ACTE QUATRIESME.
Reading edition
SCENE PREMIERE.
Pamphilie. Aristide.
PAMPHILIE.
Quoy, rien ne peut flechir ce courage obstiné?
ARISTIDE.
Non, bientost devant vous il doit estre amené, Je vous en donne advis.
PAMPHILIE.
Où?
ARISTIDE.
Dedans cette salle, Affin que s'il se peut, cette ame desloyale Renonce son erreur dedans les mesmes lieux, Où son crime a chocqué l'Empereur & les Dieux.
PAMPHILIE.
Comment le sçavez vous?
ARISTIDE.
De l'ordre de Rutile, Qui voyant qu'on prenoit une peine inutile, Et que tous nos efforts agissoient vainement, Pour guerir cet esprit de son aveuglément, M'a dit qu'il vous alloit envoyer ce rebelle, Et que je vous en vinsse apporter la nouvelle, Affin que vostre esprit se puisse preparer, À luy lancer des traicts qu'il ne puisse parer.
PAMPHILIE.
En cette occasion que feray-je Aristide?
ARISTIDE.
Vous sçavez mieux que moy l'humeur de ce Perfide.
PAMPHILIE.
Il m'a pourtant trompée autant & plus que vous.
ARISTIDE.
C'est de vous seule aussi dont il craint le courroux.
PAMPHILIE.
Il me craint.
ARISTIDE.
Je le crois.
PAMPHILIE.
Et sur quelle apparence? Ne me traitte-t-il pas avec indifference, Et ne luy suis-je pas un objet de mespris?
ARISTIDE.
Vostre nom toutesfois touche encor ses esprits, Car il n'a pu jamais au recit de vos charmes, Estouffer ses soupirs ny retenir ses larmes.
PAMPHILIE.
Apres ses trahisons & des mespris si grands, Ses pleurs & ses souspirs sont de foibles garands: Il a changé l'ingrat, & quoy que l'on presume, Ce qu'il fit par amour il le fait par coustume.
ARISTIDE.
Pour complaire à Cesar, il le faut esprouver, C'est l'ordre de Rutile.
PAMPHILIE.
He bien va le trouver Et dis que pour dompter ce superbe courage, Ma hayne & mon amour mettront tout en usage. Va laisse moy resver à ce fascheux soucy.
ARISTIDE.
Adieu, dans un moment vous le verrez icy.