Sermon du Cordelier aux Soldats, ensemble la responce des Soldats au Cordelier, recueillis de plusieurs bons autheurs catholiques.
Reading edition
Lisez hardiement, car il n'y a pas d'heresie.
A Paris, imprimé par Nicolas Lefranc, demeurant vis-à-vis les Cordeliers.
M.DC.XII.
In-8[312].
Sermon du Cordelier aux soldats.
Un cordelier tomba entre les mains D'aucuns soldats, non pas trop inhumains, Qui luy ont dit: Frère, qu'on se despeche: Fay nous icy quelque beau petit presche Pour resjouyr la compagnie toute. Le cordelier, qui leur parler escoute Sans s'estonner, ne leur refusa poinct, Et pour prescher commença en ce poinct: Je ne sçaurois assez vous collauder. Messieurs, dit-il; je veux bien asseurer Que vostre train, pur, innocent et munde, A cil de Christ ressemble estant au monde. Premièrement, il hantoit les meschans: Sy faictes-vous, et les allez cherchans; Il ne fuyoit les noces et banquetz: A table on oit nuict et jour vos caquetz; A luy venoient paillards et publicains: Avecques vous sont tousjours les putains; En croix pendu fut avec les larrons: En tel estat de bref nous vous verrons; Puis vous sçavez qu'aux enfers descendit: Vous aurez bien un semblable credit; Il en revint, puis au ciel s'envola: Mais vous jamais ne bougerez de là. Voilà sans faute, en oraison petite, De vostre estat la louange deduicte.
La Responce des Soldats.
Ces bons soldats, ayant bien escouté Du cordelier le sermon effronté, L'un print propos, disant en ceste sorte: Heu! compagnons, que nul ne se transporte Hors de ce lieu tant qu'auray respondu Au bon sermon de ce moine tondu. Escoutez tous. Premierement, il dict Que les meschans ont vers nous grand credit.
Confesser faut que sommes mal vivans, Que la plupart de ceux qu'allons cherchans Aussi pour nous nous montrent les effects De ce en quoy l'on nous tient pour suspects.
Epilogue.
Mais, pour chasser toute melancolie Et resjouir la bonne compagnie, Sus, sus, soldats! chantons joyeusement Ces beaux huictains que nous apprit Clement, Je dis Marot, qui le pot descouvrit, Dont ces cagots creveront de despit.
Pause.
Voulez-vous voir un homme honneste? Attachez-moy une sonnette Sur le front d'un moine crotté, Une oreille à chaque costé Au capuchon de sa caboche: Voilà un sot de la basoche Aussi bien peinct que sçauroit homme Depuis Paris jusques à Rome.
Sainct François a suyvi la trace (Ce dict des Cordeliers la race) De Jesus-Christ, et contrefaict Tout ce que Jesus-Christ a faict, Et ne s'est trouvé en ce monde Qu'un sainct François qui le seconde. Jesus-Christ fut bien povre icy, Et sainct Françoys le fut aussy, Qui nous delegua sa besace. Jesus-Christ seul, à sa menace, Fit taire les vents et les eaux, Nostre sainct François les oyseaux. Jesus-Christ repeut cinq mille hommes, Et sainct François, à qui nous sommes, En entretient par son secours Plus de dix mille tous les jours, Gras, enbonpoinct, sans s'entremettre De mestier où la main faut mettre. Jesus aux enfers devala: Saint François aussi y alla. Jesus-Christ est monté en gloire, Emportant d'enfer la victoire: Ils sont differents en ce poinct, Car sainct François n'en revint poinct.
