VARIANTES. (continued 6)

Li rois Phelippes et li signeur de France, qui se amassoient à Paris et venoient de tous costés, avoient grant mervelle de ce que les Englois faisoient. Et disoient ensamble li auqun: «Mervelles est dou voiage des Englois. Que pensent il à devenir, ne où quident il passer la rivière de Sainne?» Disoient à aultre qui respondoient à ce pourpos: «Il iront passer en Bourgongne, qui ne lor ira aultrement au devant.»—«Que on conmence donc! respondoient li aultre; il n’est point en lor poissance de faire ce voiage: il seront avant conbatu quatre fois.» Or fu on moult esmervilliet à Paris, qant les nouvelles i vinrent que les Englois avoient refait le pont à Poisi, et estoient tout passé la rivière de Sainne. Donc fu conmune renonmée que les Englois venroient devant Paris. Donc se departi li rois Phelippes à toute sa cevalerie que il avoit très grande, et s’en vint à Saint Denis. De quoi li bourgois de Paris furent tout esbahi, mais il leur fist dire et semer paroles que il se departoit pour aler au devant des Englois et euls combatre; et parmi tant, li peuples de Paris s’apaissa. Et li rois d’Engleterre se tint à Poissi cinq jours, et fu là le jour de la Nostre Dame mi aoust, et tint court solempnèle en l’abeie des Dames de Poisi, et sist à table en draps vermauls d’escarlate, fourés d’ermine, et en sourcot sans mances, et tint son estat roial de toutes coses, aussi bien ou mieuls que il fust en Engleterre.

Qant li rois d’Engleterre ot esté à Poisi les Dames, cinq jours, et ils et ses gens s’i furent rafresqi, il s’en departirent et cevauchièrent oultre en aproçant Paris. Messires Godefrois de Harcourt, li contes de Warvich, messires Renauls de Gobehem et messires Thomas de Hollandes menoient l’avantgarde, et cevauçoient à tout cinq cens lances et douze cens archiers, et ardoient et essilloient tout le pais devant euls. Et avoient ars les Englois, estans euls à Poisi les Dames, Saint Germain en Laie, la Montjoie, Saint Clo et Boulongne, et courut jusques ens ès fourbours de Paris. Et pour ce avoient esté li Parisien si esbahi, car adonc Paris n’estoit noient fremée fors de kainnes, et furent adonc toutes levées et sierées, qant li rois fu partis et venus à Saint Denis. F^os 114 et 115.

P. 147, l. 28: soissante.—Mss. A 1 à 6, 11 à 14, 18 à 22: quarante. Fº 138 vº.

P. 148, l. 7 et 8: l’un à l’un des lés et l’autre à l’autre lés.—Mss. A 1 à 6, 8, 11 à 22: l’un d’un costé et l’autre d’autre. Fº 139.—Mss. A 23 à 33: l’ung à dextre et l’aultre à senestre. Fº 159.

P. 148, l. 10 et 27: voir Sup. var. (n. d. t.)

P. 148, l. 12: Louviers.—Mss. A 23 à 33: Loviers.—Mss. A 20 à 22: Louvres. Fº 201 vº.

P. 148, l. 30: de Dreus.—Mss. A 1, 3: d’Evreux.

P. 148, l. 31: Roem.—Mss. A 1 à 7: Rouen. Fº 139.—Mss. A 20 à 22: Rouan. Fº 202.

P. 148, l. 32: Vrenon.—Mss. A 1 à 6, 8 à 22: Vernon. Fº 139.—Mss. A 7, 23 à 33: Gysors. Fº 133, en marge. Vernon a été effacé dans le texte du ms. A 7.

P. 149, l. 2: Vrenuel.—Mss. A 1 à 6, 8 à 14, 18 à 22: Viennel. Fº 139.—Mss. A 15 à 17: Vernonnel. Fº 140 vº.—Mss. A 7, 23 à 33: Vernon. Fº 133.

P. 149, l. 4: Mantes.—Les mss. A 20 à 22 ajoutent: à chevas. Fº 202.

P. 149, l. 5 et 6: Roleboise.—Mss. A 11 à 14: Roloboise. Fº 133 vº.—Mss. A 20 à 22: Roseboise. Fº 202.—Mss. A 23 à 29: Roulleboise. Fº 159.

P. 149, l. 10: estaches.—Mss. A 11 à 14, 18, 19, 30 à 33: ataches. Fº 133 vº.—Mss. A 20 à 22: estançons. Fº 202.

P. 149, l. 15: Boulongne.—Mss. A 7, 20 à 33: petite Bouloigne. Fº 133.

P. 149, l. 16 et 25 et p. 150, l. 16: voir Sup. var. (n. d. t.)

§ 264. P. 150, l. 17: Ensi que.—Ms. d’Amiens: Ensi que li roys englès chevauchoit et qu’il aloit, son host traynant, messires Ghodeffroix de Harcourt, ses marescaux, qui chevauchoit d’un costet et faisoit l’avangarde à tout cinq cens hommez d’armes et douze cens archiers, encontra grant fuisson de bourgois d’Amiens à cheval et à piet et en grant arroy et riche, qui s’en alloient au mandement dou roy Phelippe, vers Paris. Si les courut sus messires Godeffroys et se routte, et les assailli vighereusement; et chil se deffendirent ossi assés vassaument, car il estoient grant fuison et de bonne gent et friche et bien armet. Là eut grosse bataille et dure et qui dura longement, et mainte belle rescousse, car chacuns se prendoit priès de bien faire le besoingne. Finablement, li bourgois d’Amiens furent là desconfit, tout mort et tout pris; peu en escappa. Et perdirent tuit leur charoy, leur arroy et leurs pourveanches qui estoient grandez et grossez; et en y eut bien mors sus le place douze cens. Et retourna li dis messires Godeffroys deviers le roy englès sur le soir, et li recorda sen aventure: dont li roys fu moult liés, quant il vit que li besoingne estoit pour lui. Si cevauça li roys avant et entra ens ou Biauvesis, ardant et essillant le plat pays, ensi comme il avoit fait en Normendie. Et chevaucha tant en telle manière que il s’en vint logier en une moult belle et riche abbeie que on claimme Saint Missiien et siet assés priès de Biauvais. Si y jut là li roys une nuit. L’endemain, si tost qu’il s’en fu partis, il ne s’en dounna de garde, si vit le feu dedens et toutte ardoir, dont il fu moult courouchiés, car il l’avoit asseuret et coummandet à ses marescaux que on n’y fesist nul mal; et ceux qui le feu y boutèrent, il lez fist pendre, affin que li aultre gardaissent une autre foix mieux son commandement. Fº 91.

—Ms. de Rome: Or cevauchièrent les Englois et entrèrent ou pais de Vexsin. Et ardirent chil de l’avant garde les fourbours de Pontoise et de Biaumont sus Oise et Cormelles en Vexsin et Sas en Vexsin et tout le pais sans nul deport, et prissent le cemin de Ghissors et de Gournai. Et ardirent les Englois Gamaces et tous les fourbours de Ghisors et de Gournai et tout le pais de Vexsin, et entrèrent en Biauvoisin. Et trouvèrent chil de l’avant garde les bourgois d’Amiens assés priès de Saint Just en Biauvesins, que li rois de France avoit mandés, et aloient passer Oize la rivière au pont à Crai. Il furent courut sus de ceuls de la bataille des marescaus et se deffendirent, car il estoient bien quatre mille. Et les conduisoient li viscontes de Qesnes, li sires de Biausaut, li sires de Sautcourt et mesires Pières de Mellincourt, et furent en bon couvenant et se conbatirent assés vaillanment; mais finablement, il furent desconfi, et en i ot biaucop de mors et de pris. Li demorans tournèrent en fuites, et se boutèrent en la Herielle et ens ès villes voisines fremées de là priès. Li quatre chevalier demorèrent prisonnier, et plus de deus cens autres honmes, qui tout paiièrent depuis raençon. Ce soir retournèrent chil de l’avant garde deviers le roi d’Engleterre, là où il estoit logiés. A l’endemain, toute li hoos passa assés priés de Biauvais, et furent li fourbours ars, et une moult rice abbeie, qui est asisse assés priès de Biauvais, que on nonme Saint Lusiien. Fº 115.

P. 150, l. 21 et 22: douze cens.—Mss. A 23 à 29: quatorze cens. Fº 160.—Mss. A 30 à 33: treize cens. Fº 184 vº.

P. 150, l. 25: viers Paris.—Ms. B 6: et estoient bien trois mille. Fº 308.

P. 151, l. 11: douze cens.—Ms B 6: quinze cens. Fº 308.

P. 151, l. 20: Saint Lusiien.—Mss. A 1 à 33: Saint Messien. Fº 140.

P. 151, l. 27: Car li rois.—Ms. B 6: car à la prière des moines et qui avoient fait present de bons vins, il leur avoit acordé, et fist pendre vingt de ceulx qui le feu y avoient bouté. Et donna encores as moines vingt des plus riches prisonniers qu’il euist de la cité de Bieauvais en restituant leur damaige: de quoy ces vingt paièrent l’un pour l’autre chacun vingt escus à ceulx de Saint Mesien pour la refescion de leur abbeie; et ne les vot onques le roy quitter de leur foy aultrement jusques à tant qu’il eurent paiet. Fº 309.

§ 265. P. 152, l. 3: Apriès chou.—Ms. d’Amiens: Quant li roys se fu partis de Saint Messiien, il s’en passa oultre par dallés le chité de Biauvais et n’y vot point arester pour assaillir, ne à assegier, car il ne volloit mies travillier ses gens, ni perdre sen artillerie, et s’en vint logier ce jour en une ville que on claimme Milli en Biauvesis. Li doy marescal de son ost passèrent si priès des fourbours de Biauvais qu’il ne se peurent tenir que il n’alaissent assaillir et escarmuchier à chiaux des barrièrez, et partirent leurs gens en trois bataillez et assaillirent à trois portez. Et y eut mout grant assault, mès peu y gaegnièrent, car à la dite chité ne peurent il riens fourfaire; mais il ardirent tous les fourbours de Biauvais jusques as portez, et deux bonnes abbeies qui seoient hors des murs de le cité, et à leur departement, pluisseurs villages entours le chité. Et se deseverèrent li doy marescal li ungs de l’autre. Si en allèrent li ungs chà, li autres là, ardant, robant et essillant le pays de tous costéz; et allèrent tant en telle mannierre qu’il vinrent au soir logier à Milli dallés le roy leur seigneur.

L’endemain, li roys se parti de Milli et s’en alla parmy le pays, gastant et essillant à son pooir, et vint logier à une bonne grosse ville que on claimme Grantviller. L’endemain, il s’en parti et passa par devant Argies; et ne trouvèrent nullui qui gardast le castiel. Si l’ardirent et tout le pays d’environ jusquez à le ville de Pois, là où il trouvèrent bonne ville et deux castiaux, mès nuls des seigneurs n’y estoit, ne nullez gardez n’y avoit, fors deux belles damoiselles, filles au seigneur de Pois, qui tantost ewissent estet viollées, se n’ewissent esté doy chevalier d’Engleterre qui les deffendirent et les menèrent au roy pour ellez garder: che furent messires Jehans Camdos et li sires de Basset. Liquelx roys, pour honneur et gentillèche, leur fist grant feste et les envoya conduire à sauveté là où ellez veurent aller. Et se loga li roys le nuit en le ditte ville et ou plus bel castel de Pois, et toutte son ost ens ès vilettes d’entour. Celle nuit parlementèrent les bonnez gens de Pois as marescaux de l’ost que li ville deut y estre rachatée parmy une somme de florins à paiier au matin. Quant ce vint au matin, li roys se desloga et se mist au chemin à tout son host, excepté aucuns qui demorèrent pour recepvoir le racat.

Quant chil de le ville furent assamblet et il virent que li hos s’estoit partis et que cil qui demouret estoient, n’estoient que ung petit de gens, il n’eurent talent de paiier, ainschois les coururent seure pour ocire. Chil Englès se missent à deffensce et envoiièrent apriès l’ost querre secours. Li messages s’en alla quanqu’il pot, criant: «Trahi! trahi!» Quant chil de l’ost l’entendirent, il retournèrent qui mieux mieux, tant qu’il vinrent à Pois, et tuèrent chiaux qu’il trouvèrent, qui lasqueté et fraude leur avoient fait; et ardirent le ville et le castiel si netement qu’il n’y demora maison. Puis s’en alla li hos, et ne cessa si vint à Airainnes. Là endroit fist criier li roys sur le hart que nulx ne fourfesist à le ville, car il y volloit reposer ung jour ou deux. Che fist il pour tant qu’il volloit querre avis par quel pas il polroit le rivierre de Somme passer plus aise. Fº 91.

—Ms. de Rome: Et s’en vinrent logier ce jour à Grantvillers, et passèrent la rivière de Tierain, et puis vinrent à Dargies, ardant et essillant tout le pais. Si ne trouvèrent chil de l’avant garde nului qui deffendissent ne gardaissent le chastiel de Dargies. Si le prissent à petit de fait et le desemparèrent, et le ardirent ce que ardoir en porent; et puis passèrent oultre, ardant et exillant le pais à tous lés. Et vinrent ensi jusques à Pois, là où il trouvèrent bonne ville et deus chastiaus, mais nuls des signeurs n’i estoient, ne nulles gardes n’i avoit, fors deus belles jones damoiselles, filles au signeur de Pois, Jehane et Marie, qui tantos euissent esté violées, se ne fuissent doi gentil cevalier d’Engleterre, asquels la congnisance vint de la prise, mesire Jehan Candos et mesire Renault de Basset, qui tantos les delivrèrent, pour la cause de gentilèce, des mains d’archiers qui les avoient, et les amenèrent au roi: liquels rois en ot pité, et lor demanda où elles vodroient estre, et elles respondirent: «A Corbie.» Là les fist li rois mener et conduire sans peril. Et se loga li rois celle nuit en la ditte ville de Pois et toutes ses gens, là ou environ, au mieuls qu’il peurent. Et orent celle nuit parlement li honme de Pois et ceuls des deus chastiaus, à mesire Godefroi de Harcourt et au conte de Warvich qui gouvrenoient l’avantgarde, pour euls sauver de non estre ars à l’endemain, car il doubtoient ce grandement au deslogement dou roi. Et se porta trettiés que, parmi une sonme de florins que il paieroient à l’endemain et trop bon marchiet, il seroient respité.

A l’endemain, li rois et toute li hoos se deslogièrent et se missent au cemin; et demorèrent derrière auquns hommes d’armes et archiers, pour recevoir cel argent. Mais qant li hoos fu eslongie environ une lieue, ces honmes de Pois ne vorent point paier, ne nulle paction tenir; mais coururent sus ceuls qui demoret estoient, et en ocirent et mehagnièrent auquns. Les nouvelles vinrent à ceuls de l’arieregarde, qui cevauçoient tout derrière, conment li bonhonme de Pois estoient faussaire. On le segnefia au roi, pour sçavoir quel cose il en voloit faire. Li rois fist arester toute l’oost et là logier pour ce jour, et envoia ses marescaux de rechief à Pois. Qant les Englois furent retourné jusques à là, il trouvèrent ces bonhonmes qui estoient rebelles, qui tantos furent en voies, qant il veirent ces Englois venus; mais il en i ot des atrapés biaucop, qui furent mors et mehagniet. Et fu la ville de Pois toute arse, et li doi chastiel ars et abatu; et puis retournèrent li marescal, là où li rois d’Engleterre estoit logiés.

Qant ce vint à l’endemain, li rois et toute li hoos se deslogièrent et cevauchièrent viers Arainnes, ardant et essillant le pais à destre et à senestre. Et vinrent à Arainnes environ tierce, et là s’arestèrent, car il ne savoient là, ne où, ne qant, il passeroient la rivière de Sonme. Fº 115.

P. 152, l. 17: voir Sup. var. (n. d. t.)

P. 152, l. 26: Grantviller.—Mss. A 1 à 6, 11 à 29: Grantvillier. Fº 140.

P. 152, l. 28: Argies.—Mss. A 1 à 6, 11 à 14, 18, 19: Orgies. Fº 140.—Le ms. B 6 ajoute: qui estoit au conte de Blois. Fº 309.

P. 153, l. 19: se rançonnèrent.—Ms. B 6: à paier douse cens florins dedens trois jours. Fº 310.

§ 266. P. 154, l. 21: Or voel je.—Ms. d’Amiens: Or voeil retourner au roy Phelippe de France, qui estoit à Saint Denis ou là environ, et tousjours li venoient et croissoient gens de tous costéz, et tant en avoit que sans nombre. Si estoit li dis roys partis de Saint Denis o grant baronnie en instance de che que de trouver le roi englès et de combattre à lui, car de ce avoit il grant desir, pour contrevengier l’arssin de son royaumme et le destruction que li Englès y avoient fait. Et chevauça tant li roys de France par ses journées qu’il vint à Coppegni le Quisiet, à troix lieuwes priès d’Amiens, et là s’aresta pour atendre ses gens qui venoient de touttez pars, et pour aprendre le couvenant des Englès.

Or dirons dou roy Edouwart qui estoit à Arainnes arestéz, si comme vous avés oy, et avoit mout bien entendu que li roys de Franche le sieuwoit o tout son effort; et si ne savoit encorrez là où il poroit passer le rivierre de Somme, qui est grande, large et parfonde; et si estoient tout li pont deffait ou si bien gardet de bonnes gens d’armes que le rivierre ne porroit passer. Si appella li roys ses deux marescaux, le comte de Warvich et monseigneur Godeffroit de Halcourt, et leur dist que il presissent mille hommez d’armes et deux mille archiers tous bien montés, et s’en alaissent tastant et regardant seloncq le rivière de Somme, se il poroient trouver passaige là où il poroit passer et toutte sen host. Si se partirent li doy marescal dessus noummet, bien acompaigniet de gens d’armes et d’archiers, et passèrent parmy Loingpret et vinrent au Pont à Remy, et le trouvèrent bien garny de grant fuisson de chevaliers et d’escuiers et des gens dou pays, qui là estoient assamblet pour le pont et le passaige deffendre et garder. Si vinrent là li Englès, et se missent à piet et en bon couvenant pour lez Franchois assaillir. Et y eut très grant assault et très fort, et qui dura dou matin jusques à primme, mès li pons et la deffensce estoient si bien batillie et deffendue, que oncques li Englès n’i peurent riens concquerre; ainschois s’en partirent et chevauchièrent d’autre part. Et vinrent à une grosse ville que on claimme Fontainne sur Somme; si l’ardirent toutte et robèrent, car elle n’estoit point fremmée. Et puis vinrent à une autre ville que on claimme Loncq en Pontieu sur Somme; si ne peurent gaegnier le pont, car il estoit bien garnis et fu bien deffendus. Apriès, il s’en chevauchièrent deviers une autre grosse ville que on claimme Loncqpret sur Somme. Et y a bonnes chanonneries et riche ville et moult de biaux hostelx, qui tout furent ars et robés, et n’y demoura maison en estant; mès li pons estoit deffais, et ne peurent veoir mannierre ne tour coumment il fuist refèz. Si chevaucièrent encorres deviers Pikegny, et trouvèrent le ville et le castiel et le pont bien garny, par quoy jammais ne l’ewissent gaegniet ne pris. Enssi avoit li roy Phelippes fait pourveir les destroix et les passaiges sus le rivierre de Somme, affin que li roys englès ne son host ne pewissent passer, car il les volloit combattre à se vollenté ou afammer par delà le Somme. Fº 91 vº.

—Ms. de Rome: Bien lor avoit dit messires Godefrois de Harcourt que desous Abbeville devoit avoir un passage, mais que on seuist ou peuist prendre la mer à point. On li demanda quels li pasages estoit, et se point il l’avoit passet. Il respondi: «Onques ne le passai. Je ne le sçai fors par oïr dire. Et toutes fois, entre Amiens et Abbeville, il i a pluisseurs passages sus la rivière de Sonme. On deveroit envoiier taster se li pont sont deffait ou bien gardé.»

Li rois i envoia; et en furent esleu et ordonné pour aler, li contes de Warvich et messires Godefrois de Harcourt, à tout mille honmes d’armes et deus mille archiers, tous bien montés. Si se departirent de Arraines et cevauchièrent parmi Lonchpret, et vinrent au Pont à Remi, et le trouvèrent bien garni et pourveu de grant fuisson de chevaliers et d’esquiers et des honmes dou pais qui là estoient assamblé. Et en estoient chapitainne li sires de Doumarc, li sires de Havesqerqe, li sires de Brimeu, li sires de Boubert et li sires de Saintpi, et avoient mallement fortefiiet le pont, et euls aussi. Qant les Englois veirent ce, il passèrent oultre et vinrent à Fontainnes sus Somme, une grose ville, et l’ardirent toute, car elle n’estoit point fremée. Et puis vinrent à Lonch en Pontieu, et trouvèrent le pont bien garni et pourveu de gens d’armes et d’archiers; et estoit cose imposible de euls conquerre et là passer. F^os 115 vº et 116.

P. 154, l. 23: de tous lés.—Ms. B 6: tant de l’Empire que des parties de Franche; et sy atendoit le conte de Savoie et mesire Lois de Savoie son frère qui estoit priès et mandés à mille lanches. Fº 311.

P. 155, l. 3: Copegni l’Esquissiet.—Mss. A 1 à 6: Compegny l’Esquissié. Fº 241.—Mss. A 15 à 17: Copigny l’Esquiessié. Fº 142.—Mss. A 20 à 22: Copegni l’Escuissé. Fº 204.—Mss. A 23 à 29: Coppigny l’Esquisié. Fº 161.—Mss. A 7 à 14, 18, 19, 30 à 33: Coppegni l’Esquissié. Fº 134 vº.—Ms. B 6: Coppegny. Fº 311.

P. 155, l. 23: Pont à Remi.—Ms. A 7: Pont Atemi. Fº 135.—Mss. A 30 à 33: Pont Athemy. Fº 186 vº.

P. 156, l. 3: sus Somme.—Ms. A 7: sus Sainne. Fº 135.

P. 156, l. 5: Lonch.—Mss. A 20 à 22: Loing. Fº 204 vº.—Mss. A. 30 à 33: Long. Fº 186 vº.

P. 156, l. 24: voir Sup. var. (n. d. t.)

§ 267. P. 156, l. 16: Quant li doi.—Ms. d’Amiens: Quant li marescal d’Engleterre eurent enssi un jour enthier tastet et chevauchiet et costiiet le rivierre de Somme, et il virent que de nul léz il ne trouveroient point de passage, si retournèrent arrière à Arainnes deviers le roy leur seigneur, et li recordèrent leur cevaucie et tout ce que trouvet avoient.

Che meysme soir, vint li roys de Franche jesir à Amiens à plus de cent mil hommes, et estoit tous li pays d’environ tous couviers de gens d’armes.

Quant li roys englès eut entendu ses deux marescaux, si n’en fu mies plus liés et coummencha moult à muser; et coummanda que, l’endemain au matin, il fuissent tout appareilliet, car il se volloit deslogier de là. Si se passèrent le nuit enssi, et l’endemain bien matin, li roys englès oy messe; puis sonnèrent les trompettes, et montèrent tout à cheval. Et chevaucha li roys parmy le Vismeu, à tout son host, droit par deviers Oizemont et le bonne ville de Abbeville en Pontieu, et si coureur devant, et de tous costés ardans et essillans le pays, si comme il avoit coummenchiet.

Che meysme jour coummanda li roys de Franche à monseigneur Godemar dou Fay, que il partesist d’Ammiens et presist grant fuisson de gens d’armes, et s’en allast à le Blancque Take desoubz Abbeville et gardast là le passaige contre lez Englès, par quoi il ne pewissent passer. Adonc se departi messires Ghodemar dou Fay et prist bien deux mil hommez d’armes et cinq mil de piet parmy les Geneuois, et s’en vint là où il estoit ordounnés et establis pour aller. Fº 92.

—Ms. de Rome: Qant il (les Anglais) veirent que tout li pasage estoient si bien pourveu et deffendu, il retournèrent viers le roi et toute l’oost, qui les atendoient à Arrainnes, et li recordèrent ce que il avoient trouvé.

Bien avoient entendu li roy d’Engleterre et ses consauls, que li rois Phelippes, à toute sa poissance, le poursievoit moult fort et estoit jà venus à Amiens, et que sur ce il euissent avis et consel. Si fu li dis rois d’Engleterre consilliés de departir d’Arraines et de aprocier Abbeville et le pasage de la Blance Taqe, où il esperoient à passer, car trop mieuls lor valoit que il atendesissent apriès le passage, que li passages atendesist apriès euls. Si se departirent au matin de la ville d’Arraines et chevauchièrent viers Abeville, ardans et essillans le pais. Et coururent chil de l’avantgarde jusques à Aumale, et fu la ville arse; et puis s’en retournèrent viers Oizemont, où li rois d’Engleterre et les Englois, pour ce jour, avoient pris lor logeis. Et trouvèrent sus lor cemin une grose ville non fremée qui s’apelle Sénartpont et se gouverne toute de la draperie: si fu de l’avant garde toute courue et arse; et puis passèrent oultre et vinrent à Oizemont. Là trouvèrent il le roi et toute l’oost; si se logièrent pour ce jour. Fº 116.

P. 156, l. 27 et 28: à muser et à merancolier.—Mss. A 1 à 6, 8 à 14, 18, 19: à avisier et soy merencolier. Fº 141 vº.

P. 158, l. 1: le Blanke Take.—Mss. A 1 à 6, 8 à 14, 18 à 22: Blanche Tache. Fº 141 vº.—Mss. A 7, 15 à 17, 23 à 33: la Blanche Take ou Tacque ou Taque. Fº 135 vº.—Ms. B 6: entre Saint Vallery et le Crotoy desoubz Abeville. Fº 313.

P. 158, l. 15: combatans à tournikiaus.—Mss. A 1 à 6, 8 à 10: tourniquiens, turniquiens. Fº 142.—Mss. A 15 à 17, 20 à 22: Tournoisiens, Tournisiens. Fº 142 vº.

§ 268. P. 158, l. 16: Apriès ceste ordonance.—Ms. d’Amiens: Encorrez coummanda li roys de Franche que tout seigneur et aultre fuissent prest, car il volloit chevaucier deviers Arainnes, là où on disoit que li roys englès estoit. Et se parti d’Ammiens et passa le Somme parmy les pons, et chevaucha vers Arainnes et y vint à heure de nonne. Et li rois englès s’en estoit partis au matin; et encorres trouvèrent li dit Franchois assés des pourveanches as Englès. Si se loga li roys de Franche à Arainnes à l’heure qu’il y vint et le soir ossi, et l’endemain tout le jour, pour attendre ses gens et son grant host qui le sieuwoient.

Li roys englès, qui chevauchoit parmy le Vismeu, ardant et essillant le pays, fist tant que il parvint à Maroel. Et ardirent ses gens le ville, et assaillirent le castiel, et le concquissent d’assault et le abatirent et rompirent, et ossi une abbeie qu’il trouvèrent bien garnie en le ville de Maroel. Et puis chevaucièrent devers Oisemont, ardant et essillant le pays, tant que les flameskes en volloient en Abbeville. Tant allèrent li Englès en celle mannierre qu’il aprochièrent le ville de Oisemont, là où tout le pays de Vismeu estoit assambléz. Quant ces gens, qui estoient en Oisemont, virent aprochier cez Englès, il se traissent hors as camps, et se quidièrent bien deffendre encontre yaux; si les coururent seure asprement et vistement. Et avoient pour cappittainne un bon chevalier banereth, le seigneur de Bouberk, hardi homme durement. Là y eut grant hustin et dur. Et eurent li Englès une mout fort rencontre, et en y eult pluisseurs navrés et blechiés. Et trop bien s’i portèrent li Franchois; mais finablement il furent si dur combatut, et tant y sourvint de nouvelle gent sus yaux, que il perdirent le place, et les couvint partir et rentrer en le ville à grant meschief. Et y fu li sires de Bouberk très bons chevaliers, bien assallans et bien deffendans, et fu pris et prisonniers à monseigneur Jehan Camdos. Et ossi y furent pris li sirez de Brimeu, li sirez de Sains, li sirez de Louville, li sirez de Saint Pi et pluisseur autre chevalier et escuier. Et entra li roys en le ville de Oizimont et se loga ou grant hospital, et touttes ses gens en le ville ou environ, sus une petite rivierre. Et che meysme jour que li ville de Oisimont fu prise, courut messires Ghodeffroy de Harcourt, à tout une cantitet de gens d’armes et d’archiers, jusques à Saint Wallery. Et là eut une grant escarmuche et grant hustin, car li ville et li castiel estoient bien pourveus de bonnes gens d’armez, dont li comtez de Saint Pol et messires Jehans de Lini estoient chief. Et n’i peurent li Englès [riens] concquerre; si retournèrent arrierre deviers le roy englès, et le trouvèrent à Oizimont. Liquelx roys estoit moult penssieux coumment il poroit passer le rivierre de Somme, car bien savoit que li roys de Franche le sieuwoit à tout très grant effort. Si en fist li roys englès parler à aucuns chevaliers franchois qu’il tenoit pour prisonniers. Et leur faisoit proumettre grant courtoisie, mès que il li volsissent enssignier un passaige pour passer le Somme, liquelx devoit y estre ens ou pays entre Vismeu et Pontieu; mais li chevalier, pour leur honneur, s’escusoient et disoient que nul n’en y savoient.

Quant li roys englès, qui estoit logiés ou grant hospital de Oizimont, vit che qu’il ne porroit atraire aucuns chevaliers franchois dou pays de Pontieu et d’ailleurs qu’il tenoit pour prisonniers, affin que il li vosissent ensseignier passage pour passer et toutte sen host le rivierre de Somme, et tout s’escuzoient pour leur honneur, si eut li roys englès autre advis et conseil, que il fist venir devant lui gens de menre estat et de le droite nation dou pays de Vismeu, que il tenoit pour prisonniers, si leur dist enssi: «Se il a chi homme nul qui me voeil enssegnier le passage, pour passer le rivierre de Somme, et toutte mon host, je le quitteray de se prison et avecq lui cinq ou six de ses compaignons pour l’amour de lui, et li donray cent noblez d’Engleterre.»

Là eut un compaignon que on clammoit Gobin Agache, qui bien congnissoit le passaige de le Blanke Take, car il avoit estet nouris assés priès, et l’avoit passet et rappasset pluisseurs fois. Quant il oit le proummesse dou roy, si eut grant joie, tant pour gaegnier lez florins que pour estre delivréz de prison; si dist ensi: «Sire, oil, en nom Dieu, se vous me volléz tenir couvent, je vous menray demain au matin en tel lieu là où tout vostre ost sera passéz avant tierche, sour l’abandon de ma teste. Je say ung gués là où douze homme passeraient bien de froncq deux foix entre jour et nuit, et n’aroient de l’yauwe plus hault que jusques à genoulx. Car li fluns de le mer est: en venant, il regorge la rivierre si contremont, que nuls n’y poroit passer; mès quant chilx fluns, qui vient deux foix entre jour et nuit, s’en est tout rallés, li rivierre demeure là endroit si petitte, que on y passe bien aise à piet et à cheval. Che ne fait on nulle part que là, fors au pont à Aubeville, qui est forte ville et grande et bien garnie de gens d’armes. Et à ce passage, sire, que je vous di, a gravier de blanke marle, forte et dure, que on y puet seurement chariier, et pour ce le appell’on le Blancque Take.»

Quant li roys oy les parolles dou varlet, il n’ewist mies estet ossi liés qui li ewist donnet vingt mil escus; et li dist, s’il le trouvoit en veritet, qu’il quitteroit tous sez compaignons pour l’amour de lui, et li amenderoit son couvent. Et Agace li respondi: «Sire, oil. Ordonnés vous sour ce, et pour y estre là sus le rivierre, devant soleil levant.» Dist li roys: «Vollentiers.» Puis fist savoir par tuit son host que chacuns fust armés et appareilliéz au son de le trompette, pour mouvoir et departir de là pour aller ailleurs. Fº 92.

—Ms. de Rome: Ce jour que li rois d’Engleterre se departi d’Arainnes et que il vint à Oizemont, li rois Phelippes de France se departi de la chité d’Amiens et prist le cemin de Arainnes. Et estoit li intension de li, quel part que il trouveroit le roi d’Engleterre et les Englois, il les combateroit. Et avoit envoiiet devant, pour garder le pas à la Blance Taqe grant fuisson de gens d’armes, des quels messires Godemars dou Fai estoit chapitains, car on avoit enfourné le dit roi que les Englois ne pooient avoir autre passage que par là. Qant li rois de France vint à Arainnes, les Englois en estoient parti dou matin. Encores trouvèrent les François biau cop de lors pourveances, les pains ou four, et les chars ens ès hastiers, de quoi les pluisseurs se disnèrent. Li rois de France se tint à Arainnes. Gens d’armes et arbalestriers geneuois le sievoient de toutes costés. Encores estoient à venir li contes Amé de Savoie et messires Lois de Savoie, ses frères, et amenoient bien cinq cens honmes d’armes. Li bons rois de Boesme et mesires Carles, ses fils, et leurs routes sievoient le roi de France, et se logoient au plus priès de li que il pooient. Tant de peuple venoient de tous lés que mervelles seroit à penser; tous les camps estoient couvers de gens et de charoi, qui poursievoient le roi. On disoit au roi: «Sire, cevauchiés par ordenance. Les Englois sont enclos: il ne pueent avoir nullement le pasage de la Blanqe Taqe si apparilliet, avoecques ce que mesires Godemars dou Fai et grant gent d’armes sont par de delà la rivière de Sonme, qui le garderont et deffenderont; et vous et li vostre, lor venrés d’autre part au dos. Comptés ensi: il sont vostre, car il ne sont que une puignie de gens ou regart des vostres. A celle fois chi, en auerés vous raison; il ne vous pueent fuir ne escaper, se il ne mucent en terre.» Fº 116.

P. 159, l. 18: voir Sup. var. (n. d. t.)

P. 159, l. 19: Gobin.—Mss. A 11 à 14: Colin. Fº 136.—Mss. A 20 à 22: Robin. Fº 205 vº.

P. 159, l. 19: Agace.—Mss. A 20 à 22: Agache. Fº 205 vº.—Mss. A 1 à 6, 11 à 14: Agathe. Fº 142.

P. 159, l. 22: passet.—Ms. B 6: le plus grosse nefs d’Espaigne y passeroit. Fº 314.

P. 160, l. 15: cent nobles.—Mss. A 15 à 17: cent nobles d’or. Fº 143.

P. 160, l. 19 et 21: voir Sup. var. (n. d. t.)

§ 269. P. 160, l. 22: Li rois d’Engleterre.—Ms. d’Amiens: Li roys ne dormy mies gramment celle nuit, ains se leva à le mienuit, et fist sounner le tronpette. Chacuns fu tantost appareilliéz, sommiers tourssés, chars cargiés. Si se partirent, sour le point del jour, de le ville de Oizemont, et chevauchièrent sour le conduit de ce varlet et de ses compaignons, parmy le pays que on claimme Vismeu, tant qu’il vinrent à soleil levant assés priès de che gués que on claimme à le Blancque Take; mès li fluns de le mer estoit adonc tous plains: si ne peurent passer. Ossi bien couvenoit il au roy atendre sez gens qui venoient apriès lui. Si demoura là endroit jusques apriès prime, que li fluns s’en fu tous rallés. Et ainssois que li fluns s’en fuist rallés, vint d’autre part messires Godemars dou Fay à grant fuisson de gens d’armes, envoiiéz de par le roy de Franche, si comme vous avés oy. Et avoit li dis messires Godemars rassamblet grant fuisson des gens dou pays à piet et à cheval avoecq les siens, qui tantost se rengièrent sour le pas de le rivierre pour deffendre le passage. Mais li roys englès ne laissa mies à passer pour che; ains coummanda à ses marescaux tantost ferir ou gués et sez archiers traire fortement as Franchois. Là commença ungs fors hustins, car messires Godemar et li sien deffendoient vassaument le passaige. Là y eut aucuns chevaliers et escuyers franchois d’Artois et de Pikardie et de le carge monseigneur Godemar, qui, pour leur honneur avanchier, se freoient ou dit gués et venoient d’encontre jouster as Englès. Là eut mainte belle jouste et maintez bellez appertisses d’armes faittes. Et vous di que li Englès eurent là ung mout dur encontre, car tout ceux qui estoient avoecq monseigneur Godemar envoiiet pour garder et deffendre le passage de le Blancque Taque, estoient gens d’eslite, et se tenoient bien rengiet et sus le destroit dou passage de le rivierre: dont li Englès estoient dur rencontré, quant il venoient à l’yssue. Et y avoit Geneuois qui dou tret leur faisoient mout de maux; mais li archier d’Engleterre traioient si fort et si ouniement qu’à merveillez, et entroez qu’il ensonnioient les Franchois, gens d’armes passoient. Et sachiés que li Englès se prenoient bien priès de bien yaux combattre, car il leur estoit dit que li roys de Franche les sieuwoit à plus de cent mil hommes. Et jà estoient aucun compaignon coureur de le partie des François venus jusques as Englès, et qui en reportèrent vraies enssaingnes au roy dez Franchois, si comme vous oréz dire. Fº 92 vº.

—Ms. de Rome: Or retourrons au roi d’Engleterre, qui estoit en la ville d’Oisemont, à quatre lieues priès d’Abeville, et avoit entendu, par auquns prisonniers que ses gens avoient pris, que li rois de France, à grant poisance, estoit venus à Arainnes et le sievoit fortement. Li rois d’Engleterre desiroit à avoir passet la rivière de Sonme, avant que li François venissent sur lui. Et fu ordonné, la nuit que il se loga à Oisemont, que, tantos apriès mienuit, on se deslogeroit, et fu conmandé que on sievist les banières des marescaus. Tout ensi que il fu ordonné, il fu fait; et sonnèrent les tronpètes des mareschaus tantos apriès mienuit. Toutes manières de gens, au son des tronpètes, sallirent sus et se resvillièrent et armèrent; au secont son des tronpètes, on toursa et apparilla, et se missent toutes gens en ordenances des batailles, ensi que il devoient estre et aler. Au tier son, tout montèrent à ceval et se departirent et prissent le cemin, et jà estoit l’aube dou jour apparant, et se missent sus les camps; et ne laissièrent nulle cose derrière, et esqievèrent le cemin pour aler à Abeville, et prissent celi de la Blanqe Taqe. Si bien se esploitièrent que, sus le point de solel levant, le flun estoit tous plains; et qant il vinrent au pas, il trouvèrent que la mer weboit et se mettoit au retour. Donc dissent il: «Vechi bonnes nouvelles: avant que l’arrière garde soit venue, li avantgarde passera.» Messires Godemars dou Fai et sa carge estoient d’aultre part la rivière de Sonme. Et avoient les gens d’armes requelliet et assamblet parmi tout le pais et fait venir avoecques euls, et avoient les arbalestriers d’Amiens, d’Abeville, de Saint Riqier et tous les arbalestriers des villes là environ et les honmes de deffense aussi. Et estoient bien douse mille, et quidoient bien garder le pasage, mais non fissent, ensi que je vous recorderai; mais avant je vous parlerai un petit dou roi de France.

Qant ce vint le joedi au matin, li rois de France, qui logiés estoit à Arainnes, se desloga et envoia ses coureurs devant pour descouvrir le pais, et pour avoir nouvelles des Englois. Et vinrent à Oizemont, et trouvèrent encores grant apparel de chars en hastiers, à moitié quites, là laissies, et des pastés grant plenté ens ès fours, et des chars en caudrons et en caudières sus le feu, qui n’estoient point quites. Et disoient li auqun François: «Les Englois sont malescieus. Il ont tout volentiers laissiet ces pourveances en cel estat, à la fin que nous nos i ataqons. Il n’i a gaires que il se departirent de chi.» Les nouvelles vinrent au roi de France, là où il cevauçoit entre Arainnes et Oisemont, et mesire Jehan de Hainnau en sa compagnie, et li fut dit et nonchiet le couvenant des Englois. Adonc fist li rois haster ses gens, et vint à Oisemont ensi que à heure de tierce; et entra en la ville et descendi à l’ostel des Templiers, et là s’aresta, et toute li hoos aussi. Et destoursèrent les sonmiers et les pourveances, et burent et mengièrent un petit, et puis tantos retoursèrent et missent à voiture. Et fu adonc conmandé que tout voiturier et charoi et sonmiers presissent le cemin de Abbeville et tournaissent celle part, et toutes gens d’armes et de piet sievissent les banières des marescaus. Ensi conme il fu ordonné, il fu fait. Tout se departirent de Oizemont, et n’i arestèrent li François, depuis que il i furent venu, que une heure; et se missent tout au cemin en ordenance de bataille et en grande volenté de trouver les Englois, à ce que il moustroient. Les Englois, qui estoient venu sus le pas de Blanqe Taqe pour passer oultre, n’eurent aultre espasce de loisir que ce que li François missent à venir de Oizemont à la Blanque Taque, où il puet avoir de cemin environ cinq lieues. Or vous recorderai conment la besongne se porta celle journée que les Englois vinrent pour passer la rivière de Sonme.

Mesires Godemars dou Fai et sa poissance estoit d’aultre part l’aige, ens ou pais de Pontieu; et les François estoient avoecques lui, tout rengiet et ordonné en bataille sus le rivage. Li rois d’Engleterre et ses gens estoient en Vismeu: ensi se nonme le pais où il se tenoient. Et bien veoient François et Englois l’un l’autre; et atendirent là les Englois tant que la rivière fu bien ravalée. Mais les Englois, qui desiroient à passer, le prissent moult vert, car bien sçavoient que les François les poursievoient, et si veoient lors ennemis d’aultre part la rivière. Et avint que pluisseur chevaliers et esquiers, qui se desiroient à avancier et à faire armes, brochièrent cevaus des esporons, les lances ens ès poins et les targes au col, et entrèrent en la rivière. D’aultre part, chevaliers et esquiers françois, qui veoient les Englois venir, se vorrent aussi avanchier et se boutèrent contre euls en la rivière. Et i ot fait des joustes au plat de la rivière... abatus et bien moulliés et noiiés, qui ne les euist rescous. Finablement toutes manières de gens se missent au pasage et en haste de passer. Là couvint que Englois fuissent bonnes gens d’armes et de grande ordenance; car les François, qui estoient d’aultre part, les empeçoient et ensonnioient ce qu’il pooient. F^os 116 vº et 117.

§ 270. P. 162, l. 21: Sus le pas.—Ms. d’Amiens: Sus le pas de le Blancque Take fu la bataille dure et forte, et mout bien gardée et deffendue des Franchois; et maintes belles appertisses d’armes y eut ce jour fait, d’un lés et de l’autre. Mais finablement li Englès passèrent oultre, à com grant mesaise que ce fuist, et se traissent sus lez camps. Depuis qu’il eurent gaegniet le pas de le rivière et qu’il furent sur lez camps, li Franchois furent tantost desconffis. Et y eut là grant occision et maint homme mort de Abbeville, de Saint Rikier, de Rue, de Monstroel, dou Crotoi et dou pays de Pontieu, qui là estoient tout assamblet. Et s’en parti messires Godemars durement navrés et aucuns chevaliers et escuiers de se routte, et en laissièrent pluisseurs mors et pris. Quant li Englès, qui premiers estoient passet, furent oultre, il fissent voie as darrains et à leurs charoy et à leurs pourveanches. Encorrez n’estoient il mies tout oultre, quant aucun escuier as seigneurs de Franche qui aventurer se volloient, especiaulment de chyaux de l’Empire, dou roy de Behaingne et de monseigneur Jehan de Haynnau, vinrent sur yaux, et concquissent aucuns chevaux et harnas et tuèrent des Englès sour le rivaige, qui mettoient painne à passer, affin qu’il fuissent tout oultre. Les nouvellez vinrent au roy Phelippe de Franche, qui chevauchoit fortement celle matinée, et estoit partis de Arainnes, que li Englès avoient passet le Blancque Taque et desconfit messire Ghodemar et se routte. De ces nouvellez fu li roys moult courouchiés, car il quidoit bien trouver là les Englès sus le passage. Si demanda se il poroit passer à le Blancque Take: on li respondi que nenil, car li fluns de le mer commençoit jà à remonter. Dont eut conseil li roys de venir passer le rivierre de Somme au pont à Abbeville, et retourna mout courouchiéz, et s’en vint ce joedi jesir à Abbeville. Et toutte sen host sieuwy ce train, et vinrent li seigneur logier en le ditte ville et ou pays environ, car tout n’y pooient mies y estre logiéz, tant estoient grant fuison. Fº 92 vº.

—Ms. de Rome: Et avant que li Englois fuissent tout passet, il i ot grande escarmuce et maint homme reversé. Toutes fois, li Englois passèrent oultre, à quel mescief que ce fust; et ensi que il passoient, il prendoient terre et s’ordonnoient sus les camps. Sitos que ces bonhonmes dou pais, que messires Godemars avoit amené pour li aidier à garder et à deffendre le pasage, sentirent les saiettes de ces archiers, et que il en furent enfillé, il se desroutèrent tout, et ne tinrent point de ordenance et de conroi, mais tournèrent les dos et laissièrent les gentils honmes combatre et faire ce que il pooient. Se les Englois euissent aussi bien entendu au cachier et au prendre prisonniers, que il entendirent à lor charoi et sonmiers à metre hors de la rivière, il euissent porté plus de damage assés les François que il ne fissent. Qant messires Godemars dou Fai vei le grant mescief qui tournoit sus euls, et que tout li Englois estoient oultre, et que, de sa poissance, ce n’estoit riens, car moult de ses honmes fuioient et se sauvoient, si s’apensa que il se sauveroit aussi, car point n’i avoit de recouvrier. Si prist les camps et fist retourner sa banière avoecques lui. Et me fu dit que chils qui le portoit, le bouta en un buisson, car elle l’ensonnioit au brocier son ceval, et que là elle fu trouvée en ce jour meismes des Englois. Messires Godemars, tous desconfis et desbaretés, et auquns chevaliers de sa route, s’en vinrent à Saint Riqier en Pontieu, et là se tinrent pour aprendre des nouvelles et où li rois de France estoit. Or, vous parlerons dou roi d’Engleterre, conment il persevera depuis que il ot conquis le pasage. Fº 117.

P. 162, l. 22: voir Sup. var. (n. d. t.)

P. 162, l. 30: desconfit.—Ms. B 6: Toutefois les Englès vinrent sy enforchiement que il conquirent la rivière et prirent terre et desconfirent tous les Poulyés et Normans qui là estoient. Et y fut pris le conte de Dreus, le sire de Castillon, le sire de Pois, le sire de Briauté, le sire de Cresecque, le sire de Bourbourc, messires Hectors Kierés et grant foison de chevaliers et d’escuiers. Et en y eult mors, que d’un que d’autre, bien six mille. Et s’eufuy messires Godemars et se sauva. Fº 315.

P. 163, l. 6: de Rue.—Mss. A 30 à 33: d’Arras. Fº 186 vº.

P. 163, l. 6: Saint Riquier.—Mss. A 20 à 22: Saint Richier. Fº 206 vº.

P. 163, l. 7: plus d’une grosse liewe.—Mss. A 20 à 22: plus de deux grosses lieues. Fº 206 vº.

§ 271. P. 164, l. 5: Quant li rois.—Ms. d’Amiens: Or parlerons dou roy englès coumment il persevera depuis qu’il fu passés à le Blancque Take, et qu’il eult desconfi monseigneur Godemar dou Fay et lez Franchois. Il s’aroutèrent et se missent en ordonnance si comme il avoient fait par devant en venant jusques à là, et chevauchièrent tout bellement et à leur aise. Quant il se trouvèrent en Pontieu et le rivierre de Somme à leur dos, si en loa li roys englès ce jour Dieu par pluisseurs foix, qui tel grasce li avoit fait, et fist venir avant le varlet qui le passaige li avoit enssaigniet, et li quitta se prison et à tous ses compaignons pour l’amour de lui, et li fist delivrer cent noblez et un bon ronchin: de celui ne say jou plus avant. Mais li Englès chevauchièrent tout souef et tout joyant, et eurent che jour empensset de logier en une bonne et grosse ville que on claimme Noyelle, qui priès de là estoit; mès quant il seurent que [elle estoit à] la comtesse d’Aubmarle, qui estoit serour à monseigneur Robert d’Artois, qui trespassés estoit, il assegurèrent le ville et le pays appertenans à le damme pour l’amour de lui, de quoy elle remerchia mout le roy et les marescaux. Si allèrent logier plus avant ens ou pays en aprochant la Broie. L’endemain au matin, chevauchièrent li marescal englès et vinrent jusquez au Crotoy, qui est une bonne ville et marcande et bon port de mer; si le gaegnièrent à peu de fait, car elle n’estoit point fremmée: si le pillièrent et robèrent enssi qu’il veurent. Et puis s’en revinrent au soir deviers leur host, et amenèrent grant fuisson de buefs, de vaches, de pors et de brebis, et ossi grant fuison de bons vins de Poito et de Gascoingne, qu’il avoient trouvet en le ville dou Crotoy, car elle en estoit bien pourveue. Ceste nuit se tinrent tout aise, et à l’endemain, se deslogièrent et tirèrent pour venir deviers Crechi en Pontieu; si chevauchièrent che venredi jusquez à heure de miedi. Et se loga adonc toutte li os par le coummandement dou roy, assés priès de Crechi. Fº 93.

—Ms. de Rome: Qant li rois d’Engleterre et ses gens furent oultre, et que il eurent mis en cace et desconfi lors ennemis et delivré la place, et que il ne veoient ne trouvoient mais qui lor veast le cemin, il se traissent bellement et ordonneement ensamble et aroutèrent tout lor charoi, et cevauchièrent, banières desploiies, li avant garde des marescaus premiers, le roi et son fil le prince apriès, et l’arrière garde tout derrière. Et cevauçoient ensi, par ordenance que il avoient fait ou païs de Vexin et de Vismeu, et ne se esfreoient de riens, puis que il sentoient la rivière de Sonme derière euls. Il n’avoient mais que la rivière de Qance à passer, qui court desous la ville de Monstruel, et orent intension d’aler veoir Noielle et asallir le chastiel et logier dedens la ville. Mais qant il sceurent que elle estoit à madame d’Aumale, serour à mesire Robert d’Artois, qui trespassés estoit, il tournèrent d’aultre part et asegurèrent le castel et toute la ville. Mais li marescal cevauchièrent jusques au Crotoi et prissent la ville et le ardirent, mais il ne fissent riens au chastiel, car il est trop fors; et chevauchièrent viers Saint Esprit de Rue, et prissent la ville et le ardirent. Et se logièrent les Englois là environ la Broie, et orent grant fuisson de bons vins, qui furent trouvé au Crotoi des marceans de Saintonge et de la Rocelle, qui là gissoient à l’ancre. Et le venredi il ceminèrent tant que il vinrent à Creci en Pontieu et là se arestèrent, et se requellièrent toutes les trois batailles des Englois ensamble. Fº 117.

P. 164, l. 23: Noielle.—Mss. A 1 à 6: Norle. Fº 143 vº.—Mss. A 11 à 14: Nocle. Fº 137 vº.—Mss. A 18, 19: Noile. Fº 147.

P. 164, l. 25 et 26: sereur à monsigneur Robert d’Artois.—Ms. B 6: nièche à messire Goddefroy de Harcourt. Fº 316.

P. 164, l. 30: la Broie.—Mss. A 1 à 6: la Voie. Fº 143 vº.—Mss. A 11 à 22: la Voye. Fº 137 vº.—Mss. A 8, 9: la Boye. Fº 129 vº.

P. 165, l. 15: de Saint Esperit de Rue.—Mss. A 20 à 22: de Saint Esprit et de Rue. Fº 207.

§ 272. P. 165, l. 20: Bien estoit infourmés.—Ms. d’Amiens: Bien savoit li roys englès et estoit emfourmés que li roys Phelippez de Franche le sieuwoit à tout son grant effort, et avoit grant desir de combattre à lui, si comme il appairoit, car il l’avoit vistement poursieuwi jusquez à le Blancque Take et estoit retournés arrierre à Abbeville. Si dist adonc li roys englès que jammais n’yroit plus avant, si aroit veus et attendus ses annemis, et que il estoit sus son bon hiretaige de Pontieu, qui estoit à madamme se mère et li avoit estet donnés en mariaige, pour tant avoit il mieux cause et raison de là atendre ses ennemis que ailleurs, et de prendre l’aventure et le fortune telle que Dieux li envoieroit. Or savoit il bien que il n’avoit pas si grant gens de six fois comme estoient si annemy: pour tant avoit il plus grant mestier, ou cas que combattre se volloit, de regarder à son conroy et aviser le marce et le pays et d’entendre à son avantaige. Si fist touttez mannierrez de gens logier très ce venredi, et leur dist et fist dire par son connestable et ses marescaux, que chacuns se pourveist et appareillast endroit soy, si comme pour attendre le bataille, car, se li Franchois venoient, il seroient combatu. Adonc entendi chacuns à se besoingne che venredi toutte jour à rebourbir leurs armures, et remettre tout leur harnoy en bon point et à yaux fortefiier. Et regardèrent et advisèrent li doy marescal et messires Renaux de Gobehem et messires Richart de Stanfort terre et plache pour ordounner leur batailles et atendre leurs ennemis. Fº 93.

—Ms. de Rome: Bien estoit enfourmés li rois d’Engleterre que son adversaire, li rois de France, le sievoit à tout son grant effort, si ques, qant li rois d’Engleterre se vei à Creci en Pontieu, il dist à ses gens: «Prenons chi place de terre, et attendons nostres ennemis qui nous poursievent. Je sui sus mon droit hiretage, qui me vient de par madame de mère. Si le vodrai deffendre et calengier contre ceuls qui le me vodront debatre.» Donc se logièrent les Englois sus les camps et missent en bonne ordenance, et avoient vivres et pourveances assés, qui les poursievoient; et aussi li fourageur en trouvèrent assés, qant il orent passet la rivière de Sonme. Et fist li dis rois aviser et regarder par ses chevaliers les plus usés d’armes, le lieu et la place de terre, où il ordonneroit ses batailles et atenderoit ses ennemis. Ce furent li contes de Warvich, mesires Renauls de Gobehen, mesire Godefroi de Harcourt et le conte de Sufforc. Chil quatre baron, le samedi au matin, avisèrent et considerèrent bien la place de terre et raportèrent au roi: «Sire, à nostre avantage, nous attenderons chi nostres ennemis.» Et li rois respondi: «Ce soit, ou nom de Dieu et de saint Gorge!» Ensi se portèrent les ordenances.

Or parlons un petit dou roi Phelippe de France, liquels poursievi le joedi, qant il se departi de Oizemont, les Englois jusques moult priès de la Blanqe Taqe. On li dist sus le cemin: «Sire, les Englois sont oultre, et li flos de la mer conmence à retourner. Vous ne poés passer par là: il vous fault revenir à Abeville, et là passerés vous la rivière de Sonme à pont et toutes vostres aussi.» Li rois crei ce consel et retourna à Abeville, et toutes ses gens, et se logièrent: ce fu le joedi; et le venredi aussi, il se tint là tout le jour, attendans ses gens, car il en i avoit grant fuisson derrière. Fº 117 vº.

§ 273. P. 167, l. 3: Le venredi.—Ms. d’Amiens: Che venredi tout le jour se tint li roys Phelippez de Franche en Abbeville, attendans sez gens, et faisoit ossi passer oultre les aucuns pour estre plus appareilliet quant li bataille se feroit. Et avoit li dis roys de Franche envoiiet devant ses marescaux, monseigneur Carle seigneur de Montmorensi et le seigneur de Saint Venant, pour aprendre et savoir le couvenant des Englès. Si raportèrent li dessus dit au roy à heure de vespres que li Englèz estoient logiet assés priès de Crechi en Pontieu, et moustroient, seloncq leur ordounanche, qu’il atenderoient là le roy. De ces nouvelles fu li roys de Franche moult liés, et dist, se il plaisoit à Dieu, que à l’endemain il seroient combatu. Si pria au soupper dalés lui, che venredi, les haux prinches qui adonc estoient dedens Abbeville, telx que le roy de Behaingne, le comte d’Alenchon, son frère, le comte de Blois, son nepveu, le duc de Loerainne, le comte de Flandres, monseigneur Jehan de Haynnau, le comte de Namur, le comte de Salebruche, l’arcevesque de Roem, l’arcevesque de Rains, l’arcevesque de Sens, l’evesque de Laon, le comte d’Auçoire, le comte de Halcourt et pluisseurs autres. Et fu che soir en grant recreation et en grant parlement d’armes, et pria à tous les seigneurs que il fuissent amit et courtois, sans envie, sans orgoeil et sans haynne li uns as autrez, et chacun li eut en couvent. Encorres atendoit li roys le comte de Savoie et monseigneur Loeys de Savoie, son frère, qui devoient venir à bien mil lanches, Savoiiens et de le Dauffinet; car enssi estoient il mandet et retenut et paiiet de leurs gaiges pour trois mois tous pleniers. Or vous conterons dou roy englèz et de son couvenant, et coumment il ordounna ses batailles, et puis si retourons as Franchois. Fº 93.

—Ms. de Rome: Ce venredi, envoia li rois descouvrir sus les camps, pour aprendre le couvenant des Englois. Et raportèrent chil qui envoiiet i furent, que les Englois avoient pris place et pièce de terre au dehors de la ville de Creci en Pontieu. Et fu dit ensi au roi: «Sire, à ce que il moustrent et sont ordonné, il vous atenderont, et auerés la bataille.» De ces nouvelles fu li rois Phelippes tous resjois, et conmanda à ses marescaus et au mestre des arbalestriers que il regardaissent que toutes gens fuissent prest et ordonné, car le samedi on iroit combatre les Englois. Chil obeirent au conmandement dou roy, et se apparillièrent li signeur de France et lors gens de tous poins. Là estoient logiet dedens Abbeville et venu pour servir le roi, premierement li rois de Boesme, messires Carles de Boesme son fils, rois d’Alemagne, li contes de Alençon, li contes de Flandres, li contes de Blois, li dus de Lorainne, li contes de Harcourt, li contes de Namur, li contes d’Aumale, li contes de Forois, li contes d’Auçoire, li contes de Sansoire, le daufin d’Auvergne, le conte de Boulongne et tant de nobles et hauls signeurs que la matère en seroit trop longe au prononchier et au nonmer. Et estoit la ville de Abbeville, qui est une ville grande et estendue et bien logans, si raemplie de gens d’armes que tout estoit plain et pris, et encores tous les villages de là environ. Mesires Godemars dou Fai se tenoit en la ville de Saint Riquier, et n’osoit venir à Abeville deviers le roi Phelippe, car il le sentoit trop crueuls, pour tant que, sus sa garde et carge, li rois d’Engleterre et les Englois estoient passet oultre à la Blanqe Taqe. Et de ce il estoit bien consilliés, car voirement se il fust venus avant deviers le roi, entrues que il estoit en son aïr, il euist fait le dit messire Godemar dou Fai pendre, jà ne l’en euist respité ne deporté. Et en avoit parlé moult hault li dis rois sus celle fourme, là où mesires Jehans de Hainnau estoit presens. Encores atendoit li rois de France le conte de Savoie et mesire Lois de Savoie son frère, qui venoient à bien mil lances de Savoiiens et de Geneuois. Par especial, la poisance dou roi de France estoit trop grande enviers ceste des Englois, car li rois de France avoit bien vingt mil honmes d’armes et soissante [mil] honmes de piet des conmunautés dou roiaulme de France et bien vingt mil Geneuois arbalestriers; et li rois d’Engleterre, quatre mil honmes d’armes et douze mil archiers. Nous retournerons au roi d’Engleterre et parlerons de son couvenant. F^os 117 vº et 118.

P. 167, l. 20: au souper.—Ms. B 6: à l’abeie Saint Pière. Fº 318.

P. 167, l. 22: premierement.—Le ms. B 6 ajoute: messires Charles de Behaingne, ses filz, qui jà avoit enchergiet les armes, le roy de Navare. F^os 318 et 319.

§ 274. P. 168, l. 8: Ce venredi.—Ms. d’Amiens: Che venredi, si comme je vous ai dit, se loga li roys englès à plains camps à toutte son host, et se aisièrent bien de ce qu’il avoient: che fu assés, car il avoient trouvet le pays moult cras de vins et de touttez autres pourveances. Si donna à soupper che venredi tous lez baronz et le plus des chevaliers de son host, et leur fist moult grant chière, et puis leur dounna congiet d’aller reposer, si comme il fissent. Ceste meysme nuit, ensi que jou ay oy depuis recorder, quant touttes ses gens furent parti de lui et qu’il fu demourés dallés les chevaliers de son corps et de sa cambre, il entra en son oratore et fu là en genoulx et en orisons devant son autel, en priant à Dieu que il le laiast partir de le besoingne à honneur. Environ mienuit il alla couchier, et se leva l’endemain assés matin par raison, et oy messe et s’acumenia, et ses fils li prinches de Gallez ossi, et en tel mannière li plus de l’host. Et oïrent tout li seigneur messe et s’acumeniièrent et confessèrent et se missent en bon estat.

Apriès les messes, li roys commanda à touttes gens armer et yssir de lor logeis et à traire sus les camps, et fist faire un grant parck priès d’un bois de tous les chars et charettez de l’host, liquelx pars n’eut qu’une seule entrée, et fist mettre tous les chevaux dedens che parck, puis ordounna trois bataillez bellement et sagement. S’en dounna la premierre à son aisnet fil le prinche de Gallez à tout douze cens armures de fier, quatre mil archiers et quatre mil Gallois de son pays, et mist son fil en le garde dou comte de Warvich, dou comte de Kenfort, dou comte de Kent, de monseigneur Godeffroy de Halcourt, de monseigneur Renaut de Gobehen, de monseigneur Richart de Stanfort, de monseigneur Jehan de Biaucamp, de monseigneur Thummas de Hollandes, de monseigneur Jehan Camdos et de pluisseurs autres bons chevaliers et escuiers. Et donna la seconde bataille au comte de Norhantonne, au comte de Sufforch, à l’evesque de Durem, à monseigneur Loeis de Biaucamp, au seigneur de le Ware, au seigneur de Willebi et as pluisseurs autres bons chevaliers et escuiers, à tout douze cens armures de fier et trois mil archiers. Et la tierche il retint pour lui, qui devoit estre [entre] ces deux batailles, à tout quinze cens ou seize cens armurez de fier et quatre mil archiers et le remannant de pietons. Et sachiés que tout estoient Englès ou Gallois: il n’y eult miez plus hault que six chevaliers d’Allemaingne, desquelx fu li ungs messire Rasses Masurez, je ne say lez autrez noummer, et messires Oulphars de Ghistellez, de Hainnau.

Quant li roys eut enssi ordonné sez batailles par l’avis de ses marescaux en un biel plain camp devant son parck deseure dit, là où il n’avoit fraite ne fosset, et tout estoient à piet, il alla tout autour de renck en renck, et leur amonestoit de si bonne chière, en riant, de chacun bien faire son devoir, que ungs homs couars en deuwist hardis devenir. Et coummanda sour le hart que nuls ne se meuvist ne desroutast de son renck pour cose qu’il veist, ne alast au gaaing, ne despouillast mort ne vif, sans son congiet, coumment que li besoingne tournaist; car, se li fortune estoit pour yaux, chacuns venroit assés à tamps et à point au gaaing; et, se li fortune estoit contre yaux, il n’avoient que faire de gaegnier. Quant il ot tout ordonnet et coummandé ensi comme vous avéz oy, il donna congiet que chacuns alast boire et reposer jusqu’au son de le trompette, et quant li trompette sonneroient, que chacuns revenist à son droit renck, desoubz se bannierre, là où ordonnéz estoit. Si fissent touttez gens son coummandement, et s’en allèrent boire et mengier un morsiel et rafreschir pour y estre plus nouviel, quant il besongneroit. Fº 93 vº.

—Ms. de Rome: Ce venredi, ensi que je vous ai dit, se loga li rois d’Engleterre à plains camps o toute son hoost, et se aisièrent de ce que il orent. Il avoient bien de quoi, car il trouvèrent le pais cras et plentiveus de tous vivres, de vins et de viandes, et estoient bien pourveu sus lors sonmiers, car il en avoient grant fuisson trouvé en Normendie, ou Vexin et en Vismeu. Ce venredi, donna li rois d’Engleterre à souper tous les barons et les capitainnes de son hoost, et lor fist bonne chière et lie, et puis lor donna congiet d’aler reposer, si com il le fissent. Ceste meismes nuit, qant toutes ses gens furent departi de li, et que il fu demorés avoecques les chevaliers de sa cambre, il entra en son oratore, et fu là en genouls et en orisons devant un autel que ses cambrelens avoient fait, ensi que on fait et ordonne pour un roi, qant il est logiés as camps, et reconmenda à Dieu toutes ses besongnes, et li pria affectuesement que il peuist, à son honnour, retourner en Engleterre, et puis ala couchier. Le samedi au matin, il se leva et apparilla, et li princes de Galles, son fils, et aussi fissent tout chil de l’hoost. Et oïrent messe et se confessèrent li rois et ses fils, et la grignour partie de ceuls de l’hoost, et se aqumeniièrent et missent tout en bon estat, car bien sçavoient que point ne partiroient dou jour sans bataille. Qant tout ce fu fait, il fu heure de mengier et boire un cop, et puis entendre à li ordonner et à mettre en ordenance de bataille. Qant il eurent mengiet et beu à lor aise, et il se furent armé et mis en ordenance, il se traissent tout sus les camps en la propre place que il avoient le jour devant aviset.

Et fist faire li rois un grant parc priès d’un bois derrière son hoost, et là mettre et retraire tous chars, carettes et sonmages, et fist encores tous les cevaus entrer dedens ce parc, et demorèrent tout honme à piet; et n’avoit en ce parc que une seulle entrée. Encores là presentement il fist faire et ordonner par son connestable le conte de Herfort et de Norhanton et ses marescaus, trois batailles. Et fu mis et ordonnés en la première Edouwars, son fil, li princes de Galles. Et dalés le prince furent esleu à demorer, pour li garder et consillier, li contes de Warvich, li contes de Kentfort, mesires Godefrois de Harcourt, mesires Renauls de Gobehen, mesires Tomas de Hollandes, messires Richars de Stanfort, li sires de Manne, li sires de le Ware, li sires de Felleton, messires Jehans Candos, mesires Bietremieus de Brouhes, mesires Robers de Noefville, mesires Thomas Clifors, mesires Guillaumes Penniel, mesires Jehans Hacconde, li sires de Boursier, mesires James d’Audelée, mesires Pières d’Audelée, li sires de Basset, li sires de Bercler, li sires de Ponnins, li sires de Moulins et pluisseurs aultres, lesquels je ne puis pas tous nonmer. Et pooient estre en la bataille dou prince environ douse cens honmes d’armes et quatre mille archiers et mille Gallois, trop apertes gens. Si se mist la bataille dou prince en ordenance moult proprement, tout signeur desous sa banière ou son pennon. En la seconde bataille furent li contes de Herfort et de Norhantonne, li contes d’Arondiel, li sires de Roos, li sires de Lussi, li sires de Persi, li sires de Noefville, li sires de Braseton, li sires de Helinton, li sires de Multon, li sires de Fil Watier, li sires de Fil Warin, et pluisseurs aultres et tant que il furent douse cens hommes d’armes et quatre [mille] archiers. La tierce bataille ot li rois pour son corps et pluisseurs bons chevaliers et esquiers; et estoient en sa bataille environ quinse cens hommes d’armes et siis mille autres hommes parmi les archiers.

Qant ces batailles furent ordonnées et mises à lor devoir, et que casquns sçavoit quel cose il devoit faire, on amena le roi une petite blance hagenée: il monta sus, et puis cevauça autour des batailles en priant et en amonestant ses hommes que casquns vosist entendre à bien faire son devoir, et que tout i estoient tenu; et retenoit sus son corps et se ame que pour son hiretage et son bon droit, que Phelippes de Valois li ostoit et perseveroit en ce, il avoit passet la mer et atendoit l’aventure de la bataille. Tout respondirent à lui, chil qui ses paroles entendirent, que loiaument il s’aquiteroient, tant que tout i aueroient honnour, et il lor en saueroit gré. De ces responses les remercia li rois, et puis revint à sa bataille, et descendi de sa hagenée, et se mist à piet avoecques ses gens et manda son fil, le prinche. On li amena et fu adestrés de quatre chevaliers de son corps qui sont nonmé ensi: mesires Jehans Candos, mesires Bietremieus de Bruhes, mesires James d’Audelée et mesires Guillaumes Penniel. Li enfes se engenoulla devant son père: li rois le prist par la main et le baisa et le fist chevalier, et puis le renvoia en l’ordenance de sa bataille, et pria et enjoindi as quatre chevaliers desus nonmés que il en fesissent bonne garde; et il respondirent en inclinant le roi, que tout en feroient lor devoir. Qant ces batailles furent toutes apaisies et mises en pas et en ordenance, ensi que vous avez oï, on ordonna de par les marescaus que casquns s’aseist à terre et mesist son arc ou son bacinet devant lui, pour estre plus frès, qant on asambleroit. Tout ensi que il fu ordonné, il fu fait. Et se reposèrent et rafresqirent les Englois par la fourme et manière que dit vous ai. Or retournons à l’ordenance dou roi de France et des François qui estoient logiet dedens Abbeville. Fº 118.

P. 168, l. 11: voir Sup. var. (n. d. t.)

P. 169, l. 14 et 15: Stanfort.—Mss. A 1 à 6: Pontchardon. Fº 145.

P. 169, l. 15: Manne.—Mss. A 1 à 6, 11 à 14, 18, 19: Mauni, Mauny. Fº 145.

P. 169, l. 15: de le Ware.—Mss. A 18, 19: de Ware. Fº 148 vº.

P. 169, l. 16: Chandos.—Ms. B 6: qui estois tenus pour ung moult vaillant homme d’armes et saige; et estoit delés le banière du prinche, laquelle messires Thomas Ourduwich portoit. Là estoit le sire de le Ware, le sire de la Poule, le sire de Basset et plus de deux mille hommes d’armes et quatre mille archiés. En la seconde bataille, estoit le conte de Norhantonne, le conte de Herfort, le conte d’Arondel, le sire de Manne, messires Hues de Hastinges, le sire de Willeby, messires Thomas Bisse et pluiseurs aultres qui estoient douze cens lanches et deus mille archiers. En la tierche bataille estoit le roy bien acompagniés de barons, de chevaliers et de aultres. Sy estoit delés luy le conte de Sallebrin, le conte d’Arezelles, le conte de Cornuaille, le sire de Lusy, le sire de Persy, le sire de Neufville, le sire de Ros, le sire de Felleton, messire Thomas de Hollande et messire Jehan de Hartecelle. F^os 319 et 320.

P. 169, l. 16: Broues.—Ms. A 7: Bruues. Fº 138 vº.—Mss. A 1 à 6, 15 à 17, 20 à 33: Brunes. Fº 145.—Mss. A 8, 18, 19: Brubbes. Fº 130 vº.—Mss. A 11 à 14: Brubles. Fº 138 vº.

P. 169, l. 17 et 18: Cliffors.—Mss. A 1 à 6, 8, 18 à 22: Clisors. Fº 145.

P. 169, l. 18: de Boursier.—Mss. A 23 à 29: le Boursier. Fº 164.

P. 169, l. 18: Latimiers.—Mss. A 15 à 17: le Latimier. Fº 145 vº.—Mss. A 11 à 14: Latiniers. Fº 138 vº.—Mss. A 18, 19: de Latiniers. Fº 148 vº.

P. 169, l. 21: huit cens.—Mss. A 20 à 22: huit mille. Fº 209.

P. 169, l. 26: d’Arondiel.—Les mss. A 20 à 22 ajoutent: de Labreth. Fº 209.

P. 169, l. 27: Ros.—Mss. A 30 à 33: Rooz. Fº 187.

P. 169, l. 27: Luzi.—Mss. A 30 à 33: Ligy. Fº 187.

P. 169, l. 27: Willebi.—Mss. A 20 à 22: Willebri. Fº 209.

P. 169, l. 29: Tueton.—Mss. A 1 à 6, 11 à 14, 18, 19: Tuecon. Fº 145.—Mss. A 20 à 22: Turcon. Fº 209.

P. 169, l. 29: li sires de Multonne.—Mss. A 15 à 17: Loys de Multonne, monseigneur de la Haze. Fº 145 vº.

P. 169, l. 29: Multone.—Mss. A 1 à 6, 11 à 14: Mulsonne. Fº 145.—Mss. A 18, 19: Mulconne. Fº 148 vº.—Mss. A 20 à 22: Mulcon. Fº 209.

P. 169, l. 29: Alassellée.—Mss. A 23 à 29: de la Selée. Fº 164.—Mss. A 30 à 33: de la Selle. Fº 187.

P. 170, l. 2: cinq cens.—Mss. A 15 à 17: six cens. Fº 145 vº.—Mss. A 20 à 22: huit cens. Fº 209.

P. 171, l. 1 et 2: poissance.—Les mss. A 15 à 17 ajoutent: ainsi qu’il fist. Fº 146.

§ 275. P. 171, l. 3: Ce samedi.—Ms. d’Amiens: Che samedi au matin que li roys englès eult ordounné ses bataillez, si comme vous avés oy, se parti li roys de Franche de Abbeville, qui sejourné y avoit le venredi tout le jour, atendans ses gens, et chevaucha, bannierrez desploiiées, deviers les ennemis. Adonc fu biel veoir ces seigneurs noblement montéz et acemés et cez rices paremens et ces bannierrez venteler et ces conrois par ces camps chevauchier, dont tant en y avoit que sans nombre. Et sachiés que li hos le roy de Franche fu extimés à vingt mil armurez de fier, à cheval, et à plus de cent mil hommes de piet, desquelx il y avoit environ douze mil que bidaus, que Jeneuois. Et li roys englès en avoit environ quatre mil à cheval, dix mil archiers et dix mil Gallois, que sergans à piet. Quant li roys de Franche se fu très sus les camps et eslongiet Abbeville environ deux petittez lieuwez, il ordounna ses bataillez par l’avis de ses marescaux. Et toudis alloient et chevauçoient ses gens avant, bannierres desploiiées, et ossi le sieuvoient il, car li routte estoit si grande que il ne pooient mies chevauchier, ne aller tout d’un froncq. On faisoit les geneuois arbalestriers à leur aise aller tout devant et porter sus chars leurs arbalestres et leur artillerie, car on volloit de yaux coumenchier le bataille et assambler as Englès. Et cilz qui se tenoit che jour le plus prochains dou roy, c’estoit messires Jehans de Hainnau, car li dis roys l’avoit retenu dalléz lui pour deviser et ordounner par son conseil en partie de ses ennemis. Quant li roys de France eut ordounnet ses bataillez et ses conrois, il fist cevauchier avant delivrement pour raconsuir lez Englèz, et si envoya devant pluisseurs appers chevaliers et compaignons pour veoir là où on les poroit trouver ne raconssuiwir, car bien penssoit qu’il n’estoient mies loing. Et toudis alloit li hos avant et li roys ossi. Ainchois qu’il ewist esloingniet Abbeville quatre lieuwez, revinrent li chevalier qui envoiiet y avoient estet, et li dissent qu’il avoient veut les Englèz et qu’il n’estoient mies plus hault de trois lieuwez en avant.

Adonc pria li roys à un mout vaillant chevalier et moult uset d’armez, que on clammoit le Monne de Basèle, et à trois ou quatre autres preus chevaliers ossi, que il se volsissent avanchier et chevauchier si priès des Englès, qu’il pewissent conssiderer leur couvenant. Chil vaillant chevalier le fissent vollentiers et se partirent dou roy, qui tout bellement cevauchoit, mès s’arestoit en souratendant leur revenue. Jà estoit il heure de nonne, et sollaux commenchoit à tourner. Et avoit li roys englès fait sonner ses trompettes, et chacuns dez siens estoit remis en se bataille desoubz se bannierre, si comme ordonnés avoit estet en devant, car bien sentoient que li Franchois les aprochoient. Et seoient touttes mannierres de gens bien et faiticement les dos contre le solleil, et les archiers mis contre les annemis. Enssi et en cel estat les trouvèrent li dessus dit chevalier. Quant il eurent bien conssideré et ymaginé leur couvenant que pour rapporter ent le certaineté, et bien s’en perchurent li Englès, il s’en retournèrent arrière. Si encontrèrent en leur chemin pluisseurs bannierrez des leurs à une lieuwe des Englès, qui chevauçoient toudis avant et ne savoient où il alloient. Si les fissent arester et attendre lez autres, puis s’en revinrent au roy et à son consseil, et dissent qu’il avoient veut et comsideret les Englèz, qui estoient à mains de deux lieuwez de là et avoient ordonnet trois bataillez, et les atendoient bellement. Adonc estoit dalléz le roy messires Jehans de Haynnau, qui le relation oy mout vollentiers, pour tant que li bon chevalier en raportoient verité. Et li dissent cil qui ce rapport faisoient, qu’il regardast quel cose il en volloit faire. Lors pria li roys au Monne de Basèle qu’il en volsist dire son advis, pour tant qu’il estoit durement vaillans chevaliers, et les avoit veu et justement conssideré. Li Monnes s’escuza par pluisseurs foix, et disoit que là avoit tant de noblez seigneurs et de bons chevaliers que sus yaux ne s’en vorroit mies ensonniier. Non obstant ses excusanches et son bel langage, il fu tant priiéz et cargiéz dou roy qu’il en dist son advis en telle mannierre. F^os 93 vº et 94.

—Ms. de Rome: Ce samedi au matin, qant li rois de France ot oy messe en l’abeie de Saint Pière, dedens Abeville, où il estoit logiés, on fist sonner ses tronpètes, liquel cevauchièrent en toutes les rues d’Abeville, pour resvillier gens d’armes, armer et traire sus les camps. Au son des tro[n]pètes dou roi, se armèrent et apparillièrent tous signeurs et toutes aultres gens; et tant en i avoit grant fuisson, que il missent plus de demi jour à widier hors d’Abeville. Et devés sçavoir que onques nobles gens, qui deuissent sentir et considerer que c’est de tels coses, ne se ordonnèrent pis, ne issirent de bonne ville ne ne missent sus les camps, que les François fissent. Li rois issi de Abbeville, mesire Jehan de Hainnau et le signeur de Montmorensi en sa compagnie, et se traist sus les camps. Li rois de Boesme et mesires Carles, ses fils, issirent assés tos apriès li; et tout issoient sans ordenance, ne point n’atendoient l’un l’autre. Qant on ot un petit eslongiet Abbeville, il fu dit au roi: «Sire, ce seroit bon que vous envoiissiés chevauceurs devant, pour aviser le couvenant de vostres ennemis.» Li rois respondi et dist: «On i envoie!»

Donc furent esleu quatre chevaliers usés d’armes, les quels je vous nonmerai: premiers le Monne de Basèle, le signeur de Biaugeu, mesire Mille de Noiiers et mesire Loeis d’Espagne. Chil quatre chevalier se departirent dou couvenant des François et cevaucièrent sus les camps, et si avant aprocièrent les Englois que les Englois euissent bien trait jusques à euls, se il vosissent, mais nennil. Onques ne se desrieulèrent, mais se tinrent tout quoi et les regardèrent en seant. Et qant li quatre chevaliers les orent avisés et considerés, il se missent au retour. Et ensi que il retournoient, il encontroient lors gens qui ceminoient, les auquns à cheval, les aultres à piet et sans ordenance, de quoi il en fissent pluisseurs arester et demorer tous qois sus les camps, car il lor disoient: «Pourquoi allés vous avant, folle gent, sans les banières des marescaus? Vous vos alés perdre: vechi les ennemis devant vous.» Qant chil quatre chevalier furent venu deviers le roi, il s’arestèrent et trouvèrent le roi sus les camps, le conte d’Alençon, le conte de Flandres, le conte de Blois, le duc de Lorraine, mesire Jehan de Hainnau, le signeur de Montmorensi et grant fuisson de nobles signeurs autour de li, car tout s’arestoient, pour tant que il estoit arestés. Qant li rois vei les chevaliers ens sa presence, il volt sçavoir quel cose il avoient veu et trouvé, ce fu raison. Li chevalier regardoient l’un l’autre, et ne voloit nuls parler premiers. Donc regarda li rois sus le Monne de Basèle et li dist: «Monnes, parlés, je vous voel oïr.» F^os 118 vº et 119.

P. 171, l. 30: le Monne de Basèle.—Mss. A 1 à 6: le Moyne de Baselée. Fº 145 vº.—Mss. A 11 à 14, 18, 19: le Moynne de Baseles. Fº 139.—Mss. A 20 à 22: le Moynne de Baselle. Fº 209 vº.—Mss. A 23 à 33: le Moyne de Bascle. Fº 164 vº.

P. 171, l. 31: Noiiers.—Mss. A 23 à 29: Nouyers. Fº 164 vº.

P. 172, l. 22: que on tenoit.—Ms. B 6: pour tant que il estoit le plus rusés de guerre. Fº 322.

§ 276. P. 172, l. 28: Sire.—Ms. d’Amiens: «Sire, vostre conroy sont diversement espars par ces camps: si sera durement tart ainschois qu’il soient ordonné ne rassamblé, car nonne est jà passée. Si consseilleroie que vous fesissiés chy endroit vostre host logier, et demain matin, apriès messe, si ordonnissiéz vos batailles meurement, et puis chevauchissiés par deviers vos ennemis, rengiés sans desroy, el nom de Dieu et de saint Gorge, car je sui certain que vostre annemy ne s’enfuiront mies, ains vous atenderont seloncq che que j’ay veut.»

Chilx conssaulx pleut assés au roy de Franche, et l’ewist vollentiers fait. Si fist envoiier partout as routtez des seigneurs et priière qu’il fesissent retraire leurs bannierrez arrière, car li Englèz estoient là devant rengiés; si volloit là endroit logier jusquez à l’endemain. Bien fu sceu entre lez seigneurs li mandemens dou roy, mès nulx d’iaux ne se volloit retourner, se chil ne se retournoient, qui estoient premiers. Et chil qui estoient devant avanchiet, ne se volloient retourner pour tant qu’il estoient si avant allet, se li autre ne se retournoient premiers, car ce lor sambloit estre homtez, mais il se tenoient quoys. Li autre, qui estoient derière, chevauchoient toudis avant pour tant qu’il voloient y estre ossi avant que li autre ou plus. Et tout ce estoit par orgoeil et par envie, si comme on puet bien supposer, et dont touttes bonnez gens d’armes n’ont que faire, car Dieux et fortune het ces deus visces. Or ne fu mies li conssaux dou bon chevalier tenus, ne li coummandemens dou roy acomplis, dont che fu follie, car oncques bien ne vint de desobeir à son souverain. Tant avoit là de grans seigneurs, de baronnie et de chevalerie, que merveillez seroit à recorder. Si regardèrent li ungs sus l’autre, si comme pour leur honneur avanchier, car, enssi con dist, c’est une bonne envie d’armes, mès que on le face raisonnablement. Fº 94.

—Ms. de Rome: Li Monnes enclina le roi et dist: «Sire, volontiers, puis que vous le conmandés, et ce sera par l’amendement et correction de mes signeurs et compagnons. Nous avons cevauchiet si avant que nous avons veu et consideré le couvenant des Englois. Il sont mis et ordonné en trois batailles, bien et faiticement, et ne font nul samblant que il doient fuir, mais vous attenderont à ce qu’il moustrent. Si conselle de ma partie, salve tousjours le millour conseil, que vous faites toutes vos gens chi arester sus les camps, et logier pour celle journée. Car, avant que li darrainnier puissent estre là où li premier sont, et vos batailles ordonnées et mis en pas, ensi que il apertient, il sera tart et hors d’eure pour courir sus et combatre vos ennemis. Et seront vos gens tous las, et vous trouverés vos ennemis frès et nouviaus, et tous avisés à savoir quel cose il deveront faire. Et ce consel, je le donne et nul aultre; et qui mieuls scet, se le die.» Donc regarda li rois sus son frère, le conte d’Alençon, et sus messire Jehan de Hainnau, et dist: «Il nous samble que chils chevaliers a bien parlé, et nous volons que sa parole soit oïe et tenue.»—«Monsigneur, respondirent li doi desus nonmé, il a parlé bien et sagement, ensi que il apertient, selonch l’usage d’armes; si faites apriès son consel.» Donc s’arestèrent li signeur tous sus l’opinion dou Monne de Basèle, qui fu uns moult vaillans chevaliers et usés d’armes, et le plus proçain dou corps le bon roi de Boesme. Et fu conmandé à deus marescaus de France de faire ordenance sus ces paroles et tantos. Li doi marescal obeirent, ce fu raison, et cevauchièrent li uns devant, et li aultres derrière, en disant et conmandant as bannières: «Arestés, banières, de par le roi, ou nom de Dieu et de monsigneur saint Denis.» Chil qui estoient premiers, à ceste ordenance arestèrent, et li darrainnier, point, mais cevauçoient tout dis avant et disoient que point il ne se aresteroient, jusques à tant que il seroient ausi avant que li premier estoient. Et qant li premier veoient que li darrainnier les aproçoient, il cevauçoient avant et voloient moustrer: «Je sui premiers, et premiers demorrai.»

Ensi par grant orguel et beubant fu demenée ceste cose, car casquns voloit fourpasser son compagnon. Et ne pot estre creue ne tenue la parole dou vaillant chevalier, de quoi il lor en mesvint si grandement, com vous orés recorder assés briement. Ne ausi li rois de France ne si marescal ne porent estre mestre de lors gens, car il i avoit si grant multitude de peuple, et par especial de grans signeurs, que casquns par envie voloit là moustrer sa poissance. Et trop grant temps avoit que point il ne s’estoient veu en parti de bataille avoir, si apparans conme ceste estoit, et cose si notable que la poissance d’Engleterre et la poissance de France ensamble l’un contre l’autre; car tout estoit là des deus roiaulmes, ou dedens Agillon et en Gascongne avoecques le conte Derbi, ou devant Agillon au siège avoecques le duch de Normendie. Si se voloient li un pour l’autre avancier, et non estre nonmé à demorer derrière. Et cevauchièrent en cel estat sans arroi et sans ordenance si avant que il aprochièrent les ennemis, et que ils les veirent en lor presence. Or fu moult grans blames pour les premiers, et mieuls lor vausist à estre aresté à l’ordenance dou vaillant chevalier desus nonmé, que ce que il fissent. Car si tretos que il veirent lors ennemis, il reculèrent tout à un faix si desordonneement que chil qui derrière estoient et qui venoient, s’en esbahirent. Et quidièrent li pluisseur que la bataille fust conmenchie et li premier desconfi; et orent adonc bien espasce de aler devant se il veurent, de quoi li auqun i alèrent. Et li aultre se tinrent tout quoi et ne moustrèrent point adonc de haste, mais laissièrent passer ceuls qui passer voloient, et disoient: «Nous demorrons chi, atendans le roi et ses arrois, car il nous est dit de ses marescaus ensi.» Là ot sus les camps si grant peuple de conmunauté des chités et bonnes villes de France que tout estoit là reversé, et les cemins tous couvers entre Abbeville et Crechi, et plus de euls vingt mil de ces bons honmes, qant ils se veirent sus les camps, traissent lors espées, et escriièrent: «A la mort, ces traitours Englois! Jamais piés n’en retournera en Engleterre.» Fº 119.

P. 173, l. 19 à 22: en disant... saint Denis.—Mss. A 1 à 6, 11 à 14, 18, 19: en disant et commandant aux banières, de par le roy, ou nom de monsigneur saint Denis, que chacun se tenist selon ce que ordonné lui estoit. Fº 146.—Mss. A 20 à 22: en commandant aux bannières, de par le roy, eulx arrester, en nom Dieu et saint Denis. Fº 210.—Mss. A 23 à 33: en disant aux banières: «Arrestés, banières, de par le roy, ou nom de Dieu et de saint Denis.» Fº 165.

P. 173, l. 28: ceste cose.—Ms. B 6: car il estoient sy grant peuple au regart des Englès qu’il lez deuissent avoir tout devorez. Fº 323.

§ 277. P. 174, l. 22: Il n’est nulz.—Ms. de Rome: Vous devés sçavoir, et c’est cose posible et legière assés à croire, que il n’est honme, tant fust presens à celle journée, ne euist bon loisir de aviser et imaginer toute la besongne ensi que elle ala, qui en sceuist ne peuist recorder, de la partie des François, bien justement la verité. Et ce que je en ai escript, je en fui enfourmés de vaillans honmes, chevaliers d’Engleterre qui là furent, et liquel missent grande entente à veoir le couvenant des François: ce furent depuis mesires Jehans Candos et mesires Bietremieus de Brouhes, et de la partie des François li sires de Montmorensi, et des chevaliers messire Jehan de Hainnau; car chil doi hault baron estoient et furent ce jour au frain dou roi Phelippe de France. Mais sitos que les chevaliers usés d’armes, qui estoient de la partie des Englois, veirent le povre couvenant des François, il dissent: «Ces gens sont nostre.» Et aussi li sage chevalier de France et usé d’armes, parellement dissent: «Nous sonmes en parti de tout perdre, car il n’i a point de bonne ordenance en nous.»

Les Englois, qui ordonné estoient en trois batailles, et qui seoient jus à terre tout bellement, sitos que il veirent les François aprochier, ils se levèrent sus, moult ordonneement sans nul effroi, et se rengièrent en lors batailles. Et se mist en grande ordenance ceste dou prince, car elle pensoit bien à avoir le grignour faix de la journée, et missent les archiers tout devant en fourme de une erce, et les gens d’armes ou fons, et la bataille seconde sus une aultre èle, pour reconforter la première, se besoings estoit, et le roi d’Engleterre et sa bataille, encores plus en sus, liquel avoient pris la mote d’un moulin à vent. Et là se tenoit li rois au plus hault, pour veoir plus lonc et autours de li. Et pooit estre li rois adonc en l’eage de trente sis ans, en la flour de sa jonèce, et conforté grandement en ses besongnes. F^os 119 vº et 120.

P. 174, l. 28 et 30: voir Sup. var. (n. d. t.)

§ 278. P. 175, l. 14: Quant li rois.—Ms. d’Amiens: Ensi en chevauchant toudis avant, li maistres des arbalestriers, qui conduisoit les Geneuois, chevauça tant et se routte qu’il se trouvèrent devant les Englèz. Lors s’arestèrent tout quoy et prissent leurs arsbalestrez et leur artillerie, et s’appareillièrent pour coummencher le bataille. Environ heure de vesprez, coummencha ungs esclistrez et ung tonnoire très grans et une pleuve très grosse avoecq un très grant vent; et l’avoient li Franchois ens ou viaire, et li Englès au dos. Quant li maistres des arbalestriers eut ordonné et aroutté les Geneuois pour traire, il coummenchièrent à huer et à juper moult hault; et li Englès [demorèrent] tout koy et descliquièrent aucuns kanons qu’il avoient en le bataille, pour esbahir les Geneuois.

Apriès ce que li oraiges fu passés, li dit mestre des arbalestriers fissent avanchir bidaus et Geneuois, et aller par devant lez bataillez pour traire et pour bersser as Englès et yaux derompre, enssi que coustumme est, et allèrent de si priès qu’il traissent assés li uns as autrez. Et furent assés tost bidaus et Geneuois par lez archiers desconfis et fuisson fuis en voies, se il pewissent; mais les bataillez des grans seigneurs estoient si escaffées pour yaux avanchier et combattre lors ennemis, qu’il n’atendirent ne ung, ne autre, ne ordonnanche, ne aroy; ains coururent tous desordonnés et entremeslés, tant quil encloïrent les Geneuois entre yaux et les Englès, par quoy il ne peurent fuir, ains cheoient li cheval foible parmy yaux, et li cheval fort cheoient parmy les foiblez qui cheu estoient. Et chil qui derière estoient, n’y prendoient point garde pour le priesse; si cheoient parmy chiaux qui ne se pooient relever. Et d’autre part, li archier traioient si espessement et si ouniement à chiaux qui estoient devant et d’encoste, que li cheval, qui sentoient ces saiettez barbues, faisoient merveillez. Li ung ne volloient avant aller, li autre salloient contremont, li pluisseur regettoient fort, li autre se retournoient les culz pour les saiettez qu’il sentoient, par deviers les ennemis, maugret leurs mestres, et chil qui sentoient le mort, se laissoient cheoir. Et les gens d’armes englès, qui estoient rengiet à piet[359], s’avanchoient et se freoient entre ces seigneurs et ces gens qui ne se pooient aidier de leurs chevaux, ne d’iaux meismes, et tenoient daghes, haces et cours espios de gue[r]re, durs et roys, et ocioient gens à leur aise, sans contredit et à peu de fait et de deffensce; car il ne se pooient aidier ne dessonniier li uns par l’autre, ne oncquez on ne vit tel mesaventure, ne perdre tant de bonnes gens à peu de fait.

En telle mannierre dura chilz grans mesciéz pour lez Franchois jusques à le nuit, car li nuis les desparti. Et jà estoit vesprez, quant li bataille coummencha; ne oncques li corps dou roy de Franche, ne nulz de se bannierre ne peut che jour parvenir jusques à le bataille. Ossi ne fissent nullez des commugnez des bonnes villez de Franche, fors tant que li sires de Noiiers[360], ungs anchiens chevaliers et durement preudons et vaillans, porta l’oriflambe, la souverainne bannierre dou roy, si avant qu’il y demoura. Fº 94.

—Ms. de Rome: Qant li rois Phelippes de France vint auques priès de la place où les Englois estoient aresté et ordonné et il les vei, se li mua li sans, car moult les avoit encargiet en grant haine, et perdi tous pourpos et arrois sus l’estat que li Monnes de Basèle avoit dit et ordonné, et dist tout en hault: «Par m’ame et par mon corps, je voi mes ennemis, mais je les voel aler combatre. Faites traire avant ces Geneuois et conmenchier la bataille, ou nom de Dieu et de monsigneur saint Denis.» Donc fu faite voie as arbalestriers, et moustroient les auquns que point il n’i aloient de bonne volenté, car jà il estoient tous las de venir à piet de Abbeville jusques à là, où il i a siis lieues, et de porter lors arcs. Ces Geneuois pooient estre environ quinse mille. Li mestres des arbalestriers des Geneuois dist tout en hault: «On nous fait issir hors de l’ordenance des marescaus. On nous avoit dit que nous reposerions meshui ichi, et entenderions à mettre nostre artellerie à point; et on voelt, tous lassés que nous sonmes, que nous alons tantos combatre!» Ces paroles furent ditets et reprises au conte d’Alençon, qui durement en fu courouchiés, et dist à ceuls qui estoient dalés li: «Regardés, on se doit bien cargier de tèle ribaudaille! Il ne sont bon, fors à la table. On tue tout! Il nous porteront plus d’empecement que de avancement.» Entrues que ces paroles et detriances couroient, et que chil Geneuois se requelloient, descendi dou chiel une plueve si grose et si espesse que mervelles fu à considerer, et conmença à esclitrer et à tonner, et sambla proprement que li mondes deuist finer. Avoecques tout ce, il vint une vollée de corbaus, si grande et si espesse, en vollant pardesus les deus hoos et en demenant très grant noise. Adonc dissent auquns chevaliers, et de l’une part et de l’autre: «Il auera, avant que il soit nuit, ichi très grande bataille et effusion de sanc et mortalité de honmes, sur qui que li affaires tourne.»

Apriès toutes ces coses, li temps s’apaisa et li solaus conmença à luire sus l’eure de basses vespres, biaus et clers. Li François l’avoient en l’oel, et li Englois au dos. Qant chil Geneuois furent tout requelliet et mis ensamble, et il deubrent aprocier les Englois, il conmenchièrent tout de pluisseurs vois à juper si hault que ce fu mervelles. Et fissent ceste ordenance pour les Englois esbahir, mais les Englois n’en fissent compte, assés tos apriès la seconde fois en tèle manière et la tierce ensi, et il l’ont de usage; et puis passèrent avant et tendirent lors arbalestres, et conmenchièrent à traire. Et qant chil archier d’Engleterre veirent ceste ordenance, il passèrent un pas avant, et puis fissent voler ces saiètes, les quelles entrèrent et descendirent si ouniement sus ces Geneuois que ce sambloit nège. Li Geneuois, qui point n’avoient apris à trouver tels archiers que chil d’Engleterre sont, qant il sentirent ces saiètes qui lor perchièrent bras et poitrines, et lors ceoient sus lors visages et de plus lonc que il ne pooient traire, se conmenchièrent à esbahir et furent tantos desconfi. Et coppèrent li pluisseur les cordes de lors arbalestres, et les aultres les ruèrent jus, et conmencièrent à tourner les dos et moustrèrent samblant que il voloient fuir, mais il ne peurent, car il furent enclos des gens d’armes. Et li rois de France et son frère, le conte d’Alençon, qant il veirent le mauvais couvenant de euls, dissent: «Tués la pietaille! Tués la pietaille! Il nous ensonnient et tiennent le cemin sans raison.» Là veissiés gens d’armes entouelliés entre euls ferir et fraper sus euls et ocire, et moult de vaillans honmes, euls et lors cevaus, ceoir et tresbuchier parmi euls, que on ne pooit aidier ne relever. Et toutdis traioient archier englois esforciement ou mont, et ne perdoient nuls de lors trais, car il enfieroient et enpalloient parmi les corps, ou parmi chevaus, ou testes ou bras ou jambes de gens d’armes, par telle manière que on estoit mehagniet trop durement ou bleciet ou mort, et si ne savoit on d’où les saiètes venoient. Ensi se conmença la bataille, ce samedi, à heure de basses viespres, tout oultre l’ordenance et la volenté des vaillans honmes qui avoient consilliet que on se logast là ce samedi devant les Englois, et que le dimence on aueroit avis conment on se poroit ordonner. Fº 120.