 21 à 23: en trente.... revenue.—Mss. A 1 à 6: et trente deux gros vaisseaux espaignolz tous armez et tous fretez s’ancrèrent sur la mer, attendans leur venue. Fº 101 vº.

P. 7, l. 22: waucroient.—Mss. A 8, 9, 11 à 17, 20 à 22: s’ancroient. Fº 93.—Mss. A 18, 19: s’en entrèrent. Fº 102.

§ 185. P. 8, l. 3: Ensi.—Ms. d’Amiens: Ensi que messires Robiers d’Artois, li comtez de Pennebrucq, li comtez de Sallebrin et li signeur d’Engleterre et leurs gens, avoecq la comtesse de Montfort, nagoient par mer au léz deviers Bretaingne, et avoient vent à souhet, au departement de l’ille de Grenesie, à heure de relevée, il perchurent le grosse navie des Geneuois, dont messires Loeys d’Espaingne estoit chiéz. Dont dissent leur maronnier: «Seigneur, armés vous et ordonnés vous, car vechy Geneuois et Espagnols qui viennent et qui vous aprochent.» Lors sonnèrent li Englès leur trompettez et missent les bannierrez et les pignons de Saint Jorge hors dessus leurs mas, et chacuns barons par lui sa bannierre sus son vaissiel. Si s’ordonnèrent bien sagement et s’encloirent de leurs archiers, et puis nagièrent à plain voille enssi que li tamps là portoit; et pooient y estre environ trente six vaissiaux, que grans, que petis, mès nuls si grans, ne si fors de trop n’en y avoit que messires Loeys d’Espaingne en avoit neuf. Et entre ces neuf avoit trois gallées qui se remoustroient dessus tous lez autres; et en chacune de ces trois gallées estoient li trois corps des seigneurs, messires Loeys, messires Carlez, messires Othes. Si s’aprochièrent li vaissiel, et coummenchièrent Geneuois à traire de leurs arsbalestrez à grant randon, et li archier d’Engleterre ossi sour eux. Là eut grant tret des uns vaissiaux as autres, et qui longement dura, et maint homme navret et blechiet. Et quant li seigneur, li baron, li chevalier et li escuier s’aprochièrent, et qu’il peurent des lanches et des espées venir enssamble, adonc y eut dure bataille et crueuse, et trop bien s’i portoient et esprouvoient li ung et li autre. Là estoit messires Robers d’Artois, qui y fu très bon chevalier, et la comtesse de Montfort armée, qui bien valloit ung homme, car elle avoit coer de lion, et tenoit ung glaive moult roide et bien trenchant, et trop bien s’en combatoit et de grant couraige. Là estoit messires Loeis d’Espaigne en une gallée, comme bons chevaliers, qui vassaument et de grant vollenté requeroit et se combatoit as Englèz, car moult les desiroit à desconfire, pour lui contrevengier dou dammaige qu’il avoit euv et recheuv ceste propre année asés priès de là, ou camp de Camperli. Et y fist, ce sachiés, messires Loeys merveillez d’armes, et bien en avoit l’avantaige, car il estoit en ung vaissiel qui se remontroit deseure tous les autres, et si estoit si bons chevaliers par mer et par terre. Là eurent li baron et li chevallier d’Engleterre ung très dur encontre et perilleus, car il avoient affaire à forte gens, mais il avoient bons cappittainnes et seurs chevaliers, bien deffendans et bien assallans. Là eut fait mainte belle appertise d’armes, maint homme mort, navré et maint reversé en l’aige, qui oncques puis ne s’aidèrent. Si dura ceste bataille de relevée tout jusques au soir, toudis combatant, trayant, lanchant et grans appertises d’armes faisans. Si les convint sus le soir, par pure necessité, partir l’un de l’autre et ancrer, car la vesprée se couvri, et une noire nuée monta, qui l’air obscurchi durement. Lors se missent tout à l’ancre, et entendirent as blechiés et as navrés remuer, bendeler et remettre à point; et estoit leur entension que jammais de là ne partiroient, se seroit li une des parties desconfite. Fº 75 vº.

P. 8, l. 4: Salebrin.—Les mss. A 23 à 33 ajoutent: le conte de Sufforc, le conte de Kenfort, le baron de Stanfort, le seigneur Despensier, le seigneur de Boursier. Fº 118.

P. 8, l. 8: Grenesie.—Mss. A 1 à 6: Gresile. Fº 102.—Mss. A 8, 9: Grèce. Fº 93 vº.—Mss. A 15 à 17: Guenerre. Fº 103.—Mss. A 18, 19: Crète. Fº 102.

P. 9, l. 17 et 18: ou camp de Camperli.—Ces mots manquent dans les mss. A 1 à 6, fº 102.

§ 186. P. 10, l. 4: Un petit.—Ms. d’Amiens: Ung petit devant mienuit s’esleva ungs vens, ungs orages si très grans et une pleuve si très grosse et ung tonnoirez et ungs esclistrez si mervilleux, que il sambloit proprement que li mondez dewist finner. Et n’y avoit si hardi ne si preu bacheler, ne qui tant ainmast les armez, qui ne volsist bien estre à terre, car cez bargez et ces naves hurtoient lez unes as autrez, et sambloit que elles se dewissent ouvrir et partir. Si demandèrent consseil li seigneur d’Engleterre à leurs maronniers quel cose leur estoit bon affaire; et il respondirent que d’iaux traire à terre au plus tost qu’il poroient, car la fortune estoit si grande sus mer, que, se li vens les y boutoit, il seroient tout en peril d’estre noiiet. Dont entendirent il generaument à sachier lez ancrez amont et les voilles, enssi qu’à demy quartier, et tantost eskipèrent et eslongièrent il les ennemis qui gisoient devant yaux à l’ancre, qui ossi n’estoient mies trop asceur. Et se boutèrent ou parfont et n’osèrent sieuwir les Englès qui aprochoient terre, pour ce que leur vaissiel estoient si grant que se il ewissent froté à terre en telle fortune, il fuissent romput. Pour tant se missent il ou plus parfont; mès à leur departement, il trouvèrent quatre nefs englesses cargies de chevaux et de pourveanches, qui s’estoient tenut en sus de le bataille. Si eurent bien consienche, quel tamps ne quel tempès qu’il fesist, de prendre ces quatre vaissiauls et d’atachier as leurs, et de prendre le haulte mer pour eskieuwer ce peril. Chilz vens et chil fortune les bouta, ains qu’il fuist jours, plus de cent lieuwes enssus dou lieu où il s’estoient combatu, et les nefs englesses arivèrent et prissent terre à ung petit port assés priès de Vennes, dont il furent tout resjoy quant il se trouvèrent à terre. Fº 75 vº.

§ 187. P. 11, l. 14: Ensi.—Ms. d’Amiens: Enssi et par ceste grant fortunne se desrompi la bataille sus mer de monseigneur Robert d’Artois et se routte à l’encontre de monseigneur Loeys d’Espaigne et de ses gens. Si n’en scet on à qui donner l’onneur, car il se partirent tout magret yaux et par le diverseté dou tamps. Touttez voies, li Englès prissent terre assés priès de Vennes et ysirent hors des vaissiaux, et missent leurs cevaux sus le sablon, touttez leurs armeures et leurs pourveanches, et puis eurent consseil et advis dou sourplus, coumment il se maintenroient. Si ordonnèrent à traire leur navie deviers Hainbon et yaux aller devant Vennes, car assés estoient gens pour assegier la dessus dite cité. Si se mirent et chevauchièrent tout ordonneement celle part. Il n’eurent miez gramment à aller, quant il y vinrent.

Adonc estoit dedens la cité de Vennes, de par monsigneur Charlon de Blois, messires Hervis de Lion et messire Oliviers de Clichon, li sirez de Tournemine et li sires de Lohiach, gardiiens et cappittainnez de Vennes et dou pays environ. Quant chil seigneur virent venus li Englès, et que il s’ordonnoient pour y mettre le siège, si ne furent mies trop effraet, mès entendirent au castiel premierement, puis as gharittes et as portes, et missent en chacune porte ung chevalier et dix hommes d’armes, dix archiers et dix arbalestriers, et s’ordounnèrent assés bien pour tenir et garder le chité contre tous venans. Or vous parlerons de monseigneur Loeis d’Espaingne et de se routte. F^os 75 vº et 76.

P. 11, l. 20: prisent terre.—Ms. B 6: Che fu environ le Saint Jehan Baptiste l’an mil trois cens quarante deux que la guerre estoit jà ouverte entre la contesse et Charle de Blois. Fº 220.

§ 188. P. 12, l. 16: Saciés.—Ms. d’Amiens: Sachiés que, quant cils grans tourmens et ceste fortune eurent pris et eslevet et boutet en mer le dessus dit monseigneur Loeys, il furent toutte ceste nuit et l’endemain tant c’à nonne, moult tourmenté et en grant aventure de leurs vies, et pardirent par le tourment deux de leurs petis vaissiaux chargiés de pourveanchez; mais il en avoient concquis quatre sus les Englès, plus grans assés. Quant che vint environ nonne, li tempès cessa, li mers s’aquoisa. Si demandèrent li siegneur as maronniers auquel lés il estoient plus priès de terre, et il respondirent: «Dou royaumme de Navarre.» Lors furent li patron moult esmervilliet, et dissent que li vens les avoit eslongniés enssus de Bretaingne de six vingt lieuwez. Si se missent là à l’ancre et atendirent le marée, si ques, quant li flos de le mer revint, il eurent assés bon vent de quartier pour retourner vers le Rocelle. Et costiièrent Baione, mès il ne l’osèrent aprochier, et puis toutte le Gascoingne. Et fissent tant qu’il rapassèrent les reus Saint Mahieu, et là se missent il à terre, et puis vinrent à Camper Correntin, et là se reposèrent et rafrescirent pour entendre dez nouvelles. Si envoiièrent deviers monseigneur Charlon de Bloix, qui se tenoit à Rennes, à savoir quel cose il volloit que il fesissent. Or lairons nous d’iaux à parler ung petit. Si vous recorderons dou siège de Vennez et de monseigneur Robert d’Artois et de ses gens, coumment il se maintinrent. Fº 76.

—Ms. de Rome: En celle prope sepmainne que li armée d’Engleterre ariva en Bretagne, fallirent les trieuwes entre mesire Carle de Blois et la contesse de Montfort.

Quant li dis mesire Carles, qui se tenoit en Nantes, sceut la verité de la venue des Englois que ils estoient arivet en Bretagne, il pensa bien que il aueroit la gerre. Si envoia tantos à tous lés, sus la mer, pour oïr nouvelles de son cousin mesire Lois d’Espagne. Et fu trouvés à le Bai en Bretagne, et jà savoit il que la contesse estoit passée et retournée en Bretagne. Si fist tant li dis mesires Lois que il vint à Rennes et trouva là mesire Carle de Blois, qui i estoit venus à grant gent d’armes. Si ordonna tantos et pourvei li dis mesires Carles gens d’armes par toutes ses forterèces, et senti bien que pour celle saison les Englois tenroient les camps, se poissance de France ne li venoit trop grande. Et pour ce que la besongne se tailloit que tout premierement li sièges se metteroit devant Vennes, messires Carles de Blois i envoia en garnison deux cens lances, et en fist chapitainne mesire Olivier de Cliçon et mesire Hervi de Lion. Et ensi de garnison en garnison il envoia ses chevaliers, et puis s’en retourna à Nantes. Et manda et escripsi tout l’estat de Bretagne à son oncle le roi Phelippe et à son cousin le duch de Normendie, et à son frère le comte de Blois et à ses cousins, ceuls de Chastellon. Fº 89.

P. 13, l. 9: Garlande.—Mss. A 1 à 7, 11 à 14, 18, 19 à 33: Guerrande. Fº 103.—Mss. A 15 à 17: Garrande. Fº 104 vº.—Mss. A 8 et 9: Garlande. Fº 94 vº.

§ 189. P. 13, l. 17: Messires.—Ms. d’Amiens: Messire Robers d’Artois, si comme vous poéz oïr, avoit assegiet la chité de Vennes à mil hommes d’armes et à troix mil archiers, et couroit le pays tout environ, ardoit, essilloit, et destruisoit tout jusquez à Dinant et jusquez à le Roche Periot, jusquez à Ghoy le Forrest et jusques à le Roce Bernart et jusquez au Suseniot, et n’osoit nulx demorer sus le plat pays, mais avoient le leur retret ens ès fortrèces. Le siège durant, il y eult as bailles de le ville mainte escarmuche, mainte envaye et tamaintez bellez appertisses d’armes faittez. Chil dedens, loist assavoir li sirez de Clichon, messires Hervis de Lion et li autre chevalier, s’i portoient si vassaument que mieus ne pooient, et ung tampz y acquissent il grant grace. Et sachiés que toudis se tenoit la comtesse de Montfort au siège devant Vennes avoecq monseigneur Robert d’Artois. Ossi messires Gautiers de Mauni, qui s’estoit tenus en Hainbon ung grant temps, recarga le dite ville et castiel à monseigneur Guillaumme de Quadudal, à monseigneur Henry et à monseigneur Olivier de Pennefort et à messire Gerart de Rochefort, et le laissa bien pourveue pour touttes aventurez, puis prist avoecq lui monseigneur Yvon de Tiguery et cent hommes d’armez et deux cens archers, et vinrent en l’ost devant Vennez, où il furent recheu à grant joie de monseigneur Robert d’Artois et des barons d’Engleterre.

Assés tost apriès, se fist uns assaux devant Vennes moult grans et moult fiers, et assaillirent le chité chil qui assegiet l’avoient en troix lieux et toutte à une fois, et trop donnèrent affaire à chiaux de dedens; car li archier d’Engleterre traioient si ouniement et si espessement, c’a painnes s’osoient chil qui deffendoient, amoustrer as gharitez. Et dura chilz assaux ung jour tout entier. Si y eut moult de bleciéz et de navréz d’un lés et de l’autre. Quant che vint sus le soir, li Englès se retrayrent à leurs logeis, et chil de dedens à leurs hostelz, tous lassés et moult travilliés. Si se desarmèrent, mès chil de l’ost ne fissent mies enssi, ainchois se tinrent en leurs armeurez et ostèrent tant seullement leurs bachinés, et burent ung cop chacuns et se rafresquirent. Depuis, par l’avis et consseil monseigneur Robert d’Artois, qui fu ungs grans et sages gueriièrez, il s’ordonnèrent en trois batailles, et en envoiièrent les deux à deux portez là où il faisoit le plus fort assaillir, et le tierche fissent tenir toutte quoye couvertement. Et ordonnèrent que si trestost que li autre aroient assailli une bonne espasse, et que chil de dedens entenderoient à yaux deffendre, il se trairoient avant sus ce plus foible lés et seroient tout pourveu d’escielles cordées à grawès de fier, pour jetter sus les dis murs et atachier as gharitez, et asaieroient se ceste voie le poroient concquerre.

Tout ensi comme il eurent ordonnet et estaubli, il fissent. Et s’en vint messires Robers d’Artois en le première bataille assaillir et escarmuchier à le baille de le porte, et li comtez de Sallebrin enssi à l’autre. Et pour ce qu’il faisoit tart, et affin ossi que chil de dedens en fuissent plus esbahis, il alumèrent grans feux, si ques li clartés en resplendissoit dedens le chité. Adonc tout à une vois li homme de le ville qui virent le feu et le lumierre, et especialment cil dou castiel, quidèrent que leurs maisons ardissent. Si criièrent: «Trahy! trahy! armés vous! armés vous!» Jà estoient li pluiseur couchiet et retret pour yaux reposer. Si se levèrent soudainement et s’en vinrent, sans arroy et sans ordonnanche et sans parler à leur cappitainnes, celle part où li feux estoit; et ossi li seigneur qui en les hostelx estoient, s’armoient. Entroes que ensi il estoient entoueilliet et empeschiet, li comtez de Kenfort et messires Gautiers de Mauni et leur routte, qui estoient ordené pour l’esciellement, entendirent à faire leur emprise et vinrent de ce costet où nus n’entendoit, et drechièrent leurs eschiellez et montèrent amont, les targes sus lor testez, et entrèrent en le cité par celle mannierre assés paisivlement. Et ne s’en donnèrent garde li Franchois et li Breton qui dedens estoient. Si virent leurs ennemis sus le rue et yaux assaillir devant et derière: dont n’y eut si hardi, qui ne fuist tous esbahis, et tournèrent en fuitez chacuns pour lui sauver, et quidièrent que li meschiés fuist plus grans que il n’estoit; car, se il se fuissent retourné et deffendu de bonne vollenté, il ewissent bien mis hors les Englès qui entrés dedens estoient. Et furent li seigneur qui cappittainne en estoient, si souspris, que à painnes peurent il monter à ceval, et quidièrent y estre tout trahi. Et s’en parti tout premiers pour son corps sauver messires Oliviers de Clichon, et fist ouvrir une porte et prist les camps. Ossi tout li seigneur qui dedens estoient, se sauvèrent, chacuns qui mieux peut.

Là eut, je vous di, grant encauch, grant noise, grant occision d’ommes, de femmez et d’enfans, car cil qui escellé l’avoient, vinrent as portes et coppèrent les flayaux, et ouvrirent lez portes et puis lez baillez. Si entrèrent ens touttes mannierrez de gens, premiers messires Robers d’Artois et se bannierre et toutte se routte, messires Richart de Stamfort et se bannierre, li comtez de Pennebrucq et se bannierre, et ensi tout li autre chevalier et escuier, qui mieux mieux. Et chil de Vennes widoient et fuioient leurs maisons, et laissoient femmes et enffans, draps et jeuiaux. Et vous di que, se che ewist estet de jour ossi bien que ce fu de nuit, tout chevalier et escuier et autres bonnez gens de Vennes ewissent estet tout mort et pris. Mès li Englès ne chachièrent point, car pas ne congnissoient lez usaiges ne les voies d’environ le chité, et si leur sambla qu’il ewissent trop bien exploitiet, quant il avoient pris le ville et le chité de Vennes par assault et boutté hors leurs ennemis. Fº 76.

—Ms. de Rome: Droit as octaves de la Saint Jehan Baptiste s’en vinrent la contesse de Montfort, messires Robers d’Artois, messires Gautiers de Mauni et li chevalier de Bretagne et d’Engleterre mettre le siège devant la chité de Vennes, et l’environnèrent si avant que assegier le porent, car bien estoient gens pour ce faire. Cil de la chité se confioient grandement en la bonne chevalerie qui dedens estoient, et à bonne cause; car c’estoient tous vaillans honmes et de grant prudense. Euls venu devant Vennes, il i fissent pluisseurs assaus as portes et as barrières. Et moult vaillanment asalloient li Englois; et aussi li chevalier et li esquier qui dedens estoient, par grande apertise d’armes se deffendoient.

Mesires Carles de Blois mettoit grande entente à ce conment il peuist avoir tant de gens d’armes et de Geneuois que il peuist lever le siège, et resister contre la poissance de la contesse, et avoit ses messages alans et cevauçans en France nuit et jour deviers le roi Phelippe et les signeurs. Mais pour lors la cours dou roi de France estoit si raemplie d’uiseuses et si lontainne en esplois, que à painnes pooit on avoir nulle delivrance, ne on ne pooit avenir jusques au roi, car tous jours estoit il en ses deduis. Et jà se tenoient li tresorier de France tout hodé et moult acargiet dou fait de la guerre de Bretagne, car trop d’or et d’argent, à ce que il faisoient entendant au roi et à son consel, reversoient là.

Dou conmencement de ces gerres de Bretagne, li rois Phelippes de grant volonté aida son cousin à continuer la gerre et à lui envoiier gens d’armes et saudoiiers. Et puis que les gerres furent escaufées, et que les Englois s’en ensonniièrent, il s’en refroida, à ce que on vei les apparans, dont les besongnes en furent plus laides pour messire Carle de Blois.

Or retournons au siège de Vennes. Messires Robers d’Artois et messires Gautiers de Mauni rendoient grant painne à ce que il peuissent conquerir la chité de Vennes, pour faire garnison et frontière contre le demorant dou pais. Bien savoient que par trettié jamès ne le raueroient, car elle estoit garnie et pourveue de vaillans honmes et grans signeurs de Bretagne et bien amis à mesire Carle de Blois, qui jamais n’entenderoient à nul trettiet. Et lor estoit avis que, se il poient avoir Vennes et conquerir, il seroient grant signeur sus la frontière, car il aueroient Vennes, Hainbon et Brest, et tout seant sus la mer. Et poroient ces trois garnisons sans dangier conforter l’un l’autre et retraire au besoing, se poissance de gens d’armes lor croissoit dou roiaume de France. Pour ce soutilloient il nuit et jour conment il le poroient avoir, et tant i visèrent et soutillièrent que il vinrent à lor entente.

Entre les asaus que les Englois et les Bretons fissent à la chité de Vennes, il en i ot un grant et bien continué, car il dura un jour tout entier, et se ensonniièrent priès toutes les gens d’armes de l’oost et chil de dedens. Qant ce vint sus le soir, tout se retraiièrent dedens et dehors à lors logeis. Messires Robers d’Artois et les Englois et Bretons d’un lés soupèrent bien briefment, et point ne se desarmèrent, et reposèrent un petit. Et tantos apriès mie nuit, il sallirent sus, sans faire grant noise, et s’ordonnèrent en pluisseurs routes, et s’en vinrent pour assallir Vennes. Et fissent alumer grant fuisson de feus de busce au plus hault de la ville au dehors et au desus dou vent, et dou plus priès de la ville que il porent.

Chil qui faisoient le gait pour la nuit dedens Vennes, veirent les feus eslever contre mont à celle heure là. Si furent tout esmervilliet, et quidièrent de premiers que li feus fust en la ville. Si vinrent celle part; si conmenchièrent à faire grant noise et à resvillier ceuls qui dormoient. Chevalier et esquier sallirent sus apertement, et quidoient que la ville fust prise. Et ensi que il issoient hors de lors hostels, et il veoient les feus et les fumières au dehors, il quidoient que ce fuissent les maisons de Vennes qui ardissent, et estoient tout esfraé. A celle heure i avoit très grant assaut à deus portes de Vennes; et pour ce que li hus et li cris estoient là, toutes gens d’armes s’i traioient.

D’autre part, mesires Robers d’Artois, mesires Gautiers de Mauni et une bataille d’Englois et de Bretons estoient aviset de lor fait et pourveu d’escelles de cordes, et alèrent tout à l’oposite de l’asaut et dou hustin, là où nuls n’estoit ne n’entendoit. Et jettèrent lors escelles à cros de fier, et les atachièrent as murs, et puis montèrent amont, sans estre oï, sceu ne veu, car li aultre menoient si très grant hustin, qui asalloient et qui se deffendoient, que on n’ooit de nulle part goute pour euls. Par celle manière entrèrent en la chité de Vennes plus de deus cens honmes d’armes, mesires Robers d’Artois et sa banière et li sirez Espensiers et sa banière, li sires de Fil Watier et son pennon, mesires Gautiers de Mauni et son pennon, et fu chils qui tous premiers i entra. Et qant il furent tout dedens, il se missent en bonne ordenance et arroi, et descendirent tout parmi une rue, en escriant lors cris, et en abatant tous ceuls que il encontroient. Li François estoient et furent soudainnement si effraé et en tel desroi que il conmencièrent à fuir, li uns chà et li aultres là, sans mettre nulle deffense en euls. Toutes fois, li sires de Cliçon, mesires Hervis de Lion, mesires Guis de Lohiac et li chevalier qui en garnison là dedens estoient, se sauvèrent et montèrent sus lors chevaus et laissièrent tout lor arroi. Onques riens n’enportèrent, et quidièrent bien estre trahi. Les portes, au lés où les Englois et Bretons asalloient, furent ouvertes, et entrèrent dedens tout abandonneement. Ensi fu Vennes prise de par mesire Robert d’Artois et mesire Gautier de Mauni; mais trop furent les Englois courouchié que li quatre baron qui dedens estoient, lor estoient ensi escapet, et li aultre chevalier de Bretagne et de France, car bien i avoit de prisonniers pour cent mille florins. F^os 89 vº et 90.

P. 13, l. 19: trois mille.—Mss. A 1 à 6, 18, 19: trois cens. Fº 103.

P. 13, l. 21: Dinant.—Mss. A 1 à 7, 11 à 14, 18 à 33: Dignant. Fº 103.

P. 13, l. 21: et jusques à le Roce Periot.—Ces mots ont été ajoutés dans les mss. B.

P. 13, l. 24: Souseniot.—Mss. A 1 à 6, 11 à 14, 18, 19: Sustinot. Fº 103.—Ms. A 7: Suseniou. Fº 98.—Mss. A 8 et 9: Suseniot. Fº 94 vº.—Mss. A 15 à 17: Sussenioth. Fº 104 vº.

P. 13, l. 29: Lyon.—Les mss. A 1 à 6, 11 à 14, 18, 19 à 23 ajoutent: le sire de Tournemine. Fº 103.

P. 14, l. 8: as deux frères de Pennefort.—Les mss. A 1 à 9, 11 à 19, 23 à 33 substituent: et à messire Gerard de Rochefort. Fº 103 vº.

P. 14, l. 9: Tigri.--Mss. A 1 à 7, 18 à 33: Triviguidi, Treviguidi. Fº 103 vº.—Mss. A 8, 9, 15 à 17: Tigri. Fº 94 vº.—Mss. A 11 à 14: Tringuidi. Fº 99.

P. 15, l. 5: grawès.—Mss. A 1 à 6, 11 à 14, 18, 19: crapes, crappes. Fº 103 vº.—Mss. A 20 à 22: grapins. Fº 154.

§ 190. P. 16, l. 24: Ensi.—Ms. d’Amiens: Ensi que je vous recorde et par l’emprise et soutieuté monseigneur Robert d’Artois, fu la chité de Vennes prise, et fissent de ceux et de celles qu’il trouvèrent laiens, leur vollenté. Quant ce vint au matin, que tout li baron et li chevalier eurent entendu à leur besoingnez et veirent que point de recouvrier n’y avoit ens ès Franchois, ne nul samblant de retourner pour combattre, si se tinrent pour tout asseuret et vinrent querre la comtesse de Montfort et l’amenèrent dedenz le chité en grant joie. Et disnèrent ou castiel tout li seigneur avoecq monseigneur Robert d’Artois et la dessus ditte comtesse. Or vous parlerons dou pays qui fu durement effraés et esmervilliés de ceste avenue; meysmes messires Charlez de Blois par especial en fu trop durement courouchiés. Si manda à son marescal monseigneur Robert de Biaumanoir et au viscomte de Rohem qu’il chevauçaissent celle part, car li prise de Vennez estoit trop perilleuse pour le pays. Et manda encorrez messires Carlez de Blois à monseigneur Loeis d’Espaigne que il pourveist la ville de Camper Corentin bien et suffisamment et y lasast bons cappitainnes et seurs, et rentrast en mer et gardast les frontières de Saint Malo et de Saint Mahieu de Finne Postierne, dou port de Bay et de Gredo, de Garlande et de Camperli, et que il ne pooit faire milleur esploit que de gueriier sur mer allans et venans d’Engleterre en Bretaingne, ou kas que li Englès li estoient ennemy. A l’ordonnance de monseigneur Carle de Blois vot obeir li dessus dis messires Loeys, et laissa dedens Camper Correntin le seigneur de Quitin et messire Guillaumme dou Broeil et messire Henri de le Saucerrelle, puis s’en parti et se mist avoecq Espagnos et Geneuois sus mer en le compaignie de monseigneur Carle Grimaus et de monseigneur Othon Doriie. Or renvenrons à monseigneur Robiert d’Artois et as seigneurs d’Engleterre qui estoient dedens la cité de Vennes.

Au cinquime jour que la cité de Vennes eult estet prise, ordonnèrent li seigneur que messires Gautiers de Mauny et messires Yves de Tigueri ramenaissent la comtesse de Montfort dedens le ville de Hainbon, et de là ne partesissent jusques à tant que il orroient autrez nouvelles, mais fuissent songneux de garder le forterèce, car c’est une grant clés ou pays pour yaulx. Messires Ghautiers s’i acorda, et ramenèrent la dite comtesse à grant routte, qui y fu liement rechupte. Encorrez ordonna messires Robers d’Artois, comme chiéz et souverains de ceste chevauchie et armée de par le roy englès, que li comtez de Sallebrin, li comtez de Pennebrucq, li comtez de Sufforch, li comtes de Cornuaille et aucun autre baron alaissent assegier la cité de Rennes et il demorroit en Vennes, et messires Richart de Stamfort o lui, et garderoit là le chité et l’entrée. Enssi comme il l’ordounna, il fu fait. Chil seigneur d’Engleterre et leurs gens s’appareillièrent pour venir devant Rennes. Cez nouvellez sceut messires Carlez de Bloix que li Englès venroient assegier Rennes. Si eut consseil qu’il s’en partiroit et madamme sa femme ossi, car mieux entenderoient à leurs besoingnes, se il avoient lez clés des camps, que ce que il fuissent là dedens enclos. Si fist sa femme amenner à Nantes, et il s’en vint au Suseniot, et laissa dedens Rennes à cappitainne le seigneur d’Ansenis, messire Ievain Charuiel, qui estoit adonc jones bacelers, et monseigneur Bertran de Claieqin, qui ossi estoit moult jones et de grant emprise, et avoecq yaux pluisseurs escuiers de Bretaingne, de Bourgoingne et de Normendie. Et li dessus dit seigneur d’Engleterre s’en vinrent devant Rennes, et l’assegièrent de tous les poins, et i fissent tamaint assault. Et li saudoiier et compaignon de la chité, parmi l’ayde des bourgois, ossi le gardèrent très bien. F^os 76 vº et 77.

P. 17, l. 12: trois mille.—Mss. A 1 à 29: quatre mille. Fº 104.

P. 17, l. 20 et 21: d’Engleterre.--Mss. A 1 à 6, 11 à 14, 18 à 22: de Bretaigne. Fº 104.

§ 191. P. 17, l. 24: Pour le prise.—Ms. d’Amiens: Pour la prise de la cité de Vennes fu li pays durement esmeus et courouchiés; car bien quidoient que li dessus dit seigneur et cappittainne, qui dedens estoient quant elle fu prise, le dewissent deffendre et garder ung tamps contre tout le monde, car elle estoit forte assés et bien pourveue de toute artillerie et d’autres pourveanches, et bien garnie de gens d’armes. Si en estoient par le mesavenue tout honteux li sirez de Clichon et messires Hervis de Lion, car aussi li envieux en parloient villainnement sus leur partie. De quoy li doy seigneur ne veurent mies plenté sejourner, ne yaux endormir en le renoumée des mesdisans; ains quellièrent grant fuisson de bons compaignons, chevaliers et escuiers de Bretaingne, et priièrent as cappittainnez des fors que il volsissent y estre à cel jour [que ordonné et nommé avoient entre yaus, sur les champs], à tout tel quantité de gens; et se il plaisoit à Dieu, il feroient ung tel fet d’armes qu’il y aroient honneur, et tous li pays prouffit. Si le segnefiièrent il ossi à monseigneur Robert de Biaumanoir, marescal del pays de Bretaingne de par monseigneur Carle de Blois, liquelx ne s’escuza nullement, mès dist qu’il y seroit vollentiers. A che jour que li dessus dit ordonnèrent, vinrent les cappittainnez de là environ: messires Pière Porteboef, cappittainne de Dinant, et amena bien mil hommez; li cappittainne d’Auroi en amena deux cens; Gerars de Malain, castelain de Roce Piriot, deux cens; Reniers de Malain, castelain de Fauet, cent; li sirez de Quitin, cappittainne de Camper Correntin, cinq cens. Briefment, chevalier et escuier et touttes manierres de gens se queillirent et assamblèrent par le pourkas et à le priière des dessus dis, et furent tout venu ung certain jour devant Vennez. Et estoient bien dix mil hommes parmy le communauté dou pays, et assegièrent le cité de Vennes de tous costéz et puis coummenchièrent fortement à assaillir. Fº 77.

—Ms. de Rome: Pour la prise et la perte de la chité de Vennes fu li pais de là environ tous esmeus et courechiés. La contesse de Montfort i entra à grant joie. Et furent pris auquns bourgois de la ville et mis en prison, et corrigiet les auquns de lors vies et de lors cavances, pour tant que l’autre fois si legierement il s’estoient rendu et tourné à mesire Carle de Blois. Si se tint la contesse là, je ne sçai qans jours, et puis s’en retourna à Hainbon et laissa mesire Robert d’Artois et mesire Gautier de Mauni couvenir de sa gerre. Mesires Oliviers de Cliçon, mesires Hervis de Lion, mesires Guis de Lohiac et li sires de Tournemine et chil qui sauver se porent, au departement de Vennes, s’en vinrent à Rennes, et trouvèrent là mesire Carle de Blois et sa fenme et les signeurs. Si recordèrent les aventures qui avenues lor estoient, et conment Vennes estoit perdue. En parlèrent li seigneur en pluisseurs manières. Li auqun disoient que il i avoit eu trahison, et li aultre, non. Meismement chil qui en retournoient, n’en savoient point parler bien proprement. Et disoient li auqun en requoi que Vennes avoit esté perdue par simplèce et povre garde et negligense de mesire Olivier de Cliçon et de mesire Hervi de Lion. Et tant montèrent les murmurations que li doi chevalier en furent enfourmé; et leur fu dit de ceuls qui les amoient, que la vois dou pais parloit vilainnement sus lor partie. Et qant il oïrent ce, si furent moult courouchié et à bonne cause, et jurèrent que jamais n’entenderoient à aultre cose, si aueroient repris la chité de Vennes ou il i metteroient les vies. Et se ordonnèrent à ce faire, et priièrent tous lors amis, dont il avoient grant fuisson, et tous les chapitainnes des forterèces de Bretagne; et s’estendoient les priières et mandemens ensi que, sus un jour que il i ordonnoient, il fuissent tout là où il les voloit avoir. Tout i furent, et i ot à lor priière grant asamblée de gens d’armes; et s’en vinrent de fait et sus un un jour mettre le siège devant Vennes. La contesse de Montfort s’en estoit partie un petit devant et retraite en Hainbon, mais messires Robers d’Artois et grant fuisson de bonnes gens d’armes d’Engleterre et d’archiers i estoient demoret. Si se trouvèrent les François et les Bretons, qant il furent là tout assamblé, plus de douse mille, et ne sejournèrent point longement devant, qant il le conmenchièrent à asallir. Fº 90.

P. 18, l. 4: li envieus en parloit.—Mss. A 1 à 33: les ennemis en parloient. Fº 104 vº.

P. 18, l. 15: plus de douze mille.—Ms. B 6: bien cinq mille. Fº 122.

P. 18, l. 17 et 18: Biaumanoir.—Mss. A 8, 9, 15 à 17: Beaumont. Fº 95 vº.—Mss. A 20 à 22: Beauvaiz. Fº 155.

§ 192. P. 18, l. 21: Quant.—Ms. d’Amiens: Quant messires Robiers d’Artois se vit assegiéz dedens Vennes, si ne fu mies esbahis de lui tenir vassaument et de deffendre le chité. Li Breton qui devant estoient, comme tout fourssenet de ce, che leur sambloit, que perdu l’avoient, s’aventuroient à l’assaillir durement et corageusement, et se hastoient d’iaux aventurer, par quoy chil qui seoient devant Rennes et chil qui estoient dedens Hainbon, ne leur venissent pour yaux brisier leur emprise. Dont il avint que li Breton estaublirent et liv[rè]rent ung tel assault, si dur et si bien ordonné, et si corageusement s’i esprouvèrent li assallant, chevalier et escuier et meysmement li bon homme dou pays, et tant donnèrent affaire à chiaux de dedens, qu’il concquissent les baillez et puis le porte, et entrèrent ens par force et par proèce, volsissent ou non li Englès, et furent mis en cace. Et mout y eut adonc d’Englès mors et navrés, et par especial messires Robers d’Artois fu durement navrés, et à grant meschief mis hors de le presse et sauvés de ses gens, et l’enportèrent vers Hainbon. Ossi à grant meschief se sauva messires Richars de Stamfort. Et là fu ossi navrez li sirez Despenssiers, un grans barons d’Engleterre, et pris de monseigneur Hervi de Lion et siermentés à prison, mès il ne vesqui despuis que troix jours.

Enssi que je vous compte, par assaut et par biau fet d’armes fu la cité de Vennes reconcquise, et mis et cachiet hors ou pris tous li Englès qui s’i tenoient. Et fu messires Robiers d’Artois aportés durement blechiés et navréz à Hainbon, de quoy la comtesse de Montfort fu durement courouchie, et ossi furent tout li baron et li chevalier d’Engleterre qui là estoient. Ceste nouvelle s’espandi parmy le pays que la cité de Vennes estoit reprise, et messires Robert d’Artois navrés à mort et pluisseur aultre. Si furent grandement resjoy cil qui devant en avoient estet courouciet, et meysmement messire Charle de Blois: che fu bien raisons.

Li Englès qui assegiet avoient la chité de Rennes, entendirent ces nouvelles. Si en furent moult dolent, et plus de le navreure monseigneur Robiert d’Artois, que de la prisse de Vennes. Nonpourquant il ne veurent mies brisier leur siège, ains le renforcièrent de jour en jour, car chil qui escappet estoient de Vennes, se traioient celle part, et ossi la comtesse de Montfort y envoya grans gens. Si devés savoir que messires Robiers d’Artois depuis ne vesqui nient plentet, ains trespassa de che siècle et ordonna qu’il fuist rapportez à Londres. Là fu il ensevelis. Enssi morut li dessus dis messires Robers, qui fu moult gentilz et haus homs et de noble lignie, qui premierement mist le guerre entre le roy de Franche et le roi d’Engleterre.

Quant li roys englès seut que ses oncles messires Robiers d’Artois estoit mors et par le bleçure qu’il avoit euv à Vennes, si fu trop durement courouchiéz, et dist qu’il n’entenderoit jammais à autre cose, si l’aroit vengiet. Auques nouvellement estoit la trieuwe fallie entre lui et le roy de France, celle qui avoit estet premeute et pourparlée devant Tournay et confremée en la chité d’Arras. Si fist li roys englès tantost escripre lettrez et mander par tout son royaume que chacuns, noblez et non noblez, fust appareilliés pour mouvoir avoecq lui au chief dou mois, puis fist grans pourveanches de naves et de vaissiaux et de touttez autres coses. Au chief del mois, il se mist en mer à grant navie et vint prendre port assés priès de Vennes, là où messire Robiers d’Artois et se compaignie avoient l’autre fois arivet, puis descendi à terre; et missent hors des vaissiaux premierement leurs chevaux et touttes leurs pourveanches, et puis s’aroutèrent et chevaucièrent deviers Vennes. Bien estoient quinze cens hommes d’armes et cinq mil archiers. Fº 77.

—Ms. de Rome: Qant mesires Robers d’Artois se vei assegiés dedens Vennes, si ne fu pas trop hesbahis de soi tenir vassaument et de deffendre la chité. Li Breton qui devant estoient, conme tout foursenet de ce que lor sambloit que perdu l’avoient si simplement, s’aventuroient durement à l’asallir corageusement, et se doubtoient que par force de gens d’armes et d’archiers, fust de nuit ou de jour, on ne venist lever le siège. Pour ce se delivroient il de faire lor [emprise] dou plus tos que il pooient, et estoient priès nuit et jour tout dis en armes. Et par especial il i ot un assaut si dur et si fort et si bien continuet que, de force et par biau fait d’armes, les bailles de l’une des portes furent conquises et copées. Adonc vinrent toutes gens d’armes si efforciement à la porte où li Englois estoient, qui ouverte l’avoient, pour livrer deffenses as bailles, que de fait et de force il efforcièrent les Englois; et entrèrent li asallant en Vennes, vosissent ou non li deffendant. Si estoient là present messires Robers d’Artois et sa banière, li sires Espensiers et sa banière; mais on voelt dire que chil de la ville rendirent grant painne à ce reconquès, et se tournèrent avoecques les François. Là furent navré durement li sires Espensiers, et aussi fu mesires Robers d’Artois et biau cop d’aultres. Et là furent pris mesires Richars de Stanfort et mesires Jehans de Lille, et aussi fu messires Edouwars li Espensiers. A grant meschief se sauvèrent mesires Robers d’Artois et li aultre, et issirent par une posterne et vinrent à Hainbon.

De ces nouvelles et dou reconquès de la chité de Vennes furent la contesse et tout chil de sa partie courouchié et à bonne cause, mais amender ne le porent. Li sires Espensiers, tous prisonniers à mesire Hervi de Lion, des plaies que il ot morut. Mesires Robers d’Artois onques ne pot estre bien sanés de une plaie que il ot ou chief, et li prist volenté de retourner en Engleterre, et ot un sauf conduit de mesire Carle de Blois, lui dousime de chevaliers. Si monta en mer li dis mesires Robers, bien accompagniés de chevaliers et d’esquiers, dont il fist folie, car encores n’estoit il pas bien sanés. Et sus la mer, pour la marine, ses plaies s’esmurent tellement et si le ragrevèrent que, li retourné en Engleterre, il ne vesqui point depuis longement, mais morut. De laquelle mort li rois d’Engleterre fu moult courouchiés, et s’en vesti de noir, et ses ainnés fils li princes de Galles et li contes Derbi; et fu ensepvelis moult solempnement as Augustins en la chité de Londres, et là li fist on son obsèque moult reveranment. Et y furent li rois et la roine d’Engleterre et leurs fils li princes, et tout li prelat et li baron d’Engleterre, qui pour ces jours estoient en Engleterre. Assés tos apriès fu fais aussi li obsèques dou signeur Espensier, mesires Edouwars; et demorèrent de li quatre fils, Edouwars, Hues, Thomas et Henris. Et furent depuis li troi, chevaliers, et Henris, evesques de Nordvich; et fu lor mère fille au signeur de Ferrières d’Engleterre.

Moult fu li rois d’Engleterre courouchiés de la mort mesire Robert d’Artois, et dist et jura que jamès n’entenderoit à aultre cose si aueroit esté en Bretagne, car li contes de Monfort avoit relevé la ducée de Bretagne de li, lequel, à tort et à pechié, ensi que on l’avoit enfourmé, li rois Phelippes et li François avoient enprisonné à Paris ou chastiel dou Louvre et là tant tenu que il i estoit mort; et aussi il avoit eu en couvenant à la contesse de Montfort, que il la reconforteroit, puis que il li besongnoit. Et fist faire tantos grant amas de naves et de vassiaus et de nefs passagières, et traire viers les pors de Pleumude, de Wesmude et de Dardemude, et fist un moult grant mandement de gens d’armes et d’archiers. Entrues que li rois d’Engleterre ordonnoit ses besongnes et asambloit ses gens, li Englois qui estoient demoret en Bretagne dalés la contesse de Montfort, s’en vinrent mettre le siège devant la chité de Rennes, et encloirent dedens des bons chevaliers et esquiers qui vaillanment s’i portèrent.

Li rois d’Engleterre entra en mer à deus mille honmes d’armes et siis mille archiers. Et se departirent tout d’une marée et des havenes desus nonmés ses gens, et singlèrent viers Bretagne et costiièrent Normendie et les isles de Grenesée et de Breha, et vinrent tout de une flotte moult priès de Hainbon et de Vennes, dont tout chil qui tenoient la partie la contesse de Montfort, furent tout resjoï, et chil de par mesire Carle de Blois tout courechié, car il estoit venus à si grant poissance que pour tout cachier devant lui. Et ariva li dis rois d’Engleterre à Hainbon. La contesse de Montfort vint à l’encontre de li et le rechut ensi que on doit recevoir son signeur, et le mena logier ou chastiel. Li dis rois d’Engleterre demanda à la contesse de ses chevaliers où il estoient, pour ce que nuls n’en veoit ne trouvoit. Elle respondi et dist que tout estoient alé, bien avoit un mois, au siège devant Rennes. De ce se contenta li rois et respondi que il faisoient bien, car gens d’armes en pais de gerre ne doient point estre wiseus. F^os 90 vº et 91.

—Ms. B 6: Adonc fist li rois ung grant mandement et asambla quatre mille hommes d’armes et huit mille archiés, et fist faire toutes ses pourveanches à Hantonne, et là trouva sa navire toute preste. Alors le roy monta en mer et avecque lui le conte Henry Derby, le conte d’Arondel, le conte de Wervich, le conte de Herfort, le conte de Northantonne, le conte d’Aresselles, le sire de Persy, le sire de Ros, le sire de Felleton, le sire de Luzy, le sire de Noefville et pluiseurs grans barons d’Engleterre. Sy nagèrent tant qu’il arivèrent en Bretaigne à Saint Mahieu de Fine Posterne en Bretaigne bretonnant, et issirent de leurs batieaulx. Et furent les seigneurs cinq jours en la dite ville en eulx rafresquissant, et tant que leur nefz furent toutes deschergies; et puis montèrent et se mirent à chemin pour venir devers la cité de Vennes. Fº 223 et 224.

P. 19, l. 13 et 14: Richars de Stanfort.—Mss. A 1 à 22: le baron de Stanfort. Fº 104 vº.

P. 20, l. 7: à Saint Pol.—Ms. B 6: à l’eglise des Augustins. Fº 223.

P. 20, l. 23: au chief dou mois.—Mss. A 1 à 6, 11 à 14, 18, 19: avant un mois. Fº 105.—Mss. A 20 à 22: dedens ung moys. Fº 156.—Mss. A 23 à 29: à la fin du mois. Fº 122.

P. 20, l. 25: Au chief dou mois.—Mss. A 23 à 29: au bout du moys. Fº 123.

§ 193. P. 21, l. 4: Tant esploita.—Ms. d’Amiens: Si vint li roys devant Vennes et l’asega, monseigneur Olivier de Clichon dedens et monseigneur Hervy de Lion et pluisseur autre gentilhomme dou pays ossi, qui estoient de le partie monseigneur Carle de Blois. Quant la comtesse de Montfort sceut la venue dou roy englès, elle se parti de Hainbon en le compaignie monseigneur Gautier de Mauny et de monseigneur Yvon de Tigeri, et s’en vint devant Vennes veoir le roy, et li fist grant chière. Li roys le rechupt liement et doucement, enssi que bien le savoit faire.

Quant messires Charles de Blois, qui se tenoit au Suseniot, entendi ces nouvellez que li rois englès estoit arivés en Bretaingne si efforciement que pour reconcquerre ce qu’il tenoit et avoit concquis sour le comtesse de Monfort, si escripsi erranment lettrez et prist especials messages, et les envoya deviers le roy de Franche son oncle, en lui suppliant que il le volsist aidier et envoiier gens d’armes pour deffendre son pays et resister contre le puissance le roy englès. Quant li roys Phelippes eut veut les lettrez que ses nepveux li envoioit, et oy les messages qui l’emfourmoient de la force au roy englèz, si dist qu’il y entenderoit vollentiers, car ce estoit raison, pour secourir son neveult, qui tenoit en fief et en hoummaige la duchié de Bretaingne de lui. Si manda tantost le duc de Normendie, son ainnet fil, qui lors estoit à Roem, qu’il venist vers lui, et li escripsi le coppie des lettrez de monseigneur Carle de Blois, son cousin, affin qu’il se hastast et se pourveist de gens d’armes de Normendie et des basses marches.

Entroes que chil mesage allèrent et vinrent, li roys englès qui seoit devant Vennes, ardoit et essilloit le pays d’environ; et devant che ossi qu’il y venist, il estoit durement ars et gastéz et foulléz de tous costéz, tant qu’il euissent eu deffaulte de vivres, se il n’en ewissent amenet avoecq yaux grant fuisson d’Engleterre. Si y fist li roys englès, le siège durant, maint assault et mainte escarmuche, et moult dounna chiaux de Vennes affaire; mès la cité estoit forte et bien pourveue de gens d’armes et de toutte artillerie: si en estoit plus aisieule à deffendre. Fº 77 vº.

—Ms. de Rome: Si issirent les Englois petit à petit des vassiaus et se rafresqirent ou pais de la contesse. Et puis se ordonnèrent par le commandement dou roi, et se departirent un jour, et vinrent tout ensamble mettre le siège devant la chité de Vennes; et encloirent dedens bien deus cens cevaliers et esquiers, des quels mesires Oliviers de Cliçon, mesires Hervis de Lion, mesires Joffrois de Mailatrait, li viscontes de Rohen et li sires de Roce Tisson estoient chapitains et gardiiens. Si constraindirent li Englès et li Breton moult fort la chité de Vennes, et moult songneusement l’asallirent le terme que il furent par devant; mais elle estoit si bien pourveue et garnie de bonnes gens d’armes et de vaillans honmes les chapitains, que petit i conquissent. Fº 91 vº.

§ 194. P. 22, l. 23: Quant li rois.—Ms. d’Amiens: Quant li roys englès vit la cité si forte et bien furnie de gens d’armes et vit le povreté dou pays, il penssa bien qu’il ne poroit le chité avoir si tost concquise que de premiers il cuidoit. Et si avoit bien entendu que li comtez de Sallebrin, li comtes de Sufforch, li comtes de Pennebruch, li comtes de Cornuaille et li autre seigneur seoient devant Rennes, et avoient jà sis bien deux mois, et y avoient souvent assailli et peu fait, car la cité estoit bien garnie de gens d’armes et de touttez aultrez pourveanchez: si s’avisa li roys englèz qu’il yroit veoir ses gens que, grant temps a, n’avoit veut, et laisseroit partie de ses gens devant Vennes. Si ordounna le comte de Warvich, le comte d’Arondiel, le baron de Stamfort et monseigneur Gautier de Mauni à tenir le siège devant la dessus dite chité à cinq cens hommes d’armes et mil archiers. Puis se parti li roys et prist en se compaignie monseigneur Yvon de Tigeri et aucuns chevaliers de Bretaigne, pour lui enseignier les chemins, et le remanant de son host: bien estoient mil hommez d’armes et quatre mil archiers; et chevaucha tous ardans et essillanz le pays d’un lés et d’autre, et fist tant qu’il vint devant Rennes où il fu moult liement veus et recheus.

Quant messires Carlez de Bois sceut que li roys englès chevauchoit, si se parti dou Suseniot et s’en vint à Nantez, où il trouva monseigneur Loeys de Poitiers, comte de Vallenche, qui là estoit à grant gens d’armez, car il l’i avoit establi. Si entendirent chil seigneur es murs et as deffensses de le cité, et le remparèrent de tous poins et pourveirent d’artillerie et de tous vivrez, car bien penssoient que li roys englès les venroit veoir et espoir assegier.

Quant li roys Edouwars eut estet une espasse, environ cinq jours, avoecq ses gens devant le chité de Rennez, il entendi que messires Carlez de Blois estoit dedens Nantez et faisoit là son amas de gens d’armes. Si se avisa qu’il yroit celle part pour combattre à yaux, ou il lez assiegeroit dedens la cité meymez. Si s’esmut à l’onzime jour pour aller celle part, et leissa tous quois ses gens seans par devant Rennez; et chevauça tant, tout ardant et gastant le pays, que il vint devant la cité de Nantes. Et lui venu par devant, à une matinée, il fist ses gens bellement rengier et ordonner sus une montaigne assés priès de la cité, et là furent jusquez à haulte nonne, atendans que messires Carlez de Blois isist contre yaux; mès il ne le trova mies en son consseil. Si envoia li roys ses coureurs courir devant, qui ardirent les fourbours de le chité; et quant il vit qu’il ne les atrairoit point hors, il se loga assés priès de Nantez à siège fet bien ordonneement. Et messires Carles de Blois envoioit souvent messagiers deviers le roy son oncle, en lui segnefiant l’estat de ses ennemis: de quoy li roys de Franche, pour conforter son neveult, avoit fait ung très grant et especial mandement à tous noblez et non nobles de son royaumme, que il sieuwissent le duc de Normendie, son fil, chacuns o tout son effort, qui s’en alloit en Bretaingne. Si s’adrecièrent deviers ce cemin, duc, comte, baron, chevalier et touttez mannierrez d’autrez gens de qui on se pooit aidier en gherre. Li dus de Normendie s’en vint en le cité d’Angiers, et là s’aresta, atendans ses gens qui venoient. Et li comtes Loeys de Blois passa oultre à bien trois cens lanches, et s’en vint à Nantes deviers monseigneur Carlon, son frère, pour lui aidier à deffendre et garder le chité contre les Englès. F^os 77 vº et 78.

—Ms. de Rome: Quant li rois d’Engleterre vei che que point ne conquerroit la chité de Vennes legierement, et entendi que li pais de environ Vennes estoit si gastés et si mengiés que on ne trouvoit riens sus les camps, ne li coureur et varlet ne savoient où aler fouragier, et se tenoit là une moult grande hoost, il eut consel que il laisseroit là devant Vennes une partie de ses gens pour tenir le siège, et ils et li demorans de son hoost chemineroient oultre, et iroient mettre le siège devant la chité de Nantes, et là enclore mesire Carle de Blois: si se departi un jour de devant Vennes et i laissa à siège le baron de Stanfort, mesire Gautier de Mauni et pluisseurs aultres. Et estoient chil qui demorèrent environ cinq cens lances et douse cens archiers. Et puis se departi li rois o le demorant de son hoost, et estoient environ douse cens lances et vingt cinq cens archiers. Et ceminèrent tant avant et arrière que il vinrent devant Nantes, là où mesires Carles de Blois et sa fenme et si enfant estoient, et grant fuisson de bonne chevalerie de Bretagne, qui tenoient sa partie, de France et de Normendie, qui l’estoient venu servir.

Si mist là li rois d’Engleterre le siège et le asega d’un lés, car toute la chité de Nantes ne pooit il pas enclore, pour la cause de la rivière de Loire. Trop i faudrait de peuple, qui tout ce vodroit faire. Et avoient li Nantois et li François, qui là dedens se tenoient, lor issue et entrée, toutes fois que il voloient, au lés deviers Poito; et par là estoient il rafresqi de pourveances et de gens d’armes et de tout ce que il lor besongnoit.

Ensi se tint en celle saison li rois d’Engleterre devant la bonne chité de Nantes, et mesires Carles de Blois estoit dedens, et estoient bien cinq cens armeures de fier. Et encores i retournèrent mesires Lois d’Espagne, mesires Carles Grimaus, mesire Othon Doriie et Toudou, qui toute la saison s’estoient tenu sus la mer et riens n’i avoient fait, fors desrobé les marceans, otant bien ceuls de lor costé conme les aultres, qant il les avoient trouvé sus la mer, car Espagnols, Geneuois, Bretons et Normans, esqumeurs de mers, n’ont nulle consience à mal faire.

Mesires Lois d’Espagne et chil de sa route estoient arivé et venu en Garlande, et par les terres deviers Poito entré en la chité de Nantes. Et trop bien vinrent à point pour aidier à deffendre et garder Nantes des grans assaus et envaies que les Englois et les Bretons, qui tenoient la partie de la contesse de Montfort, i faisoient, car tous les jours continuelment i avoit assaut ou escarmuce.

Mesires Carles de Blois escripsoit et segnefioit souvent son estat à son chier oncle, le roi de France, et à son cousin germain, le duch de Normendie, qui moult l’amoit, et à son oncle, le conte Carle d’Alençon. Chil troi entendoient bien as lettres et priières que mesires Carles leur faisoit, mais pour ce temps la cours du roi de France estoit si lontainne en tous explois que on n’en pooit avoir nulle delivrance, jà seuissent ils li rois et ses consauls que ses adversaires li rois d’Engleterre estoit, à poissanche de gens d’armes et d’archiers, en Bretagne, et que sa venue et son afaire pooit trop grandement adamagier le roiaulme de France: si ques ordonné fu et commandé de la bouce dou roi que son fils, li dus de Normendie, fesist son amas et assamblée de gens d’armes et se mesist à poisance sus les camps, et alast au devant des Englois qui estoient venu en Bretagne.

Li dus Jehans de Normendie, de bonne volenté, obei à l’ordenance dou roi son père, et fist son mandement par tout le roiaulme de France à estre à tel jour qui nonmés estoit, à Angiers et au Mans; et s’estendoient li mandement que li rois de France mandoit, pour estre plus diligent de venir. F^os 91 vº et 92.

P. 23, l. 3 et 4: et les deux frères de Pennefort.—Mss. A 1 à 6, 11 à 14, 23 à 33: messire Richart de Rochefort. Fº 105 vº.—Mss. A 7 à 10, 15 à 22: monseigneur Gerart de Rochefort. Fº 100 vº.

P. 23, l. 12: cinq.—Mss. A 8, 9: quinze. Fº 97.—Mss. A 15 à 17: cinq ou six. Fº 107.

P. 23, l. 32: fourbours.—Mss. A 1 à 6, 8 à 29: faubours. Fº 106.

§ 195. P. 24, l. 1: Ensi se tint.—Ms. d’Amiens: Entroes que ces assamblées se faisoient, se tenoit li roys englès devant la cité de Nantez et l’avoit assegiet de l’un des costéz, et y faisoit souvent assaillir et escarmuchier et esprouver ses gens; mès en tous ses assaulx peu y concquist, ainschois y perdi pluisseurs fois moult de ses hommez, chevaliers et escuiers, dont il estoit moult courouchiéz. Quant il vit que par assault il ne le conqueroit point et que messires Carles de Blois n’isteroit point as camps pour lui combattre, si s’avisa qu’il lairoit là le plus grant partie de ses gens à siège, tant qu’il oroit autres nouvellez, et se trairoit deviers le bonne ville de Dinant. Si ordonna le comte de Kenfort, messire Henry, viscomte de Biaumont, le seigneur de Perssi, le seigneur de Ros, le seigneur de Montbray, le seigneur de le Warre, monseigneur Renault de Ghobehen, monseigneur Jehan de Lille à yaux là demourer et tenir le siège à cinq cens armures de fer et deux mil archiers; et puis cevauça o le demorant. Si pooit avoir environ quatre cens lanchez et deux mil archiers, tout ardant et exillant le pays de Bretaingne de l’un léz et d’autre, tant qu’il vint devant le bonne ville de Dinant, dont messires Pière Porteboef estoit cappittainne. Quant il parfu venus devant Dinant, il mist le siège tout environ et le fist fortement assaillir; et cil qui dedens estoient, ossi entendirent à yaux deffendre. Enssi assiega li roys englès, tout en une saison et à ung jour, en Bretaingne, troix chitéz et une bonne ville. Fº 78.

—Ms. de Rome: Si se apparilloient toutes gens d’armes des lontainnes marces de Flandres, de Hainnau, de Tournesis, d’Artois, de Vermendois, d’Amiennois, de Biauvesis, de Pontieu, de Corbiois, de Normendie et de toutes les marces et limitations de France, de Bar, de Lorrainne, de Bourgongne, de Campagne, de Berri, de Poito et de Tourainne; et tout s’avaloient sus les basses marces viers le Mans et viers Angiers. Si ne furent pas sitos venu ne assamblé, et entrues avinrent pluisseurs avenues et fais d’armes en Bretagne. Car, qant li rois d’Engleterre vei que point il ne venroit à son entente de la chité de Nantes, et que trop fort elle estoit pourveue de gens d’armes, et se ne lor pooit on oster l’entrée et l’issue de Poito, de Saintonge et de la Rocelle, par lequel lés il estoient dedens Nantes tous les jours rafresqi, il eut consel que il lairoit là le conte Derbi, le conte de Honstidonne, le signeur de Bercler, mesire Thomas de Hollandes et cinq cens armeures de fier et quinse cens archiers, qui tenroient le siège avoecques les Bretons de lor partie, et il s’en iroit à tout cinq cens armeures de fier et douse cens archiers esbatant parmi Bretagne et veoir ses gens devant la chité de Rennes, et sentir d’aultre part se riens il poroit conquerre, car trop li anoioit à estre longement sus une place et riens faire. Et se secours ou gens d’armes venoient en France et s’avaloient en Bretagne pour li conbatre, de ce seroit il tous resjois, et aueroit tantos toutes ses gens remis ensamble. Et tout ce li consilloient ausi à faire chil qui li estoient le plus proçain.

Si se departi li rois d’Engleterre de devant Nantes en l’estat et ordenance que je vous di, et se mist au cemin pour venir devant Rennes veoir ses gens. Et tant esploita que il vint, et le veirent volentiers tout chil qui là estoient, ce fu raisons; et se tint cinq jours devant la chité de Rennes, et au sisime il s’en departi et s’en vint mettre le siège devant Dignant en Bretagne.

Ensi tint li rois d’Engleterre en celle saison quatre sièges en Bretagne, à Nantes, à Vennes, à Rennes et à Dignant; et à casquns de ces sièges i avenoient tous les jours escarmuces, envaies ou assaus. Fº 92.

P. 24, l. 21: Si ordonna.—Ms. B 6: Sy ordonna à demorer devant Nantes le conte d’Arondel, le conte de Wervich, le conte de Hantitone, le sire de Persy, le sire de Montbray, le sire de Felleton, le sire de Luze et mille hommes d’armes et deux mille archiers. Fº 227.

P. 24, l. 24: Renault de Gobehen.—Mss. A 1 à 6, 11 à 14, 18 à 23: Jehan de Gobehen. Fº 106.

P. 24, l. 26: six cens.—Mss. A 1 à 6: cinq cens. Fº 106.

P. 25, l. 5: luy et ses gens.—Mss. A 1 à 6: que lui, que ses gens. Fº 106.

§ 196. P. 25, l. 7: Entrues que.—Ms. d’Amiens: Entroes que li roys englès alloit et venoit et chevauchoit le pays de Bretaingne, ses gens qui seoient devant la cité de Vennes, y faisoient et livroient tous les jours tamaint assault, car durement le convoitoient à gagnier par fet d’armes, pour ce que li seigneur qui dedens estoient, l’avoient en celle meysme saison reconcquis sus yaux. Dont il avint ung jour entre les autres que à l’une des portez ungs très grans assaux se fist, et se trayrent de celle part touttes lez bonnes gens d’armes de l’un léz et de l’autre. Et là eult mainte belle appertise d’armes fet; car chil de dedens avoient, comme bon chevalier et hardi, ouvert leur porte, et se tenoient à le barrière pour le cause de che qu’il veoient le bannierre le comte de Warvich, le comte d’Arondiel, le baron de Stanfort, monseigneur Gautier de Mauni, monseigneur Guillaume Fil Warinne, monseigneur Thummas de Hollandes et pluisseurs autrez qui là se tenoient et abandonnoient: de quoy messires Oliviers de Clichon et messires Hervis de Lion et li autre chevalier plus corageusement s’i aventuroient, car gentil homme contre gentil homme c’est droite parchons. Là y eut fet tant de biaux fèz d’armes que merveillez seroit à recorder, car li Englès, qui veoient le porte toutte ouverte, le tenoient en grant despit et à grant orgueil et à grant vaillandise, et si veoient le seigneur de Clichon, monseigneur Hervy de Lion et lez autrez chevaliers qui merveillez d’armes y faisoient. Finablement chilx assaux se porta tellement que de premiers li Englès furent recullet et moult arrière des bannièrez reboutet: ne say se il le fissent par malisce ou pour atraire chiaux de dedens. Mès à ce que li seigneur d’Engleterre reculèrent, li seigneur de Bretaigne s’avanchièrent et ouvrirent leur baille, chacun son glaive en son poing, et laissièrent six chevaliers pour garder le baille avoecq grant fuisson d’autrez gens; et puis, tout à piet en boutant et en lançant, il poursuivirent les seigneurs d’Engleterre qui, tout en recullant, se combatoient. Là eut très bon pugneis, fors bouteis des glaives et tamaintez belles appertisses d’armes faittez. Touttesfois, li Englès moutepliièrent et fortefiièrent; et convint les Bretons reculler, et non pas si rieuleement comme il estoient avallet. Là eut grant lutte et dur estekis des glaives, et maint homme blechiet et reverset. Quant chil qui gardoient le barière, virent lors gens cachier et reculler, il retraissent lez baillez avant et si mal à point que il convint monseigneur de Clichon demourer; et fu pris devant le barrière, et ossi fu messires Hervis de Lion. D’autre part, les Englès qui estoient monté vistement, et tout premiers li sirez de Stanfort et se bannierre, furent enclos entre le porte et lez baillez, et ne les peult on onques aidier que il ne fuissent pris ou mort; et fu li sirez de Stanfort pris pour prisonniers, et pluisseur de son hostel qui estoient dalléz lui. Adonc rentrèrent il dedens la chité de Vennes et refremèrent le porte, et cessa li assaux qui longement et en grant avanchement d’armes avoit duret. Fº 78.

—Ms. de Rome: Entrues que li rois d’Engleterre aloit, venoit et cevauçoit le pais de Bretagne, ses gens qui se tenoient devant la chité de Vennes, i livroient et faisoient là tous les jours tamains assaus, car moult le convoitoient à gaegnier par fait d’armes, pour tant que li chevalier qui dedens estoient, l’avoient en celle meisme saison reconquis sus euls.

Donc il avint un jour, le siège pendant, que à l’une des portes uns très grans assaus se fist, et se traissent de celle part toutes les bonnes gens d’armes, de l’un costé et de l’autre. Et là ot tamainte belle apertisse d’armes fait, car chil de Vennes avoient, conme vaillans gens et qui desiroient les armes, ouvert la porte; et estoient issu et venu as barrières, et là se tenoient, pour la cause de ce que il veoient les banières dou conte de Warvich et dou conte d’Arondiel et dou baron de Stanfort et de mesire Gautier de Mauni, qui se abandonnoient, ce lor estoit avis, assés follement. De quoi li sires de Cliçon et mesires Hervis de Lion et li aultre chevalier de lor costé plus corageusement s’en aventuroient. Là i furent faites tantes de belles apertises d’armes que mervelles seroit à recorder. Les Englois, qui veoient la porte ouverte, le tenoient en grant orguel et presomption, et li aultre le tournoient à grant vaillance. Là ot lanciet, pousset, ferut, batut et escarmuchiet, d’un lés et de l’aultre, moult longement. Et se portèrent ces envaies de premiers tellement que li Englois furent reboutet et reculet. Et li auqun voellent dire que il le fissent par malisce, pour mettre les François hors de lors pas et laisier les bailles et avaler aval. Et en avint que, en boutant et en requlant les Englois, il eslongièrent si lors bailles que, qant il vodrent retourner et monter amont, on les carga d’un trop grant faix, car mesires Gautiers de Mauni et li aultre qui là estoient, s’efforchièrent tout de grant volenté. Et vinrent une route d’Englois sus le costé, et se boutèrent entre les bailles et les François qui estoient trop avant passé. Là eut très dur hustin et grande escarmuce. Li visconte de Rohem et mesires Guis de Lohiac, mesires Joffrois de Malatrait et li sires de Tournemine estoient as barrières et les deffendoient et gardoient moult vaillanment. Et qant il veirent venir sus euls l’effort [de ceuls] qui rendoient grant painne à conquerir les barrières, il se doubtèrent que il ne fuissent efforchiet; si cloirent lors barrières, et se tinrent entre la porte et la barrière. Encores avoecques le signeur de Cliçon et mesire Hervi de Lion, qui faisoient ces apertises d’armes, en i avoit de lors gens enclos plus de soissante qui moult vaillanment se conbatoient.

Qant li Englois veirent que les barrières estoient fremées, et li sires de Cliçon et mesires Hervis de Lion enclos entre euls et les barrières, si rendirent grant painne au bien conbatre, et dissent entre euls: «Nous serons lasques gens et mal conbatant, se chil doi baron de Bretagne ne nous demeurent, qant nous avons si grant avantage sus euls.» Adonc les envairent ils de grant corage, et furent par force d’armes lors banières conquises et abatues, et li doi chevalier [pris] et fianchiet de mesire Gautier de Mauni. Il ot en sa pareçon le signeur de Cliçon; et li contes de Warvich, mesire Hervi de Lion; et li François devant les barrières prissent le baron de Stanfort et mesire Jehan de Lille. Ensi se portèrent les pareçons. Et soustinrent là li François un grant faix contre les Englois et se departirent de l’assaut, et se retraist casquns deviers ses gens à tout lors prisonniers; et entendirent à mettre à point les bleciés, dont il en i ot grant fuisson, tant des François conme des Englois.