¶ Cy commence le premier livre de la premiere navigation faicte par la mer Occeane aux terres des mores de la basse ethiope par le commandement de treshault prince le seigneur Infant don Hurich frere de don Durich Roy de portugal.

Vous messieurs & dames qui lirez ou orrés lire ce present livre serez advertis que quant trouverez les motz qui s’ensuyvent C’estassavoir Ostro/ Austral/ Septentrion/ Acquillon Tranmontane/ Levant/ Orient/ Ponent/ Grec/ Siroch/ Maistral/ Garbin/ Bonace. Ce sont noms de vens Ostro Austral c’est ung mesme vent que nous apellons midy Septentrion Acquilon Tranmontane/ ces trois c’est ung mesme vent et s’appelle a nous le vent de bise Levant et Orient c’est semblablement ung mesme vent & s’appelle le vent d’amont Ponent c’est le vent d’aval Garbin c’est ung vent qui est entre le soleil couchant & le midy Siroch est entre le midy et le vent d’amont Grec est entre le vent d’amont et celuy de bise et le Maistral est entre la Bise/ et celluy d’aval Neantmoins ce mot Trammontane il sert aulcuneffois pour une estoille/ par laquelle les mariniers se gouvernent et l’appellent Trammontane.

¶ La premiere qui a trouvé la navigacion de la mer Occeane vers le midy.

Chapitre premier.

¶ Prologue de l’acteur.

Moy loys Cadamosto estant le premier de la nation de la noble cyté de venise esmeu a naviguer la mer occeane au dehors de l’estroict de Gilberterre/ vers les parties du midy : dans les terres des mores de la basse ethiope/ ouquel lieu et en mon voyage ayant veu plusieurs choses nouvelles & dignes d’estre notees affin que ceulx qui apres moy auront a descendre puissent entendre quel a esté mon couraige en cherchant diverses choses en divers et nouveaulx lieux/ que voirement et les coustumes et les lieux nostres/ en comparacion de la chose par moy veue et entendue ung autre monde se peut bien appeller Parquoy les choses par moy veues et entendues meritent bien d’en faire quelque chose digne de memoire Et ainsi comme la memoire me servira/ ainsi avec ma plume je transcripray les choses susdictes lesquelles se par moy ne seront aornement mises comme la matiere le requiert/ a tout le moins ne fauldray point de mettre en tout lieu la pure verité/ Et sans doubte j’escripray toute la verité des choses que narreray Or doncques est assavoir que celluy qui fut le premier inventeur de faire naviguer ceste partie de la mer Occeane vers midy es terres des mores de la basse ethiope laquelle depuis nostre premier pere adam ença ne se trouve jamais avoir esté naviguee sinon a present par le gentil seigneur Infant don Hurich de portugal qui fut filz de hault prince don jehan roy de portugal lequel seigneur infant don Hurich combien que de ses vertus plusieurs choses notablez s’en pourroyent dire toutes je les laisse/ mais seullement je declareray comme il s’est donné a batailler pour nostre sauveur jesucrist en guerroyant les barbares et combatant pour la foy. Il ne voulut jamais prendre femme en sa jeunesse soubz grande chasteté se gardoit de choses tresdignes il a faict en bataille contre les mores et en sa propre personne et par son industrie de grandes choses dignes de memoire dequoy sondict pere Jehan venant a la mort appella ledict seigneur infant don Hurich son filz en luy recommandant toute la chevallerie des portugalois le priant et exhortant de vouloir suivre son sainct vray et laudable propos. C’estassavoir de persecuter avec tout son povoir les ennemis de la saincte foy de jesucrist lequel seigneur infant en parlant briefvement s’efforça de le faire. Et depuis la mort de sondict pere avec l’aide de son frere don durich qui succeda au royaulme de portugal fist une grande guerre en affrique a ceulx de Fess dequoy apres plusieurs ans passez ledict seigneur infant procurant par toute voye possible dommaiger en plusieurs lieux ledit royaume de fess lequel vient sur la mer occeane au dehors l’estroit de gilberterre envoya ses caravelles. Et par chascun an faisoyent plusieurs dommaiges aux mores & ceulx qui conduisoient lesdictes caravelles solliciterent ledict seigneur Infant de les faire aller chascun an plus avant jusques a ung promontoire appellé chef de non : lequel chef dient ainsi estre apellé jusques aujourd’huy et cestuy chef est la fin ou ne se trouve aulcun avoir plus avant passé que jamais en retournast parquoy s’appelloit le chef de Non qui le passe retourne non et par ainsi lesdictes caravelles alloyent jusques audit chef & de la n’osoyent passer plus oultre. Mais ledit seigneur Infant desirant de sçavoir plus oultre delibera de faire que lesdictes caravelles l’an ensuyvant passassent avec l’aide & faveur de dieu oultre ledit chief de non. Et print les meilleures caravelles de portugal et icelles bien equippees de toutes choses necessaires fut estimé que il estoit possible que elles povoyent naviguer par tout et luy qui estoit desirant de vouloir entendre choses nouvelles pour & affin de sçavoir la generation des habitans d’iceluy pays pour vouloir nuyre aux mores feist mettre en point trois de ses caravelles avec bonnes munitions d’armures victuailles & autres choses necessaires & mist dedans de vaillans hommes lesquelz allerent & passerent ledict chef de non en navigant de jour par la coste/ & de nuyt se arrestoient et ceulx estans allez par ladicte coste environ cinquante lieues oultre ledict chef de non non trouvans habitation ny aucunes gens/ mais toute terre areneuse & seiche tournerent en derriere Et voyant ledict seigneur infant iceluy en non avoir peu entendre aucune chose l’an ensuivant fist retourner sesdictes caravelles et hommes en leur commandant qu’ilz passassent plus oultre qu’ilz n’avoient esté de .xxx. lieues & plus s’ilz povoient & que il les feroit tous riches & ainsi allerent & acomplirent le commandement dudit seigneur Lesquelz non trouvans autre chose que terre areneuse & seiche sans aucune habitation s’en retornerent Et ce non obstant croissoit de jour en jour audit seigneur Infant la voulenté de sçavoir qu’il y avoit en ses parties la/ & fist retourner le deuziesme an deux desdictes caravelles. Et a dire en brief les y fist tant aller par plusieurs ans qu’ilz vindrent trouver en aucune partie y estre habitation des arrabes qui vivent en iceulx desers Et apres plus oultre une generation de gens qui s’apelloit Azanegi/ lesquelz sont hommes grisastres c’est a dire qu’ilz ne sont ne blans ne noirs de laquelle generation cy apres sera faicte mention Et determineement se parviendra a descouvrir les terres des premiers mores. Et apres de temps en temps d’aultre generation desditz mores de diverses choses langues et coustumes & foy ainsi comme en ce present livre pourrez plus largement entendre.

¶ Des choses trouvees de loys de cadamosto en la navigation des terres des mores.

Chapitre .ii.

Adoncques moy loys de cadamosto me trouvant en nostre cité de venise en l’an de nostre seigneur mil quatre cens .liiii. estant de l’aage environ de .xxii. ans ayant navigué en aucunes parties de nostre mer mediterrane/ j’avoye determiné de vouloir tourner en flandres ou une aultresfoys avoye esté et c’estoit affin de gaigner aulcune chose pource que en ce temps la tout mon pensement estoit de travailler de toute ma possibilité pour acquerir aulcuns biens et finablement pour parvenir a aulcune perfection d’honneur. Et ayant deliberé de m’en aller comme j’ay dit je prins avecques moy si peu d’argent que j’avoye en ce temps la & me mis sus les nostres gallees qui vont en flandres et estoit capitaine le seigneur marchez en chevalier et ainsi avecques le nom de dieu nous partimes de venise avec lesdictes Galees l’an dessusdict. le .viii. jour d’aoust/ et navigasmes par noz journees en faisant noz demourances aux lieux acoustumez/ jusques a ce que nous arrivames en espaigne. Et nous trouvant a cause du temps contraire avec lesdictes Galees au chef de sainct Vincent que dient ainsi estre apellé/ de fortune nous sceusmes que ledict seigneur Infant don huric estoit logé en une ville voisine apellee reposera/ lequel seigneur ayant notice de nostre venue envoya a nosdictes galees ung sien secretaire qui avoit a nom anthoine gouzalles/ & avec luy avoit ung patrice des comtes qui se faisoit ainsi appeller lequel se disoit estre venitien & consel de nostredicte nation audict royaume de portugal/ comme se monstre estre par une sienne lettre de nostre seigneurie avec le seau pendant/ lequel patrice estoit pensionnaire dudict seigneur infant/ et vindrent a nosdictes galees par la commission de luy avec aulcunes monstres de succres de l’isle de la madere/ et du sang de dragon/ et autres choses tirees des lieux & isles apartenans audict seigneur/ et monstrerent desdictes monstres a plusieurs personnes et moy estant present demanday a ceulx qui estoient venuz en nosdictes galees de diverses choses & en les nous disant racomptoient comme cestuy seigneur infant avoit faict habiter nouvellement ladicte isle/ laquelle jamais au paravant n’avoit esté habitee/ laquelle produisoit lesdictz sucres & sang de dragon et autres bonnes choses utilles/ & que cecy c’estoit riens au regard aux autres plusgrandes choses que ledict seigneur faisoit en nous declarant que depuis certain temps en ça il avoit fait naviguer la mer ou jamais autres n’avoient navigué & descouvert terre de diverses generations estranges/ dans lesquelles se trouvoit choses merveilleuses/ & ceulx qui avoient esté la en celle part avoient avec celle gent nouvelle/ faict de gros gaingz par ce que de ung solz ilz en faisoient .vii. ou .x. & de cecy ilz disoient tant & tant de choses/ que de moy mesmes entre les autres j’en estoie esmerveillé. & cela me fist venir la voulenté d’y aller & demanday se ledict seigneur infant y laissoit aller tous ceulx qui vouloient aller/ lesquelz me respondirent que ouy en faisant de deux choses l’une La premiere que celuy qui y vouldroit aller & armer la caravelle a ses despens en retournant la marchandise il seroit obligé a payer par droit de coustume audict seigneur la quarte partie de toutes les choses que ilz aporteroient desdictz lieux & terre & les autres trois parties seroient a lui La .ii. ou que ledict seigneur armeroit ladicte caravele a ses despens/ & au retour d’icelle iceluy seigneur prendroit la moytié de tout ce qui seroit dedans. Et au cas que ladicte caravelle retournast vuide/ tous les despens tomberoient au dommaige dudict seigneur/ et cecy nous fut declairay qu’on ne s’en povoit retourner sans faire grans gaingz & que si aulcun de nostre nation y vouloit aller ledict seigneur l’avoit tresagreable/ & luy donneroit toute faveur/ pource qu’il presumoit que esditz pays se descouvreroit l’espicerie et aultres bonnes choses et les venitiens en estoient plus congnoissans que autre nation Lesquelles choses ouyes par moy/ me deliberay de aller avec les dessusdictz pour parler audit seigneur infant/ ce que je feis/ et pour abreger il me conferma tout ce que lesditz messaigiers avoient dit estre vray en me promettant que se je y vouloye aller de me faire tous les plaisirs et proffitz qu’il luy seroit possible Lesquelles choses par moy ouyes me voyent jeune & bien disposé pour soustenir toutes fatigures & labeurs et desirant de veoir le monde et choses que jamais aucun de nostre nation n’avoit veues/ esperant aussi que pour m’y en aller acquesteroye honneur & prouffit deliberay du tout d’y vouloir aler & apres que je fus informé de la marchandise & choses qui m’estoient necessaires/ m’en revins a nostre galee/ & consigné toutes mes choses que je avoye pour le present a ung mien parent acheptay des choses estans en ladicte galee lesquelles je veis m’estre necessaires pour faire mondit voyage/ et ainsi descendy en terre/ et lesdictes galees suivirent leur voyage.

¶ Le temps que partirent les caravelles et ausquelz vens ilz naviguerent.

Chapitre .iii.

¶ Moy estant demouré en la maniere dessusdicte au chief de sainct Vincent/ ledit seigneur infant eut grant joye de ma demourance/ et si me fist grant feste Et depuis plusieurs jours il me fist armer une caravelle qui portoit environ quatre vingtz neuf botes de laquelle estoit patron Vincent dies natif de lagus/ qui est ung lieu apres ledit chef de sainct Vincent a quatre lieues/ et icelle caravelle fournie de toutes choses necessaires pour nostre voyage avec l’aide de dieu et en bonne adventure partismes dudict chef sainct Vincent le .xii. jour de mars Mil quatre cens cinquante cinq/ avec ung vent grec et la transmontane en poupe/ en dressant nostre chemin vers l’isle de la madere en allant a la carte de Garbin vers ponent a la voye droicte le .xxv. jour dudit moys arrivasmes a l’isle du port sainct environ le mydy qui est distant dudict chef sainct Vincent environ six vingtz lieues.

¶ De l’isle du port sainct avec la description des choses qui y naissent et mesmement du sang de dragon en quelle maniere il se faict.

Chapitre .iiii.

Ceste isle de port sainct est bien petit de chose/ et a de tour environ cinq lieues/ & a esté trouvé depuis .xxvii. ans en ça de par les caravelles dudict seigneur infant/ et l’a faicte habiter de portugalois & jamais au paravant n’avoit esté habitee/ & d’icelle est gouverneur barthelemy pastoureau homme dudict seigneur. Ceste isle porte froment & autres blez pour son usage/ elle est habondante de chair qu’on mengeue & de pourceaulx sauvages & de infiniz congnins/ et en icelle se trouve le sang de dragon lequel naist de aucuns arbres qui y sont lequel sang est une gomme que boutent lesdictz arbres en certain temps de l’an/ & se tire en ceste maniere les habitans de ladicte isle frappent aucuns coups d’une cognee au pied des arbres en faisant des taillades & l’an ensuivant dedans certain temps lesdictes taillades boutent une gomme/ laquelle on cuist & la purge l’on/ & ainsi se faict le sang & lesdictz arbres produisent ung certain fruit qui au moys de mars est meur & est tresbon a menger. & a la similitude de cerises mais il est jaulne & notez que a l’entour de ladicte isle se trouve de grandes pescheries de dorades vielles et autres bons poissons/ ceste isle n’a point de port mais elle a bon stage couverte de tous vens sauf que du levant & seroch/ & de ostro & seroch avec telz vens on n’y seroit pas bien asseuré/ du demourant on y est bien mais qu’il y ait ung bon gouverneur. Ceste dicte isle a a nom port sainct et faict le meilleur miel que je croy qui soit au monde et cire en grande quantité.

¶ De moncrich port de l’isle de la madere.

Chapitre .v.

En apres le .xxvii. dudict moys de mars partismes de ladicte isle de port saint/ & en iceluy mesme jour arrivasmes a moncrich qui est ung des portz de la madere laquelle est distante de celle de ce port sainct de dix lieues/ & avec ung temps cler se voyent l’ung l’autre.

¶ De l’isle de madere et en quelle maniere elle fut premierement habitee et de sa fertilité.

Chapitre .vi.

Ceste isle de madere depuis .xxiiii. ans en ça l’a faicte habiter le devant dit seigneur infant des propres portugallois et jamais au paravant n’avoit esté habitee. Et d’icelle a faict gouverneur deux de ses chevaliers/ desquelz l’ung a nom tristant scera et l’autre s’apelle jehan gouzailles et cestuy tient l’autre moytié du costé de fouzalle/ & s’apelle l’isle de madere qui vault a dire l’isle de bois pource que quant premierement elle fut trouvee par les gens dudict seigneur il n’y avoit une seulle paulme de terre qu’il ne fust plaine de grans boys/ et fut necessaire a ceulx qui premierement y voulurent habiter qu’ilz y missent le feu lequel par un temps alla par ladicte isle ardant & fut si grant que ledit jehan gouzale qui alors se y tenoit fut contraint sa femme/ ses enfans & a tous autres qui estoient fuyr la fureur dudict feu/ & eulx mettre en l’eaue dans la mer/ en laquelle ilz estoient jusques a la gorge & y furent .ii. jours & .ii. nuitz sans menger ne boire ou autrement ilz eussent esté mors en apres que ledict feu eut bruslé beaucop dudit bois ilz firent labourer la terre Ceste isle est habitee de .iiii. pars. la premiere partie se appelle Moncrich la .ii. saincte Croix. la .iii. la Fouzalle la .iiii. chambre des eufz/ et combien qu’elle ait autre habitacion ceulx icy pourtant sont les principalles/ & pourra faire environ .viii. cens hommes pour tout/ desquelz en sera cent a cheval Ladicte isle a de tour dix lieux elle n’a aucun port ferme mais tresbons stages/ & a pays tresfructueux & habondant & posé qu’elle soit pleine de montaignes comme est la Cicille neantmoins il pevent cueillir .ccc. miliers de froment aucunesfois plus aucunesfois moins. au commencement la terre souloit rendre .lx. & .lxx. & pour le present elle est reduicte a .xxx. & .xl. pource que la terre en la labourant de jour en jour elle se amoindrist de porter/ le pays est copieux d’eau de fontaines gentilles/ & a environ huit petis fleuves non trop grans qui traversent ladicte isle sur lesquelz fleuvez sont faictes aucunes siez qui continuellement ouvrent en boys & font des tables de beaucoup de sortes lesquelles fournissent tout portugal & autres lieux desquelles tables je fois estime de .ii. sortes l’une est de cedre qui a grant odeur & semblable au cipres & s’en faict tables larges et longues et cassez & autres ouvrages l’autre sorte si est de nassus. Nassus est ung arbre qui s’appelle en ceste sorte & a proprement parler c’est yf/ de quoy on fait les arcs/ lesquelz sont de couleur de rose. En ceste isle pource qu’elle est ainsi baignee de plusieurs eaues ledict seigneur a fait mettre une grande quantité de cannes lesquelles portent le sucre et font la quantité de .ccc. quintaux de une cuycte/ & par cecy je puis comprendre que pour le temps advenir il s’en fera beaucoup plus pource que c’est un pays moult convenant a faire celle chose/ car l’air y est chault & jamais n’y fait froit/ & pource qu’elle est habondante en eaues il s’i faict beaucoup de confitures/ et s’i faict cire/ & miel/ mais nonpas en quantité et s’i faict des vins selon l’habitation nouvelle. Et se naviguent lesdictz vins/ lesquelz sont de plante de malvoisie que ledit seigneur infant envoya querre en candie & rendent assez bien pour le pays estre ainsi bon/ les vignes produisent plus raisins que fueilles & les grappes sont tresgrandes environ de .iiii. paulmes qui est la plus belle chose du monde qu’on sçauroit veoir & y a aussi des raisins noirs de pergolie sans aucuns grains & sont en toute perfection & en ladicte isle se faict des arcs d’if tresbeaulx/ et bons/ l’on en navigue en ponent et s’en faict de tresbeaux arbiers d’arbalestre il se trouve en ladicte isle paons sauvaiges desquelz en y a de blancz et perdrix et aultre sauvagine n’ont fors qu’il y a force porcz sauvaiges aux montaignes. Et ay ouy dire aux hommes de ladicte isle dignes de foy/ que au commencement se trouvoit grande habondance de coulons/ et encores en y a il/ lesquelz on prenoit en ceste façon on mettoit au bout d’ung baston une corde en façon d’ung laz & on mettoit ladicte corde dans le col d’ung coulon/ et en ceste façon on le tiroit des arbres & le coulon n’avoit point de paour & c’estoit pource qu’il ne congnoissoit quelle chose fust l’homme/ et n’avoyent point de coustume d’estre en ceste sorte chassez et vous le povez croire pource que en une autre ysle nouvellement trouvee ay ouy dire qu’il a esté fait le semblable & est ladicte ysle habondante de chair & sont en icelle beaucop de riches gens selon le pays pource que c’est tout ung jardin et ce qu’ilz recueillent en ladicte ysle c’est or. En cestedicte ysle y a des monasteres de freres mineurs observarins & des hommes de tressaincte vie et ay ouy dire a hommes dignes de foy y avoir veu les raisins meurs a la sepmaine saincte.

¶ Des canaries qui sont dix isles avec leurs noms.

Chapitre .vii.

Nous partismes de la dessusdicte isle de la madere suyvant nostre chemin par la voye de ostro/ pervenimes aux isles des canaries qui sont distantes a ladicte isle de la madere environ .lxiii. lieux desdictes isles canaries sont .vii. habitees et trois desertes/ les habitees sont deux icy. La premiere a nom lauzarette. La seconde forte venture. La tierce grancamaria La quarte teneriffe La quinte guiemere La sixiesme la palme. La septiesme le fer en notant que ses sept isles les quatre sont habitees de crestiens C’estassavoir lauzarete forte venture cité Giemere ou voirement la gomere et le fer et les aultres troys sont de ydolatres le seigneur de toutes ces ysles habitez de crestiens se nomme Ferrare & est gentil homme et chevalier natif de la cité de sebille & est subjet au roy d’espaigne/ le vivre des crestiens cy est pain d’orge & chair et laict ilz en ont assez/ et principalement de chievre ilz n’ont gueres de vin ne point de forment si d’autre part ne leur est porté ilz ont eu peu de fruitz et quasi autres choses bonnes n’ont il en sesdictes isles se trouvent habondance d’asnes sauvages speciallement en l’isle du fer & sont lesdictes ysles loingtaines l’une de l’autre de dix ou douze lieues/ toutes sont a la fille l’une apres l’autre et se garde la premiere avec la derniere comme le levant et ponent.

¶ Des choses qui naissent dedans lesdictes canaries.

Chapitre .viii.

Il se tire de cesdictes isles des canariens grande quantité d’une herbe qui s’appelle oricelle/ De laquelle herbe on tainct les draps/ laquelle arrive en cades au fleuve de sibillia et dela se navigue par levant et par ponent/ il s’en tire aussi bonne quantité de cordouans qui sont gros & en toute perfection/ et du suyf assés et encores de bons fromages/ les habitans de ces quatre isles de crestiens sont purs canaries et sont differens de langaige & peu se entendent l’ung l’autre/ lesquelles isles n’ont aulcun lieu muré/ sauf les villaiges/ mais ilz se sont retirez es montaignes pource qu’elles sont tresgrandes et haultes/ & y a des passages si fors que tout le monde ne sçauroit prendre fors que par siege/ & la rotundité desdictes quatre isles n’ont gueres moins de .xxv. lieues et les aultres trois isles habitez de ydolatres sont plus grandes et beaucoup mieulx habitees & specialement les deux/ c’estassavoir la grande canarie qui fait environ .viii. mille ames et teneriffe qui est la plusgrande de toutes fait environ .xv. mille ames la palme fait peu de gens/ et a veoir c’est une tresbelle ysle Et notez que ces trois ysles pource qu’elles sont bien habitees elles ont beaucop de gens de deffence & aussi qu’il y a montaignes treshaultes & lieux perilleux & fors ne peurent jamais estre subjuguez des crestiens Et de teneriffe qui est la plus habitee et d’en faire mencion. Car c’est la plus haulte ysle du monde et a mon jugement en temps cler l’on la peult veoir de .lx. ou .lxx. lieues D’espaigne pource qu’il y a une poincte au meilleu de ladicte ysle en maniere d’ung dyament/ qui est treshaulte et continuellement art. Et cecy se peut entendre des cretiens qui ont esté prins en ladicte isle/ et afferment ladicte poincte estre haulte depuis le pié jusques a la cime de .xv. lieues de portugal qui sont .xxv. lieues des nostres. En cestedicte isle entre eulx ilz ont .lx. seigneurs appellez ducz/ ilz ne sont pas seigneurs par nature comme succede le filz au pere/ mais qui peut est seigneur/ et font aucuneffois entre eulx guerre et se tuent comme bestes/ pource qu’ilz n’ont point autres armes que pierres et massues en maniere d’ung dard. Et aucuns y mettent une corne aguisee en maniere de fer/ et avec cela ilz frappent pource qu’ilz n’ont point de fer ny armes & vont tousjours nudz fors que aucuns se mettent une peau de chievre l’une devant et l’autre derriere & oignent leur chair du sain de bouc composé avec le justz de aulcunes herbes pource que cela engresse leur peau et deffend du froit combien qu’il y face peu de froit/ pource qu’il est vers le midy/ ilz n’ont maisons ny de muraille ny de paille ilz demourent es grotes ou es cavernes de la montaigne/ ilz vivent d’orge/ de chair/ de laict de chievre/ ilz ont habondance de aucuns fruitz speciallement de figues/ ilz recueillent leur blé des le moys de mars et de apvril/ ilz n’ont point de foy ny congnoissent dieu/ mais les aucuns adorent le soleil les autres la lune & les autres les planettes/ et ont nouvelles fantasies de ydolatrie les femmes ne sont communes mais est licite de sçavoir a chascun d’en prendre autant qu’il en veult et ne prendroyent point nulle femme vierge se premierement elle ne avoit dormy avec sondict seigneur une nuyt et cela le reputent pour grant honneur. Et si vous disiés dont sçavez vous telles choses vous sera respondu que les habitans des quatres isles crestiennes ont de coustume avec aulcuns de leurs festes de venir a cesdictes isles de nuyt pour assaillir ces canariens ydolatres & aulcuneffois y prennent des masles et des femelles et puis apres envoyent en espaigne a vendre pour esclaves/ et entrevient aulcuneffois qu’il en demoure de ceulx qui y vont dans lesdictes festes lesquelz lesdictz ydolatres ne font mourir/ mais leur donnent pour office de tenir les chievres et les escorcher et faire chair et cela tiennent ung tresvillain office d’estre bouchier & pour les despriser leur font faire jusques a ce qu’ilz s’en puissent resjouyr en aulcune maniere. Et cesdictz canariens ydolatres ont une autre coustume que quant aulcun de leurs seigneurs entre nouvellement en sa seigneurie aucun d’eulx se offre a mourir pour honnorer la feste/ et viennent tous a une certaine valee bien parfonde. Et apres qu’ilz ont faict aulcunes leurs cerimonies et dit aulcunes parolles celuy qui veult mourir pour ledict seigneur se gecte du hault en bas en celle vallee et se met en pieces et apres cela le seigneur demeure obligé faire honneur et donner des biens aux parens du mort. Et combien que celle coustume leur soit brute et bestialle/ touteffoys elle se afferme estre vraye Encores ces hommes canariens sont agiles & grans saulteurs et saultent de pierre en pierre deschaussez comme chevreulx & font saulx qui ne sont pas de croire/ & encores tirent une pierre si roidement qu’ilz en donnent la ou ilz veulent/ ilz ont ung bras si fort qu’ilz mettent ung bouclier en piece. La progenie de ces gens icy se depingent sur leur peau/ aussi bien les masles comme les fumelles d’aucun just d’herbes verdes & jaulnes & tiennent que semblables couleurs soit une belle devise/ comme nous faisons de beaulx habillemens. Esquelles isles de canariens moy loys dessusdit fus en deux d’icelles : c’estassavoir en l’isle de gomere/ et en celle du fer qui sont des crestiens Aussi fus a l’isle de la paulme mais en ceste la je n’y descendy point pour faire nostre voyage.

¶ La description du chef blanc avec les isles plus prochaines.

Chapitre .ix.

Nous partismes de ceste isle en navigant toute la voye par ostro vers l’ethiope/ et arrivasmes en peu de jours au chief blanc lequel est distant de ceste isle de Canarie environ cent quatre vingtz lieues. Et est a noter que en partant de ladicte isle pour venir vers le chef blanc on coustoye la riviere de l’affricque. Car en allant par ostro on s’en vient demourer a la main gauche combien que l’homme aille courant au large et n’a point de vent de terre pource que ladicte isle des canariens est dessoubz ladicte coste en la mer vers le ponent auquel va l’homme courant au large de terre jusques a ce qu’il ait passé a tout le moins les deux tiers du chemin qui est de ladicte isle jusques audit chef blanc et puis apres on se destourne a main gauche avec la coste jusques a ce qu’on ait veu terre pour passer non ledict chef blanc sans le recongnoistre pource que oultre ledict chef ne se voit terre aulcune jusques au grant chemin plus avant & se mect la coste dans ledict chef et faict ung goulfe qui s’appelle la forme d’argin lequel nom D’argin descend de une isle qui est mise dans ledit goulfe laquelle est appellee par ceulx du pays argin et entre dans ledict goulfe plus de douze lieues & demye et y a la encores trois isles lesquelles par les portugalois ont esté nommez/ c’estassavoir l’une blanche pource qu’elle est areneuse/ l’autre la garze pource que ceulx qui premierement la trouverent ce furent lesdictz portugalois y trouverent si grant multitude de ces oyseaulx marins que ilz en chargerent deux barches de leurs caravelles La troiziesme isle apellee est l’isle des cuyrs/ lesquelles trois isles sont petites areneuses et non habitees et en celle d’argin se trouve assez d’eaue doulce et aux aultres non. Et est a noter que l’homme en partant hors de l’estroict de gilberterre/ pour venir vers ceste Ethiope ne trouve aulcune habitation de barbares jusques au chief de chantin/ et dudict chef toutesfois par ladicte coste vers ledit chef blanc se commencent les terres areneuses qui est le desert qui confine a la partie de la transmontane avec les montaignes/ lequel ferme ceste nostre barbarie deça de Thunes et de tous ces lieux de la coste lesquelles montaignes lesdictz barbares appellent Sarra & de la part ostro ledit desert se confine avec les mores de la ethiope basse/ & est tresgrant desert qui dure a traverser a ung bon chevaucheur cinquante ou soixante journees et est en aucuns lieux moindre ou plus grant & cestuy desert vient boyre sur la mer occeane de la coste laquelle est toute areneuse et blanche et seiche et est terre blanche toute esgalle et ne se monstre point estre plus hault en ung lieu qu’a l’autre jusques audict chef blanc pour autant que les portugaloys qui premierement la trouverent veirent qu’ilz estoient areneux & blancs & sans signe d’erbe ne d’arbres/ aulcuns l’appellent le chef blanc & est ung tresbeau chef pour estre en triangule. C’estassavoir en visaige et fait trois bouches larges loingtaines l’une de l’autre environ demye lieue En toute ceste coste se trouvent tresgrandes pescheries de divers et tresbons poissons & grans a la semblance des nostres que avons de deça et aussi d’aultre maniere. Audict goulfe d’argin par tout y a peu d’eaue et y sont aulcunes secques de sablon et aultres de pierre.

Vous qui lirez ce present livre quant desormais trouverez secques/ entendez que secques c’est ung roc qui est dedans la mer lequel est couvert de bien peue d’eau/ & est une chose dangereuse pour lez navires/ car si elles y heurtent elle se rompent et la est la mer et y a grans cours d’eaue par lequel on ne navigue point que de jour en tastant si l’eaue est parfonde & avec l’ordre de ladicte eaue/ pource qu’en cedit goulfe se rompirent deux navires sur lesdictes secques. Et est assavoir que cestuy chef de Chantin se garde avec ledit chef blanc vers ostro & la transmontane & est de sçavoir que derriere icelluy chef blanc dedans la terre est un lieu apellé par nom Hoden/ et y a jusques la six journees de chameau/ lequel lieu n’est point muré/ mais est habité des arrabes et y a port ou arrivent les caravannes qui viennent de Tambutu et d’autres lieux des mores qui veulent venir a nostre barbarie de deça et les vivres des habitans de ce lieu la si est de datiles & orge desquelz ilz en ont aulcunement/ mais non pas a souffisance/ et boyvent laict de chameaulx & des autres bestes pource qu’ilz n’ont point de vin ilz ont aussi des vaches et chievres mais non pas trop pource que la terre est seiche et y a des beufz et vaches mais petiz au regard des nostres. Ces gens icy tiennent la loy de macommet & sont tresennemys de jhesucrist et jamais ne sont fermes & vont tousjours vagans par iceulx desers Ce sont hommes qui vont aux terres des mores et viennent aussi a nostre Barbarie de deça et sont aucuns de bonne generation Et ont grande habondance de Chameaulx et avec iceulx ilz conduisent leur marchandise et argent de la Barbarie et aultres choses a Tambutu et autres terres desdictz Mores. Et dela ilz tirent l’or et graine de Paradis que ilz admenent de deça. Et sont hommes bruns & vestent aulcunes petites cappes sur la chair avec une tresse rouge sur le chef et ainsi se habillent leurs femmes sans chemise. Les hommes portent en leurs testes ung couvrechef a la façon Moresque & vont tousjours deschaulx. En ces lieux la areneux tousjours se trouve des Lyons Leopardz/ et des oeufz d’austruche Desquelz ay mengé plusieurs foys et sont bons. Et encores est de sçavoir que ledict seigneur de Portugal a faict de ceste isle D’argin ung repaire pour les crestiens en ceste maniere que nul ne peult entrer dedans ledict Goulfe pour marchander avec les dessusditz arrabes fors ceulx qui ont leur repaire en ladicte isle d’argin & y tiennent continuellement leurs facteurs qui achaptent et vendent avecques lesdictz arrabes qui viennent a la marine en faisant marchandises de diverses choses/ comme de draps/ toilles/ argent. tapiz/ & aultres choses et sur tout forment/ & pource qu’ilz sont tousjours affamez ilz donnent a l’encontre des esclaves noirs. A ceste cause ledict seigneur infant a faict faire ung chasteau en ladicte isle D’argin pour conserver a perpetuité telz traffigues et pour icelle occasion les caravelles de portugal tout l’an vont et viennent a ladicte isle D’argin sesdictz arrabes d’avantaige ilz ont beaucoup de chevaulx barbarisques desquelz ilz font marchandise et les conduisent es terres des mores et les vendent aux seigneurs lesquelz leur donnent a l’encontre des esclaves/ ilz conduisent semblablement aux terres desditz mores ouvraiges de soye moresque qui se font en Grenate et a thunes de barbarie/ et aussi y conduisent argent et beaucop d’aultres choses a l’encontre desquelles ilz ont des esclaves et de l’or lesquelz arrivent audit port et lieu de hoden et de la se partirent et une partie s’en va aux montaignes de Barche et de la arrivent en sicille/ et une autre partie se conduit a cestuy lieu de argin et les vendent aux portugallois qui y ont leur repaire en maniere que chascun an s’en tire par lesditz portugallois plus de mil esclaves vous declairant que cestuy traffigue a esté ordonné depuis ung peu de temps en ça/ car ceulx de portugal qui souloient venir avecques leurs caravelles en cedit goulfe D’argin descendoient en terre de nuyct et assailloient aulcuns villaiges de pescheurs et encores couroient par la terre en maniere qu’ilz prenoient desdictz arabes aussi bien masles que femelles et les menoyent a Portugal pour vendre et ainsi le faisoient par l’autre costé et plus avant que tient ledict chef blanc jusques au fleuve de senega lequel est ung grant fleuve et depart une generation qui s’appelle azenaghi du premier royaulme des mores lesquelz azenaghi sont hommes grisastres et si sont plus bruns que grisastres et habitent en aucuns lieux de ladicte coste qui est oultre le chef blanc et iceulx arrabes par le desert se confinent audit hoden & vivent semblablement de dates orges et laict de chameaulx/ mais ceulx qui sont plus pres de la terre desdictz mores vivent de millet et d’aultres legumes Ce sont hommes de peu de viande car en ayant ung peu de farine d’orge moullue ilz se maintiendront frais tout ung jour & ne sont point gens de provision parquoy bien souvent les portugalois en prenoient et les vendoient pour esclaves & iceulx icy sont meilleurs esclaves que ne sont pas les mores/ mais quoy que ce soit depuis ung bien peu de temps en ça tout s’est reduict a paix et au faict de la marchandise & ne permet ledit seigneur infant qu’a nulluy d’eulx soit faict aucun dommaige pource qu’il espere en conversant les crestiens avec eulx on les pourroit remettre a nostre foy pource qu’ilz ne sont pas bien fermes en la foy machometane/ car ce qu’ilz en ont ilz ne l’ont que par ouy dire. Et est a noter que ceulx icy azenagi ont une coustume bien estrange pource que continuellement ilz portent ung couvrechief alentour de la teste qui leur vient a travers du visaige et leur couvre la bouche et partie du nez et disent que la bouche est une brute chose qui continuellement rend aulcune ventosité et mauvaise odeur et pourtant elle se doit tenir couvert en la voullant comparer au ciel et que ses deux parties se veullent couvrir et est vray qu’ilz ne descouvrent jamais leur bouche sinon quant ilz mengent/ j’en ay veu plusieurs mais jamais je ne les veiz que ilz n’eussent leurs bouches cachees sinon quant ilz mengent/ Entre eulx ilz n’ont point de seigneur fors ceulx qui sont les plus riches sont aucunement des autres plus honnorez et obeiz/ toutesfoys ilz sont povres gens et mensongiers larrons plus que gens de tout le monde & grans traistres et sont hommes de commune grandeur mais ilz sont maigres et portent leurs cheveulx pendans sur l’espaule a la maniere d’allemens Mais ilz ont les cheveulx noirs & oignent tous les jours leurs cheveulx avec la gresse de poisson et fleurent tresmal & cela ilz ont par grande gentillesse.

¶ Commutation de sel pour autant d’or et le long chemin qu’il fault faire pour aller querir/ et la longue distance.

Chapitre .x.

Si ont ilz encores de coustume qui est a priser que leurs femmes soyent grasses et que sur tout elles ayent grandes tettes et pour cela quant elles sont en l’aage de .xvii. ans ou environ ilz leurs rompent les tettes par la moytié par force avec une corde en maniere que elle leur viennent pendillant/ en bas/ et ainsi qu’elles enfantent elles le font une autreffois parquoy elles sont treslongues c’est une chose tresabhominable a veoir. Et est assavoir que jamais n’avoyent eu notice d’aultres crestiens que desditz portugaloys/ lesquelz leur firent guerre par l’espace de quatorze ans ou environ en prenant plusieurs de leurs comme j’ay devant dit et les vendoyent pour esclaves vous certifiant que quant ces gens icy eurent la premiere veue des voilles ou navires sur la mer jamais au paradvant eulx ny leurs predecesseurs n’en avoyent veu et croyoyent que ce feussent grans oyseaulx ayans aesles blanches qui vollassent/ et fussent venuz d’aucun estrange pays et fussent la arrivez & apres que lesdictz Portugalois abbaissoyent leurs voilles pour descendre a leurs rivages aulcuns d’eulx pensoyent que desdictes caravelles feussent poissons en les voyant de loing et aulcuns disoyent que c’estoient fantosmes qui alloyent de nuyt et avoient tresgrant paour et c’estoit pource que les caravelles se trouvoient en peu d’espace de temps en plusieurs lieux et estoyent assaillis des hommes qui estoyent dedans/ et mesmement de nuyt/ et aulcuneffois faisoyent leurs assaulx a .xxv. lieues loing l’ung l’autre/ & aucuneffois moins selon qu’il estoit ordonné entre eulx mariniers Et aussi ainsi que les vens les servoyent aucuneffois plustost ça/ plustost la et disoyent entre eulx si ces gens icy estoyent creatures humaines comment pourroyent ilz faire tant de chemin en une nuyct que nous ne sçaurions faire en trois Ilz n’entendoient point la maniere de naviguer parquoy du tout tenoyent que ce fussent fantosmes et de cecy j’ay esté certifié par plusieurs portugalois lesquelz en ce temps la pratiquoient iceulx rivaiges avec leurs caravelles & semblablement de ceulx qui avoyent esté prins en ce temps la par lesditz portugalois. Et par cecy povez considerer comme ces gens cy estoyent nouveaulx aux choses nostres quant ilz avoyent telle oppinion Sur ledict port de Edon plus avant en terre de six journees y a ung lieu qui s’appelle Tagaza qui vault a dire en nostre Langue chargeur ou se charge tresgrande quantité de sel de pierre lequel se charge chascun an avec tresgrandes caravanes de chameaulx appartenans ausdictz arrabes & Azanaghi et se devisent en plusieurs parties et passent par Tambutu & vont a melly empire des mores si vous ditz que incontinent que ledit sel est arrivé audit empire que en huyt jours il est tout vendu et se vent la charge au pris de deux cens mitigali ou .ccc. selon qu’elle est & ung mitigal vault environ ung ducat Et puis apres avec leur or ilz s’en retournent en leurs maisons Vous advisant que cestuy empire de Melchy/ si est tant chault et aussi les vivres pour les bestes ayans quatre piedz y sont si contraires que la plusgrande partie des bestes qui vont avec ycelle Caravane de cent n’en retourne pas vingt cinq. Et audict pays de Melly ilz n’ont aucunes bestes de quatre piedz/ pource qu’elles se meurent toutes & encores plusieurs desditz Arrabes et Azanaghi audict lieu y deviennent malades et les aultres y meurent/ et cecy est pour la grande chaleur Et dit l’on que de Tagaza a Tambutu y a quarante journees de cheval et de Tambutu a melly environ trente J’ay demandé ausditz arrabes et Azanaghi que font les marchans de melly de cestuy sel/ lesquelz m’ont faict responce que une petite quantité dudit sel s’en consumme entre eulx en leur pays pource que eulx qui sont soubz le meridional ou equinoctial ou continuellement est autant de jour que de nuyt ou environ auquel lieu est la plus extresme chaleur en certain temps de l’an que leur sang se pourrist par maniere que si n’estoit ledit sel ilz mourroyent La medecine que ilz font si est ceste/ ilz prennent ung petit dudit sel lequel ilz destrempent en une escuelle avecques ung petit d’eaue laquelle ilz boivent chascun jour/ et avecques cela ilz disent qu’ilz se sauvent et que la reste dudict sel ilz le mettent en pieces et les font aussi grandes comme ung homme les pourroit porter habillement sur la teste avec ung grant engin/ pource qu’ilz ont apporter grant chemin. Et est assavoir que quant ledict sel arrive audict Melly avec les chameaux il est apporté en deux pieces pource que plus facillement on charge lesdictz Chameaulx qui l’aportent. Et puis apres a Melly les Mores le rompent en plusieurs pieces pour le porter sur la teste/ Si que chascun homme en porte une piece Et ainsi se faict ung grant excercice de gens a pied qui portent ledit sel ung grant chemin. En notant que ceulx qui le portent ont deux fourches/ lesquelles quant ilz se veulent reposer ilz les fichent en terre et sur icelles ilz mettent ledict sel/ et en ceste maniere ilz le portent jusques sur une certaine eaue Laquelle on ne m’a sceu dire si elle estoit douce ou sallee pour sçavoir si c’estoit Fleuve ou mer pourtant il se tient que ce soit mer/ et convient a sesdictz mores conduire ledict sel en la maniere que dessus/ pource que ilz n’ont point de chameaulx ny aultres bestes pour charger/ pource que la ilz ne pevent vivre Et pensés combien il fault d’hommes a porter a pied ledict sel. Et combien ilz sont de gens qui le consumment par chascun an.

Alors apres que ledict sel est apporté sur ladicte eaue/ lesdictz mores de Milly tiennent ceste façon de faire. Trestous ceulx de qui est ledict sel font ung mont a ladicte fille/ et marquent chascun le sien de son seing/ et apres que ilz ont faict tout cela tous ceulx de ceste Caravane se tirent en derriere demye journee. Et puis tout cela fait il vient une aultre generation de mores qui ne se veult laisser veoir ny parler/ et viennent avecques aulcunes leurs Barcques grande/ et semble qu’ilz yssent hors de aulcunes ysles et descendent et apres que ilz ont veu le sel ilz mettent une quantité d’or a l’encontre de chascun mont/ et puis tournent en derriere en laissant trestout l’or et le sel et puis apres qu’ilz sont partis viennent les mores de melly a qui appartient le sel et si la quantité de l’or leur plaist ilz prennent l’or et laissent le sel/ et s’il ne leur plaist ilz laissent l’or avecques le sel et de rechief s’en retournent en derriere. Et puis apres viennent les aultres mores a qui appartient l’or/ et celluy mont qu’ilz trouvent sans or/ ilz le prennent et aux aultres mons ou est encore l’or ilz tournent a mettre plus d’or se leur semble ou voirement ilz levent l’or et laissent le sel et en ceste maniere ilz font leur marchandise sans veoir l’ung l’autre et parler/ et cela est par une longue et antique coustume Et combien que cecy semble chose moult estrange a le croire neantmoins je vous certifie avoir fait information avec plusieurs marchans tant D’arrabes comme de azanaghi et encores de personnes desquelz l’homme y doit adjouster foy.

¶ Comme l’empereur de melly voulut congnoistre l’ung de ces marchans.

Chapitre unziesme.

Vous serez advertis que j’ay bien voulu dire a ces marchans que je estoye esbahy comme povoit estre que l’empereur de melly qui estoit si grant seigneur des mores ainsi qu’ilz disent que il n’avoit peu trouver maniere d’entendre/ ou par amour/ ou par autre voye quelz gens estoient ceulx la qui ne se vouloyent laisser veoir ne parler/ il me fust respondu qu’il n’y avoit pas grant temps que ung Empereur de Melly se delibera du tout de en vouloir avoir quelque ung d’eulx entre ses mains. Et apres que il eut eu conseil sur ceste chose qu’il debvoit faire partir aulcuns de ses gens peu de jours avant que partist la caravane dudict sel. Et que ilz allassent jusques au lieu la ou on faict les mons dudit sel/ et quant ilz seroyent la arrivez qu’ilz fissent aulcunes fosses et cela faict qu’ilz se mussassent dedans icelles/ et quant ce viendroit que ilz viendroyent a mettre leur or aupres le mont du sel qu’ilz saillissent desdictes fosses/ et que ilz les assaillissent/ & en prinssent deux ou trois et que soubz bonne garde ilz les menassent oudict melly et pour brief parler ainsi fut faict et en prindrent quatre/ et les aultres s’en fouyrent Et d’avantaige des quatres ilz en laisserent aller troys/ et leur sembloit que l’ung d’eulx pourroit satisfaire a la voulenté dudict empereur. Et aussi que ilz ne fussent en la maulvaise grace de iceulx mores. Et a celluy qui fut prins luy fut parlé de divers langaiges de mores. Et jamais ne voulut respondre ne parler/ ne jamais ne voulut menger/ et vesquit quatre jours/ & puis apres mourut A cause dequoy les oppinions de ces Mores de Melly tiennent pour l’experience que ilz sont muetz/ & les aultres dient que ilz le font par despit Ceulx dudict Melly furent moult fort marris quant ilz virent que celluy que ilz avoyent prins estoit mort/ pource qu’ilz n’avoyent peu satisfaire a la voulenté de leur empereur qui estoit qu’il en vouloit veoir ung en vie. Et puis apres quant ilz furent retournez audict Melly ilz racompterent par ordre audit empereur le fait comme il estoit allé lequel en eut assez de desplaisir/ et leur demanda de quelle stature ilz estoyent/ ilz luy respondirent qu’ilz estoyent hommes tresnoirs et bien formez de corps/ & plus grant d’une paulme qu’ilz ne sont. Et que ilz ont la levre de dessoubz plus large de une paulme et qu’elle vient jusques sur la poictrine et est gros et rouge en monstrant par la part dedans qu’il boutoit hors le sang et la levre de dessus estoit petite comme la leur/ pour laquelle defformité de leurs levres ilz monstroient les jencives et les dens lesquelles dens ilz dient estre plus grandes que les leur or ont audictz costez deux grans dens & ont les yeulx gros & noirs qui sont terribles quant ilz regardent et que la jencive boutoit le sang ainsi comme la levre et depuis n’a esté aucun empereur qui ce soit voulu entremettre de sçavoir quelz gens ce sont pource que pour la mort de cestuy seul demourerent par trois ans qu’ilz ne voulurent oncques retourner avec leur or pour avoir du sel acoustumé. Et jugent que leurs levres se pourrissent pour estre en pays plus chault que ne sommes & pource qu’ilz n’ont peu trouver remede de leur putrefaction que par le moyen dudict sel ilz sont retournez a leur premiere coustume c’estassavoir a prendre dudit sel. Et telle est nostre oppinion qu’ilz ne pevent vivre sans le sel. mais tant a qu’il n’en chault audict seigneur infant comme la chose aille/ mais qu’il ait leur or et cecy & tout ce que j’ay entendu touchant ceste matiere et puis que tant de gens le dient nous le povons bien croire et j’en suis l’ung de ceulx la pource que j’ay veu et entendu aulcunes choses du monde & veulx croire ceste et aultres qui sont possibles Et cestuy or qui arrive a Melly en ceste maniere se devise en trois parties la premiere va avec la caravane qui tient le chemin de melly a ung lieu qui s’appelle Cochta qui est le chemin qui s’adresse vers la sorie la seconde & tierce partie vient avec une caravane de melly tambutu/ et la se partissent l’une partie s’en va a ato/ et de ce lieu la ilz se estent vers Thunes de Barbarie par toute la coste de dessus et l’autre partie vient a hodem lieu dessus nommé et la se estend vers Oran et Houa Toutesfois sont lieux de barbarie dans le destroict de Gilberterre/ et desers et Amarochos et Arzib et azare Et Amessa lieux de barbarie hors dudict estroict. Et de ces lieux icy nous aultres ytaliens et crestiens achaptons des Mores ledict or pour la diversité des marchandises que nous leur baillons. Et pour retourner a mon premier propos cecy est la meilleure chose qui se puisse tirer de ladicte terre et pays de Azanaghy et d’arabes pource que celle partie d’or qui arrive chascun an a Hodem iceulx arabes et azanaghy en portent aulcune quantité sus les rives de la mer & la vendent aux espaignolz qui continuellement sont en ladicte isle de archin traffiquer la marchandise et changer a aultres choses En ceste terre de arabes ne se baille point aulcune monnoye ne jamais n’en usent et en cesdictz autres lieux il ne se trouve point mais tout leur faict si est de changer l’une chose pour l’autre et en ceste maniere ilz vivent & est vray que j’ay entendu que dedans la terre de ces arabes & azanaghy et en leurs lieux ilz mengeussent des petis cochons blancs & je croy que a venise il y en arrivé de semblables de levant vous desclarant qu’ilz les vendent aux poix.

¶ Comment les hommes honorent les riches des habitz des femmes et de leurs armes.

Chapitre .xii.

Ces gens icy qui habitent en cestuy desert n’ont aucun roy naturel/ bien est vray que ilz recongnoissent et portent plus reverence a ung que a l’autre et ceulx qui sont riches ont plus suyte comme est en plusieurs lieux et aulcuns de ceulx icy ont suyte d’aulcunes gens mais ilz ne sont pas seigneurs les femmes de cestuy pays sont de couleur gris & portent cottes de cotton qui viennent de la terre des mores & quelc’une d’icelles portent cappettes dessus escriptes Alchisel sans porter chemise la condition de leurs armes est telle/ et est a entendre qu’ilz n’ont armes pour vestir pour eulx deffendre et n’ont pour deffence autre chose que la targe qui est d’ung cuir qui s’apelle auta qui est tresdur & pour faire mal a leurs ennemys ilz portent une lance ou javete longue & est de boys moult delie ligier avec deux ou trois dars petis en la main de une autre forme que les nostres. Toutesfoys ilz chevauchent chevaulx a la moresque mais ilz n’en ont gueres pource que le pays est trop steril parquoy ilz ne les pevent gueres maintenir/ & aussi pour la challeur ilz ne vivent pas grant temps les parties de cestuy desert sont moult chauldes et ont peu d’eaue pour laquelle chaleur il y a defaillance d’eaue/ le pays est sec et sterille. En cesdictes parties il n’y pleut que trois moys de l’an. C’estassavoir en aoust septembre & octobre encores j’ay veu en cestuy pays que en aucuns ans il y aparoist une grant quantité de locustes/ lesquelles sont comme sauterelles/ mais plusgrandes et sont rouges/ & apparoissent en l’air en si grande quantité et espesseur que au lieu la ou elles sont par elles empeschent qu’on ne peut veoir le soleil & l’air en est couvert de si grant sorte qu’il semble que ce soit terre et est chose espouentable a veoir/ et la ou elles tombent il ne demeure riens auculne chose que la terre que tout ne soit gasté d’icelles locustes/ & s’elles venoist chascun an on ne pourroit habiter audict pays/ mais il n’y viennent que en troys ou quatre ans/ et une foys que je passoye par celuy pays les veis a la marine & y en avoit ung nombre et quantité inestimable.

¶ Du fleuve de senega qui separe la terre areneuse de la fertilité.

Chapitre .xiii.

Apres que eusmes passé ledict chief blanc en le voyant nous navigasmes par nostre journee au fleuve apellé senega/ qui est le premier fleuve de la terre des mores entrant par ceste coste/ lequel fleuve divise les mores des arrabes et azanaghy et aussi en partie la terre seiche aride qui est le desert dessusdict de la terre fertile qui est pays de mores lequel fleuve est grant et large en la bouche ung petit plus demye lieue et a fons assez et faict encores une aultre bouche ung petit plus avant et faict une isle au meillieu et si met ung chef dans la mer par .ii. bouches & sus chascune d’icelles bouches et depuis icelles jusques en la mer environ demye lieue/ si faict bancs et scabelles larges en notant que audit lieu l’eaue y croist et descroist par chascun jour six heures/ c’est a dire la mer y monte et descend/ & quant elle monte elle entre dedans ledict fleuve plus de quinze lieues et cela je le sçay par information que j’ay eue des portugallois qui ont esté dedans ledit fleuve Et qui veult entrer dans ledict fleuve il luy convient aller avec le cours de l’eaue au moyen desdictz bancs et escabelles qui sont a la bouche dudict fleuve & est a noter que du chef blanc jusques a cestuy fleuve y a quatre vingtz lieues & la coste est toute areneuse jusques a bien pres de la bouche de cestuy fleuve environ dix lieues. Et s’appelle la coste de airte rotte/ laquelle touteffoys est des azanaghy et merveilleuse chose me semble que deça ledict fleuve ilz sont tresnoirs grans et gros et bien formez de corps Et tout le pays est verd et plain d’arbres et si est fertil et deça sont hommes grisastres petiz et est le pays steril et sec/ cestui fleuve on dict estre ung rameau du nil long des quattre fleuves royaulx lequel en arrousant toute la ethiope il baigne le pays comme il faict en Egipte. Car en passant par le caire par certain temps de l’an/ il baigne tout le pays d’egipte et d’avantaige ledict fleuve du nil faict d’autres rameaulx tresgros oultre celuy de senega et y tut de grans fleuves de ceste ville de ethiope plus avant s’en dira aucune chose.

¶ Des seigneurs qui regnent a la coste du chef vert.

Chapitre .xiiii.

Au pays de ces premiers mores du royaulme de senega est au commencement du premier royaume de ethiope & est toute terre basse et plusieurs peuples habitent aux rivaiges dudict fleuve de Senega lesquelz peuples se appellent gilosi Et encores plus avant en terre par grande espace est toute terre basse derriere achiarida/ et en oultre ledit fleuve sauf le chef vert/ lequel est la plus haulte terre qu’il soit en toute ceste coste elle a .lxxx. lieues oultre ledit chef vert et deça dudit chef plus de cent .lxxx. toute la coste est pleine basse. Saichez que cestuy roy de senega en mon temps se nommoit zachalin/ mais en cestuy pays il y a plusieurs petiz seigneurs lesquelz aulcunesfoys par jalousie aulcuns d’eulx se adcordent et font ung roy a leur plaisir/ mais toutesfoys il fault qu’il soit de parens nobles. Lequel roy dure autant qu’il plaist ausdictz seigneurs et plusieurs foys se faict le roy puissant et se deffet d’eulx souffise vous que cest estat n’est pas ferme ainsi comme celuy de babiloine et demoure tousjours en souspeçon d’estre mis hors et devez sçavoir que cestuy roy et les seigneurs sont gens bien povres et en leur pays n’y a aucune cité/ ains des villaiges avec maisons de paille et non point de chaulx pour faire des murs et ont grande deffaillance de pierre & si est ung trespetit pays/ par ce que la coste de la marine n’a que cinquante lieues et dans la terre il y en peut avoir environ autant par l’information que j’ay eue est de semblable largeur Le vivre de cestuy roy si est tel il n’a point de revenu certain fors celuy que luy donnent chascun an les seigneurs de ce pays la pour estre bien avec luy et le present que luy font lesdictz seigneurs est de aulcuns chevaulx lesquelz sont la beaucop prisez pource qu’il en y a deffaillante et luy donnent aussi quelques bestes comme vaches et chevres et aussi des legumes et miel et semblables choses maintiennent cestuy roy avecques aultres pilleries que il faict. C’estassavoir il faict desrober plusieurs esclaves aussi bien en son pays comme au pays de ses voisins lesquelz il faict labourer la terre en aucunes possessions a luy deputees Encores plusieurs d’iceulx Esclaves il les vent aux marchans de azanaghi qui arrivent la avec chevaulx ne aultres choses Et aussi en vent aux crestiens depuis qu’ilz ont commencé a traicter de la marchandise avec lesditz mores a cestuy roy est licite d’avoir autant de femmes qu’il en veult et aussi a tous les seigneurs & hommes de celuy pays mais qu’ilz soyent puissans pour faire les despens/ & cestuy roy en a tousjours trente & faict reverence a l’une plus que a l’autre selon la personne dont elle est descendue aussi cestuy roy tient ceste maniere de vivre avecques sesdictes femmes il a certains villages et lieux et en aucun d’iceulx il en tient huit ou dix. Et chascune demeure en sa maison a par soy & chascune a certaines chamberieres jeunes qui les servent et ont des esclaves lesquelz labourent certaines possessions et terres a elles consignees par leur seigneur et ont certaine quantité de bestial comme vaches chievres pour leur usaige avec ceste maniere de femmes de cestuy roi vivent/ elles font semer/ et gouverner par lesditz esclaves le bestial et vivent de cela et quant le roy va a aucuns desdictz villages il va a la maison de aucune de ses femmes lesquelles sont obligees du revenu qu’elles ont de faire les despens au roy et a tous ceulx qu’il mene avecques luy & chacun au matin au lever du soleil chascune de ses femmes font apprester trois ou quatre sortes de diverses viandes et chair et poisson et d’aultres viandes moresques selon leurs coustumes/ et les envoyent par leurs esclaves presenter a la maison de la despence dudit seigneur en maniere que en une heure il se trouve en point .xl. ou cinquante mes de viandes quant vient l’heure que le seigneur veut manger il prent pour luy ce qu’il luy plaist. Et la reste il la faict donner aux siens qui sont venuz avec luy. Mais jamais il ne donne a menger a ses gens en habondance & tousjours ont faim En ceste maniere il va de lieu en lieu & vit sans avoir pensement de aulcune chose pour son manger et coucher. Aucuneffois il couche avec l’une/ et aulcuneffois avec l’autre de sesdictes femmes/ et croist en moult gran nombre d’enfans par ce que des ce que l’une de ces femmes est grosse il la laisse & par ceste mesme maniere vivent les aultres seigneurs de ce pays la.

¶ De l’habit des mores et de leur loy.

Chapitre .xv.

La foy de ces premiers mores est de macommet/ mais pourtant ilz ne sont pas si fermes en ladicte loy comme sont les mores blancz/ & mesmement le menu peuple/ mais neantmoins les seigneurs tiennent la loy dudit Macommet/ pource tiennent avecques eulx aulcuns prebstres de Azanaghi ou voirement des Arrabes/ Lesquelz donnent aulcuns enseignemens a iceulx seigneurs des mores touchant ladicte loy machometaine. En leur disant que ce seroit grant honte estre seigneur et vivre sans aucune foy de dieu & faire comme faict son menu peuple lequel vit sans loy Et pour ceste raison pour non avoir eu jamais conversation aultre que avec ceulx desditz Azanaghi ou voirement d’aucuns Arrabes ilz sont convertis a ladicte loy de Macommet/ mais depuis qu’ilz ont eu conversation avec les crestiens ilz y croyent moins pource que noz coustumes leur plaisent/ et d’avantaige en voyant noz richesses/ nostre engin qui est plus proffitable que le leur ilz dient que celui dieu qui nous a donné tant de bonnes choses monstre ung signe de grant amour avec nous parquoy ne peut estre que il ne nous ait donné une bonne loy Mais que neantmoins leur loy est de dieu/ et que en icelle on se peult sauver sicomme nous povons faire en la nostre Le vestement de ceste gent il ne s’en fault gueres que continuellement ilz ne aillent tous nudz sauf qu’ilz portent ung cuir de chievre faict en maniere d’une braye/ avec lequel ilz couvrent leurs choses honteuses/ mais les seigneurs qui sont plus puissans vestent chemises de coston pource que en iceluy pays y croist du coston assez & leurs femmes en fillent et en font des draps larges de deux paulmes & ne les sçavent faire plus larges pource que ilz n’ont point les pignes desquelz les tisserans usent quant ilz battent les toilles en les faisant & ainsi ilz cousent ensemble quatre ou cinq de telz draps et en font leur chemises larges et courtes jusques a la moityé de la cuisse et les manches sont larges et courtes jusques a la moytié du bras. Encores ilz usent d’aucunes brayes faictes de coston et s’en habillent par le travers et sont longues jusques au col du pied et sont moult larges & si est la laine si subtille que ung homme en mettroit en sa bouche trente ou trente cinq aulnes/ et jusques au .xl. Et quant ilz s’en sont ceincts par le travers cela fait beaucoup de plis a cause de la grande largeur et longueur. Et vient a faire ung sac devant et l’autre derriere et vient pendre jusques a terre/ et faict une queue et a veoir cela c’est la chose la plus contrefaicte du monde pource qu’ilz vont au moyen de ladicte queue avec les jambes larges. Et ilz demandoient a nous aultres si jamais nous avions veu ung plus beau habit que ceulx la/ et tiennent de certain que en leur pays soit la plus belle forme d’abillemens du monde et leurs femmes vont toutes descouvertes au dessus de la sceinture soyent elles mariees comme non mariees. Et au dessoubz de la ceinture portent ung linceul faict de coston tainct au travers qui leur joinct jusques a la moytié de la jambe & tousjours vont deschaulx aussi bien masles comme femelles ilz ne portent riens en leur teste et de leurs cheveulx ilz font aucunes tresses polies & liez en diverses manieres aussi bien les hommes comme les femmes & sachez que les hommes de ce pays la font beaucoup d’ouvrages feminins comme de filler et laver draps et aultres choses/ en cestuy pays y a tousjours grande chaleur le plus grant froit qu’il y face est en febvrier et est moindre que celuy qui se faict en nostre pays D’ytalie au mois d’apvril.

¶ Comment les hommes sont netz de leurs personnes et ortz en leur vivre.

Chapitre .xvi.

Alors les hommes et les femmes de ce pays la sont netz de leurs personnes pource qu’ilz se lavent tout le corps chascun jour quatre ou cinq fois/ mais en leur vivre ilz sont tres ortz et mal netz es choses lesquelles ilz n’ont pratiquees ny acoustumees ilz y sont mal a droit/ mais en leurs choses lesquelles ilz ont acoustumees et pratiquees ilz y sont expers comme chascun de nous aultres. Ce sont hommes de beaucoup de parolles et jamais leur parler n’eust achevé et communement ilz sont tresgrans mensongiers et trompeurs/ aultrement ilz sont charitables ilz voyent voulentiers les estrangers & pour ung past ou deux ilz le donnent voulentiers sans en vouloir avoir aulcune chose.

¶ Comment les seigneurs des mores du royaulme de Gamba combatent.

Chapitre .xvii.

Ces seigneurs mores souventesfois font guerre l’ung contre l’autre Et aussi souventesfois avec leurs voisins et leurs guerres se font a pied pource que ilz ont bien peu de chevaulx car ilz n’y pevent vivre pour la grant chaleur qui y est. Armes pour leur veoir ilz n’en portent point pource qu’ilz n’en ont aulcunes mais seullement ilz ont des targes rondes et larges/ et pour combatre ilz portent de Azanaghez qui sont aucuns dardz & les gettent vistement pource qu’ilz sont grans maistres de les tirer et ont cesdictz dardz ung palme de fer labouré avec barbettes mises en diverses manieres & quant ce vient que ceulx qui les ont dedans leurs corps il leur escorche toute la chair Encore ilz portent aucuns bastons moresques a maniere d’une demye simeterre & est estroicte & sont faictes de fer sans acier pource que ces mores du royaulme de gamba ont plus de fer que les autres mores mais d’avoir de l’acier ilz n’en ont point la maniere & posé que par aventure il en acroist la ou ilz font le fer touteffois ilz n’ont point l’industrie de le habiller. Item en batailles ilz portent en esté pour armes une javeline autres armes n’ont ilz point leurs guerres sont mortelles pource qu’ilz sont desarmés & s’en tue assez & sont moult hardis & bestiaulx car ilz ayment mieulx mourir que de fuyr ilz ne s’esbahissent point de veoir leur compaignon mort ainsi comme gens acoustumez qui ne leur en chault de veoir telles choses et ne craignent riens la mort.

¶ Des grans nageurs et du royaulme de senega.

Chapitre .xviii.

Ces gens icy n’ont point de navires & depuis que le monde est monde qu’on sache n’en avoyent jamais veu/ Sinon depuis qu’ilz ont eu congnoissance des portugallois Il est bien vray que ceulx qui habitent sur cestuy fleuve de Senega et qui demouront a la marine ont aulcuns petis basteaulx qui portent trois ou quatre hommes au plus et avec ceulx la vont aucuneffois pescher et passent ledict fleuve avec iceulx et vont de lieu en lieu par iceluy fleuve et telz mores sont les plusgrans nageurs que je sache au monde pour l’experience que ay veu faire a aucuns d’eulx Selon que j’ay peu entendre et sçavoir cestuy royaulme de Senega pays de mores Premierement confine a la terre de la part du Levant avec le pays appellé Tuchuror & de la part du midy avec le royaulme de gamba pays des mores/ et du Ponent avec la mer occeane et la transmontane avec ledict fleuve de senega lequel divise les Azanaghes de ces premiers Mores Sachés qu’il y avoit environ cinq ans avant que je fasse en cestuy voyaige que cestui fleuve fut trouvé de .iiii. caravelles du seigneur infant duquel ay dessus faict mention lesquelles entrerent dedens & firent paix avec ces mores par maniere qu’ilz commençoyent a traicter marchandise avec eulx et ainsi par chascun an y avoit esté des navires jusques a la mienne allee.

¶ La marchandise que loys cadamosto contracta avec le seigneur Budomel.

Chapitre .xix.

Je passay ledict fleuve de Senega avec ma caravelle et en nageant pervins au pays de Budomel distant dudict fleuve par la coste environ .xii. lieues et demye & est ladicte coste toute basse sans aucune montaigne cestuy nom budomel est tiltre de seigneur et s’appelle la terre de budomel qui est a dire tel pays de seigneur ou voirement conté en cestuy lyeu je demouray avec ma Caravelle pour avoir notice dudit seigneur pource que j’avoye esté informé des portugalois lesquelz avec luy avoient eu affaire qu’il estoit homme de bien duquel on se povoit fier et payoit reallement ce qu’il prenoit et pource que j’avoye avec moy des chevaulx D’espaigne et aultres choses qui sont de bonne requeste au pays des mores/ nonobstant que j’eusse avec moy beaucoup de choses comme draps de laine & ouvrages de soye moresque et aultres merceries je me deliberay de faire mon faict avec cestuy seigneur & feis mettre a l’autre a ung lieu de la coste de son pays lequel s’appelle les palmes de budomel qui est demourance et non pas port. Et depuis que je fus la arrivé feis assavoir audict seigneur budomel par ung mien truchement more comme j’estoye venu avec chevaulx & autres marchandises pour l’en servir s’il en vouloit Et des ce que ledit seigneur budomel eut entendu ma venue se mist a cheval et vint a la marine avec .xv. chevaulx ou environ et cent cinquante hommes de pied et m’envoya dire qu’il me pleust descendre en terre et le aller veoir & qu’il me feroit honneur et service & pource que je sçavoye sa bonne renommee je m’en allay vers luy & si me fist grant feste et apres plusieurs parolles je luy presentay mes chevaulx et tout ce qu’il voulut de moy en me fiant de luy & me pria que je voulsisse aller par terre en sa maison qui estoit bien loingtaine environ douze lieues et que la il me payeroit & que il m’y conviendroit demourer par aucuns jours a cause des choses que luy avoie baillees en lieu desquelz il me devoit bailler cent esclaves. Je luy baillay mesdictz chevaulx avec leurs harnois et autres choses qui ne me revenoient point a plus de trois cens ducatz Parquoy me deliberay d’aller avecques luy mais avant que partisse il me donna des ce qu’il me vit une jeune garse more de l’aage de douze ans et estoit bien belle et me dist qu’il me la donnoit pour me servir en ma chambre laquelle je acceptay et l’envoyay a ma caravelle. Il est vray que mon aller par terre n’estoit pas tant seullement pour avoir mon payement/ mais aussi pour veoir et entendre aulcunes choses nouvelles de celuy pays.

¶ Comment loys de cadamosto alla par terre avec le seigneur budomel.

Chapitre .xx.

Adoncques je m’en allay par terre avec budomel & me donna chevaulx et tout ce qui m’estoit de besoing et quant nous fusmes pres de sa demourance environ deux lieues plus en ça/ il me bailla a ung sien nepveu qui s’appelloit Bisboror lequel estoit seigneur d’une petite ville en laquelle nous estions arrivez lequel nepveu me receupt en sa maison & si me fist tousjours honneur et bonne compaignie et demouray la environ vingt et huit jours et estoit au temps du moys de novembre dedans lesquelz jours allay plusieurs foys trouver ledict seigneur budomel et son nepveu estoit tousjours avec moy. Et en cestuy temps la je veis une maniere de vivre de ce pays la desquelles cy dessoubz en sera faicte aulcune mention et d’autant que j’avoye intention de veoir autant il me fut necessaire tourner en derriere par terre jusques audict fleuve de Senega pource que en ladicte coste il se mist ung maulvais temps et me fut force que se je me vouloye mettre dedans madicte caravelle que je la fisse venir jusques audit fleuve de senega/ et de m’en aller par terre. Vous advisant que entre aultres choses que je veis en ce lieu la fut que moy voulant envoyer une lettre a ceulx de ma caravelle affin de les adviser qu’ilz me vinssent prendre audict fleuve de senega & que je m’en alloye par terre je demanday aux mores dudit lieu s’il y avoit aucun d’eulx qui sceust nager et eust le courage de porter une lettre dedans madicte caravelle laquelle estoit dedans la mer environ une lieue et incontinent il y eut plusieurs qui me dirent que ouy et pource que la mer estoit grosse & aussi qu’il tiroit gros vent leur dis qu’il me sembloit quasi impossible que aulcun homme y peust nager et aller jusques a madicte caravelle/ et pource que empres terre environ ung traict d’arc il y a des bancs c’estassavoir bancs de sablon et aussi plus avant en mer a deux traictz d’arbalestre et dedans ses bancs y a si grande course d’eaue que a ceste heure elle va en sus et a ceste en bas qui estoit tresdifficille chose a aucun homme en nageant qu’il peust soustenir ladicte course d’eaue et que elle ne le menast a perdicion et aussi sus sesdictz bancs souffloit tant la mer qu’il sembloit qu’il estoit impossible de la passer et non pour cela deux desdictz mores se offrirent a moy d’y vouloir aller ausquelz demanday qu’ilz vouloient avoir pour y aller et ilz me demanderent deux maiulez d’estaing pour chascun qui est une chose qui vault chascune cinq petis blancs et apres que leur eu baillé ma lettre se mirent dedans l’eaue La difficulté qu’ilz eurent a passer ses bancs avec tant de mer je ne la pourroye compter et aucuneffois par bonne espace d’heure ilz estoient que je ne les veoye point en maniere que je jugeoye par plusieurs fois qu’ilz estoient noyez & au dernier l’ung d’eulx ne peut soustenir tous les coups que luy bailloit la mer & s’en tourna en derriere/ mais l’autre demoura fort et combatit sur lesdictz bancs environ une grosse heure/ et a la fin il passa et porta ma lettre a ceulx qui estoient dedans ma caravelle et retourna avec la responce qui me sembla chose merveilleuse/ et je conclus pour certain que ces mores la sont les meilleurs nageurs du monde Cela que j’ay peu veoir dudit seigneur budomel de ses coustumes & de sa maison fut cecy. ¶ Premierement je veis clerement combien que ceulx icy ayent nom de seigneur touteffois ilz n’ont aulcuns chasteaulx ne villes comme dessus ay dit. Le roy de cestuy royaulme n’a autre chose que villaiges et maisons de paille. Et cestuy budomel estoit seigneur d’une partie dudict royaume qui est petit & ne sont proprement seigneurs pource qu’ilz ne sont riches d’or ny d’argent par ce qu’ilz n’en ont point/ et la il ne se despend aulcune monnoye mais des cerimonies et de suyte de gens se peuvent appeller vrayement seigneurs pource que ilz ont plus grande obedience que noz seigneurs de deça et c’est sans comparaison.

¶ Des maisons et villages de budomel avec plusieurs siennes femmes.

Chapitre .xxi.

Affin que vous entendez tout Telz roys jamais ne sont fermes ilz ont aulcuns villaiges dans lesquelz ilz tiennent leurs femmes et serviteurs et au villaige la ou je fus qui se appelle sa maison y peult avoir .xl. ou .l. maisons de paille toutes pres l’une de l’autre et tout a l’entour. Et sont avironnees a l’entour de certaines hayes d’arbres gros en laissant seullement une bouche ou deux par lesquelles on y entre/ et chascune de sesdictes maisons ont une courtine serree pres desdictes hayes et aussi l’on va de courtine en courtine et de maison en maison Et ce lieu la budomel avoit neuf femmes Et aussi il en a par les aultres lieux plus ou moins selon que bon luy semble et luy est advis et chascune des femmes a cinq ou six chambrieres mores qui les servent & est licite au seigneur de dormir avec lesdictes chambrieres aussi bien qu’avecques ses femmes ausquelles ne semble estre fait injure pource que la coustume y est telle/ par cela change souvent le seigneur de past. ¶ Et iceulx mores tant masles que femelles sont moult luxurieux et le sçay par ledict seigneur budomel avec grande priere pource qu’il avoit entendu que nous autres crestiens sçavons faire plusieurs choses pour esmouvoir l’homme a luxure me fist demander se je le povoye aulcune chose enseigner par laquelle il peut contenter beaucoup de femmes qu’il me donneroit grant chose et sont iceulx seigneurs moult jaloux et ne consentent que aucun aille aux maisons ou demeurent leurs femmes que luy mesmes & de ses propres filz ne se fie & cecy je vous fais assavoir.

¶ De la compaignie de budomel et qui tousjours demeure en sa maison.

Chapitre .xxii.

Cestuy budomel a tousjours pour le moins en sa maison deux cens mores qui le suivent continuellement Bien est vray que l’ung vient et l’autre va et oultre iceulx jamais n’a deffaillance de gens qui le viennent veoir de divers lieux & a l’entree de la demourance dudit budomel/ premierement s’i trouve avant qu’il vienne au lieu ou il dort et cela se praticque jour et nuyt sept grans pavillons et de pavillon en pavillon en passe et au meillieu de chascun y a ung arbre grant affin que ceulx qui attendent en cesditz pavillons soient a l’ombre et esdictz pavillons sont partis les serviteurs dudict seigneur selon leurs personnes. c’est assavoir au premier a l’entree y a serviteurs menuz et ainsi comme plusieurs ont aproché la demourance dudict budomel croist la dignité de ceulx la qui habitent dans lesdictz pavillons jusques a la porte dudict budomel et peu d’hommes osent aprocher la porte fors les crestiens lesquelz on y laisse aller liberallement quant ilz y sont & aussi ses prestres de azanaghi lesquelz leur monstrent leur loy et a ses deux nations.

¶ Coustumes de budomel et ceulx qui les honnorent et saluent.

Chapitre .xxiii.

D’avantaige cestuy budomel leur monstroit une haultesse en ceste maniere il ne se laissoit veoir le jour fors une heure au matin et aussi vers le soir/ touteffois en cestuy temps qu’il se laissoit veoir il ne sailloit point hors de son pavillon sinon jusques a la porte de sa premiere habitation en laquelle comme j’ay dit n’y entre que lesdictes deux nations et quelque homme d’estime encore le seigneur icy quant il veult donner audience a quelc’un ceulx a qui la donne il use de grandes cerimonies quelque homme que ce soit et fusse son parent/ a l’entree de la porte du pavillon dudit budomel ilz se mettent a genoulx avec les deux jambes en inclinant la teste basse jusques a terre avec ces deux mains & mettent derriere leurs espaulles du sablon et dessus la teste & sont tous nudz & en ceste maniere ilz saluent leur seigneur car il n’y a aucuns d’eulx qui osast venir devant qu’il ne fust despouillé tout nud fors les membres honteux lesquelz ilz couvrent de cuir qu’ilz portent avec eulx pour eulx couvrir & sont en ceste maniere une grande espace de temps en se metant cestuy sablon au doz et jamais ne se levent mais s’en vont tousjours trainan par terre jusques a ce qu’ilz approchent leur seigneur et quant ilz en sont pres a .ii. pas ilz demeurent la et dient leur faict tousjours en mettant sur leur dos du sablon avec teste basse en signe de humilité et le seigneur montre semblant de ne veoir sinon escarchement et ne cesse de parler avec autres personnes & apres quant son vassal a bien dit avec une grande arrogance des sourcilz/ il luy fait une responce de deux parolles Et quant dieu seroit en terre/ a peine luy pourroit on faire plus d’honneur qu’on fait a cestuy budomel Et tout cecy me semble qu’il procede pour la grant paour que ont les hommes subgectz de cestuy budomel par ce qu’ilz ne sçauroyent si peu faillir que incontinent il ne face prendre leurs femmes & enfans & les fait vendre par ainsi sa seigneurie il se maintient en obedience & crainte de peuple pour ce qu’il fait vendre leurs femmes et enfans.

¶ De la mosquee/ c’est a dire l’eglise de budomel de leur maniere de sacrifier et de vivre.

Chapitre .xxiiii.

Pour la grande familiarité qu’avoye avec ledict budomel il me laissa entrer en la mosquee ou ilz font leurs oraisons quant ce venoit vers le soir il apelloit ses azanaghy ou arabes lesquelz il tenoit continuellement avec soy comme nous tenons noz prestres lesquelz sont ceulx qui luy aprenent la loy de macomet & avec eulx il entroit en ung certain lieu avec aucuns de ses principaulx barons & lui estant sur les piedz & aucuneffois regardant vers le ciel souventeffois se inclinoit et baisoit la terre et tout ce que faisoyent ses prestres aussi fasoit ledit seigneur budomel et les aultres qui estoyent avec luy par l’espace de demye heure Et quant ilz eurent achevé il me demanda qu’il m’en sembloit et pource qu’il avoit grant plaisir d’ouir reciter aucune chose de nostre foy il me dist que je luy en vousisse dire aulcune chose/ et je luy dis que la sienne estoit faulce et qui ceulx qui la luy monstroyent estoyent trompeurs et la avec plusieurs raisons luy monstray que sa foy estoit faulce. Et la nostre estre vraye et saincte en tant que je faisoye courroucer les meilleurs de sa foy ledict seigneur s’en rioit Et disoit nostre foy estre bonne pource qu’il ne pourroit estre autrement veu que dieu nous eust donné tant de bonnes et riches choses et si grant engin/ mais que encores ilz avoient bonne loy laquelle ilz tenoient de bonne raison & qu’ilz se povoient mieux sauver que nous autres crestiens ce que dieu estoit juste seigneur & que a nous en cestuy monde il nous donne tant de biens et richesses/ & a eulx mores comme riens au regard des nostres et que par ainsi dieu nous avoit donné en ce monde le paradis & en l’autre ilz le devoient avoir et en cela il monstroit aucunes bonnes raisons il avoit bon entendement d’homme & moult luy plaisoit le faict des crestiens & je suis certain que facillement on l’eust peu convertir a nostre foy si n’eust esté la paour de perdre son estat et son nepveu avec lequel j’estoye logé me le dist et luy mesme avoit tresgrant plaisir que je luy contasse aucunes choses de nostre loy et me disoit que c’estoit bonne chose d’ouyr la parolle de dieu la maniere de vivre qu’il tient est celle que j’ay dessusdicte du seigneur ou roy senega que chascune de toutes ses femmes luy envoyent divers metz de viandes et tel stille tiennent tous les seigneurs mores & hommes d’estimation que leurs femmes les nourrissent & mengent en terre bestiallement sans aucune coustume et avec sesditz seigneurs mores aucun n’en mengue fors leurs prestres ou ung ou deux de ses plus principaulx barons tous les aultres menus peuples mengent dix ou douze ensemble et mettent une de leurs viandes au meillieu et mengent moult peu par fois/ mais ilz mangent souvent. C’estassavoir quatre ou cinq foys le jour.

¶ Des legumes et vin qui viennent au royaulme de Senega.

Chapitre .xxv.

En ce royaulme de Senega qui est comme dessus est dict pays des mores et aussi plus avant en aulcune terre ne naist forment ne seigle ny orge ny avoine/ ny vin. Et la raison si est que le pays est trop chault et en neuf moys de l’an il n’y pleut point C’estassavoir depuis le moys d’octobre jusques au moys de juillet. Et combien qu’ilz ayent esprouvé de semer lesdictz blez pourtant ilz ne croissent point/ a cause de la grant chaleur/ et semble qu’elle produit du millet de diverses sortes gros et menu & aussi feves faizeulx & sont les plus gros & plus beaulx qui soyent au monde le faizeul est gros comme l’ung de noz noisettes domesticques tout doree/ et painct de diverses couleurs/ et sont tresbeaulx a veoir la feve est fort large plate grande et rouge de une vive couleur et aussi en y a de blanches & sont moult belles et ceulx icy sement au moys de Juillet et recueillent au mois de Septembre. En ce temps qu’il pleut ilz labourent la terre et sement et cueillent les biens ou temps de trois moys ilz sont tresmauvais laboureurs et hommes qui ne veulent prendre peine de semer/ fors pour autant qu’il leur suffise a mengier pour tout l’an/ et encores secarcement/ et ne leur chault guieres d’avoir bledz pour vendre. Leur maniere de labourer si est que quatre ou cinq des leur se mettent au camp avec certaines besches : et vont boutant la terre avant au contraire de ce que font les nostres quant ilz beschent la terre ilz tirent la terre a eulx et ne la parfondent que de quatre dois ou environ et cecy est leur labouraige et pource que la terre est vertueuse elle produit comme j’ay dessus dit Leur boire si est eaue laict ou vin de paulme Cestuy vin est une liqueur que gette ung arbre qui est de la forme d’ung dactile : mais non pourtant ce n’est pas cestuy la : & de telz arbres ilz n’en ont gueres et quasi tout l’an telz arbres rendent une liqueur que les mores appellent mignol & en ceste maniere ilz le font ilz frapent d’une congnee l’arbre en deux ou trois lieux en luy faisant des taillades : et il gette une liqueur a maniere d’eaue grise & mettent dessoubz une escuelle ou autre chose qui reçoit ceste liqueur puis apres la prennent : mais il n’en rend pas grande quantité & en ung jour et une nuyt il rend deux pintes moyennes et est tresbonne liqueur pour boire et enyvre comme le vin avec l’eau. Le premier qui se recueille est aussi doulx comme le plus doulx vin du monde : et de jour en jour il va perdant sa doulceur et devient vert : et est meilleur le .iii. et .iiii. jour que le premier. je le sçay pource que j’en ay beu plusieurs jours au temps que j’estoye en ce pays la : et me sembloit meilleur que nostre vin : de ce mignol ilz n’en ont pas si grande quantité que chascun en puisse avoir a habondance mais toutesfois ilz en ont raisonnablement et mesmement les principaulx et est commun a tous hommes pource qu’ilz n’ont point de vignes ne possessions de telz arbres : mais ilz sont dans la forest en lieu commun et est permis a ung chascun de faire telle liqueur.

¶ Fruitz de diverses sortes et huille merveilleux.

Chapitre .xxvi.

En ce pays la ilz ont des fruitz de diverses sortes aux nostres et sont bons et tous sont fruictz de forest C’estassavoir sauvaiges je cuide qui tiennent lesdictz fruictz en leurs mains comme on fait en nostre pays quant ilz sont bons Leur pays est tout champaigne convenable a produire en laquelle de bons pastourages avec multitude d’arbres grans et beaulx mais ilz ne sont point cogneuz de nous & y a aussi plusieurs lacz d’eaue doulce : lesquelz ne sont pas grans mais ilz sont tresparfons d’eau dans lesquelz y a des poissons differens aux nostres : & y a beaucoup de serpens d’eaue qui s’apellent calcatrice et en cestuy pays ilz usent d’une sorte d’huille en leurs viandes lequel a trois vertus C’estassavoir odeur de violettes de mars saveur quasi comme le nostre de olives & la couleur est comme d’ung brou et quant on y met du saffran et est ladicte couleur plus pollie que n’est celle que taint ledit saffran En cestuy pays se trouve aussi une espece d’arbres qui font fuizeulx rouges une espece de legumes avec l’oeil noir et en sont grande quantité mais ilz sont petis.

¶ Des couleuvres grandes qui engloutissent une chevre et des enchanteurs d’icelles.

Chapitre .xxvii.

Il se trouve en cestuy pays diverses generations de bestes/ et mesmement de couleuvres grandes et petites de plusieurs sortes et les aucunes sont venimeuses et les aultres non : il y a des couleuvres grandes de deux pas : Mais ilz n’ont pas aelles ny piedz comme les serpens mais elles sont moult grosses : & se trouve une couleuvre avoir englouty une chievre entiere sans la mettre en pieces et disant que cesdictes grandes couleuvres se reduisent en aucune partie dudict pays par flotes en lieu ou regnent tresgrande quantité de formis blancz lesquelz de leur nature font aucunes maisons ausdictes couleuvres & portent la terre avec leur bouche et quant elles sont faictes elles semblent a ung four et font cesdictes maisons comme on faict es beaulx villages .c. & .cl. par lieu et ces mores sont grans enchanteurs de toutes choses & speciallement de ces couleuvres/ et ay ouy dire a ung genevoys homme digne de foy que luy se trouvant au pays dudict budomel l’an devant que je y fusse & dormans une nuyt dans la maison du nepveu dudit budomel qui s’appelloit bisboror avec lequel je fus logé qu’environ la minuyt a l’entour de la maison il ouyt plusieurs sifletz qui le firent reveiller et aussi ledit bisboror/ Lequel se leva incontinent et apella deux de ses mores et monta a cheval sur ung chameau et s’en alla et demanda ledict genevoys la ou il vouloit aller a telle heure et il me respondit qu’il alloit a ung sien affaire : et qu’il seroit incontinent de retour et apres que il fut de retour en la maison ledict genevois luy demanda de rechef dont il venoit & il luy respondit n’avez vous pas ouy siffler il y a une piece aucuns siffletz environ la maison & ledict genevoys respondit que ouy & lui demanda que c’estoit & ledict bisboror lui dist que c’estoyent couleuvres : lesquelles si je ne fusse allé faire ung certain enchantement duquel deça nous usons avec lequel j’ay fait tourner en derriere toutes lesdictes couleuvres celles m’eussent ceste nuit fait mourir plusieurs de mes bestes & le genevoys respondit que moult il s’esmerveilloit de telle chose pource que aulcun crestien ne le croiroit pas et ledict Bisboror luy dist qu’il ne s’en esmerveillast point pource que son oncle Budomel faisoit de plus grans choses que ceste icy/ car quant il vouloit faire du poizon pour envenimer ses herbes/ il faisoit ung grant circuit et avec enchantement il faisoit venir en ung cercle tous les serpens voisins de ce pays la et celuy qui luy sembloit le plus venimeux il le tuoit avec ses mains & les aultres laissoit aller et prenoit le sang de celluy qu’il avoit tué et le destrempoit avec certaines semences d’ung arbre duquel j’ay veu : et en faict une mixtion de laquelle il envenimé ses armes & la ou il en frape & qu’il y ayt sang/ et combien que la playe soit petite en ung quart d’heure la personne meurt qui ainsi en sera frapee Et me dist ledit Genevois que ledict Bisboror luy en voulut faire veoir l’espreuve : mais il ne luy challut d’en sçavoir plus avant Par ainsi je conclus tous ces Mores estre grans enchanteurs Aussi en nostre quartier y a aucunes personnes qui sçavent enchanter les couleuvres.

¶ Des bestes saulvaiges qui y sont en grande quantité/ mesmement des Elephans et Giraffes.

Chapitre .xxviii.

¶ En ce royaulme de Senega pays des Mores ne se trouve aultres bestes domesticques fors beufz/ vaches/ et chievres : de moutons il n’y en vient point : pource que ilz n’y sçauroient vivre pour la grant challeur qui y est Les vaches et beufz de celluy pays sont beaucoup plus petis que les nostres & est advanture d’y trouver une vasche rouge elles sont ou toutes noires ou toutes blanches ou voirement tachees de noir et blanc bestes sauvaiges de rapines sont Lyons & leopardz en grande quantité aussi y a il loups chevreaulx & lievres Encores y a des Elephans saulvaiges : pource qu’ilz ne usent point a les faire privés comme on fait es aultres parties du monde et telz Elephans vont en route comme a nous vont les pourceaulx es boys Et de nature ces elephans ont deux grans dens des deux costés de la gueulle comme ont nos pourceaulx/ fors que les dens desditz pourceaulx regardent contremont et celles des Elephans regardent en bas vers la terre et jamais ne bout sesdictes deux dens que il ne soyt a la mort Et est une beste qui ne fait point de desplaisir a L’homme si l’homme ne luy en faict/ et le desplaisir que il faict a l’homme est que quant il se joinct a luy il luy donne de sadicte trombe longue qui est en maniere d’ung nez & la retire comme il veult ung si grant coup par dessoubz en sus qu’il jecté aulcuneffois l’homme en l’air ung traict d’arbalestre et n’y a homme si viste que le Elephant ne joingne a la champaigne en allant tant seullement son pas a cause de sa grandeur il faict ung pas tresgrant quant ilz ont des faons ilz ne sont plus perilleux que en autre temps ilz n’en font point plus de trois ou quatre a la fois & mengeussent les fueilles des arbres et les fruitz lesquelz elephans pour avoir le fruit rompent les rameaulx des arbres quant ilz sont gros avec leur groin Sa trombe est en la machouere de dessoubz & la fait longue & courte comme il veult & avec icelle prent toute la viande & l’eaue qu’il boit et la met dedans la bouche laquelle bouche est en sa poictrine leur demourance est dedans les bois espés ou y a de la fange et la se gectent comme pourceaulx : & d’avantaige j’ay entendu qu’en cedict pays y a des giraffes & autres bestes savaiges de plusieurs sortes.

¶ Des papegays et oyseaulx de diverses sortes.

Chapitre .xxix.

En cedict pays y a des oyseaulx de diverses sortes et mesmement des papegays en grande habondance lesquelz vollent parmy ce pays la et les mores leur veullent grant mal : pource qu’ilz font dommaige a leurs champs car ilz mengeussent leur millet & autres legumes il en est de diverses manieres j’en euz de deux sortes de petitz et de grans et sont de couleur verte grise & jaulne et en euz de ceulx qui estoient en leurs nidz mais ilz moururent j’en portay en espaigne .cl. et au dessus et les vendiz ung ducat la piece cesdictz Papegays sont oyseaulx moult industrieulx en faisant leurs nidz et les font de joncz et sont tous rondz comme une boulle ilz s’en vont sur ung arbre qu’on appelle palme ou aultre arbre qui ait rameaulx et choisist les plus subtilz et debilles : et au bout du rameau ilz lient ung jonc & au bout de cestuy jonc ilz font leur nid tissu d’une merveilleuse sorte en maniere que quant il est achevé il demoure au bout dudit jonc qui est attaché au rameau une boulle a laquelle il laisse ung trou par lequel il entre et ilz font cela a cause des couleuvres qui leur mangent leurs enfans lesquelles ne pevent aller sur celuy rameau pource qu’il est ainsi foyble et ne sçauroit porter le fez desdictes couleuvres : & en ceste maniere ilz asseurent leur nidz Il y a aussi en cedit pays aulcuns oyseaulx grans lesquelz nous appellons gelines d’inde qu’on a acoustumé d’apporter du levant de cestes gelines en y a grande habondance y a aussi des oyes lesquelles ne sont pas comme les nostres/ mais ont les plumes diverses. Et y a aussi semblablement plusieurs autres oyseaulx petis grans et beaulx et d’aultre sorte que ne sont pas les nostres de deça.