Chanson piteuse composee par frere Olivier Maillard, et se chante comme bergeronnette savoysienne.

Il fault mourir a ce coup cy Puisque le grant sainct est sonné N’avez vous point ouÿ le cry Quant a moy je suis estonné Monde tu es bien assommé Ne pense tu point a cela Chascun a esté ajourné Pour rendre compte et reliqua Generale citation A esté donnee a chascun En plaine predication Quant a moy je n’ay paour que d’un Bien sçay que nul n’eschappera Et ne respondra pour aucun Car chascun pour soy parlera Pour rendre compte et reliqua Par les freres predicateurs Sommes citez et convoquez Entre vous endurcis pecheurs Ne faictes que vous en mocquer Mais la mort vous viendra croquer Devant qu’il soit ung an en ça Lors vous aurés bel escouter Pour rendre compte et reliqua Nous sommes aussi invitez Souvent par flagellations Maladies, infirmitez Et maintes tribulations Divines inspirations Remors de conscience y a Nous donnent persuasions Pour rendre compte et reliqua Que vous en semble gaudisseurs Qui en tout mal vous employez Ne congnoissez vous le prescheurs Que frere Olivier vous nommez Vostre terme pas n’oubliez Il fault aller de pardela Devant que soient deux ans passez Pour rendre compte et reliqua Bonnetz rouges et chapeaulx blancs Ribleurs et bateurs de pavez Vous mourrés tous pour parler franc Et serés damnez ou sauvez Maillart vous a tresbien lavez Las vous amenderés vous ja Qui menez la vie que sçavez Pour rendre compte et reliqua Levez les cueurs et vos espritz Femmes qui menez haultz caquetz Estes vous allees offrir A ces festages et bancquetz Et aux estrangiers par acquestz Dieu sçait les maulx qui se font la Vos procés sont desja tous faictz Pour rendre compte et reliqua Quant quelque vice commettras Considere que Dieu le voit Soit tant secret que tu vouldras Aussi le dyable l’apperçoit Pour vray se Dieu le permettoit Il te estrangleroit sur cela Mais fol ne croit tant qu’il reçoit Pour rendre compte et reliqua Vous aultres qui avez l’autruy Indeuement et oultre gré Ou qui par faulx langageri Avez personne revelé Publiquement ou en celé Ou detracté soit ça ou la Fault que cela soit reparé Pour rendre compte et reliqua Faulx ypocrites glorieux Gens folz qui vous glorifiez Et qui faictes les marmiteulx Et sur tous vous justifiez Estes vous bien certifiez Qu’en vous n’y a ne si ne qua Pas ne s’i fault en trop fier Pour rendre compte et reliqua Vous filles de devotion Vierges pures sacré vaisseau Et aultres de religion Vostre corps doit estre ung tombeau Pur beau tout net et precieulx Pour y loger Dieu par deça Qui vous conduira sur les cieulx Pour rendre compte et reliqua Disposons nous a bien mourir C’est le remede que je y voy Ungs et aultres grans et petis Et chascun pense bien de soy Pour soy trouver devant le roy Quant la trompette sonnera Povre pecheur appreste toy Pour rendre compte et reliqua.