VARIANTES. (continued 5)

P. 125, l. 6 et 7: voir Sup. var. (n. d. t.)

§ 251. P. 125, l. 8: De telz rencontres.—Ms. d’Amiens: Encorres avoecq tout che, chil seigneur de France fissent ung jour armer tous chiaux de l’host, et coummandèrent que chil de Toulouse, chil de Charchasonne, chil de Biauquaire et tout chil de leur senescaudie assausissent dou matin jusquez à miedi; et chilx de Chaours, de Roerghe, de Aghinois, à leur retrète jusquez au viespre; et chilz qui premiers poroit gaegnier le premier pont dou castiel, on li donroit tantost cent escus. Li dus de Normendie, pour mieux furnir cel assault, fist assambler grant plenté de nefz et de chalans. Li aucun entrèrent ens pour passer le dite rivierre, et li aucun passèrent au pont. Chil dou castel, qui virent l’ordonnance de l’assault, furent tout appareilliet de eux deffendre. Lors coummencha uns plus fors assaux qu’il n’avoient encorres eut. Qui donc veist gens abandonner vie et corps, et aprochier le pont pour gaegnier les cent escus et presser l’un sour l’autre si comme par envie, et qui regardast chiaux du castiel ossi yaux deffendre vassaument, il se pewist bien esmervillier. Finablement, au fort de le besoingne, aucun se missent par une nacelle en l’iauwe par desoubz le pont, et jettèrent grant kros de havés au pont leveis, et puis tirèrent si fort qu’il rompirent lez chainez qui le pont tenoient, et le abaissièrent jus par forche jusquez au droit pont. Qui adonc veist gens lanchier sus ce pont et trebuchier li ungs sus l’autre dix ou douze en ung mont, et veist chiaux de le porte d’amont jetter grandes pières, pos de cauch et grans mairiens, bien pewist veir grant fuisson de gens mehaignier et morir et jus del pont trebuchier, qui oncques puis ne se relevèrent. Touttesvoies fu li pons gaegniés par forche au darains jusques à le maistre porte, mès il cousta grandement de leurs gens assés plus qu’il ne vaulsist. Quant li pons fu gaegniés, chil de l’host eurent plus affaire que devant, car il ne peurent aviser voie coumment il peuissent gaegnier le porte. Si se retraissent à lors logeis, car il estoit tart et priès de le nuit. Si avoient besoing de reposer. Quant il furent retret, chil dou castiel yssirent hors et refissent le pont plus fort que devant. Fº 88.

—Ms. de Rome: De tels rencontres et de tels hustins i avenoient souvent, le siège tenant, sans les assaus et les escarmuces qui estoient priès que tous les jours à chiauls dou chastiel. Et ce estoit grandement en la desplaisance le duch de Normendie et des signeurs de France. Et seoient là plus par erredrie que pour cose que li chastiaus vausist quatre fois, ne toutes les signouries qui au chastiel apendoient, mais tous les jours il le quidoient avoir à volenté et ceuls qui dedens estoient. Ce estoit la cause pour quoi tant il s’i tenoient, ne point il ne s’en voloient partir ne aler avant, non que li chastiaus de Agillon demourast derrière à lor contraire; car avis lor estoit, se il le laissoient derrière, et elle lor fust ennemie, elle lor torroit lors pourveances par terre et par aige. Pour ce et pour lor honnour, rendoient ils grant painne à l’avoir. Et de ce se arguoit durement li dus de Normendie que tant se tenoient, et que si vaillanment les Englois, qui dedens estoient, se portoient. Et avoit juret li dus de Normendie que le siège d’Agillon ne leveroit par nulle condition que ce fust, se li rois, son père, ne le remandoit, si aueroit les Englois, qui dedens Agillon estoient enclos, à sa volenté. Or avisèrent li François une autre manière d’asaut, et fist on armer un jour tous ceuls de l’hoost; et qant il furent armé, li signeur ordonnèrent que chil de Toulouse, de Carcasonne, de Biauqaire et tout li honme des senescaudies desus dictes qui là estoient, fesissent assaut dou matin jusques à midi, et chil de Bighorre, de Roergue, de Qersi et d’Aginois, à lor retraitte, jusques à viespres, et chils qui premierement poroit conquester le pont aueroit cent esqus.

Li dus de Normendie, pour mieuls furnir cel assaut, fist venir et asambler sus la rivière grant plenté de nefs et de calans. Li pluisseur entrèrent dedens pour passer la ditte rivière, et li auqun passèrent au pont que il avoient fait. Qant chil dou chastiel veirent l’ordenance de l’assaut, si furent tantos tout apparilliet pour deffendre. Lors conmença uns trop plus fiers assaus que il n’i euist encores eu. Qui veist là gens abandonner vies et corps, et aprocier le pont pour la convoitise de cent esqus gaegnier, et presser l’un sus l’autre ensi que par envie, et qui veist aussi cheuls dou chastiel euls deffendre vassaument, de toutes ces coses il se peuist grandement esmervillier. Finablement, au fort de la besongne, auqun appert compagnon se missent en un batiel desus la rivière, et vinrent desous le pont et jettèrent grans gros cros et havés de fier au dit pont leveis, et puis tirèrent si fort que de force il rompirent les chainnes que le pont portoient et tenoient, et l’avalèrent jus par force. Et qui adonc veist gens lancier sus ce pont et tresbuchier l’un sus l’autre, diis ou douse en un mont, et qui veist ceuls de la porte d’amont, as deffenses, jetter pières et blechier honmes, il peuist de toutes ces coses avoir grant mervelle, et moult en i ot de trebusciés en l’aige. Toutes fois li pons fu conquis par force, mais il cousta grandement des François plus que il ne vausist. Qant li pons fu gaegniés, chil de l’hoost eurent plus à faire que devant, car il ne porent aviser voie conment il peuissent gaegnier la porte. Si se retraissent à lors logeis, car jà estoit tart, et avoient li plus bien mestier de reposer. Qant il furent retrait, chil dou chastiel issirent hors, et tantos il entendirent au pont refaire, et le refissent plus fort que devant. F^os 108 vº et 109.

§ 252. P. 126, l. 25: A l’endemain.—Ms. d’Amiens: A l’endemain, vinrent doy maistre enghigneour au ducq et as seigneurs de son consseil et dissent, se on les volloit croire et livrer bois et ouvriers à fuison, il feroient quatre grans cas, fors et haulx, sour quatre grandes fortes nefs que on menroit jusques as murs dou castel, et seroient si hault qu’il sourmonteroient lez murs, par quoy chil qui dedens lez cas seroient, se combateroient main à main à ciaux qui seroient sour les murs. Li dus y entendi vollentiers, et coummanda que chil quatre cat fuissent fait, quoy qu’il dewissent couster, et que on mesist en oeuvre tous les carpentiers dou pays, et que on leur payast largement leur journée, par quoy il ouvraissent plus apertement et plus vollentiers. Chil quatre chat furent fait à le devise et ordonnanche dez deux maistrez en quatre fortez nefs, mès on y mist longement, et coustèrent grans deniers. Quant il fu parfait et les gens d’armes dedens entré, qui à chiaux dou castiel devoient combattre, et il eurent passet le moitiet de le rivierre, chil dou castiel fissent desclichier quatre martinéz que il avoient nouvellement fait faire pour remediier contre lez quatre cas dessus diz. Chil quatre martinet jettèrent si grosses pièrez et si souvent sus ces cas, qu’i[l] furent bientost [si] debrissiet, que lez gens d’armez et chil qui les conduisoient, ne se peurent dedens garantir. Si les couvint retraire arrière, ainschois qu’il fuissent oultre le rivierre. Et en fu li uns effondrés el fons de l’aige, et le plus grant partie de chiaux qui dedens estoient, noiiet: dont che fu pitéz et dammaiges, car il y avoit des bons chevaliers et escuiers. Fº 88.

—Ms. de Rome: A l’endemain vinrent doi mestre des enghiens que li dus de Normandie avoit mandés et fait venir de moult lonc à grans coustages. Et dissent au duch et as signeurs: «Faites nous delivrer bois et ouvriers, et nous ferons et ordonnerons quatre enghiens que on nomme kas, et les ferons hauls et fors et bien batilliés, et sus quatre fortes nefs, que on menra jusques as murs dou chastiel; et seront si très hault que il sourmonteront les murs. Et auera, en ces kas, estages où gens d’armes se meteront, et se combateront, main à main, à ceuls de dedens, et par cel assaut, se jamais il doivent estre conquis, il le seront.» A ces paroles entendirent li dus de Normendie et li signeur volentiers, et leur sembla raisonnable. Et furent tantos ouvriers mis en oevre, bos amenés et achariiés, et estoient bien deus cens carpentiers ouvrans. Et furent fait chil enghien, nonmés kas, sus quatre grosses nefs, à la devise et ordenance des deus mestres enghienneours, qui menoient les ouvriers. Qant chil enghien nonmés kas furent parfait, et les gens d’armes dedens entré qui à ceuls dou chastiel devoient combattre, et il orent passet la moitiet de la rivière, chil dou chastiel fissent descliqier quatre martinés que il avoient nouvellement fait faire, pour remediier contre les quatre kas desus dis. Chil quatre martinet jettèrent grosses pières et si souvent sus ces kas que il furent bientos tous confroissiés et debrisiés, que les gens d’armes, qui dedens estoient et chil qui les conduisoient, ne se peurent garandir. Si les couvint retraire arrière, avant que il fuissent oultre la rivière. Et en fu li uns effondrés au fons de l’aige, et la plus grant partie de ceuls qui dedens estoient, noiiet: dont ce fu pités et damages, car il i avoit de bons chevaliers et esquiers, qui grant desir avoient de lors corps, pour leur honnour, avanchier. Fº 109 vº.

§ 253. P. 127, l. 28: Quant li dus.—Ms. d’Amiens: Quant li dus de Normendie et li signeur de France virent le grant mescief, et que par ce il ne pooient venir à leur entente, il furent mout courouchiet; et fissent les autres trois nefs et les chas cesser et retraire, et yssir hors tous chiaux qui dedens estoient. Si ne pooient li seigneur plus aviser voie, mannierre ne enghien coumment il pewissent le fort castiel de Aguillon concquerre, et se n’y avoit duc, ne comte, tant fust grans sirez, ne prochains de linage au ducq de Normendie, qui osast parler dou deslogier; car li dis ducs en avoit parlet moult avant qu’il ne s’en partiroit, si aroit le castiel à se vollenté et chiaux qui dedens estoient, non se li roys ses pèrez ne le remandoit. Si avisèrent li seigneur que li comtez de Blois, li comtes de Ghinnez, connestablez de Franche, li comtez de Tancarville se partiroient dou siège et s’en repairoient en Franche pour compter au roy le mannierre dou siège et quel cose li roys volroit que li dus sez filz en ordonnast. Si se partirent chil troi seigneur dessus nommet, et aucun chevalier de Franche ossi, par le bon congiet dou ducq, et s’en revinrent à Paris deviers le roy de Franche, et lui recordèrent toutte l’ordonnance dou siège d’Aguillon et le couvent de chiaulx de l’host et ossi de cheux dou castiel. Si en fu li roys moult esmervilliéz coumment tant se pooient tenir, et ne remanda mies adonc le duc son fil, mès s’acorda bien à ce que il tenist le siège et que il les conquesist par afammer, puisque par assault ne les pooit avoir. Or vous lairons à parler dou siège d’Aguillon, et parlerons dou roy englès et coumment il ariva en Normendie, en l’ille de Coustentin, en celle meysme saison, sus l’enort de monseigneur Godeffroy de Halcourt. Fº 88 vº.

—Ms. de Rome: Qant li dus de Normendie et li signeur de France veirent le grant mescief, et que par ce il ne pooient venir à lors ententes, il furent moult courouchiet, et fissent les aultres trois nefs et les kas cesser et retraire, et issir hors tous ceuls qui dedens estoient. Si ne pooient li signeur plus aviser voie, manière ne enghien conment il peuissent le chastiel de Agillon avoir et destruire. Et se n’i avoit prince ne baron, tant fust grans sires ne proçains de linage au duc de Normendie, qui osast parler dou deslogier, ne aler d’aultre part entendre, car li dus en avoit parlé moult avant que point de là ne se departiroit, si aueroit le castiel à sa volenté et ceuls qui dedens estoient, con longement que il i deuist mettre, non se li rois son père ne le remandoit. Si avisèrent li signeur que li contes de Ghines, connestables de France, et li contes de Tanqarville se departiroient dou siège et s’en retourneroient en France, pour remoustrer au roi l’estat de son fil, le duch de Normendie, et dou siège qui tant avoit cousté et coustoit encores tous les jours. Si se departirent de l’oost chil doi conte desus nonmé, assés par le gré et congiet dou dit duch, et cevauchièrent tant par lors journées que il vinrent à Paris, et trouvèrent le roi et la roine et la duçoise de Normendie et les dames. Si furent chil signeur conjoi et requelliet liement dou roi et de la roine, de tous et de toutes; et demandèrent de l’estat dou duch et dou siège. Il lor en comptèrent assés. Si demora la cose ensi et li sièges devant Agillon. Nous nos soufferons à parler dou duc de Normendie, et parlerons dou roi d’Engleterre. Fº 109 vº.

§ 254. P. 128, l. 29: Bien avoit.—Ms. d’Amiens: Vous avés bien chy dessus oy coumment messires Ghodeffroix de Halcourt, qui estoit li uns dez plus grans barons de Normendie, escei en le indination et malivolensce dou roy Phelippe de Franche, et ossi coumment il vint en Engleterre, où li roys englès le rechupt liement et le retint de son hostel et de son consseil, et le assigna de terre et de pencion grande et rice pour lui et pour son estat. Chilx messires Godeffroix avoit pris en grant anoy et despit le courouch dou roy de Franche, et mettoit et rendoit toutte le painne qu’il pooit, que li roys englèz volsist ariver en Normendie. Et bien li disoit que Normendie estoit ungs dez gras pays de tout le monde et dez plentiveux de tous biens, et que trop grandement il y feroit le prouffit de lui et de ses gens. Tant consilla et enhorta le roy englès que il eut affection et desir de y venir et de faire une chevauchie en Franche plus grande que oncque n’avoit fait; si fist tout cel estet son apparreil très grant et très gros de touttes coses. Et entroes qu’il s’appareilloit, pluisseurs lettrez li vinrent de Gascoingne dou comte Derbi, son cousin, qui se tenoit à Bourdiaux, et li segnefioit à quel puissance li dus de Normendie seoit devant Aguillon et avoit ou dit castiel asegiet ses gens. Si eut li roys pluisseurs pourpolx, et touttesfoix celli où il s’enclinoit le plus, estoit de aller lever le siège devant Aguillon et combattre lez Franchois.

Et messires Godeffrois de Halcourt, d’autre part, le reconssilloit de ariver en Normendie, si comme vous avés chy dessus oy, si ques li roys englès, sus cel estat, fist ung grant appareil de naves et de vaissiaux, grans et petis, et de touttes pourveanches qui à gens d’armes appertiennent, et les fist touttez aroutter et appointier ou havene de Hantonne; et fist un especial et grant mandement de tous ses hommes dont il se pooit aidier, à estre à Londres ou environ, le vegille monseigneur Saint Jehan Baptistre. Tout y furent au jour denommet, pourveu et garni pour passer le mer avoecq lui. Assés tost apriès le jour Saint Jehan, li roys parti et prist congiet à le roynne sa femme, et le recoummanda en le garde dou comte de Kent son cousin, dou seigneur de Perssi et dou seigneur de Noefville, et son royaumme en le garde de ces seigneurs et de quatre prelas, l’archevesque de Chantorbie, l’arcevesque d’Iorche, l’evesque de Lincolle et l’evesque de Durem; et n’eswuida mies son royaume tellement que il n’y demorast assés de bonne gent pour le garder et deffendre, se mestiers faisoit.

Li rois englès s’en vint à Hantonne, et là entra en mer et touttes ses gens ossi, dont il y avoit belle carge. Et pooient y estre quatre mil hommez d’armes et dix mil archiers, sans les Galès et aucuns Irois qui sieuwoient son host tout à piet. Or vous nommeray aucuns seigneurs qui estoient avoecq le roy: premiers li prinches de Galles ses filx, qui lors estoit en l’eage de treize ans ou environ, li comtez de Herfort, li comtez de Norrenton, li comtez de Cornuaille, li comtes de Warvich, li comtez de Sufforch, li comtez d’Arrondiel, le comtez de le Marche, li comtez de Hostidonne, messires Renaux de Gobehen, messires Jehans de Biaucamp, messires Loeys de Biaucamp, messires Rogiers de Biaucamp, li sirez de Ros, li sirez de le Ware, li sirez de Felleton, messires Guillaummes Filx Warine, li sires de Willebi, messires Guillaumme de Windesore, li sires de Brasseton, li sirez de Multon et pluisseur autre banereth et chevalier. Et se missent en mer et singlèrent che premier jour à l’ordonnance dou vent et dez maronniers au léz deviers l’ille de Grenesie. Et fist li roys patron de se nave monseigneur Godeffroy de Halcourt, en qui il avoit grant fiance. Fº 88 vº.

—Ms. de Rome: Bien avoit li rois d’Engleterre oy recorder que li François tenoient les camps en Gascongne, et que li dus de Normendie, à poissance de gens d’armes, seoit devant Agillon. Et tout l’estat dou pais, ses cousins, li contes Derbi, li avoit escript, et que sur ce il euist avis et consel, car ensi que li pais avoit esté gaegniés, il se perderoit, se on n’i pourveoit. Et se il estoit perdus, ce ne seroit point à recouvrer en grant temps ou espoir jamais, car les villes se fortifieroient et garniroient aultrement et plus fort que il n’euissent esté en devant. Et aussi li chevalier dou pais qui tourné françois estoient, jamais ne retourneroient en l’obeissance dou roi d’Engleterre; et tout li aultre, qui espoir poroient venir à celle volenté, n’i prenderoient point bon exemple. Toutes ces coses considera bien li rois d’Engleterre. Si eut avis et volenté que, à poissance de gens d’armes et d’archiers, il passeroit la mer, et s’en iroit prendre terre à Bourdiaus sus la Geronde et lever le siège de devant Agillon; à tout le mains, il en feroit son acquit. Si fist un mandement et semonse de gens d’armes à estre à Londres as octaves de la Saint Jehan Baptiste. Tout i furent, chil qui mandé et escript estoient. Et se departi li dis rois dou chastiel de Windesore, et vint à Cènes, et de là à Eltem, et toutdis estoit la roine en sa compagnie. Qant li rois d’Engleterre ot tout son estat ordonné, et ses pourveances furent prestes, et sa navie toute ordonnée, tant à Wesmude, à Pleumude et à Dardemude, il fist traire ses gens petit à petit de celle part, et cargier la navie, et puis prist congiet à la roine, et le reconmanda en la garde des Londriiens. Et puis se departi et enmena avoecques lui, son fil, le prince de Galles, Edouwart, l’ainnet de tous ses enfans, et pooit avoir pour lors environ quinse ans.

Avoecques le roi et moult proçains de li, se tenoit mesires Godefrois de Harcourt, liquel estoit banis et escaciés dou roiaulme de France, ensi que vous savés et que dit est en l’istore ichi desus. Chils Godefrois de Harcourt fu uns chevaliers de grant corage, et moult vaillans de consel et d’armes, selonch sa poissance, car il fu boisteus moult fort. Mais pour ce ne demora mies que il ne fust hardis et entreprendans, et ne daigna onques fuir en bataille; et avoit pris ce que on l’avoit escachiet hors de France et bani, en grande ingratitude et desplaisance. Et proposoit que, par envie, fraude et mauvesté, on li avoit fait ce blame, et que tout estoit pour garder et tenir en droit et soustenir les coustumes et libertés normandes. Et pour ce que trop avant il en avoit parlé à l’encontre de la majesté roiale, on l’avoit pris en indignation, si ques trop volentiers il en veroit, ce disoit il au roi d’Engleterre et à auquns barons d’Engleterre, son coer esclarchi et sa contrevengance. Et rendoit grant painne à ce, et consilloit que li rois d’Engleterre et sa navie presissent terre en Normendie; et leur disoit que trop bien il les menroit et ou millour pais, plus rice, plus cras et mieuls pourveus de tous biens qui fust ou monde. Et disoit ensi: «Sire, de une marée, nous i serons et ne trouverons honme qui nous contredie.» Li rois d’Engleterre entendoit as paroles messire Godefroi de Harcourt et les sentoit, contenoit assés, et trouvoit bien dalés li qui li consilloit à faire; mais son corage s’enclinoit à ce que ses gens, qui estoient enclos dedens le chastiel d’Agillon, fuissent réconforté, car il gissoient là en peril et en dangier. Et respondoit à ce, et disoit: «Godefroi, je sçai assés que vous me consilliés loiaument, mais il faut premierement entendre au plus disseteus, et [qant auerons] nous esté par de delà et viseté Bourdiaus et le pais, jamais en Engleterre ne retournerons, si auerés veu une partie de vostre desir.»

Ensi se devisoient li rois d’Engleterre et messires Godefrois de Harcourt ensamble. Et tant vinrent que il se trouvèrent à lor passage, où toutes les nefs estoient apparillies et cargies, ensi que conmandé et ordonné estoit. Et euls venu, il n’i sejournèrent point longement, car il avoient tout pourveu, et vent à volenté. Si entrèrent tout generaulment en lors vassiaus, et se desancrèrent et entrèrent en la mer, et levèrent les voilles amont. Et estoit li intention dou roi de prendre la mer pour aler en Gascongne et à Bourdiaus, mais qant il furent en la mer et il quidièrent esploitier et avoir le vent pour euls, ils l’orent tantos si contraire que il ne pooient aler avant. Et les couvint jesir à l’ancre à l’encontre des isles de Normendie, et tant que li rois en estoit tous anoieus. Adonc li dist messires Godefrois de Harcourt: «Sire, soiiés tous certains que Dieus voelt que nous alons en Normendie. Si vous pri que vous creés Dieu et le vent, et vous verés proçainnement que vostres besongnes en vaudront mieuls.»—«Godefroi, respondi li rois d’Engleterre, se li chastiaus d’Agillon et chil qui sont dedens enclos, estoient en Normendie, je seroie bien tos consilliés de traire celle part; mais il fault et si apertient que nous alons à plus digeteus devant, et reconfortons ceuls qui gissent en dangier et en peril.» A ces paroles respondi messires Godefrois de Harcourt et dist: «Sire, conment les poés vous faire plus grande aïe que de entrer dedens le roiaulme de France et tantos, et faire forte gerre? Vous chevaucerés et tout vostre hoost jusques ens ès portes de Paris, et jà ne trouverés qui vous empèce, ne contredie vostre cemin. Et par le voiage que vous ferés ensi parmi le roiaulme de France, se levera li sièges de devant Agillon; car toutes gens d’armes, où que il soient, seront mandé pour venir à l’encontre de vous et vous combattre. Et li dus de Normendie et li grant baron de France, qui seent devant Agillon, ne seront pas oubliié, ne mis derrière que il ne soient remandé.» Adonc regarda li rois d’Engleterre sus le conte de Warvich et le conte de Arondiel, qui estoient dalés li, et lor demanda: «Que vous en samble de ce que Godefrois de Harcourt conselle?» Il respondirent: «Sire, nous n’i veons que tout bien, et voirement dist il verité de une cose: li voiages est lons de chi en Gascongne, et si avons le vent contraire pour nous, et vous ne poés aler avant ne esploitier fors que par le vent. Et se vous prendés terre en Normendie, et cevauchiés avant ou roiaulme de France, de legier, ensi que il dist, se leveront chil qui tiennent siège devant Agillon.» Adonc dist li rois: «Or avant, faites tourner deviers Normendie, car nous volons prendre et aler ce cemin, et Dieux soit sus nostre voiage!» F^os 109 vº et 110.

P. 129, l. 8: voir Sup. var. (n. d. t.)

P. 129, l. 12: Cartesée.—Mss. A 1 à 7, 11 à 14, 18, 19: Cartasée. Fº 133 vº.—Mss. A 20 à 22: Carcassée. Fº 195.

P. 129, l. 17: Kent.—Mss. A 11 à 14, 18, 19: Kenk. Fº 128.—Mss. A 15 à 17: Ken. Fº 135.

P. 129, l. 24 et 25: mil trois cens quarante cinq.—Mss. A 18, 19, 23 à 29: mil trois cens quarante six. Fº 137.

P. 129, l. 29: quatre.—Mss. A 20 à 22: trois. Fº 195.

P. 129, l. 32: Durem.—Mss. A 15 à 17: Durennes. Fº 135.

P. 130, l. 8: Si pooient.—Ms. B 6: Et entrèrent ens le roy son filz, six contes, vingt deux barons, quatre cens chevaliers et tout en somme six mille hommes d’armes et douze mille archiés et environ six mille Gallois. C’estoit grant bieauté à veoir la navire nagier sur mer et ces ensaignes et ces banières venteler sur la mer. Sy y avoit environ quatre cens nefs. Là sist le roy sur mer, et fist messire Godefroy de Harcour estre patron de toute la navire. Fº 294.

P. 130, l. 8: sept mil.—Mss. A 1 à 33: quatre mille. Fº 134.

P. 130, l. 9: trois.—Ms. A 8: Yrlois. Fº 121 vº.—Mss. A 15 à 17: Yrlandois. Fº 135 vº.

P. 130, l. 14: treize.—Mss. A 15 à 17: dix sept. Fº 135 vº.—Mss. A 20 à 22: quatorze. Fº 195 vº.

P. 130, l. 14: Herfort.—Mss. A 20 à 22: Harfort. Fº 195 vº.

P. 130, l. 15: Norenton.—Ms. A 7: Noreton. Fº 128 vº.—Mss. A 20 à 22: Norton. Fº 195 vº.

P. 130, l. 17: Hostidonne.—Mss. A 1 à 6: Hastidonne. Fº 134.—Mss. A 15 à 17: Hostidionne. Fº 135 vº.—Mss. A 23 à 29: Hontindonne. Fº 153.

P. 130, l. 17 et 18: Askesufforc.—Mss. A 11 à 14: Hasquesufford. Fº 128 vº.—Mss. A 20 à 22: Acquesuffort. Fº 195 vº.—Mss. A 1 à 6: Stanfort. Fº 134.—Mss. A 15 à 17: Kenforth. Fº 135 vº.

P. 130, l. 20: Biaucamp.—Mss. A 15 à 17: Beaux Champs. Fº 135 vº.

P. 130, l. 21: Gobehen.—Mss. A 11 à 17: Gobehan. Fº 128 vº.

P. 130, l. 22: Ros.—Mss. A 30 à 33: Rooz. Fº 181.

P. 130, l. 22: Lussi.—Mss. A 18, 19, 23 à 33: Lucy. Fº 137.

P. 130, l. 22: Felleton.—Mss. A 20 à 22: Filleton. Fº 195 vº.

P. 130, l. 23: Brasseton.—Mss. A 15 à 17: Busenton. Fº 135 vº.—Mss. A 20 à 33: Braston. Fº 195 vº.

P. 130, l. 23: Multon.—Mss. A 30 à 33: Millon. Fº 181.

P. 130, l. 23 et 24: le Ware.—Mss. A 1 à 6: Ware. Fº 134.—Mss. A 7 à 17: la Ware. Fº 128 vº.—Mss. A 23 à 33: Labbar. Fº 153.

P. 130, l. 25: Bercler.—Mss. A 1 à 7, 11 à 14, 18, 19: Bercles. Fº 134.—Mss. A 23 à 29: Barcles. Fº 153.—Mss. A. 30 à 33: Barclet. Fº 181.

P. 130, l. 25: Willebi.—Mss. A 20 à 22: Willebry. Fº 195 vº.

P. 130, l. 27: Guillaumes.—Mss. A 1 à 6, 11 à 14: Jehan. Fº 134.

P. 130, l. 28: James.—Mss. A 8, 15 à 17: Jaques. Fº 121 vº.

P. 130, l. 28: Audelée.—Mss. A 8, 9, 15 à 17, 23 à 33: Andelée. Fº 121 vº.

P. 130, l. 29: Wettevale.—Mss. A 15 à 17: Westevalle. Fº 135 vº.

P. 130, l. 29: Bietremieus de Brues.—Mss. A 15 à 17, 23 à 33: Berthelemi de Brunes. Fº 135 vº.—Mss. A 20 à 22: Bertholomieu de Brunis. Fº 195 vº.

P. 130, l. 31: nommer.—Les mss. A 1 à 6, 11 à 14, 18, 19 ajoutent: singulierement. Fº 134.

P. 130, l. 32: Oulphars.—Mss. A 11 à 14: Oulfas. Fº 128 vº.

P. 131, l. 14: gras.—Mss. A 15 à 17: cras. Fº 135 vº.—Mss. A 8, 9, 11 à 14: grans. Fº 122.

P. 131, l. 27: voiage.—Les mss. A 15 à 17 ajoutent: Et pour certain vous et nous tous en vauldrons mieulx, car nous y trouverons or, argent, vivres et tous autres biens à grant plenté. Fº 135 vº.—Ms. B 6: car il n’i a rien, fontainne ne rivière où jou n’ay esté voller de mes oisieaulx; et congnois tous les pasages par où on puelt entrer ne yssir en Normendie. Fº 295.

§ 255. P. 131, l. 28: Li rois d’Engleterre.—Ms. d’Amiens: Li roys de Franche estoit bien enfourmés de l’arivée le roy englès et dou grant appareil qu’il avoit fait, mès il ne savoit de quel part il vorroit ariver. Si avoit garnis tous ses pors de mer et partout envoiiéz gens d’armes. Et avoit envoiiet son connestable le comte de Ghines et le comte cambrelent de Tamkarville, qui nouvellement estoit revenu d’Agillon, à grant fuisson de gens d’armes, en Normendie, qui se tenoient en le bonne ville de Kem. Et avoit envoiiet l’un de ses marescaux, monseigneur Robert Bertran, en Constentin, à grant fuisson de gens d’armez, car il supposoit que messires Godeffroys de Halcourt poroit bien amenner les Englès celle part. Et avoit envoiiet à Harflues monseigneur Godemar dou Fay à grant fuisson de gens d’armes, et li avoit recargiet toutte celle marche mouvant de Harfluez tant c’à Kalais. Tant singla li roys englèz qu’il ariva à l’entrée d’aoust en l’ille que on claimme Grenesie, à l’encontre de Normendie, et se tient celle terre françoise; si le trouva plaine et grasse durement, et y sejourna sept jours, et l’ardi et essilla tout. Là eut consseil li roys que il se trairoit en Normendie, et premiers ou boin pays de Constentin. Si ordonnèrent leurs vaissiaux et leur navie et rentrèrent ens, et tournèrent lez voilles deviers le Hoge Saint Vast, assés priès de Saint Sauveur le Visconte, où li marescaux de Franche estoit à bien deux mil combatans. Tant singla la navie au roy englès qu’il arivèrent en le Hoge Saint Vast le jour de le Madelainne, l’an mil trois cens quarante six.

Quant messires Robers Bertrans, marescaux de Franche, entendi que li roys englèz avoit ars et essilliéz l’ille de Grenesie et pris le fort castiel qui y estoit, et volloit ariver en Normendie, si manda par touttez les garnisons gens d’armes et compaignons pour deffendre et garder le pays, si comme ordonné et coummandé de par le roy li estoit. Et fist sen asamblée à Saint Salveur, qui solloit estre au dessus dit monseigneur Godefroy de Halcourt, mès li roys de Franche li avoit tolut et toutte se terre ossi; et se mist as camps et dist que il veeroit au roy englèz le passaige. Si avoit li dis marescaux de Franche adonc avoecq lui pluisseurs chevaliers et escuiers de Normendie, dou Maine, dou Perce, de le comté d’Allenchon. Si se ordonnèrent li Franchois bien et hardiement par le fait de leur souverain, seloncq le marinne, et missent tout devant chiaux qui archiers et arbalestriers estoient. Quant li roys englès et se navie durent ariver, il trouvèrent cel encontre. Là fist li roys englès le prinche de Gallez, son fil, chevalier, et le recoumanda à deux des milleurs chevalierz de son host, le seigneur de Stanfort, qui revenus estoit nouvellement de Gascoingne et dou comte Derbi, et monseigneur Renart de Gobehem. Et puis coummanda li roys à ordonner les archers seloncq le marine et de prendre terre. Dont s’aroutèrent vaissiel, chacuns qui mieux mieux. Là estoient li Franchois qui bien s’aquittoient d’iaux veer et deffendre le passaige; et y eut dur hustin et fort malement, et dura li trais moult longement. Fº 89.

—Ms. de Rome: En ce jour estoit amirauls de la mer et institués de par le roi et son consel, li contes de Warvich, et connestables, li sires de Biaucamp, et marescauls, mesires Thomas de Hollandes, et mestres cambrelens d’Engleterre, li contes de Honstidonne. Et avoit li rois d’Engleterre en celle flote et route quatre mille hommes d’armes et douse mille archiers. Adonc furent les nefs tournées au conmandement et ordenance dou roi, au lés deviers Normendie; et tantos il orent si plain vent que à droit souhet il euissent assés perdu, et prissent terre en l’ille de Coustentin, en la Hoge Saint Vast. Dont messires Godefrois de Harcourt estoit si resjois de ce que il veoit que il enteroient en Normendie, que de joie il ne s’en pooit ravoir, et disoit bien: «Nous enterons ou plus cras pais dou monde, ou plus plentiveus, et si en ferons nostre volenté, car ce sont simples gens qui ne scèvent que c’est de gerre.» Fº 110.

P. 132, l. 9 et p. 133, l. 1: voir Sup. var. (n. d. t.)

§ 256. P. 133, l. 7: Quant la navie.—Ms. d’Amiens: Quant li vaissiaux le roy englès deut approchier terre, il, de grande vollenté, se mist à deus piés le bort de se nef et s’esquella tous armés et sailli à terre. Ad ce qu’il sailli, li ungs de ses piés li glicha, et chei trop durement en dens sus le sablon, tant que li sans li volla hors dou viaire. Adonc le prissent li chevalier qui dallés lui estoient, et li dissent: «Sire, sire, rentrés en vostre nef; vous n’avés que faire de traire avant pour combattre. Nous ferons bien ceste journée sans vous. Che que vous estez cheus et si dur blechiés, nous esbahist grandement, et le tenons à mauvais signe.» Adonc respondi li roys et dist à ses chevaliers qui ces parollez li avoient dittez: «Signeur, signeur, il n’est miez enssi, mais est ungs très bons signez, car la terre me desire et connoist que je sui ses sirez naturelx. Pour ce a elle pris de mon sanc. Alons avant, ou nom de Dieu et de saint Jorge, et requerons nos ennemis.» De le responsce dou roy furent chil qui dallés lui estoient, tout sollet, et dissent entr’iaux que il se confortoit grandement de soy meysmez. Touttesfois il se tinrent là tant que il fust estanciés, et entroes se combattoient li autre. Là eut bataille dure et forte, et dura moult longement. Et prendoient li Englèz terre à grant meschief; car li Franchois leur estoient au devant, qui lez traioient et berssoient, et en navrèrent de coumencement pluisseurs, ainschois que il pewissent ariver. Touttesfois, li archier d’Engleterre moutepliièrent si, et tant ouniement traioient, que il efforcièrent les Normans qui là estoient, et les reculèrent. Et prissent terre premierement li princes de Gallez et se bataille, et puis messires Godeffroit de Halcourt et li comtez de Sufforch, qui estoit marescaux de l’ost. Là furent li Franchois reculet, et ne peurent tenir plache, et mis à desconfiture. Et y fu messires Robers Bertrans durement navrés, et uns siens fils, uns juenez et mout appers chevaliers, mors, et pluisseurs autrez. Et vous di que se li Englès ewissent eu lors chevaux, qui encorres estoient en lors vaissiaux, jà homs ne s’en fuist partis, que il n’ewissent esté ou mors ou pris. A grant dur et à grant meschief se sauva li marescaux de France.

Apriès celle desconfiture, ariva li roys englès et tout sen host paisieulement en le Hoge Saint Vast, et se tinrent là sus les camps quatre jours en descargant leur navie, et en ordonnant leurs besoingnes et en regardant quel part il se trairoient. Si fu enssi conssilliet que il partiraient leur host en trois pars; et yroit li une des parties par mer pour ardoir et essillier le pays seloncq le marinne, là où il avoit plenté de cras pays et plentiveus et grant fuisson de bonnes villez, et prenderoient touttez lez naves et les vaissiaux qu’il trouveroient sus les frontierrez de le marine. Et li roys et li prinches, ses filz, yroient à tout une grosse bataille par terre, gastant et essillant le pays, et li doy marescal, li comtez de Sufforch et messires Godeffrois de Harcourt, à cinq cens hommez à cheval et deux mil archiers, reprenderoient l’autre léz de le terre, et chevaucheroient un autre chemin, et revenroient touttez les nuis en l’ost le roy englès, leur seigneur. Chil qui s’en allèrent par mer, che furent: messires Richart de Stamfort, messires Renaux de Gobehen, li sirez de Ros, li sire de le Ware, messires Loeis de Biaucamp, messires Jehans Camdos, messires Edouwart de Clifort, li sirez de Willebi et messires Thoumas de Felleton et pluisseurs aultrez.

Chil chevalier et leurs gens, qui s’en aloient par mer seloncq le marinne, prendoient touttes les naves, petittez et grandes, qu’il trouvoient, et les enmenoient avoecq yaux. Archiers et gens de piet aloient de piet seloncq le marinne d’encoste yaux, et reuboient et ardoient villettez, enssi qu’il lez trouvoient. Et tant allèrent et chil de terre et chil de mer que il vinrent à un bon port de mer et à une moult forte ville que on claimme Blarefleu, et le concquissent, car li bourgois se rendirent à yaux pour doubtance de mort; mès pour ce ne demoura mies que toutte la ville ne fust reubée, et pris or et argent et chiers jeuiaux, car il en trouvèrent si grant plenté que garchon n’avoient cure de draps fourréz de vair, ne de couvretoirs, ne de telz coses. Et fissent tous les hommes de le ville yssir hors, et monter en naves et aller avoecq yaux, pour ce qu’il ne volloient mies que ces gens se pewissent rassambler, quant il seroient oultre passet, pour yaux grever. Fº 89.

—Ms. de Rome: Qant li rois Edouwars d’Engleterre, qui pour lors estoit en la flour de sa jonèce, ot pris terre en la Hoge Saint Vast, en l’ille de Coustentin, et que tout[e] la navie fu aroutée, et toutes gens issoient de lors vassiaus et saloient sus le sabelon, car la mer estoit retraite, li rois, qui estoit de grant volenté, mist son piet sur le bort de sa nef et salli oultre sus la terre; et à ce que il fist son sault, li piés li gliça et chei si roit sus le sabelon que li sans li vola hors dou nés à grant randon. Donc dissent li chevalier qui dalés li estoient: «Sire, retraiiés vous en vostre navie. Vechi un povre et petit signe.»—«Pourquoi? respondi li rois, mais est li signes très bons, car la terre me desire.» De ceste response se contentèrent et resjoirent moult grandement tout chil qui l’oirent. Et issirent, petit à petit, les Englois hors de la navie, et se logièrent là environ au mieuls que il porent. Et qant toutes les nefs furent descargies, le rois d’Engleterre eut consel que on les garniroit de gens d’armes et d’archiers, et poursievroient tous jours la marine; et puis orent consel conment il chevauceroient. Il ordonnèrent lors gens en trois batailles, de quoi li une cemineroit d’un lés, costiant la marine, et la bataille de l’avant garde chevauceroit sus le pais à destre, et li rois en milieu de ces batailles; et devoit, toutes les nuis, la bataille des marescaus retraire ou logeis dou roi. Si conmencièrent à cevauchier et à aler ces batailles, ensi que ordonné estoient. Chil qui s’en aloient par mer, selonch la marine, prendoient toutes les naves petites et grandes que il trouvoient, et les enmenoient avoecques euls. Archiers et honmes de piet aloient costiant la mer, et prendoient et enportoient devant euls tout che que il trouvoient. Et tant alèrent et chil de mer et chil de terre, que il vinrent à un bon port de mer et une forte ville que on clainme Barflues, et entrèrent dedens; car li bourgois se rendirent pour le doubtance de mort, mais li chastiaus n’eut garde, car il est trop fors. Et pour ce ne demora pas que la ville ne fust courue et roubée de tout ce de bon que il i trouvèrent; et i trouvèrent or et argent à grant plenté, et [de] lor butin et pillage, il cargoient lors vassiaus; et fissent entrer en lors vassiaus tous les honmes aidables de la ville, et les enmenèrent avoecques euls, afin que ils ne se requellaissent et mesissent ensamble et les poursievissent. Fº 110 vº.

P. 133, l. 10 et 11: voir Sup. var. (n. d. t.)

P. 133, l. 27: sus leur navie.—Mss. A 1 à 6, 11 à 14: sur le rivage. Fº 135.

P. 133, l. 28: quatre cens.—Mss. A 1 à 6, 11 à 14, 18 à 22: trois cens. Fº 135.

P. 133, l. 31: serrant.—Ms. A 8: suiant. Fº 122 vº.—Mss. A 15 à 17: suivant. Fº 136 vº.

P. 134, l. 13: Barflues.—Mss. A 7, 15 à 17: Barfleu. Fº 129 vº.—Mss. A 11 à 14: Barefleu. Fº 129 vº.—Ms. A 8: Harfleus. Fº 122 vº.—Mss. A 1 à 6, 18 à 33: Harefleu, Harfleu. Fº 135.

P. 134, l. 15: reubée.—Ms. B 6: car elle n’estoit point framée. Sy fut toute pillie et arse et destruite, et l’avoir mis ès nefs. Et en estoient les gouverneurs le conte de Hostidonne et messire Jehan de Beaucamp. Fº 296.

§ 257. P. 134, l. 24: Apriès ce que.—Ms. d’Amiens: Apriès ce que la grosse ville de Barefleu fu prise et robée, il allèrent et s’espandirent aval le pays seloncq le marinne, et faisoient touttes leurs vollenté[s], car il ne trouvoient nul homme qui leur veast. Et allèrent tant qu’il vinrent à une bonne ville et riche et grant port de mer que on claimme Chierebourch, et le prissent et le robèrent en tel mannierre qu’il avoient fait Barefleu. Et puisedi en tel mannierre il fissent de Montebourc, d’Avaloingne et touttes autrez bonnes villez qu’il trouvèrent là en celle marce; et gaegnièrent si grant tresor qu’il n’avoient cure de draps ne de jeuiaux, tant fuissent bon, fors d’or et d’argent seullement. Apriès, il vinrent à une moult grosse ville et bien fremée et fort castiel que on claimme Quarentin, là où il i avoit grant fuison de saudoiiers et de gens d’armes de par le roy de Franche. Adonc descendirent li seigneur et les gens d’armes de leurs naves, et vinrent devant le ville de Quarentin et l’assaillirent fortement et vistement. Quant li bourgois virent chou, il eurent grant paour de perdre corps et avoir; si se rendirent sauf leurs corps, leurs femmes et leurs enfans, maugret lez gens d’armes et lez saudoiiers qui avoecq yaux estoient, et missent leur avoir à vollenté, car il savoient bien qu’il estoit perdu davantaige. Quant li saudoiier virent che, il se traissent par deviers le castiel qui estoit mout fors, et chil seigneur d’Engleterre ne veurent mies laissier le castiel enssi. Si se traissent en le ville, puis fissent asaillir au dit castiel deux jours si fortement, que chil qui dedens estoient et qui nul secours ne veoient, le rendirent, sauf leurs corps et leur avoir; si s’en partirent et en allèrent autre part. Et li Englèz fissent leur vollentés de celle bonne ville et dou fort castiel, et regardèrent qu’il ne le pooient tenir. Si l’ardirent et abatirent, et fissent les bourgois de Quarentin entrer ens ès naves, et allèrent avoecq yaux, enssi qu’il avoient fait les autres. Or parlerons ottant bien de le chevaucie le roy englès que nous advons parlet de ceste. Fº 89 vº.

—Ms. de Rome: Apriès que la ville de Barflues fu prise et robée sans ardoir, il s’espardirent parmi le pais, selonch la marine, et i fissent grant partie de lors volentés, car il ne trouvoient honme qui lor deveast; et ceminèrent tant que il vinrent jusques à une bonne ville, grose et rice, et port de mer, qui se nonme Chierebourch. Si en ardirent et reubèrent une partie, mais dedens le castiel il ne peurent entrer, car il le trouvèrent trop fort et bien pourveu de bonnes gens d’armes et arbalestriers, qui s’i estoient bouté pour le garder, de la conté d’Evrues, qui pour lors estoit hiretages au roi de Navare. Si passèrent oultre les Englois et vinrent à Montbourch, et de là à Valongne. Si le prisent et robèrent toute, et puis l’ardirent et parellement grant fuisson de villes et de hamiaus en celle contrée, et conquissent si fier et si grant avoir, que mervelles seroit à penser. Et puis vinrent à une aultre bonne ville, seans sus mer, que on dist Qarentin, et i a bon chastiel et tout au roi de Navare, et de la conté d’Evrues. Qant il parfurent venu jusques à là, il trouvèrent la ville close et assés bien fremée et pourveue de gens d’armes et de saudoiiers: si se ordonnèrent les Englois pour le asallir, et i livrèrent de venue très grant assaut. Qant li bourgois de Quarentin veirent ce, il orent grant paour de perdre corps et avoir. Si se rendirent, salve lors corps, lors fenmes et lors enfans, vosissent ou non les gens d’armes et les saudoiiers qui dedens estoient, liquel se retraissent ou chastiel, et là dedens s’encloirent. Les Englois entrèrent en la ville de Quarentin et s’i rafresquirent, et ne vorrent pas laissier le chastiel derrière, mais le alèrent tantos asallir de grant volenté, et furent deux jours par devant. Qant li compagnon qui ou chastiel estoient, veirent que point les Englois ne passeroient oultre, et mettoient lor entente à euls prendre de force, et ne venoient secours ne delivrance de nulle part, si doubtèrent à tout perdre et tretièrent as Englois, et le rendirent, salve lors corps et lors biens. Qant li signeur se veirent au desus de Quarentin, de la ville et dou castiel, il regardèrent que il ne le poroient tenir. Si le ardirent et desemparèrent tout, et fissent les honmes aidables et de deffense de Qarentin entrer en lor navie, ensi que ceuls de Barflues, et les enmenèrent avoecques euls, par quoi il ne se aunassent sus le pais et lor portaissent damage. Et ensi avoient il pris les honmes de Chierebourc, de Montebourc et des aultres villes voisines. Et fu tous li pais pilliés, courus et robés, selonc la marine, et avoient cargiet lor navie de si grant avoir de draps, de pennes, de lainnes, de fillés et de vassielle que mervelles estoit à penser. Or parlerons nous otretant bien de la cevauchie le roi d’Engleterre, que nous avons parlé de ceste. Fº 111.

P. 134, l. 30: Chierebourc.—Mss. A 1 à 6, 11 à 14: Chierbourc. Fº 135.—Mss. A 20 à 22: Chierbourch. Fº 197.—Mss. A 15 à 19: Chierebourc. Fº 136 vº.—Mss. A 23 à 33: Chierebourg. Fº 155.—Mss. A 8, 9: Cherebourc. Fº 122 vº.—Ms. A 7: Chierebourch. Fº 129 vº.

P. 135, l. 3: Montebourch et Valoigne.—Mss. A 7, 8, 9, 15 à 17: Montebourch ou Montebourc Davalongne. Fº 129 vº.—Mss. A 18, 19: Montebourch Davaloigne. Fº 138 vº.—Mss. A 20 à 22: Montbourch Davalonne. Fº 197.—Mss. A 23 à 29: Montebourg Danalongne. Fº 155.—Mss. A 30 à 33: Montebourg de Valongnes. Fº 182.—Les mss. A 1 à 6, 11 à 14, ne font pas mention de Valognes.

P. 135, l. 8: grosse ville.—Ms. B 6: qui est au roy de Navare. Fº 297.

P. 135, l. 9: Quarentin.—Mss. A 1 à 6, 11 à 14: Karentin. Fº 135.—Mss. A 7, 8, 9: Qarentain. Fº 129 vº.—Mss. A 15 à 17: Carentain. Fº 136 vº.—Mss A 18, 19: Carentan. Fº 138 vº.—Mss. A 20 à 33: Carenten. Fº 197.

P. 135, l. 16 à 18: avoir... et misent.—Mss. A 1 à 7, 11 à 14, 18, 19, 23 à 33: avoir, leurs femmes et leurs enffans. Malgré les gens d’armes et les souldoiers qui avec eulx estoient, ilz mistrent... Fº 135. Voir aussi Sup. var. (n. d. t.)

§ 258. P. 136, l. 8: Quant li rois.—Ms. d’Amiens: Quant li roys Edouars eut envoiiés ses gens seloncq le marinne, enssi comme vous avés oy, il se parti de Hoges Saint Vast en Coustentin et fist monseigneur Godeffroy de Harcourt, marescal de l’host, gouvreneur et conduiseur, pour tant qu’il savoit toutez les entrées et yssues dou pays, liquelx prist cinq cens armures de fer et deux mil archiers, et se parti dou roy et de son ost, et alla bien six ou sept lieuwez loing enssus de l’host, ardant et essillant le pays. Si trouvèrent le pays cras et plentiveux de touttes coses, les grainges plainnes de bleds, les maisons plainnes de touttes rikèches, riches bourgois, kars, karettes et chevaux, pourchiaux, moutons et les plus biaux bues del monde que on nourist ens ou pays; si les prendoient et amenoient en l’ost le roy, quel part qu’il se logast le nuit, mès il ne delivroient mies as gens le roy l’or et l’argent qu’il trouvoient, ainschois le retenoient pour yaux. Enssi cheuvauchoit li dis messires Godeffrois, comme marescaux, chacun jour d’encoste le grant host le roy, au destre costet, et revenoit au soir o toutte se compaignie, là où il savoit que ly roys se devoit logier, et telx fois estoit qu’il demouroit deux jours, quant il trouvoient cras pays et assés à gaegnier. Si prist li roys son chemin et son charoy deviers Saint Leu en Coustentin. Mais ainschois qu’il y parvenist, il se loga sus une rivierre trois jours, atendans ses gens qui avoient fait le chevauchie seloncq le marinne, enssi comme vous avés oy. Quant il furent revenut et il eurent tout leur avoir mis à voiture, li comtes de Warvich, li comtez de Sufforch, li sires de Stanfort, messires Renaux de Gobehen, messires Thummas de Hollandez, messire Jehans Camdos et pluisseur autre reprissent le chemin à senestre, à tout cinq cens armures de fer et deux mil archiers, et ardoient et couroient le pays, enssi que messires Ghodeffroit de Halcourt faisoit d’autre costé; et tous les soirs revenoient en l’ost le roy, voir[e]s se il ne trouvoient leur prouffit à faire trop grandement. F^os 89 vº et 90.

—Ms. de Rome: Qant li rois d’Engleterre ot envoiiet ses gens costiant la marine, par le consel de mesire Godefroi de Harcourt, et chil se furent mis au cemin, assés tos apriès il se departi de la Hoge Saint Vast, là où il avoit pris terre, et fist monsigneur Godefroi de Harcourt conduiseur de toute son hoost, pour tant que il savoit les entrées et les issues de la duccé de Normendie. Liquels messires Godefrois, conme uns des marescaus, se departi dou roi, à cinq cens armeures de fier et deus mille archiers, et chevauça bien siis ou sept lieues en sus de l’hoost le roi, ardant et essillant le pais. Se le trouvèrent cras, et plentiveuse la contrée de toutes coses, les gragnes plainnes de bleds, les hostels raemplis de toutez ricoises, buefs et vaces les plus cras et mieuls nouris dou monde, brebis, moutons et pors aussi. Tant trouvoient à fouragier que il n’en savoient que faire. Si prendoient les Englois de tous ces biens à lor volenté et le demorant laissoient, et s’esmervilloient des grans recoises et des biens que ils trouvoient près; et de ce bestail il en avoient assés tant que il voloient, et en envoioient encores grant fuisson en l’oost le roi, dont il estoient servi. Ensi cevauçoit messires Godefrois de Harcourt, casqun jour, dou costé le grant hoost le roi, au destre costé, et revenoient le soir et toute sa compagnie, là où il sçavoit que li rois devoit logier; et tèle fois estoit que il demoroit deux jours, qant il trouvoit bien à fourer. Et prist li rois son charoi et son cemin deviers Saint Lo le Coustentin, mais ançois que il parvenist jusques à là, il se loga trois jours sus une rivière, atendans ses gens qui avoient fait la cevauchie sus la marine, ensi que vous avés oy. Qant il furent revenu, et il orent tout lor avoir mis à voiture, li contes de Sufforc, li contes de Warvich, messires Renauls de Gobehen et messires Thomas de Hollande reprissent le cemin à senestre, ardans et assillans le pais, ensi que messires Godefrois de Harcourt faisoit à destre. Et li rois chevauçoit entre ces deus èles; et tous les soirs se trouvoient ensamble, et ceminoient à si grant loisir que il n’aloient le jour que deus ou trois lieues dou plus. Fº 111 vº.

P. 136, l. 19: voir Sup. var. (n. d. t.)

P. 137, l. 4: Saint Leu.—Mss. A 1 à 6, 11 à 14: Saint Lou. Fº 135 vº.—Mss. A 23 à 33: Saint Lo. Fº 155 vº.

§ 259. P. 137, l. 15: Ensi par les Englès.—Ms. d’Amiens: Ensi par les Englès estoit ars et essilliés, robéz et pilliéz li bons pays et li cras de Normendie. Ces nouvelles vinrent au roy de France qui se tenoit à Paris, coumment li roys englès estoit en Constentin et gastoit tout devant lui. Dont dist li roys que jammais ne retourroient li Englèz, si aroient estet combatu, et les destourbiers et anois qu’il faisoient à ses gens, rendus. Si fist li roys lettrez escripre à grant fuison, et envoya premierement deviers ses bons amis de l’Empire, pour ce qu’il li estoient plus lontain, au gentil et noble roy de Behaingne, et ossi à monseigneur Charlon de Behaingne, son fil, qui s’appelloit roys d’Allemaingne, et l’estoit par l’ayde et pourkas dou roy Carlon, son père, dou roy de Franche, et avoit jà encargiet lez armes de l’Empire. Si les pria li roys de Franche si acertes que oncques peult, que il venissent o tout leur effort, car il volloit aller contre les Englès qui li ardoient son pays. Chil dessus dit seigneur ne se veurent mies excuzer, ains fissent leur amas de gens d’armes allemans, behaignons et luzenboursins, et s’en vinrent deviers le roy efforchiement. Ossi escripsi li roys au duc de Lorainne, qui le vint servir à plus de quatre cens lanchez. Et y vint li comtez de Saumes en Saumois, li comtez de Salebrugez, li comtez Loeys de Flandres, li comtez Guillaumme de Namur, chacuns à moult belle routte. Encorrez escripsi li roys et manda especialment monseigneur Jehan de Haynnau, qui nouvellement s’estoit aloiiés à lui par le pourkas dou comte Loeys de Blois, son fil, et dou seigneur de Faignoelles. Si vint li dis chevaliers, messires Jehans de Haynnau, servir le roy moult estoffeement et à grant fuisson de bonne bachelerie de Haynnau et d’ailleurs. Dont li roys eult grant joie de sa venue, et le retint pour son corps et de son plus privet et especial consseil. Li roys de Franche manda tout partout gens d’armes là où il lez pooit avoir, et fist une des grandez et des grossez assambléez de grans seigneurs et de chevaliers, qui oncques ewist estet en Franche, ne à Tournay, ne ailleurs. Et pour ce que il mandoit ensi tout partout gens et en lontains pays, il ne furent mies sitos venu ne assamblé; ainchoys eut li roys englèz mout mal menet le pays de Constentin, de Normendie et de Pikardie, enssi comme vous oréz recorder chi enssuiwant. Fº 90.

—Ms. de Rome: Ensi, en ce temps dont je parole, que on compta en l’an de grasce mil trois cens et quarante siis, fu gastés et essilliés li bons pais et li cras de Normendie, de quoi les plaintes grandes et dolereuses en vinrent au roi Phelippe de Valois, qui se tenoit ens ou palais à Paris. Et li fu dit: «Sire, li rois d’Engleterre est arivés en Coustentin à poissance de gens d’armes et d’archiers, et vient tout essillant et ardant le pais, et sera temprement à Can, et tout ce cemin li fait faire messires Godefrois de Harcourt. Il faut que vous i pourveés.»—«Par m’ame et par mon corps, respondi li rois, voirement i sera pourveu.» Lors furent mis clers en oevre pour lettres escrire à pooir, et sergans d’armes et messagiers envoiiés partout [deviers] signeurs et tenavles de la couronne de France. Li bons rois de Boesme ne fu pas oubliiés à mander, ne mesires Carles ses fils, qui jà s’escripsoit rois d’Alemagne, quoi que Lois de Baivière fust encores en vie. Mais par la promotion de l’Eglise et auquns eslisseurs de l’empire de Ronme, on avait esleu Carle de Boesme à estre rois d’Alemagne et emperères de Ronme; car li Baiviers estoit jà tous viels, et aussi il n’avoit pas fait à la plaisance des Ronmains, ensi que il est escript et contenu ichi desus en l’istore. Si furent mandé li dus de Lorrainne, li contes de Salebruce, li contes de Namur, li contes de Savoie et messires Lois de Savoie, son frère, le conte de Genève et tous les hauls barons, dont li rois devoit ou pensoit à estre servis. Et aussi [fu escript] as honmes des chités, des bonnes villes, des prevostés, bailliages, chastelleries et mairies dou roiaulme de France, que tout honme fuissent prest. Et lor estoient jour asignet, là où casquns se deveroit traire et faire sa moustre, car il voloit aler combatre les Englois, liquel estoient entré en son roiaume. Tout chil qui mandé et escript furent, se pourveirent et s’estofèrent de tout ce que à euls apertenoit, et ne fu pas sitos fait. Avant eurent les Englois cevauchiet, ars et essilliet moult dou roiaulme de France.

Si furent ordonné de par le roi et son consel, sitos que les nouvelles furent venues que li rois d’Engleterre estoit arivés en Coustentin, mesires Raouls, contes d’Eu et de Ghines et connestables de France, et li contes de Tanqarville, cambrelenc de France, à cevauchier quoitousement en Normendie, et li traire en la bonne ville de Can, et là asambler sa poissance de gens d’armes et faire frontière contre les Englois. Et lor fu dit et conmandé, tant que il amoient lor honneur, que il se pourveissent, tellement que les Englois ne peuissent passer la rivière d’Ourne qui court à Can et s’en va ferir en la mer. Chil signeur obeirent et dissent que il en feroient lor pooir et lor devoir, et se departirent en grant arroi de Paris et s’en vinrent à Roem, et là sejournèrent quatre jours, en atendant gens d’armes qui venoient de tous lés, et puis s’en departirent; car il entendirent que li rois d’Engleterre estoit venus jusques à Saint Lo le Coustentin. Et cevauchièrent oultre et vinrent à Can, et là s’arestèrent et fissent lors pourveances telles que elles apertiennent à faire à gens d’armes qui se voellent acquiter et combatre lors ennemis. Encores fu escrips et mandés dou roi Phelippe messires Jehans de Hainnau, qui s’estoit tournés François, ensi que vous savés. Si vint servir le roi moult estofeement et bien accompagniés de chevaliers et d’esquiers de Hainnau et de Braibant et de Hasbain, et se contenta grandement li rois Phelippes de sa venue. Si venoient et aplouvoient gens d’armes, de toutes pars, pour servir le roi de France et le roiaulme, les auquns qu’il i estoient tenu par honmage, et les aultres pour gaegnier lors saudées et deniers. Si ne porent pas sitos chil des lontainnes marces venir que fissent li proçain, et les Englois ceminoient tout dis avant. Fº 112. Voir aussi Sup. var. (n. d. t.)

P. 138, l. 13: duch de Loeraingne.—Ms. B 6: et à l’evesque de Mès. Fº 299.

§ 260. P. 139, l. 4: Vous avez.—Ms. d’Amiens: Vous avés chy dessus bien oy recorder des Englès coumment il cevauchoient en troix batailles, li marescal à destre et à senestre, et li rois et li prinches de Galles, ses filz, en le moiienne. Et vous di que li roys cevauçoit à petittez journées: toudis estoient il logiés, où que ce fuist, entre tierce et midi. Et trouvoient le pays si plentiveux et si garny de tous vivres, qu’il ne leur couvenoit faire nullez pourveanchez, fors que de vins; si en trouvoient il asséz par raison. Si n’estoit point de merveille, se cil dou pays estoient effraet et esbahit, car, avant ce, il n’avoient oncquez veu hommes d’armes, et ne savoient que c’estoit de guerre ne de bataille; si fuioient devant les Englèz, ensi que brebis devant les leus, ne en yaux n’avoit nulle deffensce.

Li roys Edouwars et li princes de Gallez, sez filz, avoient en leur routte bien quinze cens hommes d’armes, six mil archiers et dix mil sergans à piet, sans ceux qui s’en alloient avoecq lez marescaux. Si chevaucha, comme je vous di, en tel mannière li roys, ardans et essillans le pays et sans brisier sen ordonnance, et ne tourna point en le chité de Coustanses; ains s’en alla par deviers le grosse ville, riche et marchande durement, que on claimme Saint Leu en Coustentin, qui estoit plus rice et valloit trois tans que la chité de Coustances. En celle ville de Saint Leu le Constentin avoit très grant draperie et très grant aport de marchandise et grant fuisson de richez bourgois; et trouvast on bien en le dite ville huit mil hommes, mannans que bourgois, rices que gens de mestier. Quant li roys englès fu venu assés prièz, il se loga dehors, car il ne veut mies logier en le ville pour le doutance dou feu, mais li grosse ville fu tantost conquise à peu de fait et courue et robée partout. Il n’est homs vivans qui poroit pensser, aviser ne croire, se on lui disoit le grant avoir qui là fu gaegniés et robés, ne le grant fuison dez draps qui là furent trouvet. Qui en volsist acheter, on en ewist grant marchiet. Chacuns en pooit prendre là où il volloit, mès nulz riens n’y acomptoit, ains tendoient plus à querre l’or et l’argent, dont il trouvoient asséz. Et si ardamment y entendirent que la ville demoura à ardoir, mès grant partie des ricez bourgois furent pris et envoiiés en Engleterre pour ranchonner; et grant planté dou commun peuple furent de premiers tués à l’entrée en le ville, qui se missent à deffensce. Fº 90.

—Ms. de Rome: Vous avés ichi desus bien oï recorder l’ordenance des Englois et conment il chevauçoient en trois batailles, li marescal à destre et à senestre en deus èles, et li rois et li princes de Galles, ses fils, en la moiienne. Et vous di que li rois cevauçoit à petites journées, et aussi faisoient toutes ses batailles. Et estoient logiet toutdis entre tierce et midi, car il trouvoient tant à fourer et si plentiveus pais et raempli de tous biens, les plus cras buefs dou monde, vaces, pors et oilles et tant que il n’en savoient que faire; et estoient tout esmervilliet des biens que il trouvoient. Il prendoient desquels que il voloient, et le demorant laissoient aler. Et ne brisoient point les Englois lor ordenance, et ne tournèrent point adonc viers Coustanses, mais prissent le cemin de Saint Lo le Coustentin, une grose ville, qui pour lors estoit durement rice et pourveue de draperie. Et bien i avoit neuf ou dis mille bourgois, gens de tous mestiers, mais la grignour partie s’estofoient tout de la draperie. Qant li rois d’Engleterre fu venus assés priés, il se loga dehors et envoia ses marescaus et ses gens d’armes et archiers devant, pour escarmucier et veoir quel cose chil de la ville voloient dire et faire, tant que au deffendre lor vile. Il furent tantos conquis et desconfi et caciet en fuites, et entrèrent les Englois dedens, et en fissent toutes lor volentés. Et orent li pluisseur pité des honmes, fenmes et enfans qui ploroient et crioient à haus cris, et les laissoient passer et widier la ville legierement; mais ils widoient les maisons des riches biens que il i trouvoient, et ne faisoient compte que d’or et d’argent. Et n’avoit si petit varlet en la compagnie, qui ne fust tous ensonniiés d’entendre au grant pourfit que il veoient. Fº 112.

P. 140, l. 4 et 5: huit mil ou neuf mil.—Mss. A 7, 23 à 33: huit vingt ou neuf vingt. Fº 131.—Mss. A 20 à 22: huit mille. Fº 198 vº.—Ms. B 6: dix à douze mille. Fº 300.

P. 140, l. 6 et 7: dehors.—Ms. B 6: au dehors de la ville, en une abeie. Fº 300.

P. 140, l. 9: conquise.—Ms. B 6: car les gens qui estoient en la ville n’estoient point de deffense, car c’estoient simple gens laboureulx et marchans et ouveriers qui faisoient leur draperie, et pour le temps de lors ne savoient que c’estoit de guerre; car oncques n’avoient porté espée, fors ung baston de blanc bos pour les chiens, allant de ville à aultre. Fº 300.

§ 261. P. 140, l. 16: Quant li rois.—Ms. d’Amiens: Qant li roys englès eut fait ses vollentés de le bonne ville de Saint Leu en Constentin, il se parti de là pour venir par deviers le plus grosse ville, le plus grande, le plus riche et le mieux garnie de toutte Normendie, horsmis Roem, que on claimme Kem, plainne de très grant rikèce, de draperie et de touttes marcandises, de riches bourgoix, de noblez dammes, de bellez eglises et de deux richez abbeies. Et avoit entendu li roys englès que là se tenoient en garnison, de par le roy de France, li comtez d’Eu et de Ghinnez, connestablez de Franche, et il comtez de Tamkarville et grant fuison de bonne chevalerie de Normendie et d’ailleurs, que li roys y avoit envoiiés pour garder le ditte ville et le passaige contre les Englès. Si se traist li roys celle part, et fist revenir ses bataillez enssamble. Tant alla li roys qu’il vint asséz priès de Kem: si se loga à deux lieues prièz. Li connestable et li autre seigneur de Franche et dou pays, qui là estoient avoecq lui, fissent la ville gettier mout noblement toutte le nuit; et au matin, il coummandèrent que tout fuissent armet un et autre, chevalier et escuier et bourgois ossi, pour deffendre le ville. Qant il furent tout armet, il yssirent hors de le ville et se rengièrent par devant le porte par où li Englès devoient venir, et fissent grant samblant de bien deffendre et de leurs vies mettre en aventure. Fº 90.

—Ms. de Rome: Qant li rois d’Engleterre et ses gens orent fait lors volentés de la ville de Saint Lo le Coustentin, il s’en departirent et prissent lor cemin pour venir deviers une plus grose ville trois fois que Saint Lo ne soit, qui se nonme Cen en Normendie. Et est priès aussi grose, et aussi rice estoit pour lors, que la chité de Roem, plainne de draperie et de toutes marceandises, rices bourgois et bourgoises et de bon estat, aournée de belles eglises et par especial de deus nobles abbeies durement belles et riches, seans l’une à l’un des cors de la ville et l’autre à l’autre. Et est appellée li une de Saint Estievène, et l’autre de la Trenité, le une de monnes, celle de Saint Estievène, et en celle de la Trenité dames, et doient estre siis vins dames à plainne prouvende. D’autre part, à l’un des cors de la ville, sciet li chastiaus, qui est uns des biaus castiaus et des fors de Normendie. Et en estoit pour lors chapitainne, uns bons chevaliers, preus, sages et hardis, qui se nonmoit messires Robers de Wargni, et avoit avoecques lui dedens le chastiel en garnison bien trois cens Geneuois. Dedens la ville estoient logiet li connestables de France, li contes de Tanqarville et plus de deus cens chevaliers, tout au large et à leur aise; et estoient là venu et envoiiet pour garder et deffendre Kem et faire frontière contre les Englois.

Li rois d’Engleterre estoit tous enfourmés de mesire Godefroi de Harcourt que la ville de Kem estoit durement rice et grosse, et bien pourveue de bonnes gens d’armes. Si chevauça celle part et tout sagement, et remist ses batailles ensamble, et se loga celle nuit sus les camps à deus petites lieues priès de Kem. Et tout dis le costioit et sievoit sa navie, laquelle vint jusques à deus lieues priès de Kem, sus la rivière de Iton qui se rentre en la mer, et sus un havene que on nonme Austrehem, et la rivière Ourne, et court à Kem; et estoit de la ditte navie conduisières et paterons li contes de Honstidonne. Li connestables de France et li aultre signeur, qui là estoient, fissent celle nuit grant gait, car il sentoient les Englois moult priès de euls. Qant ce vint au matin, li connestables de France et li contes de Tanqarville oirent messe. Et aussi fissent tout li signeur qui là estoient, où grant fuisson de chevalerie avoit, et avoient consilliet le soir que de issir hors et de combatre les Englois. Si sonnèrent les tronpètes dou connestable moult matin, et s’armèrent toutes manières de gens de armes, et les bourgois meismement de la ville. Et widèrent hors de la ville et se traissent sus les camps, et se missent tout en ordenance de bataille. Et moustrèrent tout par samblant et par parole que il avoient grant volenté de combatre les Englois, dont li connestables de France estoit moult resjois. Fº 112 vº.

P. 140, l. 17: Saint Leu.—Mss. A 1 à 6: Saint Loup. Fº 136 vº.

P. 140, l. 20: Kem.—Mss. A 1 à 6, 8 à 19, 23 à 33: Caen. Fº 136 vº.—Ms. A 7: Kan. Fº 131.—Mss. A 20 à 22: Kent. Fº 199.

P. 141, l. 2: Robers.—Mss. A 15 à 17: Thomas. Fº 138 vº.

P. 141, l. 2: Wargni.—Mss. A 20 à 22: Warny. Fº 199.—Mss. A 23 à 29: Blargny. Fº 157.

P. 141, l. 7: envoiiés.—Ms. B 6: dont il estoient bien vingt mille hommes. Fº 299.

P. 141, l. 15: Kem.—Ms. B 6: Et à deux lieues de Kem a ung chastiel que on apelle Austrehen sur ceste meisme rivière de Ourne, où toutes les grosses nefs arivent. Fº 301.

P. 141, l. 16: Austrehem.—Mss. A 1 à 6, 11 à 14: Hautrehen. Fº 137.—Mss. A 7, 18, 19, 23 à 33: Austrehen. Fº 131.—Mss. A 8, 9, 15 à 17: Austrehem. Fº 124.—Mss. A 20 à 22: Haustrehem. Fº 199.

P. 141, l. 21: assamblé.—Ms. B 6: plus de deux cens. Fº 302.

P. 141, l. 25: bourgois.—Ms. B 6: car le communalté de Kem avoient fait leut moustre; sy s’estoient bien trouvé quarante mille hommes deffensablez. Fº 302.

§ 262. P. 142, l. 17: En ce jour.—Ms. d’Amiens: A celui jour, li Englès furent moult matin esmeus d’aller celle part. Li roys ossi yssi hors et fist ses gens aller par conroy, car bien penssoit qu’il aroit à faire; si se traist tout bellement celle part, ses batailles rengies, et fist ses marescaux chevauchier devant à toutte sa bannierre jusques as fourbours de le ville, et assés priès de là où chil signeur estoient rengiet, et li bourgois de Kem moult richement et par samblant en bon couvenant. Si tost que cez gens bourgois de Kem virent lez bannierrez dou roy englèz et de ses marescaux approchier et tant de si bellez gens d’armes que oncques n’avoient veut, il eurent si grant paour que tout chil del monde ne les ewissent retenut que il ne rentraissent en leur ville, volsissent connestablez et marescaux ou non. Adonc pewist on veir gens fremir et abaubir, et celle bataille enssi rengie desconfire à pau de fait, car chacuns se penna de rentrer en le ville à sauveté. Grant fuisson de chevaliers se missent à l’aler deviers le castiel: chil furent à sauveté.

Li connestablez, li cambrelens de Tamkarville et pluisseur autre chevalier et escuier avoecq yaux se missent en le porte de le ville, et montèrent as fenestrez des deffenscez, et veoient ces archiers qui tuoient gens sans merchy et sans deffensce; si furent en grant esmay que ce ne fesissent il d’iaux, s’il lez tenoient. Enssi qu’il regardoient aval en grant doubte ces gens tuer, il perchurent un gentil chevalier englès qui n’avoit que un oeil, que on clammoit messire Thoumas de Hollande, et cinq ou six bons chevaliers avoecq lui, qu’il avoient autrefoix compaigniet et veu l’un l’autre en Grenade, en Prusse, oultre mer et en pluisseurs lieux, ensi que bon chevalier se treuvent; si les appiellèrent et leur dissent en priant: «Ha! seigneur chevalier, venés amont et nous gharandissiéz de ces gens sans pité qui nous ochiront, se il nous tiennent, enssi que les aultrez.» Quant li gentilx chevaliers messires Thumas les vit et il lez eut ravissés, il fu moult liés: ossi furent li autre compaignon. Si montèrent en le porte jusquez à yaux, et li connestablez de Franche, li cambrelens de Tamkarville et tout li autre qui là estoient afuis, se rendirent prissonnier; et le dit messire Thummas de Hollande et si compaignon les rechurent vollentiers et se pennèrent d’iaux à sauver et de garder leurs vies; et puis missent bonnez gardes dalléz yaux, par quoy nulx ne lez osast faire mal ne villonnie.

Puis s’en allèrent chil chevalier englès par le ville de Kem pour destourber à leur pooir le grant mortalité que on y faisoit, et gardèrent puisseurs belles bourghoises et dammes d’encloistre de violer: dont il fissent grant aumousne et courtoisie et droite gentillèche. Et fu trouvés et robés si grans tresors, que on ne le poroit croire ne pensser. Au recorder le persequcion, le occision, le violensce et le grant pestilensce qui adonc fu en le bonne ville de Kem, c’est une pité et grans orreurs à pensser coumment crestiien puevent avoir plaisanche ne conssienche de enssi li ungs l’autre destruire. A deus corron[s] de celle bonne ville de Kem avoit deus moult grandes et mout riches abbeies, l’une de noirs monnes et l’autre de noires dammes qui sont touttes gentilz femmez. Et doient estre et elles [sont] six vingt par compte et par droit nombre, et quarante converses à demie prouvende, dont une grant partie furent viollées. Et furent ces deus abbeies priès que touttes arsses avoecq grant partie de le ville, dont ce fu pitéz et dammaigez. Et moult en despleut au roy, mès amender ne le peut, car ses gens s’espardirent si en tous lieux pour le convoitise de gaegnier, que on ne les pooit ravoir. Et sachiés que très grans tresors y fu gaegniés, qui oncques ne vint à clareté, et tant que varlet et garchon estoient tout riche; et ne faissoient compte de blancq paiement fors que de florins: il donnaissent plain ung boisciel de paiement pour cinq ou pour six florins.

Quant li roys englès eut acompli ses volentéz de le bonne ville de Kem, et que ses gens l’eurent toutte courue et robée, et concquis ens si grant avoir que on ne le poroit numbrer, si regarda li roys et ses conssaux que il avoient tant d’avoir qu’il n’en savoient que faire, et n’en quidoient mies tant en un royaumme qu’il en avoient jà trouvet depuis qu’il arivèrent en l’ille de Grenesie en venant jusquez à là. Et avoient pris par droit compte en le ville de Kem cent et sept chevaliers et plus de quatre cens riches bourgois; et en avoient encorrez grant fuison pour prisonniers pris ens ès bonnes villes, que concquis avoient en avant. Et si estoit ossi toutte leur navie en le Hoge Saint Vast. Dont il regardèrent as pluisseurs coses, à sauver leur avoir concquis et leurs prisonniers, et à garder leur navie. Si ordonna li roys d’Engleterre que tous leurs avoirs fust menés et chariiés à leur navie, et ossi tous leurs prisonniers menet, ainschois que il chevauchaissent plus avant. Tout enssi comme il fu ordonnet, il fu fait. Les naves et li vaissiel furent recargiet de draps, d’avoir et de jeuiaux tant que sans numbre, et leurs charois alegeris; et puis missent tous leurs prisonniers en leur navie. Et en fu rekerkiés li comtez de Hostidonne à deux cens hommes d’armes et cinq cens archiers, qui se parti dou roy et de l’host et monta en mer et ramena tout ce que devant est dit, à sauveté en Engleterre. Or parlerons dou roy Edouwart et coumment il chevauça encorez avant. Fº 90 vº.

—Ms. de Rome: En ce jour se levèrent aussi les Englois moult matin. Et oirent li rois messe et tout li signeur, et puis se apparillièrent et missent en ordenance et au cemin pour aler à Kem. Si se traissent tout souef, lors batailles rengies, les banières des marescaus tout premiers, et aprochièrent la ville de Kem. Ces gens d’armes de France, chevaliers et esquiers, estoient tout tret sus les camps, et mis en bonne ordenance de bataille, et d’autre part aussi tout li honme bourgois de Caen; et moustroient par samblant que il attenderoient les Englois et les conbateroient. Mais qant il les veirent venir cevauchant en ordenance de bataille, et tout en une brousse, banières et pennons ventellans, ce que acoustumé il n’avoient pas de veoir, si se conmencièrent à esfraer, et encores plus qant ces archiers conmenchièrent à traire et il sentirent ces saiètes; et se desconfirent si de euls meismes que tout chil dou monde ne les euis[sen]t mies retenus qu’il ne se fuissent mis à la fuite. Adonc peuist on veoir gens fremir et esbahir, et celle bataille rengie desconfire à peu de fait, car casquns se pena de rentrer dedens la ville à sauveté. Là ot grant encauch et maint honme reversé et bouté jus à terre, et ceoient à mons l’un sus l’autre, tant estoient il fort eshidé. Li connestables de France et li contes de Tanqarville, li sires de Graville, li sires d’Estouteville, li sires de Saqenville, li sires de Coursi, li sires d’Iveri, qui veirent ce grant meschief apparant et ces honmes et bourgois de Kem ensi fuir et ceoir l’un sus l’autre, s’en retournèrent, casquns que mieuls mieuls, sans arroi et ordenance. Et montèrent amont en une porte sus l’entrée dou pont et se quidièrent là sauver; et estoient, n’i avoit baron, ne chevalier, tout esbahi dou mescief que il veoient, car les Englois estoient jà entré dedens la ville bien avant. Et ensi que il entroient, il se rengoient et ordonnoient sus les caucies, ne nuls n’entendoit à lui deffendre, mès au fuir et à lui sauver, et gissoient li mors et les ocis sus les caucies à mons. Auqun chevalier et esquier, qui savoient le cemin viers le castel et meismement des honmes de la ville, se destournèrent et se missent hors dou fouleis et de la voie des Englois, et se retraissent et boutèrent ou chastiel. Tout chil et celles qui peurent avoir celle aventure d’entrer ens ou chastiel, furent sauvé. Moult de honmes, de fenmes, et d’enfans widoient aussi par les portes qui estoient ouvertes, et prendoient les camps et eslongoient ce mescief, et ne faisoient compte de cose qui demorast derrière. Bien sçavoient que tout estoit perdu: encores ewireus qui se pooit sauver par ce parti. Englois, gens d’armes et archiers qui encauçoient les fuians, faisoient grans occisions, car honme n’estoit espargniés, qui ceoit en lors mains.

Et avint que li connestables de France et li contes de Tanqarville, qui monté estoient en celle porte au pont, regardèrent au lonc, tant en la ville que dehors la ville, car tous jours entroient Englois; et veirent devant euls sus les rues si grans oribletés et pestilenses que grans hisdeurs seroit et estoit de le oser regarder. Si se doubtèrent de euls meismes de esceir en ce dangier et entre mains d’archiers qui point ne les congneuissent. Ensi que il regardoient aval, en grant doubte, ces gens ocire et abatre, il perchurent un gentil chevalier englois, qui n’avoit q’un oel, lequel on nonmoit mesire Thomas de Hollandes, et cinq ou siis chevaliers avoecques lui, et desous banière. Et par la banière que uns chevaliers portoit toute droite, il le ravisèrent, car bien l’avoient veu aultrefois, et boutèrent hors deus de lors pennons par les fenestres de la porte, et conmenchièrent à criier et à huier et à faire signe que on parlast à euls. Tantos chil gentilhonme englois, qui estoient avoecques mesire Thomas de Hollandes, entendirent ce signe, et li dissent: «Monsignour, arestés vous. Là sus sont retrait grant fuisson des barons de France, qui ne sont pas bien asegur de lors vies. Montons amont, car il vous demandent et se voellent rendre. Vous poriés par ce parti moult tos avoir une bonne journée.» Mesires Thomas et sa banière s’aresta; et descendirent de lors chevaus et montèrent les degrés de la porte. Ensi que il montoient, li doi conte de France lor vinrent au devant et li dissent: «Messires Thomas de Hollandes, entendés à nous et nous prendés à prisonniers, et nous sauvés les vies de ces archiers.»—«Qui estes vous?» dist mesires Thomas. «Nous sonmes Raouls, contes d’Eu et de Gines, connestables de France, et je Jehans de Melun, contes de Tanqarville et canbrelens de France.» Qant messires Thomas de Hollandes les entendi, si senti et congneut tantos que il avoit bien volé, et fu tous resjois pour deus raisons: li une estoit pour tant que il avoit bons prisonniers, dont il poroit avoir cent mille moutons; l’autre pareçon, pour tant que il lor sauveroit les vies, car il gissoient là et avoient esté en grant peril pour les archiers et les Gallois, car ils sont si divers que il ne voellent nului congnoistre. Tantos chil doi conte fiancièrent lors fois à mesire Thomas de Hollandes, et aussi fissent tout li aultre baron et chevaliers, qui dedens la porte estoient. Considerés la bonne estrive et aventure que mesires Thomas de Hollandes ot d’avoir si bons prisonniers qui li ceirent ens ès mains. Tantos, il ordonna trois de ses chevaliers et de ses honmes à demorer là d’encoste ses prisonniers, et mist son pennon en la porte. Ce estoit segnefiance que la porte estoit à lui, et tout chil qui dedens estoient; et puis descendi aval et monta à ceval, et se remist en ordenance avoecques les autres au cevauchier et à aler toutdis avant; mais toutes gens fuioient devant les Englois. Si est la ville de Kem grande et poissans et estendue durement et fort peuplée. Et cei adonc si bien as Englois que sans le dangier de passer au pont, il passoient et repasoient, ensi que il voloient, la rivière de Ourne, car la mer estoit si basse pour celle heure que il n’i avoient nul empecement de passer, et par ce point fu la ville plus tos conquise.

Ensi ot et conquist li rois d’Engleterre la bonne ville de Kem, et en fu sires; mais aussi il li cousta moult de ses honmes, car chil qui estoient montés ens ès loges et sus les tois, par jetter pières et baus et autres coses, en mehagnièrent et ocirent assés. Et fu dit au roi d’Engleterre au soir et raporté de verité que il avoit perdu bien cinq cens honmes, dont li rois fu si courouchiés que il ordonna et conmanda que à l’endemain tout fust mis à l’espée, et la ville contournée en feu et en flame. A ces paroles dire, estoit messires Godefrois de Harcourt presens, qui amoit la ville de Kem, quoi que il fust là en la compagnie des Englois, et ala au devant et rafrena le corage dou roi, et li remoustra ensi, en disant: «Chiers sires, soufisse vous, se vous avés les biens de la ville, sans essillier. Encores est la ville moult peuplée, et se sont repus et muchiés moult de gens en cambres, en soliers, en tours et en celiers, qui se meteront à deffense, se il voient que on les voelle tout metre à l’espée. Et ce vous poroit grandement couster de vos honmes, et vous en avés bien à faire, avant que vous soiiés au cor de vostre voiage; et auerés des rencontres et des batailles assés, avant que vous soiiés venus devant Calais, où vous tendés à venir; mais faites asavoir et criier par toute la ville que casquns se loge et se tiengne en sa paix, car jà ont vostres gens tant conquesté que tout li plus povre sont rice.» Li rois se rafrena et se ordonna par le consel Godefroi de Harcourt.

Li rois d’Engleterre et ses gens furent signeur de la ville de Kem trois jours, et ne fissent à honme ne à fenme mal, depuis que mesires Godefrois de Harcourt en eut priiet et parlet. Mais jà avoient les Englois pris et levés tant de biens et de bons meubles, que bien lor devoit souffire; et tant en avoient amené des aultres villes conquises et dou plat pais que tout en estoient cargiet et soelet. Et orent ordenance et avis, en ces trois jours, que tout lor butin et lor conquès et les prisonniers que pris avoient, il les envoieroient en Engleterre par la mer, et en lors vaissiaux qui gissoient à l’ancre, assés priès de Kem, en la rivière de Ourne. Se ne fissent li plus de ces Englois que porter, mener et chariier toutes bonnes coses, draps, toilles, pennes, lis, cambres ordonnées, et tous bons meubles. De menues coses et petites, il ne faisoient compte, et vendoient bien li un à l’autre lor pillage et lor conquès, et en donnoient très grant marchiet, et lors prisonniers aussi, et tout estoit remis à cariage et voiture et porté en la navie. Li connestables de France et li contes de Tanqarville furent rendu et livré de mesire Thomas de Hollandes au roi d’Engleterre. Et furent tant que dou rendage et de la prise bien d’acort ensamble, et des aultres chevaliers qui pris avoient esté en la ville de Kem prissonniers. Et toutes coses furent tout mis ens la navie, et li contes de Honstidonne, à tout deus cens honmes et quatre cens archiers, ordonnés à estre capitains et conduisières de la navie, pour mener en Engleterre. Et fissent ce les Englès à celle intension et ordenance que il ne voloient point estre cargiet, sus le grant cemin que il avoient à faire, de nulle cose qui lor donnast empecement. F^os 113 et 114.

P. 143, l. 1: oïrent.—Mss. A 1 à 6, 11 à 14: virent. Fº 137.

P. 143, l. 1: ruire.—Mss. A 15 à 17, 20 à 29: bruire, bruyre. Fº 138 vº.

P. 143, l. 6: voir Sup. var. (n. d. t.)

P. 143, l. 13: aucun chevalier.—Ms. B 6: neuf chevaliers. Fº 304.

P. 144, l. 19: moutons.—Mss. A 20 à 22 et B 6: escus. Fº 200.

P. 146, l. 4: il vous tourroit.—Mss. A 23 à 33: la quèle chose vous redonderoit à grant blasme (mss. A 30 à 33: honte. Fº 184.) Fº 158 vº.

P. 147, l. 17: Si fu ordonnés.—Ms. B 6: Sy le renvoia on et tout l’avoir devant conquis et toute leur navire en Engleterre par le conte de Hostiton à cinq cens combatans. Et ossy y furent mené tous les prisonniers, le connestable et le conte de Tancarville et bien six vingt chevaliers et quinse cens riches hommes normans, que de Kem, que de Saint Lo et de Barfleu, qui depuis paièrent grant renchon. Fº 306.

§ 263. P. 147, l. 25: Ensi ordonna.—Ms. d’Amiens: Quant li roys englès eut enssi ordounné, si comme vous avés oy, il fist chevauchier ses marescaux seloncq se premierre ordounnanche, l’un des lés et l’autre d’autre; et il et li prinches de Galles, ses filx, chevauchoient enmy le moiienne. Yaux parti de Kem, il entrèrent en le comté de Ewrues, ardant et essillant le pays. Et vinrent à une ville que on claimme Louviers, là où on fait plus grant drapperie qu’en ville qui soit en France; et estoit priès ossi bonne que li chitéz d’Ewrues ou que Saint Leu en Constentin. Si fu la ville de Louviers prise assés tost à peu de force, car elle n’estoit point fremmée; et fu toutte courue et robée, et y eut trouvet très grant avoir. Quant li roys englès eut fait ses vollentés de le ville de Louviers et de le comté de Ewruez, horsmis des fortrèchez, car devant nul fort il ne se volloit arester, si se mist sour la rivierre de Sainne, et gasta tout le pays d’entours Mantes et Meulent. Et s’en vint à Vrenon, qui estoit moult grosse ville, et l’ardi et essilla. Puis s’en vint à Poissi, mout grosse ville ossi, et trouva le pont brisiet et deffait. Ossi avoit il fait à Vrenon, dont il fu dollans et courouchiés; mès encorrez estoient les estakez et les gistez en le rivierre. Si se aresta là li roys, et y sejourna par cinq jours. Endementroes fist il le pont refaire bon et fort, pour passer son host bien et aisiement. En che sejour il fist chevaucier ses marescaux monseigneur Godeffroy de Harcourt et le comte de Warvich jusques à Saint Clou, et là bouter les feus, et puis Saint Germain en Laie et le Monjoie aussi ardoir et abattre, et tant que on en veoit clerement les feux de Paris. Et estoient adonc moult esbahit en le chité, car elle, à che donc, n’estoit point fremmée fors que de bailles. Si se doubtoient li Parisiien qui li Englès par outraige ne venissent escarmucier à yaux.

Quant li roys de Franche, qui se tenoit adonc en Paris, vit lez Englès si aprochier, que les feux estoient à deux petittez lieuwez priès de lui, si fu moult courouchiéz, et demanda consseil coumment il poroit ouvrer de ceste besoingne. Ad ce jour avoit grant fuison de prelas et de fourés chaperons dalléz lui, car li roys de Behaigne, li dus de Loerainne, messires Jehanz de Haynnau, li comtez de Namur et toutte se chevallerie estoient à Saint Denis et là environ. Si conssillièrent au roy que il venist deviers yaux, et ewist advis de chevauchier contre ses ennemis, et que de yaux enclore sour aucun pas, car à leur navie ne poroient il jammais retourner. Et lui dissent encorrez, pour lui recomforter, qu’il ne fust de riens effraés, car par fummières li Englès ne le bouteroient jamès hors de son hiretaige.

Adonc se parti li roys de Paris et s’en vint à Saint Denis, où il trouva le roy de Behaingne, le duc de Lorainne, le comte de Bloix, son nepveult, monseigneur Jehan de Haynnau, et grant fuison de bonne chevalerie, qui li fissent grant chierre et li conssillièrent qu’il chevauchast contre ses ennemis. Lors remforcha li roys son mandement partout, en Bourgoingne, en Campaigne, en Franche, en Vermendois, en Artois, en Pikardie et par tous lieux où il pooit avoir gens d’armes, qu’il venissent deviers lui; et chil obeirent, qui mandet furent.

Endementroes fu li pons à Poissi refais bons et fors, et passa oultre li roys [englès] et toutte sen host; et s’en vint logier en l’abbeie de Poissi, et y fu le nuit de Nostre Damme my aoust, et le jour toute jour. Et l’endemain il s’en parti, et chevaucha plus avant le chemin de Pikardie, au léz devers Biauvais et Biauvesis. Fº 91.

—Ms. de Rome: Au quatrime jour, li rois d’Engleterre et les Englois issirent de Kem, et qant il monta à ceval, il i avoit autour de li grant fuisson de honmes et de fenmes, qui venu l’estoient veoir. Se lor dist li rois tout hault: «Entre vous qui chi estes, de la courtoisie que je vous fac, remerciiés vostre bon amic Godefroi de Harcourt, car par li estes vous deporté de non estre ars.» Tout et toutes s’engenoullièrent adonc devant le roi, et dissent de une vois: «Très chiers sires, Dieus le vous puist merir, et à li ossi.» Adonc cevauça li rois oultre, et li princes de Galles, ses fils; et grant fuisson de claronchiaus et de tronpètes et de menestrels cevauçoient devant et faisoient lor mestier. Et cevauchièrent en cel estat tout au lonch de la ville de Kem, et missent priès d’un jour au widier, avant que li arrière garde fust hors. Et prissent tout le cemin de Louviers, et se logièrent oultre Kem, celle première journée puis lor departement, une lieue ou cemin de Louviers.

Et li contes de Honstidonne à toute sa carge à flun de la mer se desancra, et vint celle première marée jessir à l’ancre en l’abouqure de la mer. Et enmenoit si grant avoir jà conquis en Normendie que mervelles seroit à penser, et bien cinq cens prisonniers, tous rices honmes des viles où il avoient passet, et le conte d’Eu et de Ghines, connestable de France, et le conte de Tanqarville, et bien soissante chevaliers et esquiers. Et esploitièrent tant depuis, à l’aide de Dieu et dou vent, que il prissent terre en Engleterre. Si fu tous li pais resjois de lor venue, et par especial la roine Phelippe d’Engleterre, et conjoi ces chevaliers prisonniers; et furent envoiiet et mis ens ou chastiel de Londres, tout au large et à lor aise, car li rois en avoit ensi escript et segnefiiet à la roine. Se tint la bonne roine l’ordenance dou roi, ne jamais ne l’euist brissiet.

Tant cevauchièrent li rois d’Engleterre et ses gens, depuis que il se furent departi de la bonne ville de Kem, que il aprochièrent Louviers, une bonne ville, et où on faisoit grant fuisson de draperie, et estoit pour lors rice et plentiveuse de tous biens. Les Englois entrèrent dedens à peu de fait, car pour lors et en devant elle n’estoit noient fremée. Si fu la ville courue et reubée, mais il ne prendoient que toutes bonnes coses, et ne se voloient mais cargier de si grant meuble que il avoient fait en devant, pour tant que lor navie ne les sievoit plus. Nequedent ne se pooient il tenir de pillier et de rompre huges et escrins et de prendre or et argent, qant il le trouvoient. Et qant il avoient assamblé des draps, des lainnes et des biaus jeuiauls à grant fuisson, il apactissoient les honmes dou pais qui se boutoient ens ès fors. Et tenoient trop bien lors pactis, et lor vendoient tout ce de gros que pris et pilliet avoient; et donnoient pour cent florins ce qui en valloit mille, et ensi orent il moult de finance sus le cemin.

Qant il orent fait lors bons et lors volentés de Louviers et il s’en departirent, li darrainnier boutèrent le feu dedens; et puis entrèrent en la conté d’Evrues et l’ardirent toute, reservé les forterèces. Et passèrent Pasci et au Pont à l’Arce et aprocièrent la chité de Roem, qui pour lors estoit moult bien garnie de gens d’armes et de signeurs; mais chil qui dedens estoient, n’avoient nulle volenté de issir, car il avoient bien oï dire que la ville de Kem estoit perdue par l’orguel des bourgois de la ville, qui vorrent issir. Et là estoient en garnison li contes de Harcourt, frères à mesire Godefroi, et li contes de Dreus, mais sa ville fu arse. Li avant garde ne se peurent tenir, c’est à entendre chil qui la gouvernoient, que il n’aproçassent Roem, et en ardirent les fourbours. Li rois d’Engleterre et sa bataille passèrent ensi que à une lieue priès, et se rengièrent et ordonnèrent à la veue et moustre de ceuls qui en Roem estoient, et lor mandèrent la bataille par un hiraut; mais point ne s’i acordèrent.

Si tournèrent les Englois deviers Vrenon, où il i a bon chastiel et fort, auquel il ne fissent nul samblant de l’asallir, mais il ardirent la ville, et puis Vrenuel et tout le pais de environ Roem et le Pont de l’Arce. Et vinrent ensi tout ardant le pais, à destre et à senestre, et devant euls jusques à Mantes et Meulent. Et passèrent assès priés dou fort chastiel de Roleboise, mais point n’i assallirent. Et partout sus la rivière de Sainne trouvoient il les pons deffais. Et tant ceminèrent que il vinrent à Poissi, et trouvèrent le pont deffait; mais encores estoient les estaces dou pont et les gistes en la rivière. Si se aresta là li rois et toute li hoos, et i sejournèrent cinq jours. Et entrues entendirent les Englois carpentiers, que il avoient amené en lor compagnie, au pont refaire. Et couroient li fourageur tout le pais environ, tant que, des feus que il faisoient ou plat pais, les fumières en estoient veues de Paris.