Here foloweth ye applycacōn of ye example to purpose.

T[h]enne sayd the Emperours sone, lorde haue ye vnderstande what I haue sayd. Themperoure sayd ryght well. Tho sayd the sone, My mooste honourable ⁊ redoubted fader, all thoughe y^t god hathe gyuen ⁊ indued me w^t wysdome ⁊ vnderstandyng aboue many other, y^t sholde not be in appayrynge of youre honoure ⁊ myght, but more for the preseruacyon of the same. So in lyke wyse y^e kynges maieste which was no thynge to y^e hynderaunce of his fader, but rather for his worshyp ⁊ proufyte, for as long as they lyued they were honoured in his realme. Than sayd themperoure, My dere sone I wyll all hole resygne to you thempyre too gouerne, for I perceyue well by youre narracōn y^t ye haue to me declared, y^t it is beste to me ⁊ moost for myn ease y^t I leue this besynesse ⁊ labour ⁊ take me to more reste, for I am olde ⁊ feeble. The sone answered his fader, My lorde fader, so shall it not be, but as longe as y^e lyue y^e shall haue the auctoryte and myght of thempyre to do and commaunde as it apperteyneth vnto an Emperour, but in all besynesses y^t are labourouse I wyll alwayes be redy to mynystre ⁊ to serue you accordynge to my dute.