¶ Le second livre de la navigation de lisbone a calichut translaté de langue Portugaloise : en ytalienne et de ytalienne en françoys.

¶ Icy se descouvrent nouveaulx pays avec leurs noms.

Chapitre .xlvii.

Ce que dessus est escript est ce que j’ay entendu et veu au temps que allay es parties dessusdictes. mais despuis moy il y en a esté d’autres principallement depuis la mort dudict seigneur infant don Hurich a envoyé deux caravelles armees/ et en estoyt capitaine Pierre de Sinzia escuyer dudict seigneur : lequel donna commission & chargea audit de sinzia qu’il deust aller avec lesdictes deux Caravelles plus avant que on avoit esté par ceste coste de mores & qu’ilz descouvrissent pays nouveaulx avec lequel pierre de sinzia alla ung jeune homme Portugaloys mon amy lequel avoit esté avec moy mon escripvain aux voyages que avez ouys & au retour desdictes deux caravelles moy loys de cadamosto me trouvant en lachus qui est ung lieu apres le chef sainct vincent. arriva ledict pierre de sinzia & mondict amy lequel vint loger en ma maison lequel me compta de point en point tous les pays qu’ilz avoient descouvers et les noms qu’il leur avoit mis : et les lieux la ou ilz avoient sejourné. Et commenceray au fleuve si grant la ou je avoye esté et duquel m’en party pour m’en retourner en portugal desquelz pays leurs noms & demourances cy dessouz en sera faicte mencion. premierement mondict amy me dist qu’ilz avoient esté a cesdictes deux grandes isles habitees et que en l’une d’icelle ilz descendirent en terre & parlerent avec les mores mais qu’ilz ne furent point entenduz Et allerent a leur habitation & leurs maisons estoient trespovrement acoustrees couvertes de paille & [en] aucunes d’icelles maisons trouverent statues de ydolles de boys et par cela qu’ilz peurent entendre de cesdictz mores ilz sont ydolatres/ et apres qu’ilz veirent qu’ilz ne povoient avoir ne entendre aucune chose de cesdictz mores ilz se partirent d’eulx suyvans leur voyage par ladicte coste et tant feirent qu’ilz vindrent a la bouche dudit fleuve grant et large selon leur jugement d’une lieue et dit que depuis cestuy fleuve grant duquel me party jusques a cedict autre fleuve y peut avoir a son advis quatorze lieues. et dit que iceluy fleuve s’appelle le fleuve de Besague/ a cause d’ung seigneur qui demeure a la bouche d’icelui fleuve. Apres qu’ilz furent partiz de la bouche de cedict fleuve de besague en navigant par ladicte coste vindrent a ung chef auquel [misrent] nom le chef de verga et toute celle coste depuis ledict fleuve de besague jusques audict chef de verga est montueuse non pourtant trop haulte : et sont depuis cedict fleuve jusques au chef de Verga environ .xxxv. lieues : et lesdictes montaignes sont plaines de beaulx arbres et moult grans et on les veoit verdoyer de loing et semble une belle chose de veoir.

¶ Du chef de Sargres avec trois aultres et les noms de tresgrans fleuves.

Chapitre .xlviii.

Et apres passerent par ledict chef de verga et en navigant par ladicte coste par l’espace de vingt lieues : ilz descouvrirent ung autre chef lequel selon le jugement de chascun des mariniers dient estre le plus hault chef que jamais ilz veirent au meillieu de la terre. a cestuy chef y a une poincte haulte aguisee a maniere d’ung diament & tout ce chef est grant et habondant d’arbres vers et misdrent a nom a ce chef sacres en maniere de une forteresse que fist faire la bonne aymee du feu seigneur Infant don Hurich sus une des poinctes dudict chef saint vincent a laquelle il meist nom Sages et s’appelle des portugalloys le chef de Sacres de senega et dyent les mariniers que les habitans de celluy pays estre ydolatres pour l’information qu’ilz en eurent/ et qu’ilz adorent statues de boys en formes d’hommes et dient d’avantaige quant ilz veullent menger ou boyre offrent a leurs ydolles de leurs viandes : ces Mores icy ont aulcuns signes fait avec le fer chault dedans leurs visages & dedens leurs corps & ses mores icy sont plus fort tirans beaucoup sur le gris que sur le noir et vont tousjours nudz et leurs braes sont faictes des escorces d’arbres avec lesquelles ilz couvrent leurs parties honteuses ilz n’ont aucunes armes par ce que il ne se trouve point de fer en leurs pays ilz vivent de ris et de miel et de legumes : C’estassavoir feves et faizeulx et d’autres qualitez des nostres mais plus beaulx et plus gros ilz ont chairs de vaches & de chievres mais non pas en quantité et dyent encores que despuis cestuy chef jusques en la mer y a deux petites isles l’une est distante d’une lieue et l’autre de deux & sont desabitees pour estre petites mais elles sont copieuses d’arbres.

En apres les habitans de cestuy fleuve ont aucunes almadies qui sont tresgrandes dedens lesquelz il y naviguent de trente a quarante hommes par chacune & voguent avec avirons eulx estans sur les piedz comme dessus ay dict/ & cestes gens ont tous les oreilles pertuysees tout a l’entour et a chascun pertuis ilz ont des aneaulx d’or et aussi au neez et quant ilz veullent menger ilz les tirent dehors/ et aussi bien les portent les femmes comme les hommes/ et dient que les femmes des seigneurs ou des hommes d’estime ont de nature leurs levres pertuisees d’aucuns pertuis comme ilz ont les oreilles/ esquelz pertuis lesdictes femmes portent par grant dignité : et pour signification d’estat aneaulx d’or ainsi comme es oreilles lesquelz ilz tirent et mettent a leur bon plaisir Passé ledit chef de sacres environ dix lieues se trouve ung autre fleuve appellé sainct vincent et est large dedans la bouche environ dix lieues et plus avant environ douze lieues et demye par ladicte coste se trouve ung aultre fleuve lequel s’apelle le fleuve verd et est plus grant en la bouche que n’est celuy de sainct vincent : c’estassavoir de plus de dix lieues et a telz fleuves ont estez mis noms par lesdictz navigans de deux caravelles du roy de portugal : et toute ceste coste est pays montueux et a par tout bon cours et bon fons Et apres qu’on passe cestuy fleuve verd environ .li. lieue se trouve ung autre chef et l’apellerent le chef allegre Et cela fut pource que cestuy chef avec le pays semble estre tout alegre : et de cestuy chef allegre commence une coste d’une montaigne : laquelle dure environ lieue et demye & est ceste montaigne moult haulte toute couverte d’arbres vers & haulx Et a la fin de ceste montaigne se trouve en la mer environ deux lieues trois isles et la plus grande peut estre environnee de trois lieues et les appellerent isles sauvaiges : et appellerent ladicte montaigne la montaigne lionne.

Item apres qu’on a passé la coste de la montaigne lyonne tout de la en avant si est terre basse et plaige et y a beaucoup de secques de sablon et du chief de ladicte montaigne plus oultre se trouve ung autre fleuve bien gros : et est large en la bouche environ d’une lieue : auquel misdrent nom le fleuve rouge pource que l’eaue de cedict fleuve se monstroit estre au fons comme rouge a cause de la terre qui estoit rouge : et oultre ledit fleuve y a ung chef et pource qu’il se monstre rouge ilz l’appellerent le chef rouge : et depuis cestuy chef jusques en mer environ deux lieues il y a une ysle rouge.

Item en apres qu’on a passé ledit chef rouge on trouve ung goulfe ouquel est ung fleuve grant auquel misdrent nom le fleuve saincte marie pource que le jour saincte marie de la naige il fut trouve par lesdictz mariniers Et de l’autre part du fleuve y a une poincte au devant de laquelle ung pas dans la mer y a une petite isle et se fait en ceste isle beaucop de bancz bas et areneux qui durent en allant par la rive quatre lieues & la romt la mer et y a la grant courance d’eaue et grant mer qui monte et descent et appellerent ladicte petite isle : isle des bans a cause de ce qu’il y avoit beaucop de secheresses & oultre ladicte isle se fait un chef grant lequel ilz apellerent le chef de sainct anne pource que a cestuy jour il fut trouvé : & depuis ladicte isle jusques a cedit chef cinq lieues et tout ceste coste est plaige et de petit fons.

¶ Des fleuves des palmes avec plusieurs autres.

Chapitre .xlix.

Item oultre ledit fleuve de saincte anne a dixhuit lieues toutesfois par ladicte coste trouvasmes ung autre fleuve auquel ilz misdrent nom le fleuve des palmes pource qu’en ce lieu la y a habondance de palmes/ et la bouche de cestuy fleuve combien qu’elle se monstre estre assez longue si est elle occupee de bancz et de Secques de sablon & l’entree de cestuy fleuve est perilleuse & depuis ledit chef de saincte anne jusques a cedit fleuve c’est tout plaige : ¶ Item apres cestuy fleuve est ung aultre loingtain de dixhuit lieues : & est tousjours plaige par ladicte coste et ont appellé cedit fleuve le fleuve des fleuves. Et cela a esté pource que quant ilz le trouverent par tout celle coste on ne veoit autre chose en terre que fleuves faitz par ceulx du pays & oultre cedict fleuve a cinq lieues tousjours par plaige se trouve ung chef qui se met bien avant dedans la mer Sur cestuy chef semble avoir ung mont hault et l’appellerent le chef de la montaigne. ¶ Item plus avant cedict chef de la montaigne environ deux lieues y a ung aultre chief petit et non hault sus lequel monstre estre une montaignette & l’appellerent chef courtois Et en ceste partie ceste premiere nuit ilz virent plusieurs feux & arbres sur lesquelz y avoit des mores et croyent qu’ilz s’estoient mis dessus iceulx pour non estre prins et aussi pour veoir chose jamais par eulx non veue : et oultre ledit chef courtois a trois lieues tousjours par celle coste y a ung grant bois avec plusieurs arbres qui beuvent jusques sur l’eaue de la mer & au derriere de cestuy boys ilz misdrent l’anchre et aucunes almadies vindrent a la caravelle & y avoit dedans trois hommes par chascune tous nudz lesquelz portoyent en leurs mains aucunes massues aguës & a leurs modes ce sont quasi dars et aucuns d’eulx avoyent certains petis couteaulx & entre eulx tous ilz avoyent deux targes de cuir avec trois arcz & vindrent a la caravelle et ces gens icy avoyent toutes les oreilles tout a l’entour pertuisees et aussi le nez par dessoubz Et aucuns d’eulx avoyent au col aucune reste de dens qui sembloit que fussent dentz d’homme ausquelz fut parlé par divers truchemens mores qui estoyent dedans lesdictes caravelles et jamais ne furent entendus d’une seulle parolle et on ne peult entendre d’eulx aucune chose desquelz mores en furent prins par les portugaloys et de ces .iii. ilz en laisserent les deux : & cecy estoit pour acomplir le commandement de leur roy lequel leur avoit commandé qu’en la derniere terre la ou ilz arriveroyent eulx non voulant aller plus avant si par adventure ilz n’estoyent entendus avec celle generation qu’ilz trouvassent moyen d’amener aulcuns desdictz mores du pays fust par amour ou par force affin de povoir entendre de luy avec le temps ou par voye de truchemens d’autres mores qui se trouvent en portugal ou voirement par espace de temps qu’ilz apprinssent a parler aulcunes nouvelles de ces mores de son pays Et pour ceste raison ilz retindrent cestuy more pour non vouloir passer plus oultre lequel ilz conduirent a portugal & pour abreger le roy de portugal fist parler a cedict more par divers mores & au dernier d’une seulle femme more esclave d’ung bourgois de lisbonne qui estoit de loingtain pays il fut entendu non pas par son propre langage mais par ung autre langaige que luy & elle sçavoyent & autre chose ne raporta au roi par le moyen de ceste femme que entre choses en son pays y avoit des licornes vives et beaucoup d’autres choses Et apres que le roy l’eut tenu environ trois moys en son royaulme il luy donna aucunes robes et le fist conduire de nouveau dans une caravelle en son pays et de ce dernier lieu depuis n’est passé oultre aulcune navire jusques a mon partement D’espaigne qui fut le premier jour de febvrier mil .cccc.lxiiii. Auquel boys fut mis nom le boys de saincte marie finis Et notez que le .vii. jour d’aoust a mon retour eusmes veue du chef blanc en venant a la volte de terre & depuis avec l’autre volte nous le passasmes le .viii. jour dudict moys environ midy et nous apparut sur la mer a la proue ung tresgrant poisson lequel venoit par l’eaue en faisant grant bruit et tempeste vers nostre volte en aprouchant aucunement a nous apres que eusmes veu une bonne partie de si terrible grandeur par ce que aucunement il se mettoit hors de l’eaue avec sa teste/ et veu par nous la terrible impetuosité qu’il menoit nous estraignismes noz voilles en nous mettant de costé le plus que nous povyons et cherchions de nous eslongner et fouyr de cestuy poisson lequel dieu moyennant ne vint vers nous et passa sur le vent qui estoit sus nous environ ung quart de lieue il passa loing de nous & par cela que nous peusmes veoir ledit poisson quant il se monstroit sus l’eaue il monstroit au baisser de la teste a maniere de elles que devoyent estre espines : lesquelles se baissent toutes derriere apres l’autre qui sembloyent proprement esles de moulin a vent. Sa grandeur par ce que monstroit ne me sembloit point moindre de l’une de noz galeaces de venise grosse & tous les espaignolz lesquelz sont usités de veoir plusieurs balaines lesquelz sont les plus grans poissons dequoy nous ayons congnoissance dyent jamais avoir veu poisson si grant ne si terrible ne que si grant paour luy eussent faict comme fist cestuy cy.

¶ Le temps que se partirent les navires de lisbonne et leur retour.

Chapitre .l.

Les navires que envoya le Roy de Portugal furent trois balonniers tous nouveaulx c’estassavoir deux de tonneaulx quattre vingtz et dix et l’autre de cinquante et plus une petite navire de cent tonneaulx chargee de vinnaille : et celles toutes portoyent neuf vingtz hommes et partirent de lisbonne le neufviesme jour de juillet. Mil quatre cens quatre vingtz et dixsept : le cappitaine de Ghiman le dixiesme de juillet mil .cccc.lxxx. et .xix. retourna en ceste de lisbonne avec l’ung des balonniers portant cinquante tonneaulx le cappitaine vasch demoura au travers de l’isle du chef verd avecques ung balonnier de tonneaulx .lxxx.x. pour avoir mis ung sien frere en terre qui estoit malade a la mort/ et l’autre balonnier de quatre vingtz dix tonneaulx ilz le bruslerent : pource qu’ilz n’avoient pas gens de la povoir naviguer et aussi bruslerent la petite navire : combien que ceste n’eust point a retourner.

¶ Le lieu ou est melinde/ calichut avec plusieurs autres lieux.

Chapitre .li.

A leur retour ilz avoyent hommes malades .lv. d’une maladie qui leur venoit en la bouche et apres descendoit en la gorge : et encores leur venoit une grant douleur es jambes depuis les genoulx en bas Ces gens qui avoyent esté dedans ces navires dessusdictes avoient encore descouvert terre nouvelle oultre le chef de bonne esperance environ .M. huit cens lieues Lequel chef fut descouvert du temps de don jehan roy de portugal Et dela ledict chef allerent bien six cens lieues en costoyant toute la coste populee de mores & ausdictes six cens lieues ilz trouverent ung grant fleuve et a sa bouche ung grant village tout habité plain de mores qui sont comme subgectz de mores qui estoyent demourans dedans la terre & font guerre ausdictz mores : & en leur disant qu’ilz demourassent la une lune & qu’ilz leur donneroyent de l’or infiny : le capitaine n’y voullut pas demourer mais alla tousjours avant et quant il fut allé .ccc.l. lieues il trouva une grande cité avec murs habitee de mores gris comme mores indians avec tresbelles maisons maçonnees de pierre & de chaulx a la moresque Et la descendirent en terre & le roy d’icelle cité qui estoit more les veit voulentiers et leur bailla ung pillote pour traverser le goulfe et ceste cité s’appelle : Melinde et est assise a l’entour d’ung grant goulfe tout habité de Mores : Et cestuy pillote parloit Italien ilz passerent ledict goulfe pour aller de l’autre costé qui furent .ccccccc. lieues de travers & arriverent a une grande cité de crestiens plus grande que lisbonne qui s’appelle calichut lequel goulfe comme se dict est tout populé de grandes citez et chasteaulx de mores de chascun costé et au bout dudit goulfe y a ung estroit comme a dire l’estroict de rommanie et apres qu’on a passé ledict estroict y a une autre mer : c’estassavoir ung goulfe auquel ja est la mer rouge du costé droict & dela jusques a la maison de la mecque ou est l’arche de Machomet y a .iii. journees par terre et non plus a laquelle maison de la Mecque y a une tresgrande cité de mores mon oppinion est que cestuy goulfe soit goulfe d’arabie Duquel escript pline & que Alexandre le grant fut jusques la pour faire guerre Semblablement les rommains y furent et prindrent tout.

¶ Description de calichut du Roi et de son Palays.

Chapitre .lii.

Et pour retourner a la cité des crestiens qui s’appelle calichut elle est plus grande que lisbonne habitee des crestiens indigenes gris qui ne sont noirs ny blans. En laquelle y a eglises avec cloches. Mais il n’y a point de prestres & ne font office ny sacrifice : mais seullement esdictes eglises y a ung baquet d’eau a maniere d’eaue benoiste & autres baquet ont du baume & baptisent en trois ans une fois en ung fleuve qui est aupres la cité dedans laquelle sont les eglises de pierre & de chaulx faictes a la moresque & sont les rues bien ordonnees & droictes comme est en Italie Le roy de ladicte cité se fait servir moult haultement & tient estat de roy avec grande quantité d’escuyers et chambellans a ung tresbeau palais. Et quant le capitaine desdictes navires arriva la le Roy estoit dehors ladicte cité a ung chasteau loing d’icelle cinq ou six lieues et incontinent qu’il eut entendu la nouvelle des crestiens qui estoient la venus : il s’en vint a la cité avec cinquante personnes et troys jours apres envoya appeller le capitaine qui estoit en la nef et incontinent il descendit a terre avec douze hommes et environ cinq milles personnes l’acompaignerent depuis la rive de la mer jusques au pallays du roy a la porte duquel il y avoit dix portiers avecques masses fournies d’argent depuis allerent jusques a la chambre dedans laquelle estoit le roy et se gisoit sur ung lict bas le plancher de ladicte chambre estoit tout a l’entour du lict couvert de veloux verd et la muraille de ladicte chambre toute tapissee de damaz de diverses couleurs/ le lict estoit couvert d’une coulte blanche bien fine ouvré toute de fil d’or : et avoit dessus le lict ung pavillon moult riche : et soubdainement le Roy demanda au capitaine qu’il alloit cerchant Le capitaine luy respondit que la coustume de ces chrestiens estoit quant l’embassadeur disoit son embassade a aulcun prince elle estoit secrete & non publique : a l’heure le roy envoya tous ses gens dehors le capitaine luy dist comme il y avoit grant temps que le roy de portugal avoit eu notice de sa grant haultesse & comment il estoit roy crestien & desiroit avoir son amitié & l’envoyoit visiter comme il est de coustume de faire entre les Roys crestiens le roy receut benignement l’embassade depuis envoya le capitaine reposer dedans la maison du more moult riche.

¶ Des espiceries et marchandises avec les monnoyes de calichut.

Chapitre .liii.

En laquelle cité y a infiniz marchans mores tresriches Et tout le train de marchandise est en leurs mains ilz tiennent une petite mosquee tresbelle. Leur roy est regy et gouverné du tout par les mains desdictz mores/ ou par voye de presens qui luy font par industrie toutes les espiceries se trouvent toutes en cestedicte cité de calichut c’estassavoir canelle poivre clou de giroffle gingembre : encens : lacque : du bresil y a infiniz boys neaumoins ladicte espicerie ne croist pas la/ mais croist dedans certaines ysles loingtaines de ladicte cité environ .cxl. lieues lesquelles isles sont aupres de la terre ferme a une lieue du costé de ladicte cité on y va par terre en vingt jours et sont habitees de mores et non des crestiens et lesdictz mores en sont seigneurs Neantmoins toutes lesdictes espiceries se conduisent dedans ladicte cité dedans laquelle est estape desdictes espiceries. les monnoyes qui plus se despendent sont sarraffis d’or fin monnoyé du souldan qui poisent deux ou trois grains moins que le ducat & en ladicte cité on les appelle sarraffins & s’il y a aucuns ducatz venitiens & genevois et y a monnoye d’argent bien petite qui aussi dict estre du souldan Il y a aussi draps de soye/ veloux de toutes couleurs veloutez : satins : damatz : taffetaz : tapis veloutez futaines cotons ouvrez estaing labouré Ilz ont de toutes choses en habondance/ & mon oppinion est que lesdictz draps y sont conduitz du chaire.

¶ Des navires qui passent sur la calamite avec le pris des espiceries.

Chapitre .liiii.

Ces portugaloys demourerent en ladicte cité de calichut depuis le .xix. jour de may jusques au .xxv. jour d’aoust. Dedans lequel temps ilz veirent venir ung nombre infini de navires et dient qu’il y en vint bien mil cinq cens qui vont au traffigue de l’espicerie & les plusgrandes navires ne passent point .cc. bottes de portee : & y en a de plusieurs sortes grandes & petites lesdictes navires n’ont point d’arbres : & ne pevent aller sinon a poupe aucuneffois ilz demourent quatre ou cinq mois pour attendre le temps & beaucoup s’en perist/ elles sont d’estrange maniere & moult debilles elles ne portent point d’armeures ny artillerie : & les navires qui vont aux isles de l’espicerie/ affin qu’elles demourent aupres la cité elles ont le fons bien plain et demandent peu d’eaue & y a aucunes navires qui sont faictes sans aucun fer pource qu’elles ont a passer sur la calamite laquelle est ung peu dela desdictes isles Toutes lesdictes navires quant elles sont devant ladicte cité/ elles demourent au sec dedans la fange & les y mettent quant la mer est grande affin que l’yver elles soyent asseurees de la mer par ce qu’il n’y a pas bon port : la mer y croist & descroist de six heures en six heures & aucuneffois il s’i trouve des navires cinq ou six cens qui est grant chose Le poix de la canelle qui est cinq quintaulx/ vault dedans ladicte cyté de dix a douze ducatz au plus hault pris & dedans lesdictes isles ou elle se recueille elle ne vault que six ducatz ainsi est le poivre et clou de giroffle le gingembre la moytié moins : la lacque ne vault quasi riens tant en y a & la chargent pour enfondrer les navires & semblablement le bresil duquel y en a bois infiniz et ne veullent avoir leur payement sinon en or ou argent Aussi y a du coral Les marchandises de deça ilz estiment peu fors les draps de lin & croy que qui en meneroit il en seroit bon marchant pource que les mariniers vendirent aucunes leurs chemises a change de l’espicerie combien qu’il y ait toilles fines et blanches. lesquelles toylles doyvent venir du chaire & y a la dohane comme a nous et d’entree ilz payent cinq pour cent des joyaulx ilz en apportent peu : & n’est chose qui vaille par ce qu’ilz n’avoient ny or ny argent pour contracter/ combien qu’ilz dient qu’elles soient la cheres et semblablement les perles et mon oppinion est que la il y en a bon marché/ mais celles que les portugalloys veirent estoient es mains de ces marchans mores et ce qui ne vault que ung ilz les veullent vendre quatre comme ilz ont acoustumé de faire. Touteffois ilz ont apporté aucuns balais saffirs & certains petis rubis & y avoit en granade ilz dyent que le capitaine en apporta des riches il les achepta de son argent et toutes les vendit pour joyaulx.

¶ De la mecque le mont Sinaÿ la mer Rouge.

Chapitre .lv.

Les navires qui chargent les espiceries en ladicte cité des crestiens la plusgrande partie vont avec lesdictes espiceries sur ledict goulfe que passerent les portugalloys lequel est moult grant et aussi passe celuy estroit Et depuis avec les autres navires plusieurs ilz passent la mer rouge : & de la ilz vont a la maison de la mecque & y a trois journees et depuis au chemin du chaire & passent au pied de la montaigne de sinaÿ et apres par le destroict du sablon ou ilz dient que aulcuneffois avec grant vent se leve par ledit sablon en hault : & quant il achept il couvre tout ce qui trouve Aussi aucunes navires vont par toutes les citez de ce goulfe & aussi aulcunes a celuy fleuve lequel nous trouvasmes tout populé de mores & sont quasi subjectz aux mores qui demourent dedans la terre & leur font guerre Noz gens trouverent en ladicte cité des crestiens des malvoisies de candie dedans des barilz a mon jugement elle estoit conduicte du chair comme les autres marchandises il y a environ quatre vingtz ans que en ladicte cité de calichut arriverent certaines navires des crestiens blancz avec cheveulx longs comme ont les almans & la barbe avoient entre le nez et la bouche la reste estoit toute rasee comme font en constantinoble ceulx qui suyvent la court & appellent icelles moustaches & avoient des hommes armez de coraces couvertes de chapeaulx de fer & banieres certaines armes en façon d’une hasche en leurs navires avoyent de l’artillerie plus petites que celles qui se usent a present & depuis ont suivy d’y aller de deux ans en deux ans une fois avecques .xx. ou vingt et cinq navires Ces gens icy ne sçavent dire quelz gens ce sont ne quelles marchandises ilz y portent sinon toilles moult fines & chargent leurs navires d’espiceries lesquelles sont de quattre arbres comme ceulx d’espaigne Si c’estoient allemens il en seroyt aucune notice ilz pourroyent estre du pays de la roussie selon aucuns qui entendent aucune chose de la mer Neantmoins nous atendons tout sçavoir par cestuy pillote more qui parle ytalien que leur donna le roy more qui vient dedans les baloniers du capitaine et y est contre sa voulenté.

¶ Les viandes que use le roy de calichut et le peuple dudit calichut.

Chapitre .lvi.

En ladicte cité de calichut des Chrestiens les mores avec leurs navires y apportent assez pain Et pour trois ou quatre deniers ung homme en auroit assez a souffisance pour ung jour ilz ne font point leur pain levé & iceluy est faict en façon de gasteaux/ et le cuisent soubz la braise jour pour jour aussi il y a quantité de ris aussi y a vaches & beufz : mais petis : ilz font laict et beurre : il y a aussi des oranges assez mais toutes doulces lymons : cytrons : cedres : pommes moult bonnes : dates fresches et seiches & aussi beaucoup d’aultres fruitz : le roy de ladicte cité ne mengeue chair ne poisson ne aultre chose qui souffre mort aussi font ceulx qui suivent sa court et les hommes de bien pource qu’ilz disent que nostre seigneur jesucrist commanda en sa loy qui tue soit tué & par cela ne veullent manger chose qui preigne mort Le peuple mangue chair et poisson il ne leur en chault de riens mais de la chair de beuf ilz n’en mengeussent point mais en tiennent grant compte par ce qu’ilz dyent qu’ilz sont bestes de benediction. Et quant ilz passent par une rue ilz leur touchent avec la main/ et puis la baisent Ledict roy mengeue ris : lait : et beurre : pain de grain et moult d’aultres choses semblables Ceulx qui suivent sa court et les gens de bien mengeussent des choses dessusdictes. Le roy se fait servir haultement comme appartient a ung roy : il boit vin de palme avec ung verre d’argent et le verre ne s’approche point de sa bouche : mais il tient la bouche ouverte et laisse cheoir dedans ledit vin : il y a des poissons de la mesme qualité que nous avons & de toutes sortes qui se trouvent de deça et y a la des pescheurs qui peschent aussi y a il des chevaulx plus grans que deça/ et peu sont prisez desditz crestiens mores.

¶ La cognition qu’ilz ont de jesucrist et du pape.

Chapitre .lvii.

Les chrestiens qui chevauchent sus les elephans desquelz y en y a quantité : et sont domesticques. Le roy quant il va en aulcun lieu a la guerre. La plusgrande partie de sa gent va a pied & l’autre partie sur les elefans Le roy quant il va d’ung lieu a ung autre : il se faict porter sur le col de ses hommes principaulx Toute ceste gent depuis la ceincture de bas va vestue et la plusgrande partie d’iceulx sont vestus de coton pource qu’il y en y a quantité & depuis la ceinture en sus ilz sont tous nudz ceulx qui suivent la court et les gens de bien aussi semblablement : neantmoins ilz se vestent de draps de soye : de draps jaunes et autres couleurs selon sa qualité & aussi semblablement les femmes. toutesfois celles des hommes de bien vont depuis le hault de la ceinture couvertes de draps de soye : & de la ceinture en bas vont couvertes de toilles blanches moult fines & deliees : et les aultres femmes populaires vont descouvertes : Les mores vont vestus a leur mode avec leurs alzubes et balangiens. Alzubes ou balangiens sont vestemens comme ceulx des Albanoys depuis lisbonne jusques a ladicte cité de calichut y a trois mille huyt cens lieues a raison de .iiii. mille pour une lieue Et lesdictes .iii. mille .cccccccc. lieues a la raison que dessus font de milles .xv. mille. & .cc. et autre tour a retourner or a ceste heure se peut estimer en combien de temps se peult faire le voyage a tout le moins il y fault pour le faire .xv. ou .xvi. moys. Et les mariniers de la C’estassavoir les mores naviguent avec la transmontane & avec certains quadrans de boys Et quant ilz traversent ledit goulfe a main droicte leurs pilotes dient qu’il y a unze mille isles et qui s’i mettroit il se perdroit pource qu’elles sont moult basses Ce doivent estre celles que le roy de castille a faict commencer a descouvrir par ses mariniers. Et les habitans de ladicte cité de calichut ont aucune notice de prebstre jehan : mais non trop et ce doibt estre pource qu’il est bien avant dans la terre d’yndie. Ilz ont encores cognoissance comme jhesuchrist nasquit d’une vierge sans peché : et comme il fut crucifié et mort par juifz : et fut ensepvely en Hierusalem et semblablement du pape qui est a romme Autre notice n’ont ilz point de nostre foy. Ilz ont lettres et escripvent en leur langaige.

¶ Le lieu ou croissent les espiceries.

Chapitre .lviii.

Aussi y a infinis dens de elefans Et si faict semblablement beaucoup de coton & sucres et a mon jugement je estime que en ladicte cité n’y a chose de laquelle on n’y puisse trouver : parquoy c’est la plus grant richesse du monde : je croy que le vin seroit bonne marchandise pour ledit pays d’indye : pource que les crestiens le beuvent moult voulentiers. Ilz demandent de l’huylle D’olive. En ladicte cité se maintient la justice/ celuy qui tue ou robbe ou faict aultre malefice Incontinent il est empallé a la mode de Turquie/ et qui veult tromper il pert toute la marchandise dedans ladicte cité : aussi se trouve de la Civete musquee de l’ambre : storax : bengin : l’isle ou naissent lesdictes espiceries s’apelle l’isle de zallun Laquelle est dela ladicte cité de calichut .clii. lieues les arbres qui portent ladicte canelle sont en perfection. l’isle qui porte le poivre est en terre ferme a l’entour de ladicte cité de calichut : le clou de giroffle vient de plus loing pays : de rubarbe : il y en a assez et d’aultres espiceries menues : le gingembre est en la terre ferme et est toute perfection Ou goulfe qui se dit estre par tout populé et habite mores depuis j’ay bien mieulx entendu : et est la verité que seullement du costé de deça est la population de mores : et de l’autre costé qui est au midy est populé de crestiens indiens blancz comme nous la terre aussi est bien a la rive de la mer comme en plaine terre moult fructueuse de grans blez : fruitz : chairs et d’autres victuailles assez : lesquelz ilz envoyent audit calichut pource que le lieu ou est assis ledit calichut la plusgrande partie est terre de sablon qui ne porte point de blez En celle part il ne regne que deux vens ponent et levant : c’estassavoir en l’iver ponent & en l’esté levant En ladicte cyté y a de tresbons paintres de figures et de toutes choses : ladicte cité de calichut & aussi toutes les autres n’ont point de murailles sinon tresbelles maisons moresques : les rues bien ordonnez En l’isle ou se trouve la canelle en perfection y a beaucop de saffres.

¶ Le pont auquel arrivent les espiceries du souldan.

Chapitre .lix.

Vous avez entendu particulierement les choses qui croissent au pays d’ynde : depuis est venu celuy pillote que noz gens prindrent par force lequel sembloit esclave au dernier il s’est trouvé estre juif ne en alexandrie : ou en celle part luy estant jeune : il passa par terre en ladicte inde : et est marié en Calichut et a femme & enfans il avoit quattre navires : et aucunesfois il alloit en l’armee : il dit choses merveilleuses de celuy pays de leurs richesses : de leurs joyaulx et espiceries : la canelle bonne et fine se fait en autres ysles dela calichut .cl. lieues moult aupres la terre ferme et sont populees de mores Le poyvre : et le clou de giroffle plus de cousté : il dit qu’en cedit pays y a juifz : et aussi y a roys de juifz de dix tribus du peuple judaïcque qui saillit d’egipte : il dit que audit pays a assez peuple de gentilz C’estassavoir gens ydolatres : & qu’il y a peu de chrestiens et cela qu’on dit estre eglises et cloches sont temples a maniere de gentilz : & y a dedans certaines painctures de ydolles et non de saintz : et cela me semble plus vraysemblable de dire qu’ilz ne sont pas crestiens/ car ilz ne font faire le divin office ne n’y a prestres ne sacrifice et n’entens point qu’il y ait d’autres crestiens d’en faire compte par ce que ceulx de prestre jehan sont trop loing de calichut qui est du costé de deça du goulfe d’arabie et confine avec le roy de melindarum : & avec les ethiopiens C’estassavoir avec le souldan de babilone Cestuy prestre jehan tient prestres et en son pays on y faict sacrifice on y garde les evangilles et le decret qui y a esté faict selon celuy que nous autres chrestiens gardons et n’y a pas grande difference a nous aultres. Le souldan tient port de mer en la mer rouge et de alexandrie on va audit port de mer tousjours par terre dudict soubdan et y a bien .lxxx. journees duquel port se deschargent toutes les espiceries qui viennent de calichut. Et la y a une ysle aupres la terre ferme a une lieue laquelle est toute habitee de pescheurs qui ne font aultre chose que pescher perles : en ladicte isle n’y a point aucune eaue/ mais chascun jour y a infinies barques qui vont a ung grant fleuve qui est la : et emplissent lesdictes barques d’eaue toutes combles sans botes ou barilz : et le bestial qui est dedans ladicte isle quant il voit retourner lesdictes barques il s’en va tout incontinent a la marine pour boire dedans lesdictes barques et en autre lieu ne se pesche point de perles sinon en ladicte isle laquelle est deça de calichut soixante lieues et est habitee de gentilz ilz font grant compte de vasches et de beufz et quasi ilz les adorent et qui en mengeroit d’ung ou d’une ilz le feroyent mourir par justice.

¶ Instrumens pour naviguer : et les marchandises qui se mettent a pris.

Chapitre .lx.

Dedans calichut y a ung temple que qui y entre dedans certains jours de la sepmaine et mesmement le mercredy devant midy il meurt pour les choses dyaboliques qu’il voit et ce juif afferme estre vray et trescertain que en cestuy temple y a ung certain jour de l’an que dedans ledit temple se allument aucunes lampes qui semblent deux choses fort difformees de la nature En ceste mer la ilz avoyent les quadrans par lesquelz tous Mariniers pevent facillement congnoistre le lieu la ou ilz sont : Et aussi pour iceulx quadrans comment ilz se gouvernent/ mais avec aucuns boys escarrez qui semble difficille chose et mesmement quant il fait obscur qu’ilz ne pevent veoir les estoilles ilz ont certains ancres moult petites et ne sçay comme ilz s’en peuvent ayder. Le temon de la navire se tiennent liez avec cordes et sont plus lung que ses estoilles de la navire de troys paulmes toutes les navires de celuy pays se font en calichut pource que en autre lieu n’y a point de boys et les principalles marchandises qui sont bonnes pour celuy pays me semble que ce soyt coral de cuivre mis en oeuvre comme en chaulderons. et poilles de fer : lunettes. Il y a certain pays que une paire de lunettes vallent ung grant pris/ toilles grosses vin huylle brochatz d’or peu aussi de draps de soye : desquelz cestuy juif nous a donné grande lumiere et d’autres choses.

¶ Des elefans et le tiltre du roy de portugal.

Chapitre .lxi.

Cestuy roy de portugal a ung tresgrant courage sus cest affaire. Et a desja fait mettre en point quatre navires et deux Caravelles bien armez pour les envoyer en ce pays de dela au moys de febvrier avec marchandises et faict compte quant le roy de calichut ne vouldroit consentir que les portugalois feissent la le train de marchandise que le capitaine desdictes navires preigne des navires qui sont sur les passaiges autant qu’il pourra/ a mon jugement il en prendra autant qu’il vouldra pour autant qu’elles sont foibles et mal faictes et ne pevent aller sinon a pompe : desquelles navires y en a grande quantité & vont a cestui train de l’espicerie : les principalles bestes de celluy pays sont elefans et avec iceulx ilz font la guerre et mettent sur leur doz certains chasteaulx dedans lesquelz y a trois ou quatre hommes a combatre & l’ung est le principal qui le guide. Et y a aucuns roys qui tiennent chascun mil cinq cens elefans et autres mil autres huyt cens autres moins selon la seigneurie qu’ilz tiennent : ceulx qui en sont venus dient qu’il y a assez joyaulx mais chers eu esgard aux autres marchandises ne le capitaine ne autres n’ont apporté joyaulx qui soyent d’en faire estime et cela me fait croire que la mine desdictz joyaulx n’est point la : esquelle soit plus loing Et iceulx princes et roys de celuy pays prisent assez les joyaulx il y a assés de storax bengin Civete & semblables choses Le roy de portugal a print les tiltres qui s’ensuivent : C’estassavoir roy de portugal roy de la Garbe deça et dela mer en affrique : et seigneur de Ginca [et de la navigation] de la Ethiope de la Arrabe : et de perse : et inde.

¶ Le lieu ou en personne le roy Manuel de Portugal bailla l’estandart royal au capitaine.

Chapitre .lxii.

En l’an mil cinq cens le roy de portugal appellé par nom manuel envoya une sienne armee de navires tant grandes que petites pour les parties d’inde : en laquelle armee y avoit .xii. navires tant grandes que petites de laquelle armee estoyt cappitaine general Pierre aliares : lesquelles navires estoient bien equipees de toutes choses qui leur estoit necessaire pour ung an et demy : desquelles douze navires il ordonna qu’il en demourast dix en calichut & les aultres deux par la Arrabie : affin qu’elles allassent a ung lieu appellé zasfalle : affin de contracter marchandise : lequel lieu se trouve estre au chemin de calichut : et le huytiesme jour du moys de mars audit an mil cinq cens : furent en point par ung jour de dimenche : & allerent au large de ceste cité dedans la mer demye lieue en ung lieu appellé Rastel ou il y a une eglise appellee saincte marie de balleu : ouquel lieu le roy fut en sa propre personne pour bailler a son capitaine l’estandart royal pour ladicte armee.

¶ Item le lundy qui fut le neufviesme dudict moys partit ladicte armee avec bon temps pour son voyage.

¶ Item le quatorziesme dudict moys ladicte armee passa par l’isle des canariens.

¶ Item le vingtdeuziesme dudict moys elle passa par l’isle du chef verd.

¶ Item le .xxiii. dudict moys se partit une navire de ladicte armee & depuis n’a esté veue & ne scet l’on qu’elle est devenue jusques a present.

¶ Comment lesdictes navires de portugal par fortune alloyent ça et la par la mer.

Chapitre .lxiii.

Le vingtquatriesme jour d’avril qui fut le mercredy apres l’octave de pasques ladicte armee eut veue d’une terre de laquelle ilz eurent grant plaisir et arriverent a terre pour veoir quelle terre c’estoit laquelle ilz la trouverent moult habondante d’arbres et de gens lesquelz alloyent par le rivaige de la mer et ladicte armee gecta l’ancre dedans la bouche d’ung petit fleuve et apres que les ancres furent gectees le capitaine envoya gecter ung petit bateau en la mer pour veoir quelles gens c’estoient qui estoyent la : et trouverent qu’ilz estoyent de couleurs perde : c’estassavoir une couleur entre le blanc et le noir/ et bien disposez avec cheveulx longs Et vont tous nudz comme ilz nacquirent sans aucune honte : & chascun d’eulx portoit son arc avec ses flesches comme hommes qui sont en deffence dudict fleuve/ ladicte armee n’avoit aulcun qui entendist leur langaige : et apres que ceulx qui estoyent dedans ledict bateau eurent tout veu ilz retournerent au capitaine & en cest instant il se annuicta en laquelle nuyt advint grant fortune ¶ Item le jour ensuyvant au matin nous haulsasmes noz ancres avec grande fortune & allions vogant la coste par la transmontane : le vent estoit de Siroch pour veoir si nous trouverions aulcun port auquel pourroit demourer ladicte armee finablement nous trouvasmes ung port auquel nous gettasmes noz ancres. auquel nous trouvasmes de ces gens dessusdictz qui alloient peschant en leurs barquetes et ung de noz petis basteaulx alla sur sesdictz pescheurs et en prindrent deux lesquelz ilz menerent au capitaine pour sçavoir quelz gens estoient et comme est dict on ne entendoit point leur langaige ny moins par signe et celle nuyt le capitaine les retint avec luy : le jour ensuivant il les renvoya vestus avec une chemise et ung habillement et ung bonnet rouge. Duquel vestement ilz demourerent moult contens/ et furent esmerveillez des choses qu’on leur avoit monstrees : et apres ledict capitaine les envoya en terre.

¶ Racine desquelles on faict du pain avec aultres coustumes.

Chapitre .lxiiii.

Celuy mesmes jour qui estoit l’octave de pasques le .xxv. dudict moys d’avril le grant capitaine delibera d’ouyr messe & envoya tendre une tente en une place en laquelle il fist ordonner ung autel & tous ceulx de ladicte armee allerent la ouyr messe/ et semblablement le sermon & au lieu ou ilz estoient vindrent plusieurs de ces gens desquelz prochainement j’ay parlé lesquelz dançoyent et chantoient avec leurs cors : & incontinent que la messe fut dicte chascun s’en alla en sa navire : et cesdictz hommes entroyent en la mer jusques soubz les bras en chantant & faisant grant feste et apres que le capitaine eut disné les gens de ladicte armee retournerent en terre en prenant esbatz et soulas avec ces gens la & commencerent a traicter avec eulx de ladicte armee & donnoient arcs et fleches pour des sonnettes & pour des fueilles de papier & pieces de drap/ & tout ce jour la ilz s’esbatirent avec eulx : et trouvasmes la ung fleuve d’eaue doulce : & estoit tard quant nous trouvasmes aux navires. Item l’autre jour delibera ledict capitaine de prendre de l’eaue & du boys : tous ceulx de ladicte armee furent en terre : et les hommes de ce lieu la leur venoient ayder a porter lesdictes eaues et boys. & aucuns des nostres allerent en terre jusques a leur demeure : laquelle estoit loing d’une lieue : et changerent aulcunes choses a papegaulx : & a une racine appellee igname : de laquelle on fait le pain que mengent les arrabes/ ceulx de l’armee leur donnoyent des sonnettes et du papier en payement desdictes choses auquel lieu nous demourasmes cinq ou six jours. La maniere de ceste gent si est ilz sont de couleur entre blanche et noire et vont tous nudz sans avoir honte du monde. leurs cheveulx sont longs & portent la barbe pelee & les paupieres de dessus les yeulx avec les sourcilz ilz estoyent painctz comme figure de couleur blanche : blanc noir/ asur & rouges ilz portoyent les levres de la bouche c’estassavoir celle de dessoubz percee et au pertuys ilz mettent ung os grant comme ung cloud : & aucuns portent une pierre azuree verde et longue les femmes semblablement vont toutes nues sans avoir honte aulcune et sont belles femmes de corps : Elles ont les cheveulx long : leurs maisons sont de boys couvertes de fueilles et de rameaulx d’arbres avec beaucoup de colomnes de boys/ au meillieu desdictes maisons et desdictes columne ilz atachent aux murs des retz de coton : entre lesquelles ilz font ung feu en façon que en une seulle maison il y aura quarante ou cinquante lytz.

¶ Papegaulx qui ont esté trouvez en la terre descouverte.

Chapitre .lxv.

En ceste terre nous ne veismes fer & moins aultre metal et ilz taillent le boys avec pierres et ont plusieurs oyseaulx de beaucop de sortes : speciallement des papegaulx de plusieurs couleurs : entre lesquelz y en y a de grans comme gelines et aultres oyseaulx moult beaulx et de la plume desdictz oyseaulx ilz en font des chapeaulx et des bonnetz qu’ilz portent Ladicte terre est moult habondante d’arbres et d’eaues et de millet : et de ignames : et de coton. En cestuy lieu nous ne veismes aulcunes bestes : la terre est grande/ et ne sçavons si c’est isle ou terre ferme : nous croyons que ce soit terre ferme a cause de la grandeur et y a moult bon aer : & ces gens icy ont des retz et sont grans pescheurs et peschent de plusieurs sortes de poisson : entre lesquelz nous en veismes ung qu’ilz prindrent qui estoit plus grant d’une pipe : et avoit la teste comme ung porc : et ses yeulx estoyent petis : et n’avoit point de dens : & si avoit icelluy poisson les oreilles longues d’ung bras et larges de demy bras : au bas du corps il avoyt deux pertuys : et sa queue estoit longue d’ung bras : et entretant large et n’avoit aucuns piedz en aucuns lieux il avoit de la peau comme ung pourceau : son cuir estoit gros d’ung doy et sa chair estoit blanche et grasse comme d’ung porc.

¶ Item en cesditz jours que demourasmes la : le capitaine delibera de faire sçavoir au roy de portugal comment ilz avoyent trouvé ceste terre : et d’y laisser deux hommes banis et jugez a la mort lesquelz ilz avoyent en leurdicte armee pour le faire Incontinent ledict capitaine despescha une petite navire qui estoit en ladicte armee : et ceste navire estoit oultre lesdictes .xii. navires : laquelle navire porta les lettres au roy de portugal : lesquelles contenoyent tout ce que nous avions veu et descouvert et apres qu’il eut despesché ladicte navire ledict capitaine alla en terre : & fist faire une croix de boys moult grande : et l’envoya planter en la plaine : et ainsi comme il a esté dit il laissa les deux hommes bannis en cedit lieu : lesquelz commencerent a plorer & les hommes de celuy pays les confortoyent et leur monstroyent avoir de eulx pitié.

¶ Fortune si grande que .iiii. navires se perirent.

Chapitre .lxvi.

Item autre jour qui fut le .ii. de may dudit an Mil .ccccc. l’armee fist voile pour aller a la volte du chemin du chef de bonne esperance lequel chemin differoit d’ung goulfe de mer plus de mil .cc. lieues a raison de quatre mille pour lieue et le douziesme jour dudit moys en allant par nostre chemin aparut une comette vers les parties d’arrabie : avec une raye moult longue Laquelle nous apparut continuellement de nuyt par l’espace de huit ou dix jours.

¶ Item ung dimenche qui estoit le vingt et quatriesme jour dudit moys de may Toute l’armee joincte en allant ensemble avec bon vent avec les voylles avec la moytié de l’arbre sans la petite voylle au moyen d’une pluye que nous avions eue le jour precedent : et ainsi en allant il nous survint ung vent si fort par devant et si soubdainement que nous ne voyons point : jusques a ce que les voylles furent atraversees aux arbres. Et en ce mesme instant ilz se perirent quattre navires avecques tous les gens qui estoyent dedans sans leur povoir donner aucun secours Et les autres sept qui eschaperent elles demourerent quasi comme toutes perdues : et en prenant le vent en poupe avecques les arbres et voilles En demandant misericorde a nostre seigneur En ceste façon allasmes tout ce jour la : et la mer estoit enflee de telle maniere qu’il sembloit que nous allissions dessus les cieulx : & le vent se changea soubdainement Neantmoins la fortune estoit si grande sur la mer que ne fusmes si hardys de mettre les voylles au vent : et en allant ainsi par ceste fortune sans voylles nous perdismes de veue l’ung l’autre en maniere que la navire du capitaine avec deux autres prindrent autre chemin : & une autre navire appellee royalle avec deux autres prindrent ung autre chemin et l’autre qui demoura ainsi seullette s’en alla par ung autre chemin. Et en cette maniere nous passasmes ceste fortune par l’espace de vingt jours sans donner aucunes voilles au vent.

¶ De zasfalle mine de l’or.

Chapitre .lxvii.

Item le .xvi. jour de juillet eusmes veue de terre de l’arabie Et apres que fusmes joignans a la terre nous getasmes noz ancres et la prinsmes du poisson assez. Et nully ne descendit en terre Ceste terre est moult populee Et en icelle vismes plusieurs gens : et a l’heure levasmes les ancres et allions loing de la terre avec bon temps et vismes de grans fleuves et beaucoup de bestes en maniere que tout estoit habité. Item nous allasmes tant avant que nous arrivasmes a zasfalle : qui est une mine d’or : & trouvasmes des hommes avec deux ysles et vismes deux navires de mores qui venoyent de ceste mine d’or : et alloyent a melinde : et comme ceulx desdictes deux navires eurent veue des nostres commencerent a fouyr et donnerent en terre et ilz se getterent tous dedans la mer pour se mettre en terre Et getterent l’or qu’ilz avoyent dedans la mer affin que nous ne leur ostissions et apres que lesdictes deux navires furent prinses par noz gens Le capitaine les envoya veoir et leur demanda de quel lieu ilz estoyent : Et l’ung d’eulx respondit qu’il estoit more cousin du roy de melinde : et que les deux navires estoyent siennes & que il venoit de zasfalle avec celuy or : et avec luy il menoit sa femme et que en voulant fuyr en terre elle s’estoit nyee et semblablement ung sien filz Le capitaine de ladicte armee quant il sceut qu’il estoit cousin du roy de melinde lequel nous avions pour nostre grant amy il en fut fort desplaisant et luy fist beaucoup d’honneur et luy rendit lesdictes deux navires avecques tout l’or qu’on luy avoit osté. Le capitaine more demanda a nostre capitaine s’il avoit avec luy aulcun enchanteur qui tirast l’or qu’il avoit getté dedans la mer nostre capitaine luy respondit que nous estions crestiens : Et que entre nous ne se acoustumoit point faire telle chose/ en luy demandant que s’estoit de zasfalle lequel n’estoit point encores descouvert sinon par renommee : lequel more luy dist que zasfalle estoit une mine d’or : et que ung roy more le tenoit : lequel demoure en une ysle qui s’appelle Chilloa qui estoit par le chemin par lequel nous avions a aller et que zasfalle demouroit derriere le capitaine se despescha & allasmes a nostre chemin.

¶ Item le .xxi. jour de juillet arrivasmes a une petite ysle qui est au mesme roy de zasfalle mozonbige : laquelle ysle est petite et peuplee en laquelle y a marchans riches/ et en ceste ysle nous prismes vivres pour nous refreschir/ et ung pillote affin qu’il nous menast a chilloa Ceste ysle est ung bon port et est aupres de terre ferme De la nous partismes pour aller a chilloa au long de la coste en laquelle nous trouvasmes beaucoup d’ysles habitees qui sont a ce propre roy.

¶ Item le .xxvi. jour dudit moys nous arrivasmes a chilloa/ auquel lieu se joingnirent noz six navires : l’autre jamais n’a esté trouvee Ceste isle a petite descendue avec la terre ferme et si y a une belle ville avec maisons haultes a la façon d’espaigne. En ceste ville y a de riches marchans et aussi y a beaucoup d’or et d’argent : de l’ambre : musc : & perles Ceulx de la ville vont couvers de draps de coton fin & de soye et de choses moult fines Et sont hommes mores noirs.

¶ Comment apres que le capitaine eut le saufconduit il parla avec le roy.

Chapitre .lxviii.

Ce temps pendant que nous estions audit pont nostredit capitaine envoya demander au roy ung saufconduit lequel incontinent luy envoya Et depuis que ledit Capitaine eut le saufconduit il envoya en terre alfons furtad avec sept ou huyt hommes qui furent bien venuz avec ambassade : Par laquelle il envoyoit dire audit roy comme ces navires estoyent au roy de portugal et qu’ilz venoyent la pour contracter avec luy : et qu’ilz avoyent beaucop de marchandises de plusieurs sortes : et luy envoya dire d’avantaige qu’il auroit grant desir que ilz se entre vissent ensemble. Le roy luy respondit qu’il en estoyt moult content et que le jour ensuivant si ledit capitaine vouloit descendre en terre ilz se verroyent ensemble Alfons furtad luy fist responce que le capitaine avoit commandement de par son roy de non descendre en terre : et que s’il luy plaisoit ilz parleroyent ensemble dedans les basteaulx et demourerent d’accord que le lendemain ilz parleroyent ensemble dedans lesditz basteaulx. Auquel jour ledit capitaine fist mettre en point tous ses hommes les navires et basteaulx avec les banieres estendues de dehors/ et aussi ses Heraulx estoyent en point et son artillerie. Le roy de ladicte ville aussi fist mettre en point aucunes almadies C’estassavoir basteaux et apres qu’ilz furent prestz il entra dedans avec grans esbatemens et sons a leur maniere. Le capitaine estoit dedans ses navires avec ses trompettes & menestriers & quant ce vint au joindre l’ung de l’autre : l’artillerie dudit capitaine estoit toute preste pour tirer ce quelle fist Et tira de sorte pour la grande tempeste qu’elle feist que le roy avec tous ses gens demourerent tous esbahis et espouentez & depuis le roy et le capitaine eurent conferance ensemble de leurs affaires/ et cela faict ilz prindrent congé l’ung de l’autre : et l’autre jour ensuivant le capitaine envoya ledict alphons furtad en terre pour commencer a traicter Lequel trouva le roy moult hors du propos qu’il estoit par cy devant avec ledit capitaine en soy excusant qu’il n’avoit nul besoing de nostre marchandise & sembloit audit roy que nous fussions courciers de mer/ et avec cela s’en retourna ledict alfons furtad au capitaine Et demourasmes la deux ou trois jours : que jamais nous ne peusmes faire chose qui vaulsist en cestuy temps que nous demourasmes la. Le roy ne fist autre chose que d’envoyer gens a terre ferme dedans ladicte isle doubtant que nous ne la voulsissions prendre par force Et apres que le capitaine eut veu cela : il se delibera de s’en partir et commanda qu’on fist voille pour le chemin de bellinde ce que fut fait & trouvasmes du loing de la coste plusieurs isles peuplees de mores dedans l’une desquelles y a une cité appellee monbaza Et en est seigneur ung roy more.

¶ Item toutes ces costes d’arabie sont toutes peuplees de mores et aussi les ysles et ilz dient qu’ilz sont crestiens mais ne nous en sommes point apperceuz.

¶ Comment la lettre du roy de portugal avec le don fut presenté au roy de melinde.

Chapitre .lxix.

Item nous arrivasmes le .ii. jour D’aoust a melinde audit an Mil .ccccc. Auquel lieu y avoit trois navires ancrees de gambaye/ et chascune estoit de portee de .cc. bottes. Au fons elles sont bien faictes et de bon boys cousues avec cordes par ce qu’ilz n’ont point de cloubs : et sont empagees d’une misture : et en laquelle y a beaucoup d’encens Et esdictes navires n’y a point de chasteaulx sinon en la pouppe. Cestes navires estoyent venues de la partie D’indie pour contracter : Et aussitost que fusmes arrivez la le Roy nous envoya visiter avec quantité de moutons : poulles : oyes : limons. et orenges : les meilleures qui soyent au monde : par ce que en noz navires y avoit aulcuns malades en la bouche lesquelles orenges les guarirent Incontinent que nous eusmes devant la ville getté les ancres : le capitaine commanda qu’on mist le feu a toutes les pieces de l’artillerie et aux navires mettre les bannieres et envoya en la ville deux facteurs du roy de portugal : & l’ung d’eulx sçavoit parler more : c’estassavoir arabic pour entendre que faisoit le roy et luy faire sçavoir la cause pour laquelle nous venions : et que l’autre jour y envoyeroit son ambassade avec une lettre que le roy de portugal luy envoyeroit : le roy more eut grant joye de nostre venue : et celuy des facteurs qui sçavoit parler arabic a la requeste du roy demoura dedans la ville Le jour ensuivant le roy envoya aux navires deux mores moult honnestes lesquelz sçavoient parler Arabic pour visiter nostre capitaine et luy envoya dire comme il avoit grant plaisir de sa venue en le priant que de tout ce qu’il auroit affaire estant en sa ville qu’il l’envoyast querir comme s’il estoit en portugal : Et que lui & tout son royaulme estoit au commandement du roy de portugal. Le capitaine incontinent ordonna de envoyer dedens ladicte ville les lettres avec le present que le roy de portugal lui envoyoit. Le present estoit cecy C’estassavoir une selle riche/ une paire de testieres pour chevaulx et une paire d’estriers avec les esperons d’argent tous esmailletez et dorez : avec ung poictral sortable a ladicte selle avec cordons et fornimens de cramoisy moult riche. Et ung licoul ouvré d’or fillé pour ung cheval. Et deux oreilliers de drap d’or et autres deux de veloux cramoisy : et ung tappis fin & une piece de tapisserie : et deux pieces D’escarlate. Lequel present dedans Portugal valloit plus de mille ducatz. Et encores y avoit une piece de Satin cramoisi : et une piece de taffetas cramoisi. Le Capitaine eut par conseil qu’il debvoit envoyer ledict present par Areschorea qui alloit pour le roy de Portugal pour son grant facteur : Lequel alla en ladicte ville avecques la lettre et present Et avec luy alloient les plus principaulx hommes avec trompettes le roy envoya semblablement tous ces principaulx pour recepvoir ledict facteur : & les maisons du roy estoyent en la rue du port : & et devant que arrivissions a la maison du roy nous vindrent au devant beaucoup de femmes avec vaisseaulx plains de feu : dedans lesquelz ilz y mettoyent tant de parfumes que les odeurs estoyent par toute la ville & ainsi entrasmes en la maison du roy : en laquelle il estoit assis en une chaire & avec luy avoit plusieurs mores de ses plus principaulx : Le roy eut grant plaisir de nous veoir et luy fut donné le present et la lettre : laquelle une partie estoit en arrabic et l’autre en Portugalloys. Le roy apres qu’il eut leue ladicte lettre parla avec ses mores et entre eulx ilz eurent grant plaisir & tous ensemble gecterent ung merveilleux cry au meileu de la salle en rendant graces a dieu d’avoyr ung si grant roy comme le roy de portugal pour leur amy/ & incontinent il fist emporter le present & fist dire a ceulx qui avoient apporté ledict present & mesmement areschorea qu’ilz demourassent dedans la ville jusques a ce que les navires vouldroient partir : et qu’il avoit grant plaisir de parler avec ledict areschorea : lequel respondict qu’il ne le sçauroit faire sans le congié du grant cappitaine : incontinent le roy envoya ung sien cousin audict capitaine avec ung sien aneau d’or : en le priant qu’il laissast demourer ledict areschorea. et qu’il envoyast querir dedans sa ville tout ce qu’il avoit de besoing Le capitaine de ce fut content & soubdainement le roy bailla audict areschorea ung beau logis : & luy envoya bailler tout ce qui luy estoit necessaire : c’estassavoir moutons : gelines : et ris : laict : et burre dates miel et fruictz de toutes sortes : du pain il ne luy en envoya point : pource que en ce pays ilz n’en mangeussent point & ainsi demoura ledict areschorea trois jours dedans la ville en parlant au roy a toutes heures des choses de nostre roy de portugal & des choses estans au royaulme de portugal : en luy disant qu’il auroit moult grant plaisir de ce trouver avec le capitaine : areschorea luy deist que le capitaine n’avoit point de commission de descendre en terre mais qu’ilz se pourroyent veoir dedans les bateaulx : comme fist le roy de chillea : Le roy recusant a cela areschorea feist tant avec luy qu’il luy mist en teste d’y aller : & l’envoya dire au capitaine : lequel soubdainement se mist en poinct en ses bateaulx en laissant les navires avec bonne seureté : ses gens qui estoient avec luy dedans ledict bateau estoient armez par dessoubz leurs habillemens lesquelz estoient d’escarlate moult fine : le roy fist aprester deux bateaulx : et aussi envoya mettre ung cheval a la façon de portugal et les siens ne le sçavoient acoustrer en ceste façon : mais les nostres le misdrent en point le roy descendict par ung degrez : et au bout desdictz degrez tous ses hommes l’atendoient bien richement acoustrés lesquelz avoient ung mouton. & ainsi que le roy montoyt a cheval ilz couperent la gorge au mouton & le roy passa par dessus & tous ses hommes crierent moult fort avec une voix moult haulte : et cela faisoient par cerimonie et enchanterie : et ainsi apres il vint a parler audit capitaine : et apres qu’ilz eurent eu plusieurs parolles le capitaine luy dist qu’il s’en vouloit partir : et qu’il avoit besoing d’ung pillote en le priant qu’il le conduisist a calichut. et le roy luy en bailla ung : & apres que le roy fut en terre incontinent il envoya areschorea esdictes navires avec chair & fruitz pour le capitaine et luy envoya ung pillote des navires de combaye qui estoient audict port. Le capitaine laissa la deux hommes bannis de portugal : affin qu’ilz demourassent a melunde l’ung d’eulx demoura la et l’autre fut envoyé a gombaye. Le septiesme jour d’aoust le capitaine se partit dudict port : et commencerent a traverser le goulfe pour aller a calichut.