Cy c'ensuit le mirouer de dames et damoiselles et l'exemple de tout le sexe femenin

Mirés vous cy dames et damoiselles Mirés vous cy et regardés ma face Helas pensés se vous estes bien belles Comment la mort toute beauté efface

Je fus jadis tant belle et tant plaisante Que de beauté j'estoie l'exemplaire Et ores suis tant laide et desplaisante Que plus desplais qu'oncques je ne peus plaire

Las et que sont maintenant devenus Les beaux cheveux de mon chief atourné De l'orde terre estoient tous venus Et en terre s'en est tout retourné

Las comment sont mes beaux ieulx vers changés Et de ma face aussi tout le surplus Las tellement les ont les vers mangés Qu'on n'i voit plus que les partus sans plus

Las advisés hors ma face et dedans Qui jadis fut tant belle et coulouree Laissé n'i ont le vers fors que les dens Las bien peu m'est ma beauté demouree

Las je souloie aussi droit q'une tour Avoir le col plus blanc que lis et beau Environné d'ung collier d'or autour Et maintenant plus noir est q'ung corbeau

Las maintenant qu'est aussi devenue Ma poitrine tant blanche et tant refaite Las qui la voit maintenant toute nue Horreur en a tant est laide et deffaite

Las et ou est la beauté de mes mains Aornees de diamens richement Las et ou sont pour denser soirs et mains Mes piés polis chaussés mignotement

Las ors souloit mon corps estre tenu Tant bel et gent et souefment nourri Et maintenant qui l'advise tout nu Conte n'en fait ne que d'un sac pourri

Las de draps d'or de damas et de soye Jadis souloie estre toute couverte Et maintenant fault que d'une serqueul soie Envelopee et demi descouverte

Las je souloie estre jadis d'ermines Toute fourree et de fins menus vers Et maintenant je porte les vermines Et me rongent les gros et menus vers

Las je souloie avoir mes beaulx logis En hauls palais chambres et lis parfons Et en ung coffre a present desclos gis Desoubz la terre ou les vers sont au fons

Las je souloie avoir si grant demainne Possessions terre et revenue Et ores suis par mort qui tout amainne Tant miserable et povre devenue

Las j'avoye du temps que j'estois vive Si grant renom et domination Et maintenant si petit n'est qui vive Qui n'ait de moy abhomination

Las fortune jadis tant me prisa Que des prisés estoie en tout prisee Et par la mort qui tout mon pris prins a Des desprisés suis ore desprisee

Las près de moy jadis on se tenoit Et maintenant chacun de moy s'eslongne Ma grant beaulté chacun veoir venoit Et on me fuit comme une orde charongne

Las remirez qu'après respas serés Ne plus ne moins mon fait le vous figure Et recordés que vous trespasserez Et porterés comme moy la figure

Las tant belle m'avoit faicte nature Que ma beauté les cueurs des beaulx perçoit Et ores n'est si laide creature. Qu'il n'est horreur si tost qu'il m'apersoit

Or est toute ceste beauté passee Plus tost que vent en ainsi peu d'espace Et tout acoup suis jeune trespassee Et perdue se dieu ne me fait grace

Las de beauté que j'ay peu nommer ci Que perdue ai ne du corps soubz la lame Ne me chault ja se dieu me fait merci Si que sans fin n'en soit perdue l'ame

Mais c'est pitié quant pour joie si briefve On pert des cieulx la gloire en ung moment Pour estre en dueil tousjours dont plus en griefve Ung jour que si deux cens jours de tourment

Que vault honneur doncques qui tant peu dure Que vault estat qui si tost devient cendre Que vault plaisance en corps si plain d'ordure Que vault monter pour si tost bas descendre

Que vault pompe ne bruit qui si tost fault Las mieulx vauldroit le moien estat prendre Puis qu'on sçait bien qu'en la fin il en fault Tresestroit conte au juste juge rendre

Las et ou sont celles qui piessa furent Dont les beautés raconte mainte histoire Judich hester qui tant grant beauté eurent Dont mention fait la bible et memoire

Las et ou sont de helaine et lucresse Les grans beautés et de sidoine aussi Faillies sont et mortes en destresses Passé long temps et vous mourrés aussi

On me souloit nommer maistresse et dame Et plaisir faire et service jadis Et maintenant je ne saiche au monde ame Qui dist pour moi ung seul de profundis

Helas pourtant vous qui regnés sur terre Dont après mort on ne fera plus conte Vivés si bien devant qu'on vous enterre Qu'après mort vifs dieu en sa court vous conte