Ce sont les noblesses et coustumes aux contes de Bretaigne

Premierement toutes nefz ou vaisseaulx quant ils adventurent a la costiere de Bretaigne tout est conquis ausditz contes sans que nul homme ne marchant y prennent rien sinon ceulx qui les saulvent qui doivent avoir leur salaire selon qu’ilz ont desservi, c’est assavoir s’ilz vont a l’aventure de la mer loing les querre ilz ont le tiers et s’ilz ne perdent terre ilz n’auront que salaire competant au regard de justice. Et pource que le païs de Bretaigne est de si grant dangier que a peine par deux ans peult nef mareer sans venir en dangier de la dicte seigneurie dont fut accordé entre ledit conte & toutes manieres de nefz par l’assentement du treschrestien roy de France a la priere, requeste, et supplication de trestous les païs que ledit conte mist seaulx lesquelz sont appellez brefz esquels qu’il vousist en son terrouer et ainsi estoient tenues toutes les nefz qui chargeoient a la duché de Bretaigne jusques au royaulme d’Espaigne de prendre lesditz brefz sur peine de ladicte nef perdre et tous les biens. Fut accordé pource entre lesditz nommez a quelque nef qui se aventurast a sondit terrouer trouvant les brefz en tesmoignage du papier des lieux ou les brefz seroient ne doibt ladicte seigneurie rien prendre ne souffrir que l’en prenne rien de ladicte nef des biens qui dedens soyent ne de la marchandise saulve le droit des saulveurs lequel est accordé affin qu’ilz travaillent a saulver les biens. Et pour ces convenances des brefz sont asseurees toutes manieres de nefz et marchandises du droit et noblesse du dit prince. Et doivent monstrer a l’admiral ou son lieutenant les brefz de tous les voyages qu’ilz auront fait en une annee toutes fois qu’il les vouldra requerre, ou autrement il le peult tenir en poefait. Et pource que le roy d’Espaigne ne ses pors ne furent mie dessoubz ceste acordance a mareer soubz la premiere condition ne aussi les anglois ou cas qu’ils viendroient chargees ou vuidees de leur païs, mais s’ilz chargeoient ou les brefz sont, ils sont tenus d’en prendre : car s’ilz sont sans lesdictz brefz ils sont a la voulenté du prince corps et biens.

L’ordonnance pourquoy le viconte de Leon est acoustumé es seaulx lesquelz sont appellez seaulx de conduict non mie brefz fut pource que ledit vicomte estoit de trespas de la ou il convenoit a toutes nefz assembler chargees & vuides, affin que les ungz ne mesfissent aux aultres pource qu’ilz estoient d’estranges contrees il fut acordé que il devoit tenir vaisseaux pour les garder et conduire endroict sa terre & ledit trespas et pour souffrir que toutes manieres de gens puissent prendre vitaille a sondict terrouer fut pource accordé que il eust certaine somme pour les seaulx, et ou cas que aucune nef passeroit oulstre sans prendre vitaille a sondit terrouer sans avoir les seaulx elle auroit forfait en corps & en biens et pource ledict viconte les suivra quelque part qu’elles iront & les amenera avecques lui comme chose forfaicte a justicier a son terrouer dessusdict. Et sont tenus a monstrer tous les seaulx des voyages qu’ilz auront faictz pour annees, et par ainsi est tenu ledit viconte de tenir lesdictz vaisseaulx et faire son povoir de leur porter paix oudit trespas et en sondit terrouer, et c’est son droit depuis que homme a memore depuis que les seigneurs de Bretaigne ont conquis ladite viconté, et sont les deux noblesses audit prince. Et depuis que ladicte noblesse fut toute audit prince il a voulu que les espaignolz et aultres qu’ilz peussent prendre port en sa terre sans adventure chargee ou a charger d’estrange pays que la ou les brefz seront saufz a eulx demander les brefz dedens la tierce maree.

Apres avoir getté au port leur ancre en la terre, et saisir o effect les aller querir en quelque part qu’ilz seront ou cas qu’ilz ne passeroient par le ras de monseigneur Sainct Mahé, mais ou cas qu’ilz ne passeront, ilz ne seront mie sauvez par telle voulenté et maniere.