Le Courtisan à la mode, selon l'usage de la cour de ce temps, adressé aux amateurs de la vertu.
Reading edition
Ces valeureux courtisans qui font estat d'avoir veu le monde, et comme les perroquets parlent divers langages: quant à moy, je n'estime pas dire avoir veu le monde, de regarder des bastimens de terre et des eaux, combien que cela serve.
Mais quand je dis avoir veu le monde, j'entends cognoistre la manière de vivre des nations, les proprietez et singularitez particulières qu'ont les unes et les autres; ce que l'on peut taire quelquefois sans aller loing et faire des courvées.
Il faut seulement, se trouvant en quelque ville celèbre, frequenter des personnes de nations diverses, faisant profit de leurs actions et discours, et remarquer curieusement ce qui est digne de recommandation.
Et cela est tout ce qu'ils ont retenu et sçavent faire.
La France, plus que province du monde inconstante, grossière d'inventions, en produict et enfante tous les jours de nouvelles. L'un des plus illustres personnages de ce temps, parlant du mignon François.
. . . . . . . . . . . Qui Guenon affecté Des estrangères mœurs cherche la nouveauté, Et ne müe inconstant si souvent de chemise, Que de ces vains habits la façon il deguise.
C'est bien pis au temps où nous sommes, auquel l'on porte la barbe poinctüe, les grandes freizes, les chapeaux hors d'escalades, et d'autres en preneurs de taupes, l'espée la poincte haute, bravant les astres, et crains encores à l'advenir un plus grand debordement de mœurs et humeurs, chose beaucoup plus dangereuse que la superfluité des habits: ce qu'apprehendoit ce poëte liricque.
Pourquoy nous mocquons-nous d'Hercule quand nous lisons qu'il prit l'habit d'une servante, sinon pour ce qu'il avoit laissé son cœur d'homme et avoit prins celuy de femme, et tant qu'il fut vestu de cet habit, il ne sceut que porter la quenoüille.
Ainsi plusieurs de nos fendeurs de nazeaux qui ont commencé parmy les nations estrangères sans avoir exercé l'art militaire, ne sçavent faire acte de vaillance, quelque morgue qu'ils facent, et la response que fit la belle Heleine à ce mignon et damoiseau Paris leur est fort convenable, lequel persuadant de le suivre à Troye, et luy raconter les braves exploits de guerre, elle le voyant sans armes, ains poupin mignonnement frizé et coiffé de son amour luy dit:
Et parce que ceste galante response est digne de remarque, et que les dames de la Cour en facent leur profit pour gausser en ces genereux cavalliers, j'ay mis ces vers françois:
Quant à vos preux et vaillans faicts Dont vous tenez si grand langage, Je le crois, mais vostre visage Ne me semble point si mauvais: Vous estiez nay mieux pour les femmes Que pour les armes et debats. Laissez aux autres les combats, Mignons, faictes l'amour aux dames.
Je ne tance point par ces vers les braves guerriers et genereux enfants de Mars, qui, pour estre amoureux de la belle Venus, ne laissoient de se trouver aux lieux d'honneur, et faire leur devoir à la guerre.
Il voudroit mieux les imiter en ce qui est de vertueux et louable, non-seulement en eux, mais en toutes les nations du monde: car nous devons, sans distinction de personnes, sexes et qualitez, naturaliser la vertu estrangère.
Où, entre autre chose, l'on voit toutes les nations despeintes en leur naturel, avec leurs habits à la mode des pays, hormis le François, qui est despeint tout nud, ayant un rouleau d'etoffe soubs l'un de ses bras, et en la main droicte des cizeaux, pour demontrer que de toutes les diversitez de l'univers il n'y a que le François qui est seul à changer journellement de mode et façon, pour se vestir et habiller, ce que les autres nations ne font jamais.
Voilà, amy lecteur, ce que pour le present j'ay tracé pour un petit racourcissement sur ma toille le portrait de l'un des plus parfaits courtisans à la mode, lequel pour un peu de temps s'est absenté de la Cour au subject que ses amours n'alloient selon sa volonté, et pour en faire paroistre les vifs ressentimens, je te feray part de ce qu'il a faict sur son depart.
La retraicte du courtisan à la mode.
Que j'ayme l'air des champs! j'y voy en mille endroicts, Et tout premier object, la nature en son estre; Je voy d'un franc desir ceste trouppe champestre Reverer la justice et honorer les roys. Les petits bergerots, d'une contente voix En chantant, le matin meinent leur troupeau paistre; Leur père seul leur sert et d'escolle et de maistre, Pour suivre mesme trace et vivre en mesme loix. Heureuses bonnes gens, ainsi loing de nos villes, Loing de l'ambition, loing des murs inutiles, Loing des traicts de la Cour, pleins de fidelité. C'est un theatre ouvert pour jouer les misères. Chacun tourne le voille au cours des vents prospères, Et jamais nul n'accorde à la felicité.
Stances Sur l'adieu d'un courtisan de ce temps à sa maistresse.
Je cherche le plus sombre au fond de ces forests Pour pleurer mon absence, et contre mes regrets: Car je ne puis chasser de ma triste pensée La fortune, bon heur de mon aise passée. Comme droict au soleil regarde le soucy, Mon œil trop amoureux, qui se desplaist icy, Jettant mille souspirs, à toute heure se tourne Du costé de la France, où ma Blanche sejourne. Je croy pour me tromper qu'ayant les yeux tournez Sur le beau paradis des amants fortunez, Que mon cœur se soulage, et qu'une douce flame, Compagne de l'amour, vient contenter mon ame. O jardins compassez de mille lauriers verts! Beaux vergers fructueux, où je couche à l'envers! J'ay moderé ma peine et ma douleur charmée Au giron bien-aymé de ma deesse aymée. Cabinets derobez, et vous petits destours, Où nous prenions l'escart pour conter nos amours, Lorsque sur le tapis de l'herbe la plus molle Mille mignards baisers nous bouschoient la parolle, Doux paradis d'amour si souvent frequentez, Combien depuis six mois je vous ay regrettez! Mille fois tous les jours dans mon cœur je vous conte Le malheur qui me tue, et le mal qui me dompte. Las! vostre souvenir ne me sert seulement Que d'augmenter ma peine et doubler mon tourment Car ce fort sentiment, loing du bien qu'on desire, Au lieu de l'appaiser, augmente le martyre.
Fin.
