Table des chapitres et des illustrations (continued 3)

Comment Girart combatist le chevalier de Langarde et l’ocist et osta la damoiselle de la fontaine, laquelle le vouloit depuis faire murdrir en dormant.

Quant Girart eust salué la pucelle et qu’elle lui eust rendu son salu, il lui pria qu’elle lui voulsist dire pourquoy elle estoit en celle fontaine ne qui lui faisoit souffrir celle peine d’estre en celle fontaine toute nue jusques au col. « Sire, dist la pucelle, oncques homme vivant ne fist telle derision a femme ne a damoiselle ne pour si peu d’occasion. Jamais plus merveilleux homme ne fut comme est cellui qui m’a icy mise. Moult voulentiers le vous diroye se je osoye aucunement. Il est lassus ; assés tost retournera ; s’il vous treuve icy avec moy a grant martire seray livree. Et pour ce sire vous prie et requiers que incontinent vous departez d’ycy. » « Belle, dit Girart, saichiés pour verité que jamais d’icy ne partiray jusques a ce que m’ayés dit la cause pourquoy vous estes la mise, ou vous souffrez tant de peinne. » Lors la pucelle lui dist a basse voix : « Sire, gaires n’aurez gaignié de le sçavoir, ne je n’en pourroye estre alegee. Mais se a la verité savoye que en riens me puissiez aydier voulentiers le vous diroye. » « Belle, dist Girart, je vous jure et prometz ma foy que se dire le me voulez je mettray tout mon povoir a vous mettre hors de celle peine ou vous voy a present. » « Sire, dist la damoiselle, a ce que je voy de vous vous me semblez estre homme de foy et de credence. Et pour ce vous racompteray la cause pourquoy je suis cy mise. Sire il est vray que le chevalier qui m’a cy mise me requist une fois que amer le voulsisse. Tant me pressa que mon amour lui octroyay. Il m’ama moult et aussi fis je lui. Advint que ung jour lui et moy alasmes jouer es champs et eusmes pluseurs devises ensemble et me requist moult fort que la verité lui voulsisse dire d’une chose qu’il me vouloit demander. Je lui respondis que la verité lui en diroye. Alors il me demanda s’il y avoit chevalier ou monde plus preu, plus bel, plus courtoys, plus sage ne si bien parlant comme il estoit. Je lui respondis que je ne savoye ou monde plus preu, plus bel ne plus sage chevalier qu’il estoit excepté le bel damoisel de Nevers ; parquoy il fut tant troublé et couroucié sur moy, qu’il me dist que desprisié l’avoie et que incontinent me despoillasse et que je me meisse en ceste eaue ou je suis tous les jours une heure et me dist et jura sa foy que a tousjours mais me tiendroit en ce point jusques a ce que par Girart de Nevers, par sa bataille, par sa force m’en auroit ostee. Sire, la verité vous dis. Si vous prie que me vueilliez dire vostre nom. » « Belle, dist Girart, doncques est vostre penitence parfaicte, car je suis cellui qui vous doy delivrer : par mon droit nom suis appelle Girart. Saige et advisee avez estee de moy avoir dicte la verité. » Ainsi comme ensemble aloient devisant, le chevalier monté sur ung cheval noir descendist d’en hault et tantost qu’il veist Girart lui commença a escrier et lui dist : « Vassal, moult grant oultrage avez fait d’icy vous avoir arresté. Jamais plus grant folye ne vous avint. » Girart le regarda moult fierement et lui dist : « Dans chevalier, pourquoy dictes vous ce ? Jamais ne croyroie que a ceste cause me voulsissiez faire aucun desplaisir. » « Vassal, dist le chevalier, vostre priere ne beau parler ne vous y auront mestier que premierement ne vous soit chier vendu de ce que tant y avez arresté. » « Vassal, dist Girart, puis que doulceur ne prieres n’y auront lieu, tost et hastivement vous tirez arriere. » Lors sans plus dire se eslongerent l’un de l’autre et mist chascun la lance en l’arrest et picquerent cheval d’esperon, et rencontrerent tellement et par si grant force que leurs lances furent rompues en plus de cent pieces et n’y demeura sangle ne poitral entier. Chevaulx et maistres cheurent a terre puis se leverent et misrent chascun la main a l’espee et commencerent a combatre merveilleusement, et frappoient si grans cops qu’il ny avoit healme ne piece de harnois qu’il ne fust tout rompu. Jamais par deux chevaliers ne fut plus vaillamment combatu. Toutesvoyes quant ilz eurent beaucop combatu, le chevalier se retraist ung peu arriere et pria a Girart qui se voulsist ung peu retraire, puis lui requist que son nom lui voulsist dire. « Vassal, dist Girart, pour vous ne pour autre ne vouldroye mon nom celer. Saichiez que je suis Girart de Nevers. Or puis que ainsi est que mon nom savez, raison est que me dictes le vostre. » « Vassal, dist le chevalier, par mon droit nom suis appellé Baudrain d’Apremont, lequel avez fait plus joyeulx que oncques fusse en ma vie de ce que vostre nom m’avez dit, puis que vous estes Girart de Nevers. Jamais ne buvray de vin jusques a ce que vostre chief auray tranchié jus de voz espaules ; par mes mains vous couvient morir, imposible vous est d’eschapper. » Quant Girart entendist le chevalier ainsi parler, moult fierement le commença a regarder et lui dist : « Chevalier, se attendre voulez de boire et de maingier jusques a ce que m’ayez ossis, assés porrez attendre. » Lors Girart se approcha de lui et leva l’espee contremont en y employant toute sa force et l’ataindist sur le healme ung cop si desmesuré qu’il le fendist jusques es dens et, au retirer qu’il fist son espee, cheust tout mort, dont moult grant bien fut pour le païs d’Ardene, car jamais on n’avoit veu si faulx ne si mauvais qu’il estoit, ne que plus se advisast de faire mal qu’il faisoit. Quant Girart eust occis ce chevalier il essua son espee et la rebouta dedans son forrel, puis vint a la fontaine, si en tira hors la damoiselle et la mena dessoubz ung arbre ou ses robes estoient et les lui bailla, puis quant elle fut vestue et atournee Girart se merveilla moult de la grant beauté qui estoit en elle, et la prinst par la main et l’assist a terre empres lui et la commença a interroguer dont elle estoit ne quel maison. « Sire, dit la damoisselle, puis qu’il vous plaist savoir dont je suis je vous en diray la verité et ne vous en celeray riens. Mon nom est Denise de la Lande. » « Belle, dit Girart, je vous prie se vostre nom vous ay demandé qu’il ne vous desplaise, ne aussi ung peu me repose empres vous. Deux jours a que ne dormis ne reposay et suis si fort traveillié que a grant peine me puis soustenir. » « Sire, dit la damoiselle, pas ne me doit desplaire. Je ne seroye pas courtoise se n’estoie contente de vous complaire, car je suis tenue a vous plus que a homme du monde et ne m’est pas possible de jamais le vous desservir. »

Comment Girart s’endormist ou geron de la damoiselle et comment il fut esveillié par ung escuier.

Alors Girart se coucha et mist son chief ou geron de la demoiselle ou il s’endormist tantost et y demeura moult longuement que oncques la damoiselle ne se bougea ne tant ne quant. Ainsi que Girart estoit endormy survinst ung jeusne escuier bel et courtois a merveilles qui estoit monté sur ung bon destrié et pourtoit une moult riche espee. Il regarda la damoiselle assise tenant sa main a sa maisselle et Girart gesant en son geron. Il se approucha d’elle et la salua moult courtoisement. La damoiselle lui respondist moult bas que tresbien fust il venu. L’escuier lui demanda moult doulcement qui estoit le chevalier qui dormoit sur son geron. Elle lui respondist moult bas : « Tresdoulx jouencel, saichiez que c’est le plus faulx et le plus desloyal chevalier du monde, le plus crueux qui oncques nasquist de mere. Tout droit a occis mon amy que la veez mort. Je n’atens l’eure quant il sera esveillié d’estre par lui deshonnoree. Pour Dieu je vous requiers que descendez et prenez vostre espee et coppez la gorge et je vous prometz que incontinent que l’aurez fait je feray toute vostre voulenté. » Quant le jeusne escuier entendist la damoiselle ainsi et sa mauvaise voulenté qu’elle avoit, lui respondist moult saigement : « Damoiselle, jamais bien ne me puist advenir se a cellui qui ne m’a riens meffait que a vostre requeste lui face aucun desplaisir. Mauldit soye je se une heure vois avec vous. Bien devroye estre monstré au doit se a vostre priere commettoie ung tel murdre. Jamais en vous n’auroye fiance quant ung tel chevalier voulez que je murdrisse sans le avoir deffié et en dormant. Pour verité pouroye dire que autretel feriez de moy. Dommaige seroit de murdrir ung si bel chevalier. » Et en devisant qu’ilz fasoient Girart s’esveilla et se leva et fut esbaÿ de veoir se jeusne escuier a cheval. Icellui escuier veant Girart esveillié vinst a lui et le salua moult courtoisement. « Amy, dit Girart, Dieu vous vueille garder. » Lors la damoiselle qui se sentoit avoit meffait dist a Girart : « Ha sire, pour Dieu je vous requiers mercy. Tenez, ma foy, je vous prometz que ce que je dis ores a ce jeusne escuier ce ne fut fors que pour l’essayer. » La desloyale damoiselle, pensant que Girart l’eust oye, s’avança lui dire avant ce que l’escuier en parlast. « Damoiselle dist Girart, grant damaige est de la beauté qui est en vous quant la bonté n’y est aussi. Mal est emploié en vous le beau corps, et la belle façon de tant nature a mal ouvré en vous, que bonté et vertu n’y a mise. Il m’en desplaist moult. Pour telle que vous ay trouvee vous lairay, plus avant d’icy ne vous menray. » Autre chose plus ne lui dist fors que il la commanda a Dieu et la laissa toute seule. La damoiselle prinst congié de l’escuier qui d’autrepart s’en tourna atant. Girart lui seul prinst son chemin par champs, par villes et par chasteaulx en enquerant tousjours d’Euriant s’amye. Quant nouvelles n’en povoit oyr, lui mesmes se dementoit fort. Tant ala Girart chevauchant qu’il choisist une moult belle contree ou il n’y avoit nulle terre arable fors prelz, boscaiges et rivieres sur laquelle il veoit tout au long le plus bel vignoble que il eust jamais veu. La riviere estoit moult grande et large ; par dessus avoit ung moult riche pont tant bien ouvré que oncques plus bel n’avoit veu, puis au bout du pont avoit ung chastel moult fort de murs et de tours et dedans bien garny de belles chambres bien parees. Tant plaisant place estoit que oncques on ne veist plus plaisant. Mais d’une chose Girart ne se peust assez esmerveillier, c’estoit de ce que entour du chastel pres ne loings n’apparissoient bordes ne maisons ne nul bateau sur la riviere qui estoit moult grosse.

Comment Girart rencontra ung escuier en une lande et de leurs devises.

Quant Girart eust bien avisé le chastel il fut moult esbaÿ que ce povoit estre d’une telle place qui ainsi estoit seule et que tout entour estoit despeuplee. Ainsi comme en ce penser estoit survint ung gentil homme qui venoit vers lui a grant erre monté sur ung cheval de chasse. L’escuier estoit bel et droit. Quant Girart le veist, il vinst a l’encontre de lui et le salua moult courtoisement en lui priant que la voye du chastel lui voulsist monstrer. L’escuier moult humblement lui rendist le salut et luy dist : « Sire, pour Dieu mercy, gardez que tost et hastivement vous en alez et fuyez, car vostre demeure vous pourroit anuyer. Il n’est homme mortel tant soit preu ne hardy qui cy osast seul attendre ne arrester. » « Amy, dit Girart, pourquoy ne a quel cause me dictes vous ces nouvelles ? Je ne voy ne ne sçay riens pourquoy je me doye espaonter, mais je vous prie que dire me vueilliez la cause pourquoy cestui païs est ainsi despeuplé et destruit. » « Sire, dist l’escuier, ce lieu et ceste contree que ainsi veés estre apovrie souloit estre tant riche tant plantureuse et plaine de biens que la pareille n’avoit ou monde, ainsi comme es anciens ay ouy dire. Verité est que au plus pres d’icy est demeurant ung geant moult grant et hydeux a veoir lequel destruit ce païs et n’y a laissie borde ne maison ; mesmement le chastel que veés il a mis a ruyne ; et a nom ce geant Burgalidans. Et pour ce sire je vous conseille ou cas que n’ayés bonne conduite ou saufconduit que tantost vous departez d’icy ou se aler voulez avant il vous couvient prendre le chemin a main droitte affin d’eschever le peril et dangier en quoy vous porriez encheoir. Car le geant dont je vous parle n’espargne homme du monde qu’il ne prengne ou mette en prison, et la raison pourquoy il le fait je le vous diray. Il est vray que il est passioné d’une maladie moult merveilleuse, car deux fois la sepmaine le tient si merveileusement que il n’est homme tant soit hardy qui n’eust grant paour et grant hyde de l’oyr cryer, si fort le contraint sa maladie. Mais il se treuve alegié d’une chose que vous diray. Les hommes qu’il prent et mest en prison il mainge et destruit l’un apres l’autre. Et par ainsi de ceste cruelle maladie dont il est ainsi tourmenté est du tout alegié. Homme ne femme n’est icy entour demeurant. En ceste grant forest se tient empres ceste grant riviere. Se plus attendons icy nous serons ou mors ou prins. » « Amy, dit Girart, alez vostre chemin. Jamais ne quiers retourner arriere jusques a ce que j’auray veu et visité ceste place que la voy tant belle. » Alors a tresgrant haste l’escuier se departist de Girart et demeura Girart tout seul et s’en ala tout le pas contre le chastel, et ne fut gaires alé avant qu’il veist partir de la place ung chevalier qui avoit le chief enveloppé et couvert d’un mantel.

Comment Girart rencontra ung chevalier qui menoit avec lui sa femme et sa fille en demenant grant dueil.

Quant Girart veist venir ce chevalier, il ala a l’encontre de lui, mais ainçois qu’il y peust estre il veist que apres le chevalier venoit sa femme et sa fille, qui estoit tant assouvye en beaulté que nature n’y avoit riens oblié ; lesquelz demenoient la plus grant douleur et plus grant dueil du monde ; et apres yssirent d’icelle place pluseurs personnes du plat païs qui plouroient apres eulx ; et estoit chose moult piteable de les veoir desconforter et mener le dueil qu’ilz menoient. Girart veant ce eust grant pitié et se merveilla fort et desira fort de savoir la cause de leur doleance et s’approucha d’eulx et les salua moult humblement, et eulx lui pareillement a voix basse et piteuse. Apres Girart demanda au chevalier et lui dist : « Se anuyer ne vous cuydoye, moult voulentiers sauroye de vous la cause de vostre doleance et de tous ceulx qui viennent apres. » Le chevalier remply de dueil et de melencolie lui dist : « Sire, assés auroye a faire de vous racompter et dire mes douleurs et celles de ces gens qui apres moy viennent. » « Sire, dist Girart, de vostre couroux et anuy suis tres desplaisant. Mais je vous prie que racompter le me vueilliez. » « Sire, dist le chevalier, il est vray que en ce païs et assés pres d’icy est demeurant ung geant grant et orrible qui se tient sur ceste riviere en une place forte a merveilles. Riens ne passe par cy, soit homme ou femme, qu’il ne preigne et mette en sa prison. Si est advenu que j’avoye .vii. filz chevaliers moult vaillans et hardis en armes ; est advenu que ung jour passé ce geant les prinst et les emmena prisonniers. Si est ainsi que lui et moy avons eu parlement ensemble, par tel si que je lui dois mener une mienne fille que j’ay dessoubz cest arbre que la veés, et il me doit rendre mes sept filz, dont moy et ma fille avons au cuer telle douleur que je cuide que nous morrons de desplaisir. Car pas ne sommes encores seurs de ravoir noz enffans pour nostre tresamee fille. » Quant Girart eust oy parlé le chevalier il en eust grant pitié, et lui dist : « Laissiez aler vostre dueil et pensez de vous reconforter. Car moyennant la grace de Dieu je feray tant que voz enffans raurez tous. Faictes que j’aye armures, car les miennes sont rompues. » « Ha sire, toutes les armures du monde ne vous porroient aydier. Car ce geant est crueux et tant orrible car il oseroit bien attendre ung grant ost. » « Sire, dit Girart, trop m’anuye que tant desprisiez l’ayde que vous vueil faire. Alez, si vous hastez de moy apporter du harnois frec et moy mesmes conduiray vostre fille vers le geant pour vostre promesse acquiter, laquelle avec voz sept filz vous ramenray au plaisir de Dieu. » Quant le chevalier oyst ainsi parler Girart et le haultain vouloir qu’il avoit il le regarda moult fort et lui sembla bien estre homme de grant façon. Il le veoit estre grant et fort et bien taillié de tous ses membres, et se reconforta et incontinent envoya querir du harnois en son chastel du plus fort que on peust trouver et les fist apporter a Girart ; puis armerent Girart. Quant Girart fut armé, le chevalier prist sa fille et la baisa en plorant et la mere pareillement et la baillerent a Girart, et puis s’en retournerent ou chastel menans le plus grant dueil du monde. Girart et la damoiselle se misrent au chemin et vindrent a l’arbre ou le geant devoient attendre. Ilz descenderent jus des chevaulx et se assirent a terre. Girart estoit moult desplaisant du dueil et du desconfort qu’il veoit mener a la damoiselle ; toutesvoyes il la reconfortoit le plus doulcement qu’il povoit et lui disoit : « Belle fille, ayés bon espoir en vous et vous refortez. Car au plaisir de Dieu vous et voz sept freres delivreray des mains de ce geant et vous remeneray saufs vers voz pere et mere. » Ainsi comme en ces paroles estoient, Girart regarda aval et amont et veist venir le geant amenant devant lui les sept freres de la damoiselle. Quant la damoiselle veist le geant venir elle fut comme pasmee de la paour qu’elle eust de le veoir et se souhaida pluseurs fois morte ou [en] la riviere noyee.

Comment Girart combatist le geant et le tua et rescouist les sept freres et la damoiselle leur seur, et de la grant chiere que leur pere lui fist.

Quant Girart veist le geant venir, il se leva incontinent ; la damoiselle lui ayda a armer sa salade ; et dist Girart a celle damoiselle : « Belle, ne vous desconfortez point, car aujourd’uy au plaisir de Dieu serez asseuree de la grant paour que vous avez. » Girart monta sur son cheval. La damoiselle lui bailla sa lance, et lui dist que pour lui elle voulsist prier. Quant le geant aperceust Girart venir vers lui, de la grant joye qu’il eust se venoit tout poursaillant et ne prisoit Girart tant ne quant. Il vinst pasmoyant sa masue. Moult fierement se regarderent l’un l’autre. Girart picqua cheval d’esperon et baissa la lance et rencontra le geant et l’assigna en la poitrine ung cop si merveilleux que sa lance voula en pieces. Alors le geant leva sa mace pour frapper Girart. Girart guencist arriere et leva son escu. Le cop cheust a terre et entra dedans bien ung pié, et se Girart n’eust guencié le geant l’eust tout fourdroyé de ce cop. Le geant cuida marvoye de ce qu’il se sentist frappé et navré. Girart qui moult estoit desirant de tuer le geant retourna encores sur le geant et lui bailla au plus pres de la ou il l’avoit attaind ung si grant cop d’espee que une playe lui fist en la cuisse moult grande et tant que le sanc en saloit a grant randon ; et au passer que fist Girart le geant leva sa massue en cuidant attaindre Girart sur la teste, mais il faillist pour ce qu’il destourna ung peu arriere ; toutesvoyes il l’attaindist le cheval sur l’arçon de la selle qui fut tout fourdroyé ; et pensez que s’il eust attaint Girart qu’il ne lui eust point falu de mire. Girart veant son cheval mort fut moult doulant et non sans cause, mais lui comme vertueux chevalier moult vivement se getta hors de la selle l’espee en la main, la visiere abaissee, son escu mis en avant et courist sus au geant, si le commença a frapper de son espee en l’assenant sur le costé et le navra moult fort ; dont le geant fut bien couroucié, et cuida marvoyer de ce que Girart lui duroit tant, et s’avança en cuidant frapper Girart, mais il faillist par ce qu’il rencontra une pierre a quoy il choppa et cheust a terre et en cheant sa massue lui cheist hors des mains. Girart qui ne dormoit pas s’avança et prinst la massue et commença a frapper sur le geant ; le geant qui estoit fort a merveilles se releva, lequel estoit moult fort blessié, et vinst a Girart et lui donna ung cop de poing si grant que Girart fut tout estourdy, puis prinst Girart par l’escu et lui tira hors du col, puis a deux mains le hausa et frappa sur Girart ung si grant cop qu’il le feist cheoir a la renverse. Le geant ne le povoit pas bien choisir pour le sanc qu’il lui couroit sur les yeulx des cops que Girart lui avoit donnez.

La damoiselle et ses freres veant Girart estre a terre cuidoient qu’il fust mort, dont ilz eurent grant douleur et cuidoient tous estre perdus. Girart qui estoit vigoreux incontinent se releva la massue en ses mains, desirant soy vengier, frappa le geant si grant cop en la teste qu’il lui fendist la teste en maniere que la cervelle lui sailloit hors. Le geant sentant le cop de la mort getta ung cris si tres horrible que a l’oyr estoit chose espaventable et cheist a terre tout mort et a cheoir qu’il fist prist si grant flac qu’il sembloit ung arbre qui cheist a terre. Quinze piés avoit de longueur quant il estoit en son estant. La pucelle et les seps chevaliers freres veans le geant abatu furent moult joyeux et non sans cause, et fort troublez de ce qu’ilz veoient Girart moult fort blecié. Pas n’estoit de merveilles s’il estoit las et traveillié, car de grans cops avoit receuz du geant et tant qu’il estoit pasmé par terre. Lors les sept chevaliers ayans grans joye et leur seur pareillement qui commença cryer a haulte voix : « Par ma foy, jamais nul jour de mon vivant n’auray mary se je n’ay cellui qui est navré a mort pour amour de moy et cellui qui m’a delivree des mains de ce deable adversier ; se pour moy meurt je prie a Dieu que la mort me soit prouchaine, car apres sa mort jamais plus ne vueil vivre. » Apres le pere et la mere vindrent devers Girart qu’ilz trouverent couchié a terre, et le assuerent d’un couvrechief le sanc et la sueur qu’il avoit ou visaige qui lui couvroient toute la veue. Lors Girart se revint de pasmoison et se leva et dist a haulte voix : « Dieu me doint ceste grace que encores puisse trouver Euriant m’amye par quy j’ay eu maint mal et mainte peinne. Mais pas ne m’en doit desplaire, car vers elle l’ay bien deservy. » La damoiselle entendist Girart et cheist comme pasmee ; son pere et sa mere et ses freres vindrent vers elle et lui aroserent le visaige. Quant elle fut revenue a elle ilz lui disrent que pas n’estoit saige quant encores ne scet la volenté du chevalier ne quel chose il vouldra faire. « Ha sire, dit la pucelle, ores entendis du chevalier qu’il fist ung reclain moult piteux pour une sienne amye qu’il nommoit Euriant par qui il disoit avoir tant de maulx souffert lesquelz il portoit bien en gré. » « Ma fille, dit le chevalier, delaissiez vostre dueil et couroux ; nous irons parler a lui. » Ilz vindrent a Girart et le trouverent couchié sur son escu. Ilz se misrent a genoulx devant lui et le desarmerent du tout puis lui aroserent le visaige d’eaue rose. Apres le seigneur lui dist : « Sire, pas ne sçay vostre nom, mais je vous prie que dire me vueilliez comment vous vous sentez et s’il vous semble que puissiez eschapper. » « Sire, dit Girart, j’ay esperance en Dieu que de mort n’auray garde, ja soit ce que par cest anemy ay esté moult fort blecié, meshuy m’en iray avec vous. Car se demain povoye estre gary, tantost me mettroye au chemin pour aler en une queste ou il couvient que je voise. » Girart se leva sus et ala avec eulx ou chasteau ; quant ceulx de la forteresse les virent venir ilz vindrent au devant d’eulx et avoient la plus grant joye du monde et tous lui crioient : « Sire, a bonne heure soyez venu ! Pardeça de servitute nous avez mis en franchise. A tousjours mais estiesmes perdus se ne fussiez vous. Benoit soit le pere qui vous engendra et la mere qui vous porta quant du terrible geant nous avez fait delivre. »

Alors a grant joye et a grant lyesse entrerent dedans le chastel. Si grant feste menoient le seigneur et la dame et tous ceulx de l’ostel a Girart que merveilles. La fille lui faisoit de moult piteux regars et disoit en soy mesmes que jamais n’avoit plus bel chevalier veu, que ores pleust a Dieu que fusse s’amye mais que amer daignast. Alors de tous costez, varletz et gentilz hommes, chascun se efforçoit de servir Girart. Ilz le menerent en une chambre et le desvestirent et lui misrent a point ses playes ; en la char n’estoit gaires navré parquoy il se deust couchié, fors de grans cops et pesans qu’il avoit receuz dont il estoit las et foulé. Ilz le firent couchier en ung lit pour soy reposer ; quant il eust reposé il se leva et habila et vestist ung mantel d’escarlate qu’ilz lui aporterent puis l’amenerent en la saule. Tous acouroient pour le veoir, car tant bel chevalier estoit que tous disoient que oncques plus bel n’avoient veu. Les tables furent mises et le disner prest. Ilz laverent les mains ensemble puis se assirent. Les sept chevaliers freres le servirent a ce disner, que oncques Girart ne peust tant faire qu’ilz se voulsissent seoir. Le seigneur et la dame s’efforçoient de le conjoyr et faire tout l’onneur qu’ilz povoient. Souvent le regardoit la pucelle qui empres luy estoit assise. Grant desir avoit qu’il la voulsist prier d’amours. Mais a Girart gaires n’en chaloit car autrepart avoit mis son cuer. Moult richement furent servis a ce disner. Quant ilz eurent disné et osté les nappes et lavé, Girart appella le seigneur de l’ostel et lui dist : « Sire, grant necessité est de moy partir pour achever et mettre a fin une chose que j’ay entreprinse. Et pour ce avant que demain vienne je vueil prendre congié de vous en vous merciant du bien et de l’onneur que m’avez fait. » « Sire, dist le chevalier, en moy n’est vous rendre le service et bien que m’avez fait, et aussi a tous mes enffans, car du servage ou nous estiesmes nous avez affranchiz ; a tous avez sauvé la vie. Ma terre et mon avoir vous requiers que vueilliez prendre, et ma fille avec, pour laquelle deffendre avez mis vostre vie en aventure. Car ce ne fust par vostre grant proesse et vaillance a tousjours mais estiesmes en exil. Loué en soit Nostre Seigneur et vous qui de ce peril nous avez getté. » Lors furent alumees torches. Il prinst congié du seigneur et de la dame, de la fille et des sept freres, lesquelz le menerent en sa chambre ou son lit fut moult richement paré et mis a point, puis firent collacion ; apres se partirent et laisserent deux escuiers avec Girart pour le couchier et servir. Girart se coucha qui estoit traveillié, jusques ce vinst le matin qu’il se habila et mist a point et puis vinst en la sale ou il trouva le seigneur auquel il pria que lui voulsist prester ung cheval. « Sire, dist le chevalier, a cheval ne povez faillir car tout ce qui est ceans est vostre ; mais je vous vouldroye bien prier que si tost ne vous vueilliez departir d’icy et attendez tant que soyés plus fort et gary de tout point. » « Ha sire, dit Girart, je vous prie que du demeurer ne me parlez plus ; ja vous ay dit que besoing m’est de partir d’icy pour accomplir mon voyage, que long temps a que l’ay promis. Et pour ce sire vous me pardonnerez car autrement ne le puis faire. » « Sire, dist le seigneur, puis qu’il vous vient a plaisir et que estre ne peult autrement, vostre voulenté se face soit d’aler ou de demeurer. » Alors lui fist amener ung cheval ung des meilleurs qu’il eust.

Comment Girart prinst congié du chevalier et de la dame, et du grant dueil que demena la damoiselle quant elle veist partir Girart.

Apres ce que Girart eust prins congié du seigneur et de la dame, il monta a cheval. La pucelle saichant le partement de Girart estre si subit, en pur cotheron, les cheveulx espars, ayant ung chappellet de roses sur son chief, vint acourant au devant devant la sale ou elle trouva Girart a cheval prest pour soy partir. Icelle pucelle avoit la couleur fresche plus vermeille que la rose n’est en may qui est couloree de blanc et vermeil. Les yeulx avoit beaulx et vairs, les sourcis traictis, le corps bien fait, les bras longs, les mains blanches et bien faictes ; ung petit avoit surlevé son cotteron qui estoit de damas blanc, par quoy on veoit son petit pié.

De la grant haste qu’elle avoit de venir a Girart se bleça ou petit artoil a l’encontre d’une pierre tant que le sanc en sailloit. Quant elle veist Girart estre monté, par grant force d’amours vinst a lui et le prinst par la bride de son cheval et lui dist : « Ha sire, pour Dieu mercy, vueilliez prendre pitié de moy et ne rompés point la grant amour que j’ay a vous. Jusques a ores ne le vous ay osé dire jusques a ce que fussiez gary, car bien cuidoye que ceans deussiez longuement demeurer. » « Belle dist, Girart, je vous jure loyalment que en moy n’est plus de demeurer. Partir me couvient d’icy : pourtant je vous prie qu’il vous plaise moy donner congié. » La pucelle veant que nullement ne povoit tant faire a Girart qu’il voulsist demeurer fut moult doulante. Girart les commanda tous a Dieu, et eulx prierent a Nostre Seigneur pour lui, fors la pucelle qui demenoit grant douleur. Girart se partist du chastel et se prinst a chevauchier bien roidement car tousjours lui souvenoit d’Euriant. Tant chevaucha celle journee sans aucune adventure trouver qui face a raconter. Il veist devant lui ainsi comme a heure de vespres ung chastel moult bel et fort seant sur une riviere et avoit nom icellui chastel Mousson. Il passa le pont et la porte pensant en lui mesmes que celle nuyt vouloit la demeurer, pour enquerir et savoir se aucunes nouvelles pouroit oyr d’Euriant s’amye. Quant dedans le bourg fut entré il veist une dame vefve assise devant son huys, a laquelle il requist que celle nuyt le voulsist abergier. La dame lui respondist moult courtoisement que voulentiers elle le feroit. Il descendist et entra dedans ; assés trouva varletz et serviteurs qui lui prindrent son cheval et le menerent en l’estable ; les autres le menerent en sa chambre.

Le souppé fut apresté et la table mise ; la dame commença deviser a lui ; apres on apporta l’eaue et laverent puis se assirent entre eulx deux et furent tresbien servis. Quant ce vinst apres souppé et qu’ilz furent levez de table Girart prinst congié de la dame et s’en ala dormir, jusques ce vinst le matin qu’il se leva, et n’avoit gaires dormy celle nuyt car il n’avoit fait que penser a Euriant s’amye. Quant il veist qu’il fut cler jour il ala oyr messe ; quant il eust oy messe il prist une souppe en vin et puis prinst congié de son hostesse et monta a cheval et partist de la ville par la porte ou il estoit entré. Toute celle matinee chevaucha tant qu’il vinst assés pres de Metz. Si pria Dieu devotement que de s’amye Euriant peust avoir nouvelle. En faisant ainsi ses prieres se trouva en une lande moult grande et plaine ou il se prinst fort a chevauchier, et vist venir a dextre grant foison de gens a cheval qui fasoient mener devant eulx grant foison de hernois, males et bahus. Girart desirant savoir de leurs nouvelles les surattendist affin qu’il peust chevauchier avec eulx et sçavoir de leurs nouvelles. Ilz vindrent, Girart les salua et eulx Girat, et chevaucha avec eulx.

Comment Girart vinst a Metz et trouva en son chemin gens qui y venoient et lui dirent comment par une femme estrange la seur du duc avoit esté murdrie par quoy ilz venoient pour la jugier.

Quant Girart fut meslé avec eulx moult courtoisement leur prinst a demander a quy estoit le riche arnois qu’ilz menoient. « Sire, dist l’un d’eulx, tout le harnois que vous veez est au conte de Bar, lequel vient cy apres nous et va a Metz pour une piteable aventure que n’a gaires y est advenue. Le duc de Metz nepveu de monseigneur avoit une sienne seur germaine, laquelle de nouvel a esté piteusement murdrie par une femme espaysee qu’il trouva en une forest au retour qu’il fist de saint Jaques ou il avoit esté en pelerinage. Tant estoit amee du duc et si grant fiance avoit en elle que du tout le gouvernement de sa seur lui avoit baillié, et couchoit chascune nuyt avec elle, et saichiez que ce n’eussent estez ses barons et conseilliers il l’eust esposee et prinse a femme. Quant Girart oyst l’escuier qui lui disoit ces nouvelles, il lui demanda combien de temps il avoit que le duc l’avoit amenee. Cellui se pensa ung peu et lui dist la verité. Girart ayant oy l’escuier pensa ung peu en lui mesmes qu’il couvenoit que ce fust s’amye Euriant selon le jour et terme que par le duc avoit esté amenee de la forest ou il l’avoit lassee. Si se teust atant sans lui plus riens enquerir ; car advis lui estoit que lui estre venu en la cité plus amplement le poura sçavoir. Au plus tost qu’il peust se partist d’eulx et vinst en la cité et se logea en ung des meilleurs hostelz de la ville, et tantost apres lui y ariva le conte de Bar, lequel fut moult haultement receu par le duc de Metz son nepveu et fut mené en son palaix ; mais d’icelle venue Meliatir ne s’esjoyssoit gaires, car bien eust voulsu estre a ceste heure en Jherusalem. Moult doulant estoit que Euriant n’estoit arse et brulee. D’autrepart Girart estre arivé en son hostel et en sa chambre manda son hoste, que on nommoit Thibault, et lui pria que avec lui voulsist disner. L’oste veant a son semblant Girart estre homme de façon lui accorda moult voulentiers. La table fut mise ilz se assirent et firent bonne chiere. Quant ilz eurent disné et qu’ilz furent levez de table, Girart pria a son hoste qu’il lui voulsist tenir compaignie jusques au palaix, pour ce qu’il avoit oy dire que jugement se devoit faire d’un crisme que on disoit avoir esté commis par une damoiselle estrange, et que bien fait seroit d’y aler ; car en oyant pletz et procés, jugemens et autres choses touchans justice, a l’oyr on povoit moult aprendre.

« J’ay grant merveille comment ceste damoiselle a eu couraige de murdrir celle dont tant estoit amee. Et pour ce, bel hoste, je vous prie que dire me vueilliez la chose ainsi qu’elle est alee. » « Sire, ce dist l’oste a Girart, puis que savoir le voulez je vous diray toute la verité. »

Lors lui racompta et dist tout au long ainsi que la chose estoit advenue, et ainsi parlant s’en alerent jusques au palaix. Quant la furent venus ilz virent grant assemblee de gens, de chevaliers, de barons.

Le duc de Metz et le conte de Bar son oncle estoient assis sur ung banc bien richement paré pour oyr le jugement de la damoiselle. Girart et son hoste se misrent en la presse avec les autres pour escouter et oyr. Gaires ne furent la arrestez qu’ilz virent ung ancien chevalier qui se leva de son siege, lequel estoit parent de Meliatir, qui commença a plaidoyer la cause d’un lengaige moult affaictié et dist tout hault :

« Mes tresredoubtez seigneurs, pour ce que par vous ay esté requis de parler, il n’est aujourd’uy tresor que avoir voulsisse que droit, loyaulté et justice ne voulsisse conseillier. Mais s’il vous plaist sans plus en riens dire pour ceste fois n’en diray plus, raison le doit : car je suis prouchain parent a Meliatir, car riens ne vouldroye dire ou mettre avant chose dont eust suspection sur moy qui mieulx saura si le die. »

Comment les barons estoient au conseil pour jugier la belle Euriant a mort, et comment Girart emprinst a combatre a l’encontre du chevalier qui l’avoit accusee a tort et sans cause.

Quant le seigneur de Nauvy eust finé sa raison et que autre chose ne vouloit dire, le seigneur d’Aspremont se leva et dist : « Seigneurs, se vostre plaisir est de moy ung peu entendre de ceste chose vous diray mon advis. Verité est que l’omme qui entreprent a faire ung jugement fait grant mal et pechié se il ne dist la juste verité ; jamais a tort jugement ne se doit faire s’il ne scet loyale occasion parquoy a mort doye jugier homme ou femme. Vous avez oy Melyatir qui veult maintenir que ceste damoiselle estrange a esté prinse au fait, ayant la main sur le coutel duquel la seur du duc a esté murdrie. Quant est a moy jamais ne croiray et si est impossible a croire que ceste damoiselle ait commis ce crisme dont elle est accusee, que jamais elle ne fust arrestee ne attendue d’avoir esté trouvee au fait, mais s’en fust enfuye ou musee en lieu que par homme n’eust esté trouvee, et jamais ne se fust endormie avec elle. Oncques tel hardement ne fut en homme ne en femme s’ilz n’estoient hors du sens. Quant est a moy jamais ne le croiray. Elle fut trouvee dormant. Saichiés que en ce point ne le feriés mie, et aussi en veillant jamais ne l’eust frappee que incontinent ne s’en fust enfuye et soy mise a sauveté. Si conseille, et est mon oppinion, que on voise vers elle et que on lui demande se elle a commis le cas : c’elle dist non il couviendra que Meliatir prengne la lance et l’escu pour ce que lui mesmes dist que elle a fait et commis le murdre. Se chose est que la dame treuve champion qui pour elle se vueille combatre Dieu lui porroit aidier. Car selon mon advis la damoiselle n’y a coulpe se autrement ne se peult prouver. »

Alors tous les barons et chevaliers qui la estoient dirent tous a une voix que jamais meilleur conseil ne virent ne plus droicturier n’avoit esté dit. Et conseillerent tous au duc que la damoiselle envoyast querir. Euriant fut amenee, laquelle estoit bien pale et bien deffaicte du desplaisir qu’elle avoit. Quant elle fut amenee devant le duc il lui demanda pourquoy ne a quel cause elle avoit esté si hardie d’avoir murdrie sa seur. « Sire, dist Euriant, oncques jour de ma vie le crisme ne commis. Se il est trouvé et sceu a la verité que aye celle traÿson commise, je abandonne mon corps a faire tel justice qu’il vous plaira. »

Lors Girart saillist en place et dist : « Sire, je m’offre pour elle pour son droit et querelle deffendre. Je dis et vueil maintenir que se Meliatir veult dire ne prouver qu’elle ait commis le murdre dont par lui a esté enculpee, je suis cellui qui vueil prouver pour elle que oncques elle ne le fist. »

Lors Meliatir saillist avant et dist : « Vassal, saichiés que autre chose ne demande. Car avant qu’il soit vespre vous en recevrez la mort, et la desloyale en sera brulee et arse en ung feu d’espines. Riens n’est aujourd’uy au monde que avoir voulsisse, que a l’encontre de vous ne me combate. » « Vassal, dist Girart, vostre hault parler ne orgueilleuses manieres et menaces ne me font de riens esbaÿ. Car tel menace aucunefois qui a grant paour. Je croy que avant que le vespre soit venu on verra lequel de noz deux se gabera de son compaignon. A nul chevalier n’appartient soy vanter ne dire chose dont a autre puist desplaire. Se je treuve baron ou chevalier qui me vueille faire ceste courtoisie de moy prester harnois, des maintenant suis prest de deffendre la querelle de ceste damoiselle. » Quant le seigneur d’Appremont oyst Girart soy plaindre d’armures, il lui dist : « Sire chevalier, pour armures ne destrié ne demourez de deffendre la damoiselle, car assez vous en feray avoir des meilleures que porray finer. »

Comment Girart desconfist Meliatir et lui fist cougnoistre la mauvaise traÿson qu’il avoit commise.

Alors incontinent sans plus actendre le duc fist aprester le champ et les lices ainsi comme pour lors estoit accoustumé de faire, puis firent alumer ung grant feu, puis fut amenee Euriant ou champ, laquelle estoit piteuse chose a veoir, et prioient pluseurs a Dieu qu’il voulsist aidier son champion. Girart se fist armer en son logis des armes que le seigneur d’Appremont lui avoit envoyés. Pareillement Meliatir se ala armé, triste et desplaisant de ce que justice n’estoit faicte d’Euriant ; laquelle estoit devant le feu, ou elle fasoit a genoulx et a mains joinctes son oroison moult devote, priant Dieu que son champion voulsist aydier et secourir aussi vrayement que a tort estoit accoupee. Pas ne l’avoit recougneu car elle estoit en telle paour que mieulx sembloit morte que vive.

Les deux champions furent amenez es lices montez chascun sur ung puissant destrier. Girart veant Euriant empres le feu par grant couraige appella Meliatir et lui dist : « Vassal, il n’est pas temps d’user de menaces : or y perra lequel fera le mieulx. Je vous deffie de Dieu et de la vierge Marie sa mere. »

Alors se reculerent et picquerent cheval d’esperon l’un contre l’autre et baisserent les lances et rencontrerent tellement que leurs lances furent rompues en plus de cent pieces, puis misrent la main a l’espee et se combatirent merveilleusement, et frappoient si grans cops que le feu partoit de tous costez, et tellement combatirent qu’ilz furent tous deux bleciez et navrez. Euriant prioit tousjours Nostre Seigneur de bon cuer que aydier voulsist son champion a son bon droit. Girart et Meliatir se combatoient tousjours a l’espee, et tant que Meliatir, qui estoit hardy et vaillant chevalier, leva l’espee contremont et frappa Girart sur le heaume si grant cop que se Girart n’eust guency il l’eust fendu jusques es dens.

Lors Melyatir lui escria : « Vassal, je croy que aujourd’uy vous monstreray la grant folie que avez entreprinse de vous avoir voulu combatre contre moy. Jamais plus beau jour ne verrez, se ainsi est que a moy ne vous rendez vaincu. » Girart oyant Meliatir l’encommença fort a regarder sans ce que ung seul mot lui voulsist respondre. Il tenoit l’espee en la main dextre et frappa Meliatir sur le heaume si couraigeusement que le nez et la moittié du menton lui abatist tout jus. Le cop fut si merveilleux et si pesant qu’il vinst descendant comme fourdre sur le col du cheval de Meliatir tant qu’il lui coppa tout jus et fut force a Meliatir de tomber per terre lui et son cheval.

Lors Girart lui escria a haulte voix et lui dist a haulte voix : « Vassal, desormais je vous conseille que voz vantises et haulx parlez vueilliez refraindre. Assés de foy ay oy dire que trop parler nuyt, pour ce est ce folie de menacier. Car au departir on verra lequel sera maistre de nous deux. »

Meliatir soy voyant par terre fut bien esbaÿ ; se leva a cop l’espee ou poin, affermant en son coraige que mieux amoit morir qu’il ne rendist a Girart le cop qu’il lui avoit donné. Car si grant angoise avoit que gaires n’en failloit qu’il ne yssist de son sens. Il tourna son escu sur son dos puis a deux mains leva son espee et frappa Girart sur son heaume ung si merveilleux cop qu’il fut tout estonné, dont les barons qui la estoient se esmerveillerent moult et disoient que Meliatir estoit vaillant chevalier et que grant dommaige estoit de les laissier combatre.

Lors Girart, moult honteux de ce que Meliatir lui avoit tant duré, s’approcha de lui l’espee ou poing et lui sembloit que honte lui seroit de le combatre a cheval ; saillist jus de son cheval et s’approcha de Meliatir, desirant lui rendre le cop qu’il avoit receu, hauça son espee et le frappa sur l’espaule dextre ung cop si desmesuré que le bras et toute l’espaule lui abatist ou champ ; puis de son corps le hurta de si grant force qu’il abatist par terre et lui saillist sus, et lui coppa les las de son heaume et lui aracha hors de la teste en lui disant qu’il se tinst pour oultre. Meliatir cognoissant son pechié, par lequel il se veoit en dangier de mort, dist a Girart que le duc et les barons fist venir et que la verité cognoistroit du grant crisme que lui mesmes avoit commis. Les gardes du champ qui la estoient presents firent signe au duc et es barons que la voulsissent venir pour oyr ce que Meliatir vouloit dire. Le duc commanda qu’il fust amené devant lui, et la damoiselle pareillement qui estoit devant le feu attendant la grace de Dieu. Meliatir et la damoiselle furent amenez devant le duc et sa compaignie. Quant la furent, Meliatir commença a dire en hault qu’il estoit digne de mort et que a tort et sans cause il avoit accoulpee la damoiselle, puis leur racompta mot apres autre la cause ne pourquoy il avoit commis le murdre et le mis sur la damoiselle Euriant, laquelle devant Dieu et le monde il descoulpoit du murdre et de la grant traÿson qu’il lui avoit mis sus. Le duc et tous les seigneurs ne se peurent assés esbaÿr de Meliatir et de l’orrible crisme, si le jugerent estre trayné et pendu. Lors Meliatir fut pris et attaichié a la quehue d’un cheval et trayné au gibet et puis pendu. Mais oncques ne fut veu a homme tant recevoir de maledicions que le peuple lui faisoit, mesmement les petis enffans lui getoient boe et ordure en lui disant : « O desloyal chevalier, trop as vescu en terre, quant par ta mauvaise traÿson as murdry Ysmaine nostre damoiselle. » Mais pour chose qu’ilz lui deissent oncques ne respondist mot. Et ainsi fut trayné au gibet et fut payé de sa deserte.

Cy parle du grant honneur que le duc de Metz et les barons firent a Girart et a s’amye Euriant et des recougnoissances qu’ilz firent.

Apres que le champ fut fait et justice accomplie le duc prinst Girart par la main et l’emmena a l’ostel accompaignié de tous les seigneurs qui la estoient. Il fut receu moult honorablement par son hoste.

Le duc prinst congié de lui et le conte de Bar son oncle aussi et emmenerent Euriant. Quant le duc fut ou palaix il envoya ses medicins et sirurgiens a Girart pour le visiter. Ilz furent devers Girart et le visiterent mais oncques ne lui trouverent chose parquoy il deust laissier a chevauchier ne aler ou bon lui sembleroit. Quant Girart eust esté visité les maistres prirent congié de lui et retournerent devers le duc et lui dirent comment Girart n’estoit point blecié dont il fut moult joyeux.

Le duc regarda Euriant et lui demanda se point ne cognoissoit ce chevalier qui pour elle s’estoit combatu. « Sire, dit Euriant, je ne sçay qui il est et ne m’est point advis que jamais je le veisse. Dieu par sa grace lui vueille rendre le grant service qu’il m’a fait. En moy n’est le remercier fors de prier pour lui. » Ung peu vous lairons a parler d’Euriant et retournerons a Girart qui est en son hostel. Quant Girart fut desarmé et mis a son aise, son hoste lui fist apporter prepoint, chausses, robe et ung riche manteau d’escarlate fouré d’armines, puis mist ung chappeau de roses sur son chief, et lui attaicha son hoste ung frumeau d’or moult riche garny de pierres precieuses. Quant il fut vestu et paré pluseurs chevaliers qui la estoient venus le louoient et prisoient, disans entre eulx que oncques jour de leur vie plus bel jeusne chevalier n’avoient veu ne qui mieulx semblast estre homme de hault affaire. Il se partist de son logis moult bien accompaignie et ala a la court, ou il trouva le duc et son oncle, le conte de Bar, qui le receurent moult courtoisement. Euriant le prist moult fort a regarder et le recongneust incontinent et se prinst a tressaillir pensant qu’elle porroit faire, d’aler vers lui ou d’attendre qu’il la recougneust, et disoit en soy mesmes : « Vray Dieu, que feray je ? Yray je vers lui, ou se attendray qu’il viengne vers moy ? Certes je cuide que jamais n’y viendroit car de moy ne luy chault. » Lors sans plus dire comme une femme ravye, non saichant qu’il lui estoit avenu, la larme a l’ueil et mains joinctes, se vinst getter devant lui, lui requerant perdon et mercy.

Lors Girart qui la cougneust, la veant ainsi a genoulx plorant devant lui, la prinst par les bras et la leva et l’embrassa et baisa plus de cent fois. Le duc et les barons non saichans leur adventure se prindrent moult fort a esmerveillier, car l’un ne l’autre ne cognoissoient et furent tresdesirans de savoir de leur adventure. « Belle, dist Girart, reconfortez vous. L’adversité et le mal que avons eu ensemble devons prendre en gré et louer Nostre Seigneur puis que tous sommes venus jusques a cy. Saichiés, belle, que au plaisir de Nostre Seigneur je raray ma terre, car a tort et sans cause par Liziart conte de Forest vous et moy avons esté traÿs. » Le duc et les barons les oyans ainsi parler furent tous esbaÿs encores plus que devant, et pria le duc a Girart que dire et racompter lui voulsist son adventure, et dont il avoit congnoissance a ceste damoiselle pour qui il s’estoit combatu. « Sire, dist Girart, puis qu’il vous plaist le savoir je vous en diray la verité. Il est vray que je suis nommé Girart de Nevers, et ceste damoiselle est appellee Euriant fille du conte de Savoye, avec laquelle j’ay esté norry toute ma jeunesse en l’ostel de son pere. Si advint n’a pas long temps que par maladie son pere morust. Elle et moy estans avec la contesse sa mere nous commençasmes de tant amer l’un l’autre que elle fist promesse de soy en venir avec ou cas que lui promeisse de la prendre a femme. Je lui promis que ainsi le feroye.

Lors manday querre aucuns de mes barons pour lors estans en ma conté de Nevers. Elle et moy advisames heure et temps de nous partir ; tant nous exploitasmes et feismes telle diligence que en une nuyt partismes de Chambery et passasmes le mont du Chat et venismes au giste a Roussillon sans avoir quelque empeschement ; puis le lendemain venismes a Bourg en Bresse ; tant exploitasmes de nuyt et de jour que arivesmes a Nevers. » Et ainsi racompta au duc en la presence de ses barons la maniere comment il avoit perdue sa terre, et la traïson que lui avoit faicte par Liziart conte de Forest. Apres leur racompta toutes les aventures qu’il avoit eues depuis. Le duc et les barons oyant Girart ainsi parler et ses aventures furent bien esbaÿs, combien que autreffois en avoient oy parler, mais pas ne savoient la verité comment la chose avoit esté demenee. « Girart, dit le duc, veés icy le conte de Bar mon oncle et moy qui vous offrons a nostre povoir vous servir et accompaignier jusques a ce que vostre terre sera remise en voz mains. » La n’y eust baron ne chevalier qu’il ne lui promist le servir de son povoir. Girart les remercia bien humblement. Il tenoit Euriant par la main, laquelle lui dist. « Sire, la verge d’or que derriement me donnastes ay perdue par la plus merveilleuse aventure dont jamais oyssiés parler. » Lors elle lui conta la maniere comment elle l’avoit perdue comme par adevant le povez avoir oy. Girart et tous ceulx qui la estoient se esbaÿrent et encores plus quant Girart leur raconta la maniere comment par son esprivier l’anel avoit esté recouvré, lequel il tira hors de son doit et le bailla a Euriant. Elle le prinst et le mist en son doy ou autreffois l’avoit porté et en fut tant joyeuse que merveilles ; par layans se devisoient ensemble des grans aventures et fortunes que a Girart estoient avenues ; tous lui fasoient grant honneur et a s’amye Euriant. Le disner fut prest, ilz se misrent a table, et fut Girart assis au dessus. Euriant fut assise entre le duc de Metz et le conte de Bar. Des metz et entremetz dont ilz furent servis ne vous vueil faire long compte, car si richement furent servis que on ne pouroit mieulx. Quant ilz eurent disné ilz commencerent a deviser ensemble des adventures de Girart et de Euriant s’amye.

Comment Girart vinst au tournoy a Montargis et es monstres.

A ceste heure qu’ilz furent levez de table ariva leans ung jeusne escuier moult courtois et bien aprins. Quant il veist le duc, humblement lui fist la reverence. Le duc qui bien le congnoissoit en sousriant lui dist que bien fust il venu et que dire lui voulsist de ses nouvelles. « Sire, dist il, monseigneur le conte d’Alos vous mande salut par moy, lequel j’ay laissié a Montargis, ou le roy est et tous les grans seigneurs et barons de France. Si advint mardy passé apres souppé Liziart conte de Forest et le conte de Montfort eurent pluseurs hautaines paroles ensemble et tant que le conte de Montfort reprocha a Liziart que par grant mauvaistié il avoit esté cause d’avoir destruit Girart de Nevers et Euriant s’amye qui estoit sa niepce, et que par lui et par son fait eulx deux estoient alez en essil. Tant hault monterent les paroles d’un costé et d’autre que par grant couroux ilz ont entreprins ung tournoy ou chascun d’eulx doit estre accompaignié de ses amis. Et pour ce vous mande vostre cousin le conte d’Alos que vostre arnois mettez a point et vous appareilliez pour estre ce jour au tournoy. Car le conte de Montfort par le grant dueil et courroux qu’il a eu pour sa niepce qui est perdue a mandé tous ses parens et amis. »

Le duc oyant ses nouvelles fut tresjoyeux, mais sur tous autres Girart le fut merveilleusement. Telle joye et lyesse en eust au cuer pour les bonnes nouvelles que advis lui estoit qu’il fust desja au tournoy. Moult desiroit la journee et l’eure que son anemy peust rencontrer. Quant le duc eust oy ces nouvelles, il appella son seneschal et lui commanda que cent arnois fist aprester et les parures et habillemens tous blans pour accompaignier Girart de Nevers auquel il desiroit moult faire service et lui aydier tant qu’il revist sa terre, que Liziart avoit et tenoit par mauvaise traÿson. Le seneschal oyant le commandement du duc fist tout aprester : cent harnois blancs, cent heaumes, cent lances, cent housseures tous blancs comme niege. Quant le duc veist que tout fut prest il fut bien joyeux. Il commença deviser a Girart et lui dist que par droit et raison il devoit bien amer s’amye, car par pluseurs fois il l’avoit requise qu’elle le voulsist avoir a mariage mais oncques ne le volt consentir pour don ne pour promesse que lui sceust faire, mais disoit que tout son temps avoit esté fole femme et de la plus mauvaise vie que jamais femme fut. « Car moult voulentiers l’eusse prinse ce n’eust esté par mes barons qui m’en destourberent. » Quant Girart oïst ainsi parler le duc il fut bien joyeux. Tous les maulx et peines qu’il eust oncques pour elle a celle heure furent obliez pour amour de ce que ainsi saigement s’estoit gouvernee. « Sire, dist Euriant, pas ne vous amoit cellui que si grant peine a mis de vous avoir eslongnié de moy, mais vostre peine et traveil est alegee puis que trouvee m’avez. Loé en soit Nostre Seigneur qui nous a fait ceste grace. Auquel nous devons prier que le demeurant vueille conduire et parfaire ainsi qu’il scet que besoing nous est. »

Ainsi qu’ilz estoient en ses devises le conte d’Alos arriva en la cité de Metz et vinst descendre ou palais et monta amont les degrez en grant compaignie de chevaliers. Avant que de sa venue le duc fust en riens adverty il entra par layans. Quant le duc le veit venir il ala au devant de lui et l’embrassa et incontinent lui racompta la venue de Girart de Nevers dont il fut moult joyeux. Il vinst vers lui et le prinst par la main en soy offrant a le servir de tout son povoir. Girart le remercia chierement. « Girart, dist le conte d’Alos, ores est l’eure et le temps venu que plus deviés desirer, si est de ce que si a point estes venu que a vous ne tient, fors de vous vengier de cellui par quy vous avez esté desherité. Maintenant est en vous d’en prendre vengence. Vostre force ne proesse ne prise en riens se maintenant ne le monstrez. Et quant est a moy pour vous servir suis prest de habandonner corps bien et avoir. » Lors Girart moult courtoisement remercia le conte et lui dist : « Sire, du grant service que me offrez vous remercie, et me doint Dieu tant vivre que le vous puisse remerir. J’ay esperance en Dieu que la peine et le traveil que a sa cause et par sa desloyale traÿson j’ay souffert auray vengence de lui, ou je y moray a la peine. Moult me tarde l’avoir trouvé. » Apres commencerent a parler de pluseurs autres choses. Le souppé fut prest, ilz se misrent a table. Le duc et tous les autres barons firent grant chiere ; chascun se devisoit du tournoy a venir ; peu en y avoit qui ne le desirast. Quant vinst apres et que chascun eust fait bonne chiere et devisé, chascun se retrayst, mais celle nuyt Girart gaires ne dormist pour le grant pensement et desir qu’il avoit de soy trouver ou tournoy. Quant vinst le matin qu’il fut jour chascun se leva, duc, contes et chevaliers qui avoient tout fait aprester pour partir. Les chevaulx furent prestz, entre lesquelx y avoit une belle aguenee sur quoy Euriant monta avec grant compaignie de dames et de damoiselles qui l’accompaignerent. Chascun monta a cheval ; les harnois et bagues furent mises sur chariotz qui estoient desja devant ; tous partirent ensemble de la ville, et tant chevaucherent ensemble qu’ilz vindrent ensemble a Bar le Duc ou le conte les festia haultement car il en estoit adverty. Lequel parla a Girart qui estoit averty de son fait et lui dist que de sa venue estoit moult joyeux et que ores estoit l’eure se jamais le vouloit faire de soy vengier de cellui par quy il avoit tant souffert de maulx. « Sire, dist Girart, Dieu me doint le povoir comme j’ay la volenté de ce faire. » Celle nuyt furent moult bien festiez. Quant vinst le matin, tout fut prest ; chascun monta a cheval ; ilz traverserent la champaigne et chevaucherent tant qu’ilz vindrent a Moret en Gastinois. Quant ilz furent arrivez ilz trouverent beaucop de seigneurs qui aloient au tournois. Ilz firent celle nuy bonne chiere. Quant vinst le demain au matin tout fut prest pour partir, et envoyerent devant leurs forriers a Montargis pour prendre les logis, mais ilz trouverent la ville tant plaine de gens et les fourbours que les jardins estoient tous plains. Mais par l’ordonnance du roy logis leur fut delivré, c’estassavoir pour le duc et sa compaignie, combien que de Girart ne fut oncques faicte mencion car il leur estoit deffendu. Incontinent apres que les logis furent prins, le duc de Metz et Girart ensemble leurs gens vindrent, et demeura Euriant au logis jusques a ce que Girart l’envoieroit querre. Quant ilz entrerent a Montargis ilz avoient grant compaignie avec eulx. Le duc et Girart aloient ensemble, le conte de Bar et le conte d’Alos apres, puis les autres barons et chevaliers apres, et vindrent en leur logis descendre. Le disner fut prest, ilz se misrent a table. Quant ilz eurent disné ilz se leverent de table ; l’eure vinst que les monstres se firent et furent cent chevaliers qui furent tous d’une compaignie. Girart estoit ou milieu d’eulx que oncques par homme ne fut recougneu. De ceulx qui furent es monstres, tant d’un costé que d’autre, ne vous vueil faire long compte affin de abregier nostre matere.

Comment Girart de Nevers gaigna le pris du tournois a Montargis.

Quant les monstres furent faites en la prayerie, ou le roy estoit monté sur ung eschaffault, et la royne aussi accompaignee de pluseurs duchesses et contesses et autres dames et damoiselles ; apres la monstre faicte chascun s’en retourna en son hostel et soupperent et firent bonne chiere celle nuyt, jusques le demain au matin que chascun ala oyr messe, puis retournerent en leurs hostelz et misrent a point leurs besoingnes. Chascun d’eulx prinst la souppe en vin et incontinent vindrent heraulx criant par les rues que chascun se mist a point pour venir au tournoy, et que le roy et les dames estoient desja sur les eschaufaulx. Quant les chevaliers entendirent les cris des heraulx, chascun fist amener son cheval bien en point. Trompettes commencerent a sonner merveilleusement, dont les cuers des nobles hommes se esjoyssoient. Girart et sa compaignie, affin d’estre descongneu, furent couvers de blanc. Chascun monta a cheval l’escu au col et la lance ou poing puis deux et deux se misrent en chemin et partirent hors de la ville, et en passant furent moult fort regardez mais oncques par homme ne furent cougneuz, fors seulement que on disoit qu’ilz estoient au duc de Metz. Quant ilz furent ou champ ilz firent la reverence au Roy et es dames. Le roy les regarda fort et se donna merveilles quelz gens se povoient estre, car a les veoir sembloient anges empennez. Lors passa le conte de Monfort en sa compaignie et en sa routte estoit le conte de Bourgoingne, le conte de Roussy, le conte de Ponthieu, le conte de Saint Pol, le seigneur de Garlande, Le seigneur de Barres et pluseurs autres chevaliers, chascun bien armé et bien en point, la lance sur la cuisse, et passerent pardevant la roy en moult belle ordonnance. Quant ilz furent passez oultre ilz se misrent en conroy. Girart veant le conte de Montfort venu incontinent se ala joindre avec lui ainsi comme a ung trait d’arc tenant sa route a part lui.

Apres vinst Liziart conte de Forest atout moult grant chevalerie. Le seigneur de Bourbon y fut, le seigneur de Chalon, le conte d’Avergne, Le conte d’Auceure, le chastellain d’Isodun, le chastellain de Grantpré. Moult grant compaignie de barons et chevaliers y furent assemblez, chascun desirant acquerir honneur et loz. Quant oultre les hours furent passez, ilz se arengerent et misrent en tresbelle ordonnance prestz pour commencier le tournoy. Lors heraulx publierent de par le roy a son de trompe que chascun laissast aler.

Lors les deux parties s’apresterent pour commencier le tournoy. Lors Liziart conte de Forest, chief de l’une des parties, prist la lance ou poing pour commencier la jouste. La y eust ung herault qui commença a crier : « Qui vouldra la jouste si viengne a cellui, mais je cuide que a l’encontre de lui n’y aura nully qui l’oze attendre ne venir a l’encontre de lui. »

Le conte de Montfort veant l’omme au monde que plus haÿssoit mist l’escu avant et prinst la lance moult forte et royde desirant assembler sur lui. Mais Girart qui moult estoit duit, et prest en armes, s’avança en traversant devant lui tant que ceste jouste lui osta moult courtoisement. Il baissa sa lance et vinst assembler Liziart par grant force tant qu’il peust courre, et Liziart pareillement vinst contre lui. Ilz se rencontrerent par si grant force que a les veoir venir sembloit une fourdre ; du cop qu’ilz baillerent leurs lances rompirent en plus de mil pieces, et fut attaint Liziart ou col par si grant force qu’il renversa cheval et maistre a terre. Si cria Girart tout en hault au parfurnir son poindre : « Ce premier cop soit fait pour amour de m’amye Euriant, » cuidant que nully ne l’eust entendu. Apres ce cop le tournoy commença tresfort. Mains chevaliers y eust abatus, desquelz les chevaulx couroient parmy les prés traynans leurs brides. Maintes bannieres y eust abatues par terre et moult fort se combatirent de tronçons de lances et d’espees. Ou plus espetz du tournay se trouva Girart en frappant de tort et de travers sur hommes et sur chevaulx ; la ou il veoit la plus grant presse il se feroit et jamais ne s’en partoit qu’il ne l’eust esclarcie. Quant pres se trouvoit d’eulx et que il ne les povoit frapper, il leur detourdoit et esrachoit les healmes hors des testes. Il abatoit et confundoit tous ceulx qu’il rencontroit, pour tant que a plain cop les peust attaindre. Le roy et tous les barons se donnoient merveilles de le veoir ainsi vaillant homme. Assés demanderent et enquirent qui il estoit mais oncques personne n’en sceust a parler. « Seigneurs, dist le roy, assés est aparant que devant tous autres il aura le pris et l’onneur, car aujourd’uy je n’ay veu chevalier qui lui ait fait tort. Regardez comment il depart les grans pressés ; veez le trestourner et confondre ceulx qu’il rencontre ; souvent le voy courir et recourir pour secourir sa partie. » Ainsi comme vous oez le roy se devisoit de la vaillance de Girart de Nevers.

Comment le roy et ses barons convoyerent Girart de Nevers jusques en son logis.

Girart estant ou tournoy, faisant merveilles, le conte de Monfort et ceulx de sa partie le suivoient moult de pres, car devant eulx il fasoit place. Tous desiroient savoir son nom et qui il estoit affin d’avoir son accointance. Girart l’espee ou poing regarda sur dextre et choisist le conte d’Averne atout sa route et le seigneur de Garlande qui s’estoient ferus en la bataille du conte de Montfort. Lors Girart tourna celle part. Quant ilz le virent venir il n’y eust cellui que voye ne lui fist ; la pluspart d’eulx regardoient d’un costé et d’autre pour les merveilles qu’ilz lui veoyent faire. Heraulx escuiers et varletz aloient criant apres lui en regardant les dames en disant : « Mes dames et mes damoiselles, vous povez veoir devant vous le miroir des dames, fleur de chevalerie, a qui nul n’est a comparer. Regardez que tout fuit devant lui. » Ainsi crioyent tout le jour apres lui. Tant il fist Girart par sa haulte proesse que Liziart et toute sa route furent chassiés hors du champ, dont le conte de Montfort avoit la plus grant joye du monde ; et y prinst Girart sept prisonniers des meilleurs de la compaignie ; mais mieulx amast avoir pris Liziart qu’il n’eust toute la compaignie, car tant en estoit couroucié de ce qu’il ne l’avoit peu attaindre ne prendre qu’il en cuidoit tout vif marvoyer. Toutesvoyes Girart eust le pris pour la journee. Le tournoy fut achevé, chascun s’en ala en son hostel. Heraulx et trompettes faisoient leurs devois. Le roy et toute la seigneurie convoyerent Girart jusques en son logis. Le roy le laissa la et s’en retourna en son palais, et charga au seigneur de Roye qu’il retournast a Girart et que il lui dist que, devant qu’il partist de la, que le roy le vouloit veoir et parler a lui, car moult desiroit son accointance. Et dist au duc de Metz que dit lui avoit esté que avec lui et en sa compaignie estoit venu. « Sire, dist le duc, verité est que en chemin l’ay rencontré. Je cuide que quant bien l’aurez avisé que bien le cougnoistrez. » Le duc prinst congié du roy qu’il avoit accompaignié et vinst descendre en son logis ou estoit Girart, ou il trouva le seigneur de Roye priant a Girart qu’il vinst parler au roy le demain au mating pour ce que il estoit traveillié. Girat respondist que son commandement feroit de bon cuer. Il pria le seigneur de Roye au soupper et la pluspart de la chevalerie. Il tinst molt grant court celle nuyt sans ce que homme le sceust recongnoistre.

Apres ce qu’ilz eurent souppé chascun s’en ala en son logis. Quant le seigneur de Roye vinst a court, il racompta au roy ce qu’il avoit veu, dont le roy et les barons furent plus esmerveilliez que devant. Le roy lui demanda se point l’avoit oy nommer. Il dist que non mais bien veoit a l’onneur que lui fasoit le duc de Metz et le conte de Monfort et le conte d’Alos qu’il estoit de grant et hault lieu.

Ainsi comme vous oyez le seigneur de Roye fist son rapport au roy.

Apres que Girart veist chascun estre departy de son hostel, y manda querre Euriant s’amye affin que le matin fust devers lui.

Liziart conte de forest estoit en son logis, doulant et triste de ce que ainsi avoit esté rebouté et une partie de ses gens prins, et tout par la grant proesse d’un seul chevalier qu’il desiroit moult a cougnoistre. S’il eust sceu que la deust estre venu pour tout l’or du monde ne s’i fust trouvé. Girart estoit en son hostel bien joyeux desirant que demain vinst. Il se ala couchié mais gaires ne dormist celle nuyt pour les grans pensement ou il estoit. Quant il veist le jour il se leva et ala oyr messe. Au retourner qu’il fist il trouva s’amye qui estoit venue. Tantost courust l’embrassier et baisier devant tous ceulx qui la estoient. Eulx deux ensemble entrerent a l’ostel. Le duc de Metz, le conte de Monfort et les autres barons sceurent qu’elle estoit venue et vindrent devers elle. Euriant, veant son oncle le conte de Montfort, fut moult joyeuse et se mist a genoulx devant lui. Le conte moult hastivement la leva par les bras et la baisa plus de cent fois en lui demandant comment elle avoit fait depuis qu’il ne l’avoit veue, et que estoit devenu Girart son amy.

« Sire, dist elle, veés le la empres vous. » Lors Girart le courust embrassier et firent grans recougnoissances. Le conte ploroit de pitié et de joye quant il leur oyst raconter les peinnes, perilz et travaulx ou ilz avoient estez depuis qu’il ne les avoit veuz. Moult grant feste firent entre eulx. Lors Girart parla a eulx tous ensemble en leur priant que jusques a la court le voulsissent accompaignier. Car son entencion estoit devant le roy et ses barons appeller en champ mortel Liziart conte de Forest pour la grant traÿson qu’il lui avoit faicte. Lors ilz respondirent tous que de corps et d’avoir le serviroient tant qu’il raroit sa terre. Girart les en remercia moult. On amena les chevaulx et une belle aguenee blanche pour Euriant qu’ilz menerent ou mylieu d’eulx jusques a la court. Moult grandement furent accompaigniés de chevaliers et de barons, lesquelx desiroient tous le bien et honneur de Girart pour ce qu’il estoit si vaillant chevalier.

Comment Girart de Nevers vinst a la court et comment il appella Liziart en champ et getta son gaige.

Quant ilz furent a la court ilz descendirent. Girart prinst s’amye par le bras et elle son oncle le conte de Montfort aussi par le bras. Le duc de Metz et le conte d’Aloz aloient ensemble. A celle heure le roy estoit es fenestres de la grant sale de Montargis, qui veist Girart et s’amye et les autres barons venir devers luy. Si demanda au seigneur de Roye qui estoient ses gens qui venoient. « Sire, dist il, c’est le chevalier qui gaigna hier le tournoy. » « Par ma foy, se dit le roy, il m’est advis que c’est la damoiselle de Nevers et son amy Girart qui la tient par le bras, esquelz Liziart fist si grant anuy. » Lors chascun le commença a cougnoistre. Le roy le commença moult fort a regarder puis dist a ses barons : « Je croy que par lui aurons telles nouvelles qui ne seront gaires plaisans a Liziart. » Lors Girart entra en la court et monta amont. Peu en y eust avec le roy qui ne venissent au devant de lui. Girart saichant les honneurs mondains tant comme homme de son eage se mist a ung genoil et salua le roy et apres tous les barons estant avec le roy. Le roy l’embrassa et lui dist : « Girart, de vostre venue avons grant joye, mais vous prions que dire nous vueilliez les adventures qui vous sont avenues depuis le temps que avez esté dehors et en quel lieu avez esté depuis. » « Sire, dist Girart, puis que savoir les vous plaist, de bon cuer les vous diray. »

Lors Girart commença de raconter au Roy comment en la forest d’Orliens il tua le grant serpent et comment il laissa s’amye en icelle forest toute seule. Apres comment il fut a Nevers en guise de jongleur la viole au col ou il chanta devant Liziart a son disner quatre coupplés de Guillaume d’Orenges.

Puis apres comment il se chauffa derriere Liziart et oyst l’estrif et reproche de Liziart et de la vielle Gondree par quy avoit ainsi esté traÿ et perdu sa terre. Et apres lui raconta au long tout ce qui lui estoit advenu durant le temps qu’il avoit esté dehors, dont le roy et tous ses barons furent bien esbaÿs. Lors Girart se mist a genoulx devant le roy et lui dist : « Sire, je vous supplie humblement que droit me vueilliez faire. Je suis prest pour prouver et maintenir ce que vous ay mis avant qui est vray. Faictes mander Liziart et se chose est que au contraire vueille aler, je suis prest de le combatre et lui monstrer de mon corps contre le sien que onques jour de sa vie il n’eust compaignie a m’amye Euriant que vous veés cy presente. » « Girart, dist le roy, se ainsi est comme vous dictes, il n’a pas bien ouvré ne ja bien ne lui en viendra. » Lors le roy par deux de ses chevaliers manda querre Liziart. Quant Liziart fut venu accompaignié de pluseurs barons il se presenta devant le roy qui estoit assis tenant Girart par la main et Euriant s’amye empres lui, dont il eust au cuer grant douleur ; mais pour couvrir son angoisse affin que de nulz ne fust apperceu salua le roy, puis apres Girart et Euriant et tous les autres barons. Quant Girart veist cellui par quy il avoit esté dechassié et desherité, il se leva en piés moult sagement puis se mist a genoulx devant le Roy et lui dyst : « Sire, assés tieng vostre tresnoble memoire estre recors, et aussi des nobles barons qui cy sont presens, que ung temps qui passa, Liziart qui est par dela fist une gaigure de sa terre a l’encontre de la mienne, que ou cas que de m’amye Euriant feroit sa volenté toute ma terre auroit gaignee et que ou cas qu’il ne le poroit faire sa terre je gaigneroye. Et sur ce il ala a Nevers et trouva manieres par le moyen d’une vielle sorciere qui fist tant pour lui qu’elle lui monstra une enseigne qu’elle avoit sur sa dextre mamelle, laquelle homme ne femme n’avoient jamais veue fors elle et moy. Quant il fut retourné devant vous il dist que de Euriant m’amye avoit fait sa volenté es enseignes qu’il avoit veu. Verité est que les enseignes estoient telles, mais du fait il mentoit tout a plain et mentira quant il le vouldra dire. Car par lui mesmes et la vielle ay oy dire le contraire a Nevers quant je chantay devant luy.

S’il est si mal advisé de vouloir contrarier je offre mon corps contre le sien pour le combatre. Et ou cas que ceste chose ne lui face congnoistre je suis content que me faictes copper la teste et que ma terre lui demeure. » Quant Liziart oyst ainsi parler Girart il eust au cuer grant destresse ; neantmoings que le moings de semblant qu’il povoit faire il en faisoit. Au roy dist : « Sire, jamais de ceste chose ne le creez, car assés povez savoir, puis que ung homme pert sa terre et s’amye qu’il ayme bien il ne lui chault gaires de mettre le corps a l’aventure pour tout recouvrer, nonobstant ce peu y peult gaignier, mieulx lui vauldroit aler en essil ou autrepart pour sa folie oblier et celer sa honte que d’avoir ramentu la chose qu’il doit celer. »

Ainsi comme vous oyez parloit Liziart et dist depuis par grant fierté en soy tournant vers le roy : « Sire, je vueil que ardoir me fassiez ou morir par grant tourment ou cas que avant que le vespre soit venu ne le vous rende confus. »

Comment Girart de Nevers desconfist Liziart conte de Forest et lui fist congnoistre et confesser la traÿson qu’il avoit commis a l’encontre de Girart et Euriant s’amye dont il fut trayné au gibet de Montargis.

Quant Girart entendist Liziart il passa avant et prinst le pan de sa robe et le presenta au roy. Liziart ce veant accepta le gaige et le couvrist. Lors le roy ne se volt deporter et leur fist a tous deux baillier ostaige. Lors jour fut assigné et pris de les delivrer. Il n’y eust cellui d’eulx qui assés n’en trouvast et fut prins le jour du champ le jour apres ensuivant qu’ilz eurent bailliez ostaiges. Le jour fut venu pour combatre et les lices faictes et ordonnees. Les champions vindrent accompaigniés chascun de parens et amis et vindrent faire la reverence, requerans que les pleges fussent delivrez. Le roy les delivra, puis apres chascun se mist a point. Quant chascun fut prest le roy les fist venir devant lui pour veoir se aucunement les porroit accorder sans eulx combatre, mais oncques le roy ne les barons n’en peurent venir a chief. La estoit le conte de Bourgoingne qui dist tout en hault que la requeste faicte de par le roy et les barons n’estoit raisonnable ne juste. Et dist : « Seigneurs, vous oyez que Girart le appelle de traïson. Ja Dieu ne plaise que je soye en lieu ou traÿson soit couverte. Il le couvient esclarsir. Car l’escripture nous tesmoingne que l’omme qui est entaichié de traÿson est entaichié du plus villain pechié du monde. Si me semble moult grant folie de les vouloir destourber de combatre. Se ainsi estoit que maintenant l’accort se feist et que a Girart on rendist sa terre pourtant ne demoroit pas la renommee dont Euriant a esté acoulpee et sans cause fut du tout anichillee que tousjours contre son honneur on ne parlast. Et pour ce je conseille tant pour l’un que pour l’autre que eulx les laissiez combatre. » Apres ce que le conte de Bourgoingne eust finee sa raison le Roy se leva en piez et dist que ja ne les deportera et que le conte avoit loyalment dit.

Alors le roy fist apporter les sainctes reliques sur quoy ilz jurerent tous deux. Girart fut le premier et Liziart apres. Quant ilz eurent juré, ilz monterent a cheval moult richement armez et couvers et vindrent ou champ chascun la lance ou poing et baisserent les [lances] et picquerent cheval d’esperon et rencontrent par tel raideur que tous deux se porterent hors des selles et furent si estourdis que longue espace furent gesans que on ne sçavoit s’ilz estoient mors ou vifz. Quant a eulx furent revenuz ilz saillerent en piés chascun l’espee en la main et l’escu avant mis et commencerent a combatre par tel fierté que oncques heaume ne escu ne leur demeura entier que tout ne fust en pieces et leur sailloit le sanc de tous costez. Tant se combatirent que nul ne savoit jugier qui avoit le meilleur. Tous deux s’efforçoient de mettre a mort l’un l’autre. Liziart haussa l’espee et assigna Girart sur la teste ung si merveilleux cop que se Girart n’eust ung peu guency il eust esté mort car le cop fut si merveilleux que le riche sercle d’or garny de pierres precieuses fut party et coppé en pieces et abatist a Girart ung quartier de son escu.

Lors Liziart se recula ung peu arriere et dist a Girart ainsi comme par reprouche ; « Vassal, mieulx vous venist, vous et vostre amye, aler par le païs querant les adventures telles que Dieu vous vouldra donner que de vous combatre a moy. Assés porrez trouver en alant de ville en ville gens qui vous donneront or et argent a grant planté affin que Euriant vostre amye ou tant avez mis vostre amour leur prestez et baillez pour leur voulenté faire car ung tel chaudel vous apareille que la mort en recevrez. » Quant Girart oyst Liziart ainsi lui reprouchier ung seul mot ne lui respondist. Il s’approcha au plus pres qu’il peust et hauça son espee en y mettant toute sa force et frappa Liziart sur le heaume ung cop si pesant que l’un des quartiers du heaume lui abatist sur l’espale et lui emporta avec une oreille et la joue tout jus. Et avec ce lui sailloit le sanc par la bouche et par le nez dont il avoit si grant douleur qu’il cuidoit morir.

Liziart, veant que impossible lui estoit d’eschapper de mort, soy faignant par une cautelle et traÿson moult humblement appella Girart et lui dist : « Noble chevalier remply de toute vertu, je te requiers humblement mercy et te prie que viengnes vers moy, si prens mon espee et me bende les yeulx et me trenche la teste. Mais avant je te diray mot apres autre la traÿson et grant mauvaistie que j’ay commis vers toy et vers Euriant t’amye. Je te prie que haster te vueilles, je sens en moy si grant foiblesse que sur piés ne me puis tenir. Viens vers moy, si me soustiens, puis feras appeller le roy et ses barons devant lesquelx je raconteray tous mes pechiés et leur diray la maniere et comment j’ay devers toy ouvré. » Girart veant Liziart en ce dangier pensa que verité lui dist, se approcha de lui et fist tant qu’il tira sa chemise hors et en tira une grant piece pour lui appareillier sa playe. Ainsi comme il se baissoit pour le lier, prinst sa dage qui estoit moult trenchant et en cuida tuer Girart. Mais Girart s’en apperceust. Il leva les bras contremont et destourna le cop, mais oncques ne sceust tant faire qu’il ne feust blecié ou bras bien parfont. Quant Girart sentist le cop il se tira arriere et lui dist : « O Liziart, traictre desloyal, a ton emprise as failli, laquelle te feray chier comparer. » Il haulça l’espee et attaindist Liziart sur l’espaule ung si grant cop que le bras lui abatist a terre. Lors Liziart pour la grant douleur qu’il sentist cheist a terre. Girart le veant par terre lui saillist sus et le desarma du heaume et ne le volt point occire jusques a ce que devant le roy et les barons eust confessé la traÿson qu’il avoit faicte. Au plus hault qu’il peust appella les gardes du champ et leur dist que le roy feissent venir pour oyr Liziart racompter la traÿson que vers lui avoit commis. Le roy et les barons vindrent. Girart se leva l’espee ou poing, et dist a Liziart que la verité cougneust ou il lui trencheroit le chief. Liziart ayant paour de mort, cuidant en soy que du roy auroit mercy par le moyen des barons, raconta et dist au roy toute la maniere et comment il avoit besoingnié et la grant traÿson qu’il avoit faicte en encoulpant la vielle Gondree par quy tout le mal estoit advenu. Quant le roy l’eust oy, il le fist delivrer es mains du prevost des mareschaulx, lequel le fist trainer au gibet et pendre comme il avoit deservir.

Comment le roy Loys donna a Girart la conté de Forest et lui rendist sa conté de Nevers, et comment Girart prinst a mariage Euriant s’amye, et de la grant qu’ilz firent.

Apres la mort de Liziart, le roy prinst Girart par la main et lui dist : « Des maintenant vous rens vostre terre, que a tort et sans cause vous avoit esté ostee. Et avec ce vous metz en saisine et possession de la conté de Forest, laquelle je vueil que tenez en fief de moy ainsi comme devant fasoit Lisiart. » Girart se mist a ung genoil et remercia treshumblement au roy et lui fist hommaige ainsi armé comme il estoit. Puis se departist le roy tenant Girart par la main et le mena jusques en son hostel ou il se desarma. Apres vinst ou palais bien accompaignié de ducs et de contes ou du roy et des barons furent receuz a grant joye et a grant lyesse. Se dire et racompter vous vouloye les grans honneurs et festes que on feist a Girart et a Euriant s’amye trop porroit eslongier nostre matiere.

Apres ce que Liziart fut mort par le commandement du roy Girart rescrivist hastivement a ses barons de Nivernois que sans plus arrester lui amenassent la desloyale vielle Gondree pour la payer comme elle avoit deservy. Alors le messagier s’en departist et vinst a Nevers et bailla ses lettres es bailli et gouverneur de Nevers. Quant ilz eurent leu les lettres et entendu le contenu en icelles, jamais plus grant joye ne lyesse ne fut veue en la cité de Nevers, quant la verité sceurent que leur naturel seigneur ravoit sa terre et son païs quitte et delivre. Tost et hastivement prindrent la desloyale vielle et la misrent en une prison moult obscure. Apres escripvirent lettres es barons du païs des nouvelles qu’ilz avoient eues, dont ilz furent moult joyeulx. Au plus tost qu’ilz peurent vindrent a Nevers le seigneur de Mercilly, le seigneur de Rochefort, le seigneur de Chastelus et le seigneur de Anesy et pluseurs autres barons et chevaliers en grant nombre. Quant tous furent arivez a Nevers ilz firent prendre et loyer la vielle et la monterent sur une grosse mule et la emmenerent a Montargis ou ilz trouverent le roy et tous les barons a qui ilz firent la reverance. Puis vindrent a Girart leur seigneur et leur damoiselle Euriant. Pitié estoit de les veoir. Assés lui demanderent et enquirent des fortunes et adventures que avenues lui estoient. Girart leur en raconta et dist au long ce qu’il en estoit. Puis lui livrerent la vielle Gondree, laquelle il delivra au prevost des mareschaulx pour en faire justice.

Comment la faulce vielle Gondree fut arce et brulee en ung feu d’espines.

Apres ce que tout fut fait et mis a son premier et deu estat et la vielle brulee, le roy pour faire plus grant honneur a Girart manda la royne et toutes les dames du païs et fist esposer Girart et s’amye Euriant et fist la sollempnité des nopces tenant court ouverte huit jours durans. De la feste qui y fut faicte ne vous vueil faire long compte, mais bien vous ose dire que long temps par avant la pareille feste ne fut veue de joustes, tournois et dances ; des grans dons que le roy y fist ne vous vueil parler, car ilz furent si grans qu’il n’y eust cellui qui au departir ne s’en louast. Quant ce vinst au .ix.^e jour la court se departist, Girart prinst congié du roy et de la royne, aussi fist Euriant. Ilz se misrent au chemin, le duc de Metz et le conte de Montfort avec eulx, et vindrent tous a Nevers ou a grant joye furent receus des nobles et du commun peuple.

Apres qu’ilz eurent la demeurez huit jours le duc de Metz et le conte de Monfort prindrent congié du conte de Nevers et de la contesse Euriant. Apres leur departement Girart ala prendre possession de la conté de Forest et receust les homaiges et feaultez des nobles du pays et l’obeyssance des villes et chasteaux. Puis s’en retourna a Nevers ou long temps vesquirent ensemble en bonne paix et amour, et eurent deux moult beaux filz dont l’un eust non Loys et l’autre Girart. Et furent en leur temps moult cremeuz et doubtez.

L’esné fut conte de Nevers et l’autre conte de Forest, apres le trespas du conte Girart leur pere et de la contesse Euriant leur mere, pour lesquelz je prie a Nostre Seigneur qui vueille avoir leurs ames et les nostres quant de ce siecle partiront, Amen.

Si fine le livre de Girart de Nevers et de la belle Euriant s’amye qui fut escript par moy Guiot d’Augerans par le commandement de mon tresredoubté et souverain seigneur monseigneur Phelippe par la grace de Dieu duc de Bourgoingne, de Brabant et de Lembourg, conte de Flandres. etc.