DAS LEHEN
Reading edition
Ich hân mîn lêhen, al die werlt! ich hân mîn lêhen! nû enfürhte ich niht den hornunc an die zêhen und wil alle bœse hêrren deste minre vlêhen. der edel künec, der milte künec hât mich berâten, daz ich den sumer luft und in dem winter hitze hân. mîn' nâhgebûren dunke ich verre baz getân: sie sehent mich niht mêr an in butzen wîs', alsô sie tâten. ich bin ze lange arm gewesen ân' mînen danc. ich was sô volle scheltens, daz mîn âtem stanc: daz hât der künec gemachet reine und dar zuo mînen sanc.