Les choses horribles contenue en une lettre envoyée à Henry de Valois par un enfant de Paris, le vingt-huitiesme de janvier 1589, selon la coppie qui a esté trouvée en ceste ville de Paris, près l'orloge du Palais. Pour Jacques Gregoire, imprimeur.
Reading edition
M.D.LXXXIX
Vous sçavez bien qu'avez obligé vostre ame à tels gens.
Vous sçavez bien que, pour passer plus oultre vostre malignité, avez contrainct iceux sorciers et enchanteurs de transmuer cest esprit en figure d'un homme naturel, ce qu'ils trouvèrent fort estrange; et neantmoins, avec leur art diabolique, ont accordé ceste requeste, et par faicts obliques, en corps et ame, ont faict sortir un diable d'enfer, figuré en homme; et de la region ou il fust premier apparu, ce fut en Gascogne, d'un nommé Nogeno, où il print le nom de Nogaret, ou Teragon, à cause de son premier nom Teragon, et se vint trouver au milieu de ces sorciers et enchanteurs. De bonne volonté le presentèrent à Henry estant au Louvre, accommodé comme un gentil-homme pour son conseil; le roy de Navarre, qui sçavoit la tragedie, luy envoya un homme damné nommé du Beloy, pour l'introduire plus ardemment à trahison.
Henry, vous sçavez bien que, tout aussi tost que vistes Teragon, vous l'appellastes vostre frère, en l'accolant, et la nuict suyvante il coucha dans vostre chambre, seul avec vous dans vostre lict.
Vous sçavez bien que toute la nuict il tint sur vostre ventre droict au nombril un anneau, et sa main liée dans la vostre, et fust le matin vostre main trouvée comme toute cuitte; et meit sur icelle un applic, et ce matin il vous monstra que dans la pierre de son anneau estoit la vostre ame figurée.
L'on tient que ce dit Teragon eust affaire un certain jour à une fille de joye en la chambre secrette, de quoy icelle cuida mourir, suivant le recit qu'elle en a faict à ses privez amis, certifiant que Nogaret ou Teragon n'est point un homme naturel, parce que son corps est trop chaut et bruslant.
Madame la comtesse de Foix, sa femme, laquelle dict qu'elle aime mieux mourir que d'estre habitée de luy, et a dict que son mariage a esté faict par sort et par charme, et du tout contre sa volonté, et que la première nuict fut Teragon d'elle esvanouy, et puis le matin se trouva couché près d'elle, et alors iceluy Teragon la vouloit depuceler, elle ne sçeut endurer sa chair si chaulde qu'elle estoit, dont le jour ensuyvant ne cessa de plorer devant sa tante.
Or de croire cest effect damnable de ce diable desguisé est possible, car un conte de Flandres espousa le diable en figure de femme.
A Lucques, le primat tenoit le diable en figure d'un page.
A Toscane, une dame de nom tenoit une fille qui devinoit tout, et estoit un diable, comme enfin fut apparu.
En la ville de Bordeaux, un diable a esté veu un mois entier par la ville, monté sur un cheval, figuré en homme; et, en fin du temps predit, emporta un homme à luy voué par achapt.
En Angleterre, le roy Edouard tenoit Gaverston, qui enfin fut trouvé diable desguisé, et fut cause que ce roy fist mourir des bons seigneurs; dont, pour sa juste recompense, ce roy Edouard fut vif embroché en fer bruslant.
Toutes ces choses icy, ce sont des advertissemens à tous seigneurs de laisser Henry: car la verité est telle que tout homme ayant l'ame bonne accompaignant Henry, tous y seront perdus, par guerre ou par sort, ou par charmes, ou par femmes desbordées ou trahison: car c'est chose asseurée que l'estat du diable, regnant avec Henry, oste la vie, le renom, la gloire, l'honneur et la vertu des hommes.
Dialogue de Henry le tyran et du grand sorcier d'Espernon, pour faire mourir Monseigneur de Guise.
D'Espernon parle.
Sire, qu'attendez-vous? Voilà le Guysien Qui, comme une brebis amiable innocente, Vers vous, trop cauteleux, pour mourir se presente: Car, veu qu'avez juré, il s'asseure trop bien.
Henry.
N'a-t-il de l'entreprise encore entendu rien?
D'Espernon.
Vostre amitié luy est autant qu'à moi plaisante; Il faut le despecher.
Henry.
J'y ay bien mon attente; Puis le peuple de Blois n'est pas Parisien.
D'Espernon.
Et que craignez-vous donc?
Henry.
Je doute d'une chose, Qu'on vengera sa mort, parquoy si tost je n'ose Que je ne sois certain d'avoir quelque secours.
D'Espernon.
Ne craignez rien; je vay armer cent mille diables, Terribles à chacun, mays à moy amiables, Qui pourront tout destruire en moins de quatre jours.
Par tout gaillard.
Invocation des diables pour le secours de Henry le tyran, faicte par le grand sorcier d'Espernon.
Trouppes des bas enfers, gendarmes sataniques, Qui les lieux souterrains terribles habités, La voix du magicien d'Espernon escoutés, Vostre plus grand amy, frère des heretiques. Sortez, sortez, soldats des antres plutoniques; De venir au secours de vostre Henry hastés; Venez, venez icy, en armes apprestés: Nous voulons à ce coup chasser les catholiques. Capitaine Astarot, sors de tes bas manoirs, Ameine nous cent mil de tes gendarmes noirs, Que renge Lucifer soubs sa noire cornette. Desployez, mes amis, en l'air vos estandars, Le vaillant Belzebut face de toutes parts De peur trembler le peuple, au son de sa trompette.
