Table des chapitres et des illustrations (continued 2)

Il m’est venu volenté d’accomplir ung voyage que pieça ay entreprins de faire ; parquoy je vueil prendre congié de vous, lequel vous me donnerez s’il vous plaist. Et s’il advenoit que aucun affaire vous survinst je seray prest de vous secourir pour tant que je en soye adverty de par vous, car comme a vostre chevalier me povez commander. Vous priant que, avant que me parte de vous, me vueilliez dire vostre nom. » « Sire, dist la pucelle, puis que mon nom vous plaist savoir moult voulentiers le vous diray : mon pere eust a nom Trargis et je suis appellee Engline. De mon pere et de mes freres avez prins vengence sur cellui qui a ses deux mains les avoit occis, dont a tousjours mais seray tenue et obligee a vous. Je vous prie aussi que vostre nom me vueilliez dire, et se vostre plaisir est de demeurer, ma terre, mes chasteaulx et tout ce que j’ay en ce monde vous est abandonné pour en faire a vostre plaisir, et moy mesmes me donne a vous pour estre vostre femme ou vostre amye s’il vous plaist, laquelle chose chier amy vous prie que vueilliez faire. Je suis de grant lignage, ja soit ce que dame ne damoiselle ne se doit prisier ne vanter. » Girart, qui aperceust assés qu’elle avoit s’amour en lui, lui dist : « Ma damoiselle, pour Dieu ne vous vueille desplaire. Car pour tout l’avoir de Constantin le riche empereur de Romme ne vouldroye laissier de faire le voyage que ay entreprins. » Quant la damoiselle vist que Girart ne vouloit point demeurer et que il avoit le cuer autrepart elle devinst toute pensive et ne povoit parler de desplaisir. Girart la veant en ce pensement la prinst par la main et lui dist : « Ma damoiselle, il n’est point possible que je puisse demeurer, » et lui conta tout son affaire, le grant anuy et la grant perte de sa terre qu’il avoit perdue, et encores plus plaignoit s’amye Euriant. Quant la pucelle oyst qu’il parloit de s’amye, oncques n’eust au cuer plus grant douleur, et dist : « Las moy doulante, comment poura mon cuer soustenir le desplaisir et peinne que j’ay a present et auray de perdre cellui en quy m’amour ay mise et en quy j’avoye toute mon esperance ! Maintenant voy je bien que j’ay perdue ma peinne de ainsi avoir mis mon amour en lui, combien qu’il me aist mis hors de grant maleurté et de grant peinne, si m’a il mis en plus grant mil fois, dont je en suis cause et est par moy, car c’est chose clere et chascun le scet que se il ne fust icy venu jamais il ne fust advenu que me fusse enamoree de lui. »

Ainsi comme vous oez la pucelle se excusoit. Puis apres dist en elle mesmes : « Bien appert que pas ne suis sage quant la coulpe en mettoye sur lui et moy mesmes m’en excusoye. Certes pas ne l’en dois blasmer, mais mon cuer qui a le amer m’a contraint et mes yeulx par quy j’ay esté traÿe ; lasse je en cuidoye estre au dessus, or voy je bien que je en suis bien loings. » Ainsi comme vous oyez se complaignoit la damoiselle. Et Girart a qui il tardoit moult soy de partir prinst congié d’elle et de tous ceulx de l’ostel et monta a cheval et se mist en chemin pour trouver et enquerir nouvelles de s’amye Euriant, de laquelle oncques ne peust trouver aucunes nouvelles.

Comment Girart se partist du chastel de la damoiselle et vinst a Chalon en Champaigne ou il fust long temps malade.

Ainsi comme vous avez oy Girart se partist du chastel et de la damoiselle et chevaucha six jours moult doulant triste et pensif, dont il fut tellement malade qu’il demeura au lit a Chalon en Champaigne en l’ostel d’un notable bourgeois ou il demeura moult grant espace de temps ; le boire et le maingier perdist, dont il devinst tant sec et tant magre que merveilles, et n’estoit riens qui le peust resjoïr tant pensoit a s’amye Euriant ; il se amoit austant mort que vif et finablement devint si au bas que a la fin il perdist toute cougnoissance et d’Euriant ne d’autre chose ne lui souvenoit plus. Et en fust bien doulant le notable bourgeois son hoste, lequel avoit une tresbelle fille, gente, courtoise, gracieuse et plaisant austant que faire se povoit, laquelle estoit ung jour assise en la chambre de son pere ou elle ouvroit d’or et de soye moult richement de florettes sur ung drap ; elle qui chantoit merveilleusement bien commença a dire une chançon et tant que en la chançon elle nomma Euriant. Girart qui estoit en son lit couchié oyst celle chançon et oyst s’amye nommer. Quant la chançon fut assouvye et que Girart l’eust bien entendue, il se assist sur son lit et commença a penser grant piece, puis dist : « Las moy, le mal que j’ay souffert m’a tourné a grant desplaisir ; je pense que jamais ne sauray trouver le lieu ne l’estre ou est m’amye ; bien voy que l’amour que lui avoye est obliee ; pas ne me merveille se je suis affoibly quant j’ay mis en obly celle qui pour moy a souffert tant de douleurs. Je me vueil efforcier jusques a ce que puisse aler par le pays enquerir d’elle ; se je me puis trouver fort, jamais jour n’aresteray jusques a ce que l’auray trouvee, et pour chose qui me puist avenir ne laray que ne l’emmaine se elle est en vie. » Et pour soy resjoyr et prendre courage commença Girart a chanter bien doulcement et tant que la fille de l’ostel l’oyst et s’en merveilla moult et l’escouta tres volentiers, et pensoit que Girart fust cheu en frenaisie comme il estoit.

La pucelle qui estoit courtoise vinst a Girart, lequel elle trouva assis dedans son lit, et lui pria bien doulcement qu’il se voulsist recouchier, en lui priant qu’il ne se voulsist troubler de ce qu’elle estoit la venue. « Belle, dist Girart, vostre venue m’est moult plaisant mais je vous prie que me faictes apporter a maingier. » Incontinent la pucelle lui fist du lait d’amandres et lui apporta, lequel il beust tresbien, dont la pucelle fut tres joyeuse. Puis il demanda a la pucelle se jamais avoit oy parler d’une damoiselle qui avoit nom Euriant ; la pucelle lui dist que oncque ne l’avoit veue ne congneue, ne que d’elle n’avoit oncques oy parler. « Sire, dist elle, je fus ores troublee quant ainsi vous oys chanter. » « Belle, dist Girart, c’estoit pour moy reconforter, car a celle heure il me souvint de celle pour qui ce mal m’est venu. Car nagaires en chantant la vous oys nommer. » « Sire, dist la pucelle, a ce que j’entens de vous le mal que si long temps avez eu vous est venu d’amer. »

Lors Girart lui raconta tout son fait, son anuy et sa grant perte et de Euriant s’amye. Quant la pucelle eust escouté Girart bien au long, elle lui dist : « Sire, a vous ne a autre n’aviegne jamais de vouloir esprouver s’amye. Il m’est advis que ung homme de grant façon peult assés tost faire une amye ; ligiere chose est de la furnir, mais de la bien savoir entretenir est le sens ; cellui qui se sent avoir bonne amye jamais ne la doit esprouver. » Girart oyant la ainsi parler la pucelle lui dist : « Belle, vous dictes verité, dont humblement vous mercie moult ; grant confort m’avez donné et avez esté mire du mal que si long temps m’a tenu ; tant par vostre parler que par vostre chanter m’avez mis au dessus. » Adonc la pucelle le fist recouchier et le venoit souvent visiter et si bien pensa de lui qu’il revinst en sa force.

Comment la pucelle fille de l’oste dona a Girart ung esprivier a prendre congié d’elle.

Quant Girart se sentist fort gary il dist que jamais ne cesseroit jusques a ce qu’il eust trouvé nouvelle de Euriant, et la deust il aler querre en Angleterre ou en Escosse, et que jamais son cuer n’auroit joye jusques a ce qu’il l’aist trouvee.

Il appella la pucelle et lui dist : « Belle, je vous prie que je sache ce que je dois ceans. »

« Sire, dit la pucelle, je pense que vous n’avez apporté gaires d’argent avec vous car long temps a que partistes de vostre pays ; se ne seroit pas courtoisie se je prenoye gaige de vous. Je vous tiens assez pour tel que quant vous aurez le povoir que vous nous contenterez bien. Et vous prie qu’il vous plaise prendre cestui esprivier et l’emporter avec vous affin qu’il vous souviengne de l’ostel de ceans. Et saichiez de vray, ainsi comme cellui qui le m’a donné m’a dit, que c’est le mieulx fait et le meilleur que on pourroit trouver. » Girart prinst l’esprivier par les longes qui estoient moult riches, le touret estoit de fin or et avoit dessus ung riche rubis, et remercia bien chierement a la pucelle. « Sire, dit la pucelle, tout tant que j’ay est en bien a vostre commandement. » « Belle, dist Girart, je me sens tant tenu a vous que a tousjours me tiendray pour vostre amy. Et s’il vous plaist moy riens commander je suis cellui qui entierement l’accompliray. »

Avec ce la pucelle lui donna draps, linges et robes pour ce qu’elle savoit bien que les siens ne valoient riens. Girart remercia plus de cent fois la pucelle. Il fist amener son cheval, qui estoit gras pour le bon sejour qu’il avoit eu, et prinst congié de [la] pucelle et monta a cheval et se partist de Chalons et print son chemin contre Lorraine, en demandant et enquerant tousjours de s’amye, mais oncques ne trouva homme ne femme qui lui en sceust dire nouvelle, ja soit ce qu’elle fust ou pays, mais son nom n’avoit voulu dire, et tousjours chevaucha Girart par mons et par vals tant qu’il arriva a Couloingne.

Comment Girart vinst a Couloigne et comment il y fist de merveilleusement beaux fais d’armes contre les saines.

Quant Girart eust passé la Champaigne, Bar et Lorraine, il ariva a Couloigne et vint descendre en l’ostel d’un moult riche bourgeois qui estoit bien doulx homme et debonnaire, lequel avoit a nom Adam le gregois. Quant il veist Girart estre descendu il fist par son varlet prendre son cheval et le mener en l’estable. Icellui Adam vinst a Girart et lui dist que en son hostel fust tresbien venu, et sa femme pareillement, et le prirent par les mains et le menerent en sa chambre et firent mettre la table et apporter a maingier, puis se assirent tous trois ensemble et firent bonne chiere, car viande avoient a planté et bonnes.

Ainsi comme ilz [furent] ou mylieu de leur disné leur fut rapporté et dit par l’un des varletz de l’ostel que les saines venoient devant la cité pour la assigier et que les fourbours ja estoient ars et brulés et les vignes coppees et que desja ilz estoient escarmuchans es portes de la ville, puis leur conta comment leurs navires estoient sur la riviere chargiés de vivres et d’artillerie et que tous se lougeoient entre la riviere et la porte des trois roys en moult grant puissance et grant nombre de gens moult bien en point ; et que ilz estoient gens de grant entreprinse et que desja avoient prins et mis en leur subgection pluseurs villes et chasteaux. Droit a ceste heure que le varlet de l’oste leur contoit ces nouvelles, ung messagier vint au duc Milon, qui alors estoit seigneur de la cité, lui dire les nouvelles. Quant le duc entendist que les saines l’estoient venu assigier il eust doubte et paour pour ce que si soudainement estoient venus sans ce que riens en sceust car pour le jour il n’avoit gaires grant chevalerie ne gens pour combatre. Adonc comme saige et vaillant prince fist publier a son de trompe par toute la cité que tout homme se mist en point pour deffendre leur ville.

Alors chascun se mist en armes et monterent sur les murs sur les tours et sur les portes pour deffendre leur cité.

L’oste de Girart se leva de table et lui dist : « Sire, moult grant bruit se fait en la cité. » Lors Girart fist oster la table et se leva incontinent, ayant grant paour que l’ost ne se deslogast avant ce que a eulx se fust combatu. Moult doulcement appella son hoste et lui pria que il peust avoir des armeures et qu’il avoit grant desir de estre armé. Quant l’oste entendist Girart et la bonne voulenté qu’il avoit, incontinent vinst en sa chambre et prinst du harnois tel que pour lors on portoit en armes, et l’apporta a Girart et l’arma tresbien et puis lui bailla son escu couvert de vermeil. Quant Girart se veist armé et son cheval tout prest et bien en point il saillist sus sans mettre le pié en l’estrié. L’oste fist tirer son cheval pour le convoyer jusques a la porte ; Girart avoit sa lance en sa main, en laquelle avoit une enseigne rouge, et s’en vint a une poterne avec son hoste et saillist es champs et choisist sur destre du grant chemin .x. chevaliers et .xx. qui les suyvoient. Il entrecopa le chemin, que oncques par les vingt ne fust veu, et vint frapper sur les .x. chevaliers et baissa la lance et en rencontra ung, lequel perça tout oultre et l’emporta a terre. Il retira sa lance du corps du chevalier mort et vint frapper sur les autres et tellement les esparpilla que avant que sa lance feust rompue ne cassee il en abatist quatre. Au quart sa lance rompist, et du tronçon qui lui demeura en la main en abatist ung autre par terre, puis mist la main a l’espee et commença de frapper sur les autres cinq et frappoit si menu qu’ilz n’avoient pas loisir de eulx deffendre. Droit a ceste heure que Girart se combatoit, le duc Milon estoit a la porte regardant les vaillances que Girart faisoit, qui estoit chose increable qui ne l’eust veu. Il se escria moult hault et dist a ses gens qu’ilz secorissent le chevalier et que grant damage seroit se par faulte de estre secoru il estoit occis ou blecié a mort.

Lors se partirent de la cité cent chevaliers pour le secourir. Le duc Milon saillist apres, mais si tost ne sceurent estre vers Girart que desja il n’eust desconfy les .x. chevaliers. Mais saichiés de verité qu’il n’avoit escu ne lance ne harnois entier que tout ne fust mis par pieces, et eust esté desconfy se il n’eust eu si tost secours, car les .xx. chevaliers qui venoient apres les .x. l’avoient desja avironné et ne povoit faillyr de estre mort ou prins. Quant les saines virent venir le secours a Girart ilz furent esbaÿs et ne savoient que faire d’atendre ou de fuyr. Mais le duc et ses gens les hasterent tellement que oncques n’eurent loisir de fuir ne de eulx deffendre, et tant que le duc vint la lance en l’arrest encontre l’ung de ses saine et l’emporta a terre tout mort et puis combatist vaillamment tant que aucuns des saines se misrent en fuite, lesquelz furent suys par Girart et les autres chevaliers jusques tout dedans leurs tentes et leur copperent les cordes de leurs tentes en demenant tel bruit et tel noise que a les oyr sembloient estre dix mil, par quoy tout fut esmeu et se misrent tous en armes, lesquelz estoient bien cent mil hommes. Quant le duc vist la maniere qui estoit homme de guerre il fist tromper la retraite et tout le petit pas sans se effroyer tinst le chemin contre la cité et envoya hastivement ung messaige devant dire qu’il eust secours car il vouloit combatre ceulx de l’ost. Le messaigier dist son messaige es bourgeois de la cité lesquelz furent incontinent prestz et saillirent de la cité bien .xv.^m bien en point et bien encoraigiez de combatre et de secorir leur seigneur. Les dames bourgeoises et pucelles monterent sur les murailles pour veoir la bataille, lesquelles prioient Dieu, les unes pour leurs amys, les autres pour leurs peres et freres et les autres pour leurs maris ; et entre les autres y estoit la belle Aglentine qui estoit sur une tour accompaignee de ses damoiselles, fille du duc, de laquelle lairons a parler et parlerons d’autre matiere.

De la grant bataille qui fut devant Couloingne ou Girart fist merveilles.

Quant ceulx de la cité furent saillis hors pour secourir leur duc, au plus tost qu’ilz peurent ilz aborderent a lui, dont il fut tresjoyeux quant il les veist aprochier, mais sur tous autres Girart avoit tel joye de ce qu’il veoit la chose approchier car advis lui estoit que les ungs ne les autres ne povoient reculer sans avoir bataille. Il regarda et veist que sur dextre venoit ung chevalier moult fierement chevauchant la lance ou poing et le penon desploié qui partoit de la bataille des saines pour los et pris acquerir. Apres cellui en vinst ung autre, lesquelz commencerent a aprouchier ; quant ilz furent assés pres l’un commença a crier : « Entre voz couloignois couars et faillis y a il personne de vous qui soit si hardy de venir rompre une lance a l’encontre de nous ? Je sçay que aujourd’uy vous tuerons tous et entrerons en vostre cité et de voz filles et femmes ferons noz volentez, que ja ne sera en vous le contredire. » Quant Girart oyst ainsi parler le saine grant desir eust de le rencontrer. Il prinst sa lance et pica cheval d’esperon et vinst a l’encontre du saine et tellement le rencontra qu’il le getta a terre et puis lui dist : « Vassal, c’est folie de soy venter, car pour voz hautes menaces la chose n’aviendra pas ainsi comme vous pensez. » Girart avoit beau parler car l’autre estoit navré a mort et n’avoit garde de soy relever. Girart le laissa la et regarda es batailles qui ja estoient prestes pour assembler et veist ung autre chevalier sainois qui estoit party pour encommencier le hutin ; chevauchant entre deux rencs moult richement en point Girart pica cheval d’esperon et vinst contre le saine.

Le saine veant Girart venir sur lui mist la lance en l’arrestz et picque contre et rencontrerent si bien que la lance du saine rompist en pieces, mais celle de Girart non car elle estoit grosse et forte et tant que le saine cheust a terre et son cheval sur luy et tellement qu’il eust ung bras rompu. Les deux hostz veant celle jouste priserent grandement Girart ; mesmement les dames qui estoient sur les murs en tindrent parlement ensemble. Mais sur toutes celles qui y estoient Aglentine la fille du duc en tinst grant parlement. Elle appella Florentine qui estoit au plus pres d’elle et la prinst par la main et lui dist : « Belle, je te prie par la foy que tu me dois se tu as bien advisé ce chevalier, comment il est duit et bien aprins de porter armes ! N’as tu pas veu quel cop il a donné au saine ? Certes moult volentiers le verroye. En ceste ville est aujourd’uy venu, ainsi comme m’a esté dit. Pleust a Dieu que il m’amast autant que amer le voudroye. » « Dame, dist Florentine, il est bien digne d’estre amé, que ores pleust a Dieu qu’il me fust cousté tout ce que sur le corps de moy ay vestu et une nuyt me tinst entre ses bras. »

Lors Aglentine, enflambee comme ung charbon, moult fierement regarda Florentine et lui dist : « Comme estes vous si abandonnee ne si hardie de vouloir amer cellui ou du tout j’ay mon cuer mis ? Il auroit le jeu mal party se pour vous prendre il me laissoit. Trop vous voy ores oultrecuidee quant devant moy voulez aler. Pensés autrepart, mettez vostre amour ailleurs, car de vous prendre a moy riens ne porriez conquester. » « Damoiselle, vous oyez ce que vous dis, a vous ne me vouldroie prendre, mais toutesfois je vouldroye estre s’amye. » Du debat des demoiselles vous lairay a parler, et parlerons des saines et couloignois qui estoient en bataille l’un devant l’autre.

Comment le duc Milon de Coulongne gaigna la bataille sur les saines par les grans proesses de Girart de Nevers et de la grant gloire qui lui fut faicte quant il rentra a Couloingne.

Quant les saines veirent que Girart avoit abatu leur chevalier ilz le voulsirent secourir et baisserent leurs lances et ceulx de Couloingne pareillement pour secourir Girart ; et assemblerent d’un costé et d’autre et y eust maintes lances rompues et maintes escuz perciez, grant foison de chevaliers et chevaulx portez par terre, maintes poins, maintes testes coppés. Girart les veant ainsi estre assemblez s’avança et entra en la presse de la bataille et commença a combatre vaillamment et tellement qu’il n’y avoit gaires homme qui l’osast attendre ; ainsi combatoit merveilleusement et de grant puissance car il leur trenchoit leurs harnois tous en pieces. Et tant et si vaillamment combatist qu’il perça la bataille des saines tout oultre et puis retourna dedans faisant merveilles, et choisist ung saine merveilleusement grant auquel Girart avoit veu faire merveilles et tuer pluseurs coulongnois. Desirant tresfort combatre a lui, Girart prinst une lance et vinst a ce grant saine pour le assembler. Le saine ainsi veant venir Girat contre lui s’avança contre Girat et frapperent si grant cop de lance, lesquelles estoient grosses et fortes, que eulx et leurs chevaulx cheurent a terre ; mais incontinent se releverent en piés chascun l’espee ou poing et se combatirent merveilleusement tant que le sang couroit jusques a l’esperon de tous deux.

Quant le saine vist qu’il ne povoit desconfire Girart furieusement se approcha de lui pour le cuidier tuer, mais Girart qui estoit expert en guerre desmarcha, advisant le saine avoir failly, leva son espee a deux mains et frapa sur le saine ung si grant cop qu’il lui coppa le bras dont il tenoit l’espee. Quant icellui saine se sentist ainsi blecié il getta ung merveilleux cry, car il estoit grant et gros plus d’un pié de hauteur que homme de la compaignie, auquel tous les saines avoient toute leur esperance que par lui gaigneroient la bataille. Car en son temps avoit desconfy pluseurs vaillans chevaliers en champ. Alors de tous costez pour le secourir et aydier les saines y acorurent et d’autrepart le duc Milon et sa compaignie vindrent secorir Girart, mais oncques les parties ne y sceurent si tost estre venu que Girart ne lui eust coppee la teste.

Alors a la rescouse de Girart la bataille fut grant et orrible a veoir et y eust pluseurs nobles chevaliers tuez et especiaulment per Girart car quant il vist son secours empres lui il commença a combatre si terriblement que tous ceulx qu’il frappoit il les abatoit tous mors, et n’y avoit si hardy saine qui l’osast attendre, neantmoings qu’il avoit une playe ou costé dextre qui lui grevoit fort. Ce non obstant se remist en la bataille et avisa ung saine qui avoit combatu contre le duc, duquel Girart avoit grant despit, pour ce aussi que tout le jour lui avoit veu fort fouler les colongnois ; Girart prinst ung corage en lui merveilleux et s’approcha du saine plain de couroux et d’ire. Le saine qui en riens ne le doubtoit se approcha aussi de Girart, chascun l’espee ou poing, et se assemblerent et commencerent a frapper par telle maniere l’un sur l’autre que leurs escus et harnois misrent tous en pieces et se navrerent tresfort. Girart moult desplaisant de la mort du seneschal de Couloingne que icellui saine avoit tué, ja soit ce que oncques n’avoit eu accointance a lui fors tant seulement pour les proesses et vaillances qu’il lui avoit veu faire, hauça son espee en hault a deux mains et frappa sur le saine ung si merveilleux cop qu’il lui fendist son heaume et la teste jusques es dens, et cheust le saine a terre tout mort, dont ceulx de sa partie furent moult dolans et desplaisans car c’estoit l’ung de ceulx sur qui ilz avoient toute leur esperance de gaignier la journee.

Alors le duc des saines, veant la grant perte qu’il avoit eu par ung seul chevalier, lequel il veoit mort devant lui, commença a crier a ses gens en les blasmant pourquoy ilz avoient souffert de tuer son chevalier par Girart en leur commandant et amonnestant comment qu’il fust que Girart lui rendissent mort ou vif.

Lors de tous costez approcherent Girart en tirant dars enpennez et viretons contre lui ; mais gaires ne lui en chaloit car il commença a frapper sur eulx par tel maniere qu’il les abatoit plus drul que mouche et ne l’osoient aprouchier ; mais on dit que la force paist le pré, car le duc des saines pressoit si fort Girart que se le duc Milon n’y fust si tost venu Girart eust esté rué jus. Lors eussiez veu combatre merveilleusement les saines et les couloignois. Et en combatant que Girart sentist son secours estre venu regarda a costiere et vist le duc des saines qui abatoit coulougnois a force. Icellui Girart vinst a lui et lui donna si grant cop sur son heaume qu’il l’abatist a terre, puist Girart vinst sur lui pour lui copper la gorge, mais le duc se rendit a lui et lui bailla son espee. Adonc Girart le prinst a mercy et le bailla au duc Milon qui moult joyeulx estoit de tenir son anemy prisonnier, desirant moult cougnoistre Girart par lequel il estoit au dessus de ses ennemis. Les saines veans leur duc prisonnier, lequel le duc Milon fist emmener a Colongne par douze chevaliers, et leurs capitaines mors et desconfis, et cougneurent entre eulx que l’esperance de victoire leur estoit ostee et tout par ung seul chevalier, et leur estendart par terre. Lors sans conroy et sans ordonnance commencerent a fuir et laisserent leurs tentes et pavillons et toute leur artillerie et ne leur chaloit mais que d’eulx sauver. Girart et les autres alerent apres eulx tousjours tuant. Le duc Milon aloit tousjours suivant affin que aucun dangier ne lui venist, lequel vist le sanc tout cler qui lui partoit du costé destre. Lors vinst a Girart et lui dist que assés avant avoient chassié et qu’il estoit heure de soy retraire et de reposer. « Girart, dit le duc, je voy saillir le sanc d’une playe que vous avez, de quoy fay doubte que n’en soyés en dangier. » « Sire, dist Girart, c’est peu de chose. »

Lors le duc fist sonner la retraicte, car plus de deux lieues avoient chassié leurs anemis, en laquelle chasse y eust pluseurs mors et pluseurs prisonniers et pluseurs navrez et y eust si grande occision faicte car long temps avoit que on n’avoit oy parler de la pareille, ne par si peu de gens estre faicte contre si grant nombre de gens comme estoient les saines.

Apres ce fait le duc Milon revinst es tentes des saines et fist desarmer Girart pour veoir ses plaies, et lui dist le sirurgien que Girart n’avoit garde de morir. Lors le duc le fist emporter sur une litiere pour ce qu’il estoit fort affoibly, et se merveilla moult le duc et les barons quant il fut desarmé comment il avoit peu souffrir ne endurer de combatre si vaillamment qu’il avoit fait, veu qu’il estoit si jeusne, car encores n’avoit il pas vingt ans, dont il fut moult prisié ; et le fist le duc partir au butin bien et largement, et n’en retinst riens pour lui, car il le dona a son hoste qui l’estoit venu veoir, lequel estoit bien dolant de Girart qui estoit ainsi fort navré.

Apres que le butin fust party, le duc se mist au chemin contre la cité. Quant il entra en la cité il n’est homme qui sceust dire la grant feste que l’on lui fist et a ses gens pareillement.

Mais sur tous ceulx de la compaignie le duc commanda que on fist a Girart tel et si grant honneur comme a lui mesmes. Se dire et raconter vous vouloie le grant honneur qui fut fait ce jour a Girart de Nevers trop long seroit a racompter. Car les dames, damoiselles, bourgeoises et jeusnes filles qui estoient es fenestres getterent sur la litiere de Girart au passer qu’il faisoit tant de roses et de florettes, eaues roses et autres bonnes flaireurs que grant doulceur estoit de les sentir, dont son hoste estoit tant joyeux qu’il aloit beneissant l’eure et le jour que Girart vinst en son hostel. Trompettes et menestreux aloient sonant devant la litiere. Le duc et les barons et chevaliers le convoierent jusques en son logis puis le duc lui envoya tous ses sirurgiens et medicins, et tous les jours le venoit visiter jusques a ce qu’il fut gary. Lesquelles nouvelles furent racomptees a Aglentine, c’estassavoir comment le chevalier nouvellement venu estoit tresfort blecié.

Comment Aglentine fille du duc et Florentine eurent grosses paroles ensemble pour amour de Girart duquel elles estoient amoreuses.

Quant Aglentine fille du duc Mylon entendist les nouvelles que cellui que plus desiroit de veoir estoit ainsi piteusement navré, moult fort le commença a plaindre et dist : « Lasse moy, ores suis je la plus maleureuse que jamais fust veue sur terre quant celluy en qui j’avoye du tout mis mon amour est en peril de mort. S’il meurt jamais n’auray joye.

Je cuydoye faire mon amoreux de lui, or voy je bien que cuidier deçoit. La parole est bien veritable, tel cuide qui fault, assés l’aperçoy en moy car il me sembloit que j’estoye au dessus de mes amours, or maintenant voy je le contraire. » Ainsi comme vous oyez Aglentine se complaignoit pour amour de Girart en plorant. Et ainsi que elle se complaignoit la belle Florentine vinst devers elle, laquelle commença crier et dist tout hault : « Lasse moy, dolante, maleureuse et chetive la plus qui oncques fut, a peu que mon cuer ne part en deux, jamais ne porteray tresse ne cheveulx sur le chief se ainsi est que mon amy moire, tous mes cheveux feray trenchier et me rendray recluse en ung monastere et n’auray jamais de mariage la benediction du prestre. » Aglentine oyant Florentine ainsi se lamenter pour amour de Girart se leva incontinent et lui dist : « Quelle male aventure vous esmeut ! Pensez vous que s’il eschappoit qu’il vous prist a mariage ? Savez vous de certain qu’il vous ayme et qu’il a cure de vous ? Vous avez beau cuidier de penser qu’il vous espeuse devant moy, il yroit bien a rebours. Quelles villes, quelz chasteaulx ne quelle rente auroit il avec vous ? » « Ma damoiselle, dist Florentine, pour Dieu vous prie que pas ne vous vueilliez couroucier. Se ainsi est que le vassal garisse et qu’il retourne en santé, se vous l’avez pas n’en seray courroucee, mais se de vous il ne vouloit faire s’amye, et que il me voulsist avoir pour amye, pensez que plus fiere m’en vouldroye tenir et jamais plus mal ne sentiroye. » Lors Aglentine moult fierement lui respondist et lui dist : « Se ainsi estoit qu’il vous amast et pour vous me laissast je me tresperceroye le cuer ne jamais plus ne vouldroye vivre. Pour verité je sçay, ainsi que pluseurs m’ont dit, que plus belle de moy on ne sauroit trouver. Bien on devroit tenir aveugle cellui qui de beauté vous esliroit devant moy. » « Damoiselle, dist Florentine, besoing n’est de vous courrecier se plus belle et plus cointe estes que moy ; d’autrepart je suis plus gracieuse et plus assavoree. Je seroye de bonne heure nee s’il me vouloit amer et vous laissier. Je vouldroye bien avoir mon plaisir de lui et avoir vostre mal talent tous les jours de ma vie, et il fust ainsi comme je le dis ; se envye avez sur moy, il faudra bien que je l’endure au mieulx que je porray. Je ne sçay comment il en aviendra, s’il me veult amer je soffreray que de moy face sa volenté. »

Lors Aglentine de grant ire eschauffee lui dist par grant fierté : « Vous qui estes demeurant avec moy, comment estes vous si osee d’entreprendre chose a l’encontre de moy et en laquelle je contens ? Je vous demande se vous estes de si hault lignaige que a moy doyés tencier. Soiés seure que bien m’en souviendra quant le cuiderez avoir oblié. » Lors sur ces paroles Aglentine vist son pere venir et toute sa chevalerie, et n’avoit de rire talent mais au mieulx qu’elle peust se cela, et ala a l’encontre de lui et lui demanda comment il lui aloit, et que pour Dieu lui voulsist dire cellui qui pour le jour avoit fait le mieulx. Le duc lui respondist : « Ma fille, saichiés de verité que au monde ne se trouveroit le pareil chevalier comme est cellui qui est logié en l’ostel de Adam le gregeois. Assés vous en orrez parler. » Apres le duc et ses barons se firent desarmer puis vindrent en la sale ou les tables furent prestes pour soupper. Chascun lava les mains et puis se assirent et furent servis de pluseurs metz et d’entremetz a grant plenté.

Lors les barons et chevaliers commencerent a racompter les beaulx fais et grans proesses que Girart avoit fais a la journee et le louoient et prisoient ; et plus le prisoit et plus estoient esprises les deux damoiselles Aglentine et Florentine, lesquelles avoient merveilleuse envie l’une a l’autre et tant que se elles eussent esté a part elles eussent bien parlé l’une a l’autre.

Apres le maingié se leverent de table et commencerent a petier et a deviser par la saule ; Jongleurs et menestreux jouoient de leur mestier, desquelz ne chaloit gaires a Aglentine, car amours la fasoient penser autrepart, et se fist mener en sa chambre et fist appeller sa maistresse pour couvrir son lit ; quant il fut couvert elle se lança sus toute vestue, et n’avoit garde de dormir car si fort pensoit a Girart qu’elle ne savoit quelle maniere tenir. Une fois tordoit ses mains, l’autre fois demeuroit comme ravie et puis disoit en soy mesmes : « Maintenant vois je bien que je suis toute radotee, quant pour ung homme suis en tel point que jamais ne veis et que oncques ne cougneus, fors tant seulement que aujourd’uy au matin l’ay veu armé. Lasse moy, trop tost l’ay amé, il me fault penser autrepart, si le mettray du tout en obly. » Lors incontinent se leva de son lit et se promenoit par sa chambre en mettant peine de oblier Girart. Mais amours qui tousjours atise l’amoreux ou elle veult demeurer le contraint d’amer cellui de qui il cuide oster son cuer. Combien que du tout en tout se mist a penser a Girart, et l’assailloit tousjours amours, et tant que elle se prist a chanter une chançon disant que amours l’avoit mise a malaise se par le mal d’amer n’estoit alegee. Et estoit a celle heure la belle Florentine couchee en ung lit empres la chambre d’Englentine. Laquelle entendist la chançon et icelle oye a peu que ne partist de dueil et se bouta ung peu en son lit sa main a sa maiselle en lui souvenant de Girart et lui prist volenté de dire une chançon pour soy reconforter disant :

Englentine lui respondist en tel maniere : « En puist a Dieu souvenir que male mort vous en maine affin que vostre face deviegne ternie. »

« Damoiselle, dist Florentine, ja Dieu ne plaise que ceste cruaulté m’aviegne. Car pas je ne l’ay deservy. Jamais ne veis femme si injurieuse que vous estes. Dieu le vous vueille perdonner et tellement y pourveoir que j’en puisse estre joyeuse. »

A tant vous lairay a parler des deux pucelles, jusques heure soit de y retourner et vous raconteray de Girart de Nevers.

Comment Girart de Nevers vinst a court ou il fut bien receu et comment Aglentine parla a lui et de leurs devises.

Assés avez oy par cy devant les grans proesses que Girart conte de Nevers fist devant Coulongne en la bataille a l’encontre des saines ou il fut moult fort navré, parquoy il geust au lit l’espace d’un mois avant ce qu’il fust gari, en laquelle maladie le duc le visita tous les jours.

Apres ce qu’il fut gary il aloit souvent avec le duc a la chasse.

Advint que ung jour le duc le pria au disner. Girart pour complaire au duc y ala. Quant le disner fut prest, Aglentine et Florentine sachans la venue de Girart se parerent le mieulx qu’elles peurent et partirent de leurs chambres et vindrent en la saule ou elles veirent Girart que moult voulentiers regarderent.

Mais Aglentine pensant que nully ne s’en prinst garde le regardoit si fort, que tous apperceurent qu’elle estoit amoureuse de lui et ne povoit oster ses yeulx de Girart. Assez vous pourroye tenir se raconter et dire vous vouloie les regars et manieres qu’elle tenoit. Girart, qui moult estoit courtois, saichant qu’elle estoit fille du duc, vint vers elle et la salua humblement, et elle pareillement moult doulcement le salua. Girart la commença a regarder pensant en lui que se ailleurs n’eust esté amoreulx que voulentiers se fut aprochié d’elle. Lors Florentine s’avança ung petit et vint vers sa damoiselle et lui dist : « Dame, or estes vous maintenant a vostre plaisir. Le sospir que vous avez getté vient il de puis ne de fontaine ? Car a ce que j’ay veu de vous vous l’avez esté querir bien parfont. » Quant Aglentine l’oïst peu s’en faillit que de desplaisir ne marvoiast combien que onques n’en fist semblant. Apres on bailla l’eaue pour les mains et puis se assirent. En ce disner Girart pensa moult fort a Euriant et ne maingea gaires, combien que grant temps avoit que on n’avoit veu en hostel de prince faire si grant disner. Si grant n’avoit leans qui ne veist volentiers Girart et se traveilloit chascun de lui faire plaisir. Des metz dont ilz furent servis ne vueil faire long compte. Apres ce qu’ilz eurent disné se prindrent a deviser les ungs es autres ; les ungs alerent dormir, les autres se promenoient, les autres jouoyent es tables, autres es eschecz, mais a Girart n’en chaloit, et au plus tost qu’il peust les laissa et se vinst apuyer a unes fenestres qui estoient sur le jardin. Et lui commença a souvenir de Euriant, dont a grant peine se povoit soustenir sur piés ; tout le corps et les membres lui faillirent, puis se reprinst et dist en soy mesmes que il ira querir s’amye pour savoir ou trouver la porroit. Ung peu se prinst a reconforter et lui souvint d’une chançon qu’il commença a chanter en fasset. Aglentine qui assez pres estoit moult voulentiers l’escouta ainsi comme celle qui n’y pense. Quant elle eust oye celle chançon elle fust moult joyeuse pensant que c’estoit pour amour d’elle. Elle manda prier a Girart qu’il vinst parler a elle. Girart respondist au messaige que moult volentiers le feroit. Lui et son hoste, qui empres lui estoit, vindrent en la chambre de la pucelle ou y avoit maintes damoiselles. Girart saichant son estre comme homme de court les salua moult courtoisement. Aglentine vinst devers lui, lui disant que bien fust il venu et le prinst par la main et l’assist empres elle, et lui dist : « Sire, se Dieu me vueille aidier, grant desir avoye de vous veoir pour savoir et oyr de vous dont vous estes ne de quel terre. Je vous requiers en droite amour que vous m’en vueilliez dire la verité et je vous prometz sans contredire je feray vostre volenté. » Girart oyant ses paroles lui dist moult courtoisement : « Ma dame, puis que sçavoir le volez je le vous diray. Gaires n’a de temps que je amblay a ung riche marchant sa femme, qu’il avoit moult chiere, lequel estoit moult nyce et lourt et le plus eschars du monde tant estoit riche et plain que ung chariot a quatre chevaulx ne sauroit mener son avoir. Couvoitise me sourprinst pour l’avoir que veis si grant et esposay icelle femme, volsist ou non, mais au plus tost qu’elle peust se eschappa de moy et se plaindist a la justice et ainsi m’en [est] couvenu enfuir. Je suis povre homme et je n’y ose retourner. » La pucelle Aglentine oyant Girart ainsi complaindre qu’il estoit povre fut moult joyeuse ; le cuidant par ses belles offres du tout le attraire a son amour, lui dist : « Amy, la dame qui vous dechassa de son pays vous amoit bien peu quant elle se plaindist de vous. Car se je estoye vostre amye pour riens ne m’en vouldroye plaindre. »

Florentine veant sa damoiselle ainsi de pres parlant a Girart toute vive cuida marvoyer : « Ha, fait elle, lasse dolante, elle est tant soubtille que par ses belles paroles elle fera tant que elle le attraira ; car trop scet de soubtil malice qu’il n’est femme qui tant en saiche. Certes moult la tieng estre hardie quant devant moy l’oze tenir si grant espace en paroles ; bien scet que je sçay sa pensee mais se je revieng a l’assay et que parler je puisse a lui en autre maniere feray tourner sa pensee, que ores pleust a Dieu qu’elle eust la parole perdue ou que elle n’eust point de langue jusques a ce que je vouldroye. Trop m’anuye que elle ne laisse en paix ce jeusne chevalier. Je le voy meu et taisant ; je aperçois assés que peu a conte a son lengaige ; il semble assez a le veoir que son caqueter lui anuye. » Ainsi la belle Florentine en elle mesmes par grant envye se complaint. D’autrepart Aglentine dist a Girart : « Sire, je vous prie que chanter vueilliez pour amour de moy et vous vueilliez reconforter ; si oblierez vostre femme que ores fut elle arse et brulee quant tel mal vous cuida pourchassier. » Lors Girart commença a chanter une chançon moult [hault] et dist : « Je ne voy pas icy celle pour qui je atens ma joye et mon bien etc. »

Comment les deux damoiselles par jalousie tencerent l’une a l’autre et comment la vielle fist la poisson.

Quant Aglentine oyst la chançon elle cuida que dicte l’eust pour escondit ainsi comme se il n’eust d’elle cure, et de mal talent et de couroux commença toute a tressuer. La face lui devinst obscure, et lui dist : « Sire, bien estes paoureux et avez bien le cuer failly quant amer n’osez ou vous estes amé ; ja povez oyr que je vous requiers vostre amour et vous me escondites. » « Damoiselle, se dit Girart, ne dictes pas ainsi. Je ne vous escondis ne octroye. D’autrepart vous savez que pour parjus seroye tenu se mon mariage faulçoye. Et si vous dis que pour fol et cornart seroye tenu se en si hault lieu je pensoye, chascun diroit que seroye fol et oultrecuidié. Pour Dieu, ma dame, vueilliez vous deporter, car tel vous pouroit oyr que pour fole vous tiendroit. » A ce mot sans plus parler Girart se partist d’elle et prinst congié. Quant elle veist que Girart s’en aloit et que a elle ne vouloit plus parler elle entra dedans sa garde robe ou elle se getta sur une couchette. Le mal d’amer la toucha si fort au cuer qu’elle devinst moult mate et moult vaine et se commença a plaindre et sospirer ; une fois avoit froit, l’autrefois chault. Ainsi que elle estoit en celle peine, Florentine ala venir et lui dist : « Dame, dictes moy comment il vous est, car assés sçay que avez eu prest le vassal pour faire vostre plaisir et en avez fait vostre desir. Se ores estoye si bien de vous que par amour le me voulsissiez prester jusques a ce que je en eusse fait a ma volenté a tousjours mais vous ameroye. »

Aglentine plainne d’ire et de couroux et comme toute forcenee cuida respondre mais elle ne osa pour sa maistresse qu’elle veist venir qui ses sospirs lui fist retrenchier. Sa maistresse la regarda en lui disant : « Madamoiselle, que avez vous ? Je vous prie que dire me vueilliez quelle maladie vous est survenue. Car tant vous voy tainte et pale que je ne sçay que penser dont ce mal vous est survenu. » « Dame, dist Aglentine, je me sens ferue d’un mal, je ne sçay que ce peult estre : une heure ay chault, l’autre ay froit ; une heure fremis et l’autre tramble a la fois ; semble que je suis toute esvanuye. » « Damoiselle, dist la maistresse, assés me cougnois en telz maulx et dont ilz peuent proceder. Saichiez qu’il vous vient d’amours.

Or me dictes, je vous prie, se cellui dont ainsi vous voy ferue vous en requist premierement. » « Dame, dist Aglentine, oncques mot ne m’en dist, mais quant je lui en parlay au plus tost qu’il peust s’en ala, dont j’ay au cuer telle douleur que impossible m’est de plus vivre se brief ne suis secourue. » Quant la maistresse oyst sa damoiselle ainsi soy lamenter et complaindre, en basse voix affin que nul ne l’oyst lui dist : « Ma damoiselle, saichiés que j’ay grant desir vous servir et complaire. Je vous prometz de ma main en la vostre que je feray tant pour vous que a loisir et a vostre aise aurez tous voz plaisirs de lui ; si vous prie que vous vueilliez resjoyr, car telle poison sçay faire que mais que lui en donnez a boire et que apres lui en buvez jamais de vous ne se poura departir et sur toute riens serez amee de lui. » Quant Aglentine oyst sa maistresse elle l’embrassa et le baisa plus de dix fois en lui priant que tost et hastivement se voulsist delivrer de ce faire. « Mais humblement vous prie que vostre coubine Florentine ne s’en aperçoive. » « Damoiselle, dist la maistresse, tant secretement le feray que ja par elle ne sera seu. » La maistresse ysist de la chambre et tira l’uys apres elle, puis entra en ung vergier ou elle cueillist une herbe pour faire la poison qu’elle avoit entreprins de faire. Quant Aglentine eust la promesse de sa maistresse incontinent se leva de son lit et ala monter sur une tour et se apuya a une fenestre la main a sa maiselle et regarda aval la ville se elle verroit venir cellui que tant desiroit, lequel elle ne aperceust point, dont elle fut bien dolante, puis dist qu’elle diroit une chançon si hault et si cler que par aventure sa voix yroit jusques a son amy ; puis apres se reprinst et dist que non feroit et que encores souffreroit, puis dist apres : « Lasse, comment porray je souffrir ? Je cuide que se longuement me tient se mal que je sens a present que je morray ; et toutesfois puis que j’ay entreprins de chanter, quoy qu’il en aviengne, je chanteray, ne me chault se en suis reprinse, adviengne ce que advenir en pourra. » Lors commença de chanter moult hault et dist :

Comment Girart beust la poison que la vielle avoit faicte pour le decevoir.

Ainsi et a ceste heure que la belle Aglentine eust finee sa chançon sa maistresse qui bien avoit escoutee retourna du vergier garnie d’erbes telles qu’elle vouloit avoir, et vinst en la chambre de la damoiselle ou elle estampa les herbes et destrempa ainsi que bien le sçavoit faire, puis les mist en ung pot d’argent si soubtillement meslé avec vin que nully ne s’en savoit prendre garde. Si advint que assés tost apres Girart vinst a court, vestu d’un court manteau d’escarlate fourré d’armines, en intencion de prendre congié du duc pour soy en aler querir Euriant s’amye. Son hoste amenoit avec lui pour lui accompaignier. Incontinent qu’il entra en la saule il encontra la fille du duc qui lui venoit au devant. Quant elle veist Girart, commença de changier couleur. Girart veant ainsi la couleur d’elle changier et que elle ne se mouvoit en quelque maniere vinst vers elle et la salua bien humblement. « Sire, dist elle, joye et bonne aventure vous doint nostre seigneur. Je vous prie tant comme je puis qu’il vous plaise venir en ma chambre pour deviser et passer temps, et d’autre part j’ay ung peu a parler a vous de secret. »

« Dame, dist Girart, je suis prest de faire ce qu’il vous plaira moy commander. » Eulx trois entrerent en la chambre, puis Aglentine prist Girart par la main et le assist empres lui sur une couche, et lui dist : « Assés ne me puis esmerveillier de ce que en nulle maniere ne puis tant faire par devers vous pour priere ne pour requeste que amer me vueilliez. Je vouldroye bien savoir a quoy il tient que vostre amour avoir ne puis et que l’amour que avez a vostre femme ne mettez en obly, quant vous mesmes dictes qu’elle vous het de mort. » « Pucelle, dist Girart, il n’est point en moy de povoir hoster mon cuer de celle pour qui je me dueil. D’autrepart pour riens ne m’en vouldroye oster. » Aglentine oyant ainsi Girart parler se arresta ung peu avant qu’elle parlast, puis apres dist : « Certes sire, bien me doit le cuer faire mal quant oncques d’amer vous priay ; tenue en dois estre pour fole et assés pire que darvee doit la femme estre tenue qui premierement prie ung homme. Bien voy que j’ay failly a prendre ; autrepart me couvient viser. Se croire vouliés mon conseil, en aucun ordre vous yriés mettre. Il m’est advis que vous n’amez point le deduit des dames. Penser ne viser ne puis a quoy vous porriés estre bon. » Quant Girart entendist le reprouche que Aglentine lui disoit sagement lui respondist et dist : « Damoiselle, tant m’avez contraint qu’il couvient que la verité vous die. Saichiez que j’ay aimé dont je sens estre bien amé. Car autrement mon amour vous donnasse. Pas n’eusse attendu que m’en eussiés requis car assés mieulx en cuidasse valoir ; tant cuide savoir de vous que pour riens du monde ne vouldriés que mon amour vous octroyasse et que tout mon cuer meisse a vous amer : grant traÿson et grant villenie seroit a moy se vous fasoye entendre que vous amasse. Et d’autrepart seroit traïson a moy que a m’amye que si long temps ay amee feisse tort et amer autre et la laissier. Certes digne seroye de mort recevoir et d’avoir griefve pugnicion. Mescheoir me puist il se jamais la fausse et aussi puist il faire a cellui qui sera faulx a sa dame, pourtant que d’elle soit loyalment amé. Mais damoiselle des maintenant me offre a vous pour estre vostre chevalier et serviteur se mestier en avez. En vous priant que le congié me vueilliez donner car jamais n’arresteray jusques ad ce que m’amye auray trouvé, laquelle long temps ay perdue. » Quant Aglentine entendist que Girart s’en vouloit aler elle fust moult esperdue, et appella sa maistresse et lui dist qu’elle aportast a boire. Alors la vielle leva sus moult diligemment et fist le commandement de sa damoiselle. La faulce vielle prinst le pot d’argent et versa la poison dedans une couppe. Las quel aventure advint a Girart ! Car se Dieu ne lui eust aidié a tousjours eust perdue s’amye.

La vielle se aproucha de lui et lui tendist la couppe, mais pas ne la vost prendre jusques a ce que la damoiselle eust beu. Lors Aglentine prist la couppe si la bailla a Girart en lui priant que a elle voulsist boire. Girart par son commandement prinst la couppe et beut puis la bailla a Aglentine. Elle qui sçavoit a quoy le boire touchoit beust tout que riens n’y laissa. La vielle maistresse duyte et aprinse de son mestier prinst une tasse et versa d’autre vin et fist boire l’oste de Girart. Quant Girart eust beu le buvrage, ainsi comme s’il fust revenu de pasmoison se assist tout coye sur une couche ou il fust moult grant espace sans penser a Euriant, et lui vinst volenté de regarder Aglentine car tant belle lui sembloit a veoir que saouler ne se povoit de la regarder.

Comment Girart fut feru de l’amour d’Aglentine apres ce qu’il fut empoisonné et comment il prinst congié d’elle.

Alors Aglentine et la vielle perceurent assés que le buvraige avoit deceu Girart et s’en tinst Aglentine plus fiere et plus orgueilleuse et desdaigneuse envers luy. On dist par usaige qu’il est de coustume que quant femme de ligier coraige quant elle voit et aperçoit ung homme surpris de son amour elle se monstre vers lui desdaigneuse et estrange. La vielle avoit introduitte Aglentine des manieres qu’elle devoit tenir. Icelle Aglentine dist a Girart qu’il s’en alast ainçois que le duc son pere vinst. Girart l’eust volentiers priee d’amours mais il ne lui en osoit parler car trop redoubtoit l’escondire. Toutevoyes il prinst congié de Aglentine et n’oza plus arrester et partist de la chambre et vinst en la saule ou il trouva Florentine assise qui ouvroit de soye. Elle qui moult estoit courtoise se leva incontinent et le salua bien courtoisement. « Damoiselle, dist Girart, seez vous, si ovrez a ce que vous avez commencié, et je vous feray compaignie. » « Sire, sur toute rien je desire estre empres vous pour vous tenir compaignie. Il n’est riens qui plus me plaise que vostre compaignie ; se la mienne vous plaisoit austant je ne fay nulle doubte que nul fors que Dieu nous sceust jamais departir. Or sire, puis que cy vous voy, je vous prie que donner me vueilliez vostre amour ou que dire me vueilliez se point avez d’amye, car je ne me vouldroye traveillier en vain, car trop me porroit grever se j’amoye et point ne fusse amee. Sire, sachiés que pas ne suis coustumiere de moy presenter ne offrir ; oncques mais n’amay plus homme que vous, du commencier suis en grant soussy. » « Belle, dist Girart, mercy vous requiers : ung peu de mon fait vous vueil dire, pour ce que en vous je aperçois loyaulté. Verité est que je suis amoureux, mais n’oseroye dire se celle dont je le suis me ayme austant comme je fais elle. Trop mal me seroit le jeu party se j’amoye sans partie ; se elle ne m’ayme austant comme je fais elle, mon temps auroye bien perdu ; toute ma joye et ma lyesse seroit tournee en douleur, au cuer n’auroye jamais lyesse. Car tant est belle a regarder que mieulx ressemble une deesse que une femme. Elle a la bouche tant vermeille et la chiere tant belle et tant plaisant que ou monde n’a sa pareille ; de beaulté, de sens, de courtoisie passe toutes femmes du monde. Et pour ce au pres de vous vueil dire une chançon. »

Lors Girart commença de chanter. Quant il eust finee sa chançon et que Florentine l’eust entendue elle eust au cuer moult grant douleur et couroux pour ce que bien lui sembloit avoir perdu son esperance de l’amour de Girart qu’elle cuidoit avoir. D’ire et de mal talent trembloit toute. Puis dist a Girart : « Sire, se bonnement osasse, volentiers vous demanderoye ou celle que vous amez demeure ne comment elle a a nom. » « Belle, se dist Girart, pour riens du monde ceste chose ne vous diroye. Mais suis du tout content de souffrir et endurer tout le mal que pour l’amour d’elle je sueffre, jusques a ce que de moy aura pitié et mercy. » Lors se leva et prist congié d’elle.

Comment Girart se departist de la court et comment le lendemain ilz alerent assigier ung chastel que le duc prinst par le moyen de Girart.

Quant Florentine veist partir Girart de la saule cuida marvoyer. Lui et son hoste alerent a l’ostel, puis quant ce vinst le matin, ilz revindrent a court pour ce que le soir devant on lui avoit dit que le duc vouloit aler dehors. Quant il fut a la court on lui dit que le duc vouloit aler assigier ung chastel moult fort qui estoit a ung chevalier par quy il avoit eu de grans dommaiges. Le païs alentour de Coulongne avoit tout gasté et destruit ; .lx. hommes avoit le chevalier avec lui dedans le chastel preux et hardis es armes ; la plus part d’eulx estoient saines grans et beaulx hommes et cruelz a veoir. Quant le duc aperceust Girart il le prinst par la main et lui dist que bien fust il venu, et lui pria que avec lui voulsist aler courir devant ung chastel qui lui estoit bien pres voisin. Girart desirant complaire au duc lui dist : « Sire, prest suis d’accomplir vostre desir ; tout droit m’en vois monter et armer pour aler avec vous. Girart vint en son hostel et se arma de toutes pieces et monta a cheval la lance ou poing et s’en vinst a la court ou il trouva le duc tout prest. A celle heure qu’ilz estoient en la court Aglentine se mist es fenestres de sa chambre, sa vielle maistresse empres elle, qui dist a la damoiselle : « Que vous semble de vostre amy ? il n’a pas encores trois jours qu’il avoit grant haste de s’en aler. Ores povez apercevoir quel service je vous ay fait. Avisez comment il le fait bon veoir en son harnois. Madamoiselle se vous me voulez croire je feray tant que l’aurez a mary. Jamais ne vous peult eschapper, mais gardez que trop ne vous abandonnez a lui, mais faictes l’estrange, car il vous en amera mieulx ; mais hardiement vous monstrez a ceste fenestre tout a plain afin qu’il vous aperçoive. »

« Ma maistresse, dit Aglentine, a bonne escole avez esté ; bien dois louer Dieu de l’eure que avecques moi venistes ! Car par vous et par vostre sens je suis tournee de mort a vie, puis que j’auray cellui a mary pour qui tant de peine et tant de tourment ay souffert. Je croy que ou monde ne se trouveroit le pareil de beaulté, de sens et de courtoisie. Ung peu me vueil a lui monstrer affin que de moy ait souvenance. »

Lors Aglentine se monstra tout a plain a la fenestre de sa chambre. Girart qui a autre chose ne pensoit l’aperceust assés tost ; moult fort la prist a regarder, et l’eust voulentiers salué se a son honneur l’eust peu faire. Mais oncques il n’osa pour paour d’estre aparceu, et aussi qu’il veoit le duc son pere si pres de lui. Il afferma a son haultain couraige que avant ce que jamais il retourne le pennon de sa lance, qui estoit d’un blanc satin, seroit taint en rouge du sanc de ses anemis.

Lors le duc accompaignié de deux cens chevaliers se partist de Coulongne par une posterne et saillist es champs, que oncques par ceulx de la ville ne fut veu ne apperceu affin que a Miliadus le seigneur du chastel n’en fust aucunement averty. Mais si pres on ne s’en sceust garder que assés tost ne fut a Miliadus averty de la venue du duc parquoy incontinent lui et ses gens se misrent en armes. Le duc venoit tousjours tant qu’il povoit. Quant il fut devant le chastel incontinent Melyadus et ses gens furent tous prestz a la barriere. Le duc veant Meliadus si bien en point et si hardy redoubta fort pour ce aussi qu’il veoit assés plus de gens qu’il n’avoit accoustumé veoir, et se recula ung peu arriere et se arresta tout quoy pour veoir la maniere comment arriere de leur place les porroient faire saillir. Quant Girart veist ses anemis et que ceulx de sa partie se conseilloient ensemble il ne fut pas bien content, car moult lui tardoit combatre. Il advisa Meliadus lui .x.^e qui estoit sailly hors pour verdoyer et mist la lance en l’arrest et vinst a l’encontre d’icellui Meliadus. Meliadus comme preux chevalier ne le refusa point, mais aussi mist la lance en l’arrest et vinst a l’encontre de Girart, et tellement rencontrerent que la lance de Meliadus rompist en pieces. Girart qui portoit une lance moult forte et royde rencontra Meliadus par le costé par telle maniere que la lance et le pennon le tresperça tout oultre, et tant que au retirer la lance Meliadus cheust tout mort par terre. Puis vint a ung autre chevalier qu’il tua. Quant ceulx du chastel veirent leur seigneur mort et l’un de leurs chevaliers avec lui, ilz furent bien courrouciez. Incontinent se apresterent pour le vengier et vindrent courir sus a Girart. Quant il les veist venir tous sur lui il tourna ung peu sur costiere en advisant l’un d’eulx qui venoit devant tous les autres. Girart mist la main a l’espee et frappa sur si grant cop sur sa salade qu’il lui abatist une oreille et la moittié du menton sur la poittrine, puis apres frappa ou milieu des autres et les desconfist tous car si hardy d’eulx n’y avoit qui l’osast aprouchier. Quant ilz veyrent que par ung seul homme eulx dix estoient desconfis, les autres que devant la porte estoient cuiderent tous marvoyer ; sans plus attendre les vindrent secourir et saillirent plus d’un tret d’arc de leur porte pour venir enclore Girart. Quant le duc les veist venir pour courir sus a Girart il escria a haulte voix et dist : « Seigneurs, il est temps et heure de secourir ce vaillant chevalier ou briefment sera occis, dont ce seroit grant dommaige. » Alors sans plus dire le duc et ses gens baisserent leurs lances, si se ferirent dedans leurs ennemis qui moult eurent grant paour, car encores plus doubtoient Girart que tout le demeurant. Bien veirent entre eulx que si grant fais ne porroient soustenir, se tournerent incontinent fuyans en leur place, mais si tost n’y sceurent estre que par Girart ne fussent suys jusques dessus le pont, ou il encontra ung saine moult grant et puissant, une hache en sa main, auquel il bailla si grant cop d’espee que les bras et la hache lui abatist a terre. Girart si avant se bouta que se brief n’eust eu secours jamais n’en fust retourné, car ainsi comme sur le pont estoit lui vinst au devant ung saine grant et merveilleux, mieulx resembloit ennemy que ung homme mortel, qui tenoit en ses mains une grande mace de fer, si la leva en hault pour frapper Girart, lequel guencist ung peu arriere et ne fut point attaint, mais descendist le cop sur l’arçon de la selle si roidement que Girart et son cheval abatist sur le pont. Si bien advint a Girart que sans bleceure ne playe il releva sur piés l’espee ou poing et vinst contre cellui qui lui avoit donné le cop. Ceulx du chasteau le veant seul combatre vindrent sur le pont pour le tuer et mettre a mort. Mais le duc Milon et ses gens se hasterent et le vindrent secourir. Quant ceulx du chastel veirent le secours ilz se retrairent si hastivement qu’ilz n’eurent loisir de lever leur pont ne fermer leur porte. Le duc et ses gens les suirent et les occirent et misrent tous a l’espee sans en espargnier ung tout seul. Quant tous furent mors le duc y laissa garnison puis s’en partist bien joyeulx, soy devisant a ses barons des grans proesses de Girart et des grans dengiers ou il s’estoit trouvé. Le duc vinst a lui et l’acola en lui faisant si grant honneur et si grant chiere que Girart en avoit honte. Souventesfois et assés le duc beneissoit l’eure que Girart estoit venu en son païs. Tant chevaucherent qu’ilz ariverent a Coulongne ou a grant honneur furent receuz pour leur joyeuse victoire, et sur tous les autres Girart estoit prisié et honnoré. Chascun lui faisoit feste. Quant ilz furent devant le palais, pensez se la fenestre de la chambre de la belle Aglentine estoit paree de damoiselles, lesquelles regardoient voulentiers Girart, et sur toutes les autres Aglentine qui avoit grant joye de son amy qu’elle veoit avoir tant d’onneur, lequel elle eust plus voulentiers veu de pres. Apres que le duc fut descendu Girart se partist de la court et s’en ala en son logis soy desarmer, lequel fut tres courtoisement receu et festié de son hoste et de son hostesse. Quant il fut desarmé il se rafreschist d’abilemens puis lui et son hoste monterent chascun sur ung cheval et alerent a court ou il fut receu a grant joye du duc et de ses barons, car tant estoit amé que il estoit bien en lui de commander ; ce qu’il vouloit estoit fait, nul ne lui aloit au contraire. Le duc le fist son mareschal en lui baillant tout le gouvernement de ses païs et seignories, mesmement de la justice laquelle il gouverna sans aucune couvoitise, et tant fist que de tous estoit amé et prisié et fut grant espace de temps ou païs et ne se fasoient joustes ne tournois ou il ne fut le premier. En lieu ne se trouvoit qu’il ne gaignast le pris. Il amoit et prisoit les povres chevaliers qu’il sentoit estre vertueux et leur faisoit moult de biens et estoit amé de toutes gens, et sur tous autres de la fille du duc qui merveilleusement l’amoit, comme dessus est dit, et lui elle pareillement et tant que peu lui souvenoit d’Euriant s’amye non plus que se oncques ne l’eust veue. Ung esté et ung yver fust Girart a la court du duc Milon ou il fasoit tous ses plaisirs. A tant vous laray a parler de Girart de Nevers et le laisserons a Coulongne jusques temps et heure soit d’y retourner.

Et parlerons d’Euriant s’amye qui estoit a Metz en Lorraine.

Comment Euriant perdist son anel d’or que Girart lui avoit donné par l’aloe qui l’emporta, elle estant avec la seur du duc de Metz.

Bien avez oy parcidevant la maniere et comment Girart de Nevers avoit laissé s’amye Euriant en la forest d’Orliens toute seule, et comment par le duc de Metz fut emmenee en sa cité en intencion de la prendre a mariage, et l’eust voulentiers prinse se par ses barons et son conseil n’en eust esté destourbé. Le duc avoit une seur jeusne et moult belle laquelle il bailla a Euriant en garde et pour aprendre a ouvrer de soye, car sur toutes autres femmes Euriant estoit maistresse d’en ouvrer. Si bien aprinst la seur du duc que icelle seur l’ama tant que sans elle une heure ne povoit estre. Si advint que ung jour la belle Euriant toute seule entra en sa chambre et lui ala souvenir de Girart son amy, lequel elle cremoit moult que pour la perte qu’il avoit eu de ses terres et seigneuries qu’il ne se desesperast ou qu’il ne lui survenist aucune maladie.

« Lasse, dit elle, quant me fera Dieu ceste grace que veoir le puisse avant que la mort me prengne ? Lasse moy, se une fois l’avoie veu je seroye contente de morir ! O, desloyal Liziart, Dieu te vueille confondre quant par ta desloyalté et traÿson nous as fait separer et esloingnier. Bien me devroit le cueur partir quant oster m’as ce que plus amoye au monde. Pas ne sçay penser ne sçavoir comment tu pourchassas de sçavoir les enseignes que j’ay sur moy parquoy Girart et moy avons esté traÿs et deceuz. Aussi vrayement que sans cause et raison nous as separez et departis, le mal et la douleur que tous deux en avons receus puist sur toy venir ! Aussi fera il quelquefois car je n’en fais nulle doubte. Lasse moy, pas ne puis a la verité sçavoir comment il me pourra trouver. Assés le pouroye cy attendre avant ce que nouvelle il peust avoir de moy. Car il n’est nul pardeça qui saiche qui je suis ne de quel païs. Bien sçay que ja ne verray l’eure que pardeça le puisse veoir. »

Ainsi comme vous oyez la belle Euriant se devisoit a par elle et n’estoit chose qui en riens la puist conforter, et ainsi que a par elle estoit survinst ung varlet qui lui apporta une aloe qu’il avoit prinse, qu’il lui donna, dont elle eust grant joye si en remercia icellui compaignon. Elle tenoit icelle aloe en son geron et lui donnoit a maingier. Mais avant que gaires demeure l’aloe la fera bien doulante et triste comme vous orrez cy apres. Euriant avoit ung anel ou avoit assis ung saffir lequel Girart son amy autreffois lui avoit donné.

Ainsi comment elle paissoit l’oiselet l’anel saillist hors de son doit et cheust en son geron que oncques garde ne s’en prinst. L’aloe regarda la pierre qui estoit clere et luisant et le prinst au bec si se escouyst tant que l’anel lui entra ou col. Lors l’aloe se esvola et saillist hors par une petite fenestre dont Euriant fut moult doulante et dist : « O, vierge Marie, comme hores me dois ennuyer quant l’anel que mon amy m’avoit donné ay ainsi perdu ! En grant douleur a mon cuer mis l’aloe, que mal feu le puist ardoir. Lasse moy, je ne pensoye pas que je en deusse avoir aucun anuy. Verité est que jamais ung mal ne vient sans l’autre. Joye me fuit, anuy et couroux m’aprochent ; aujourd’uy doublera mon mal. Au maleureux le vireton. Par trop puis haÿr l’aloette ; jamais nulle n’en ameray ; se plus en chiet en mes mains incontinent les feray morir. A, doulx amy, grant temps a que de moy estes esloingnié. A ceste fois puis je apercevoir que tous les temps de ma vie mes joyes seront tournees en pleurs et en tristesse. » Lors commença de tirer ses cheveux et a demener grant dueil.

Comment Meliatir le desloyal chevalier cuida enforcier Euriant et de la male adventure qu’il lui pourchassa.

Ainsi comme en celle douleur estoit survint vers elle ung chevalier moult felon et de mauvais affaire, le visaige avoit moult felon, qui estoit apellé Meliatir. Traitre et desloyal estoit. Par lui et par son pourchas Euriant eust moult de peine et de grans maulx a souffrir. Et pour ce dist on qu’il advient souvent que ung mal revient sur l’autre. Quant ce chevalier vist que Euriant estoit seule il lui pria et requist d’amer par amours et que tant lui feroit de biens que jamais n’auroit povreté. Euriant moult espaventee du chevalier lui dist : « Sire, ja Dieu ne plaise que ung si hault homme que vous aye aucun atouchement a moy ne a ma char, qui ne fut oncques a homme refusee. » Le chevalier lui dist : « Je croy que vous estes fole ou hors du sens quant ainsi m’escondissiez. » « Ha sire, dit la damoiselle, ja Dieu ne plaise que ceste honte vous aviengne. » Lors le chevalier desirant accomplir sa mauvaise voulenté la prinst et la getta sur le lit. Euriant se veant ainsi estre pressee hauça le pié et frappa le chevalier ou visaige ung si grant cop que quatre dens lui rompist en la gorge, puis comme toute forcenee se leva en piés et l’esgraffina par le visaige tant que le sanc en sailloit de tous costez, puis comme triste et doulante se partist de la chambre et vinst en la saule sans faire quelque semblant, ou elle trouva la seur du duc qui moult voulentiers la veoit, car tant amoient l’une l’autre que deux seurs n’en povoient plus faire.

Comment Meliatir murdrist piteusement Ysmaine cuidant avoir occis la belle Euriant.

Quant Meliatir, qui estoit en la chambre triste et couroucié de ce que Euriant lui estoit ainsi eschappee, et encores plus desplaisant pour ses dens qu’il avoit perdues et son visaige esgrafiné, parquoy celui jour il ne se osa trouver en la saule, il se pensa et fist serement de jamais boire ne maingier jusques a ce que de Euriant se fust vengié, et s’appensa par son malice de soy mucier derriere ung coffre jusques a ce qu’il fust nuyt. Quant il veist que chascun eust souppé et que le duc fut retrait pour aler dormir et que les damoiselles furent couchees et endormies en leur lit, c’estassavoir la seur du duc et Euriant qui dormoient ensemble en ung lit, lors le desloyal traittre, ayant l’ennemy avec lui qui le gouvernoit, estant mucié en leur chambre, tira ung coutel qu’il portoit bien trenchant et affilé ; au plus coyement qu’il peust vinst en la ruelle du lit et trouva les deux pucelles, qui dormoient les bras hors du lit pour la chaleur qu’il faisoit celle nuyt et les courtines non tendues ; et s’approcha de la seur du duc cuidant avoir Euriant et lui bouta le coutel en la poitrine et l’ataindist si droit qu’il la frappa au cuer, parquoy oncques ne dist moult ne aussi ne remua piez ne bras ; puis prinst la main d’Euriant qui dormoit et lui mist le coutel en icelle cuidant que ce fust la seur du duc ; puis au plus coyement qu’il peust yssist de la chambre. Quant vinst le lendemain au matin que par layans chascun fut levé et que les chambrieres vindrent en la chambre des damoiselles, icelles chambrieres veirent le sanc courir par la chambre et sur le lit et les linceulx ensanglentez puis veirent Euriant qui tenoit le coutel qui encores estoit ou corps de Ysmaine seur du duc. Lors commença l’une a dire que nulli ne deist mot jusques a ce que le duc les eust veues. Lors l’une d’elles vinst en la saule ou elle trouva le duc soy parmenant et lui dist moult effreement que tost venist en la chambre de sa seur. Le duc sans arrester y ala. Quant il fut en la chambre ou il veist le piteux murdre, adonc Euriant se esveilla pour le bruit qu’ilz menoient en la chambre et se merveilla fort pourquoy tant de gens estoient en la chambre. Le duc la prinst a regarder et lui dist que en elle avoit fait mauvaise garde. « Jamais ne l’eusse cuidié. Bien est raison que anuy et desplaisir en aye et aussi ay je quant oncques euz fiance en vous. » Euriant qui encores ne sçavoit riens de la mort de Ysmaine seur du duc se merveilla moult des paroles que le duc lui disoit. Elle leva ung peu sa teste en hault pour esveillier Ysmaine sa compaigne, laquelle veist morte. Lors commença a crier et desconforter en disant : « Lasse moy, ma damoiselle, qui vous a ainsi atournee ? » Lors le duc par grant courroux la tira par la main et la fist vestir et habilier et la bailla a Meliatir le desloyal chevalier en lui disant. « O, tres desloyale fole, bien dois maudire l’eure que oncques te trouvay ! Ouvré tu as malvaisement d’avoir murdrie ma tresamee seur. Je te prometz que telle justice feray de toy que ce sera exemple a toutes autres. » Euriant esbaÿe de ce merveilleux cas et du crisme que on lui mettoit sus, dont elle estoit innocente, se assist en my la saule comme celle qui mieulx sembloit morte que vive, toute deschevelee, comme de son lit avoit esté tiré par le duc. Elle veant Meliatir qui la traittoit durement se mist a genoulx les mains joinctes et cria mercy au duc et lui dist : « Ha sire, pour Dieu ayez mercy de moy, car oncques a ma vie ne commis ce murdre que me mettez sus. » « O tresdesloyale fole, dist le duc, la chose ne povez nyer car au fait avez esté prinse. » Il manda ses barons et conseilliers devers lui et leur demanda en quel maniere il devoit faire morir celle qui avoit murdri sa seur sans cause. Lors Meliatir le desloyal lui dist : « Monseigneur, besoing ne vous est d’en tenir conseil quant au fait a esté trouvee : autre n’y a que de la faire ardoir en ung feu d’espines. » Lors se leva en piés ung ancien chevalier moult saige que on nommoit le seigneur de Fenestrange, qui pour lors estoit mareschal de Metz, et dist : « Monseigneur, a ceste chose avez bien a regarder ainçois que fasiez justice, et que le cas soit bien approuvé. Le cuer ne me peult jugier que ceste damoiselle ait fait le murdre que on lui mest sus, car tant amoient l’une l’autre que deux seurs ne se povoient plus amer. Car se ainsi estoit que le fait eust commis jamais ou lit n’eust arrestee mais s’en fust fuye quelquepart pour soy sauver. Autrefois ay oy racompter d’un pareil cas que jadis avint a Romme par une empereis, plus avant ne vous en vueil raconter. Mais vous conseille que hastivement envoyez a Bar le Duc querir vostre oncle, qui est moult saige et grant justicier a esté en son temps ; de maintes choses scet a parler plus que nul homme. Faictes mettre ceste damoiselle en prison et la faictes garder sans lui faire aucun desplaisir jusques a ce que vostre oncle le duc de Bar sera venu. » Quant Meliatir oyst le conseil et l’advis du seigneur de Fenestrange il cuida tout vif marvoyer. Si dist : « Sire, mauvaisement faictes que tost ne la faittes ardoir. Car je ose dire et le vueil prouver a l’encontre de cellui qui pour elle se vouldroit combatre que elle mesme sans nul autre a murdrye et mis a mort Ysmaine vostre seur. Et pour ce je dis que vous et tout vostre conseil en ouvrez mauvaisement de ce que tost et hastivement ne la faictes ardoir en ung grant feu d’espines. » « Melyatir, dist le duc, ja justice n’en sera faicte jusques a ce que mon oncle sera venu. » Quant Melyatir oyst le duc oncques jour de sa vie il ne fust plus courrecier. Alors le duc fist mettre Euriant en la prison et envoya querir son oncle le conte de Bar. D’eulx vous lairay a parler jusques heure soit, et retournerons a parler de Girart de Nevers qui estoit a Coulongne en la court du duc, ou il estoit moult bien amé.

Comment Girart et Aglentine se amerent tant que le duc en volt faire le mariage.

Parcidevant avés oy comment Girart de Nevers estoit a Coulongne en la court du duc Mylon, duquel il estoit tant amé que toute sa terre lui avoit baillee en gouvernement, dont il en ouvra si bien que de grans et de petis estoit amé, et peu lui souvenoit de s’amye Euriant pour la poison qu’il avoit beu. Mais tant amoit Aglentine fille du duc que jour ne heure n’estoit aise s’il ne la veoit et elle lui pareillement le amoit si tresfort que elle en estoit comme ravye. Le duc s’en aperceust et en tinst sa fille a moings sage, et lui remonstra pourquoy ne comment elle mettoit son amour a ung homme qu’elle ne cognoissoit. Mais oncques pour paroles qu’il lui sceust dire ne laissa point d’amer Girart. Quant le duc veist que sa fille ne se vouloit deporter d’amer Girart, se pensa en lui mesmes qu’il lui donroit a mariage en lui semblant que mieulx ne povoit faire. Ung jour le duc assembla ses barons et son conseil, esquelz il meist la chose en terme, mais il n’y eust oncques cellui qui au contraire voulsist aler, mais tous l’accorderent disans la chose est bien prinse et que mieulx ne povoit estre assignee. Alors le duc en presence de ses barons manda Girart et sa fille pour sçavoir leur volenté. Girart respondist au duc et lui dist : « Tel que je suis m’avez fait. En vous est de moy commander, prest suis de faire vostre vouloir. » « Et vous ma fille, dist le duc, il est temps que soyés mariee ; se Girart vouliez avoir il est prest de faire et obeir a mon commandement. » « Ha sire, dist Aglentine, puis que vostre plaisir est que ainsi se face, commander le me povez. Je suis contente de l’avoir, ainçois aujourd’uy que demain jamais autre que lui ne vueil avoir. » Lors le duc et tous ceulx qui la estoient commencerent a rire. « Ma fille, dist le duc, demain feray venir ma baronnie car je vueil que tous y soient. Si vous feray fiancer puis le lendemain espouser. » « Sire, dist Aglentine, a vostre plaisir soit, mais pluseurs fois ay oy dire que ce que on peult faire le jour on ne doit attendre le demain. » Se par avant avoient eu ris, encores le eurent ilz plus fort assés. Apres ce chascun se departist. Girart mena Aglentine en sa chambre ou ilz deviserent de pluseurs choses, puis se departist d’elle et vinst en son hostel ou il trouva son hoste qui avoit grant joye des nouvelles, qui louoit Nostre Seigneur de l’eure qu’il estoit venu en son hostel. Girart desiroit moult de veoir l’eure qu’il tinst s’amye entre ses bras, car advis lui estoit qu’il n’y vinst jamais a temps ; mais pour oblier le temps lui prinst voulenté d’aler voler atout son esprivier pour le mieulx duire et aprendre. Il appella son hoste et lui dist qu’il se vinst jouer avec lui et que autre que lui ne vouloit avoir avec lui. Alors son hoste pour lui complaire fist mettre a point son cheval. Quant ilz furent prestz ilz monterent a cheval, et chevaucherent ensemble, Girart l’esprivier sur le poin. Quant ilz furent hors de la porte a celle heure mesmes Florentine et Aglentine estoient sur une haulte tour appoyees sur une fenestre. Aglentine tençoit Florentine en la blasmant de ce qu’elle cuidoit attraire Girart a son amour. Florentine lui respondoit le mieulx qu’elle povoit. Quant Girart fut hors de la porte il se retourna et regarda a l’une des fenestres de la tour du palais ou il vist celle que mieulx amoit au monde, et dist a son hoste : « Bel hoste, que vous semble il ? ne veez vous luire le soleil a celle fenestre ? Il m’est advis que la tour est fort embellie pour ce que y vois celle que j’ayme plus au monde et a quy plus desire complaire. Pour amour d’elle vueil dire une chançon, espoir que le vent lui portera affin qu’elle me puist oyr. » Lors encommença de chanter. Quant il eust finee sa chançon, tout en chevauchant contreval du Rin se arresta et oyst la voix d’une aloe qui moult cler aloit chantant. Girart oyant icelle voix fut bien joyeux et se estendist sur ses estriez et lui ala souvenir de ses tresdesirees amours, Aglentine qu’il avoit veue es fenestres, et commença de rechief de chanter une chançon moult hault et a cler son en soy resjoyssant, esperant veoir la journee de povoir joyr de ses amours. Mais avant ce que Girart eust finee sa chançon il veist asseoir l’aloette devant lui.

Comment Girart ala vouler es champs ou il prinst l’aloe qui avoit a son col l’anel qu’il avoit autreffois donné a Euriant parquoy il delaissa Aglentine pour Euriant.

Alors que Girart veist l’aloe assise il piqua cheval d’esperon et osta les longes a son esprivier. L’esprivier qui estoit bon veist l’aloe et se debatist sur le poing. Girart le laissa aler : l’aloette monta en hault et l’esprivier apres et si bien voula qu’il la prinst, dont Girart fut bien joyeux. Il piqua cheval d’esperon et vinst a son esprivier et descendist et se tinst tout quoy jusques a ce que son esprivier eust esplumé sa proye, puis s’approcha et prinst son esprivier et l’aloe et de la cervelle d’icelle lui fist son droit. Quant l’aloette lui eust ostee il regarda et vist que ou col avoit ung anel moult riche, si appella son hoste et lui monstra l’anel qui moult bel et riche estoit et le commença a regarder. Tant le regarda et tourna qu’il le recogneust et lui sembla que une fois l’avoit donné a s’amye Euriant. Quant il eust ainsi cogneu il demeura une grant piece comme pasmé et sans soy mouvoir de la, de l’angoise qu’il eust quant il lui souvinst de ce qu’il avoit promis a Aglentine et aussi pour amour qu’il avoit a Euriant, de laquelle il lui souvinst quant il veist l’anel. Quant il eust bien demeuré environ une heure en ce point il revinst a luy et moult fort se prinst a blasmer lui mesmes et dist : « Las moy, il m’est advis que grant dommaige est que je suis en vie quant j’ay perdu ce que plus j’amoye ! » Tant est doulant, tant se desconforte qu’il n’est nul qu’il n’eust pitié de le veoir. Lors s’escrie et bat ses palmes et commença son esprivier a soy debatre qui estoit debonnaire et voula sur une arbre. Girart commença a faire son dueil le plus grant que jamais fust veu par homme. « Helas, fait il, pourquoy ne suis occis quant une telle faulte ay commise ? Las moy, que fera ce doulant chetif ? Grant dommaige est que tant suis en vie ! O terre, euvre toy, si m’engloutis ! Pas ne suis digne estre veu des hommes. » Son oste le veant ainsi estre desconforté ne savoit qu’il deust faire mais ploroit de la pitié qu’il avoit de lui, et descendist a terre et le reconforta le mieulx qu’il peust en lui disant : « O treschier seigneur, laissiez vostre dueil et me vueilliez dire la cause de vostre doleance, car tant vous voy pale et amorty que jamais joye n’auray au cuer jusques a ce que le m’aurez dit. » « Ha mon hoste, dist Girart, bien ay cause de moy douloir. Dommaige est que je suis en vie, quant pour moy et ma cause ay perdu celle que tant amoye et pour une autre l’ay mise en obly. Pour ce me plains, car pieça l’ay perdue. » Lors son hoste lui dist : « Ha sire, je vous prie que dire me vueilliez, mais qu’il ne vous desplaise se avez autre amye que Aglentine. » « Oyl mon hoste, ce dist Girart, cent fois plus belle qu’elle n’est. Bien sçay et aperçoy en moy que par mon pechié l’ay mis long temps en obly, et pour ce jamais n’aresteray d’aler et serchier loings et pres jusques a ce que l’auray trouvee ou que aucune nouvele auray d’elle. » « Sire, dist son hoste, que dira ma damoiselle Aglentine quant ces nouvelles lui seront racomptees ? Jamais n’aura mary que vous. Certainement je cuide savoir que se ainsi vous en alez sans prendre congié d’elle que elle morra de dueil. » Quant Girart oyst parler d’Aglentine pas ne seroye deviser comment il se pourra departir de l’une pour l’autre. Or pourons veoir laquelle le contraindra de demeurer ou de departir par sorceries ou par vraye amour. Se ainsi est que Girart s’eslonge d’Euriant et que avec Aglentine il demeure il semblera que sorceries et charmes vaillent mieulx que vraye amour qui viennent naturelment ; mais se droit et raison ont lieu, amour qui vient volentairement est tropt plus grande et de plus grant force, plus courtoise et plus aimable que n’est celle qui vient par art d’enchantemens et de sorceries. Et pour ce raison contraint Girart de laissier Aglentine pour aler serchier Euriant, laquelle il ne delaissera pour mort ne pour vie jusques a ce qu’il l’aura trouvee. Lors monta a cheval et reclama son esprivier qu’il vinst incontinent sur le point, puis appella son hoste et lui dist : « Mon hoste, cest esprivier porterez a Aglentine, que j’ayme moult, et luy direz de par moy que pour amour de moy le vueille prendre et garder. Au surplus direz au duc et a elle aussi que moult de fois leur remercie des grans honneurs et biens qu’ilz m’ont fais, en leur priant de par moy que mes services vueillent avoir pour agreables, et me doint Dieu le povoir que avant que je meure vous rende les biens et services que fais m’avez en vous priant que saluer me vueilliez Aglentine. »

Comment Girart prist congié de son hoste et lui bailla son esprivier pour porter a Aglentine.

Ainsi se partist Girart et prinst congié de son hoste et s’en ala lui tout seul sans compaignie, chevauchant per ung sentier, mais oncques son hoste ne se volt departir jusques a ce que de ses yeulx ne le peut plus veoir, puis le recommanda a Dieu. Lors l’esprivier sur le poing monta a cheval et s’en retourna a Colongne et ainsi qu’il fut devant la porte il veist Aglentine qui estoit a la fenestre regardant quant Girart viendroit. Mais quant elle veist retourner l’oste seul ung se commença a esbaïr, pensant pourquoy il ne revenoit avec son hoste, combien que jamais n’eust penser que d’elle se fust departi en quelque maniere ; et se reconforta pensant en elle avoir aucunes nouvelles par son hoste et pourquoy il n’estoit retourner avec lui, combien que tousjours regardoit par la fenestre se elle le verroit venir. Quant elle eust demeuré a la fenestre jusques a la nuyt et que point ne venoit elle devala de la tour et vinst en la saule ou elle trouva l’oste de Girart, l’esprivier de Girart sur le point. Quant elle le veist ainsi estre seul l’esprivier de Girart sur le poing, bien veist qu’il n’aloit pas bien. Incontinent lui ala au devant et lui demanda ou estoit Girart son amy. L’oste triste et doulant et couroucié, a basse et morne voix lui respondist : « Madamoiselle, ce que je vous vueil dire, couroux, regret ne desplaisir ne vous y pouront aydier. Et pour ce vous conseille que de ce dont ne povez recouvrer ne demenez grant dueil, car vous perdriez vostre peinne. » Lors lui racompta les nouvelles et fist le messaige que Girart lui avoit prié, et apres comment son esprivier avoit prinse une aloe qui portoit ung anel a son col, et du grant dueil qu’il demena quant il le recogneust, et du serement qu’il fist de jamais non arrester jusques a ce qu’il auroit trouvee s’amye que de long temps avoit perdue. Puis lui dist : « Ma demoiselle, Girart m’a chargié que de par lui vous saluasse et que de cestui esprivier vous feisse present, lequel par moy vous envoye. » Quant Aglentine oyst le messaige, elle hauça la palme pour frapper l’esprivier, pour le tuer, se n’eust esté le duc son pere qui y mist la main en la blasmant et lui dist : « Ha ma fille, que voulez vous faire ? Povre vengence auriez fait d’occir cest esprivier qui riens ne vous a meffait. » « Mon pere, dit Aglentine, oncques homme tant ne meffit. Car l’oseau a esté trop ligier a prendre l’aloe qui a esté cause de moy faire perdre mon amy. » Lors commença de faire ung deul si grant que layans n’avoit homme qui n’eust grant pitié d’elle, excepté Florentine a quy gaires n’en chaloit. Moult grant dueil et tristesse demenoit Aglentine pour son amy Girart qu’elle avoit ainsi perdu, et n’estoit riens qui la peust reconforter fors le duc son pere, qui tant de choses lui promist que ung peu fut reconfortee, esperant que encores une fois le rauroit, et lui promist de l’envoyer querre par tous païs s’il ne vient deans brief temps. « Et vous feray avoir tel mary que vous serez contente et appaisee et laisserez tous couroux et yre. » « Ha sire, dit Aglentine, saichiez que se je ne le ray et vous me donneissiez l’empereur de Constantinoble ou d’Alemaigne si ne les vouldroye je pas avoir. Jamais autre mary n’auray que Girart que tant ay amé. Pour Dieu, envoyez ung chevalier et lui chargiez comment qu’il soit qu’il le ramaine et face toute diligence, car par cellui Dieu qui me forma jamais autre que lui n’auray a mary. » Le duc oyant sa fille que en nulle maniere ne la povoit appaisier se apres Girart ne envoioit, fist aprester ung escuier et lui chargea de non retourner jusques a ce qu’il eust parlé a Girart et tant a lui fait que avec lui voulsist retourner. Quant Anglentine veist le messaigier aprester, elle se reconforta ung peu et laissa son dueil esperant d’avoir bonnes nouvelles. Le messaigier se partist et ala apres Girart chevauchant au plus tost qu’il peust et tellement diligenta qu’il trouva les passees de son cheval. Il se mist sus et le suist jusques a une grande forest ou les perdit pour l’erbe qui estoit moult grande. Du messagier vous lairons a tant et retournerons a Girart qui aloit chevauchant pour trouver Euriant s’amye.

Comment Girart trouva ung chevalier soubz ung arbre a qui on avoit ostee sa femme et comment Girart lui ramena.

Apres ce que Girart se fut departy de son hoste Adam le gregois et qu’il lui eust baillié son esprivier pour le baillier a Aglentine il se mist en chemin. Maint mont et mainte valee et maintes forest passa sans gaires adventures trouver dont on doye faire mencion, mais oncques ne sceust tant aler qu’il peust trouver homme ne femme par qui il peust sçavoir nouvelles d’Euriant, dont il eust au cuer grant melencolie. Si advint ainsi comme il aloit ung jour, chevauchant parmy une grande lande, il veist de loings ung grant arbre dessoubz lequel avoit une grosse pierre contre laquelle avoit couchié ung chevalier moult fort navré. Quant Girart le veist il se donna merveilles et le commença moult fort a regarder, et se approucha et luy demanda qui l’avoit ainsi navré. Le chevalier leva ung peu la teste et dist a Girart : « Sire, cellui qui ainsi m’a navré m’a par force ostee ma femme, laquelle j’avoye aujourd’uy espousee. Moy .iii.^e de chevaliers m’estoye aujourd’uy mis en chemin pour la mener en mon chastel. Mais au plus pres d’icy demeure le seigneur de Durbus ung traitre et mavais chevalier ; en Ardaine a grant seigneurie ; mon ennemy mortel estoit, mais entre luy et moy avoit treves ; ce non obstant m’a agaittié en ceste forest et m’est venu corir sus et m’a occis ung de mes chevaliers. Les autres s’en sont enfuiz apres ce que j’ay esté par terre ainsi navré comme me veés. Mais encores ay plus grant desplaisir de ma femme qu’il m’a ostee que des playes que j’ay sur moy. » Girart lui respondist : « Amy, de vostre anuy me desplaist. Je ne suis de fer ne d’acier et suis desarmé fors de mon espee que j’ay sainte qui est moult bonne et bien trempee. Saichiés de vray se j’avoye armes, ealme, lance et escu jamais n’arresteroye jusques a ce que au chevalier dont tant vous doulez je me fusse combatu, se vostre femme ne me rendoit. » « Sire, dist le chevalier, se tant de courtoisie me voulliez faire, alez desarmer ce chevalier mort que vous veez la gesant dessoubz cest arbre. » Girart regarda celle part et ala au chevalier mort et le desarma de tout point et se arma au mieux qu’il peust puis vinst a son cheval et monta sus et dist adieu au chevalier navré qui lui enseigna la voye et le sentier et lui dist se ung peu se vouloit haster que bien les consuigroit. Girart desirant de tout son cuer rescourir la femme du chevalier commença a chevauchier roidement et tant chevaucha qu’il les consuist et estoient trois chevaliers. Girart les commença a regarder, qu’ilz estoient descendus et leurs chevaulx attaichiez a des arbres, puis regarda la dame qui demenoit moult grant dueil : toute nue l’avoient despoullee excepté sa chemise ; eulx deux la tenoient par les bras et la batoient de verges, parquoy elle cryoit si hault que c’estoit grant pitié de l’oyr. Girart tourna celle part et vinst vers eulx et veist que la dame estoit toute couverte de sanc des cops de verge qu’il lui avoient donnez. Girart ayant pittié d’elle moult courtoisement leur dist qu’ilz la laissassent en paix et que sur elle ne voulsissent plus frapper. Le chevalier qui ainsi la batoit tourna la teste vers Girart et lui demanda s’il estoit la venu pour la vengier. « Je pense que avant que nous eschappes tu seras en ce point servy. » Girart leur dist : « A ce que je aperçoy de vous, advis m’est que beau parler riens ny vault. Je cuide sçavoir de certain que quant viendra au departir legierement pourez porter le gain que vous y ferez. Sus laissiez la tost car point ne le souffreroy ainsi estre batue. » Alors les chevaliers, oyans Girart eulx menacier, laisserent la dame ou chemin tousjours en chemise et incontinent monterent a cheval en jurant gros seremens que Girart seroit detranchié. Girart veant les chevaliers prestz pour lui courir sus baissa la lance en picquant cheval d’esperon et vint joindre au seigneur d’eulx tous et assigna son escu, qui estoit paint d’or, ung si grant cop et merveilleux lui donna que oncques l’escu ne le aubert ne le peust garantir que la lance ne lui passast parmy le corps. Au retirer qu’il fist sa lance, l’abatist mort par terre. Les autres d’eulx, veans leur seigneur mort, furent moult doulans et courouchiés moult asprement, courirent sus a Girart, pas ne lui donnerent loysir de couchier sa lance. Girart qui en riens n’estoit esbaÿ mist la main a l’espee, si en frappa l’un d’eulx ung cop si desmesuré que le bras atout l’espee lui abatist a terre, mais les autres deux navrent Girart en la cuisse. Quant Girart se sentist navré, d’ire et de couroux frappa cellui qui l’avoit navré, et si bien l’assena sur le healme qu’il le fendist jusques es dens. L’autre regardant le grant cop de Girart qui moult faisoit a redoubter prinst la fuitte au plus tost qu’il peust. Girart veant d’eulx la place estre delivree vinst vers la dame et la fist revestir puis la fist monter a cheval. Quant la dame se veist estre delivre et ostee hors des mains de ceulx qui l’avoient ostee a son mary, fut plus joyeuse que jamais et moult courtoisement en mercia a Girart qui ainsi l’avoit delivree des mains de ses tirans. Si luy demanda : « Sire, je vous prie que dire me vueilliez ou vous me voulez emmener. Bien est raison que partout ou vous me vouldrez emmener que je voise sans faire nul refus car la vie m’avez sauvee. Mais se par vostre courtoisie me vouliez rendre a celluy a qui aujourd’uy ay espousé grant aulmosne feriés combien que je ne sçay s’il est mort ou vif, car au departir que feis de lui le laissay moult fort navré. » « Belle, dist Girart, soyés seure pour certain que je vous remenray a vostre mary que j’ay laissié seul dessoubz ung arbre. J’espoire que garde n’aura de mort. Tant s’exploita Girart et sa dame femme du chevalier navré qu’ilz vindrent ou lieu ou il gesoit. Quant icellui chevalier veist sa femme estre ramenee par Girart, de la grant joye qu’il eust il oublya toute douleur. Lors Girart mist pié a terre et descendist la dame du cheval, qui moult estoit simple de son mary qu’elle veoit ainsi navré. Girart prinst ung couvrechief que la dame portoit et en mist a point le chevalier puis lui demanda s’il sauroit ne pouroit chevauchier et que moult voulentiers le conduiroit jusques en sa maison. « Car, dist Girart, bon mestier avez de mire pour faire visiter voz plaies. » « Sire, dist le chevalier, bien dois louer Dieu et gracier quant il vous amena pardeça. Puis que ainsi est que ceste courtoysie me voulez faire, j’ay ung chastel au plus pres d’icy ou j’ay laissié ung mien parent. Se jusques la me vouliez conduire a tousjours mais suis et seray vostre chevalier. Moy estre gary vous tiendray compaignie en tous les lieux ou vous vouldrez. » « Amy, dist Girart, ne faictes nulle doubte. Jamais de vous ne quiers partir jusques a ce que en lieu seur vous auray mis. » Alors Girart ayda monter le chevalier et la dame et puis monta a cheval et s’en partirent. Tous trois ensemble tant exploiterent qu’ilz vindrent ou chastel du chevalier navré. Quant leans furent entrez, le cousin du seigneur leur vinst au devant moult esbaÿ et triste de veoir son seigneur navré. Si lui demanda dont celui venoit. Lors le chevalier lui racompta et dist la chose comme elle avoit esté. Puis lui compta la maniere comment par Girart avoit esté sauvé et mis au delivre et sa femme rescousse des mains de quatre chevaliers dont les trois furent occis. Lors le parent du seigneur sans plus actendre lui et ceulx de leans coururent a l’estrié de Girart et lui firent tresgrant honneur car leans n’y avoit homme ne femme qui ne se traveillast de lui faire service et honneur. Ilz menerent Girart en une chambre et le desarmerent et se mist a son ayse et furent tresbien penser de son cheval, combien qu’ilz estoient moult doulans du seigneur qui ainsi estoit navré, mais pour amour de Girart s’efforçoient de faire bonne chiere. Car il n’y avoit celluy qu’il ne fust a l’entour de lui et s’efforçoient tous de lui complaire et celle nuyt lui firent tresgrant chiere et fut tresbien servy de toutes choses. Quant vinst apres soupper et qu’il fut temps d’aler couchier, le menerent en une belle chambre moult richement paree ou il dormist celle nuyt, jusques ce vinst au matin qu’il se leva et ala oyr messe. Apres fist une souppe en vin et puis prinst congié du chevalier et de la dame et de tous ceulx de l’ostel, lesquelx le prierent pluseurs fois qu’il lui pleust demeurer a l’ostel et que on lui feroit bonne chiere, mais oncques ne volt demeurer, et se partist de la et monta a cheval et se mist en chemin. Tant chevaucha par mons et par plains qu’il vinst en une grant valee, en laquelle avoit une moult belle fontaine en laquelle seoit une moult belle pucelle toute deschevelee en l’eaue jusques au col, oncques de chose que Girart veist ne fut plus esmerveillié, et pensa que ce povoit estre et pensa de fait que ce fust une fantosme ou aucun deable, et commença a faire le signe de la croix et s’approucha pres en saluant la pucelle. Quant elle veist Girart elle changea couleur et s’abaissa, ung peu fut honteuse et lui dist : « Sire, bon jour vous doint Dieu. »