¶ Cy commence le quart livre de la navigation faicte en la mer de ponent par Christofle colomb genevoys.

Chapitre .lxxxiii.

Christofle colomb genevois homme de grande stature rouge : de grant engin. & visaige long : par long temps suyvit le Roy et la Royne d’espaigne en quelque part qu’ilz allassent et procuroit que ilz luy aydassent a armer quelque navire et se offroyt de trouver par la mer de ponent en inde infinies isles en laquelle indie y a habondance de pierres precieuses : espiceries & or et que facillement on les pourroit avoir Par beaucoup de temps le roy : et la royne & tous les principaulx d’espaigne : de ce qu’il disoyt le prenoyent en jeu : et finablement depuis sept ans et apres beaucoup d’ennuy ilz compleurent a sa voulenté et luy armerent une navire avec deux caravelles/ avec lesquelles environ le premier jour de septembre mil .cccc.xcii. Se partit des rivaiges d’espaigne : et commença son voyage.

¶ Isles incongneues trouvees par ledit christofle colomb.

Chapitre .lxxxiiii.

Premierement ledit colomb de gaides s’en alla aux isles fortunees lesquelles a present les espaignolz appellent canaries Anciennement elles furent appellees isles fortunees : et sont en la mer occeane de l’estroit de gilberterre .xxx. lieues Cestes isles de canarie furent dictes fortunees a cause de leur temperance Elles sont hors du climat de europe vers midy : elles sont habitees de gens nudz qui vivent sans aulcune religion : colomb y alla pour prendre de l’eaue et des refreschemens Premierement devant qu’il trouvast aucune chose il fut sur la mer trente & trois jours : et autant de nuitz continuelz sans veoir aucune terre & au bout desdictz trente et trois jours ung homme monta en caige et virent terre & descouvrirent six isles Entre lesquelles y en avoit .ii. de grandesse non ouye/ une appellee espaignolle & l’autre la jehanne mela.

¶ Deux grandes isles avec leurs noms.

Chapitre .lxxxv.

Quant ilz virent l’isle de jehanne ilz n’estoyent pas certains que ce fust isle : mais apres qu’ilz furent joignans d’elle : en la courant par la coste ilz sentirent chanter au moys de novembre entre les boys espés les rossignolz : et trouverent de tresgrans fleuves d’eaue doulce et tresbons portz et grans Et allerent par la coste de ladicte jehanne par maistral plus de .cc. lieues qu’ilz ne trouverent fin ne final d’aucune fin : et penserent que ce fust terre ferme et delibererent de retourner et aussi la mer les y contraignoit : par ce que la bise desormais leur commençoit donner travail Adonc ilz tournerent la proue vers le vent et trouverent l’isle appellee espaignolle et desirant tenter la nature d’iceulx pays de la partie de la transmontane et ja se approuchoyent de terre que la grant navire alla sus une secque plaine qui estoit plaine d’eaue et se ouvrit mais la planeure de la pierre qui estoit soubz l’eaue ayda qu’elle ne fust noyee les caravelles eschaperent les hommes & apres qu’ilz furent descendus en terre/ ilz virent des hommes de l’isle Lesquelz incontinent qu’ilz nous virent se misrent a fouyr dedans les bois tresespés : comme si se fussent esté bestes sauvaiges qui eussent esté chassees des chiens C’est une gent non ouye/ noz gens en les suivant prindrent une femme & la menerent a la navire : et apres qu’elle eut bien repeu de noz viandes et vins : et habillee de vestemens : car ilz vont tous nudz Ilz la laisserent aller.

¶ La condition de l’isle espaignolle.

Chapitre .lxxxvi.

Incontinent qu’elle fut arrivee aux siens elle sçavoit bien ou ilz estoyent & leur monstra l’habit (quant a eulx merveilleux) & apres qu’ilz eurent apperceu la liberalité de noz gens ilz coururent tous a la marine : & pensoyent que fussent gens envoyez du ciel : ilz se gettoyent dedans l’eaue et portoyent avec eulx l’or qu’ilz avoyent et changeoyent leur or en escuelles de terre & tasses de verre Qui leur donnoit une esguillette ou une sonnette ou voirement une piece de mirouer ou autre semblable chose ilz donnoyent l’or qu’ilz avoyent : & fismes en peu de temps avec eulx une grant familiarité & amitié Les nostres en chercheant leurs coustumes trouverent par signes & actes que entre eulx ilz avoyent ung roy et apres que les nostres furent descendus en terre ilz furent receuz du roy honorablement Et aussi des hommes de l’isle en leur faisant bonne chere Quant le roy fut venu et apres que le signe de l’ave maria fut donné les nostres en leur agenoillant semblablement firent ilz : & eulx voyans que noz gens adoroyent la croix & eulx aussi le firent & eulx aussi voyant que ladicte navire estoit rompue ilz alloyent avec leurs barques. lesquelles ilz appellent canoe : ilz portoyent en terre leurs hommes & les besongnes qui estoyent dedans avec une si grande charité qu’elle ne se pourroit dire : leurs barques sont d’ung seul boys et cavees avec pierres tresaguës. elles sont longues et estroictes. Il y en a d’aulcunes qui sont de .lxxx. avirons : ilz n’ont aucun fer pour laquelle chose les nostres s’esmerveilloyent moult comme ilz edifioyent leurs maisons : lesquelles merveilleusement estoyent bien ouvrees et semblablement leurs autres choses qu’ilz ont : et noz gens entendirent qu’ilz faisoient tout cela avec aucunes pierres de rivieres lesquelles estoyent tresdures et tresaguës Encores ilz entendirent que bien loing de ladicte isle il y avoit aulcunes ysles habitees de trescruelz hommes qui se paissent de chair humaine & cela fut la cause que au commencement qu’ilz virent les nostres ilz se misrent a fouyr en croyant que fussent de ces gens la lesquelz ilz appellent canibales. Les nostres avoient laissé les isles de ces gens canibales environ le millieu du chemin du costé de midy.

¶ Coustumes de canibales.

Chapitre .lxxxvii.

Ces povres gens se plaignoyent et disoient qu’ilz n’estoient point tourmentez sinon de ces Canibales et les tourmentoient ne plus ne moins comme font les tygres ou lyons les aultres bestes saulvages et les enfans qu’ilz prennent les chastrant comme nous faisons les moutons affin qu’ilz demeurent plus gras pour les menger et ainsi comme ilz prennent les hommes meurs ilz les tuent & mengeussent les intestines toutes fresches : et aussi les extremités du corps et la reste ilz le sallent : et les gardent par temps comme nous faisons les jambons les jeunes femmes qu’ilz prennent ilz ne les mangent pas : mais les gardent pour faire des enfans ainsi comme nous gardons les gelines pour faire des oeufz les vieilles elles sont esclaves de cestes isles : desormais nous les povons reputer nostres et aussi bien les hommes et les femmes : lesquelz quant ilz sentent que cesditz canibales s’aprochent d’eulx ilz ne sçavent trouver autre remede que de eulx fouyr : et combien qu’ilz se aident de faulcilles tresaguës. toutesfois cela ne peult reprimer leur fureur et leur raige. Et ces povres gens confessoient que si dix canibales trouvoient cent de eulx ilz les surmonteroient. Noz gens ne peurent pas bien entendre ce que ceste gent adore fors que le ciel le soleil et la lune. Des coustumes des aultres isles la briefveté du temps et aussi la deffaillance des interprestz fut cause que noz gens ne sceurent sçavoir aultre chose.

¶ Coustume des habitans de l’isle espaignole.

Chapitre .lxxxviii.

Les hommes de ceste isle en lieu de pain ilz usent de certaines racines de la grandeur et forme de naveaulx aucunement doulces comme chastaignes fresches : lesquelles racines ilz appellent ages : l’or a eulx est a quelque estimacion ilz en apportent qui est attaché aux oreilles et aux neez : touteffoys les nostres ont congneu que d’ung lieu en autre ilz ne font aulcun traffigue noz gens leur demandoient par signe ou ilz trouvoyent cest or : ilz entendirent qu’ilz le trouvoient dedans le sablon de certains fleuves qui courent de treshaultes montaignes : il n’y a pas grant peine a le recueillir en balotes/ et puis apres ilz le mettent en lames mais il ne se trouve pas en icelle partie de l’isle en laquelle noz gens estoyent comme depuis ilz congneurent par experience en concordant ladicte ysle : par ce que apres qu’ilz furent partis de la ilz arriverent de cas fortuit en ung fleuve d’une grandeur inestimable Et apres qu’ilz furent descendus en terre pour prendre de l’eaue Et aussi ainsi qu’ilz peschoient ilz troverent le sablon meslé avec beaucoup d’or : ilz dient avoir veu plusieurs sortes de bestes et y a des serpens en grande quantité et d’une grandeur merveilleuse. mais ilz ne nuysent a nully. Ilz y virent aussi des torterelles saulvaiges : canardz plus grans que les nostres oyes plus blanches que cygnes avec la teste rouge Papegaulx desquelz aucuns sont vers : aulcuns sont jaulnes par tout le corps autres semblables a ceulx de l’indie avec gorge rouge ilz en aporterent .lx. mais de diverses couleurs ces papegaulx qui ont esté apportez de ladicte isle monstrent ou par proximité ou par nature participer de l’indye combien que l’oppinion de colomb semble estre contraire de la grandeur de l’espere. Ceste isle produit de sa nature en grant habondance de mastic : aloes : cothon : et autres choses semblables : certains grains rouges de divers couleurs plus aguz que le poivre que nous avons certaine canelle : gingembre duquel ilz en apporterent.

¶ Les hommes que colomb laissa pour cercher l’isle.

Chapitre .lxxxix.

Colomb contend de ceste nouvelle terre trouva des signes et ung nouveau monde non ouy estant la premiere veue delibera de s’en retourner & laissa aupres le roy dessusdit .xxxviii. hommes lesquelz eussent a cercher la nature du lieu/ et le temps jusques a ce qu’il retournast. Cestuy roy s’appelloit Guacranatillo Avec lequel il avoit fait confederation de la vie et salut et deffension de ceulx qui demouroyent le roy esmeu de pitié regardant ceulx qui demouroyent pleura : et les embrassa : et leur monstroit qu’il leur feroit tout le plaisir & service qu’il luy seroit possible et colomb au moyen de cela fist faire voille pour aller en espaigne et mena avec luy deux hommes de ladicte isle et estima ledit colomb que leur langaige se apprendroit facillement lequel se peut escripre avec noz lettres. Ilz appellent le ciel turcy la maison boa L’or cauni. l’homme daben toyno : riens maxani : leurs aultres vocables ilz ne le proferoyent moins que nous aultres latins : et cela est advenu en la premiere navigation.

¶ Comment le colomb fut appellé admiral de la mer.

Chapitre .xc.

Le roy et la royne d’espaigne lesquelz autre chose ne demandoyent que de augmenter leur royaulme & la religion chrestienne et reduire moult de simples gens au service Facillement eulx esmeuz non seullement dudit colomb mais de dieu Et de plus de deux cens espaignolz qui estoyent allez avecques luy ilz le receurent avec grant joye : & puis luy firent de tresgrans honneurs & le firent asseoir devant eulx publicquement qui est le plusgrant honneur qu’ilz sçauroyent faire : et voulurent qu’il fust appellé admiral de la mer occeane. Et quant ilz ouyrent racompter ce qu’il avoit trouve esdictes isles ilz esperoyent d’en avoir au commencement grant prouffit plus pour l’augmentation de la foy que d’autre chose Pourquoy lesditz roy et royne firent preparer quarante et deux navires avec grandes caiges : et douze caravelles sans caiges avec mille deux cens hommes avec leurs armeures : entre lesquelz y avoit ouvriers de tous les ars mecanicques : salaires : avec aucuns hommes de cheval Colomb prepara les chevaulx porcz vaches : et beaucoup d’aultres bestes avec leurs masles : legumes : froment : orge : et autres choses semblables : non seullement pour vivre : mais aussi pour semer et porta aussi des plantes de vignes et aussi beaucoup de plantes d’aultres arbres desquelz en ladicte ysle il n’y en y a point car ilz ne trouverent en icelle aucuns qui fussent de leur congnoissance sinon pins et palmes treshaultes et de merveilleuse duresse droicture & haultesse a cause de la fertilité de la terre et aultres assez qui font fruit : lesquelz sont congneuz par ceulx du pays & est le pays le plus fertille qui soit soubz le ciel Ledict admiral prepara aussi pour porter avec luy de tous instrumens de quelque exercite que ce fust : et finablement de toutes choses fut porté qui apartiennent quant on veult edifier de nouveau une cité en ung nouveau pays. Plusieurs officiers et sergens du roy se misrent de leur propre voulenté a ceste navigacion pour le desir qu’ilz avoyent de veoir choses nouvelles Et de l’auctorité dudit admiral le premier jour de septembre mil .cccc.iiii.xx. et .xiii. Avecques bon vent firent voille de cade. Le premier jour d’octobre ilz arriverent aux canaries : et a la derniere laquelle si est appellee Sereta : ilz y arriverent le quatriesme jour dudit moys & de la dessus le midy il dressa tous les voilles on n’eut depuis nouvelles d’eulx sinon jusques au equinoctial de l’yver : et le roy & la royne eulx estans a la table du champ le .v. jour D’avril mil .cccc.iiii.xx. & .xiiii. Ilz eurent nouvelles par ung courrier comme le vingt et troiziesme de mars ilz estoyent arrivez a cades douze de ses navires Celuy qui porta ces nouvelles estoit frere de la nourrice du prince filz desditz Roy et royne : lequel vers eulx fut envoyé par ledit admiral duquel et d’aultres dignes de foy et tesmoignage cy dessoubz en sera parlé.

¶ Comment l’admiral trouva les isles des canibales.

Chapitre .xci.

Apres que Colomb fut party des canaries il navigua vingt et ung jour premierement devant qu’il trouvast aulcune terre mais il alla plus a main gauche vers ostro par garbin que l’autre premier voyage Parquoy il vint es ysles des canibales desquelz icy dessus est faicte mention et a la premiere ysle ilz virent une forest qui est tant espesse d’arbres qu’on ne povoit sçavoir quelle chose s’estoit : & pource le jour qu’ilz la trouverent estoit le jour du dimenche & ilz ne l’aperceurent jusques au dimenche : & eulx appercevant qu’elle estoit habitee ilz ne se arresterent point la/ mais ilz s’en allerent plus avant. En ces .xxi. jour selon leur jugement ilz firent .cccccccc.xx. lieues Le vent leur estoit propice : car il estoit de la transmontane : Apres qu’ilz furent partis de cestedicte isle en peu de temps ilz vindrent en une aultre pleine et habondante de plusieurs arbres qui rendoyent une odeur merveilleux Aucuns descendirent en terre/ mais ilz ne veirent aulcunes personnes ne bestes : fors des liezars d’une grandeur non ouye Ceste isle ilz l’appellerent la croix Et toute la premiere terre habitee qu’ilz virent depuis leur partement des canaries/ ceste isle estoit des caniballes comme apres ilz congneurent par experience : et par les interpretz de l’isle espaignolle qu’ilz avoyent avec eulx : En environnant ladicte isle ilz trouverent beaucoup de villages de vingt a trente maisons l’ung Lesquelles estoyent toutes ediffiees par ordre tout a l’entour d’une place ronde qui estoit au meilleu ou elles estoyent toutes faictes de boys : la façon desdictes maisons est telle. Premierement il y avoit en terre tant d’arbres si haulx qu’ilz faisoyent la circonstance de la maison : apres ilz mettent dedans aulcuns soliveaulx cours appuyez a ces arbres affin qu’ilz ne cheoyent La couverture ilz la font en maniere d’ung pavillon : et ainsi toutes cestes maisons ont la couverture aguë Et apres ilz couvrent ces boys de fueilles de palmes : & de certaines autres fueilles semblables qui sont tresseures pour l’eaue ilz lyent lesdictz soliveaulx avec cordes de coton : et d’aulcunes racines qui ressemblent aux sparges : ilz ont aucuns tectz qui sont en l’air : sur lesquelz ilz mettent du cotton et estrain pour leur lict : & ont certaines portes ou ilz reduisent le succre en ung certain lieu ilz virent deux statues de boys qui estoyent dessus deux colomnes : et pensoyent que fussent leurs ydoles mais elles estoyent mises la seullement par beaulté Ilz adoroyent seullement le ciel avec ses planettes Noz gens en eulx approchant de ce lieu la soubdainement les hommes & femmes se misrent a fuyr/ et en cherchant dedans leurs maisons ilz trouverent trente femmes et garçons qui estoyent prisonniers Lesquelz garçons ces canibales avoyent prins dedans aulcunes isles pour les menger & les femmes pour les tenir esclaves. Les nostres trouverent dedans leursdictes maisons vaisseaulx de pierre a nostre usage de toutes sortes & es cuisines de chair d’homme boullie avec celle de papegaulx & y avoit oyes et canardz en broche pour rostir & par la maison trouverent os de bras humains Lesquelz ilz gardoyent pour faire des fers a leurs flesches pource qu’ilz n’ont de fer ilz trouverent aussi la teste d’ung garçon mort depuis peu de temps/ Laquelle estoit atachee a ung soliveau et rendoit encores sang : les nostres admenerent ceulx qui estoyent prins desdictz canibales : Ceste isle a huit fleuves tresgrans : & l’appellerent gaudipea : pource qu’elle ressemble au mont de saincte marie de gaudalippi d’espaigne les habitans l’appellent carachara Ilz apporterent de ceste ysle papegaulx plus grans que faisans moult differens des autres ilz ont tout le corps & les espaules rouges : les esles de diverses couleurs combien que les boys soyent plains de papegaulx neantmoins ilz les nourrissent et puis les mengeussent : L’admiral colomb fist donner des presens aux femmes ordonna que avec ces presens elles allassent trouver les caniballes : pource qu’elles sçavoyent ou ilz estoyent : et lesdictes femmes y allerent et trouverent grande quantité desdictz Canibales : lesquelz vindrent incontinent pour la cupidité des dons : mais des ce qu’ilz virent les nostres ou pour paour qu’ilz eurent ou par conscience de leur inhumanité en eulx regardant au visaige l’ung l’autre se misrent a fuyr dedans les vallees & les boys Les nostres qui estoyent allez par l’isle apres eulx apres qu’ilz furent reduitz aux navires ilz rompirent autant de barques qu’ilz en trouverent Et se partirent de ceste isle Gualippe pour trouver leurs compaignons a l’isle Espaignolle : au premier voyage laisserent la main dextre a la senestre trouverent beaucop [d’isles.] La apparut de la transmontane une grande isle : ceulx que l’admiral avoit menez avec luy de l’isle espaignolle entendoyent leur parler : et ceulx qui estoyent recouvrez de la main desditz canibales disoyent que ladicte ysle s’appelloit matinina : en affermant que dedans icelle n’y habitoit que femmes : lesquelles en certain temps de l’an se joignent avec les Canibales comme se dit des amazones : et si elles enfantoyent masles : elles les nourrissoyent : et puis elles les envoyent a leurs peres : si s’estoyent fumelles elles les retenoyent avec elles Disoyent aussi que cestes femmes ont certaines caves grandes soubz terre : dedans lesquelles elles fuyent quant en aultre temps de l’an que celuy qui est ordonné aucun va devers elles. Et si aucun par force ou autrement cherche : elles se deffendent avec flesches : lesquelles elles sçavent tirer tresbien : pour l’heure noz gens ne se peurent approcher de cestedicte isle En navigant a la veue de ladicte isle a dix lieues ilz passerent par une aultre isle : laquelle ceulx de ladicte isle espaignolle disoyent estre bien peuplee & habondante de toutes les choses necessaires au vivre humain : et qu’elle estoit plaine de haultes montaignes & luy mirent nom de Montferrat ceulx d’icelle isle espaignolle : Et aussi ceulx qui avoyent esté recouvrez des canibales disoyent que aulcunesfois iceulx canibales alloyent deux cens lieues pour prendre des hommes affin de les menger : Le jour ensuivant noz gens descouvrirent une aultre isle/ laquelle pource qu’elle estoit ronde l’admiral l’appella saincte marie rotonde/ une autre plus avant l’appella sainct martin : mais en nulle de cestes ne s’arresterent Le troiziesme jour ilz trouverent une autre isle laquelle ilz jugerent estre longue par coste dyametralle de levant a ponent .xl. lieues les interprestz du pays disoyent cestes isles estre d’une merveilleuse beaulté & fertilité & ceste derniere l’appellerent saincte marie l’ancienne : depuis laquelle ilz trouverent assez d’aultres isles : Mais de la a cent lieues y en a une plus grande de toutes les autres & les habitans d’icelle l’apellerent Ay ay : & les nostres la nommerent saincte croix et la descendirent pour avoir de l’eaue : et l’admiral envoya en terre trente hommes de sa navire qu’ilz cerchassent l’isle : lesquelz trouverent quatre canibales avec quatre femmes : lesquelles ainsi qu’elles virent les nostres sembloit qu’elles demandassent secours a mains joinctes : lesquelles furent delivrees par les nostres : Les Caniballes s’en fuyrent au boys : & l’admiral estant la par l’espace de deux jours fist demourer en terre trente hommes des siens continuellement en aguet Ce pendant les nostres virent venir une canoe c’estassavoir une barque avec huyt hommes & huyt femmes. Et le signe fait noz gens les assaillirent : et eulx avec flesches se deffendoient par façon avant que les nostres se couvrissent avec leurs targes ung bisquain fut tué d’une de ces femmes : laquelle avec une flesche en frappa encores ung aultre griefvement les nostres se apperceurent que les fleches estoyent envenimees/ et que en la poincte elles estoyent oinctes de certain oignement venimeux : entre ces gens icy y avoit une femme a laquelle il sembloit que toutes les aultres luy obeissoyent comme a une royne Et avec elle y avoit ung jeune enfant son filz robuste de regard cruel : et avoit le visaige d’ung larron. Les nostres doubtant qu’ilz ne fussent gastez desdictes fleches delibererent pour le meilleur venir aux estroitz & donnerent des avirons dedans l’eaue avec une barque de la navire : et les envahirent et mirent en fons : eulx voirement aussi bien les hommes comme les femmes en naviguant ne laissoyent a tirer desdictes fleches. Mais ilz furent suyviz si roydement des nostres qu’ilz se mirent sus une pierre couverte d’eaue/ et la combatant ilz furent prins des nostres. Et l’ung d’eulx y fut tué : et le filz de la royne fut blecé de deux coups : ilz furent conduitz devant l’admiral mais non pourtant ilz ne perdirent leur ferocité & atrocité ne plus ne moins que fait ung fier lyon quant il se sent prins et lyé : et a l’heure il ronge plus et se faict plus cruel. Il n’y avoit homme qui les vist qu’il ne sentist paour a cause de leur atrocité et dyabolic regard L’admiral en allant a ceste heure par midy : a ceste heure par garbin : a ceste heure en ponent : il vint a une largesse de mer plaine de innumerables isles differentes aucunes sembloient plaines de boys et doulces. Les aultres seiches et steriles sapeuses : montueuses : les autres se monstroient entre les pierres de couleur cramoisy/ les autres de violet les autres tresblanches. Parquoy plusieurs estimoyent que la fussent metaulx & pierres precieuses. Ilz ne descendirent pas la pource que le temps n’estoit pas bon. & aussi pour la paour de l’espesseur & quantité de tant d’isles doubtant aussi que les navires ne trouvassent aulcunes pierres ilz reserverent a quelque autre temps pour nombrer lesdictes isles toutesfois aucunes caravelles qui n’avoyent besoing d’eaue trop parfonde passerent par le millieu d’aucunes : et en compterent quarante et six : et appellerent ce lieu la archipellage. a cause de tant de ysles : En passant avant a cestuy train au meillieu du chemin ilz trouverent une isle appellee buchima : de laquelle plusieurs estoyent de ceulx la qui avoyent esté delivrez des mains des caniballes : ceulx la disoyent qu’elle estoit bien peuplee labouree et plaine d’arbres et de buissons & les habitans d’icelle continuellement avoyent esté ennemis des canibales Ilz n’ont point de navires pour aller trouver l’isle d’iceulx canibales : mais si par advanture les caniballes viennent en leur isle pour les prendre et ilz les pevent prendre ilz leur ostent les yeulx : ilz les taillent en pieces : et les rostissent et les devorent par vengeance. Toutes ces choses ilz entendoient par les interpreteurs admenez de l’isle espaignolle : les nostres pour non trop demourer laisserent cestedicte isle fors d’ung costé vers ponent Affin de avoir de l’eaue/ et aulcuns d’eulx descendirent en terre & trouverent une grant maison & belle a leur coustume avec douze aultres petites mais elles estoyent deshabitees/ et ne povoyent penser pourquoy sinon pour la grant chaleur qui y estoit : et que les gens demourassent es montaignes : ou pour la paour des canibales : toute ceste isle ont ung roy : lequel ilz appellent chiacichio : et est obey avec grande reverence de tous : la coste de ceste isle vers midy se extent environ .l. lieues : la nuyt deux femmes & deux garçons delivrés des canibales se getterent en la mer/ & nouerent a l’isle qui estoit leur païs.

¶ Comment colomb trouva ses gens mors.

Chapitre .xcii.

L’admiral finablement arriva avec son armee a l’isle espaignolle loingtaine de la premiere isle des canibales .cccc. lieues mais il y arriva a une piteuse adventure : car il trouva mors tous les compagnons qu’il avoit laissés/ en ceste isle espaignolle est une region qui s’appelle xainana : de laquelle l’admiral quant il s’en retourna la premiere fois il print et emmena avec luy .x. hommes de ladicte isle desquelz .iii. seullement y en avoit vivans Les aultres estoyent mors pour la mutation de l’air : et quant premierement ilz arriverent a Satheremo laquelle ont ainsi appellee : ceste coste xaniano : Ledict admiral en laissa aller l’ung : les aultres deux de nuyt se desroberent : et se gecterent en mer : et en nouant ilz eschapperent. De laquelle chose L’admiral n’en tint pas grant compte/ cuydant trouver en vie les trente & huit hommes qu’il avoit laissez : mais apres qu’il fut allé ung peu plus avant il rencontra une canoe/ c’estassavoir barque longue de beaucoup d’avirons : en laquelle y avoit ung frere du roy Guacenarille avecques lequel quant l’admiral se partit avoit fait une grande alliance et avoit affectionnement recommandé ses hommes : cestuy acompaigné d’ung homme seul vint audict admiral et au nom de son frere luy promettoit donner deux ymages d’or : Et comme apres qu’il fut entendu par son langaige : il commença a narrer la mort des nostres/ mais par faulte d’interpreteurs du tout il ne fut pas entendu. Apres quant L’admiral fut arrivé au chasteau du boys : et il trouva les maisons que noz gens avoyent faictes estre destruictes et converties en cendres. de laquelle chose tous eurent grande compassion : toutesfoys pour veoir si aulcun d’eulx seroit demouré en vie il feist tirer beaucoup de bombardes affin que si aulcun eust esté caché qu’il saillist dehors mais c’estoyt en vain/ car tous estoyent mors : l’admiral envoya des messaigiers au roy guacenarille : lesquelz rapporterent par les signes que ilz avoyent peu comprendre que en icelle isle y avoyt de plus grans roys que luy : lesquelz ayant entendu la venue de ceste nouvelle gent estoient venus avec grant excercite et surmonterent les nostres et les tuerent tous & destruirent le chasteau en bruslant tout en les voulant secourir il fut frappé d’une flesche : & monstra ung bras qu’il avoit lyé en disant que c’estoit la cause pour laquelle il n’estoit venu vers l’admiral ce qu’il desiroit faire L’autre jour ensuyvant l’admiral envoya ung marquis de sibelle audict roy : lequel luy tira la bende du bras et trouva que il n’avoit aucune blessure ne signe de playe : touteffois il trouva qu’il estoit dedans le lict en monstrant d’avoir mal/ son lit estoit conjoinct avec sept autres et ses concubines : ledit admiral et tous les aultres commencerent a souspeçonner que les nostres avoyent esté tuez par le conseil et la voulenté de luy. Touteffoys ledict marquis en dissimulant il feist tant que le jour ensuyvant il viendroit veoir ledict admiral & ainsi le fist : & l’admiral luy fist bonne chere & grant feste : et moult se excusa de la mort des nostres Et quant il veit une des femmes que noz gens avoyent osté aux caniballes/ laquelle noz gens appelloyent Katherine : il luy feist grant feste et parla a elle moult amoureusement : les nostres ne l’entendoyent point. Apres il s’en partit avec grant amour. Aulcuns des nostres conseillerent a l’admiral qu’il le deust retenir : et luy faire confesser comme les nostres avoient esté tuez & luy faire porter la peine qu’il avoit meritee mais l’admiral considera qu’il n’estoit pas encore temps d’irriter les habitans de ladicte isle Le jour ensuyvant le frere de cestuy roy vint aux navires et parla avec la femme dessusdicte et la seduyt comme l’yssue le monstra/ car la nuyt ensuivant ou pour se delivrer de captivité ou pour la suasion du roy se gecta dedans l’eaue avec sept autres femmes toutes convices d’elle ce faire et passerent environ une lieue de mer/ les nostres en les suyvant avec leurs barques en recouvrerent trois seullement : Katherine avec les aultres troys s’en allerent au roy : lequel le lendemain ensuyvant il s’en fuyt avec toute sa famille. Parquoy noz gens apperceurent que les trente et huyt hommes qui estoyent demourez avoyent esté tuez de luy.

¶ Les choses que trouva le marquis frere de l’admiral en cerchant le roy et ses gens.

Chapitre .xciii.

L’admiral envoya apres le roy ledict marquis avec .ccc. hommes armez lequel de fortune vint a la bouche d’ung fleuve ou ilz trouverent ung noble et bon port : lequel est apellé port royal l’entree est tant tortue que quant l’homme est dedans il ne congnoist par ou il est entré combien que l’entree soit grande que troys navires de fronc y puissent passer : au millieu du port y a ung mont tout verd & bosqueux plain de papegaulx & aultres oyseaulx qui continuellement chantent doulcement : en cestuy port y avoit deux fleuves en allant plus avant ilz veirent une treshaulte maison & pensant que la fust le roy ilz s’en allerent la/ & eulx en approchant vint au devant d’eulx ung homme acompaigné de cent hommes trescruelz de regard tous armez avec ars flesches et lances en criant qu’ilz n’estoyent pas canibales : mais raynos/ c’est a dire nobles et gentilz hommes : les nostres leur firent signe de paix & eulx apres qu’ilz eurent osté leur ferocité ilz se firent ensemble bons amys de sorte que incontinent sans aultre chose ilz descendirent es navires ou leur fut donné des presens c’estassavoir sonnettes d’esprevier & semblables choses/ les nostres mesurerent ladicte maison & l’entour d’icelle estoit de .xxxii. grans pas elle estoit ronde & a l’entour d’icelle avoit trente aultres maisons petites les solives estoyent de canes de diverses couleurs : cousues avec ung merveilleux art les nostres leur demandoient le mieulx qu’ilz povoyent du roy qui s’en estoit fuy : ilz leur notifierent qu’il s’en estoit fuy a la montaigne/ & de ceste nouvelle amytié les nostres delibererent de le faire sçavoir a l’admiral lequel en divers lieux avoyt envoyé divers hommes pour exposer ou estoit le roy : entre lesquelz il avoit envoyé horeda et gormalan jeunes hommes nobles et couraigeux : et ceulx icy trouverent quatre fleuves l’ung d’une partie et les trois d’une autre : lesquelz descendoyent d’une autre montaigne : tous ceulx de l’isle dedans le sablon recueilloyent de l’or en ceste maniere : ilz mettoyent leurs mains dedans aucunes fosses : et avec la main gauche ilz tiroyent le sablon : et avec la main dextre ilz cueilloyent l’or : et le donnoyent aux nostres : et disoit avoir veu beaucoup de grains de la quantité d’une cloche de gingembre lequel fut porté au roy d’espaigne il fut veu ung grain de sept onces de plusieurs personnes.

¶ Le fleuve de l’or et beaucoup de choses trouvees.

Chapitre .xciiii.

Quant les nostres virent cela ilz retournerent a l’admiral par ce qu’il avoit commandé sur peine de la vie : que nul ne fist autre chose que descouvrir Ilz entendirent aussi qu’il y avoit ung certain roy aux montaignes desquelles venoyent lesdictz fleuves lequel ilz appellent cazichio : cannoboa. c’est assavoir seigneur de la maison de l’or. Boa veult dire maison : canno or. Et cazichio roy ilz trouverent en cesdictz fleuves poissons tresparfaitz et semblablement ledict marquis de sibille dict que aupres les canibales ou moys de decembre est equinoctial : mais je ne sçay pas comme ce peult estre pour la raison de la spere : et dit que en iceluy moys les oyseaux faisoyent leurs nidz : et aucuns avoyent des petis : toutesfois je demanday de l’aulteur du pole de l’orient : il me fut dit que aux caniballes tout le chariot estoit chargé soubz le pole artic & les grandes transmontanes il n’est venu aulcun de cestuy voyage : auquel on puisse adjouster ferme foy pource qu’ilz sont hommes sans lettres.

¶ Chasteau ediffié de l’admiral en l’isle espaignolle.

Chapitre .xcv.

Or print l’admiral cocinfrone ung lieu joignant a ung port affin d’y ediffier une cité : et commença a ediffier et faire une eglise : mais en aprochant le temps que il avoit promis au roy de luy notiffier ce qu’il auroit trouvé renvoya en derriere douze caravelles : avec notice de ce qu’ilz avoyent veu & entendu L’admiral estant demouré en ladicte isle espaignolle/ laquelle aulcuns l’appellent offira : et dyent que c’est ceste la. De laquelle ou vieil testament ou .iii. livre des roys s’en fait mention Laquelle est par sa grandeur cinq degrez austrailles : Qui sont des lieues mille .lxx. le pole se lieve .xxvii. degrez/ & de la moitié du jour sicomme il dit degrez .xxii. sa longueur de levant a ponent a .cccccccclxxx. milles : qui sont de lieues deux cens vingt lieues La forme de ladicte isle est comme la fueille d’ung chastenier. L’admiral delibera ediffier une cité sus une montaignette au meilleu de l’isle de la part de la transmontane pource que la empres y avoit une montaigne faicte avec boys : Et pierres de faire de la chaulx laquelle il appella ysabeau : et aupres de ceste montaigne est une plaine de seize lieues de long : & large en aucun lieu plus estroicte d’une lieue et demye : par laquelle passent plusieurs fleuves Ceste plaine est tant fertille que en aucuns jardins sur le sablon du fleuve ilz semerent de diverses sortes d’herbes comme laictues : bourraiges : raves : et toutes en terme de .xvi. jours elles creurent Pompons : concombres : et autres choses semblables en .xxxvi. jours furent recueillis : les meilleurs que jamais nous mengeasmes : L’admiral a cause de la notice qu’il avoit eue des habitans de ladicte isle envoya .xxx. hommes en une province qui est dedans ladicte isle : laquelle s’appelle Cipangy : laquelle est situee au meilleu de ladicte ysle/ et est montueuse avec grande habondance d’or. Ceulx qui y furent racomptent choses merveilleuses de richesses de ce lieu la : et que de la montaigne descendoyent quatre fleuves : lesquelz se divisent en quatre parties/ l’ung va vers le levant appellé summa L’autre en ponent appellé Atribunco : Le troiziesme va a la transmontaine dit Jachem et le quart a midy et est appellé Naiba.

¶ Comment l’admiral alla a la myne d’or.

Chapitre .xcvi.

Or pour retourner a nostre propos apres que l’admiral eut faict ceste cité environnee de muraille le .xii. jour de mars se partit avec .cccc. hommes tant a pied que a cheval et se mist en chemin pour aller a la province de l’or de la part du midy Et apres qu’ilz eurent passé montaignes : vallees et fleuves ilz vindrent a une plaine : laquelle est le commencement de Cimbago : par laquelle courent aucuns ruisseaulx avec le sablon de l’or Adoncques quant l’admiral eut cheminé par dedans l’isle environ dixhuit lieues : et loing de sa cyté il arriva a une rive d’ung grant fleuve : et la en une montaigne assez apparente delibera de faire une forteresse pour plus seurement chercher les secretz du pays ce qu’il fist : et apella la forteresse sainct thomas et luy estant en faisant cest ediffice : Plusieurs paysans vindrent a luy pour avoir des sonnettes et autres merceries qu’il avoit : il leur demandoit a l’encontre que ilz luy apportassent de l’or Parquoy en peu de temps ilz allerent et porterent assez bonne quantité d’or Entre lesquelz ung des leur aporta ung grain d’une once : les nostres s’esmerveilloyent de telle grandeur. Toutesfois avec signes ilz demonstroyent qu’il s’en trouvoit encores de plusgrans & mesmement en un pays distant de la d’une demye journee : et que la s’en trouve de grans pieces/ lesquelles pieces pour non estre mises en oeuvre ilz ne les estimoyent gueres & oultre cela aultres en apportoyent des pieces plusgrandes de dix dragmes l’une : et aussi affermoyent qu’il s’en trouvoit de plusgrandes. L’admiral envoya aucuns des siens a ce lieu la : lesquelz en trouverent beaucoup plus que ne luy avoit esté dit ilz ont des boys plains d’espicerie : mais ilz ne les recueillent pas sinon quant ilz la veulent permuter avec les hommes des autres Isles voysines en platz et escuelles de terre et vaisseaulx de boys faitz dedans aultres ysles : pource qu’ilz n’en ont point Au moys de mars ilz trouverent des raisins saulvaiges bien meurs : combien qu’en ceste province soit planté de pierres : toutesfois elle est plaine d’arbres et verde. Ilz disent qu’il pleut la assez : parquoy la y a plusieurs fleuves & ruisseaulx avec le sablon de l’or : et croyent que celuy or descende de ces montaignes : et sont gens moult paresseux en yver ilz tremblent de froit et combien qu’ilz ayent les boys plains de coton toutesfois ilz ne font faire aulcuns vestemens.

¶ Des choses merveilleuses trouvees par l’admiral.

Chapitre .xcvii.

Quant tout ce que dessus a esté dit a esté cherché. L’admiral s’en retourna a la tour ysabeau en laquelle il laissa aucuns pour la gouverner : et luy se partit avec trois navires pour aller descouvrir certaine terre qu’il avoit veue et pensoit que ce fust terre ferme et est loing de ladicte isle espaignolle de .xvii. lieues : et demye et non plus Laquelle terre les paysans l’appellerent cuba Apres qu’il eut passé du costé de midy : il se mist a aller vers ponent Et tant plus y alloit avant tant plus il se esloignoit des rivaiges et s’en alloit engoulfant vers midy tant qu’il arriva a une isle appellee des paysans Jamaïca : mais comme il est dit des cosmographiens elle est dicte Jehanne plusgrande : elle est plusgrande que la Sicille et a une seulle montaigne au meilleu qui se commence a lever de toutes les pars de l’isle : mais elle va en montant peu a peu jusques au meilleu de ladicte isle : et semble que elle ne monte point Ceste isle aussi bien a la marine comme au meilleu est tresfertille et plaine de peuple qui est plus agu et de plus grant engin que tous les habitans des aultres ysles promptz a la marchandise et sont belliqueux : Et l’admiral se voulant mettre en terre et en divers lieux ilz acouroyent armés et ne laissoyent descendre noz gens et en plusieurs lieux ilz combatirent avec les nostres : mais ilz demourerent perdans : et depuis ilz se firent amys ilz laisserent ceste isle Jamaïcque : et naviguerent par le ponent sept jours toutesfois par la coste de Cuba tant que l’admiral pensoit avoir passé. L’aurea chersoneso qui est aupres nostre Levant & croit avoir trouvé des .xxiiii. heures du soleil les .xxii. et combien que en ceste navigation il souffrist de grandes tribulations : toutesfois il delibera d’aller tant avant qu’il vouloit veoir la fin de ceste cuba si elle estoit terre ferme ou non & naviga .ccc.x. lieues par ponent tousjours par le rivage dudit cuba En ceste navigation mist nom a sept cens ysles/ mais il en passa plus de deux mille. Et en courant la coste de ceste terre de cuba il trouva beaucoup de choses dignes de commemoration Premierement apres ung peu qu’il eut commencé a naviguer il trouva ung tresbeau port capable d’ung grant nombre de navires et mist en terre aulcuns des siens et trouverent aucunes maisons de paille sans y trouver aucun dedans et trouverent des broches de bois au feu : esquelles y avoit embroché environ cent livres de poisson & deux serpens de huit piedz de long et quant ilz ne apperceurent aucuns hommes ilz commencerent a menger dudit poisson et laisserent les serpens qui estoyent de la forme de cocodrilles depuis se misrent a chercher ung boys de la voisin et virent beaucoup de ces serpens lyez aux arbres avec cordes : et coururent une piece avant & trouverent environ .lxx. hommes qui estoyent fuys en la cyme d’ung grant rocher pour veoir que s’estoit que vouloyent faire les nostres lesquelz leur firent si grant feste avec signes en leur monstrant des sonnettes et autres merceries que l’ung d’eulx descendit en ung autre rocher plus prochain ung de l’isle espaignolle Lequel de sa jeunesse estoit nourry avec l’admiral alla se joindre avec cestuy et parla a luy et quasi de langaige ilz estoyent semblables et le asseura et luy et tous les aultres vindrent aux navires & firent grant amitié avec les nostres et leur declairerent qu’ilz estoient pescheurs venus pour pescher pour leur roy qui faisoit ung banquet a ung aultre roy/ & furent bien contens de ce que les nostres leur avoyent laissé les serpens lesquelz ilz gardoient pour la personne du roy/ et que c’estoit une viande delicate. L’admiral apres qu’il fut informé de ce qu’il desiroit sçavoir les laissa aller et suyvit son voyage vers le Ponent et en allant par ceste partie il la trouva moult fertille et plaine de gens humains/ lesquelz sans aucun suspeçon couroyent aux navires et portoyent aux nostres de leur pain qu’ilz usent & des bouteilles plaine d’eaue : & nous convoyent amoureusement de descendre en terre en allant plus avant ilz vindrent en une multitude D’isles sans nombre/ lesquelles se monstroient toutes habitees & pleines d’arbres et tresfertilles de la part de la terre ferme de la coste en laquelle nous trouvasmes ung Fleuve navigable d’eaue toute chaulde que on n’y povoit tenir les mains : depuis plus avant ilz trouverent aulcuns pescheurs dedans certaines Barques de ung boys creux qui peschoient lesquelz avoient pesché ung poisson d’une forme a nous incongneue. lequel a le corps d’une anguille et plusgrant : & dessus la teste a une certaine peau bien tendre qui semble d’une grant bource : & le tenoyent lyé avec une corde a ung bout de la barque/ pource qu’il ne peult souffrir la veue de l’air : et quant les pescheurs veoyent aucun grant poisson ou des tortues ilz laschent ladicte corde et des ce qu’il est lasché il court comme ung carreau d’arbalestre au poisson ou en ladicte tortue en leurs mettant au dos celle peau qu’ilz tiennent sur ladicte teste/ avec laquelle il les tient si fort que ilz n’en peuvent eschaper. Et ne les laisse point sinon que les pescheurs le tirent hors de l’eaue : lequel poisson des ce qu’il a sentu l’aer il laisse la proye : et les pescheurs sont prestz a le prendre & en la presence des nostres ilz prindrent quatre calandres lesquelles ilz donnerent a noz gens pour une viande tresdelicate : & fut demandé a cesditz pescheurs combien duroit ceste coste et ilz respondirent qu’elle n’avoit fin. Eulx partis de la ilz allerent plus avant : touteffois par ladicte coste et trouverent grant diversité de gens : & apres cestedicte terre ilz virent une Isle en laquelle ilz ne apperceurent aulcune personne tous se en estoient fouys mais tant seullement veirent deux chiens treslaidz de regard & ne habayoyent point : & virent des oyes & des canardz dedans ceste isle. En cestedicte coste de Cuba trouverent ung passaige si estroit et avec tant de gorges et tant d’espume que mainteffoys les navires toucherent en terre Ces gorges durent huit lieues l’eaue estoit blanche et espesse qu’il sembloit qu’on eust getté par tout de la farine apres que ces gorges furent passez a vingt lieues ilz trouverent ung mont treshault ou ilz mirent aulcuns hommes en terre pour avoir de l’eaue et du boys : ung arbalestrier qui entra dedans ung buysson pour faire sa necessité : arriva sur luy ung homme vestu de blanc et fut jusques sur la teste devant qu’il advisast au commencement il cuidoit que ce fust ung religieux qu’ilz avoient avec eulx en leur navire : mais tout incontinent au derriere de cestuy en apparut deux autres vestuz de telle sorte : & ainsi regardant il en vit une assemblee environ .xxx. Lesquelz incontinent qu’il les eut veuz il commença a fouyr & ilz alloient derriere en faisant signe qu’il ne s’en fuist point : mais luy le plustost qu’il peut il courut aux navires et fist entendre a l’admiral tout cela qu’il avoit veu : lequel envoya en terre par divers chemins plusieurs gens/ mais nully n’en sceut trouver aulcune chose : ilz veirent beaucoup de voiles atachees aux arbres. & beaucoup d’arbres d’espiceries : en allant plus avant ilz trouverent d’autres gens de diverses langues lesquelles ceulx de l’isle espagnole qui estoient avec l’admiral entendoient aulcunement et en costoyant ladicte terre de cuba ilz s’en alloyent chascun jour plus engoulfant a ceste heure a ostro a ceste heure a garbin/ et alloient & trouverent la mer plaine d’isles : & beaucoup de plaiges : tant que par plusieurs fois les navires touchoient a terre & l’eaue y entroyt dedans : et les voylles estoyent gastees et le biscuyt. Parquoy furent contrainctz de retourner par le chemin qu’ilz estoyent allés et s’en revindrent a l’isle espaignolle.

¶ Comment les roys de l’isle Espaignolle furent desconfitz.

Chapitre .xcviii.

Alors quant ilz furent arrivez en l’isle espagnole ilz trouverent que ung seigneur nommé marguerit et plusieurs autres chevaliers s’estoient partis courroucez avec l’admiral & s’en estoient retournez en espaigne Parquoy luy delibera aussi d’y aller doubtant que lesdictz chevaliers dissent au roy mal de luy : & aussi pour demander gens & victuailles/ mais devant que aller il chargea d’appaiser & de mitiguer aucuns de ladicte isle qui estoyent courroucez contre les espaignolz pour les insolences/ larcins/ murdres/ & beaucoup d’autres maulx qu’ilz faisoyent devant ses yeulx : premierement il reconsilia et feist ung amy d’ung roy appellé guarionexio : lequel y avoit esté du premier voyage/ et l’avoit fait pour son interpreteur Et apres ledict admiral alla au lieu la ou il avoit fait la forteresse appellee sainct thomas : laquelle estoit assiegee d’ung roy & y avoit .xxx. jours que le siege estoit devant il leva le siege et print le roy qui l’avoit assiegee et avoit deliberé d’aller plus oultre en subjugant les roys d’icelle isle : mais il entendit que par dedans on se mouroit de faim et que desja il s’i estoit mort une grant quantité de gens en ladicte isle : & que cela estoit par leur faulte/ car affin que les crestiens eussent souffrance de vivres : ilz avoyent arraché les racines dequoy ilz faisoyent le pain : & se nourrissoient en pensant que pour ceste cause les deussent habandonner ladicte isle : mais le mal estoit sur eulx par ce que les nostres furent secouruz de vivres du roy guarionexio car en son païs n’y en avoit pas si grande necessité comme es autres & pour ceste raison l’admiral se departit du chemin & entreprinse par luy commencee : & affin que les siens eussent plusieurs forteresses en ladicte ysle pour retirer quant le cas y adviendroit : il fist faire entre la rocque saint Thomas et le royaulme du Guarionexio une autre roque c’est a dire forteresse assise dessus une montaigne et l’appella la conception. les habitans de l’isle voyant les crestiens estre en propos de garder et maintenir icelles isles envoyerent de divers lieux embassadeurs vers l’admiral en luy suppliant pour l’amour de dieu qu’il mist ordre a ses gens lesquelz soubz umbre de trouver l’or alloient par l’isle & leur faisoient mille maulx en eulx offrant tribut des choses qui se trouvoyent en leurs provinces et ainsi fut conclud et accordé : les habitans des montaignes cibani entre eulx se obligeoyent donner tous les trois moys que entre eulx ilz appellerent troys lunes une certaine mesure plaine d’or : et l’envoyer jusques a la cité : les aultres ou naissent l’espicerie & coton se obligeoyent donner d’iceulx une certaine quantité.

¶ Les roys qui se rebellerent pour le mauvais portement des espaignolz.

Chapitre .xcix.

Lors cestuy accord fut rompu a cause de la famine pource que quant les racines leur furent faillies ilz avoyent assez de travailz d’aller tout le jour par boys en procurant a menger : touteffois aulcuns tindrent ledit accord. Et au temps deu ilz portoient partie de ce que en quoy ilz estoyent obligez Et eulx excusant de la reste et prometoient que le plustost qu’ilz se pourroyent restaurer ilz payeront le double. En cestuy temps fut trouvé es montaignes de cibani une piece d’or pesant vingt onces d’ung certain roy lequel habitoit assez loing de la rive du fleuve laquelle piece d’or fut portee au roy d’espaigne : & plusieurs gens la veirent il fut trouvé des boys de bresil et beaucop d’autres choses dignes de memoire Et pource que aulcuns se esmerveilloyent en disant pourquoy les caravelles d’espaigne qui estoyent allees en ladicte isle : quant elles retournerent ne furent elles aussi bien chargees d’or attendu qu’il en y a si grande quantité comme elles furent chargees de bresil : je respondray a cela que combien qu’il s’i trouve de l’or assez eu esgard a beaucoup d’aultres lieux. Touteffois il ne recueilloit pas sans grant peine et les hommes que l’admiral admena avec estoyent de disposition contraire a la peine : mais donnez a lubricité : et oysiveté : non envieulx a chastier pays : mais scandaleux et pour leurs maulvaises coustumes ilz se rebellerent a l’encontre dudict admiral : & oultre de cela les hommes de ladicte isle qui estoient de nature barbarique Ilz n’estoyent pas facilles a dompter : & estoyent dolens & courroucez pour le maulvais portement des espaignolz en façon que jusques a present a grant peine le gaing satisfera a la despence. Neantmoins cestuy an mil .ccccc. et .i. ilz ont en deux moys recueilly .xii. milles livres d’or huyt cens pour livre. Et aultres entrés & gaings comme s’il plaist a dieu cy dessoubz nous dirons non divertant de nostre propos. ¶ En celuy an il vint si grande fureur de vent qu’il arrachoit les arbres et les portoit jusques au ciel : et trois navires dudict admiral qui estoyent au port furent noyees et l’eaue creut tant qu’elle vint jusques sur terre plus hault d’ung bras : de laquelle chose ceulx de l’isle pensoyent que les crestiens fussent cause de cela a cause de leurs pechez : car ilz estoyent allez destourber le vivre pacifique : par ce que il n’y avoit aulcuns d’eulx qui jamais eust ouy dire ne veoir telle chose/ l’admiral apres qu’il fut venu au port incontinent fist faire deux caravelles par maistres tressouffisans.

¶ Forteresse ediffiee a la mine d’or.

Chapitre .c.

Ce temps pendant Berthelemy colomb Admiral envoya ung sien frere Lequel il avoit ja constitué Capitaine de l’isle avec aulcuns bien armez & industrieux a la mine des metaulx et alloyent es montaignes esquelles ilz cavent l’or et elles sont distantes de la forteresse ysabeau .lx. lieues Et pour chercher au vray la nature de ces lieux ledit cappitaine y alla et trouva des caves tresparfondes et antiques esquelles que se juge le roy salomon quavoit son tresor comme il se list au vieil testament les maistres que le cappitaine avoit menez avec luy en cerchant les superfices de la terre d’icelles caves virent qu’elles duroyent quatre lieues et jugerent qu’il y avoit si grande quantité d’or que chascun maistre facillement pourroit caver chascun jour trois onces d’or de laquelle chose le cappitaine le fist incontinent sçavoir a l’admiral : lequel apres qu’il eut entendu cela il delibera de retourner en espaigne : mais premierement il constitua son frere capitaine et gouverneur de l’isle et se partit au commencement de mars Mil quattre cens quatre vingtz et quinze a la volte d’espaigne ce pendant ledit cappitaine par le conseil de l’admiral son frere ediffia aupres lesdictes caves de l’or une forteresse et l’appella doree pource que en la terre de laquelle ilz faisoyent la muraille ilz y trouverent de l’or meslé parmy et consomma trois moys a ediffier et forger ouvraiges et recueillir de l’or Mais la famine les destourba et contraignit a laisser l’oeuvre imparfaicte et se partit de la & laissa a la forteresse dix hommes avec telle partie de pain que de l’isle qu’il peust finer : et ung chien pour prendre les connins et s’en retourna a la roche de la conception au moys que les roys Guarionexio & Manicantexio devoyent payer le tribut Et demoura par tout le moys de juing : auquel il receut le tribut & entier de ces deux roys et les choses necessaires pour le vivre pour luy et pour les siens qui estoyent avec luy Lesquelz estoyent environ quatre cens hommes.

¶ Les vivres envoyez d’espaigne avec le commandement du roy.

Chapitre .ci.

Le premier jour de juillet arriva troys caravelles avec froment : huille : vin : chair de porc & d’autres mengeailles sallees lesquelles furent toutes parties & divisees chascun donné sa porcion par cesdictes caravelles le Roy d’espaigne manda par commandement a tous ses hommes qui estoyent en ladicte isle qu’ilz s’en deussent aller habiter a la partie du midy plus prochaine es caves de l’or : et qu’ilz luy envoyassent tous les roys crestiens avec ses subjetz & le mandement fut mis a execution car il fut prins .ccc. habitans de ladicte isle avec leurs roys et envoyez au roy d’espaigne : et aussi a la partie du midy : en ensuivant le mandement ilz ediffierent une roche en une montaigne qui estoit bien pres d’ung tresbon & beau port laquelle ilz appellerent sainct dominique pource que a ung jour de dimenche ilz arriverent la : audit port y court ung fleuve de tresbonnes eaues habondant de diverses sortes de poisson par lequel les navires naviguent jusques a troys lieues pres de ladicte tour doree : en la forteresse d’ysabeau laisserent seullement les malades et aucuns maistres qui forgeoyent deux caravelles toute la reste vint a ladicte tour de sainct dominique apres qu’elle fut ediffiee le capitaine laissa en garde [en] ladicte tour .xx. hommes : et la reste il mena avec luy pour chercher les parties d’entre l’isle vers ponent.

¶ L’honneur qui fut faict au capitaine par ung roy qu’il trouva en cherchant ladicte ysle.

Chapitre .cii.

Apres que ledict capitaine fut mis en chemin il trouva le fleuve naiba/ distant de vingt et cinq lieues lequel comme il est dit cy dessus descend des montaignes de cibani de la part de ostro apres qu’il eut passé ledict fleuve il envoya aulcunes gens en la province d’aucuns roys de la part de ostro qui avoyent beaucoup de bois de bresil desquelz ilz en taillerent grant quantité et le misrent en la maison des habitans de ladicte isle pour sauveté jusques a leur retour pour les emporter avec les navires Et ainsi allant ledit cappitaine a la main dextre non trop distant dudit fleuve Naiba il trouva ung puissant roy qui avoit mis camp pour subjuguer ce peuple de ce lieu la le royaulme de cestuy roy est au chief de l’isle vers ponent qui s’appelle Sanagua : loingtain du fleuve Naiba trente lieues Tout le pays est montueux et aspre : & tous les roys de ceste contree luy doivent obeyssance Le capitaine en allant avant vint a parlement avec cestuy roy en maniere qu’il induit a payer tribut de coton & autres choses qu’ilz ont par ce que l’or ne se trouve en ces parties la et apres que l’acord fut faict ilz allerent de compaignie en la maison de cestuy roy ou ilz furent bien honnorez et luy vint a l’encontre tout le peuple de celuy roy avec grant feste et esbatemens & entre aultres y eut deux Le premier fut que au devant de luy trente belles jeunes filles du roy toutes nues : excepté les parties honteuses : lesquelles estoyent couvertes avec ung certain drap de coton faict a leur usance et coustume des damoiselles celles qui ne sont pas vierges vont avec tout le corps descouvert Chascune d’elle avoit une branche d’olivier en la main avec les cheveulx par dessus l’espaule/ mais leur front estoit [lyé] d’une bande/ lesquelles estoyent couleur grisastres mais tresbelles et saultoyent & dançoyent & chascune d’elles donna au capitaine la branche d’olivier qu’elles portoyent en leur main Apres qu’il fut entré en la maison luy fut appresté ung tresbeau soupper a leur usance et puis apres furent logez selon la qualité de chascun Le jour ensuivant ilz furent menez en une maison laquelle ilz usent en lieu de theatre : ou il fut fait beaucoup de jeux et dances paisibles En apres vint deux compaignies d’hommes l’une d’une bande & l’autre de l’autre bande combatans ensemble aussi impetueusement et asprement qu’il sembloit qu’ilz fussent ennemys avec dars & flesches en sorte qu’il en fut tué quatre : et grande quantité de blessez et cela se faisoit pour donner soulas au roy et audict capitaine et plus en y eust esté de tuez mais le roy fist son signe et incontinent ilz cesserent.

¶ Comment les roys qui s’estoyent rebellez furent desconfitz.

Chapitre .ciii.

Le troiziesme jour le capitaine avec sa compaignie se partirent de la et retournerent a la tour d’isabeau ou il avoit laissé ses gens malades & trouva qu’il en estoit mort environ .ccc. de diverses maladies : dequoy il se trouva mal content et beaucoup plus qu’il ne veoit apparoistre aulcunes navires d’espaigne avec victuailles desquelles il avoit grande necessité. Finablement ilz se delibererent de diviser les malades par les chasteaulx a la rive de la mer de la tour ysabeau a sainct dominique a droit chemin de ostro a transmontane ilz ediffierent ces chasteaulx Premierement d’ysabeau a .xii. lieues la tour d’esperance Et d’esperance a huit lieues saincte katherine De saincte katherine a .v. lieues sainct jacques. De sainct jacques aultres cinq lieues la conception. Une aultre entre la conception et sainct dominique laquelle ilz appellerent bon an ainsi est le nom d’ung roy la voisin apres que les malades furent divisez esdictz chasteaux ou tours le capitaine s’en alla a sainct dominique en recueillant les tributz des roys et luy ainsi estant aucuns jours pour les rapines & mauvais portement des espaignolz plusieurs de ces roys se rebellerent et firent leur capitaine le roy guarionexio & avoyent convenu a certain jour d’assaillir les espaignolz avec .xv. mille hommes armez a leur mode Ce que sachant le capitaine s’avanca & tous les surmonta l’ung apres l’autre touteffois ce ne fut pas sans grant peine & travail & angoisses. Nous demourerons la & retournerons a l’admiral colomb.

¶ Nouvelles isles avec diversité de gens trouvees par l’admiral colomb.

Chapitre .ciiii.

Au .xxviii. jour de mars Mil .cccc.lxxx. et .xviii. L’admiral colomb apres qu’il fut party du chasteau de Barameda aupres cades avec huit navires chargees il courut par le chemin acoustumé des isles fortunees & cela aussi pour la paour d’aucuns coursaires françoys : et alla a l’isle de la madere Et de la envoya cinq navires au chemin de l’isle espaignolle et retint avec luy une navire et deux caravelles Avec lesquelles il se mist a naviguer vers midy avec intencion de trouver la ligne equinoctialle et de la se tourner vers ponent et pour chercher la nature de plusieurs et divers lieux et se trouva en celle partie du chef verd : duquel apres qu’il fut party par garbin naviga six vingtz lieues avec sa vehemente chaleure : car s’estoit au moys de juing que quasi les navires se brusloyent & semblablement les tonneaulx esclatoyent en maniere que l’eaue : le vin et huille alloyent dehors et les hommes estoyent rotis de chaleur : ilz demourerent huit jours en ceste peine Les huit jours passez se mist le vent en pouppe : et ilz s’en allerent a la volte de ponent en trouvant continuellement meilleure temperance d’air : tant que le .iii. jour ilz trouverent ung air tressouef et le dernier jour de juillet ceulx qui estoient dedans la caige de la plusgrande navire descouvrirent treshautes montaignes desquelles ilz furent bien joyeulx par ce qu’ilz estoient contens a cause de l’eaue qui commençoit a faillir pource que les tonneaux estoyent crevez pour la desmesuree chaleur : & avec l’ayde de dieu ilz arriverent a terre Mais pource que la mer estoit toute plaine de secques ilz n’en povoient aprocher bien aperceurent que s’estoit terre habitee par ce que des navires on veoit beaulx jardins et prez plains de fleurs : lesquelz rendoyent une odeur tresodoriferante & rendoyent odeur jusques aux navires de la a quatre lieues ilz troverent ung tresbon port : mais sans fleuves pour laquelle chose allerent plus avant & finablement ilz trouverent ung port bien convenable d’eulx reparer & avoir de l’eaue lequel on appelle poincte de sablon Aupres le port ilz ne trouverent aucune habitacion mais plusieurs vestiges de bestes : car le passage des piedz y apparoissoit l’autre jour ilz virent venir de loing une canoe C’est assavoir une barcque a leur maniere avec .xxiii. et deux jeunes hommes armez de flesches & targes & estoient nudz : ilz avoient seullement couvert les parties honteuses avec ung drap de cothon & avoient les cheveulx longs L’admiral avec signes et flateries et semblables choses cerchoit [les] tirer a lui mais iceulx tant plus on les apeloit tant plus se doubtoyent d’estre trompez & se eslargissoient d’heure en heure plus des nostres et regardoyent les nostres par une grande admiration L’admiral voyant ne les povoir tirer a luy par cestes choses ordonna qu’en la caige de la nef on sonnast des tabourins et cornemuses et aultres instrumens et qu’on chantast pour prouver avec telles choses s’ilz se pourroyent domesticquer mais ilz pensoyent que telz sons les invitassent a la bataille en pensant que les nostres les voulsissent assaillir ilz se eslongnerent de la grant navire et eulx confians a la celerité de leurs avirons s’aprocherent a une petite navire plus petite : & tant s’en approcherent que le patron de ladicte navire getta ung sayon & ung bonnet a l’ung d’eulx : & par signes s’accorderent d’aller sur les rives pour parler ensemble. Le patron de ladicte navire envoya demander congé a l’admiral et eulx craignans de quelque tromperie donnerent de leurs avirons en l’eaue et s’en allerent en maniere que de ceste terre ilz n’eurent aultre congnoissance non pas trop loin de la trouverent une courance d’eau de levant et ponent impetueuse et courant si royde que l’admiral depuis son jeune aage qu’il a commencé a naviguer ne eut jamais aussi grant paour. Apres qu’il fut allé aulcunement avant par ceste courance d’eaue : il trouva une certaine bouche et ressembloit a l’entree d’ung port ou alloit ceste courance et a l’entree de ceste bouche jusques a ung aultre ilz trouverent une autre courance terrible d’eaue doulce laquelle se joignoit avec la salee/ et apres qu’ilz furent entrez en cedit goulfe ilz trouverent finablement de l’eaue tresdoulce et bonne & dient que en vingt et six lieues continuellement ilz ont trouvé eaue doulce : et tant plus ilz alloyent vers ponent tant plus elles estoyent doulces/ depuis ilz trouverent une montaigne moult treshaulte ou ilz se mirent en terre et veirent beaucoup de champs cultivez/ mais ilz ne veirent ny hommes ny maisons. ou costé de ladicte montaigne vers Ponent ilz congneurent y avoir quelque plaine et par plusieurs signes ilz comprindrent cestedicte terre estre grande & habitee : & tresbien peuplee. Et ceste terre est appellee Paria : & prindrent de ce pays la quatre hommes et les misrent en ceste dictes navires/ et allerent suyvant ceste coste de ponent ung jour pour la doulceur du pays ilz allerent en terre ung petit plus avant ou ilz trouverent plus grant nombre d’hommes qu’en aulcun autre lieu & trouverent des roys lesquelz ilz appellent cacichi lesquelz envoyerent embassadeurs a l’admiral & par signes et demonstrances il leur faisoient grandes offres & les invitoient a descendre en terre ce que l’admiral recusoit. et quant ilz veirent cela grant nombre d’eulx avec barques alla aux navires avec une multitude d’hommes acoustrez de chaines d’or et de perles orientales a leurs bras et au col et avec signe ilz respondoient que les perles se trouvoyent es rivaiges de la mer la voisine et demonstroient aussi qu’ilz en trouvoyent assez convenablement : toutesfois entre eulx ilz n’en faisoient pas grande estimation/ desquelles ilz en offrirent a noz gens eulx voulans estre amys des nostres/ et pource que le froment des navires se gastoit l’admiral delibera de differer ce train jusques a ung aultre temps/ & envoya a l’heure deux barques chargees d’hommes pour cercher & entendre la nature de ce lieu la : & quant ilz furent en terre ilz furent receuz bien amoureusement tous couroyent a les veoir comme ung miracle & deux de ces icy plus graves des aultres se misrent a l’encontre l’ung estoit vieux & l’autre jeune et estoit son filz/ et faicte selon leur coustume la salutation ilz les menoient en une maison faicte en rond au devant de laquelle il y avoit une grant place et apres qu’ilz furent entrez on leur apporta certaines chairres pour seoir d’ung boys tresnoir & ouvrees avec ung tresgrant artifice : et les nostres se seirent ensemble avec ces plusgrans/ en apres vindrent beaucop d’escuyers chargez de diverses sortes de fruitz incongneuz a nous et apporterent vins blancs et rouges et non pas de raisins/ mais faitz de divers fruictz moult doulx et amyables apres qu’ilz eurent faict collation en la maison du vieil homme depuis le jeune filz les conduisit en sa maison en laquelle il y avoit beaucoup de femmes toutes separees des hommes lesquelz vont tous nudz excepté les parties honteuses lesquelles ilz portent couvertes avec certaines voilles de cothon tyssues de diverses couleurs et nous leur demandasmes d’ou venoit l’or qu’ilz portoient : ilz respondoient avec signes qu’il venoit de certaines montaignes qu’ilz monstroient et dirent que en aucune maniere noz gens n’y allassent pource que la se mengeussent les hommes : mais les nostres ne povoyent entendre si c’estoit des bestes sauvages ou des canibales : & monstroyent avoir grant desplaisir pource qu’ilz n’entendoyent nostre parler et aussi qu’ilz n’estoyent pas entenduz.

¶ Le retour de l’admiral a l’isle espaignolle.

Chapitre .cv.

Noz gens demourerent en terre jusques a midy et retournerent aux navires avec aucunes chesnes de perles et l’admiral incontinent se leva avecques toutes les navires a cause du forment comme nous avons dit qu’il se pourissoit avec intention de y retourner une autresfois & en allant avant continuellement il trouvoyt moins de fons et par beaucoup de jours les grans navires eurent beaucoup a souffrir a cause dequoy l’admiral envoyoit devant une caravelle bien petite en tastant tousjours le fons de l’eaue laquelle monstroit le chemin aux aultres : et allerent ainsi plusieurs jours/ et croyent que ceste terre fust isle : esperant trouver voye et se tourner par la transmontane vers l’isle espaignole & arriverent a ung fleuve parfond de trente couldees & de largesse inouye lequel estoit environ de dixhuit ou de vingt lieues de large : ung petit plus avant vers ponent mais ung petit plus a midy : car ainsi se engoulfoit celuy rivaige ilz veirent la mer plaine d’herbes combien qu’il semblast qu’elle courust comme ung fleuve et sus la mer avoit aucunes semences qui ressembloyent a lentilles & l’herbe estoit tant espesse qu’elle empeschoit le naviguer des navires en ce lieu la dist l’admiral tout l’an estoit grande temperence d’aer/ & le jour estre quasi esgal par tout l’an & non gueres variable : et luy se voyant en ce goulfe quasi bien intrinqué et non trouvant issue de transmontane pour aller a l’isle espaignole tourna la proue ou il estoit entré & apres qu’il fut hors desdictes herbes print vers transmontane son droit chemin aulcuns disent que icelle terre est terre ferme d’inde : touteffois l’admiral ne trouva aultre chef/ mais quant il fut tourné aulcunement en derriere par transmontane en prenant son chemin vers l’isle espagnolle avec l’ayde de dieu il arriva selon qu’il avoit proposé le .xxviii. jour d’aoust mil .cccc.xcviii.

¶ Le desordre que l’admiral trouva ses gens en l’isle Espaignolle.

Chapitre .cvi.

Et apres que l’admiral Colomb fut arrivé en l’isle Espaignole Il trouva toute chose en confusion Et ung rodien qu’il avoit nourry avec beaucoup d’aultres espaignolz s’estoit rebellé et l’admiral voulant mittiguer non seullement ce pacifia/ mais il escripvit au roy et royne d’espaigne tant de mal de l’admiral qu’il est impossible de le dire : et aussi escripvit de son frere qui estoit demouré capitaine au gouvernement de l’isle espaignolle en le accusant qu’il estoyt vicieux de toute deshonnesteté trescruel & injuste lequel pour chascune petite chose faisoit prendre et mourir les hommes & qu’ilz estoient orgueilleux : envieux : & plains d’ambicion intollerable et pour ceste cause estoyent reboutez d’eulx comme de bestes sauvaiges qui se delectent de espandre le sang humain & ennemis de son empire & comme ceulx qui ne cerchoient que de usurper l’empire de ceste isle en escripvant ceste conjecture qu’ilz ne laissoyent point aller aux caves de l’or sinon leurs serviteurs. L’admiral semblablement notiffia audict roy et royne la nature de ces mauvais garçons & larrons et leur escripvoit qu’ilz ne attendoyent a autre chose sinon a paillardise et larcins et qu’ilz estoyent du tout affrenez dequoy les habitans de l’isle s’estoyent rebellez alloyent par l’isle violant robant & destroussant et ne faisoyent que dormir & estoient habandonnez a toute oysiveté & luxure & que pour leur plaisir ilz alloient mettre au gibet les povres gens d’icelle isle et ce pendant que ces inimitez se faisoient l’admiral envoya pour combatre ung qui s’estoit rebellé qui s’appelloit le roy de cigiani : lequel avoit six mil hommes tous armez de arcz et flesches : mais ilz estoient nudz et leur corps estoit paint de diverses couleurs depuis la teste jusques aux piedz ces gens cy apres plusieurs traveilz furent surmontez & vindrent a obeissance.

¶ Comment l’admiral et son frere furent mis es fers et envoyez en espaigne.

Chapitre .cvii.

Cy apres le roy et la royne d’espaigne en ces entre faictes receurent les lettres de l’admiral et de ses adversaires et eulx voyans que par ceste dissention de tant d’or il en venoit a eulx peu de proffit ilz envoyerent ung leur gouverneur qui eust soy enquerir des choses dessusdictes et ceulx qu’il trouveroyt coulpables qu’il les chastiast ou qu’il les envoyast en espaigne et qu’ilz chastieroyent. Et incontinent que celluy gouverneur fut arrivé a l’isle espaignolle par la subornation et fraulde [de] ces mauvais espaignolz et aussi pour la grant envie que ilz avoyent contre l’admiral et son frere son advis fut de prendre l’admiral & son frere lesquelz furent mis es fers et envoyez a la volte D’espaigne & des ce qu’ilz furent a cades le Roy et la Royne d’espaigne les envoyerent delivrer et les firent venir a leur court voulentairement en laquelle au present jour ilz se trouverent.

¶ Comment alons le noir compaignon de l’admiral trouva isles non ouyes avec divers coustumes des pays.

Chapitre .cviii.

Nous trouvons apres que l’admiral fut venu a ung tel inconvenient plusieurs de ses navires et nautonniers lesquelz continuellement avoyent esté avec luy aux dessusdictes navigations firent entre eulx deliberation d’aller par la mer occeane pour descouvrir nouvelles isles et apres qu’il eut prins congié de leur trescher maistre ilz armerent aulcuns navires a leurs despens et s’en allerent en divers chemins avec commandement qu’ilz n’eussent a approcher de .l. lieues ou avoit esté l’admiral & ung pierre alons appellé le noir avec une Caravelle armee a ses despens se myst a aller vers midy. Et arriva a celle terre appellee poria de laquelle cy dessus avons faicte mencion : ou l’admiral trouva si grande quantité de perles & allant plus avant par ladicte coste de .l. lieues pour obeyr au roy il vint a une province appellee des habitans cursane ou il trouva ung port semblable a celuy de cades et entra dedans et apres qu’il y fut entré il vit ung bourg de .lxxx. maisons et descendit en terre et trouva hommes nudz qui n’estoyent pas de ce lieu la mais d’ung autre lieu trespopulé a ung lieu voisin avec lesquelz il fist permutacion de sonnettes et autres merceries a l’encontre desquelz apres plusieurs prieres il eut d’eulx (combien que au premier ilz en firent responce) .xv. onces de perles qu’ilz portoyent au col : et le jour ensuivant il s’esleva avec sa caravelle et alla au bourg : lequel tout le peuple qui estoit infiny courut a la marine et avec signes et actes le prioyent qu’il descendist en terre mais ledit alons en voyant si grande multitude eut paour de descendre pource qu’il n’avoit en sa compaignie plus de trente et trois hommes : les nostres leur faisoyent signe que s’ilz vouloyent aucunes choses d’eulx qu’ilz venissent en la caravelle : parquoy grande quantité des leurs avec leurs basteaux en portant avec eulx grande quantité de perles avec aucunes merceries qui valoyent peu d’argent il eut environ cinquante livres de perles Et apres que ledit alons les vit si humains et qu’il eut demouré .xx. jours delibera de descendre en terre ce qu’il fist et fut receu amoureusement : leurs habitations sont maisons de boys couvertes de fueilles de palme et pour leur singulier menger ce sont capes & de plusieurs d’icelles ilz en tirent des perles ilz ont cerfz porcz sangliers connins : lievres : pigeons : et torterelles en grant habondance les femmes nourrissent les oyes et canardz et sont comme les nostres En leurs boys y a habondance de paons : mais ilz n’ont point si belles plumes comme ont les nostres le masle n’est comme point si differant a la femelle : ilz ont des faisans en grande quantité Iceulx hommes sont tresparfaitz archers ilz mettent la flesche ou ilz veulent Auquel lieu ledit alons le noir avec sa compaignie es jours qu’ilz furent la ilz firent tresbonne chere ilz avoyent ung pain pour quatre cloux et pour clou ung faisant aussi avoient torterelles oyes canardz & pigeons. Ilz achepterent pour de l’argent des patenostres de verre et des esguilles et noz gens par signes leur demandoyent qu’ilz vouloient faire desdictes esguilles & semblablement par signes ilz disoyent que s’estoit pour curer leurs dens & pour tirer les espines des piez pource qu’ilz vont deschaulx et pour cela estimoyent beaucoup les esguilles : mais sus tous les sonnettes leur plaisent Et si alla aucunement ledit alons dedans l’isle & virent boys de treshaulx arbres et espés et sentoit mugir aucunes bestes qui entonnoyent celuy pays avec estranges vociferations Neantmoins ledict alons : & la compaignie jugeoyent ces bestes n’estre nuysables : pource que les gens de ce pays la alloyent dedans ce boys seurement avec leurs arcs et flesches sans aucune crainte Quant leur plaisir estoit ilz avoyent des cerfz porcz sangliers autant qu’ilz en vouloyent ilz n’ont point de beufz ne chevres ne moutons ilz usent de pain de racines & de panil qui ressemble quasi au millet quasi comme ceulx de l’isle espaignolle Ilz ont les cheveulx noirs et gros et moitié crespés : et sont fort longs Et pour avoir les dens blanches ilz portent continuellement en leur bouche une certaine herbe et apres qu’ilz l’ont mise dehors ilz se lavent la bouche Les femmes entendent plus au labourage et aux choses de la maison que ne font pas les hommes Les hommes entendent aux jeux et festes et autres soulas ilz ont des potz : crusches : escuelles & autres vaisseaux de terre achaptez en autres provinces Entre eulx ilz font foires et marchez ou tous les aultres voisins y vont et portent de diverses marchandises selon en la varieté des provinces et changent et permettent l’une chose a l’autre ainsi qu’il leur plaist ilz ont des oyseaulx et autres belles bestes lesquelz ilz nourrissent et domesticquent pour leur soulas lesquelz portent carcans d’or et de perles : Mais ilz ne trouvent pas celuy or en ceste province Mais ilz l’ont par changement d’autres marchandises lequel or est de la bonté du florin de rein. Les hommes portent des brayes et semblablement le portent les femmes : mais la plus grande partie du temps elles sont en la maison Il leur demande par signes et actes si en la fin de celluy rivage se trouve la mer : ilz demonstroyent n’en sçavoir riens : mais pour la sorte des bestes qui se trouvent en ce pays la : ilz croyent fermement que ce soit terre ferme ce qui est facille a croire/ car noz gens ont navigué par celle costiere de ponent plus de mille lieues que jamais n’ont trouvé fin ny encores final d’aulcune fin : Et puis leur demanderent de qui ilz avoyent ledict or et de quelle bande il venoit ilz firent entendre a noz gens qu’il s’aportoit d’une province appellee Canchiette distant de la six journees vers ponent.

¶ Diverses nations et lieux trouvez par alons le noir.

Chapitre .cix.

En ceste province de canchiette Alons le noir delibera d’y aller : et environ le premier jour de Novembre Mil cinq cens arriva audict canchiette ou il se arresta avec sa caravelle/ Et puis apres que les hommes du pays l’eurent veue ilz vindrent vers ledit alons sans aulcune craincte et apporterent tout l’or qu’ilz avoyent pour l’heure Lequel estoit de la bonté dessusdicte Ledit alons trouva beaucop de papegaulx de plusieurs couleurs La y avoit bonne temperance d’air sans aucun froit et fut au moys de novembre : Celle gent est de bonne nature ilz sont sans aucune suspition toute la nuyt ilz venoyent avec leurs barques a la caravelle sans avoir aucune craincte comme se eust esté a leur maison : mais ilz sont jaloux de leurs femmes : lesquelles ilz faisoyent demourer en derriere bien loing Ilz ont grant quantité de coton lequel croist de luy mesmes sans aucune culture duquel ilz font leurs brayes Apres que ledit alons fut party de la et allant par ceste coste plus de dix journees vit ung tresbeau lieu avec maisons et chasteaulx avec assez fleuves et jardins que jamais il n’en vit de plus beaulx Esquelz voulant descendre luy vint a l’encontre plus de deux mille hommes armés a leur coustume : lesquelz par quelque voye du monde jamais ne voulurent paix ny amytié ny aucun marché En eulx se demonstroit une grande rudesse & sembloyent quasi gens sauvaiges Non obstant ilz estoyent tresbeaulx hommes et bien proporcionnez de leurs corps ilz estoyent bruns de couleur & universellement plains de taches parquoy pour cela Alons le noir content de cela qu’il avoit trouvé delibera de s’en retourner par le chemin qu’il estoit venu.

¶ Comment alons le noir en s’en retournant en espaigne combatit avec les canibales.

Chapitre .cx.

Ainsi navigant a l’ayde de dieu : ilz arriverent a la province des perles appellee curiane : ou deppuis il demoura par l’espace de vingt jours en se donnant du bon temps Et devant qu’il arrivast en ladicte province en ung lieu non trop loing d’icelle il rencontra dixhuit barcques ou canoe des canibales qui sont ceulx la qui vivent [de] la chair humaine lesquelz incontinent qu’ilz virent la caravelle ilz l’assaillerent avec une grant hardiesse : et en l’environnant commencerent a combatre avec leurs arcz et flesches/ mais les espaignolz avec leurs arbalestres et artillerie les mirent en grant paour en façon que trois se mirent a fuyr : & les nostres avec la barque armee les suivirent et tant firent qu’ilz prindrent une de leurs barques de laquelle plusieurs desdictz canibales s’estoyent gettez dedans la mer & eschaperent pour naiger : et seullement en prindrent ung qui ne peut eschapper lequel avoit trois hommes liez es mains et piedz pour les vouloir a son besoing mangier : & puis deslierent les lyez & lierent le canibal et le donnerent a ceulx qui avoyent esté prisonniers et qu’ilz en fissent la vengence telle qu’il leur plairoit et incontinent luy donnerent tant de coupz de poingz et de piedz et de bastons qu’ilz le laisserent quasi mort en luy recordant qu’il avoit mangé leurs compaignons Et les jours ensuivans semblablement ilz le vouloient manger & puis apres leur fut demandé de leurs coustumes : ilz dirent que ces canibales alloyent par toutes celles isles & celles provinces : et des incontinent qu’ilz arrivoyent a terre/ ilz font ung effort avec grans bastons et vont desrobant tout ce qu’ilz trouvent En ceste province de perles y a de tresgrandes salines et dient que quant aucun homme meurt et qu’il soit d’estime ilz le mettent dessus une certaine charrette : soubz laquelle ilz font ung certain feu qui est lent et font tant que peu a peu se distille la chair et ne reste sinon la peau et les os ilz le gardent pour son honneur Le treziesme jour se partirent de ladicte province pour venir en espaigne avec quatre vingtz seize livres de perles a huyt onces la livre achaptees au pris de bien peu d’argent. En seize jours ilz arriverent en galice les perles qu’ilz apporterent sont orientales. Touteffois elles ne sont pas bien percees & pour cela beaucoup de marchans qui les congnoissent dient qu’elles ne sont pas de trop grant pris.

¶ Navigacion de pinzon compagnon de l’admiral avec ce qu’il fut trouvé.

Chapitre .cxi.

Vincent appellé Pinzon et Aries son frere qui furent au premier voyage avec Colomb en l’an mil quatre cens quatre vingtz et dixneuf. Armerent de leurs despens quatre caravelles et le dixhuitiesme jour de novembre se partirent de palos pour aller descouvrir nouvelles isles et pays et en brief temps ilz furent aux isles de canaries & successivement aux isles du chef verd desquelles en partant et en prenant la voye par garbin naviguerent par celuy vent trois cens lieues auquel voyage ilz perdirent la transmontane et des ce qu’ilz l’eurent perdue ilz furent assaillis d’une terrible fortune de mer avec pluye & vent trescruel Neantmoins ilz suyvirent continuellement leur chemin par le vent de garbin : toutesfois non pas sans grant peril : & allerent oultre .cc. cinquante lieues et le vingtiesme de janvier : de loing ilz veirent terre en approchant d’icelle ilz trouverent tousjours deffaillance d’eaue et tasterent la profondeur et trouverent .xvi. bras d’eaue : et quant ilz furent arrivez a terre ilz desmonterent & demourerent la deux jours esquelz jamais ne leur apparut aulcune personne et allant plus avant veirent par une nuyt plusieurs feuz & sembloit que ce fust ung ost de gens d’armes & pour veoir que c’estoit desditz feuz ilz envoyerent .xxv. hommes bien armez : & comprindrent qu’il y avoit grande quantité d’hommes : & ne les voulurent aucunement destourber : mais delibererent de les attendre le matin et puis apres entendre qu’ilz estoyent le lendemain matin au lever du soleil envoyerent en terre trente hommes bien armés/ lesquelz incontinent qu’ilz furent veuz de celle gent ilz envoyerent a l’encontre des nostres .xxxii. hommes armez a leur mode d’arcz & flesches & sont hommes grans & ont le visage tors & de cruel regard & ne cessoient de menasser les espaignolz lesquelz tant plus leur faisoyent chere tant plus ilz se monstroyent estre courroucez & jamais ne voulurent paix ny accord ny amytié. Parquoy a l’heure s’en retournerent aux navires avec intencion le matin ensuyvant de combatre avec eulx mais iceulx des ce que la nuyt apparut se leverent tous nudz et s’en allerent Ceulx de la navire pensoyent que cestes gens fussent gens vacabons comme egiptiens ou tartariens lesquelz n’ont aulcune propre maison mais aujourd’huy vont ça le lendemain la avec leurs femmes et enfans Les espaignolz allerent aulcunement suyvans leurs traces & trouverent dedans le sablon l’enseigne de leurs piedz lesquelz trouverent estre beaucoup plus grans que les nostres c’est de deux foys en navigant plus avant ilz trouverent ung fleuve mais non pas de si grant fons que les caravelles y peussent aller pour laquelle chose ilz envoyerent en terre quatre barques armees & apres que les gens qui estoyent dedans furent descenduz tous armez vint a l’encontre d’eulx ung innumerable nombre de gens tous nudz lesquelz avec signes et demonstrances desiroient fort l’amitié des nostres : mais les espaignolz en voyant si grant tourbe n’estoyent point asseurez de approcher d’eulx : mais au mieulx qu’ilz peurent leur getterent une sonnette & a l’encontre de ce gecterent une piece d’or aux nostres parquoy ung des espaignolz se mist en terre pour le prendre soubdainement une tourbe d’icelle canaille fut sur luy pour le vouloir prendre : mais il se deffendoit avec l’espee le mieulx qu’il povoit mais il ne povoit reparer a si grant nombre pource qu’ilz n’estimoyent point a mourir : et les espaignolz qui estoyent dedens les barques pour secourir leur compaignon descendirent en terre. et en fut tué .viii. les autres eurent grant peine d’eschapper et se retirer a leurs barques & ne leur vaulsist estre armez de lances et d’espees car cestes gens combien que des leur en fust beaucoup mort : touteffois ne leur en challoit mais tousjours estoyent plus hardys et les suyvoyent jusques dedans l’eaue en façon qu’ilz prindrent une de ces quatre barques et tuerent le patron le demourant eut de grace de s’en fuir et s’en allerent aux navires et feirent voilles pour partir de la & aussi pour l’heure se trouverent mal contens : et prindrent leur chemin par transmontane/ car ainsi se engoulfe ceste coste.

¶ De pinçon qui arriva a la mer d’eaue doulce et trouva diverses isles.

Chapitre .cxii.

Apres qu’ilz furent allez quarante lieues en la mer d’eaue doulce & en cerchant de la ou venoit ceste eaue ilz trouverent la bouche laquelle se embuschoit dedans la mer de quatre lieues avec grant impetuosité Au devant de laquelle bouche estoient beaucop d’isles habitees de humaines gens et paisibles & ne trouverent aulcune chose de povoir contracter Ilz prindrent .xxxvi. esclaves puis que autre chose ne povoyent trouver pour contracter avec gaing. Le nom de ceste province s’appelle marina tambal : ces gens de l’isle disoient que dedans la terre ferme se trouvoit grande quantité d’or. Apres qu’ilz furent partis de cestuy fleuve en peu de jours ilz descouvrirent la transmontane qui estoit quasi a l’horizon & avoient fait cinquante lieues selon leur reigle ilz dient qu’ilz sont allez tousjours par la terre de payra pource que depuis ilz vindrent a la bouche appellee du dragein laquelle est une bouche qui est en ceste terre payra ou l’admiral alla par aucunes isles de la lesquelles estoyent en grant nombre oultre ceste Payra ou ilz trouverent grande quantité de bresil duquel ilz chargerent leurs navires : et d’icelles isles y en avoit beaucoup deshabitees pour la crainte des canibales : & veirent infinies maisons toutes en ruyne & beaucoup d’hommes qui fuyoyent es montaignes/ ilz trouverent plusieurs arbres de casse [fistule] de laquelle ilz porterent en espaigne & les medecins qui la veirent dirent que elle eust esté tresbonne si elle eust esté recueillie en temps deu : et y a de tresgrans arbres et gros telz que six hommes ne les sçauroient embrasser & veirent aussi une beste quasi monstrueux qui avoit le corps et le museau d’ung regnart et la crope & les piedz de derriere comme le cinge & ceulx de devant comme ung homme les oreilles comme une souriz chaulve. & a soubz le ventre ung autre ventre par dehors comme une gibeciere ou elle caiche ses enfans depuis qu’ilz sont nez : ne jamais ne les laisse saillir jusques a tant qu’ilz soyent souffisans de eulx mesmes nourrir excepté quant elle les veult alaicter ung de telles bestes ensemble ses enfans fut porté de sibille a granate au roy & royne d’espaigne : toutesfois dedans la navire moururent les enfans & le grant en espaigne lesquel ainsi mors furent veuz de plusieurs et diverses personnes cestuy vincent afferme avoir navigué par ceste coste de payra plus de .vi.c. lieues et ne doubte point que ne soit terre ferme/ mais en certain apres qu’ilz furent partis de la payra ilz vindrent a l’isle espaignolle le .xxiii. jour de juing mil .ccccc. & de la ilz dient estre allez continuellement par ponent plus de quatre cens lieues en une certaine province ou aux quatre caravelles qu’ilz avoyent saillit une si grande tempeste au moys de juillet que deux d’icelles se noyerent et une se rompit et estoyent plus marris de la crainte qu’ilz avoient d’estre prins qu’ilz n’estoyent d’autre chose La quarte caravelle demoura ferme et fort mais non sans grant travail et ja avoyent perdu toute esperance de salut & ainsi eulx estans ilz veirent une [de] leur navire aller ainsi que la mer la menoit pource qu’elle estoit avec peu de gens esquelz eulx doubtant de noyer se misrent a terre & la estoient en grant doubte et paour d’estre mal traictez de celle gent. Et firent deliberation d’entre eulx se tuer : & aussi estoient divers & mauvais conceptions environ par l’espace de huyt jours & apres ce mist a faire bonace leur navire qui estoyt demouré seullement avec .xviii. hommes & la monterent ensemble avec l’autre qui estoit saulvee : & firent voille a la volte d’espaigne ou le dernier jour de septembre arriverent despuis ces gens cy plusieurs aultres ont navigué a cestuy voyage par midy & continuellement sont allez par la coste de la terre de payra plus de mil deux cens cinquante lieues/ et jamais n’en [ont] trouvé aulcune fin que ce soit isle : & pour cela chascun manifestement tient estre terre ferme de laquelle dernierement a esté apporté de la casse en toute perfection et de l’or. des perles & bresil de la sorte dessusdicte : poyvre. et canelle : saulvaiges herbes & plantes : et arbres : & bestes d’estrange et diverses sortes que nous n’avons point.

¶ Cy finist le quatriesme livre de la navigacion et commence le cinquiesme.