Traicté tresrecreatif et plaisant de l'amour indicible de eurialus et de lucresse composé par le pape pie avant la papauté nommé enee silvye et translaté de latin en françois (continued 3)

En devisant ainsi que dit avons En la chambre monterent les amans Et si eurent ainsi que nous croions Autelle nuyt qu'eut paris bien visans Quant helaine plaisant et jeune de ans Es navires eut mise aussi posee Du jeu d'amours les esbas conduisans Furent autant et dura la nuytee

Et leur sembla la nuyt si amoureuse Doulce et plaisant & chascun d'eux disoit Que mars n'avoit point eu nuyt si eureuse Avec venus com chascun d'eux avoit Car eurial lucresse appelloit Ganimedes et son doulx ypolite Puis mon plaisant diomedes nommoit Pour louenge d'amours tiltre et merite

Eurialus par semblable façon Si lucresse polissene appelloit Mon emylie ma venus de renom Puis la bouche et les joes lui baisoit Et ses beaux yeulx treslumineux louoit Puis en levant parfois la couverture Les beaux secretz que jamais veus n'avoit Il contemploit par diligente cure

Puis il disoit je treuve plus de biens En ce gent corps que on ne pourroit penser Quant diane se le cas bien retiens En fontaine se voulut abaisser Et que anthion la vit illec baigner Elle estoit lors telle se m'est avis Plus beaux membres on ne sauroit trouver Ne mieux fourmés plus blans ne plus cler vis

J'ay rachaté tous dangiers et perilz Il n'est chose que pour toy ne souffrisse O poictrine plus blanche que le lis O mamelles tresplaisans ferme cuisse A ceste fois je vous ay sans que on puisse Moy empescher vous estes en mes mains Corps et membres souffisans pour un prince Et fust il duc ou roy tressouverains

Content serois de mourir & mieulx vault En ceste joye si plaisant et nouvelle Que d'attendre de fortune l'assault Qui me pourroit calamité mortelle Livrer aprés et de ma damoiselle Et son gent corps prendre par quelque effort Puis il disoit mon cueur ma jouvencelle Vous tienge ou non ou se songe ainsi fort

Est veritable ceste plaisance ou non Ou si je suis hors moy ainsi ravy Certes nenny ce n'est pas fiction Je ne songe ne reve il est ainsi O doulx baisers sans reproche ne fy Doulx acolers morsures melliflues Plus eureux n'est homme je vous affy Que moy vivant marchant parmy les rues

Las les heures sont trop briefves & courtes Envieuse nuyt pour quoy t'en fuis tu Sire appollo puis que es enfers te boutes Arreste t'y pour quoy te hastes tu Tes chevaulx n'ont quelque repos si tu De repaistre ne leur donne loisir Tousjours ilz ont le col au joul tendu Arreste les s'il te vient a plaisir

Je te suppli donne moy telle nuit Que tu donnas a la plaisant almene Las aurore qui t'a faict si grant bruit Que de titon le logis et demaine As si soudain laissé ce m'est grant peine Se autant plaisoie a titon que lucresse Me plaist pour vray a trop plus longue alaine Te dormirois comme dame et maistresse

Si tresmatin lever ne te lerroit Au pres de luy te tiendroit voulentiers Oncques ne vy nuit quant a mon endroit Qui si courte me semblast plus du tiers Si ay je esté es contrees et sentiers De bretaigne et de dacie aussi A dieu pleust il que la nuyt trois quartiers Eust encores je seroye sans soucy

Eurialus ainsi se complaignoit De la clerté du jour qu'il avisa Et lucresse pas moins si n'en faisoit Oncques ung seul baiser ne postposa Ne parole ne obmist si bien visa Qu'elle ne rendist a tout sa recompense Se l'un estrainct l'autre aussy bien serra Soy reposans quant sont las de la dance

Mais tout ainsi que antheus se levoit Plus fort aprés qu'il n'estoit par avant Quant sur terre son corps couché avoit Pareillement lucresse et son amant A la jouste d'amours si tresavant Fors et joyeux entre eulx se combatirent Que si l'un est bien chault l'autre est suant Ou fait d'amours leur devoir granment firent

Et la nuit estoit toute parfaicte Quant aurore ses cheveulx esleva De la grant mer/ pas ne fut imparfaicte De deux amans la joye quant elle leva Eurialus sur ce point s'en ala Et peu de jours aprés trouva façon Que ces esbas amoureux recouvra Si metoit l'en gardes a grant foison

Mais amours tout vainquit et supera Qui la voye trouva facilement Par la quelle les amant assembla Et les unit tresamiablement Cesar voulut aler finablement Vers eugene qui pape lors estoit Car avec luy tresacordiablement Par bonne paix consilié c'estoit

Lucresse sceut assés tost l'entreprinse Il n'est chose que amour bien n'aperçoive Qui est celuy qui sauroit par faintise Tromper amant que tantost ne conçoive La fallace ou en cueur ne reçoive Quelque signe de ce declaratif Lucresse fist ains que mengusse ou boive Lettres a son amant de cueur actif

Se je povois contre toy me marrir Et que mon cueur ce peust faire & courage Je le ferois pour ung seul desplaisir Que j'ay conceu present soie fole ou sage C'est de ce cas par faintise ou oultrage Dissimulé et teu ton partement Mais mon esperit pour perte ne dommage Ne te sauroit hair apertement

Las mon esperit plus que soy mesmes t'aime Et ne se peut encontre toy mouvoir Helas mon cueur que tant cheris & ame Pour quoy m'as tu ainsi celé le voir Du partement de cesar sans m'avoir Premierement de ce fait avertie En ce faisant eusse fait ton devoir Dure sera pour moy la departie

Je sçay assés que tu ne demourras Pas derriere quant cesar partira Las je te pry dy moy que tu feras De moy lasse quant ainsi s'en ira Que feray je qui reconfortera Mon dolent cueur certes se tu me laisses Deux jours entiers en vie ne sera Soys en tout seur veu t'en foys & promesses

Je te supply par ces lettres qui sont De mes larmes plaines et arousees Par ta dextre et foy lesquelz m'ont Ou paravant par toy esté baillees Si aucun plaisir je t'ay fait es journees Du temps passé et si aucunes doulceurs As avec moy prinses ne recouvrees Ays mercy de mes maleureux pleurs

Ayes mercy de la povre amoureuse De tout mal eur et calamité plaine Je ne requier chose trop ennuieuse Que demeures mais avec toy me maines Je faindré bien ung jour de la sepmaine Que en betheleem hors ville aller vouldré Une seule vieille que avec moy maine Pour compaignie me faire je prendray

Fay tant que deux ou trois de tes servans Soient la tous pres pour mon corps recueillir Pas grant labeur n'y a savans A rober ce qui aide a se ravir Craindre ne fault deshonneur advenir Le filz priam eut par ravissement Helaine et si en fist a son plaisir De leurs amours jouyrent longuement

A mon mary ne feras quelque injure En ce faisant certain soit et asseur Qu'il me perdra aussi bien ce te jure Se me laisses la mort le fera seur Car de ma main a bon ou mauvais eur Je me occiray: j'en feray le depart De mon mary et de moy c'est l'erreur Ou me boutes se tu n'y prens egart

Ne me vueilles estre si trescruel Ne me laisser ainsi mourir seulete Qui t'ay chery autant que ay fait mon oeil Et plus que moy aymé c'est ma desserte Se par toy suis ainsi laissee deserte Lasche amoureux on te reputera Emmaine moy soit a gaing ou a perte Cela mon cueur du tout confortera

Eurialus aux lettres respondit En la forme qui ensuyt cy aprés Ma lucresse m'amour pas ne t'ay dit Ains t'ay celé mon partir par exprés Pour que devant que nous feussons tous pres De deloger n'eusses affliction Je congnois bien tous les meurs a peu pres Trop te crucie sans moderacion

Cesar ne va de ceste ville hors Sans revenir icy retourneron Quant de romme retonra suis recors Doubter n'en fault que par cy passeron C'est le chemin au moins pres ou viron Pour retourner droit en nostre pays Plus tost cent lieux de pays forvoyrion De ce pour dieu si fort ne te esbays

Et se cesar prenoit autre chemin Et que par cy ne voulsist retourner Se je suis vif par le vouloir divin Avecques toy m'en viendré sejourner Ne me vueillent les dieux jamais donner Grace d'entrer en ma terre et pays Se ne revien vers toy sans delayer Et deussé je du prince estre hays

Veullent les dieux que ne cesse d'errer Et fourvoier sans tenir voie ne sente Ainsi que fist ulixes ains que entrer En son pays par dix ans se me absente Si loing de toy pour bien avoir ne rente Que ne viengne voir mes doulces amours Respire donc ma mignonne tresgente Laisse toutes afflictions et plours

Pren courage & tes vertus resume Ne te maigris mais viz joyeusement De toy ravir assés certes presume Qu'il en viendroit grant inconvenient Ce touteffois ferois je liement Je ne sarois avoir plus grant plaisance Que nous feussons continuellement Ensemblement pour faire demourance

Mes touteffois mieulx vault a ton honneur Conseil donner que suyvir ma plaisance A ce faire me oblige la valeur Et la bonté de ta foy et constance De laquelle m'as baillé alliance Conseil te doy donner bon et loyal Et a ton fait mettre tel pourveance Qu'il n'en puisse advenir quelque mal

Tu congnois bien que tu es noble dame Et mariee en moult noble maison On ne sauroit trouver plus belle femme De ce par tout as le bruit & renom Es ytalies ne vole pas ton nom Tant seulement car les teutoniens Et les boesmes font de toy mencion En te louant et les panoniens

Tous les peuples des parties d'occident Pareillement ceulx de septentrion Font grant feste de toy ce est evident Ilz congnoissent ta beaulté et renom Se te ravis mencion ne faison De mon honneur lequel contemneroie Pour ton amour regardons ta maison Et tes amis que je vilenneroie

De quelz douleurs seroit ta bonne mere Pointe & navree cela consideron Tant elle auroit au cueur douleur amere Et puis de toy qu'on diroit avison Par le monde quel parler quel blason Seroit de toy on ne le saroit dire Doubte ne fays car ce seroit raison Qu'on ne parlast plus que on ne peut escrire

Vecy les motz que dire l'en pourroit Voiez pour dieu ceste grande merveille De lucresse que plus chaste on tenoit Que de brutus la femme bonne & belle Et meilleure que la sage et tresbelle Penelope elle suyt ung ribault Elle a son pays/ amys & parentelle Abandonnés moult avoit le cul chault

Las que de deul aurois & desplaisir Quant je oroye de toy telz sermons faire Encor n'avons graces dieu que plaisir Nostre amour est secret et de bon aire Il n'est homme qui ne te vueille faire Biens et honneur on te loue par tout Se rapine de toy voulois parfaire Et t'en mener je troubleroie tout

Tu n'euz oncques bonnes louenges tant Que tu aurois de blasme & vitupere Mais or laissons le bon nom qui vault tant Et avisons comment ce pourroit faire Impossible seroit ne le fault taire Que nous peussons de nostre amour user Car a cesar service me fault faire A toute heure ce ne puis refuser

Cesar m'a fait homme riche & puissant Je ne le puys ainsi abandonner Sans ruine de mon estat: pourtant Provision fault sur ce point donner Se le laisse pour bien tout ordonner Decentement tenir ne te pourroie Si je me veil a court suyvre adonner Licitement tenir ne te sauroie

Tu n'aurois repos ne jour ny heure Tousjours d'un lieu en l'autre remuon Je ne vis onc a cesar tel demeure Ne si longue en lieu ou nous feusson Faire qu'il a cy faicte pour raison De la guerre qui a ce l'a contrainct Si me suyvois c'est la mode et façon Pour publique femme gens te tiendroint

Avise bien quel deshonneur seroit Autant pour toy que pour moy je te prie Pour ces causes et raisons cy endroit Treshumblement de bon cueur te supplie Que tu vueilles ceste merancolie Loing de ton cueur bouter hors & trop mieulx A ton honneur conseiller sans folie Par bon conseil & vouloir curieux

Et peut estre que ung autre qui seroit De toy autant amoureux que on peut dire Ce conseil cy pas ne te donneroit Mais te priroit grandement de le suyre Pour qu'il usast de toy tandis que rire Et passer temps avecques toy pourroit Sans regarder qui peult aider ou nuyre Fors seulement au plaisir qu'il auroit

Mais tel amant ne seroit pas loyal Ne vray amy quant plus tost ameroit Sa volupté en conseillant tresmal Que bon renom du quel ne lui chauldroit Ma lucresse je te conseille droit Et advertis de ce qu'est prouffitable A tout honneur et salut cy endroit Je te supply prens mon conseil notable

Demeure icy je te prie humblement De mon retour ne fay quelque doubtance Ce qui sera pour le gouvernement Des etrusquins a faire j'ay fiance Que l'empereur qui devant tous m'avance Commission et charge me donra Par tout mettre si bonne pourveance Que de ton corps le mien joyeux sera

Je feray tant sans quelque dommage Tu encores que a nostre aise rirons A dieu te dis m'amie sur ce passage Vy & me ayme quelque fois nous dirons Autre chose mais de ce te prions Que ne croies que moins brule que toy Du feu d'amours car plus que toy ardons A dieu te dy souvienne toy de moy

Lucresse assés voulentiers acomplit Ce que eurial lors rescript lui avoit Et peu de jours aprés cesar partit Vers romme ala: eurial le suyvoit Quant a romme furent croire l'en doit Que eurialus fut de fievre saisi Qui durement nuyt et jour le vexoit De amour ardoit et de la fievre aussi

Amour l'avoit d'ung costé fait si foible Et la fievre tant pressé d'autre part Que il estoit si deffaict et endable Par les douleurs de mal qui brule & art Que a peu s'en fault que l'ame ne part Les medecins la vie ou corps lui tiennent Par chascun jour cesar va celle part Le visiter quelque affaires qui viennent

Comme son filz reconforter l'aloit Et de apolin toutes les medecines Par curieux estude lui faisoit Bailler: affin que de santé les signes Peust recouvrer: mais oncques si tresdignes Ne vaillables receptes ne trouva Que les lettres de lucresse ou dignes Et louables nouvelles recouvra

Car il congneut par les lettres a plain Qu'elle vivoit & que estoit en bon point Et de cela fut son mal pour certain Diminué en tel façon et point Que sur ses piés il revint si apoint Qu'il fut present quant cesar sa couronne Print et receut gent et coint Fut par cesar fait qui tel honneur donne

Quant cesar fut de romme delogé Et qu'eut tiré son chemin vers peruse Eurialus estoit encores logé En la cité de romme ou pas ne muse Car il voulut la maladie incluse Qui encores pas guerie n'estoit Estre du tout hors mise sans cabuse Moult bien savoit que aprés faire devoit

Car de romme a senes se tira Ja soit ce qu'il fust povre maigre & pale Quant arrivé fut la moult desira A lucresse parler en chambre ou sale Il la peult voir mais la chose fut male Car de parler moien trouver ne peut Fortune ainsi les amoureux ravale Joyeux les fait ou tristes quant elle veult

Plusieurs lettres furent faictes par eulx Tant d'ung coté que d'autre escrivoient D'eux enfuir il fut traicté entre eulx Quant ilz virent que joindre ne povoient Et par trois jours d'escrire ne cessoient Puis eurial voyant que entrer ne peut Avec lermes qui des yeulx lui couroient Son partement faire savoir lui veult

Oncques n'eurent les amans tant de joye En conversant ensemble par amour Qu'il receurent foy que doy saincte avoye Au departir de tristesse et doulour Lucresse estoit toute remplie de plour Aux fenestres voyant son amoureux Par les rues en moult piteux atour Sur son cheval triste et calamiteux

L'un sur l'autre avoient getté les yeux Se l'un ploroit l'autre n'estoit pas moins De lermes plain de douleur sont tous deux Si fort remplis angoissés et estraincts Qu'il peut sembler que des sieges humains Leur cueur se doit arracher & sortir Plus aspre n'est le dart tresinhumains De mort que fut des amans le partir

Se aucun ne scet quel peine on peut sentir Quant de la mort viennent les durs assaux Luy plaise un peu sans vouloir dissentir Des deux amans les angoisses & maulx Viser aussi les peines et travaulx Que a departir eurent nos deux amans Il trouvera se a juger je ne faulx Qu'ilz souffrirent plus que mort endurans

La raison est bien clere a toutes gens Car l'ame envis du corps veult departir Pour qu'elle aime sans estre negligens Ce corps mortel du quel ne veult sortir Mais quant absent est l'esperit plus sentir Ne peut le corps ne peine ne misere Quant deux ames sont joinctes sans mentir Plus au partir ont de peine et de haire

Et de tant est plus dur le departir Que chascun des amans est plus sensible Les deux amans avant leur departir Ung seul esperit avoient indivisible Et d'une ame par euvre perfectible Estoient deux corps soustenus sans doubtance Aristophon s'on veult en est credible Qui ne le veult croire si face instance

Par les moyens que j'ay recités cy L'ame de l'un des amans ne laissoit Pas l'autre ains se bien avise cy Ung seul amour en deux trenché estoit Ung cueur en deux parties se divisoit L'une partie de l'ame si s'en va L'autre pour vray d'ung coté demouroit Et tous les sens de partement sont la

Au departir et aprés les corps ont De deux amans pleurs douleur & misere Ce que les corps de ceulx qui meurent n'ont Dire donc fault c'est chose necessaire Que plus eurent de grief mal & contraire Les deux amans a leur departement Que cil qui n'a que un corps qu'il puisse atraire A mort sans plus endurer de tourment

En leur faces goute ne demoura De sang/ lermes & pleurs pour sang avoient En soy plaignant chascun d'eux soupira Et d'estrois mors deux exemples donnoient Qui seroient ceulx qui sauroient ou pourroient Narrer penser ou escrire leurs deulz Tous les vivans a ce ne souffiroient S'ilz ne estoient en deul pareilz a eulx

Laudomia pres que morte tumba Quant elle vit partir prothelaee Son doulx amy qui de aler proposa Aux grans assaulx de troye tant reclamee Quant de sa mort oyt la renommee Elle ne peut plus vivre ne durer Et dido eut piteuse destinee Pour eneas soy voulant perimer

Portia qui de brutus estoit femme Ne voulut point vivre aprés son mary Pareillement lucresse noble dame Quant de eurial son gracieux amy Eut la veue perdue je vous affy Elle tumba sur la terre pasmee Puis portee fut sur son lit bien garny Tant qu'elle fust a soy mieulx retournee

Quant l'esperit lui fut bien revenu Ses vestemens d'or et pourpre laissa De liesse ne fut plus retenu Quelque aornement car tout elle mussa De vestemens de dueil tousjours usa On ne la vit puis ne chanter ne rire Par facessies et jeux on essaia La consoler mais son dueil luy empire

Ouquel estat quant eut perseveré Par aucun temps el cheut au lit malade Pour que son cueur d'elle estoit separé On n'y trouvoit remede tant fust sade Entre les bras sa mere triste & fade En vain plorant son esperit el rendit Le doulx jesus en ait l'ame en sa garde Qui pour pecheurs hault en la croix pendit

Eurialus triste et dolent s'en va A personne de ses gens mot ne dist A soy mesmes souventeffois pensa S'il reviendroit jamais car tousjours gist Dedans son cueur lucresse/ il ne fist Tout le chemin point d'autre pensement Jusques a ce que a cesar se rendist A peruse ou se tint longuement

Eurialus de peruse suivit Cesar jusques a ferrare et mantue De tridente a constance courit Jusques au palais de cesar se evertue Avecques luy tira d'une venue De hongrie jusques au pays des boesmes Mais en son cueur lucresse contenue Estoit tousjours plus que parens ne proesmes

Lucresse ainsi le suivoit en dormant Comme il suyvoit cesar soiés certains Et de repos n'avoit ne tant ne quant Quant de sa mort eut lettres en ses mains Com vray amant mena douleurs & plains Robe de deul vestit sans confort prendre Jusques a ce que cesar souverains Une femme lui donna chaste et tendre

Du sang estoit d'un noble duc venue La plaisante pucelle espousa Belle/ chaste et prudente tenue Sage homs estoit: moult l'ama & prisa Es oraisons qu'il faisoit tousjours a De la bonne lucresse remembrance Cil qui le corps a amé n'oublira L'ame jamais s'il a bonne prudence

Mon cher amy marianus tu as Icy la fin du livre des amans L'amour n'en est fainct ne eureux se bien as Par tout visé: ce te suis affermans Qui ce livre liront s'ilz sont savans Se garderont de choir en telz perilz Le brevage d'amours ne soient bevans Ou d'aloés plus que miel est mis

L'istoire que ay cy devant translatee Se par bons sens on la veult digerer Et qu'el ne soit qu'en bien interpretee A personne ne veult mal suggerer Toute vertu et bien veult ingerer Peché fuyr et faitz pernicieux Mais qui vouldroit son venin egerer Le bien seroit rendu caligineux Femmes de bien ne perdront a bien vivre A fole amour ne s'abandonneront Car il n'est vin si fort qui tant enyvre Que fol amour bien icy le liront Ceulx qui d'amours le train suyvir vouldront Si se mirent au noble eurialus De leurs dames l'onneur ilz garderont Et si seront tous scandales tolus