Traicté tresrecreatif et plaisant de l'amour indicible de eurialus et de lucresse composé par le pape pie avant la papauté nommé enee silvye et translaté de latin en françois (continued 2)

Et ja soit ce que le fait difficille Grant et pesant a sozie semblast De deux vices le moins mal comme abille Voulant fuir/ sans que plus deloyast Ceste charge ainsi que s'il doubtast Trop plus grans maulx ensuivir print sozie Disant a soy qu'en quelque lieu trouvast Euriale ne luy celeroyt mye

Tout par ordre fut narré le message A l'amoureux par le loyal sozie Euriale receut de bon courage Tous les commans et charges de sa mye Tout luy estoit legier n'en doubter mie Pour ce faire se apresta vistement La demeure grandement luy ennuye A qui atent ennuye communement

O poictrine et pensee mal sensee De fol amant aveugle peu voyant O cueur sans peur trop asseuree pensee Quelle chose est a parfaire si grant Que petite ne reputes rien tant N'est aspre ou dur que ne dies plain & doulx Rien si bien clos n'est que ne dies contant Par toy povoir estre ouvert a tous coups

Il n'est danger qui ne soit mis en soubte Par toy car rien si ne t'est difficile Toute garde tant soit elle resoulte Des caulx maris reputes inutile Loy quelconques ne veulx avoir en ville N'estre subject a crainte ny a doubte Tout labour t'est comme jeu tresfacille En tous tes fais aveugle ne vois goute

O cupido dieu d'amours vainquisseur De tous humains: le premier tu contrains Et plus prochain de cesar de age meur Plus accepté plus riche d'engin fains Lettré prudent laisser pourpres & trains D'une vieille pouche sa robe faire De couleur faux son visage estre tains Et de seigneur en serf se contrefaire

Tu contrains cil qui de coustume avoit Estre nourri delicieusement Dessus son dos porter comme l'en voit Charges et sacs de blé peniblement Comme locatif mercenaire humblement En lieu public a vil euvre s'aplique Sans honte avoir porte publiquement Plains sacs de blé et tout par la pratique

O chose pres que a dire incredible Et digne que on s'en doive esmerveiller Veoir ung homme autant qu'il est possible Grave en conseil maintenant cheminer Avec ung tas de voituriers aller En la boe immundice & ordure Telz herpailles guetrés acompaigner A grant contens de sa noble nature

Qui est celluy qui alleguer pourroit De homme sage plus grant mutation Autre chose ovide ne pourroit En son livre le quel nous appellon Methamorphos quant transmutation De homme en beste/ en pierre ou en plante Estre disoit par bonne fiction C'est quant amour raison d'omme suplante

Ceste mesme mutation sentoit Maro/ de tous poetes plus excellent Quant de circés les amoureux disoit Estre en dos de bestes promptement Muez et ce voit on bien clerement Que par le feu d'amours est la pensee D'omme muee et changee tellement Qu'elle semble pres que en beste muee

Lors aurora de titan son amy Le lit vermeil avoit desja laissé Et pour chasser de terres tout ennuy Avoit le jour de hault en bas lancé Puis apollo/ ses retz avoit dressé Et des choses la beaulté demonstree Euriale d'attendre estoit lassé Qui attendoit du point du jour l'entree

Euriale fut recreé du jour Et grandement se porta pour eureux Quant avisa avec luy tout a tour Pesle mesle ung tas de loqueteurs Et qu'il n'estoit aucunement d'iceulx Congneu tresbien avecques eulx s'en va Et se charga de fourment pour le mieulx Puis ou garnier legierement tira

Ens ou guernier le dernier demoura Vers la chambre sa dame descendit Et tout ainsi que sozie instruit l'a Vers le millieu du degrey seul se vit L'uys qui serré estoit boute ung petit Dedans se mist puis la porte serra Et lucresse qui en soye tyessit Euriale promptement avisa

Euriale s'approcha de lucresse En lui disant ma pensee ma defense Tout mon espoir: joye/ santé/ liesse Vous dont celui qui a toute puissance Que estes seule monstrés par evidence Ce que tousjours ay quis et desiré Est acomply par vostre sapience A ceste heure je vous embrasseré

Il n'est paroy qui empesche present Ne distance que ne vous puisse voir Devant mes yeulx/ combien que clerement Lucresse sceust de tout ce fait le voir Et l'ordre aussi vous l'eussés veu mouvoir Changer couleur comme ung peu espantee Car a l'eure ung esperit cuida voir Non euriale tant estoit transportee

Elle ne cuidoit jamés que ung si grant homs Eust telz perilz & dangiers entreprins Mais quant elle eut embrassé com lisons Tenu/ baisé et son esperit reprins Elle congneut disant: o bien aprins Sage/ discret es tu eurialus En l'embrassant parmy le corps prins Estraint/ serre tant que on ne pourroit plus

En ce faisant elle mua couleur De son amant la face regardoit Et lui a dit: mon amy et seigneur Comme estes vous ozé venir cy droit En tel danger et peril comme on voit Que diray je? a ceste heure apperçoy Que je vous suis treschere quoy que soit De ce danger suis cause bien le voy

Certes autre tu ne me trouveras En tous dangers me bouteré pour toy De ton costé les dieux tu requerras Et moy du mien qui nous facent otroy De leur faveur a nostre bonne foy Et vray amour veulent donner bon vent Car soyes seure que autre que toy de moy Tant que vivre n'aura jouyssement

Pas mon mary: se mary je le doy Deuement nommer: car contre mon vouloir Me l'ont donné mes parens & quant a moy Jamés ne fus consentant de l'avoir C'est mal party de faire a fille avoir Contre son gré vieillart en mariage Laissons cela plus il n'en fault chaloir Mon bien/ m'amour des amans le plus sage

Mais or avant ma volupté/ ma joye Ostés ce sac monstrés vous clerement Despouillés vous faictes tant que vous voie Hors cest habit de porteur vitement Deceignés vous de cordes promptement Ottroiés moy que je vous puisse voir Quant despouillé se fut legierement Riens plus plaisant jamés ne fut a voir

Quant ses habis de vil pris eut hors mis En pourpre et or reluisoit le mignon Se fortune eust a l'eure permis A ses amours eust donné guerison Mais sozie si tost qu'en fut saison A la porte frappa tressagement En leur disant gardés vous de trahison Menelaus vient cy legierement

Je ne sçay pas qu'il vient icy querant Secretement couvrés vostre larcin Chascun de vous soit subtil et savant De ce mary tromper c'est vostre fin Ne pensés point qu'il soit homme si fin Qui de ceans sceust maintenant sortir Pourvoiés y bien sagement affin Que vos amours ne faille departir

Lors lucresse dist a eurialus Dessoubz ce lit une muce a secrete La sont plusieurs choses bien cher tenus Et de ce t'ay pieça mencion faicte Par mes lettres si par quelque deffaicte Menelaus nous surprenoit ensemble Tu te mettrois ens en celle muete Ainsi se doit faire comme il me semble

Entre dedans par l'obscurté du lieu Et tenebres tu seras seurement Mais quant dedans seras ne tant ne peu Ne remueras: ne crache aucunement Eurialus doubta se entierement Acompliroit ce que on lui conseilloit Puis proposa que le commandement Et le conseil de sa dame suyvroit

Aprés ouvrit de sa chambre la porte Et retourna tixtre comme par devant A son mestier & tantost se transporte Menelaus son mary tout suant Avecques lui bertus l'accompaignant Quelque lettre de la chose publique Estoit alors menelaus querant A les chercher entierement s'applique

Quant es escrins chose ne peut trouver De ce que avoit presentement a faire Dist que dedans la muce recouvrer On les pourroit ainsi qu'il povoit croire A lucresse dist qu'il avoit a faire De chandelle pour dedens regarder Euriale fut point ne le fault taire Pres de la mort quant ce ouyt demander

Il commença lors a hayr lucresse Et dedens soy fol il se reputoit Ha disoit il qui m'a fors ma jeunesse Et legierté fait venir cy endroit Je suis happé et prins et a bon droit Infamie: j'ay la grace perdue De l'empereur combien que ce peu soit Il me suffist se la vie m'est rendue

Qui me pourra de ce lieu vif tirer Il est certain qu'il est fait de ma vie O vain et sot de tous folx le premier Le plus meschant de tous en vraie folie J'ay ma propre voulenté ensuyvie Par moy je suis tumbé en ce danger Telles joyes prouffiter ne voy mie Puis que acheter les me convient si cher

La volupté des plaisirs amoureulx Est bien courte: et longue la douleur O voulsissons pour le royaulme des cieulx Autant prendre de peine et de labeur Merveilleuse est la folie et l'erreur De nous povres miserables humains Qui cours travaulx & bien peu de sueur Pas n'endurons pour les biens souverains

Et pour cause de vain et fol amour Que a fumee on peut bien comparer Nous nous offrons tant de nuyt que de jour A molesties et peines sans finer A ceste heure je puis bien aviser Que je seré de tous exemple & fable Las je ne sçay comme en pourra aler N'a quelle fin viendra le miserable

Se aucun dieu par sa doulce clemence De ce peril me povoit delivrer Tant que vivrois par mon insipience En tel danger ne me viendrois gluer O dieu du ciel vueillés moy delivrer Et pardonnés a ma fole jeunesse Mes grans faultes me vueillés remembrer A l'ignorant faictes grace et largesse

Je te supply plaise toy me garder De ce peril pour que je puisse faire Penitence des pechés sans tarder Que j'ay commis las il est bien notoire Que lucresse m'a cy pour me defaire Mis en ses las: jamés el ne m'ama Voicy mon jour ma fin dont nul retraire Ne me pourroit se dieu pitié n'en n'a

J'avois assés autres fois des fallaces Et malices des femmes ouy bruyt Et icelles en plusieurs lieux & places Ouy narrer & ne me suis conduit Si sagement que aye peu jour ne nuit Leurs cautelles eviter mais se puis De ce peril par quelque saufconduit Me bouter hors: aux femmes a dieu dis

Lucresse lors moins de crainte n'avoit De son salut et curieusement De euriale doubte et soing avoit Si grant que on peut avoir aucunement Mais tout ainsi que peril eminent Des femmes est plus que de hommes l'engin Soudain/ subtil pour trouver promptement Remede acoup lucresse y trouva fin

Sa mon mary dist lucresse soudain Une archete sur celle fenestre a Je memoire que de ta propre main As dedens mis les lettres qui sont la Peut bien estre que la se trouvera Tout ce que cy longuement tu as quis Legierement le coffret empoigna Et puis dessus la fenestre l'a mis

Puis fist semblant que ouvrir elle vouloit La petite liete et en l'ouvrant Secretement tant que on ne l'apperçoit L'archete fist en bas tumber courant A son mary dist: ne soiés tardant Que ne perdons et n'ayons grant dommage Car l'archete que tenoie cy devant Est tumbee qui n'est pas avantage

Courés bien tost recouvrés mes joyaulx Et mes bagues et les lettres aussi Alés vite car la sont mes plus beaux Et plus riches joyaulx je vous affy Despeschés vous estes encores cy Alés je fais le guet qu'on ne les robe Quelque larron tant que seray icy N'y mettra pas la main mais que ne hobe

Regarde cy la grande hardiesse D'une femme & cauteleux ouvrage A ceste heure dois croire sans paresse A leur parler il n'est homme si sage Si cler voyant qui puisse l'avantage D'elles avoir tant soit il cler voiant Et que tromper ne puissent c'est l'usage Chascun le sçait le cas est apparant

Celluy pour vray de malice de dame Est et sera exempt je vous affi Le quel sans plus la seule et propre femme N'a point voulu decevoir ce vous dy Par fortune je le vous certiffy On est trop plus eureux que par engin Menelaus et bertus avec luy Descendirent par le vouloir divin

Ceste maison de lucresse moult haulte A la mode des etrusquins estoit Plusieurs degrés avoit sans quelque faulte Par ou monter et descendre failloit Eurialus ce temps pendant avoit De lieu changer faculté ce qu'il fist Car lucresse ainsi qu'elle entendoit En quelque autre neufve muce le mist

Quant ilz eurent tout prins et recueilli Bagues joyaulx lettres et autres biens Pource que n'ont ce qu'ilz charchoient parmy Trouvé tantost vindrent sans dire riens En la chambre monterent & puis liens Au pres du lieu du quel party estoit Eurialus charcherent lors je tiens Ce dist bertus tout ce qu'il nous failloit

Puis par aprés lucresse saluerent En luy disant adieu jusques au retour En sa chambre seulete la laisserent Se leur sembloit tantost sans long sejour Elle appelle son amy par amour Quant l'uis fermé et barré fut apoint En luy disant mon amy mon seignour Sortés dehors acoup ne tardés point

Ma pensee mon cueur toute ma joye La fortune de toute ma plaisance Et la source de mon bien ou que soye Plus doulx que ray de miel sans doubtance Vien ma doulceur/ m'amour ma soustenance Toutes choses sont present a seurté Parler povons seurement sans instance Du chemin est hors mise la durté

Nous povons bien embrasser seurement L'un l'autre sans que fortune nous nuise Combien qu'elle c'est portee rudement Vers nous rompant la premiere entreprinse De nos baisers les dieux par bonne guise Et façon ont regardé nostre amour De si loyaulx amans ont veu l'emprinse Ne les voulans habandonner nul jour

Entre mes bras vien t'en mon doulx amy Chose craindre maintenant tu ne dois Plus que roses ne fleur de lis aussi Donnant odeur mon amy a fin chois Que tardes tu que crains tu ceste fois T'amye suis que veulx tu delaier A me embrasser ne tarde deux ne trois Plus ne nous fault du danger effraier

A peine peut ses esperitz asseurer Eurialus touteffois quant il eut Toute crainte hors mise acoler Lucresse vint disant que jamés n'eut Si grant fraieur mais que pour elle veult Avoir soufert et enduré tourment Qu'elle est digne que on face ce que on peut Pour son amour desservir loyaulment

Telz doulx baisiers & doulx embrassemens Ne peut avoir homme sans peine avoir Car il les doit par craintes & tormens Loyaulment deservir main et soir Iceulx gangner par travaulx c'est le voir Se aprés ma mort ressuciter povoie Et les peusse par telz travaulx avoir Par mille fois pour eulx morir vouldroie

O ma tresgrant et vraye felicité Mon bien parfait & ma beatitude Te voys je cy ou ce c'est vanité Te tienge ou non ou ta similitude Suis je de engin si rebouqué et rude Que par songes soye deceu vainement Certes sés tu: bien le sçay plus ne cude Je te tiens cy je le sçay fermement

Lucresse estoit d'un fin roquet vestue Assés legier qui au corps la prenoit Si justement que tout d'une venue Les membres telz qu'ilz estoient demonstroit Plus que naige la bouche blanche avoit Et de ses yeulx la clarté et lumiere Comme celle du soleil reluisoit Regard plaisant Joyeuse avoit la chere

Les joes avoit d'une couleur vermeille Blanches parmy comme vermeilles roses Avec le lis meslees c'est couleur belle Et si avoit aussi entre autres choses En la bouche parolles gracieuses Ris avenant modeste et temperé C'estoient choses a veoir delicieuses Nature avoit en ce bien operé

Lucresse avoit poictrine ample et belle Et de chascun costé rebondissoit Une ronde ferme et plaisant mamelle Comme pommes rondes elle les avoit Le mouvement d'icelles excitoit Tous vrays amans ao jeu d'amours parfaire Pourtant ne peut eurialus quant voit Biens si parfaictz soy refraindre ou retraire

Il oublia lors toute modestie Toute crainte hors mist d'avecques luy Lucresse print et lui dist je vous prie Le fruict d'amours recevons sans ennuy Es parolles le fait fust ensuivy Mais lucresse pas ne voulut souffrir En luy disant qu'elle a cure et soucy De honnesteté et bon nom obtenir

Euriale dist elle mon amy Je n'entens point que nostre amour requiere Autre chose que diviser ainsi Honnestement sans autre chose faire Eurialus a lors ne se peut taire A sa dame dist que quelque ung saura Qu'il est venu leans pour son plaisir faire Ou que de ce aucun riens ne saura

Se aucun dit il a de ce congnoissance Que nous soions icy secretement Ne pretendra ja cause d'ignorance Que nous façons d'amours l'esbatement Infamye vouloir apertement Estre entourné atort et sans rien faire Folie seroit selon mon sentement Pour quoy conclus que tout devons parfaire

Et suppose que aucun n'en sache rien Plus tost devons le jeu d'amours parfaire Puis que parler ny en mal ny en bien On n'en pourra le jeu nous devra plaire C'est tout le fruict d'amours que de ce faire Mourir me fault plus tost que ne le face Je vous supplie ne me soyez contraire Puis que avons temps lieu convenable & place

Lucresse dist certes qui parferoit Le demourant ce seroit un grant vice Eurialus dist cil qui ne useroit Des biens iceulx appliquant a l'office Esquelz ilz sont ordonnés seroit nice Et feroit mal quant ilz les peut avoir Laisser chose qui est a soy propice Ne seroit sens mais lascheté pour voir

Et cuidés vous que voulsisse laisser L'occasion qui present m'est donnee Que ay tant quise par venir et aller Et par long temps grandement desiree Par la robe a lucresse empongnee Qui resistoit mais elle fut vaincue Et ne fut pas leur volupté saoulee Com de hamon quant thamar eut congneue

Plus grande soif de loyaulment aymer Leur engendra ce qu'ilz avoient parfait Eurialus se sceut bien remembrer Du grant peril que evité il avoit De pain et vin quant un peu fut refait Son congié print lucresse repugnoit On n'eut oncques suspection du fait Pour qu'en forme d'ung porteurs s'en aloit

Eurialus en alant par la voye En soy mesmes se donne grant merveille Disant o dieu se present rencontroye Cesar certes je l'auroye fort belle Se apercevoit ce vestement de toille Suspicion tresgrande il auroit Fable seroys a tous pour l'amour d'elle Et grandement de moy on se riroit

Jamais en paix il ne me laisseroit Jusques ad ce que eust congneu tout le voir Et bien acoup il me demanderoit De cest habit car tout voudroit savoir Se luy disoie que venisse de veoir Quelque femme en lucresse taisant Et que fiesse par tout mon plain povoir Pour l'excuser rien n'en seroit croiant

Je sçay assés que cesar loyaulment Tresvoulentiers lucresse aymeroit Pas mon prouffit ne seroit seurement Moy descouvrir car mal fait se seroit De reveler ce que celer on doit Trahir ne doy celle qui saulvé m'a Certes plus tost vif on m'escorcheroit Que voulsisse condescendre a cela

Tandis que ainsi aloit a soy parlant Nise/ achates et pline il avisa A son povoir les ala devançant Tant que nul d'eulx congnoissance n'en a Ains a l'ostel cautement arriva Ses sacs osta et sa robe a reprinse A son amy l'aventure conta La maniere du fait & l'entreprinse

Tresbien recors de tout il recitoit Les crainte et joye a lui entrevenus Et semblable a l'une fois estoit A cil qui craint aussi comme confus Puis a l'autre joyeux se monstroit plus Disant ainsi constitué en crainte Par femmes suis ung vray fol devenus Et mis mon chief en peine & douleur mainte

Mon pere pas ainsi ne conseilloit Quant il disoit qu'en femme qui fust nee Fidelité ne loyaulté n'avoit Que evitasse eulx et leur destinee Car il disoit femme est beste indomtee Infidele/ cruelle aussi muable Et a mille passions inclinee De ce povois bien estre remembrable

Mais je ne eu de ce quelque memoire Abandonné ay mon ame et mon corps Le principal et aussi l'accessoire Entre les mains d'une femme si lors Que de fourment estois chargé la hors On m'eust congneu quel honte & infamie A mes parens fust avenu des lors Consequamment a toute ma lignie

Cesar eust eu de moy abandonner Matere assés car il eust bien peu dire On doit comme vil et fol contemner Homme qu'on voit ainsi mal se conduire Se le mary de lucresse a voir dire M'eust empoigné quant les lettres cerchoit Il n'y eut eu matere de quoy rire Bien entendre chascun le peut et doit

La loy julie que on dit des adulteres Est cruele pour eulx selon les drois Mais du mary sont peines plus austeres Que de la loy car tout a une fois La loy punist par glayve com je croys Et le mary par divers batemens Occist & bat sans regarder les loix Ne si frappe de bois ou ferremens

Mais supposons que le mary m'eust fait Grace du corps et m'eust donné ma vie Si m'eust il mis pour mon cas et forfait En ses prisons puis je vous certiffie M'eust a cesar a ma grant infamie Baillé/ livré tout ainsi m'en fust prins Plus doulcement je ne povoie mye Ce mal passer quant eusse esté surprins

Or supposons que povois evader D'entre ses mains car sans armes estoit Et que je avois pour moy de lui garder Mon espee qui au costé pendoit Certes des gens avecques lui avoit Ses armeures a la paroy pendoient Facilement prendre il les povoit En sa maison mains serviteurs estoient

Clameurs et cris lors faictz eussent esté Les huis fermés tous eussent prins vengence De mon meffait ilz n'eussent arresté Pour soy venger de mon insipience A ceste heure j'ay clere congnoissance Que du danger ne m'a pas delivré Mon beau parler/ mon sens ne ma prudence Mais fortune qui bien y a ouvré

Qu'esse que dy de fortune qu'el ma Hors de danger et de peril hors mis Certes bien scé que rien fait el n'en a Mais s'a esté lucresse au cler vis Son prompt engin non tardif ne remis O loyale & tressage amoureuse O noble amour auquel me suis submis Plus que toy n'est chose delicieuse

Qui me tiendra que ne aye en toy creance Et que ta foy ne doie ensuyvir Se je avoie par divine ordonnance Cent chiefz a toy oseroie bien venir Pour qu'en ta foy le voulsisses tenir Loyale es/ caute/ prudente sage Bien scés amer: a tes fins parvenir Et ton amant garder de tout oultrage

Qui est celui qui eust si tost pourveu Consideré/ ne le moyen pensé Soudainement ainsi que l'as preveu Pour du danger ou m'estoie lancé Bouter dehors que ne feusse pressé As la voie promptement avisee Bien dire puis qu'estois mal agencé Et ma vie entierement finee

Se j'ay esperit qui encores respire Je ne tiens ce de quelque ung que de toy Ne me seroit point fort dur a vray dire La vie perdre que je retiens par toy A ton plaisir tu peuz faire de moy Le povoir as de ma mort & ma vie A toy me rens & commande en ta foy A tousjours mais sans faire departie

O poictrine blanche comme le lis Doulce langue/ clers yeulx & lumineux O prompt engin membres plains & polis Plus que marbre/ souefz & amoureulx Quant pourray je vous revoir de mes yeulx Et les levres coralines baiser En les mordant par plaisir amoureulx Pour mieulx amours resjouir & aiser

Quant pourray je en ma bouche sentir Celle doulce langue murmurative Et ses dures mamelles a laisir Taster qui sont de la generative Excitatif: il n'est contemplative Vie qui soit si doulce que lucresse C'est ung tresor/ c'est vie perfective C'est tout basme/ c'est parfaicte liesse

Lors achates amy et compaignon D'eurialus lui dist c'est peu de chose De la beaulté/ proprieté/ blason Qu'as allegué estre en lucresse enclose De tant qu'on voit femme sans estre close Toute nue elle semble plus belle Et se monstrer se povoit je suppose Que plus beaulté se trouveroit en elle

Lidia fut du roy candalus femme Gente/ belle: non pas plus que lucresse Ne m'esbahis pour monstrer de la dame La grant beaulté s'il voulut sans peresse A son amy par ung trait de liesse Son espouse descouvrir toute nue Affin qu'il peust par plus grant hardiesse Les joyes d'amours prendre d'une venue

Semblablement se faculté je avoie De ce faire: croy que ainsi ce feroit Toute nue je la te monstreroie Car ma langue suffire ne sauroit A descrire bien au long & a droit La grant beaulté de lucresse indicible Homme mortel a ce ne suffiroit Tant est belle qu'a dire est impossible

Considerer ne pourrois proprement La joye plaine qu'ay au jourd'uy receue Mais avec moy te esjouys plaisamment De mes amours car la joye que j'ay eue Est plus grande se bien l'avois perceue Que parole exprimer ne pourroit J'ay liesse a grant habundance eue Autre que moy ce ne conceveroit

Eurialus tout ainsi que dit est Ne plus ne moins a achates parla Et lucresse qui seulle en sa chambre est N'en dist pas moins: mais ce diminua Sa plaisance car taisible cela Ce qu'el n'osoit a quelque ung reveler A sozie quelque peu en parla Tout ne voulut pour honte declarer

Ce temps pendant ung homs panonien Homme noble pacorus eut en nom Qui de cesar en la grace estoit bien Homme a cheval et de noble maison De lucresse fut en celle saison Fort amoureux en cuidant qu'el aymast Car il estoit assés beau compaignon Et ne cuidoit que quelque ung l'empeschast

Pour sa beaulté estre amé arbitroit Il ne doubtoit rien que la chasteté De lucresse laquelle a tous monstroit Pareil semblant par grand honnesteté C'est la mode soit yver ou esté De nos dames sans varier estre une Aux regardans leur estat et beaulté A tous faire une chere commune

Et ce font il plus par decepcion Qu'elles ne font par art je vous affie Pour que l'amour qu'ilz ont et union Tresancien ja ne se notifie Pacorus meurt a peu se crucifie On ne le peut consoler par quelque art Se a lucresse ne dit et clarifie Le feu d'amours qui le consume et art

Il veult premier quelque response avoir De lucresse qui coustumiere estoit Com les dames de senes aler voir Nostre dame de bethleem: c'estoit Une place qui pas fort loing n'estoit De la cité: lucresse et ses deux filles Une vieille ensemble la menoit Pour y faire oraisons tresutiles

Lucresse aloit en ce lieu bien souvent Elle partit pour son voyage faire Pacorus va aprés mignotement Et pour son cas mieulx conduire et parfaire Tient ung oeillet a fleurs d'or qu'a fait faire Dedens avoit une epistole close Qu'en fin velin il avoit fait pourtraire D'amourettes parlant non d'autre chose

Ne t'esbahis que on n'ait en peu de lieu L'epistole dessus escrite mise Car ciceron qui doit de ce estre creu Dit qu'il a veu sans aucune faintise L'yliade de omere estre comprinse Subtillement en si petit d'espace Que une escalle de noix par bonne guise La contenoit entiere sans fallace

Pacorus vint assés pres de lucresse La dicte fleur lui offrit humblement Que en sa grace le mette fort la presse Le don offert refusa promptement Treshumblement la prie et instamment Que ladicte fleur vueille recevoir Lors la vieille qui estoit la present Dist pren la fleur puis que c'est son vouloir

Quelle crainte as tu de chose ou n'y a doubte N'aucun peril tu peus bien apaiser Cest gentil homs de chose qui ne monte Et qui ne peut te prejudicier A ce conseil se voulut incliner Lucresse qui de rien ne se doubtoit Et puis sa fleur tantost alla donner A la fille qui de pres la suivoit

Puis assés tost deux escolliers trouverent Qui regardent la fleur qui belle estoit Et la fille tresinstamment prierent Leur faire don de la fleur qu'il tenoit Pour que de ce grant conte ne faisoit Elle donna la fleur incontinent Tantost la fleur qui la lettre couvroit Ilz ouvrirent assés facilement

Dedans la fleur trouverent l'epistolle Qui des amours de pacorus parloit Ceste sorte de gens clers et d'escolle Ou par avant de nos dames estoit Moult fort aymé mais ce trop empeschoit La venue de cesar car depuis Que en la ville de senes residoit Estudians avoient eu du pis On se railloit d'eulx on les desprisoit On les hayoit c'estoit ung piteux cas Car des armes l'estat plus delectoit Nos mignongnes que de tous advocas Le beau parler orateurs n'avoient pas Entre dames lieu pour leur grant faconde Par ces moiens entre les deux estas Avoit hayne aigre dure et parfonde

Les gens d'armes et nobles desiroient A leur povoir nuire aux estudians Du contraire les autres se efforçoient Aux dessusditz resister par moyens Quant ilz eurent desserré les liens Et trouvé ce qui en leur fleur estoit Chés lucresse tirerent tout droit liens Menelaus trouvent qui se seoit

L'epistole tantost baillee luy ont En luy disant ce lire devoit Quant eut ce leu luy eschauffa le front Vers lucresse il s'en alla tout droit Triste et marry moult fort il l'arguoit Sale et maison a de clameurs remplie Et lucresse le fait luy renyoit En luy disant que oncques ne fist folye

Lucresse tout le cas lui recita Et la vieille pour tesmoing elle amaine Menelaus vers cesar s'en ala Sa plainte fist suant a grosse alaine On appella pacorus qui demayne Grant deconfort la verité confessa Qu'on lui face pardon a bonne estraine Requist/ & que jamés n'y retourra

Devant cesar jura & fist promesse Que lucresse jamais ne vexeroit Car bien savoit que jupiter tristresse Des parjures amans jamais n'auroit Ains leurs sermens et parjures riroit Et de tant plus que on luy a fait deffence Vers lucresse aller il desiroit D'elle suivir et voir c'est sa plaisance

L'iver survint vens de midy hors mis Furent et puis souffla le vent de bise Neiges vindrent a jouer se sont mis Les citoyens et par joyeuse guise Les bourgoises par serieuse emprise Les pelotons de neige se gettoient Aux fenestres pacorus bien avise La maniere que les autres tenoient

Occasion et entree trouva Par le moien des autres vitement Une epistre en cire close il a Puis de neige l'a couvert gentement Ainsi Ronde qu'elle estoit promptement En la chambre de lucresse la lance Qui est celuy qui ne dira present Que fortune tout regist et avance

Qui est celuy qui du vent favorable De fortune ne veult estre mené Car de bon eur c'est chose veritable Une heure plus que vauldroit a l'omme né Que de venus estre recommandé Par ses lettres au dieu mars de batailles Sages dient quant ont bien regardé Que fortune ne leur peut rien qui vaille

A telz sages leur propos je confesse Qui seulement de vertus riches sont Et qui povres malades en tristresse Vie eureuse posseder se diront Des quelz oncques en valee ne en mont Aucun ne vi et ne croy qu'il en soit Quelque ung dient ce que dire vouldront Et les suive qui bien dire les croyt

Ceste vie mestier et besoing a Des grans faveurs de fortune & ses biens Moult grande auctorité el a Quant elle donne aux ungs es autres riens L'ung hault lieve l'autre laisse ou fiens Qui a perdu pacorus fors fortune D'omme prudent il trouva les moyens Quant en la fleur mist l'epistre pour une

De homme prudent l'office excerça Secondement quant l'epistolle mist En pelote de neige et la lança Vers lucresse et ce aucun dit qu'il fist Moins cautement je respons quant transmist La pelote se fortune eust voulu Le secourir difficulté n'y gist Qu'il n'eust esté sage et prudent tenu

Mais fortune hors des mains de lucresse La pelote jusques au feu envoia Ce matere fut de neufve tristesse Car quant le feu la nege fondue a Et la cire remise on avisa L'epistolle qui a brusler prenoit Aperceue fut par ceulx qui estoient la Menelaus y fut qui la lisoit

L'epistole qui entre les mains vint De ce mary nouveau bruit commença En la cité pacorus ne se tint Mais par fuite le danger evita De ce fait cy la rumeur transvola A eurial qui son prouffit en fist Car de aller voir lucresse proposa Pour les moyens trouver son engin mist

Tandis que menelaus charchoit Deça et la pacorus pour le prendre A eurial espace et temps donnoit De parvenir a ce ou vouloit tendre Et si est vray chascun le peut entendre Que on ne garde pas bien facilement Une chose qui tant de gens sourprendre Veulent par leur engin subtillement

Les deux amans attendoient chascun jour Comment pourroient pour la seconde fois Faire le jeu d'amours et du retour Tresgrant desir avoient comme je croy Une ruelle lieu petit et estrois Entre lucresse et son voisin estoit Par la quelle sans faire grans effrois Chés lucresse lancer on ce povoit

Car on povoit tout acoup afourcher D'une paroy sur l'autre aisement Et puis de la par la fenestre entrer En la chambre de lucresse coyement Mais ce povoit on par nuyt seulement Menelaus aux champs devoit aller Moult ennuya aux deux son partement Car il devoit la nuyt aux champs coucher

Menelaus partit et s'en ala En sa maison qu'il avoit au village Eurialus gueres ne sejourna Tout son habit mua et de courage En la rue cherchant son avantage Secretement embuscher s'en ala Une estable avoit pour son usage Menelaus ou sozie le bouta

Dedens le fein se mist eurialus Ou partie de la nuyt sejourna Dromo lors page de menelaus Palefrenier second y arriva Qui des chevaulx la cure & charge a Et pour emplir les rateliers s'employe Pres du costé d'eurialus tira Du fein a poy que tout il ne desploie

Dromo estoit tout fin prest de tirer Et abatre du fein plus largement Et avecques sa fourche rencontrer Eurialus: mais sozie promptement Le grand peril avisa sagement Puis a dromo dist: mon frere et amy Que je acheve cest euvre hardement Je passeré a ce temps et ennuy

Tandis que je aux chevaulx bailleré Ce qu'il leur fault vat'en en la cuisine Et regarde se on a bien labouré Pour le souper car je te determine Que nous devons tant que la chiche mine Nostre maistre est hors de la maison Boire et gaudir a ce mon cueur s'encline Nous lui devons bien faire sa raison

Trop mieulx nous est avec nostre maistresse Que avecques lui grande est la difference Car il n'est rien plus joyeux que lucresse Plus liberal ne de plus grand clemence Quant est de lui tousjours rechine ou tance Il crie/ il brait/ il brule de avarice On n'a jamés avec lui pacience Difficile est rien n'est plus mal propice

Jamés n'avons bonne chere ou il est Il chastie nos ventres par juner Tout mort de fain & affamé il est Pour nous autres maigrir & crucier Croutes moisies & miettes serrer Pour les mettre l'endemain sur la table Fait: il n'est homs qui en sceust endurer Se lucresse n'estoit plus amiable

Et le poisson salé qui lui demeure De son soupper soit anguille ou brochet Pour lendemain fait garder a tout heure Tout est conté soit chief d'ail ou poret Il merche tout & clot soubz son signet Miserable est de vouloir estre chiche Par telz moyens car rien si sotelet N'est que vivre povre pour mourir riche

Trop fait meilleur avec nostre maistresse Qui ne seroit contente de donner A ses servans viandes a largesse Car el ne veult seulement festoier De beaulx chevreaulx mais fait appareiller Graces poulles/ faisans & gras oyseaulx Et du meilleur vin qui soit ou celier Leur arrouse leurs gosiers et museaulx

Vat'en dromo cours bien legierement Ayes cure & soing de la cuisine Dromo respond: j'en auray soing vrayement A la table mettre mon cueur s'encline Plus que aux chevaulx froter la chiche mine Nostre maistre j'ay jusques aux champs mené Mal lui vienne car parolle ne signe Onc ne m'a dit tant que suis retourné

Sur le vespre m'a dit que je retourne Et les chevaulx remmaine avecques moy A ma dame que die qu'el sejourne Pour au jourd'uy ainsi je lui diroy Puis il m'a dit je ne retourneroy Point au gitte tout vient bien a propos Bonne chere au jourd'uy je feroy Du vin beré encor plus de trois pos

Ha sozie mon amy je te loue De ainsi hair les meurs de ce viellart Car par ma foy aux sains & dieu je voue Que ja pieça feusse allé autre part Changer maistre se la prudence et art De ma dame par souppes que au matin El me donnoit ne m'eust matin & tart Entretenu prins eusse autre chemin

Il ne convient point dormir ceste nuyt Boire nous fault d'icy que le jour vienne Devourons tout: assés y a pain cuyt Qui se faindra male fievre le tienne Nostre maistre quant il vouldra revienne Mais en ung moys autant ne gaignera Que despendrons de quelque lieu qu'el vienne En ung soupper: bien employé sera

Eurialus voulentiers escoutoit Des serviteurs le babil et langage Combien que leurs conditions notoit Que on le povoit servir de tel ouvrage Quant dromo fut party pour le suffrage Des cuisines eurialus sortit A sozie qui fut vray personnage Et fidele telz paroles a dit

O sozie mon amy tant je auré Eureuse nuyt par ton grant benefice Qui cy m'a mis par engin euré De tout danger gardé et malefice Tu m'as esté clement doulx et propice Et a bon droit te ame et doy amer Je ne seré ingrat de ton office Ains du bien fait recors sans l'oublier

L'eure estoit ja venue et arrivee Que eurialus devoit en hault aler Combien qu'il eust par double destinee Double peril evadé et danger Dessus le mur se mist affin que entrer En la chambre par la fenestre peust Ouverte estoit il entra sans targer Sans que aucune personne rien en sceust

Il trouva leans lucresse au pres du feu Qui le soupper appareillé avoit Tout estoit bien acoutré en ce lieu Car la dame son amy attendoit Quant el le vit a lui s'en vint tout droit Par le millieu du corps elle embrassa Mignotises et blandisses savoit De doulx baisers donner elle ne cessa

Devers venus tirent a voile plaine Des avirons d'amours la nefz conduirent Cytheree lasse et a grosse alaine Estoit: ceres et bachus la refirent Presupposez comment que ilz firent Mains gentilz tours en nagant sur le fleuve Entendement/ engin & force mirent A qui mieulx mieulx se l'un pert l'autre treuve

Helas tant sont courtes les voluptés Qu'en ce monde prennent les amoureux Et longues sont les peines et durtés Travail & soing qu'endurer fault pour eulx A peine avoit une heure esté joyeulx Eurialus quant sozie frappa A la porte qui message piteux Aux deux amans fist savoir et nunça

Menelaus estre venu annunce Et la joye des amans perturba Eurialus avoit de paeur mainte onte De s'en fuir tout prest estre cuida Lucresse tout sagement regarda La table osta & au devant courit De son mary le quel el salua En lui disant ce qui aprés s'ensuit

O mon mary dist la gente lucresse Le bien soiés retourné et venu Je te cuidois en foy de gentillesse Estre desja villenot devenu Pour quoy t'es tu si longuement tenu Au village garde que je ne sente Quelque chose qui t'ait la retenu Soit pastoure ou bergerete gente

Pour quoy ne te tiens tu a la maison Moy contristant ainsi de ton absence Car quelque temps qui coure ne saison En crainte suis se je n'é ta presence Aussi je suis chascun jour en doubtance Que tu ne aymes autre femme que moy Les hommes sont aux femmes com je pense Fort desloyaulx en doubte suis de toy

Se tu me veulx de ceste peur hors mettre Jamés dehors la nuyt coucher n'iras Je te supply vueilles le moy permettre Ja joye n'auray quant seule me lerras Sur tout la nuyt souppons icy embas Et puis yrons coucher joyeusement Les paroles disoit n'en doubtés pas En la sale ou l'en souppoit souvent

La lucresse se efforçoit retenir Menelaus son mary longuement Jusques a ce que eurialus saillir De la chambre peust plus facilement Mais pour que avoit souppé hors promptement En sa chambre retirer se vouloit Quant lucresse lui dist esplourement Que peu l'amoit/ cherissoit et prisoit

Que n'as tu prins peine de revenir Avecques moy soupper car je te jure Que pour cause que t'es voulu tenir Hors la maison je eu tant soing et cure Que ne y menge ne beu c'est ma nature Quelques peisans ont du vin apporté Qu'ilz dient estre de bonne nourriture Tant triste estois que point n'en ay gouté

Puis que tu es present je te supplie Qu'il te plaise que voisins ou celier Et la dedens pourrons si ne t'en nuye Se le vin est tel qu'ilz dient essayer Ce dit el print tantost sans delayer La lanterne avec sa dextre main Et de l'autre print pour le festoier Menelaus qui n'avoit soif ne fain

Puis au plus bas du celier descendit Et son mary lui faisant compaignie La longuement furent comme l'en dit En gacongnant le vin dessus la lie Ce faisoit el je le vous certiffie En attendant que eurialus partist Qui s'en ala bien tost je vous affie A lucresse qu'il soit dehors suffist

Quant ilz eurent tout en la cave fait Ilz se alerent coucher enssemblement Lucresse bien se feust passee du fait Et des esbas du lit certainement Eurialus s'en partit celeement Entour minuyt en son logis ala Car il entroit et sailloit priveement Toutes les fois que ce bon lui sembla

Menelaus l'endemain massonner La fenestre sur la ruele fist Pour que de elle bon se faisoit guetter Ou que quelque ung mal n'en parlast ou dist Et croy assés que cela il parfist Pour la doubte ou suspicion qu'il eut Que l'en passast par la plus ne permist De mal faire le moyen oster veut

Et ja soit ce qu'il n'eust aucune cause D'avoir d'elle mauvaise opinion Si savoit il par lettre en mainte clause Que on lui faisoit sollicitacion Par chascun jour et deprecacion Du fait d'amours ce pas il ne ignoroit Et des femmes la grant mutacion D'autre costé souvent consideroit

Il congnoissoit des femmes le vouloir Estre inconstant & que autant sont en elles De voulentés pour en dire le voir Qu'il a dedans plusieurs arbres de fueilles Les congnoissoit estre toutes pareilles En couvoitant chascun jour sans cesser Bagues joyaux quelques choses nouvelles On ne sauroit de ce les contenter

Il congnoissoit aussi que bien a tart Ayme femme homs du quel tousjours elle a La faculté/ parler/ coucher/ regart Car de changer tousjours apetit a Par ces moyens la faculté osta A lucresse de parler ou escrire De autres maris les voyes immita Chassans maleur pour le bon introduire

Ung tavernier qui grant houlier estoit Pres de l'ostel lucresse avoit maison De la quelle eurialus souloit A lucresse parler mainte raison En ung baston creus en toute saison Lettres povoit facilement bailler Menelaus si trouva achaison Qu'il desloga de la pautonnier

Plus n'avoient les deux amans loyaux Que le regart des yeulx pour tout soulas Et par signes plus secretz & nouveaux Qu'il povoient se saluoient tout bas Ilz ne savoient par engin ne compas Trouver façon de hurter au guischet Grande douleur avoient n'en doubter pas Et cruciement qui a la mort semblet

Et la raison de ce grant desconfort Estoit telle car ilz ne avoient puissance Par leur engin subtillité ne effort De mettre a leur maladie allegance Ilz ne povoient bouter en oubliance Leur grant amour/ n'en luy perseverer Pour quoy estoient en moult dure souffrance Qui bien ayme a tart peut oublier

Eurialus estant en ce torment Angustié autant c'om pourroit dire Prenoit conseil a soy avisement En meditant qu'il pourroit faire ou suyre Puis fut recors que avoit voulu dedire Long temps avoit lucresse d'une chose De pandalus qui cousin fut du sire Menelaus/ s'en aider il propose

Des medecins tressages ensuivit La pratique qui ont telle maniere Que es grans perilz de mort ainsi qu'on dit Voians l'omme quasi pres de la biere Menger luy font medicine et matiere Qui est de mort et de vie incertaine Et mieulx ainsi leur plaist c'est chose clere Que de tousjours du mal laisser la peine

Pareillement eurialus ayma Pluscher parler du faict a pandalus Et remede trouver se aucun y a Que demourer tousjours triste et confus Et proposa que sans deloyer plus Ce qu'il avoit autreffois refusé Presentement il remetroit dessus Bien en prenist ou en fust cabusé

Il appella pandalus doulcement Ou plus secret de sa chambre le mist Quant il fut la entré secretement Mon bon amy sié toy cy lors luy dist Quelque chose dessus le cueur me gist Qui est grande la quelle te vueil dire J'ay grant besoing de toy ce me suffist Que mon conseil tu ne vueilles redire

J'ay maintenant affaire des vertus Diligence et foy qui en toy sont De la bonne bouche et celer sans plus Qu'ay entendus estre en toy c'est le ront Et des pieça tout mon secret parfont Te reveler deliberé avoie Mais je ne n'avoie par valee ne mont De toy si grant raport que desiroye

A ceste fois je te congnois & croy Que de foy es loyale et esprouvee Et pour ce t'ay aymé et aymeroy Des citoyens as bonne renommee Ilz te louent chascun jour a journee Pareillement si font mes compaignons Qui ont a toy congnoissance trouvee De toy m'ont fait bonnes relacions

Entendu ay pareillement par eulx Que desires fort ma benivolence De la quelle par vouloir gracieux Participant te fois a ma puissance Moins n'es digne d'avoir mon acointance Que suis de toy tien suis & tien vueil estre Croire me doys sans quelque deffidence Vers toy verras mon vouloir acroistre

Puis que ainsi va que sommes bons amis Bien briefvement te diray mon affaire Tu congnois bien que a aymer est soubmis Le genre humain et inclin a ce faire Soit ce vertu ou vice du contraire Par tout se extend ceste calamité Tout cuer humain languist en ceste haire Nul n'est exempt de ce ne respité

Le tressage salomon point n'en est Exempt aussi non fut sanson fortin De fol amour la nature telle est Que si une fois le cueur d'omme est enclin Et par chaleur eschauffé quelque fin Mettre on n'i peut ains tousjours brule & art Plus est contraint et plus tire a sa fin De fole amour ne veult laisser la part

Ceste peste ne peut estre guerie Mieulx que en faisant jouyr de ce qu'on ame Plusieurs hommes & femmes ont la vie Perdue par ce que de la bruslant flame Du feu d'amours pour les garder de blasme On les vouloit retirer sagement De bon conseil n'eussent prins une drame Leur voulenté suivans entierement

Du contraire plusieurs avons congneu Que aprés que avoient jouy de leurs amours Leur fole amour laisser on les a veu Quant avoient fait embrassemens & tours A leur plaisir par quelque peu de jours Leur volupté et plaisance parfaicte Mais au devant que eussent d'amours secours Provision n'y povoit estre faicte

Il n'est rien plus consult que aprés que amour Vient herdre es os de aucun fol amoureux Luy donner lieu c'est le souverain tour Car se efforcer contre air tempestueux Souvent la nef faict es lieux perilleux Perir noyer/ mais qui a la tempeste Obtempere souvent en est joyeux Et surmonte a grande joye et feste

Je t'ay ce dit briefment et recité Pour que mon cas d'amours congneu te soit Et aussi pour que puisse en verité Congnoistre ce que pour moy cy endroit Faire vouldras ja celé ne te soit Le grant prouffit que de ce t'est venu Car de mon cueur quoy que en avienne ou soit Es partie reputé et tenu

Ha pendale mon bon et cher amy J'ayme du cueur lucresse sans faintise Par ma culpe m'est advenu cecy Fortune ad ce a ma pensee submise Dessoubz sa main est la machine mise De ce monde elle gouverne tout De vous autres les meurs aussi la guise De la cité ne congnoissés en tout

Il me sembloit que les dames d'icy Sentoient ou cueur ce que l'oeil demonstroit J'en ay esté desceu je le te affy Car si tost que lucresse regardoit De ses doulx yeulx vers moy il me sembloit Que estoie aimé d'elle et cher tenu Ce m'a contraint de l'aymer bien estroit En ses prisons suis livré et tenu

Jamais n'aurois si allegante dame Voulu laisser sans avoir quelque amant Elle me sembloit sans reproche ne blasme Estre digne d'avoir loyal servant Qui fust a son amour correspondant Je ne congnois que bien peu ton lignage Mais j'ay aymé estre aymé esperant Dire mon faict te vueil en brief langage

Qui est celluy tant soit de roche dure Ou de dur fer qui ame ne amera En ensuivant l'ordre dame nature J'ay faict tout ce que cueur d'amant fera Mais quant j'ay veu que lucresse point n'a Le cueur a l'oeil correspondant j'ay dit Lors a parmoy cy tromperie a Je espere en vain d'amours avoir credit

Ce neantmoins pour que steril du tout Ne fust amour j'ay mis peine et moiens De lucresse eschauffer tout jusques au bout Du feu d'amours l'embraser ce retiens Pour qu'elle fust de semblables liens Estroitement liee car honte estoit Que brulasse et qu'elle ne sentist riens De l'angoisse que mon cueur enduroit

De jour et nuyt triste et langoureux Ay longuement esté sans hors aller Finablement a mon mal douloureux Ay quelque fin trouvé par travailler Car j'ay tant fait par venir et aller Continuant mon labeur et emprinse Qu'elle a esté et est au paraler Du feu d'amours comme je suis esprinse

Elle brusle et je ars n'en doubte point Nous perissons remede ne trouvon De nos vies alonger sur ce point Mourir convient se reconfort n'avons Si de partoy nous n'avons guerison Aide et secours il est faict de nos vies A ce besoing te supplie que soyon Brief secourus sans ce que en rien denyes

Menelaus son mary et son frere De si trespres la gardent sans doubtance Que le dragon la toison d'or tant chere Ne gardoit pas par si grant vigilance Ne cerbere par si grant diligence Ne garde point des palus infernaulx L'entree comme faict par sa folle cuidance De lucresse le mary pas & saulx

Je congnois bien et voy vostre famille Qu'estes nobles premiers de la cité Riches aymés des plus grans de la ville Et puis qu'il fault que die verité Advenu fust a la mienne voulenté Que lucresse jamais n'eusse congneue Point ne fusse par amours supplanté Prins ne vaincu c'est chose clere & sceue

Mais qui est cil qui peut sa destinee Et fortune par moyens eviter Je ne l'ay point eleue ains destinee Par fortune m'a esté sans doubter Qui de l'aymer m'est venu exorter La chose ainsi est allee par fortune Nostre fait est couvert mais mal porter Tout se pourroit/ se joye n'avons aucune

Se nostre amour n'est bien a droit conduit Il en pourroit grant scandale venir Ce dieu vueille avertir qui produit Toutes choses selon son bon plaisir Quant est de moy se je vouloye choisir Et mieulx avoir d'icy partir que attendre Je pourrois bien tout en paix a loisir Mon grief mechief apaiser sans mesprendre

Et ja soit ce que ce tresgrief me fust Fort a porter & de grant desplaisance Ce neant moins pour que toute honneur eust Vostre maison je feroie diligence De moy vuider pour vostre bien veillance Entretenir se aucun prouffit voioye Mais je congnois qu'elle brulle a oultrance Et que mon temps aussi labour perdroie

Car aprés moy toute seule viendroit Ou se seulle close estoit et tenue De sa propre main el se occiroit Dont scandale sortiroit par la rue A deshonneur perpetuel venue Elle seroit et tout vostre lignage Ta personne ay pour ce convenue Au grant prouffit de vous et avantage

Trouvons moyen de obvier a ces maulx Cy par devant recités c'est le mieulx Remede aucun n'y voy fors que loyaulx De nostre amour conducteur & songneux Nous te mettons que sur tous en tous lieux Secret tiennes nostre amour par long temps Dissimulé: de ce soies curieux Nous ferons tant que tu seras contens

A toy du tout me rens aussi commande Donne & voue sans jamés departir A nostre amour et fureur si tresgrande Vueilles ung peu de ta grace impartir Par ton labeur fay que puissons sentir La grand ardeur estre en nous moderee Qui plus croistroit se on vouloit dissentir Ou empescher qu'elle ne fust temperee

Fay nous tous deux ensemble convenir Tantost l'ardeur de nous se humiliera Et nous verras en santé revenir Tollerable lors nostre ardeur sera Tous les secretz de l'ostel ça et la Te sont congneuz entrees et pertuis Tu scés aussi quant ce mary hors va Quant a l'ostel il est ou devant l'uis

Tu scés assés l'eure que tu pourras En la maison moy mettre & introduire Pour ce frere sagement gueteras Car il sera tousjours prest de te nuyre Si pertinax est com j'ay ouy dire Au guet faire sur le fait de lucresse Que a toute heure sur elle veiller tire Com s'el estoit sa seur point n'a de cesse

Les parolles de lucresse & les faictz Considere aussi sa contenance Se elle gemist/ crache ou toust les effaictz De ce poise ce frere a la balance C'est mon avis que a grande diligence Devons mettre peine a le decevoir Ce ne pourroit sans ta bonne prudence Estre parfaict com je puis concevoir

Soies doncques diligent et songneux De regarder quant ce mary ira Dehors que me faces joyeux En me boutant leans la ou te plaira Et le frere qui demouré sera Destourneras a part te donnant garde Que autres gardes ne boute ça ou la Il te croira sans que a rien prenne garde

Et peut estre ce que veullent les dieux Que la charge de ce te baillera Se tu la prens & puis que sur les lieux Tu me treuves tout a seurté sera Car tant comme chascun leans dormira Tu me pourras secretement loger En quelque lieu ainsi que avisera Ta prudence pour mon mal mitiger

Et quans prouffis pourront de ce venir Je espoire assés que ton sens et prudence Pevent en appert ce voir & bien choisir Car c'est chose qui est en evidence De ta maison l'onneur par sapience Tu garderas & l'infamie hors mise Qui couverte est n'aura quelque apparence Ta cousine sera en vie soustinse

Menelaus sa femme retiendra Par ces moyens ne si fort dommageux Ne lui sera quant bien on l'entendra Que je qui suis de lucresse amoureux Puisse au desceu de tous les faulx jaleux Avec elle coucher par une nuyt Que qu'el coure par amour furieux Au veu de tous aprés moy faisant bruyt

En me suivant perdroit tout son honneur Car se aprés moy qui suis noble & puissant Venir vouloit pour sa grande chaleur Refrigerer jusques chiés moy suyvant Quel deshonneur auroit le triumphant Renom de tout vostre noble lignage Le peuple yroit de ce tresfort riant De autre chose on ne feroit langage

Et ne viendroit pas cela seulement Au deshonneur des parens amis Mais a note perpetuelement De la cité ainsi que m'est avis D'infamie a tousjours seroit mis Quelque chapeau que oster on ne pourroit A ces causes pour que tout soit remis A nostre amour obtemperer on doit

Aucun pourroit par aventure dire Que mieulx vauldroit tuer par ferrement Ceste femme ou par venin lui nuyre En l'estaingnant assés secretement Que permettre qu'el face aucunement Chose qui soit infame ou impudique Car on pourra assés legierement La despescher sans macule publique

Mais tout mal eur & malediction Vienne sur cil qui ses mains souillera En sang humain par vindicacion Et pour moindre peché que aucun fera Par trop plus grand vengence requerra On doit les maulx apetisser non croistre Le chascun scet qui bien regardera Faire ce doit tant ou siecle qu'en cloistre

Et bien savons que devons des deux biens Celui qui est plus excellent eslire De mal et bien par bons & sains moyens Le bien choisir: le mal laisser & fuyre Mes de deux maulx celui qui peut moins nuire Prendre devons: danger par tout y a Ce neantmoins la voie que monstre a suyvre Moins de peril aux amans portera

Par ce moyen non pas a ton lignage Porter prouffit seulement tu pourras Avecques ce me feras avantage Et grant prouffit que pas tu ne perdras Car crucié je suis n'en doubte pas Quant je apperçoy que pour cause de moy Lucresse meurt sans plaisir ne soulas Aucun avoir de ce douldre me doy

Et en effect nous sommes la venus Que si ton art et engin curieux Ne gouverne la nef ou contenus Sont les amans par moyen tressongneux Espoir ne voy de salut si m'aid dieux Nostre secours/ aide & reconfort Est en tes mains situé se tu veulx Pour nostre nef conduire & mettre a port

Aide nous donc elle & moy nous metton Entre tes mains pour nostre fait conduire De macule conserve ta maison Fay que puissons nous esbatre & deduire Que soie ingrat ne fault penser ou dire Tu congnois bien la grande auctorité Qu'ay en la court de cesar nostre sire Ce n'est fable mais pure verité

Tout ce de quoy requerre le vouldré Pour et ou nom de toy sera parfait Je te promés que tout bien absouldré Je t'en baille ma foy c'est assés fait Mais plus y a car par real effect Je te feré conte palatin estre Bien desservi te sera ton bien fait On te verra en bien fleurir et croistre

De ce tiltre conte palatin A tousjoursmés jouyra ton lignage Pour tant sur tout soit au soir ou au matin Te recommand lucresse la tressage Si fay je moy et oultre de avantage Nostre loyal amour & bon renom Aussi l'onneur de ton noble parage En ta foy soit garde & protection

De tout te fay juge/ arbitre & moyen Tout est en toy tout peulx faire ou defaire Je te supply par tout regarde bien Tout peulx saulver ou perdre du contraire Lors pandalus quant eut ouy l'affaire D'eurialus a soubzrire se print Quelque petit de pause voulut faire Puis a parler ce que ensuit entreprint

Euriale dist pandalus je avoie Bien entendu des pieça cest amour Et te promet et jure que vouldroie Que ce ne fust avenu quelque jour Mais ainsi qu'as recité sans sejour La chose est ja en tel train parvenue Qu'il me convient trouver façon & tour D'acomplir ce qu'as dit d'une venue

Necessité de ton vouloir parfaire Si me contrainct se ne vueil mon lignage Estre a jamais infame sans retraire Et d'infamie estre mis au servage Contumelies/ scandales davantage De la venir pourroient bien je l'entens Maulx infinis en viendroient c'est l'usage Ce que eviter a mon povoir pretens

Je congnois bien que lucresse est brulee Du feu d'amours ainsi qu'as recité Elle n'est point de soy dame trouvee Se el n'a secours je croy en verité Qu'el se occira par grand crudelité De aucun glaive ou quel se jettera Des fenestres embas se humanité Ne la secourt bien brief tout gastera

De sa vie el n'a cure ne soing De son honneur encor moins on le voit Evidemment: son grief mal et besoing M'a descouvert autant qu'as cy endroit J'ay resisté: & la cuidoie au droit Sentier tousjours ramener & reduire En l'increpant ainsi que droit vouloit Mais son propos elle veult tousjours suyre

J'ay essaié par moyens et tendu A refroider sa grant chaleur extreme Mais de certain j'ay en vain pretendu Et sur ce point ay failly a mon esme Pale/ foible devenue est et blesme Tout desprise vivant en grand esmoy Il n'est sirop/ brevage ne cyroisme Qui reconfort lui donne fors que toy

Tousjours tu es en son courage escript Mis & posé tousjours el te demande Toy desirant comme paint et inscript Seul sans autre en son cueur de tresgrande Affection elle veult que je pretende La guerison de son mal importable A l'une fois m'appelle puis commande Mais tousjours fait de toy quelque notable

Euriale escoute je te prie Ceste femme est par amour changee En tel façon que on peut je t'affie Dire qu'elle est muee et estrangee D'une façon en l'autre transmuee Ha grant pitié & grant douleur me tient Quant sa vertu ainsi voy commuee De bien en mal: de rien ne me souvient

En la cité n'avoit plus chaste femme Plus prudente sans doubte que lucresse Que nature si excellente dame Au dieu d'amours a vertu et prouesse Si grandz donné que soudain sans peresse Peut es pensees des humains resider C'est merveille: grant puissance & noblesse Lui a donné pour plus hault presider

A ce grief mal convient trouver secours Combien que autre remede je n'y voy Que celluy que as trouvé c'est le recours Mon plain devoir en ce cas je feray Quant il sera temps je te appelleray Grace ne vueil salaire ne loyer De homme de bien l'office com je croy N'est salaire prendre sans meriter

Mais a la fin que je puisse eviter L'infamie que sur nostre famille Pourroit tumber vueil experimenter Bon remede par voye assés subtille Et s'il avient que ce te soit utille Pour ce ne vueil quelque loyer avoir Il me suffist que par façon abille Puisse a vos maulx ainsi que entens pourvoir

Eurialus respondit a pandale Voy cy le bien et grace que en auras Car quoy que soit qui qu'en sermonne ou parle Conte/ soys seur palatin tu seras Se tu me crois pas ne refuseras La dignité car elle est belle et haulte Tousjours de plus en plus te esleveras Mais je te pry que a ce fait cy n'ait faulte

Lors pandalus a euriale dist La dignité je ne vueil reffuser Mais bien vouldroys que ce pas ne venist Par ce moien s'on povoit aviser Liberaument que on la me peust donner Sans quelque esgard avoir a ce fait cy Je ne vouldrois honneur habandonner Ce que ferois quant il seroit ainsi

Se estre povoit que j'eusse a ton deceu Par mon labeur et diligence faict Que tu eusses sans en avoir rien sceu De lucresse tant a ton plaisir faict Plus voulentiers eusse le tout parfaict Ce neantmoins le possible feray En faisant tant que joyeux et refait Te trouveras sur ce a dieu te diray

Eurialus dist a dieu de sa part Telz parolles a pandalus disant Puis que tu m'as par ta science et art Le courage rendu fay en faignant Treuve moiens en bien dissimulant Que nous soions assemblés et unis En quelque lieu ne soies delayant De lucresse me bailler vis a vis

Pandalus lors a euriale dist Ne te soucye car joyeux tu seras Grande joye en son cueur est et gist Disant a soy de quoy te soucieras Puis que l'amour d'ung si grant homme as Il esperoit conte palatin estre Plus desirant ce avoir n'en doubtés pas Que moins semblant monstroit le vouloir estre

Aucuns hommes sont aux femmes parelz Lesquelles ont telle condicion Quant on leur dit plaisir faire veilles Elles en feront lors denegation Mais c'est a lors qu'ilz ont devocion De parfaire ce dont elles sont requises De pandalus tel fut l'afection Par manieres et faintises exquises

Pandalus eut de macreau le salaire Bien tost aprés fut conte palatin De noblesse pour mieulx le tout parfaire Les ornemens receut a ung matin Ce fut assés tiré pour ung hutin Sa lignee en est magnifiee Portant habis de veloux et satin Aux plus nobles par tout parifiee

En noblesse plusieurs degrés y a Et qui vouldroit de noblesse querir L'originel naissance on trouvera Comme je croy se on veult bien enquerir Que on ne sauroit trouver ne requerir Noblesse tant soit vieille de parage Au moins bien peu que on ne treuve venir Et proceder de peché ou de oultrage

Et comme ainsi soit que nobles tenons Ceulx qui les biens du monde ont a monceaulx Et que a tart les vertus nous voions De richesses compaignes que dirons De noblesse la principe pourrons Estre en tous lieux veu tresadulterin Degenerant de vertu/ ce povons Par chascun jour voir au soir & matin

Par usures est l'un devenu noble Riche et puissant et l'autre par pillage Et par traisons et poison tresinnoble Par flateries pathelins coquillage Adulteres macrelleries bagage Par bien mentir et toutes voies obliques De la viennent a plusieurs avantage Noblesse estas et par autres trafiques

Et les autres de leurs femmes houliers Sont pour avoir richesses sophistiques De leurs filles le sont a grans milliers Plus que bourreaux infaitz par telz pratiques Et les autres leurs atins et apliques Pour les aucuns occire ont tendus Charchans avoir richesses redupliques Par faulx moiens par la loy deffendus

On trouveroit a peine homs qui peust Grans richesses justement assembler Et ne vit on oncques faucheurs qui eust Faulx tresample que pour tout arrabler Toutes herbes recueillir et trencher Grans richesses assemblent les mondains Sans d'ou viennent penser ne regarder Fors au nombre/ se sont les communs trains

A toutes gens est plaisant ce vers cy Dont tu ayes nul fait question Avoir convient de ce ont peine & soucy Par pillerie ou faulse paction Ilz boutent hors loy/ foy/ devocion Pour amasser et devenir puissans Quant de ducas auront plaine maison Nobles seront riches & triumphans

Mais noblesse par ces moiens aquise Est le loier de leur iniquité Et se tout bien je remembre et avise Mais ancesseurs ont de nobilité Nom et armes de long temps aporté Pour ce esparner eulx ne moy ne vouldroye Je ne les croy meilleurs avoir esté Que les autres quelque excuse qu'i voye

Antiquité seulement les pourroit Aucunement excuser pour qui sont Hors memoire de plusieurs on le voit Car on ne scet dont telle noblesse ont Voycy de ce mon opinion donc Nul n'est noble s'il n'aime les vertus Le plus noble de sang les pechés font Devoir estre villain dit et sentus

Je ne loue vestemens d'or ne chiens Ne grans chevaux ne de servans grant suite Les grans convis garnis de mes & biens Les haulx palais villes ou l'en habite Fermes/ estangs/ haulte moyenne justice Parcs/ et forests/ garennes ne prairies Puis que homme fol les peut par injustice Toutes avoir par ses grans pilleries

Et se aucun dit que tel est noble & digne Je vous promet que cil qui ce dira Doit & sera reputé fol indigne Par cil qui bien la verité visera Nostre mignon pandalus en fera A tous la foy qui par son macrelage Fut conte faict par ce bien infera Que fol estoit devenu et peu sage

Bien peu de temps aprés ce que dit est Les laboureurs et fermiers du mary De lucresse eurent quelque interest Noises debas menelaus marry Fut grandement en son cueur espeury Car on luy dist que aprés boire ilz avoient Quelque un d'entre eulx navré tué murtry Aller convient veoir comme ilz le faisoient

Et pour iceulx apaiser fut besoing Que ce mary menelaus allast Par devers eulx car de ce avoit soing Lucresse lors comme se bien soignast De la santé du mary et pensast Le captiver luy a dit qu'il estoit Grave foible que cheval qui trotast Dorenavant pas bon ne luy seroit

Elle luy dist mon amy empruntés Pour aller hors aucune hacquenee Aux assistens il dist par tout sentés Et que aucune me soit tost empruntee Pandalus dist je croy que en la contree On ne pourroit meilleure recouvrer Pour doulx aller mieux passant ne acoutree Que une que ay veu a eurial mener

Et si te plaist je la te emprunteré Menelaus respond que c'est bien dit Eurialus ne dist pas non feré Ains commanda que plus tost fait que dit On amenast sans quelque contredit La haquenee signe de joye receut Car a par soy secretement a dit La besongne mieulx avenir ne peut

Menelaus ce plaisir bien te vueil Sur ma beste com je voy monteras Mais qui que en ait despit feste ne dueil Ainsi que mon cheval chevaucheras En ta maison quant parti tu seras Ta lucresse pour toy chevaucheré De ce marry estre ne deveras Ce que ne peus parfaire acheveré

Apointé fut que eurialus vendroit A cinq heures en la rue devant l'uys Se pandalus chanter lors il oyoit Signe seroit qu'il auroit bonnes nuys Menelaus estoit desja partis Les tenebres de la nuyt aprochoient Du ciel c'estoient les clertés departis Par les rues peu de gens tournoient

Lucresse estoit sur son lit attendant Que son amy eurialus venist Qui devant l'uys estoit ja tournoiant Et ne faisoit que atendre que on luy fist Le signe ainsi que pandalus predist Chanter ne ouoyt ne cracher l'expectant L'eure passoit achates lors luy dist Alon nous en de toy se vont gabant

Il estoit dur de partir a l'amant Et maintenant il charchoit une cause De demourer l'autre cause querant Il delayoit le partir faisant pause Car de chançon ne oyoit verset ne clause Pour pandalus qui le frere doubtoit De ce mary tenant la maison close Entierement sur lucresse guettoit

Les entrees/ portes/ fenestres/ huys Tenoit serrees ce frere sans doubtance De regarder par tout il estoit duys La nuyt passoit sans dormir par plaisance Quelque labeur qu'endurast ou souffrance Ne lui chaloit mais que bon guet il fist De ce avoit pandalus desplaisance Qui par couroux telz parolles lui dist

Nous yrons jamais en ceste nuyt Coucher vecy trop veillé se me semble L'eure passe il est aprés minuyt Dormir me prent tant que mort je semble Quant j'ay pensé toutes choses ensemble D'une chose me vois esmerveillant Que a ung viellart ta nature ressemble Et si es tu jeune et gentil galant

Les vieilles gens esquelz humeur default Dormir ne pevent trop consumé en eulx Est radical humeur doubter n'en fault Quant vient le jour lors sont fort sommilleux Quant on se doit lever ilz cloent les yeulx Dormir veulent c'est leur propre nature Trop ressembler ainsi que voy leur vieux Contre raison pas n'est ta nourriture

Alons doncques dormir je te supplie Que valent tant de vigiles et soings Lors le frere lui dist puis qu'il t'ennuye Alons coucher mais premier est besoings Que les portes de verroulx & de coings Soient barrees pour que mauvais larrons Ne surviennent mettre y convient les poings Et puis aprés coucher nous en yrons

A la porte tout droit il s'en ala L'une et l'autre serreure mist apoint Et la barre de l'uys il abilla Une barre de fer vit sur ce point Que a grant peine deux homes en pourpoint Eusse levé: de ce barrer vouloit L'uys ja soit que on ne l'en barrast point Ou paravant fermer il l'en cuidoit

Mais quant il vit que trop pesant estoit Et que lever de terre ne la peut A pandalus dist que s'il lui plaisoit Il lui voulsist aider mais il ne veult Eurialus tout cela oyt et sceut Disant c'est fait se la barre est levee De paour qu'il a le cueur lui tremble et deult Car la porte trop eust esté clouee

Lors pandalus lui dist: que veulx tu faire Il peut sembler que on te veult assiger De tant barrer n'est chose necessaire Car en cité sommes ou n'a danger Qui te viendra en ce lieu oultrager Ou nous avons paix/ repos a plaisance Nostre ennemy florentin deloger Ne te viendra: loing fait sa residence

Et se tu crains les larrons trop est l'uis Barré aussi si les ennemis sont En la ville faire chose ne puis Qui te puisse saulver ilz te prendront En la maison barriere froisseront Si sage es l'uis ainsi laisseras Quant de ma part les barres demourront Aide de moy sur ce aucune ne auras

Les espaules me deulent griefvement Et suis rompu du bas pour quoy ne puis Chose lever ne moy aucunement A fais porter efforcer dont je suis Tresdesplaisant et se jamais cest huis On ne povoit barrer tant que de moy Ce gros barreau de fer y fust assis Tousjours ainsi demourroit par ma foy

Fy de telz gens dist ce frere a pandale De la tout droit dormir il s'en ala Eurialus qui morfondu et pale Sur le pavé estoit ne se bouga Ains dist de vray que une heure la sera Pour escouter se aucun ouvrira l'uys Son compaignon a qui moult ennuya Le mauldisoit tout bas et vis a vis

Et ne tarda pas longuement aprés Que eurialus par la fente de l'uys Vit lucresse qui s'approcha plus pres Au devant vint comme entendre je puis A travers l'uys lui a dit bonnes nuys Vous envoit dieu ma doulce amie lucresse Espantee fut de fuir eut avis Puis s'appensa de demander qui esse

Eurialus a sa dame & maistresse Lors respondit c'est vostre amy loyal Eurialus: mon cueur et ma liesse Ouvrés moy l'uis j'ay esté cy aval Sur le pavé toute nuyt ou moint mal Froit et douleur ay souffert sur mon ame Ouvrés moy l'uis par vouloir cordial Je vous requier & supplie ma dame

Lucresse bien la voix de son amant Lors entendit mais doubtant la faintise El n'osa pas son huis ouvrir devant Que secretes enseignes el avise Aux deux amans congneues selon leur guise A grant labeur les serreures ouvrit Toute vertu/ sens & puissance a mise A deffermer ce que l'autre clouit

Mais pour ce que les portes si estoient De plusieurs gros ferremens touroullees Et que les mains fermement n'avoient Pas puissance: des choses bien serrees A plain ouvrir elz furent deserrees A demy pié d'ouverture ou viron A lucresse furent lors conferees Doubles vertus pour loger son mignon

Quant eurial apperceut l'ouverture Qui estroicte et peu patente estoit Dist je mettray mon corps a l'aventure Et en entrant il mist son costé droit Son corps gresle/ gent et mignon estoit Mais de trop plus le fist gresle et habile Dedens entra amours lors lui aidoit A vrais amans n'est chose difficile

Il embrassa tresamoureusement Sa plaisance/ sa dame et sa liesse Dehors se tint achates longuement Faisant le guet qui moult au cueur le blesse Entre les bras d'eurialus lucresse Fust de crainte ou de joye se pasma Elle devint presque morte en la place Pale/ blesme sans parler demoura

Les yeulx avoit clos la plaisant lucresse Et de tout point a morte ressembloit Et n'y avoit de vie quelque adresse Fors la chaleur et le poulx qui mouvoit Eurialus qui ainsi la tenoit Tout espanté fut du cas de fortune Et ne savoit que faire lors pourroit Il povoit bien adonc conter pour une

Se je m'en fuy disoit il on dira Que de sa mort seray cause et diront Qu'en tel peril nul ne contredira Ne la devois laisser c'est ung mot ront Se je arreste les varlés qui ceans sont Me trouveront je suis de toutes pars Triste & perplex scandale me feront Je periray par coups d'espee ou dars

Ha fol amour tant tu es maleureux Plus as d'amer fiel que de doulceur L'absince n'est si amer si m'aist dieux Comme tu es trop m'as fait de rigueur En quans perilz & dangiers par foleur M'as tu ja mis et offert en mains lieux Et a quantes manieres par fureur De mort m'as tu livré jeunes & vieulx

Se seulement respit comme j'entens Que entre mes bras rendisses pale & morte Celle de qui toute ma joye j'atens Que ne m'as tu occis devant la porte Plus tost que ainsi par tresestrange sorte Tout mon plaisir et joye esvanouir Ou a beste cruele dure et forte Comme ung lion livré pour moy gloutir

J'eusse de trop plus voulentiers amé En son giron mourir et trespasser Que son gent corps entre mes bras pasmé Fust en ce point pour ceste vie laisser Amour vainquit l'amant car delaisser Ne la voulust quelque dangier qu'il vist Mieulx eust amé de ceste vie passer Que abandonner celle ou tout son cueur gist

Il la levoit sur bout a sa puissance En la baisant de lermes l'arousoit Et lui disoit mon bien ma souvenance Tout mon plaisir ce que dire on pourroit Ou estes vous ouvrés icy endroit Vos oreilles que ne respondés vous Que ne ouyés vous ce que mon cueur conçoit De deul & pleurs tout pour l'amour de vous

Ouvre les yeulx regarde ton amant Ma volupté ma plaisance ma joye Je te supply regarde moy devant Que je meure se ainsi est que je doie Mourir icy avec toy que je soye D'un ris tout seul de ta bouche esjouy D'un petit ris tel que avoir le souloie Devant ma mort seré tout resjouy

C'est ton amy eurial qui cy est Cil proprement qui te tient embrassee Je me esmerveil ou ton cueur present est De ainsi estre dois estre lassee Helas mon cueur/ mon confort/ ma pensee Es tu dehors ou si tu dors ainsi Ou pourroy je te trouver si passee Une fois es/ mourir me fauldra cy

Se ainsi estoit que eusses ferme propos De ainsi mourir et venir a la mort Tu povois bien cela com je suppos Me reveler affin que par accord Je me feusse avec toy pour confort A mort livré c'estoit ma destinee Autre secours/ remede ne confort N'eusse charché pour femme qui soit nee

Se tu ne veulx mes paroles ouir De mon glaive bien fourby et trenchant Le mien costé tu me verras ouvrir Nous deux aurons une mort depeschant Ha ma vie ma doulceur que ayme tant Mes delices et ma seule esperance Tout mon repos et mon bien accroissant Mourras tu cy sans aucune allegance

Ouvre les yeulx leve le chief en hault Pas encores n'es morte comme je croy Je regarde que as le corps encores chault Et que aspires l'air en tirant a toy A quoy tient il que ne parles a moy M'as tu mandé pour telle chere me faire Sont ce les joyes que avecques toy reçoy Me donras tu nuyt si aigre et contraire

Mon seul repos lieve toy promptement Et regarde ton loyal amoureux Ton eurial et ton alegement Qui te tient cy transi et douloureux Quant eut ce dit un fleuve de ses yeulx Abundamment de lermes descendit Dessus le front de lucresse amoureux Et les temples toutes moullees rendit

Et tout ainsi que se on eust d'eaue rose Front et temples arousé doulcement Aussy comme en grief dormir enclose Se resveilla et tresbenignement Sur son amy elle getta son voyement Helas dist elle mon amy quelle part Puis je avoir esté si longuement Comme si mort m'eust frapee de son dart

Que ne m'as tu icy laissé mourir Entre tes bras ce m'eust esté plaisant Bien euree on me auroit peu tenir Se entre tes mains mon esperit languissant Eusse rendu sans estre deloiant Ains que fusse de avec moy departi Car le depart me sera moult poingnant Et ou glayve de la mort converti